خرافات زمان ليبية💗

الحاجه طرله والحويج طرلو😂💕

خرافتنا_الليلة

#الحاجة_طرله_والحويج_طرلو..

حكايتنا اليوم حكاية قديمة هزلية ومضحكة كانو يحكولنا فيها جداتنا وكل ناس تعرفها باسم... فيه اللي يقول الحاجة مكيكة والحاج مكيك وفيه اللي يسمي فيها قطيطة وقطيط وفيه اللي يقولها ام عيشة وبو عيشة ولا الحاجة والحاج وامي ربي يطول في عمرها تقولها طرله وطرلو وكل واحد يحكي فيها بشكل وحتى اني اليوم بنحكيها بشكل تاني وان شاء الله تعجبكم ..
في زمان من الزمانات كان فيه حاجة وحويج حاجة طرله وشيبانيها طرلو عايشين في قرية بعيدة نائية في الصحراء .. الزوز زي مايقولو داقرة ولقت مغطاها ههههه العقل يجيبه ربي ..لا تعرفيهم مهبلة لا دراوش لا نية .. حاجة وخلاااص ههههه وكان عندهم راس بنية اسمها عيشة ... الزين والعقل والقد اللي صبه ربي فيها ياسبحان الله.. والعقل يوزن بلاد واخدة حصتها وحتى حصة بوها وامها في العقل والرزانة .. وكانت عندهم سانية بعيدة شوية عليهم عايشين من خيرها زارعين فيها كل ما يلزم غداهم من طميطمات وبصل وفلفل وبطاطا ومعيدنيسات وشعير ياكلو منه ويطيبو ومرات يفضل منه طشة يبيعو فيه ويشرو بيه اللي تنقصهم من الحاجات التانية ..وكانت عندهم عنيزة مجعطة يربو فيها ويحلبو من حليبها ويشربو .. حاجة طرله وحاج طرلو كانو ينوضو من الصبح بكري ويتسقدو للسانية هما وعنزتهم باش ترعى بحداهم وهما وقت الزرع يزرعو ووقت الحصادة يحصدو ويقطعوا في العشب الضار ويخلو في عيشة في الحوش اضم وتنظف وتغسل ولما يروحو يلقوها تستنى فيهم بعشاهم طايب وواتي... وفي يوم من الايامات كملو حصادة وسقي .. الحاجة طرله عندها سفة دقيق شعير بتبتتها بالمية ودارت منها فطاحات ولقطت عريفات شجر يابسات وولعت فيهم النار وحطت فطاحات الخبزة عالجمر وغطتهم بالرماد ولقطت طميطمات خضرات وقرن فلفل اخضر ناشط وخيارة قرضتهم وطلعت الخبزة وعفستها في هديكة الشرمولة ومعاها شوية ملح وزيت زيتون وزادت علي هديكة النار عريفات يابسات وحطت براد الشاهي فوقه يربخ ونادت ياطرلو هي تعال نتغدو في ظل هالشجرة ونشربو شاهينا ونرتاحو شوية لين تبرد البرودة وتمشي هالقايلة من فوق روسنا .. جي الحاج طرلو وقام كم سوريته فوق وخدي جرة المية وصب علي ايدياته غسلهم وغطس ايده وقال بسم الله ... كلي هو وطرله وحس بطنه رزانت كمكم هداكة الحولي تحت راسه وجي واتكى تحت ظل الشجرة وطرله جابتله طاسة الشاهي اللي من قوته ارشقي فيه العود يوقف رشف منها وبرم شناباته وقالها يعطيك الصحة ياطرله علي هالطاسة اللي تنقي الشيب من الراسس.. قتله صحة ياحويج واهو البراد حداي وكان تبي نزيدك ...
وهما متكيين علي جية شاب علي فرسه قرب منهم السلام عليكم وعليكم السلام قلهم مانلقاش عندكم شربة امية.. قاله الحويج غير انزل انزل وارتاح وتلقى عندنا حتى شاهي دايراته الحويجة علي كيف كيفك.... مدله امية شرب وصبله طاسة الشاهي ومدهاله .. ووين ماشي ياولدي.. قاله لقرية التل ..قاله وعلي طريقك بتمر عالقرية الفلانية وسماله قريته اللي يسكن فيها هو والحويجة .. قاله ايه ياحاج .. قاله اسمع ياولد اني راهو حوشي غادي في القرية اللي بتمر عليها وحوشي راهو قدامه شجرة توت كبيرة ومفتاح حوشي دسيته تحت رشادة جنب باب الحوش .. وفي الحوش بنتي عيشة بنت قد وزين وعقل الله واحد عليها وتحت مخدتي حاط صريرة فيها شقاء عمري .. كل مايزيد عليا قرش نحطه فيها .. وهاني حذرتك نهاااارك اللي ادور فيه كان خنبت فليساتي ولا خطفت بنتي ..
