خرافات زمان ليبية💗

المرأة الصالحة والمرأة الطالحه💕

#حكايتنا_الليلة....#المراء_الصالحة_والمراء_الطالحة..

..حكايتنا الليلة تحكي عالرجل وحظه في المراء اللي معاشرها زي مايقولو كل واحد وزهره وحظه في هالدنيا وعلي الفرق بين المراء الصالحة والمراء الطالحة ..
وناس قبل قالت حتى ولدك ادعيله بقوة السعد مش غير بنتك .. فيه من ياخد مراء تزيد اطوله رقبته قدام اماليه ونااسه حتى لو كانت قبل قصيرة اول ماياخدها تخليه سلطان زمانه وكل كبير وصغير يحسبله حساب وفيه اللي يطيح فالطالحة وتلقيه بعد عزه ودزه يبدا سيرته علي لسان اللي يسوى واللي مايسوى وهي خليكم معاي..

يحكولنا علي سلطان وماسلطان غير الله واللي عنده ذنوب يستغفر الله هالسلطان رازقه ربي بحكيم عقله يوزن بلاد يشاور فيه علي كل كبيرة وصغيرة وكان هالسلطان ديمة خايف ويشكي من الكبر وديمة يقول لحكيمه غير كان غير نحصل دواء يفكني من هالكبر نبي نقعد ديمة صغير وصحيح لين ربي ياخد امانته .. ووين ماهذا ينشد في الطباء والعرافين يقولهم ماناقصني حاجة ..مال ورزق وجاه وبلاد جنة وناسها يدعولي بطولة العمر.. مانبي غير دواء الكبر مانبيش نكبر.. بالك عندكم عشيبة ولادواء ولا حاجة تخليني زي مااني ..يقوله الا هادي ...هادي حاجة ربي مانقدرو نغيرو فيها شيء .. الكبر والصغر والموت والحياة بيد الله ..ووين مايقولوله هالكلام اطيرله ومرات حتى يلز فيهم ويقولهم امالة علاش اسمكم طبة كان اللي نبيه ماتقدروش عليه ..
والعام اللي بعده ينسى ماكان يناديهم تاني وينشد فيهم بالك سمعتو حاجة جديدة ولا عرفتو حويجة ..يقولوله ماهناك شيء ولا سمعنا شيء .. وبعد سنين من المراجاة نادي الحكيم وقاله عرافين هالبلاد معاش ينفعو بيا واني كل عام نقول هالعام والعمر يجري بيا وماهناك شيء ونبيك غدوة من الصبح تودع عويلتك وتوتي مالازمك وترحل في بلادات الله الواسعة وماتروحلي الا ومعاك دواء الشباب وطولة العمر.. جبتهولي اللي تطلبه مايغلاش عليك .. جيت بلاه ماتسمع كان براسك اللي بيتكركب بين رجليك ..
هداكة الحكيم شن عنده مايقول السلطان عقله خف واندهبت شيرته وماقدرش واحد يرجعه لعقله كان مالطف بيه ربي وهو راسه بينقص وصغويرته بيتقزنو في في شربة امية .. فكر من هني من هني وقال نرحل ونغيب سنين وبعدها يدير الله طريق .. روح لحوشه يكر في رجليه وراسه في الوطا يخمم وصل حوشه قال لمرته الليلة اخر يوم مع بعض جيبيلي الصغويرة يكشكشو حداي بنشم صنتهم ونشبع منهم مرات بعد سنين نرجع ونشوفهم ومرات ربي ياخد امانته ومعاش نتلاقو ...
خيرك ياراجل شن فيه ... اللطف شن هالكلام اللي خطر عليك اليوم..؟! قلها السلطان هكي قال وهكي قال وغدوة الفجر نبي كل شيء واتي بنرحل ...جابت هديكة المرية الصغويرة وخلتهم حداه وهيا مشت تصرصر في الحوايج وكل مايلزم للسفر وحطاته في الخرج باش الصبح يحطهم عالفرس ويتسقد ...
