خرافات زمان ليبية💗

تاجر الاكحل وعزوزة الستوت💕

خرافه الليله

#التاجر_الاكحل_وعزوزة_الستوت

ياحزاركم يامزاركم علي تاجر في بلاد من البلدان متزوج بنت عمه حسن وجمال وقد وعقل وتباتة، يحبها وتحبه روحين في جسم واحد هيا تحلف براسه ولا تحنت وهو معبودته بعد الله ، جي عام التجارة كسدت في بلادهم وفكر التاجر انه يجهز قافلة ويعبيها من بضاعته ويتاجر بيها في بلاد تانية، جي لبنت عمه وقلها التجارة كسدت ونقعد بالقداش مايجينيش شاري، وجهزت قافلة وبنرفع بضاعتي بالك نلقى من يشريها مني في البلاد الفلانية ، وخلالها مونة عام كامل ومعاها خادمتها وقلها غدوة بإذن الله بنتسقد. قتله علي بركة الله ، وتاني يوم توكل علي ربي ومشي مشي مشي لين وصل لبلاد ، هديكة البلاد فيها تاجر اسمر يسمو فيه بالتاجر الاكحل نصاب رزقه كله واخده بالنصابة كان كل مايجي تاجر جديد لبلادهم يلود بيه يفرح بيه ويكرمه ويعزمه في حوشه ويقوله بنلعب معاك شطرنج وهو فالح فيها اللعبة وماعمراش خسر ويراهن هو وياه يقوله كان ربحتني رزقي كله ومحلي نعطيهولك وكان اني اللي ربحت بتعطيني كل بضاعتك اللي جايبها معاك ، واول ماوصل التاجر تلقاه التاجر الاسود مرحبتين الحمد لله علي سلامتك زارتني البركة وقاله اضيف عندي. قاله غير خلي نمشي للفندق نرتاح انحط بضاعتي قاله شيء توة تمشي معاي لحوشي قاعد بروحي حتى زواج مش متزوج ومعاي الا الخادم تجي تقعد عندي وتضيف عندي!! قاله باهي!! ومشي معاه ضيفه ضيافة ملوك ماكلة اشكال والوان وفواكه وخضرة، وبعد العشي قال للخادم جيبلنا شاهي منعنع شربوا وهدرزو وبعدين قاله : تعرف تلعب شطرنج؟ قاله ايه نعرف شوية، قاله: امالة هيا لاعبني، وبعدين جابو الشطرنج ولعبو التاجر غلب التاجر الاكحل طلع اشطر منه في اللعب قاله هيا نعاودوا زاد غلب التاجر وزادوا الثالث والتاجر الاكحل يخسر وقفوا اللعب وقعدو يهدرزو عالسفر عالتجارة وشن فيه في بلادكم وشن يمشي وشنو مايمشيش لين وصلو في العائلة والحوش. التاجر الاكحل قال لضيفه اني مش متزوج وعايش بروحي خاطر النساوين مافيهمش امان قاله التاجر ماتقولش هالكلام الباهي والشين في كل مكان رجال ونساوين وصباع اليدين مش زي بعض اهو اني متزوج بنت عمي عقل ودين ولا تطلع ولا تخش مافيش ولد مراء يقدر يجيب فيها امارة قاله: انت مازال علي نياتك و تصدق في النساوين. قاله: مرتي مرت عمي ونعرفها زي مانعرف نفسي متربية وعايشة قدام عيوني،
قاله: باهي شن رايك نجيبلك منها امارة ؟
قاله: شنو امارة من مرتي؟!! قاله: نعم!!!
قاله : باهي شن رايك نتراهنو يااما تاخد رزقي ونولي عندك خادم وكان جبتلك منها امارة انت تعطيني رزقك وتولي عندي خادم!!