الراجل سمع منه واستغرب ..هذا الحويج خير دعوته مهبول ولا نية ولا بعقله ومشي وخلاه هو وعزوزته .. وفي الطريق خطم حق علي قرية الحويج طرلو وقال والله الا مانشوف هالشيباني كلامه اللي قاله حق ولا كذب .. مشي وقعد يدور في شجرة التوت لين لقاها تلفت قدامها لقي حوش مجخرب قريب حيوطه يطيحو من القدم والرطوبة والبيبان مشققات وحتى الغبرة والضي يخش منهم .. قرب من الباب لقي بحداه رشادة قامها لقي المفتاح تحتها شده واستغرب وقال تو هالشيباني الكلام اللي يقول فيه حق ...؟!! وعنده رزق وزي ماقال داسه تحت راسه ... وبنته اللي قال زين وعقل ومخليها في هالخربة اللي قريب اطيح علي روسهم شنو مايخافش عليها 🤔 والله الا مانخش ونشوف ...
شد المفتاح وفتح القفل ويسمع في صوت الخزيز ورزات الحوش من قدمهم يعيطو عياط يبو التزييت .. دف الباب ورفده خافه يطيح عليه .. عيشة سمعت الباب انفتح جت تجري حارت شن صار وخيرهم امها وبوها روحو بكري علي غير العادة.. قام الشاب راسه فيها فتح فمه وقال ... هالزين والقد هذا كله في هالخربة ومسكر عليه تاريته كلامه حق الحويج .. نشدها انتي عيشة..؟! قتله ايه ..وانت منو ...ماباش يرد عليها وخش للدار ولقي المخدة اللي قالوله عليها قامها لقي صرة فتحها يلقاها معبية فلوس .. قال في خاطره...عنده بنت زي الغزالة و الفلوس هادو كلهم وهو حارمهم منهم ومعيشهم في خربة زي هالخربة... هذا والله مايستاهل النعمة اللي هو فيها وماعاد شايفهم حتى بنص عين تو نحرمه منها ونعطيهم للي يستاهلهم .. يمشي يركب عويشة قدامه فوق الفرس وياخد صرة الفلوس ويهرب بيهم لقريته ..
مع المغرب روح الحاج طرلو هو وعزوزته لقي باب حوشه مفتوح خش وقعد ينادي ياعويشة..ياعويشة .. مارد عليه حد استاقض بروحه ومشي يجري لصرة الفلوس لقي مكانها سخون .. ياعمري اني يارزقي اللي حارم روحي منه مشي ... ماسدش خطف بنتي وزاد معاها فلوسي.. خيره ماسداتاش عيشة خلالنا الفلوس وعيشة عالاقل افتكينا من لقمتها ... جاته الحويجة طرله وقتله لا تعيط لا سو هالشاب راني نعرفه هذا ولد باشا كبير وفلوسه زي التراب والقصر اللي عايش فيه كبير اوله علي عقابه وبنتي عيشة ماتحلمش حتى انها تكون خدامة فيه .. عجبه زينها وتو ياخدها وتعيش سلطانة زمانها ... هكي تقولي ياطرله ... قتله امالة شني والله هذا وين انفتحتلنا طاقة القدر تعيش عيشة ونعيشو احني في جرتها .. قلها باهي امالة ياطرله هي خشي وشوفي شن طيبتلنا ان شاء الله غير خطفها بعد كملت عشانا .. خشت طرله لقت عشاهم طايب ومغطي جنب البابور صباته في قصعة وجاباته وتعشت هيا وشيبانيها ورقدو كل واحد في فراشه ...
الصبح ناضو بكري زي عوايدهم شنو ياطرله شنو الدبارة .. قتله شنو الدبارة .. نستنو للحول وبنتي فالحة ونعرفها مااطقش العام لين يكون ولدها في حجرها وبعد العام نمشو نزوروها ونشوفو وليدها ونتعرفو علي نسيبنا الجديد ووليدنا وبالك يخلينا مع بنيتي باش نعاني معاها الولد ... هكي تقولي ياطرله.. قتله هداكة اللي جاك .. لمو عوالتهم ومالازهم ورفعو عنزتهم وتسقدو للسانية زي كل يوم ...