صبح الصبح ناض الحكيم ودع مريته واضبط صغويرته وخلاهم يتباكو ومشي شد الطريق.. وقعد هداكة الحكيم يخش بلاد يطلع بلاد قطع سهول وجبال ووديان والبلاد اللي يوصل فيها ينشد في عرافينها نبي دواء الشباب وطولة العمر لسيدي السلطان .. فيه اللي يهزء عليه .. وفيه اللي يقوله شن تخرف .. وفيه اللي يقوله مازال مااخترعوشي .. وكل واحد يقوله كلام ..قعد هداكة الحكيم يلود يدور علي يبرة في كومة قش مرواح ماعاد يقدر يروح واستاحش صغاره وقال بالك نلقى حتى واحد يكذب عليا المهم يعطيني اي مصيبة نسكت بيها السلطان سنين لين ياهو يتم عمره يااني ... عارف حل مافي حل غير اهو عالاقل يقضي عقاب عمره بين عويلته وصغاره..
قعد سنين وهو يدور وينشد لين في يوم من الايام خش لقرية وقعد ينشد في العطارة والعرافين بالك عندكم عشبة اطول العمر قالوله طلبك ماعندناش لكن راهو عندنا زوز خوت ساكنين بعويلاتهم فوق الجبل زمان كانو بقوافلهم ومافيش بلاد مازاروهاش برالهم بالك تلقى عندهم الحل ولا يدلوك لمكان وين تلقى طلبك..
ركب هداكة الحكيم الجبل وكانت القمة بعيدة وين مايسكنو الخوت وماوصلش ليهم لين قريب يمغرب المغرب ... قابله من بعيد حوش ربط فرسه في شجيرة ونزل علي رجليه وصل وهو داهش من المشي.. قابله شويباني مقعمز قدامه علي بلكة الشعر ابيض مصفي ووجهه مكرمش يبان في الثمانين وهديكة اللحية نازلة علي كتافه بيضاء زي سبايك الفضة لين مخلطة علي شعر راسه شوره ليه سنين لامسها موس حسانة ولا مقص ... السلام عليكم يابوي ..قام الشويباني عويناته شوره حتى الشبح عنده بالهون ورد عليه ..السلام هي تفضل وصلت مرحبتين ... قعمز الحكيم بحداه علي رشيدة وقعد يتفرج يمين ويسار ..حويش صغير وهديكة الحاجات حايسة هني وهني.. شيش وحبال وخيش وسطول وعقاب كراسي مكسرات وحكاك شكلهم ملوحات ليهم وقت نفصهم مردومات في التراب
قاله وصلت مكاني وماعاد نقدر نقدم خطوة خليني مانبي منك شيء كان مكان وين ندك راسي نبات الليلة وغدوة من الصبح بنتسقد علي حالي .. الحكيم ماكملش كلامه زين لين يسمع في صوت مراء تلعلع من داخل الحوش شوره مرته وكانت تتصنت فيهم وقبل مايتكلم حتى الشيباني قتله ماعندناش مكان للضيوف برا دور مكان تاني وين تبات .. الشويباني وجهه تقشر من الحشمة نزل راسه في الوطا وقاله سامحني ياوليدي هاك سمعت بوذنك الله غالب.. ناض الحكيم وهو حتى راحة مازال ماارتاحش زين مشي لفرسه وحل لجامه وركبه وكمل طريقه.. مشي ..مشي ... مشي وبعد شوية قابله حويش من بعيد يزهي العين والخاطر شكله ... النظافة والترتيب تبان وزي مايقولو الربيع من فم الحوش يبان .. هدوكة محابس الورد حايطين بيه اشكال والوان والفل والياسمين معنكش في جنب الحوش وهديكة ريحته تفحفح توعي النفس... وفي جنب الحوش مفرش حصيرة وزوز منيديرات ومخيدات وبحداهم جرة المية مغطية وكوينين نار بحداها وفوق منه براد الشاهي وصنة النعناع تفحفح منه وفي جنبه هديكة الخبيزة اللي كيف طالعة من فرنها والعصيفيرات يطيرو فوق هدوكة الشجيرات ويغنو ..وفي تريكينة الحوش راجل مصنع امنع يبان النور علي وجهه ..وهديكة البدلة العربية مرشوقة عليه بيضاء تقول شمامة والفرملة المطرزة ..
