خرافات زمان ليبية💗

خرافة الليلة💕

خرافة غير شن درتي يا مقهورة *** بعد الغمه جبتي الدورة...

حكاية ابنية اسميت فاطمة في وسط ستة بنات قبلها تلاتة وبعدها تلاتة ، وعندها ابعة اوخيين مترافقين ، وبوها وامها هكي كبرهم حيين ، لا نقولوا اعنيدهم ولانقولوا محتاجين ، حالهم وسط ناس عاديين ، ايحبوا يكرموا الضيف ولو كان بالدين ، بوها في الشكل خشم وعين وفي الفعل كلمته وزنها كبير ، وامها ريمة عسوله وفعلها ماتلحق طوله ، ووخينها ، اتنين زينهم زين امه واتنين افيله وانقسمت على اختهم فاطمة ، ووخياتها الله الله غزالات لهلوبات وفالحات ، هيا حتى فاطمة فالحة وكريمة ونظيفة وقلبها محرار لكن !!! العقل احتار الام غزالة ، والبو زينه ماصار ، فاطمة كانت في الشكل عادية !!! ، توا عاد اوخياتها من زينهم وفلاحتهم جاهم البخت فيسع فيسع وكل وحدة امشت على حالها واتهنت وقعدت فاطمة تستنى وتتمنى ، فاطمة كانت عارفة الفرق بينها وبين زين خواتها ، لكن امها كانت ديمة جابرة بخاطرها وتدعيلها بالنصيب الباهي وتدعي لربي يرزقها بللي يسعدها ويدللها ، كانت امها ديمة اتقولها يا بنييييتي يا باهية ان شاءالله ايجيك نصيب زي الرعد يرفعك من اهني ويعيش في هنئ وماتشوفي معاه دي ، ياحنة دورة شهور وفي يوم من الايام خشوا زوز انساوين على ميلودة ام فاطمة اللي كانت حاطة الرحى وترحي في الشعير ، السلام عليكم ياحاجة ميلودة شن حالك وشن حال الحاج ولاولاد ... مرحبتيييين بيكم على سلامتكم اتفضلوا اتفضلوا ... وبعد نشدة وترحاب قعمزوا النساوين وابدت وحدة منهم تدوي وتقول ... احني ياحاجة ميلودة جايينك منعوتين !! من امتاعينكم اللي شاكرينكم وقالوا عندكم ابنيه فالحة ومرضية ، فرحت الحاجة ميلودة وقالت في نفسها ياوالله انهار سعييييد بختك يافطومة جي !! ردت عليهم وقالت اللي دلوكم ما خانكم حق ابنيتي فالحة وعلى فم ساكت وياسعد من اينولها واللي فيها الخيرة ربي ايجيبها ... قالت لمرا اللي متكلفة بالدوه يازينك كلام ، نادينا على ابنيتك انشوفوها وبالعين ما نأخذوها ،،، امشت الحاجة ميلودة اتنادي على بنتها فاطمة وقلبها ملهوف بين فرحة وخوف ، ياحنة خشت عليهم فاطمة وسلمت وماهناك ما قعمزت وناضت تجري ، ناضوا النساوين في جرتها استاذنوا وروحوا ، وفي الليل روح الحاج رجب هالك من الشغل وتعبان ومن لما قالتله الحاجة ميلودة على دوة الخطبة وعيلة اشكون قلبه فرح وحتى التعب نفضه ، وقال ايصير خير ان شاءالله ، وهما يومين بس ورجعوا النساوين ومعاهم الرجالة وعلى الطلب امصممين وفرررررحت الحاجة ميلودة وفررررحت فاطمة ... واخيرااااا انزل البخت والحال بيكون زين ، وتمت الخطبة والعرس في شهرين ووصلت فاطمة لحوشها ... واستقبلها عريسها وياااالطيف من اول ليلة ضرب وتكشيخ ولا عاجبه شكل ولا توصيف ،، وهو الله الله عليه لا لون ولا عون ولا كلمة طيبة ولا طبع حنون ... عاد صبحت فاطمة في الحوش اتحوس ... خشوا عليها نساوين العيلة ... شن ياعروس شن يافاطمة !!! قالت فاطمة في خاطرها احليلي شن بنشكي من اول يوم خليني نسكت ونشوف ... ومع كل يوم كانت عيشة فاطمة كان اتمرميد راجل احرف اصرف اغبر ناقصه عقل وما عنده خير ولا فلوس ... صبرت فاطمة ايجي ستة شهور ولا شافت فيهم حوش بوها ولا شمت حتى لبخور !!! وفي الشهر