وفاتو ايام وشهور وطقت حكاية عيشة العام ويوم تاني يوم من الصبح بكري وهديكة طرله نايضة تقربع وتوتي في حاجات وتصرر.. سمع الحويج التقربيع ..شنو فيه خيرك ياطرله وانتي تقربعي عالصبح لقيتي فار ولا شنو.. قتله اراااه فار في شلامتك تي نوض ياحويج بنتي عيشة طقت اليوم العام كان بنمشو نزوروها ونحضرو طهارة وليدنا ... ناض الحويج فرحان وياوالله نهار سعيد اللي رينا عمك بلعيد ... هي هي ياطرلة شوية وتلقيني قبلك غير قوليلي شن بترفعيلها وشن بنوتو لوليدنا ... قتله من فجار ربي نايضة نقوبع امالة علاش وتيت كل شيء غير نوض فيسع وهاني نصرر فيه ... قلها شن وتيتي ... قتله عندي طرف كتانة تبقص داستها من حياة امي جابتها ايام حجت هيا وبوي رحمة الله عليه اعطتهالي يوم روحت بيا عالكرمود .. وياحنا عندي خابية زيت قبل داستها لعصيدة ولد لكن ربي ماسخرش الحال واعطانا كان المنجوهة عيشة بنتك ... وتشبح في حوايجي المرمدات بالدقيق درت لعيشة عجنة كعك بنطيبهولها في التنور غير برة ياطرلو هونة الحطب بحدا التنور ولعلي النار وهاني بنجيب عجنتي ولاحقاتك... مشي الحاج طرلو فرحان ويدندن للتنور وكانت الشمس كيف طالعة وعاكس ضيها علي هداكة الفرن طبس راسه يشبح في ضي الشمس عاكس فيه يحساب النار والعة مشي لطرله لقاها بارمة الكعيكات قلها طرله لقيتها والعة النار في الفرن ... قتله ايه ياشينك دهاب شيرة شورني ولعته وناسية امالة تعال ياحويج قيم معاي صفرة الكعك بنرميه فيه ...
جي الحاج طرلو وقعدو يشاملو في الصفيرة وبدو ياخدو بالكعكة ويلصقو في هداكة الفرن لين كملوهم كلهم وقالت الحويجة للحاج رد بالك منهم راهم ينحرقو خلي نمشي نصرصر عقاب حوايجي... غابت شوية وبعدين جت ومعاها حمارتها حاشاكم حاطة فوقها خابية الزيت وحوايجها نطع نطع عجينة الكعك وتحت باطها الكتان البقيصي ..
شنو ياطرلو طاب الكعك ولا مازال .. قلها مازال شوي .. قتله قايلة فيسع قبل ماتسخن علينا الشمس قدامنا مشوار ... قعد الحويج يبرم في شناباته ويخمم وبعدين قلها ..طرله هي شن رايك نرفعو الفرن معانا مابين وصلنا يكون طاب وحتى بنيتنا تلحق عليه سخون يبوخ .. قتله ايه والله سلمك دماغ عيني مااضرك.. يمشي هداكة الحويج يقلع الفرن من جدوره وبرماده وكعكه وكل مااعطاه ربي وقلها حويجة تو كيف بنرفعوه ... قتله حطه فوق راسك .. يمشي عمكم الحاج طرلو يلبسه علي راسه زي الطاقية ووينتكت هداكة الرماد اللي فيه علي راسه وحوايجه لين راسه ادرق كله وتسند حاشية الفرن علي كتافه والكعك قاعد لاصق ههههه .. حويجة انتي وين مانشوفش قدامي كان في الكعك كيف الدبارة.. قتله شن بدير بيهم العوينات امالة اني شن ندير قاعدة هاك شد ذيل الحمارة واني نقودها قدامك وانت تبعني .. قلها ايه حق ياعليك دماغ يفكر عيني عليك باردة.. وشد في ذيل الحمارة والحويجة طرله تسوق فيها وخابية الزيت فوق ظهرها وتحت باطها قماش البقيصي وعمكم طرلو دنيته مغنجة وحوايجه رماد اسود و راسه غاطس في التنور.. الحمارة تمشي وهو شاد في ذيلها وراها وكل مرة الحويجة تنشد... هاااااا ياحويج الكعك طاب ولا مازال ... يقلها مازال .. تقوله خيره اللطف عمره مادارها قبل فيسع مايطيب ان شاء الله غير يطيب قبل نوصلو لبنتي عيشة تلقى حتى باش تشرب الشاهي .. ومشو مشو لين وصلو لوطا ترابها متشقق من قلة المطر قتله ياطرلو كان تشوف هالوطا قداش ياناري عطشانة راهي وجعاتك وسخفت عليها .. رد عليها من راسه اللي غاطس في التنور وقلها سخفتني ووجعني حالها حتى من غير مانشوفها ... قتله وشن رايك ياحويج خلي نسوقوها بالزيت بالك ترطاب شوية ..قلها اللي يدير الخير مايشاورش .. تمشي تنزل هداكة الزيت من ظهر الحمارة وتقجه علي هداكة التراب .. وكملو ياحنا مشوارهم مشو شوية وقابلتهم شجرة عالية سيقانها عرايا بلا ورق جبدت الحويجة غطاها وغطت عيونها وقالت الستر الستر ياربي كان تشوف ياطرلو هالصبية سيقانها عرايا قدام الناس راك سترتها .. قلها وهو راسه مغطس في التنور..