قاله : باهي ،وتاني يوم تسقد التاجر الاكحل ويمشي ويسال لين وصل للبلاد ولحوش التاجر واول ما شاف الحوش العتبة من قلة الاستعمال لقاها لين مدايرة العشب قال: شكلها الحكاية صح والمراء لا تطلع لا تخش وقعد ماشي وجاي قدام الحوش ومن راس الزنقة لراس الزنقة يشوف للحوش بالك حد يطلع ولا يخش لين ليل عليه الليل . وتاني يوم نفس الشي قعد ماشي جاي ويشبح للرواشن للبلكونات للباب شي لا واحد طل ولا فتح باب ولا من خش ولا من طلع كأنها الدار مش مسكونة، وزاد اليوم الثالث الرابع الخامس اسبوع شهر وشي ماشافش لا من فتح الباب حتى شق لا وبعدين ايس وقال بنرجع لبلادي وقعد يخمم رزقي كله اللي خديته من الناس بياخده التاجر وبنقعد عنده عقاب عمري خادم ، وهو في هالحوسة يخمم وماشي وجاي علي خطمة عزوزة الستوت الله لا ترحمها يوم تموت جاته وقتله: ياشبيب!! ياشبيب!! قلها: نعم يمي ، قتله: ماتقوليش خيرك طول النهار ماشي جاي ماشي جاي قدام هالحوش شن اللي صعب عليك اني نسهله لولدي
قلها: ياامنا الكبيرة تبي تستغني؟
قتله: ياوليدي اللي بيدير الخير مايشاورش!!
قلها نبي امارة من مولاة الحوش هذا . قتله: هو هذا؟!! برة ارقد واطمن واني نجيبهالك وجت قدام الحوش ووقفت ودخلت فمها في شق الباب وقعدت تنادي يابنيتي يامولاة الحوش اني اميمتك مراء كبيرة ولا والي لا تالي واعطيت بنيتي والعريس يبي العرس توة وماعنديش باش نجهز بنيتي ؛ ارحميني وتفكريني بحويجة وادعي لبنيتي ربي يزيدك من رزقه. وقعدت اطقطق وتنادي اليوم الاول والتاني والثالث وشي لا كلمها حد ولا فتح الباب وهي ماشية جاية ونهار سابع يوم تشبح في حبل نازل من فوق السطح حاجة مربوطة فيه خدتها لقتها محرمة هندية فتحتها لقت فيها قفطان هداته مولاة الحوش للعروسة خداته تجري ومشت للتاجر الاكحل اعطتهوله وعطاها فلوس ومشت علي حالها، وهو ركب حصانه وتسقد لبلاده وين مافي التاجر اللي تراهن هو وياه. اول ماوصل لقي التاجر يستنى فيه قاله هيا نمشو للدكان مشي هو وياه للدكان فتحله المحرمة وطلعله القفطان وقاله هذا القفطان تعرفه ولا ماتعرفاش؟ التاجر شاف القفطان انصدم ووجهه تغير وعيونه زغللوا وطاح ساكت.
بخوه بالمية وفيقوه واول مافاق قاله عرفت القفطان؟ قاله عرفته !! قاله خلاص ماعاش فيه خير في الدنيا ومشي التاجر الاكحل جاب كاتب العدل وكتب عليه ورقة وخدي رزقه كله والبضاعة اللي عنده وولا عنده خديم والتاجر الاكحل زاد شرط عليه انه يخدم عنده من غير حتى ماكلة ولما يجوع يمشي يعاون في صاحب الكوشة باش يعطيه فردة خبزة ياكلها!!
مرت التاجر مش عارفة شن صار قعدت تستنى في ولد عمها وراجلها خيره معاش رجع انشاء الله خير وبعدين قالت للخدامة متاعها هو مش قال بنمشي للبلاد الفلانية ؟ قتلها ايه ، اعطتها فلوس وقتلها بري اشري حصان ولبس راجل وامشيله في البلاد الفلانية وانشدي عليه وتعالي قوليلي شن صاير ، طلعت الخادم وبتفتح الباب من قلة الفتح والعشب اللي تحته ماباش ينفتح قعدت بالشوي تقطع في العشب وتفتح في الباب ومشت شرت اللي وصتها عليه للاها ومشت للبلاد اللي فيها التاجر اجرت دار في فندق وركبت حصانها وقعدت تلود من سوق لسوق من زنقة لزنقة وتنشد يوم يومين ثلاثة ، وفي يوم خشت للفرن بتشري خبزة لقت سيدها لابس شكارة ويعجن مع اللي يعجنو في الخبزة شافاته عرفاته لكن هيا مغطية نصف وجهها ماعرفهاش
طلعت من الفرن خشت للقهوة قعمزت ولقت واحد قعدت تهدرز عليه وبعدين سالاته عليه قتله هداكة الصانع اللي في الفرن من يكون مشبهة عليه؟ وشكله ولد اكابر مش ولد الصنعة هادي
قلها : اه هذا قصته قصة!! هذا مش من بلادنا هذا كان تاجر في البلاد الفلانية وجايب معاه قافلة معبية بضاعة وصارله ......وصارله ..... مع التاجر الاكحل وحكالها الحكاية وقلها توة خديم عنده.