السابع قالت لعمتها ام راجلها ياعميييييمتي راني خلااااص مع ولدكم مالقيت اخلاص اعطيني الدبارة ياعمتي .... كانت عمتها عارفة حرافة ولدها وساخفة على فاطمة منه ،،، قالتله يابيتي ماعندي مانديرلك اللي انت اتعاني فيه من ولدي عانيته اني من بوه واصبرت واقعدت واتحملت ،،، قالتلها فاطمة لااااا ياعمتي والله مانقدر راهو صبري فاض ،،، في هداكا الوقت كانت العروسة اتزور حوش بوها في كمالت العام ... وتم العام وامشت فاطمة زائرة لحوش بوها ومن لما خشت وهيا تشكي لأمها وخالتها وأمها تبكي وخالتها اتقول في خاطرها والله يافطومة ياقلة بختك وخلاص ... ياحنة امها قالتلها خلاص امكانك ووصلتيه وتو انكلم بوك اللي مايرضى فيك حتى دقت الشوكة ،،، اطلقت فاطمة والحسرة في قلبها من قلة بختها ... وزادت حسرتها لما عرفت انها حامل
.....فاطمة لما عرفت انها حامل قعمزت تبكي وتنوح على قلة بختها وحظها المنحوس ... وامها جنبها دليلها حاير وعقلها طاير ... وبوها واقف في وسط الحوش يسمع ويفكر ويحوس .... جاها بوها وقاله يا فطومة توا شن الدبارة واللي تبيه اني فيه .... تبي اتولي وتربي عيلك مع بوه وتتحملي على خاطره والا تبي تقعدي وحوش بوك ليك مفتوح انتي وعيلك ... فكري ولا تستعجلي راهو العيل ما ليه الا بوه وحوش اجدوده ايربوه ... وطلع بوها وكملت امها لكلام قالتلها يابنيييتي يا باهية اتمنيتلك من المولى يعطيك نصيب لفروح لكن الله غالب امقدر ومكتوب ... فكري في كلام بوك ومش اتقولي مانبوك ... باتت فاطمة اتخمم في حالها وتبكي على احوالها واللي طرالها من دون خواتها وفي لحظة حزن ويأس قالت ياربي خيرني قليلة بخت لا زين ولا نصيب زي الناس ودعوة امي نستنى فيها منك وماريتهاش اعوذ بالله من الشيطان الرجيم سامحني ياالله ياكريم ... اتعوذت فاطمة من الشيطان الرجيم الله يبعده ويخزيه واستغفرت ربها ورمت احمالها على الله ورقدت ... والصبح اصبح ناضت فاطمة من الفجر تجري وتحوس ... في هداكا الوقت كانت العيشة تبي الجهد وكان كل شي يخدموه بالذراع ... كان روتينهم مطبوع ... يطلع بوها الحاج رجب من الفجر يرعى السعي ومايروحش كان قرب المغرب وامها الحاجة ميلودة اتنوض توقد لحطب وتوتي لفطور للحاج رجب وشن بيرفع معاه وبعدها كان بترحي شعير ولا قمح في الرحى والا تمغض اللبن وتفصل الزبدة والا تطلع اتحطب لحطب اللي ينقص لازم بديره واللي تقصر عليه الحاجة ميلودة اتكمله عليها بنتها فاطمة من غير عاد ضمان الحوش والصابون وتطيب الماكلة وتنظيف الصوف وغيره وغيره وكله يبي الجهد والقوة ..... المهم ناضت فاطمة من الفجر مع امها ناضت وهيا حالها متعدل وبالها زاهي ومتبدل ماهي ارمت احموالها على الله واللي يرمي حموله على الله ربي يريح باله ويغير للخير حاله .... سقدت بوها للرعي وسقدت خوتها لولاد للزرع وكملت حوسة الحوش وامها بين فرحانة اللي لاقت من يعاونها ويونسها وبين متغششة على بنتها واتمنت تكون بنتها معاها مجرد زيارة ..... قعمزت فاطمة مع امها مقابلتها في الرحى يرحوا في شعيرهم ... قالتلها يامي راني بنقعد معاكم ونربي عيلي بحداكم قالتلها امها ربي يصلح حالك ويبدل احوالك ويفتحها قدامك والله غالب وخلاص .... توا عاد امشت ايام وشهور وجابت فاطمة اوليد زي بوه !!! اختاروله اسم ( علي ) حناه ميلودة