الستر الستر استريها ياطرله من غير حتى مانشوفها .. خدت هداكة كتان البقيصي من تحت باطها ولفاته علي سيقان الشجرة وخدت خلال من تاكميتها ورشقاته فيها ومشت .. كملو طريقهم لين وصلو لقصر الباشا وجت الحاجة تجري للباب وقعدت اطقطق وبعدين قتله ياحويج هادو حوشهم كبير ومنين بيسمعو اطقطيقي طبست لوطة ونحت شبشبها من رجليها وقعدت تخبط بيه عالباب وتزغرط .. يانهاري المبروك المرقع مافيه شروووك ياروووووووررررري ياعيشة افتحي رانا جينا وجبنالك الكعك السخون بتنوره فيسع افتحي قبل مايبرد وهداكة الحويج فرحان.. وباهي اللي وصلنا وهيا وينكم حولو من عليا التنور بنشوف بنتي ونسيبي.. نسيبهم يسمع في الدوشة والتخبيط والتزغريط جي وفتح الباب ... اضبطاته طرله مرحبتين بضي العين وتسلم وتعاود وهو ينفض في حوايجه من الدقيق ويعاود ..
قتله شنو ماعرفتناش اني عمتك طرله ام عيشة جيت اني وعمك الحاج بنزورو بنيتي وبنباركولها .. قلها وهو وينه عمي ... قتله اهو قدامك تحت التنور... الراجل انصدم وفتح عيونه ونادى الخدم فيسع وقلهم خولو من عليه التنور... جو يتجارو نزلو التنور وطرلو امرغد في الرماد حالة لين مايبانش لا تعرفي وجهه من قفااااه واول ماشاف نسيبه قعد يضبط ويعاود فرحان ويبارك وعيشة واقفة في الروشن تتفرج هادو خيرهم ياكبادي وشن هالحوايج اللي جايين فيهم ياحشمتي كيف بندير في راجلي وضيوفه.. وكان نسيبه مربوعته معبية عنده ضيوف من كبار القرية جايين يباركوله ... طلعت حق عويشة زايد عليها وليد زي ماتوقعت عمتكم الحاجة ههههه ...
خشش نسيبه معاهم للمربوعة وخش يجري للقصر بيغير حوايجه اللي ترونو بالدقيق والرماد .. خش الحاج طرلو وهو يسلم ويبارك وفرحان ونجوكم في الفرح راني بو عيشة الحاج طرلو مش براني ... وقعمز بيناتهم والحضور كلهم حايرين فيه وفي حوايجه المغطيات بالرماد يشبحوله وهو فرحان يحسابهم فرحانين بيه وقعد يحكيلهم عالطريق وعالكعك اللي جابوه بفرنه سخون فوق راسه... وعلي الوطا العطشانة اللي سقوها بالزيت ... وعلي الصبية العريانة اللي ستروها بكتانة الحويجة البقيصي ..ولحق عليه نسيبه يسمع في دوته واللي هذا يضحك وهازي وهذا شنو يقولوله وكيف صار وهو يقول ويعاود فرخان .. نسيبه طارتله وجي بحداه وقاله ... شنو امالة ماتبيش تبارك لبنتك هونا عيشة داخل تستنى فيك يبيه يخش ويفكه من التفتفيت اللي يدوي فيه .. قاله طرلو حق حق حتى اني استاحشتها بنتي وبنخش نشوفها ونشوف وليدها ... وطلع وخش للقصر لبنته وعزوزته وقعد يحكيلهم علي ضيوف نسيبه وكيف كلهم ساكتين ومنتبهين ويسمعو فيه هو بس شن يقول ..وقلهم هبلتهم وكلهم عجبهم حكاياتي فرخانين ينشدو فيا ويضحكو ...وقال لبنته علي حكاية التنور ..والزيت اللي سقو بيه التراب الجاف.. والبنت اللي امها غطتها بالكتان اللي قبل جايبهتولها هدية ... بنته قتله هذا كله حكيتهولهم في هالخمسة دقايق في المربوعة ... قلها ايه وهو فرحان بيطير وهي تحشمت معاش عرفت شن بتقول.. وطلعت لراجلها تجري وقتله امسحها في وجهي علي داره بوي قدام ضيوفك...
