خرافات زمان ليبية💗

خرافة الليله💕

#خرافتنا_الليلة

تحكي علي مرا ....زمان خذت راجل ...وهاديكا المرا كانت مقطع زين ....طول وقد زي السنبلة ...والشعر سالف يضرب لحزامها ...والوجيه خلقه المولي منقوش نقش ...المهم ...هاديكا المرا من نهار خذت هاداك الراجل وهي تجري ولا تدري من قضية ...لصابون ...لعجين ...لطبخ ...وتزرع ...وتحلب ..ورادة بالها من رزقه...مايجيها الليل لين اطيح زي الرطبة من التعب ...يجي هو حداها ...تقوله اليوم عييت قريب نموت من التعب ...يرد عليها هو ...يقول ..كان تموتي نحفر لك بقادومة الذهب .. هو يقول هكي وهي تزيد في الخدمة ..لين هملت روحها لاعاد خممت في ضفير ولا حنة ولازينة ولالبسة حلوة وقنينة زي النساوين ....عاد ماهو بيحفر لها نهار تموت بقادومة الذهب ..
نهار من النهارات فيه عزوز شيطانة ..وحدة فالحة تعرف البسباس ومن زرعه...جت هاديكا العزوزة خاطمة فاتت عليها المرا ..رايحة في حويلة سرافتها زي الجيفة ...وشعرها مكوكش عليها ...وحواجبها محط صبع ...والسنون مايبانوش من الغبش والايدين والرجلين حالة من الوشن ...من الزرع والحرث والقضية والصابون ...شوي شدتها العزوزة قالت الها خيرك يابنيتي هكي شكلك ...راجلك ميت وانتي في العدة ....قالت الها لا ياودي راجلي حي وهكي كبره ..وانا مش فاضية لروحي لاهية بيه وبصغاره وبحوشه وماكلته وصابونه ورزقه ...علي خاطر ديما يحلف لي نهار نموت بيحفر لي بقادومة الذهب ...ناضت العزوزة قالتالها طيح والله سعدك يادرويشة ...وانت صدقتيه ...ماهناك راجل مات علي مرا ...ونهار تموتي يغسل ايديه علي النعش ويقول ربي يرزقني خير منها...اشوي هاديكا المرا نطت في العزوزة قريب كلت لها وجهها ...الا راجلي مافيش منه .
امشت العزوزة قالت لها تو نوريك راجلك شن شكله ...تو ندبر عليك دبارة توريك راجلك كيف يفكر .
الصبح بكررررري ناضت هي وياها سقدت هاداك الرجل للسانية . هو طلع ماوصلش راس الشارع ناضت هاديكا العزوزة وسبلت المرا علي طولها ودردرت علي وجهها شوي بزار لين راحت صفرا...بدت العزوزة تعيط وتبوص علي طول رقبتها ...جي الراجل يجري.... خيركم شن فيه ...قالتله مرتك ماتت ...وربي خذي امانته خبط ايديه علي بعضهم ...شوي قالت له العزوزة برا شوف شن بدير في العزي واني تو انغسلها وانكفنها واندير اللازم...هو مشي من هني .. ..وجت العزوزة ... شدت هاديكا المرا غسلتها من قبوعة راسها لصبعها الكبير في رجليها ودارت لها الحلوة ونظفتها خلتها تضوي ضوي ونقت لها حاجبها وكحلت لها عيونها ...وحكت لها سنيناتها بطريف سواك وضفرت لها شعرها بالزيت والقرنفل ...وحنت الها ايديها ورجليها ...الحاصيلو مجي العصر لين ولت هاديكا المرا صيفة تانية.
لبستها ردي حرير وتكمتها وقعمزتها قبالة باب الحوش ..ومشت ضبحت علي راجلها ....جي هاداك الراجل يجري...شن تبي ياعزوز ...
قالت له اني هوني غسلت وكفنت لك مرتك وزود كان بتدفنها

....واني بنروح توا توا اني وبنتي قبل صلاة العصر ....ونعتته علي بنتها ...اللي هيا مرته ....وقالت الها تعالي يابنينتي سلمي علي الراجل وعزيه باش نروحو ....جت تتستل دوب ماتتحرك ومدت له ايدها سلمت عليه ...هاديكا الايد محنية خطيفة زي الرطب ..وركبت معاه صنة القرنفل في شعرها والعين قابلت من ركن مكحلة سودة ..والحاجب زي خط الوقيد...هاداك الراجل تخولط ...زمط ريقه ...لين شرق ...وشد العزوزة من ايدها ...وقال الها ...هذي بنتك ياسعد من حازها ..ماشاالله ...ناضت العزوزة قالت له فرقت حالها بنتي قاعدة بلا ماخذة ...انصدم هاداك الراجل ...قال للعزوزة لواه قاعدة هكي ...وهي زين وقد..ماخاصها شي ....والله كان تقول باهي توا نقرا فيها فاتحة وماتروح معاك وتبات من الليلة مرتي ...بعد ماندفن مرتي الاوله ......ناضت العزوزة قالت له مادبيا وين نلقا خير منك غير حاجة وحدة بس ...بنتي عندها شرط واحد وحالفة ماياخذها راجل الا لما يوافق عليه ...
قالها شن شرطها ...اهيا رقبتي وتشرط لين تعيا ...اللي هكي شكلها تشرط كيف تبي ....توا هديكا المرا ..تسمع فيه . تسف في الملح وتاكل في بعضها .
امشي ياحنة هاديكا العزوزة قالت للراجل شرطها علي الراجل اللي بياخذها..يقعمز في الوطا ويتربع ويحط فوق راسه ليان وبنتي تركب في الليان وتبول في وسط الليان .......
قالها هو هذا بس الشرط ...بري ياعزوز جيبي الليان ...مشت العزوزة جابت ليان كبيييير وقعمز هاداك المسبوه تربع في الوطا وحط الليان فوق راسه ...نادت هاديكا العزوزة مرته وقالت الها اركبي ...ركبتها في الليان وقالت الها تو يلا تخففي في الليان .....شمرت هاديكا المرا وتخففت في الليان ...ناض هاداك الراجل ...قال ....ايه بنت المليح صحيح ...حتي بولها في الليان يسيح .
امشت هاديكا العزوز ضربته بعكوزها علي عنفقته بقوة قوتها ...لين تبزع عليه البول ...وقالت له ..
هادي الاوله ياولد القبيح ....اللي ما ينفع معاه مليح .
وهادي خرافة اللي مهبولة وتحسب راجلها حد الدنيا ...نهار ناض قال
لاني بوك ولاني خوك ...ولاتجيبي الاعذار عليا ...
عديني زي قاتل بوك ...وحبيني محبة دونية