كان ماتعاند فيه وفرحانه بيه وتقول الحوش اللي فيه املائكة الشيطان مايخشلاش .... الحاجة ميلودة عندها خوها عايش من يومه في طرابلس وحالته ميسورة وكلمة مشهورة وشخصيته معلومة وعنده احباب وصحاب من المدينة القديمة لعند الهنشير وتاجوراء وكل من يقول شن الحاج محمد ايقولوا والله نعم الناس .... الحاج رجب كان كل فترة وفترة يحدر لطرابلس قاصد حوش نسيبه محمد يابت عنده من اليومين وحتى لاسبوع يطلع معاه وكان بيشري سبيزته وقضيته ويحضر معاه في ميعاد صحابه وكان معجب هلبة بنسيبه محمد ... وفي مرة في ميعاد الحاج محمد وصحابه وبحضور الحاج رجب كان حاضر السي كمال راجل متعلم متحضر قاري امسافر وداير البلدان ويعرفها من كل مكان.... حالته ماهي هيا خيرات على ذهب على حرير على خدمة وتصاوير في الزين زي التركي احمر ابيض مربوع القد مبسم تبروري وعقل واحد انيق هديكا البدلة الرسمية والطاقية الحمرا المكفية مايلة عالجنب شوية وتقعميزة رسمية .... الحاج محمد قال لنسيبه الحاج رجب هذا صاحبي السي كمال اني وياه زي الخوت ... قاله الحاج رجب اييييه نعرف وديمة تحكيلي عليه واهو اتسخر الحال وشفناه اليوم ومن اهني واهني وفي وسط الهدرزة كان الحاج رجب يحكي على نمط حياتي وروتينه اليومي مع رعية السعي والزرع والحصد وهداكا السي كمال يسمع طربان عجبه الحال وقال والله خاطري في يوم عندك ونطلع معاك ونجرب لمكان !!! قاله الحاج رجب في لهجة كلها فرح وكرم وقوة اتفضلللللللل ياسلام !!! افرح السي كمال وخذي الكلام بالجد وحدد موعد وقاله خلاص الحفظة الجاية انكون عندكم اني والحاج محمد ... روح الحاج رجب يحكي للحاجة ميلودة على السي كمال ومكانته المعروفة في طرابلس وقالها وتي الحوش والمكان راهو السي كمال حيكون عندنا ضيف واني نعرفك مع الضيف ما يغلبك حد 😊 توا عاد الحاجة ميلودة مع الضيف ما يغلبها حد كريمة فوق الحد ولا بال الضيوف خوها محمد نور عيونها وصاحبه السي كمال ... السي كمال راهو متزوج عمره هوينا في نص الستين وعنده لولاد والبنات ومرته عيلتها معروفين ... في يوم الخميس ومع الساعة العشرة ونص درست السيارة والحاج رجب وولاده ومعاه جاهة من خيرة الرجالة وافقين ، استقبولهم سلموا ورحبوا وخشوا للمربوعة وبدت الهدرزة والكلام الزين ... وابدت معاه ضيافة الحاجة ميلودة صفر صفر ... ياحنة شدوا عندكم هديكا خبزة الفرن سخووونة من فرنها وجنبها صونية الزبدة الوطنية صفرا زي الذهب وطواسي اللبن شوية وجابوا الشاهي المربرب رغوته فوقه حمرا زي الرطب ومعاه زميطة مخضور فايحة وخضرا هكي اتقول وبعدها جابوا الكبدة واللحم المشوي ماهو الحاج رجب من فجر ربي جبد احسن خروف وذبحه لاستقبال الضيوف وبعدها عاد جي الغدي بازين واللحم عليه سمين والبطاطا امهبزة والدحي عربي كبير وجنبه مرقته طافحة بدهانها صنتها اتجيب من بعيد وغادي وكمالت الصفر صونية الليم وفلفل اخضر من الجدوله امفرشخ حار هكي طوله وبعد وكلة البازين طاسة شاهي معقودة ومعسولة ... قال السي كمال يا حاج رجب رانا عندك قاعدين شن خليت ماجبتش 😊 قاله الحاج رجب صحه صحه الخير وفير وكل يوم تاكل وكلة غير .... وهديكا الحاجة ميلودة وبنتها فاطمة يجروا جري وتم اول يوم والضيافة الله يبارك ماشية جاية .... وفي اليوم التالي من الفجر ناض السي