مشت الخادم ورجعت لبلادها وحكت لللاها كل الحكاية وكل اللي شافاته قتلها خلي نفكروا شن بنديروا وقعمزو يفكروا ويحكو وبعدين مرت التاجر مشت للخزنة خدت منها الذهب وقتلها إمشي اشريلي مية جمل وحطيهم في الفندق وامشي لسوق العبيد اشريلي 99 خادم وعبي الجمال بالبضايع وجيبلي بدلة راجل
هديكة الخادم مشت دارت اللي وصوها عليه وطلعت لللاها طابع مشت مرت التاجر طبعت بيه الجمال والسلع والخدم اللي شرتهم ولبست لبسة راجل وقالت للخادم متاعها اقعدي في الحوش اني بنمشي للبلاد اللي فيها سيدك ونشوف شن صاير؟ وتسقدت هيا وعبيدها وحمالها المحملة بضاعة واول ماوصلت للبلاد جاها التاجر الاكحل زي عوايده مع كل تاجر....
مرحبا بيك الحمد لله علي سلامتك زارتني البركة ، والله الا عندي تفضل ، قتله استنى اندخل القافلة متاعي للفندق وتو نجي. مشي معاها للفندق وفتح فمك في هدوكة الجمال والبضاعة والعبيد وقال هدومة الليلة بيباتو عندي ويبدو ملكي!! وصلوا للفندق وبعدين مشوا لحوشه وموصي هداكة الخادم يديرل للضيف وجبة ملوك تعشو وشربو شاهي، قاله التاجر الاكحل تعرف تلعب شطرنج؟ ردت عليه نعم نعرف!! نادى الخادم وقاله جيبلي طاولة الشطرنج، وفتحها قدامها قتله استنى شوية راني عندي عادة مانلعبش الشطرنج الا علي ضو شمعتي اني!! قلها التاجر الاكحل عادي. طلعت شمعتها وولعتها وحطتها قدامهم وهديكة الشمعة فيها منوم وهيا مدايرة لثام علي وجهها باش مايوصلش فيها وبدوا يلعبو؛ الطرح الاول ماتمش وهداكة التاجر الاكحل نعس ورقد عالطاولة وقعد صوت نخيطه يسمع لوين ووين خدت الطابع متاعها اللي عليه اسمها حماته في النار وطبعاته بيه وهو من كثر المخدر اللي شمه مافاقش ييها دايخ؛ وخلاته وطلعت من حوشه.
تاني يوم الصبح مشت لمحكمة السلطان خشت وحياته وقتله ياسيدي الظلم موجود في بلادك؟ قلها شنو اني في ظلم في بلادي!!! قتله اني تاجر من البلاد الفلانية وعندي مملوك ليه سنين هارب مني وتوة بالصدفة جايبة قافلة لبلادك لقيته هنايا في بلادك ومداير روحه تاجر!!! قلها من هو؟ قتله مسمي نفسه التاجر الاكحل ، قلها التاجر الاكحل؟!! التاجر الاكحل؟!! بالك يوليدي غالط قتله اسمع ياسيدي السلطان اني كل حاجة نملكها لازم نحط عليها الطابع متاعي جمل حصان خادم بضاعة كل شيء نطبع فيه حتى الشكاير اللي نتاجر بيهم واهي القافلة متاعي في الفندق الفلاني ابعت حد يشوفها يلقى طابعي في كل حاجة. بعت واحد وشاف البضاعة الشكاير الجمال والعبيد كلهم مطبوعين باسمها قلهم جيبولي التاجر الاكحل!!!