وجي العشي وتعشو قال نسيبهم لعيشة وين بيباتو بوك وامك قتله في مخزن المؤونة قلها ليش القصر فيه شوق ديار كلمي الخدم يوتو وحدة منهم ويباتو فيها ... قتله حوايجهم حالة وعلي قد ماقلتلهم اغسلو وبدلو مابوش وخايفتهم يمرمدو الأثاث والبساطات ... ورفعتهم لدار الخزين وفرشلتهم فريشين ومخاد واعطتهم بطاطين وهدرزت معاهم شوية وبعدها قتلهم تصبحو علي خير بناخد ولدي من الدادة بنرضعه وبنرقده ومشت وخلتهم .. الحويجة هدرزت هيا وشيبانيها هبي هبي غير شوف ياطرلو هالعز والرزق اللي فيه بنتي مش قتلك اني سعد بنتي ونعرفه حتى في الحلم ماحلمتش بيه قلها ااااايه امالة كان تشوفي سخصيته وكلامه ومكانته بين الناس يتكلم الكل يسكت ويسمع مافتاش
في الفلاحة والسخصية كان اني .. قتله ايه ياحنا انت بتقولي نعرف .. نعرف .. هو منو فيه زيك ان شاء الله عيني مااضرك ... ضحك الحويج وبدي يتكسل وقعد يبرم في شناباته وعيونه يتلفتو يمين ويسار لقي في مخزن معبي كداس كداس حبوب القمح بروحه ..والشعير موازي بروحه والعدس.. قلها تررررررك ياطرله غير شوفي هالشوفة ...
قتله شنو ياطرلو قلها نوضي نوضي فيسع بنتنا نافس وماعندها جهد خلي انوضو نعاونوها.. قتله فاش ياحويج قلها هالكداس هدومة المشرتعات كل كدس بروحه خلي نلقطوهولها كله ونديروهولها في كدس واحد باش تلقاه واتي للرحي ... ناضت الحويجة طرله وقامت كمامها ... وهي وشيبانيها سهرو الليل كله وهما يخلطو في الثلاثة كداس وخلوهم كدس واحد .. قتله ياحويج تو الصبح تجي بنتي وتشبح اللي درناه تفرح وتشكرنا.. قلها ايه امالة شنو .. بعد كملو رقدو ناضو الصبح علي عياط بنتهم ونديبها .. يااميمتي شن درتولي..؟! قتلها اللطف شن درنالك مادرنالك كان كل خير عاوناك عارفيينك مش لاهية ولقطنالك الكداس في مكان واحد ... حق هذا اللي نستاهلوه منك ... يااميمتي هذا كل كدس حاصدينه وبيبيعوه بروحه وتوة خلطوهم مع بعض كيف بيوازوه تاني .. قتلها بري بري انتي وين تعرفي ولا راجلك ... البنت انصمتت ومسحت دموعها وقعدت تخمم شن هو اللي بتقوله لراجلها ...؟!!
سامحني الله غالب امي وبوي مايعرفوش ... الراجل طارتله ومعاش عرف شن يدير نساباته وضيوف عنده واول مرة يجوه مايبيش ينكد علي بنتهم قاعدة نافس ..كلم الخدم وقلهم عبوه في شكاير ورفعه للسوق بدل مايبيع كل واحد بروحه في سوق الحبوب باعه في سوق السعي علف للحيوانات وخسر فيه قداش .. وفات عقاب اليوم وجي الليل والنسيب نشد عيشة امك وبوك الليلة وين بترقديهم ماتقوليليش في مخزن الحبوب قتله لا لا ساد ما جي منهم الليلة فرشتلهم في الزريبة .. ليش لا مايصيرش ... قتله خليني اني تو ندبر راسي ونعرف شن ندير ... ومشت لامها وبوها وقتلها يااميمتي اني عارفاتك تحبي تشوفي ربي( قصدها عالسمي) والشجر والبرودة وتحبي ترقدي علي صوت الورق والريح والنعاج هاني الليلة فرشتلكم بحدا الزريبة...
قتلها ايه ياحنا سلم ماجابت بطني .. ورقدت ياحنا الحويجة والحاج وعقاب الليل ناضت الحويجة ... ياشيباني نوض ..ياحويج نوض ..
خيرك يامراء خير دعوتك .. قتله نوض شوف هالشوفة ..قلها شنو فيه قتله شوف بنتك قداش عندها من جرات حنة وقداش عندها من جملة ونياق هيا نوض ياطرلو خلي نصبغو شيباتنا قالو مش باهي نخلوه وانت حني لحيتك المنتفة ونركبو انت ناقة واني ناقة ونتسقدو للحج .. قلها ايه حق ان شاء الله ربي يتقبل ويوصلنا سالمين.
