حكايتنا الليلة السعد_والعقل
السعد والعقل تلاقوا كانهم زوز من الناس كل واحد يقول اني خير من التاني وديمة يتعاركوا وكل واحد يشكر في روحه
وفي يوم هما الزوز خاطمين يشوفو في واحد عربي يحرث في الارض لابس سورية بايدة عاللحم ومعبية رقع وطاقية شكلها لجده وارثها قديمة وسوداء من العرق.. قالوا السعد والعقل خلي نجربوا روحنا علي هالعربي هذا ونشوفوا منو اللي يفيده اكثر؟! واما احسن السعد ولا العقل؟! وقالوا منو يبدا الاول؟! قدم السعد وقال: اني نبدا ..
هداكة العربي كان يحرث ويحرك في التراب وفجأة سن الحراثة علقت في حلقة حديد طبس.. هادي شني ؟! جبد الحلقة لقاها لاصقة في رخامة!! حول التراب من فوق الرخامة وقامها بالحلقة بيشوف شن تحتها ؟! لقي دروج ينزلو لوطة.. نزل يلقى حوش وفيه اربعة ديار متقابلين وكل دار فيها كدس زمرد وجوهر وياقوت والماس لاد لاد ماعرفهمش شن هما !! حاجات معرمة ومرش لكن ماعمراش شافهم ولا عرف قيمتهم طلع في وسط الحوش لقي حوض كبير ترابه من العنبر ومغروسة فيه شجرة دياموند والثمرة متاعها زمرد وياقوت!! لكن ماعرفش قيمة هالخيرات اللي شافهم جي طلع ماعجبه شيء وهو طالع كسر عرف من الشجرة اللي في الحوض وقال نلقاها حتى انقي بيها سنوني .. رشقها فوق ودنه وخلاها وركب الدروج وطلع
العقل قال للسعد: شفت كان عنده عقل راهو مش هكي هالخيرات هاذو كلهم قدامه ماعرفهمش ولا عجبه منهم شيء !! قاله السعد : استنى شوية مازال عندي مااندير ؛؛
وفي يوم طلع سلطان البلاد للصيد هو ووزيره وهما ماشيين️️ فوق فرسهم والسلطان وقف حصانه وقال للوزير: ياوزير راهي الجهة هادي فيها ياقوتة اللي ماهناش في الدنيا زيها!! قاله الوزير: كيف عرفت ياسيدي️ قاله : من النور متاعها شوف الدنيا كيف ضاوية هنايا .. هيا هيا خلي ننزلو ونشوفو.. نزلوا من الفرس متاعهم وقعدو يمشو لين بان عليهم من بعيد الراجل يحرث وضي وراء ودنه مضوي الدنيا حواليه
قاله اهو الضي خلي نمشوله ... مشوله السلام عليكم قالوله ربي يعاونك شنو هذا العرف اللي راشقه وراء وذنك ؟! قاله عرف نحيته من سدرة ...قاله : وينها هالسدرة هادي؟! قال لقيتها نابثة تحت الارض ورفعهم للرخامة قاموها ونزلو من الدروج اول ماوصلو حلو فمهم هداكة السلطان علي مايكسب من خيرات ويحكم في البلاد شرق وغرب مايملكش حتى حق ربيع من الرزق اللي موجود في وحدة من الديار والدنيا المكومة قدامه.. قاله الملك للوزير : راهو العربي مش عارف قيمة الرزق اللي لقاه ... شن نديرو ياوزير؟!! قاله : ياسيدي توة نطلعو واردو الرخامة لمكانها وغدوة نبعثو 500 من الابل ويعبو هالرزق هذا كله ويجيبوه للخزنة متاع السلطنة ... قاله الملك: هذا هو الراي
طلعو وردو الرخامة لمكانها ... العربي قالهم شفتو الهبال !! عطيهم دعوة مدايرين حوش تحت الوطا باش يحطو فيها كمشة رشاد!!
قالوله: ايه حق!! ايه شفت قداش جاهلين .. وركبو علي فرسهم ومشو للقصر وتاني يوم وتو الجمال وحطو فوقهم وشكاير وطابور حرس والوزير من قدام ومشو لمو كل شيء وحطوه في خزنة السلطان
أنت تقرأ
خرافات زمان ليبية💗
Fantasyاهلين كيفكم💕 خلي نحكيلكم علي المحتوى شويه طبعا المحتوى عبارة عن قصص ليبية اخترعوها اجدادنا للنصح وتوجها ونوعاً ما من الوعي والتي تدعة ب الخرافات...❤❤ مليئة بالاحكام والدروس والفكاهة قد نستفيد منها في حياتنا 💙✨. طبعا القصص كلها (منقوله).. . ...