هداكة التاجر الاكحل ناض الصبح لقي روحه راقد عالطاوبة راسه دايخ وعيونه منفخات مش قادر يحلهم قال ياخسارة نعسني النوم وخليت التاجر يروح وماخديتش منه بضاعته لكن مازال الليالي هلبة.
وشوية ويسمع في تخبيط عالباب فتح قالوله السلطان يطلبك في الحال!! ناض مشي معاهم للمحكمة !!! السلطان قاعد والقاضي والدايرة متاع المحكمة ومعاهم مرت التاجر طبعا السلطان مازال مش مصدق يعرف التاجر الاكحل تاجر كيير في بلاده ليه سنين وكل الناس يعرفوه برزقه بجاهه ويقدروه حتى الامراء والسلاطين اول ماخش التاجر الاكحل قاله السلطان اهلا وسهلا ياوليدي تفضل اقعد . قعد قاله: اسمع اليوم من الصبح شبعت من الضحك، قاله: دوم ياسيدي الضحك. قاله: شوف التاجر هذا الضيف تعرف شن قالي ؟ قالي انك كنت مملوك عنده وليك سنين هارب وجاي هنايا لبلادي!!! قعد التاجر الاكحل يضحك ويقهقه وقاله والله الا معاك حق ياسيدي انك تضحك هذا لازم مهبول!! ناضت مرت التاحر قتله: ياسيدي احنا خيرنا نطولوا فيها وهيا قصيرة شفت المماليك متاعي كيف مطبوعين باسمي؟!! كان مطبوع باسمي اعطوني رزقي!! وكان مش مطبوع اقطعلي راسي!! ورزقي كله ياخده هو!! قال السلطان للتاجر الاكحل نقولك خلي نسايروله علي قيس عقله بالله خش خلي الحرس يشوفوك ، خش وجي واحد من الحرس شافه وطلع قال للسلطان ياسيدي السلطان راهو مطبوع ونفس الطابع اللي مطبوع بيه ال99 خديم متاع التاجر الضيف !!! السلطان تفاجأ وقاله الله الله ليك قداش داير روحك في بلادي اكبر تاجر وانت مملوك وهارب!!! وقال لمرت التاجر: هيا خود رزقك ياولدي اني الظلم مايمشيش في بلادي ، مرت التاجر امرت الخدم متاعها يكتفو التاجر الاكحل تكتيفة باهية وسلمت عالسلطان وشكراته واعطاته هدية ومشت لحوش التاجر الاكحل ولمت كل رزقه وعبيده وبضايعه ، وباعت داره والدكاكين متاعه وخدت فلوسهم ، والخدم متاعه ولو ملكها . ومنهم كان ولد عمها وراجلها وهو مش عارف شن صاير. وجهزت القافلة ورجعت لبلادها وراجلها راكب علي جمل ووصلوا للبلاد راجلها قال: هاذي بلادي ووصلوا للزنقة راجلها قال: هادي زنقتي ووصلو للحوش قال: هذا حوشي الله الله !! شوره بنت عمي خدت عليا راجل تاني.
خبطت مرت التاجر عالخادم فتحتلها الباب دخلت الرزق والصناديق والجمال والعبيد بعتتهم لمزرعتها وخششت راجلها والتاجر الاكحل مكتف للحوش ونحت اللثام، شافها راجلها قال: هادي بنت عمي؟!!! قتله نعم بنت عمك اللي بعد العمر والعشرة شكيت فيها .
وسالت التاجر الاكحل قدامه قتله انت تعرفني،؟ قلها لا!! وجهك عمري ماريته !! قتله امالة منين جاك القفطان؟ قلها عزوزة اعطيتها فلوس جابتهولي وراجلها يسمع . قتله برة امشي ماتبليش عليا اني . برة في حالك وثمن عذابي اني وعذاب ولد عمي هاك قعدت بلا رزق ؛ واني نقدر نخليك عندي مملوك لكن برة عتقتك لوجه الله برة في حالك وسادك اللي جاك . وتمت حكايتنا!!!