صبح الصبح عيشة زي اللي قلبها نخصها ناضت تجري ومشت بتشوف امها وبوها لقتهم معلقين.. روسهم لاصقين في الصقف دهنو روسهم بالدبق اللي يستعملو فيه في صيد العصافير يحسابوه حنة وركبو فوق ناقتين كانو باركات ولما ناضت الناقة روسهم وصلو للصقف ولصق الدبق في الحيط وقعدو معلقين.. قعدت عيشة تخبط وتعيط ليه عليك يااميمتي ليه عليك يابوي بتنكدو عليا بطيحولي سعدي وبتقزنولي وليدي خيركم شن جاكم .. قالولها اللطف اللطف تو حتى اللي بيمشي للحج بينكد علي بنته ولا بيقزن صغارها شن هالكلام اللي تقولي فيه مازال الوذن تسمع.. احني نوينا الحج لكن مش منادية وربي شدلنا روسنا في الصقف .. سكتت ومعاش ردت عليهم وقالت السكات خير نزلتهم من فوق النياق وغسلتلهم روسهم ومابتش تقول لراجلها... ثالث يوم قتلهم هي تعالو باتو في هالدار مشرحة وباردة فرشتلكم فريشاتكم فيها كان بترقدو .. وسهرت معاهم شوية ومشت وخلتهم... عمتكم طرله كملت عقاب هدرزتها هيا وشيبانيها وتشبح بحداها في براميل زيت زيتون مسكرات .. قتله ياطرلو شوف هالبراميل شوره بنتي معبيتهم من البير بتغسل بيهم حويجاتها هي شن رايك خلي نعاونوها . قلها ياريت لكن كيف ... قتله هي لملي حويجاتها وحويجات راجلها خلي انقعوهم ونكدوهم كدة باهية وننشروهم وغدوة الصبح يصبحو علي حبالهم تزرق عليهم الشميسة فيسع مايجفو ..جاها يجري يكركبلها في الليان حطه قدامها وصبت فيه هداكة الزيت والحويج يعرملها في الحوايج في هداكة الليان وهيا تكد وتقوله شوف شوف قداش معسلات ومزيتات وتكد وتعاود وتعصر وهو ينشر فوق الحبال ... ماوقفوش لين تهنو علي كل الزويتات اللي في البراميل سقطروهم كلهم ومن التعب لين طلعو لساناتهم واندلشو علي فراشاتهم .. مافاقوش علي روحهم لين سمعو عياطات بنتهم ونديبها علي هداكة الزيت اللي راجلها عاصره وموتيه بيبيعه .. جتها امها غير اسكتي اسكتي فضحتي بينا شن صار توة علي طشة زويتات حامضات قلبت علينا الدنيا عجب ... البنت انصمطت في وسط كبيدتها وسكتت .. ورابع يوم فرشلتهم عويشة فراشين بحدا زريبة الدجاج وقتلهم يااميمتي هنيني وفكيني من هالافكار اللي تخطر عليك عقاب الليل ... قتلها امالة تحسابيني مهبولة ماعاد مدخلة فيك ولا معاوناتك ساد ماجاني منك ومشت عليهم وخلتهم ... هدرزت الحويجة علي شيبانيها نصيب ورقدو وعقاب الليل انتخصت ناضت زي المخلوعة تسمع في صوت الدجاج والديوك يكاكو .. ياحويج نوض ... ياطرلو نوض ... خيرك يامراء لا ترقدي لا تخلي من يرقد قتله الدحاج من امبكري وهو يكاكي.. وشم شم صنته كيف طالعة هادي بنتي كانت مرزنة وتوة جايبة شكلها ليها وقت دجاج نسيبنا ماغسلاتاش لين جاه البرغوث قريب يكمله نوض ياشيباني خلي نعاونوها تو تجي الصبح تلقاه نضيف تفرح .. قلها هي هي هاني نايض ...
قتله ولع المركاب وحط فوقه طنجرة المية خلي تغلي ..ولعو النار وراجو المية لين غلت وياخدو بالدجاجة ويكدوها بالتايد والمية المغلية يكدو وهداكة الدجاج يكاكي في حويلة العدو.. الصبح جت عيشة وايدها علي قلبها زعمة شن صار لقت هدوكة الدجيجات كلهم مفطوسات ومصلوخات وريشهم كوام كوام .. قعدت تخبطت ياغبارتي شن درتولي ياحشمتي باش برقعها توة ... قالتلها امها اللطف يابنيتي هذا شنو النكد اللي اديري فيه تو احني قلنا بنعاونوك وغسلنالك دجيحااتك ونراجو في الصبح لين يصبح باش ننشرو الريش يجف والدنيا قالبتيها علينا ... قتلها والدحاج يااميمتي شوفي شن درتي فيه .. قتلها شن درتله مادرتله كان كل خير ياناري من لما كديته بالمية وصابون التايد شم النظافة ورقد كانو يكاكو والبرغوت ياكل فيهم .. قتلهم وينه يااميمتي راقد الدجاج كله فطس ومات ... تلفتت الحاجة للحويج وقتله ماااات .. شورك كثرت الصابون ياشيباني خير دعوتك الدجاج شرق من الرغوة وماااات ..