كمال وقال للحاج رجب راهو اللي بديره بنديره معاك قاله امالا هيا نوض هيا بنطلع بالسعي نرعى ... قاله هي وتلفت للحاج محمد قاله هيا نوض معانا ياحاج محمد ... شوي قاله لا اني عاد غدوة امروح واليوم نبيه هدرزة على اختي !!! امشوا انتوا اتسهلوا ... وقبل ما يطلعوا بالسعي فطروا فطورهم صفرة مليانه بالخير وكله خدمة ايدين .... ووقت المغرب روحوا بالسعي من الرعية والحاج محمد واقف يستنى فيهم وفي غمره علي اوليد فاطمة ... قاله السي كمال لمنو هالوليد ... قاله هذا اوليد فاطمة بنت الحاج رجب امسيكين امه امروحة بيه (امروحة بيه = اشارة انها مطلقة ) قاله ربي يعوضها خير ولوليد حظه كبير جده رجب وخاله محمد مجتمعين .... وتالت يوم روح الحاج محمد عنده اشغاله واعماله وقعد السي كمال عاجبه الجو وفرحان .... ومن الفجر طاسة اللبن وخبزة الفرن والدحي العربي المطبوخ ورونية الرطب وعبود الزميطة ولازم منها الترديدة يا اما شكشوكة يا اما عصيدة وبعدها الغدي والعشية ترديدة تانية ويجي العشي ومع نسمة الفجر ونسمة المغرب انسحر السي كمال بالمكان وقال ديمة بنجي اهني .... وتمت الحفظة وروح السي كمال امحمل بالخيرات اشكال الوان ... خش على مرته فرحان يحكي ويعاود قريب ايشارك حتى الجيران .... ومرته تسمع ومش عاجبه الحال طول عمرها تبي السفر برا وتبي المدينة والعمران !!! وامشت ايام وجت ايام والسي كمال دورة دورة يمشي ايغير في جوه ويروح فرحان ... وفي اخر زيارة للسي كمال كانت مدتها نص نهار وهو كيف بيركب سيارته طلعت فاطمة تجري بخبزة الفرن السخونه ومدتها لبوها وقالتله لسي كمال ...شافها السي كمال و روح وفي طول الطريق ايفكر في فاطمة وسرحان اتقولي سحرته والا اتقولي عليها ملكة جمال !!! المهم خلاص السي كمال بعد ايام وتفكير طويل قرر يخطب فاطمة ويتزوجها واللي يصير يصير ... دار معاه جاهته والحاج محمد وامشوا خطبوا وكملوا ووصلوا ... و الحاج رجب والحاجة ميلودة من الفرحة مش امصدقين وعاد فاطمة اتقول اني في حلم راني مش في علم !!! وصار اللي صار وفي الليل افتح السي كمال باب حوشه خش وخشت في جرته فاطمة ... قالتله مرته اللطف ياربي هادي منو !!!افتح السي كمال باب حوشه خش وخشت فاطمة في جرته ،،، لاقاته مرته قالتله اللطف ياربي هادي منووو !!!! قاله هادي فاطمة بنت الحاج رجب ومرتي .... قالتله ووووك عليا درتها مرة تانية !!! والله والله ماقاعدتلك في حوش وخشت لدارها ولمت شن لمت من غراضها وطلعت وهو في جرتها في قولت غير وين ماشية يا حلومه الدنيا ليل وطلع معاها ملهوف وفاطمة لصقت في الحيط من الحشمة والخوف .... شوية وخش السي كمال ايصفق في ايديه وزعلان ... قالتله فاطمة ان شاءالله خير وينها مرتك قالها وصلتها لحوش اختها بحدانا وغدوة ايصير خير ... وحلومه باتت الليل طوله وهيا تسحن وتعارك وتقول لاختها والله عرفته مشياته لصاحبه الحاج رجب ماهي بلاش .... قالتلها اختها توا غير ارقدي ورتاحي واصباح ارباح .... ومن الصبح ناضت حلومه تسحن وتعاود من جديد ... قالتلها اختها تو ياحلومه ما هو اتزوج قبل وقدرتي اطلقيها منه !!! اهدئ واهفتي وفكري كيف اطلقيها حتى هادي .... شوي قالتلها حلومه لا ياوخيتي لاولى هو طلقها لان القاها نية على البركة لكن هادي ياوخيتي وحدة فالحة في كل مرة