خرافات زمان ليبية💗

على الدجاجة الحلاجة اللي دحيتها تقضي ميات حاجة

#خرافتنا_الليلة

يا حزاركم يا مزاركم...

جت في يوم من الأيامات هاديك الدجاجة الحلاجة قالت: من يرقدلي على دحياتي نمشي نرعى في الزريبة و نجي؟؟
قالتلها فرخة الامير: اني نرقدلك على دحياتك.
مشت الدجاجة الحلاجة رعت في الزريبة و كلت وحمدت ربي و جت
قالت: نوضي يا فرخة الامير من على دحياتي.
قالتلها فرخة امير: و من بينوضني؟
قالتلها: تنوضك الدجاجة الحلاجة اللي دحيتها تقضي ميات ١٠٠ حاجة.
ردت عليها فرخة الامير: كانك الدجاجة الحلاجة و دحيتك تقضي ميات حاجة ما تسيبي دحياتك و تمشي ترعي في الزريبة، ما نيش نايضة و جيبي من ينوضني.
حرجت الدجاجة الحلاجة و مشت تبكي، لاقاها الفروج
قالها: خير يا الدجاجة الحلاجة تبكي
قالتله: فرخة امير ما تبيش تنوض من على دحياتي
قالها: باهي تو نمشي انوضها.
مشي الفروج لفرخة امير و قالها: نوضي يا فرخة الامير من على دحي الدجاجة الحلاجة.
قالتله فرخة الامير: و من بينوضني؟؟
قالها: ينوضك فروج بو فلفلة مولى السراويل المتخبله
قالتله فرخة امير: كانك فروج بو فلفلة وسراويلك متخبله ما طول اليوم داك راسك في المزبلة.
حرج الفروج مشي يبكي
لاقاه الغراب قاله: خيرك يا فروج تبكي؟؟
قاله: فرخة امير ما تبيش اتنوض من على دحي الدجاجة الحلاجة.
قاله: باهي تو نمشي انوضها.
مشي هداك الغراب لفرخة امير و قالها: نوضي يا فرخة امير من على دحي الدجاجة الحلاجة.
قالتله: و من بينوضني؟
قالها: ينوضك الغراب اللي راسه في النقاب و رجليه في الرقاب.
قالتله: كانك الغراب وراسك في النقاب و رجليك في الرقاب ما يصورك ربي بين السمي و السحاب.
حرج هداك الغراب و مشي يبكي، لاقاته البومة.
قالتله: خيرك يا غراب تبكي؟
قالها: فرخة امير ما بتش اتنوض من على دحي الدجاجة الحلاجة.
قالتله: باهي تو نمشيلها فرخة امير انوضها.
مشت البومة لفرخة امير و قالتلها: نوضي يا فرخة امير من على دحي الدجاجة الحلاجة.
قالتلها فرخة امير: و من بينوضني؟
قالتلها البومة: تنوضك البومة اللي عيونها زرقات زي القضّومة.
قالتلها فرخة امير: كانك البومة عيونك زرقات زي القضومة ما تسيبي صغارك في كل خربة مهدومة
حرجت هاديك البومة و مشت تبكي، لاقاها النسر
قالها: خيرك يا بومة تبكي؟
قالتله: فرخة امير ما تبيش اتنوض من على دحي الدجاجة الحلاجة.
قالها: باهي تو نمشي انوضها
مشي النسر لفرخة امير و قالها: نوضي يا فرخة امير من على دحي الدجاجة الحلاجة.
قالتله فرخة امير: و من بينوضني؟
قالها: ينوضك النسر اللي زمالته كيف القصر و مخالبه كيف البسر
قالتله: كانك النسر اللي زمالتك كيف القصر و مخالبك كيف البسر ما تشم الفايتة في مصر توصلها قبل العصر
حرج هداك النسر و مشي يبكي، لاقاته أم بسيسي
قالتله: خيرك يا نسر تبكي؟
قالها: فرخة امير ما تبيش اتنوض من على دحي الدجاجة الحلاجة
قالتله باهي تو نمشي انوضها
مشت أم بسيسي لفرخة امير و قالتلها: نوضي يا فرخة امير من على دحي الدجاجة الحلاجة
قالتلها فرخة امير: و من بينوضني
قالتلها: تنوضك أم بسيسي بسيسية أم كريّع ملوية ندخلك من الطاقه ونطلعك من الطاقه ونلهد علي جلدك بالصرفاقه
خافت فرخة امير و ناضت من على دحي الدجاجة ، وجت الدجاجة الحلاجة تجري فرحانة و رقدت على دحياتها
ومشيت عليهم و خليتهم بعيني ما ريتهم