مشت عيشة تجري ونادت الخدم وقتلهم ارفعو الدجاج الميت واعطوه للكلاب وربي يصبرني علي مااعطاني .. الحمدالله اللي راجلي مشي مع اللي يززو في السعي ولعند الليل تو ندبر شن بنقوله ... قلها بوها وخيره ماقلتيليش راني مشيت معاه عاونت نسيبي الناس بالناس والناس بالله ... نسيبي زي وليدي وزوز ايدين خير من ايد وحدة .. مابتش ترد عليهم ومشت وخلتهم ..هيا مشت من هني وبوها مشي ينشد في الخدم وين سيدكم ارفعوني نعاونه اني نسيبه قالوله باهي تمشي عمتك الحويجة حتى هيا كرشت بنمشي وين ماشي بروحك حتى اني بنعاون ان شاءالله حتى نطيبلكم دشيشة عالحطب تقيملكم قلبكم... قلها بااهي ... رفعها معاه واول ماوصلو لقو نسيبهم معاه رجالة واللي هذا شاد نعجة ولا خروف ويزز .. وقعدو يززو لين قريب يمغرب المغرب .. جي الحويج لنسيبه ياوليدي انت من الصبح واقف علي رجل وحدة برة روح وارتاح وهاني اني قاعد ارد بالي ونعاونهم...
... لا عادي تو نكملو ... شد فيه الحويج لين روح وخلاه وقاله رد بالك انت في مكاني توة... قاله ان شاء الله كون هاني....
كملو الرجالة الززان واللي هذا اتكى ورقد وعمتكم طرله عقاب الليل ناضت ... وياشيباني نوض ... خيرك ياعزوز قتله نوض هما مازال كمشة نعيجات تو يجيهم الذيب وياكلهم ولما وراي حاجة بنديرها حتى النوم يطير من عيني هي جيبهم نززوهم واني نعاونك ينوضو الصبح يلقو كل شيء كامل يفرحو ويروحو بكري خير من قعاد يوم تاني في هالخلي ... قلها زعمة هكي تقولي ياطرله امالة هي خلي انوض ... وبدي يجيب بالوحدة والحويجة تشدله .. قلها تو كيف بنصلخوهم وهما حيات خلي نجرو علي رقبتهم الموس قبل.. قتله ايه حق عندك حق وجاب الموس وقعد يذبح ويصلخ والحويجة تاخد في الجلد وتنشر ..لا خلت صور لا حبل لا طابية هندي لا شعال ولا شجرة طلح مانشرتش فيها .. ناضو هدوكة الرجالة الصبح يلقو الدنيا دمومة والجلود منشرة في كل مكان.. هذا شنو شنو اللي درتوه ... قالوله انت وين تعرف بره في حالك احني لما في زماننا نززو انت مازال ماجاباتكش امك ... سكت الراجل وقالهم دبرو روسكم مع الباشا نسيبكم... قالوله ماعليكش فيه احني نعرفو اللي يصلح براجل بنتنا .. وتسقدو روحو للحوش... بنتهم انخلعت لقت خوايجهم دمومة...
اللطف خيركم شن صاار .. قالولها ززيزنا كل النعجات الفاضلات ونشرنا جلودهم عالسور وتو اول مايمشي راجلك يلقاهم جافات واتيات يرفعهم لمعمل الصوف .. بدت بنتهم تعيط وتخبط حى عليا ضيعتوا رزق راجى ياغبارتي السوداء شن بنقوله بااما وجه بنقابل ... قتلها امها والله علي قد مانديرو في عين عورة واعور لكن والله ماعاد قاعدتلك فيه غير يصبح علينا الصبح تو بنتسقدو اروحو لحويشنا
... بنيتهم سكتت ومسحت دميعاتها ومشت لراجلها وقتله اللي صار وسامحني الله غالب اعتبرهم عقيقة لوليدي وصدقة ...هيا ليلة وفراقها صبح.. مازال هالليلة ومروحين بنتحملوهم كيف مايجي ربي يعوضك في رزقك خير.. الراجل انصمت وقعد يعارك وماخلا عليها كلمة وهذا وين كان مدسوسلي ... وشن هالهم اللي جاني في مرة وهيا اطبطب وتسكت وتصبر ومتحشمة وماعندها ماادير...
وفات اليوم وهيا عمتكم طرله شواربها عرم جتهم في الليل بنيتهم وفرشتهم وهدرزت عليهم شوية وجت بتمشي.. قتلها اميمتها اللطف زيدي اقعدي احني غدوة الصبح متسقدين مروحين وياعالم امتى بنتلاقو تاني ... قتلها وليدي مريض وليه ثلاثة ايام يعيط ومش عارفة خيره بنمشي نشوفه... قتلها اللطف يابنيتي معقولة امك وبوك ايداوو في صغار الناس ووليدنا مريض مانداووشي هاتيهولي جاي وتو الليلة بإذن الله ينزل ربي شفاه علي ايدينا... مشت ياناري تجري وجابتلهم وليدها وحطاته في حجر امها .. قتلها بري جيبيلي حلتيت واحلبيلي شوية حليب منك ودوبيه فيه وغليلي فلية وجيبهولي ..مشت عيشة في حالها وهديكة امها شدت الوليد وقعدت تمسدله في ظهره ورجيلاته وراسه وهو يعيط ماباش يسكت وقعدت تحكحكله في راسه وتعاود .. حست بملغيغة الوليد تحت صباعها تنبض من العياط ...