يمشيلهم ايروح يحكيلي على فلاحتها ونشاطتها وكيف عوالتها ... قالتلها اختها توا غير افطري وبعدين اتصلي بولادك تو ايكلموا بوهم !!! ياحنة سمعوا بيه ولاده وكل العيلة وجيرانه وحبابه وكل واحد كلمه من جيهة وشي السي كمال سكنت في قلبه فاطمة وطول الوقت فرحان .... فاطمة من ليلة اللي خشت عالحوش حافظت عليه زي ماهو ماغيرت فيه شي بنفس لمسات وحطات حلومه .... حوش عربي كبييييير فيه مطبخ ودار خزين وعنبة في تركينة ومسكة ليل وسقيفة طويلة فيها امحبسات الغرس والتزيين .... اتنوض من صبح ربي اضم وتلمع وتحوس الحق الحوش امخلياته زي طويسة المرش .... فات شهر وحلومه امعندة ماتبيش اتروح قاعدة عند اختها ... اختها راجلها ميت وعندها زوز ولاد عزارة ... حلومه عندها خمسة ولاد واربعة بنات وكلهم متزوجين .... بناتها بعد شهر من ماخذة بوهم قالوا بنمشوا لحوش بونا شن كان فيه مرا غير امنا معاش انخشوله !!!! اتفقوا لبنات الاربعة وامشوا صبحية لحوش بوهم .... ياحنة طقوا عالباب فتحت فاطمة وسلمت و رحبت ... خشوا لبنات بعد سلامهم البارد على فاطمة وقالولها هذا حوش بونا ومانبوا انقولوا الغرب بيلزونا !!! قالتلهم فاطمة حاااااشاكم من اللزان وحااااشني ماتربيت عليه اتفضلوا اتفضلوا انتوا امالي الحوش واني الضيفة فيه ....خشوا وهما يقلبوا في عيونهم اهني واهني !!! متوقعين يلقوا الحوش متغير ومن قلة انظافته يتصين .... شوي لاقوه زي طاسة المرش انظيف يلمع تلميع اكتر من قبل ياحنة فاطمة صغيرة ولهلوبة ... وكل شي في مكانه زي ماهوا ... وهديكا الضيافة اللي حطتها امرتبة ومتكمة وكل شي في اصوله وهدرزة ودوه ... قولوا لبنات شبه انسجموا مع هدرزة فاطمة لدرجة انسوا الغل والغنه .... شدتهم فاطمة للغدي وحلفت ايمين ماكم طالعين و طيبت هداكا البازين ولحم الضأن عليه امفصل تفصيل وقالت هذا واجبكم وكان عندي كيف انزيد !!! انزيد اتنين ... وبوهم فرحان روح احضر الغدي والشاهي المليان .... رحوا لبنات وماعندهم مايقولوا في فاطمة من فعلها وكلامها الزين ... غير انها ضرة امهم وغلهم عليها قامين .... الكناين قالوا مادام لبنات امشوا لمرت بوهم حتى احني بنمشواااا .... لموا روحهم وامشوا واللي صار مع البنات صار مع الكناين ورجالتهم ... استقبال كبير وكلام زين وضيافة وفعل الخير ورحوا كلهم ممنونيين .... توا عاد قولوا نص العيلة ارطابت لفاطمة ... مازال غير حلومه .... اقترح السي كمال على فاطمة تمشي لضرته وترمي روحها عليها وتواسيها وهذا اللي صار وحلومه شي مجروحة لاتبي تتلفت لايمين ولا يسار ... فاطمة بعد شهور امشيت لاماليها زاير وعباها السي كمال بالخيرات من كل اشكال شي تعرفه وشي تحسابه خيال ... وفي حوش بوها استقبال الفرح استقبلوها خواتها وخالتها وعماتها كلهم حاضرين وللخيرات اللي جابتها مبهورين وامها من الفرحة بطير ... خشت فاطمة تجري مستاحشة اوليدها المسكين لاقتها ماشاءالله كابر ومفدغل وزي لعسيسيل ... باتت وروحت بعد يومين .... وامشي يا ايام واتعالي يا ايام وفاطمة متنغنغة في الدلال والخير ذهب وسفر وحرير وزيارات لخواتها وخالتها وعماتها محملة تحميل وكل من يقول ياسعدك يافاطمة ... جابت تلاتة ولاد وزوز بنات وضرتها انطاعت وولت بعد سنين من فعل فاطمة معاها وكلامها الزين وبري ياسنين
..
