خرافات زمان ليبية💗

"العزوزة و الدينار"💕

العزوزة_والدينار...

خرافة اليوم على عزيزة كانت عايشة بروحها في حوشها  اضم في حويشها وتنشف وتحوس على روحها.... نهار من النهارات حست فيه حاجة تحت البساط قاماته لقت دينار خداته وقعدت تخمم شن اندير بيه شن اندير ناخد بيه حويتات فيهم شويكات ناخد لحيمات فيهم عظيمات ناخد دحيات فيهم قشيرات  . امالا خل نمشي على شط البحر نقول للبحار يرفعني يدهور بيا خير مشت على الشط وعطت الجنيه للبحار وقتله ( شلوحني ودلوحني وفي الدزيرة لوحني) رفعها عمك البحار ولاد بيها في البحور لين حطها على شط دزيرة ... نزلت الحويجة ومشت مشت مشت لقت حويش طقت عليه فتحولها خشت كيف حالكم ياعويلة الحمد لله قعدت تتعرف عليهم ويهدرزوا وكيف حصلت الجنية وتبي تدهور بيه في بلاد الله و لقتهم متغششين يهدرزوا معاها وهما متغششين ومتكدرين حتى ضحكتهم مشنونة ... خيركم ياعويلة شني فيه قالولها والله حنى زعلانين على بنيتنا صويبية مريضة مسيكينة تقطع وتريش دايريلها كتيبة   ... هييي ... شهقت اللطف وشكون دارلها الكتيبة دير ايديته في رقيبته دير دوايره وادهب شوايره قتلها امها والله ياحاجة هذا ولد عمها جي يخطب فيها مشي ماوافقتش عليه ماجاش على مهاوي قلبها قال الا مانوريها كيف هي رفضتني اللا منخليها تقعد هكي ونخليها تقطع وتريش ...مشي لسحار يهودي ودارلها كتيبة ومن هضاكا اليوم وهي على هالحال قد مارفعنا للطبة للشيوخ ماخلينا بيها مطراح كلهم يقولوا اللي فيها مانقدروش عليه .قتلها افتحيلي يابنيتي خلي نشوفها فتحت اميمتها الباب طبست عليها الحويجة لقتها بنية زي العسيسيلة قنينة زي البدر لكن في بوردوا تاني مسيكينة تقطع وتريش سكرت الباب تغششت العزيزة وقعمزت تخمم وقالت في بالها اليوم ما خاب وغضوة اندير شغلي ناضت من الصبح صلت وفطرت معاهم وقتلهم توا دلوني على حوش عمكم ... خيرك ياحاجة شن فيه شن درنالك شن تبي فيهم .... قتلهم غير دلوني عليهم ومعليكمش فيهم تلحفت ومشت قعدت تراقب من بعيد لين خش ولد العم للحوش طقت على  الباب اسيكم بالخير والهني ياعويلة وداهشة هاديكا العزوزة تلقط في نفسها الا تلقيط خيرك ياعمتي الحاجة قتلهم عطشانة كنت في السوق نشري في حويجات عندي عرس ومروحة لحوش فلان فيسع فيسع عندهم عرس بنتهم هاديكا فلانة واني داهشة قريب نطيح على وجهي طويسة امية يابنيتي ... قالولها مش مريضة قتلهم هاضاكا زمان والله برت وحالها خير مني ومنكم وهوينا خطبوها ناس مقومين وتوا هادي جيتي من حوشهم خليت  فيه الغنى والزغاريط والدربوكة رابخة وقالت هكي شربت طويسة المية وتاكدت ان ولدهم سمع الكلام تنطر يجري طلع من الحوش وهي طلعت في جرته وتبعاته مشي يجري لحوش السحار اليهودي طق الباب فتحله شده من رقبته قاله قول تكذب عليا واني نسال فيك على بنت عمي  وتقولي اهي تقطع اهي تريش ....وهي برت واليوم عرسها وقال هكي طبس ذبحه والعزوزة تتفرج من بعيد وقالت هكي ولت على متناها مشت تجري للحوش قتلهم نوضوا حلوا عليها الباب قالولها خليها في حالها ياحاجة مريضة وتقطع وتريش شن تبي فيها .... قتلهم غير نوضوا حلوا الباب ناضت امها حلت الباب لقت البنية مابيهاش وبرت ومافيها حتى شئ وقالت لامها جيعانة جيبيلي ناكل طبست امها تزغرط وصار الفرح في الحوش والغنى والزغاريط شن درتي ياحاجة قتلهم على اللي داراته وكيف خلت ولد عمهم يقتل السحار من هنى والسحر يبطل من هني قالولها والله جميلك ماننسوه ياحاجة اقعدي معانا نتونسوا بيك قتلهم لا معادش نقدر نقعد قالوها غير قولي شن تبي .... تبي مال تبي ذهب اللي تبيه احنى فيه (قالتلهم اعطوني ديناري بنروح لداري) خدت دينارها ووقفت على الشط واول مركب قتله (شلوحني ودلوحني في حوشي لوحني ) وروحت هاديكا الحويجة لحويشها ....

وان شاء الله ربي يبطل كل سحر
والا تكمل  تصلي علي الحبيب المصطفي
وتصبحوا علي الف خير 😘