قالت ااااه توة عرفته الوليد خيره ياحويج .. ترا اجبد الكانون جاي وحطلي فيها عمود حديد خلي يسخن ... قلها شن بديري ياطرله قتله الوليد عنده عقرة في راسه هكي كبرها تعال شوفها حط صبعك عليها ... جي الحويج وحط صبعه علي ملغيغة العويل وهداكة الوليد في عيطة وحدة ... قلها ايه ياناري مابعده واحني نقولو خيره الوليد في عيطة وحدة ومايرقدش .. يمشي ياحنا يحط عمود الحديد فوق الكانون ويخليه لين ولا احمر وبعدين يجيبه للحويجة .. قتله انت شدلي الولد واني بنكويله هالعقرة اللي توجع فيه .. شد الحاج طرلو الوليد وتاخد طرله هداكة العمود وتكوي بيه ملغيغته وهداكة الوليد سكت سكتة وحدة.. ماعاد سمعوله حس ... قلها ياحويجة الوليد سكت سكتة وحدة.. قتله امالة شنو دواي وعارفاته ضربة ضربة بش تعرف ايدياتي يثقلو بالذهب ... قلها ياطرله بقولي الوليد سكت ديمة ..
قتله ماتقولهاش بعيد السو علي وليدي.. غير ارتاح ورقد قداش ليه ليلة يعيط ومارقدش وبعد داويته حس الهون علي ايدياتي ورقد
قلها ياودي قتلك الوليد شكله ماااات .. ناضت تهز فيه وتحرك وتقيم والولد لا حس ولا مس ... قتله وووووه ياحويج شكله الولد مات حق نوووض ياشباني البس حوليك وبلغتك تحت باطك وهيا نعطوها الشياط ... قلها وين بيها مش قلنا غدوة .. قتله غدوة شنو ياهمي تنوض نهربو قبل مايستاقضو بينا ويقتلونا ..ومن اليوم ماعاد عندك بنت اسمها عيشة انساها ولا عاد حتى سيرتها تجبدوها .. وناضت تكمكمت في رداها زين وهربت جري هيا وشيبانيها ..
جت عويشة وجايبة فيدها الفلية والحلتيت ووينك ياااام خيره وليدي شكله ايدياتك فيهم الشفي اهو رقد معاش سمعت عياطه... لا لقت لا امها ولا بوها ووليدها ملوح في قماطه وكشاكيشه طالعات ...
ووووه ياناري ... ووووه ياوليدي شن جاااك ... قامت من هني حركت من هني عرفاته ميت خبطت وعيطت وبعدين خافت من راجلها سكتت وحتى هيا حتى شبشبها مادورتاش هربت حفيانة خشت الخلي ومعاش عرفولها طريق ...
وكلا عمكم طرلو وعمتكم طرله شدو الطريق جري جتهم الصحة اللي كانت غايبة يجرو يجرو لين بعدو علي حوش بنتهم مسافة كبيرة وقابلهم في الطريق بير وشجيرة قالت طرله ياحويج اني قلبي طاح في رجليا وماعاد قادرة خلينا نرتاحو شوية ... قلها حتى اني عييت هي خلي نرتاحو ... وقعمزو هما الزوز تحت ظل الشجرة شوية وجتهم ذبانة تزن ووقفت علي خشم عمتكم طرله ...تلفتت لشيبانيها وقتله ياحويج هذا شنو اللي وقف فوق خشمي... قلها هذا عزرائيل جي بيقبض روحك .. قتلها هبي هبي وانت شن قاعد ادير مخليه.. تبيه يقبض روحي وانت تضربها بنت عشرة واثنين علي شبابك وتقول هذا وين عشت وهذا وين عرست... نوض ..نوووض فيسع اقتله قبل مايقبض روحي ... الحاج طرلو لقي بحداه رشادة كبيرة يقيمها ويفشخها علي خشم عزوزته بيقتل الذبانة طاحت الحويجة في مكانها ...
قلها حق هذا وقت النوم خلي نقيلو شوية وانوضو نكملو طريقنا بعدين... قتله نوم شنو ياشيباني الهم اني بنموت وبنخليك ...
قلها هاااااا شفتي اهو سبقني عزرائيل وقبض روحك قبل مانقتله غير ربي يهديك حتى انتي معاندية .. خلاها وناض لهداكة البير بيشرب ومن التعب والرعشة .. طبس علي هداكة البير شبح صورته وجهه مغنج وشعره تقول شجرة شعال متشوشة فيها نار وشوره اول مرة يشوف صورته في المية رعش يحساب عزرائيل طلعله من البير وقاله هالمنجوهة نقت عليا وحسدتني في مراء تانية اهو حتى اني جاني عزرائيل بيقبض روحي ... ومن الخوف والخلعة فشل وغلبه راسه جي غاطس في البير طاح غرق وماااات ...
.... تمت الخرافه وان شاء الله عجبتكم