فاطمة كانت في حوش بوها لاتعرف خشوش ولا طلوع حياتها كلها شقي وتعب وضمان ولما خذاها السي كمال اتغير الحال طلعات في المدينة وادهوير ولمات ... سافرت ولبست الحرير والسوار والشنبير ،، في الاول مبهورة تسرح وتقول غير شن هالخير اللي درته ونسيته باش ربي كافاني بي هالراجل وخيراته وحبه ليا وبسماته !!! اتفيق من سرحتها واتقول الحمدلله ياربي نحمدك ونشكرك في كل وقت وان شاءالله حالي هذا مايتم وطبعي ما ينغر وعالناس ماتنكبر ... جابت فاطمة صغيويرتها على روؤس بعضهم وفي كل عيل اتجيبه اديره وتمشي بيه لحلومه وتقولها ياوخيييتي كان تبي الربح اتولي لحوشك .... الله غالب المكتوب ارماني عليك وضرتك جيت وبعون الله تلقيني اوخيه ماننولاك سئيه ... تسكت حلومه واتقول انتي فاش جيتي اني حرجتي من مولى بيتي ومانرجعله لين اطيب مافي خاطري ... توا عاد قلنا فاطمة جابت تلاتة ولاد وزوز بنات في جرت بعضهم وبعد العيل الاخير ارطابت حلومه و ولت لحوشها والفرحة عبت لمكان ولتمت العيلة واتهنى السي كمال .... صبحت حلومه في حوشها وناضت تتفقد فيه وفي تراكينه لاقاته ياسلام انظافة وترتيب واهتمام وكل شي في مكانه اتقول طلعت منه امس مش زمان ... حلومه ابدت تنسجم مع فاطمة القتها نظيفة وفالحة كل شي اتجيبهولها لعندها وذكية تسمع وتفهم وتنفذ وعابية بصغارها واستقبال ضيوفها ... قولوا عاد رامتها اتقول اوخيتها سبحان مبدل الاحوال ... وابدي الحوش عامر بزيارات البنات وصغارهم والكناين وصغارهم ... فاطمة لانها ذكية كانت اتلاحظ في كل كبيرة وصغيرة في حلومه وبناتها وكناينها !!! كيف يلبسوا وكيف يتكلموا وكيف يتصرفوا واتقلد فيهم تمام لين ولت زيهم ... ولما تمشي لحوش بوها خواتها وخالتها ايقولوا اشي فاطمة ولت اتقول بنت مدينة من يومها حتى من لسانها انطلق مش ساكتة زي زمان ... والدلع اللي في لسانها ماكانش عندها قبل السي كمال ... وسبحانك يا مغير الاحوال .... رغم فاطمة اتغيرت في الشكل وانطلق اللسان لكن قعدت هيا هيا فالحة وطيبة وايدها اسخية وين تمشي زيارة لاحبابها كان تلقى ترفع قنطار وما ترضى بالوقية .... ومع مر الزمان كبروا الصغار اللي طلعوا كلهم في زين بوهم .... وضم السي كمال ( علي ) اوليد فاطمة لخوته وكبره وعلمه وزوجه بنت خوه وبعدها ابغاه الرحمن ... اتوفى السي كمال هذا حال الدنيا وكملت فاطمة وحلومه المسار ... حلومه زاد حنها على الصغار وكملت تعليهم زي ما كان يبي السي كمال ... اتزوجوا لولاد بنات عماتهم وخشوا كار التجارة والمال ... والبنات زي العسولات الزوز دكتورات ... وامهم فرحانة في وسطهم طربانه ... صار عرس بنت خالتها امشت فاطمة وهيا لابسة حولي حرير اخر خطة وموديل وبالذهب امرشقة والخناق كبير خشت والناس بما فيهم امها وخواتها وخالتها فيها مبهورين !!! قعمزت قدام خالتها ... وخالتها في خاطرها اتقول ( غير شن درتي يا مقهورة *** بعد الغمه جبتي الدورة ) والله يافطومة واتاك الوقت الزين
الحصيلة يا ناس بنادم المفروض ما يستسلم لليأس ويكون ظنه بالله كبير ... واللي عند الله كله خير ... ديروا الخير ايجيكم الخير ... صفوا النيه يرتاح القلب واللي تتمناه يعجل الجيه ... الحظ مش بالشكل والتوصيف !!! الحظ بعد الاختبار والصبر و التسبيح ... شدوا بالله تلقوا الحبل غليظ والفرج ماد الليد ... وربك ايلقب الحال اللي تحسابه محال في لحظة صبر واحتمال ... واللي يصون لسانه السعد واتاه وياسعد من ثقل ميزانه وقعد الخير معاه