شاد في ايديته سبحة ويسبح بيها .. اول ماشاف الحكيم ناض وقف وجاه يجري .. مرحبتين بضيف ربي شرفتنا وحوشي نور بيك ..هي تفضل تفضل وصلت مكانك .. اول ماقعمز مدله جرة المية شرب منها امية مصقعة حلوة مزهرة وبعد شرب اعطاه فوطة مسح بيها فمه وضبح علي مرته تعالي ياسالمة غطي راسك وتعالي اليوم عندنا ضيف ... طلعت المرية مغطية راسها ترحب وتعاود تقول شافت بوها ولا خوها قدامها .. صبتله الشاهي ومدلته الخبيزة السخينة وخشت داخل كان عندها جبينة كيف عصرتها جابتله صوينية ومعاها زويتينات غاميات .. وبعد كلي جابتله مندار من داخل وفرشتله عالحصيرة ومخيدة ونصولة وزادت عبتله المية وحطتها بحداه وهيا في فمها كان كلمة مرحبتين واهلا ..
سهر معاه هداكة الراجل وهدرزو مع بعض هدرزة عادية علي حال الدنيا وحوالها ولا نشده انت منو ولا منين جاي ولا حتى لاش جاي .. وبعد انتصف الليل قاله بالك تبي حاجة قبل مانخش نرقد في داري.. قاله الحكيم سلامتك تصبح علي خير ..قاله وانت من اهل الخير وكان ناقصاتك حاجة عقاب الليل ولا تبي حاجة ماتتحشمش غير ضبح واني نجيك .. تمناله ليلة سعيدة وخلاه وخش رقد في داره..
صبح الصبح هداكة الحكيم ناض علي صنة العطر يفحفح في الشاهي فتح عيونه لقي الراجل مقعمز حداه موتيله كروانة وامية وين يغسل وجهه وفوطة وبعد كمل قدمله الصفيرة طاسة لبن وخبيزة معفوسة بالسمن كلي وتحمد وتشكر واتكى عالمخدة وبدون ماينشده حكاله علي قصته وعلاش جايه وقاله قبل مانجيك مريت علي خوك الكبير ... ياناري راجل كبير وصحته بالهون لكن انت ماشاءالله عليك صحيح عيني مااضرك ... ضحك الراجل وقاله اللي كنت عنده هداكة خوي الصغير واني اكبر منه بسبعة سنين ...استغرب الحكيم وقاله ماتقولهاش ... انت الصلاة عالنبي عليك شباب وصحة تبان صغير حتى الشيب مش شايب هلبة وهو راسه ولحيته مصفيات وحتى من وجهه مكرمش ..
وقاله كان تندري ليا سنين مسيب بلادي ومرتي وصغاري واني ندور علي سر الشباب والصحة وطول العمر واهو انت قدامي خير مثال وتوة نبي نعرف منك السر واللي تطلبه مني حاضر ... ضحك الراجل وقاله غير خلينا نغدوك ونكسبو فيك اجر الضيف وان شاءالله بعد الغدي تو نقولك السر شن هو .. مافاتوش سويعتين وكان هداكة البازين معنقر في قصعته يبوخ قدامهم والراجل مولا الحوش من مكانه ماناضش ولا حتى قال لمرته شن اديري وشن مااديريش ولا شن ناقصك ولا حتى حاجة .. ساوو قعدتهم وربعو رجليهم علي هديكة القصعة تغدو وغسلو ايديهم وبعده قاله مولا الحوش خلينا نقعمزو في مكسر الظل تحت هديكة الشجيرة اللي اطل عالوادي الشمس وصلت فينا ... ناض الراجل وضيفه لقي المراء من غير مايقوللها مفرشتلهم حصيرة ومنيديرات ومخاد باش يتكو وقاله تو وقت الخضرة تبرد علينا بعد هالتغداية السمحة .. نادى مرته وقلها امشي للسانية وشوفيلنا دلاعة طايبة وحلوة خلي نبردو بيها ونحلو ... وكانت السانية مش قريبة مسافة علي الحوش في اسفل الوادي .. مشت المرية ونزلت الوادي والرجالة مقعمزين ويستنو .. غابت عليهم قريب ساعة مشي وجي وبعدها جت وفي ايدها دلاعة مدتها لراجلها شدها بين يديه وقعد يخبط عليها وبعدها قال لمرته هادي شكلها مش طايبة زين رجعيها وشوفيلنا وحدة تانية ... خدتها المراء وعلي فم ساكت ونزلت تاني للسانية اسفل الوادي وغابت حتى هو ساعة تانية وبعدها جت وفي ايدها دلاعة تانية ومدتها لراجلها خبط عليها خبيطتين وزاد قلها حتى هادي شورها مش طايبة زين .. ومن غير مايقولها نبو وحدة تانية قتله حاضر تو نزيد نشوفلكم دلاعة خيرً منها .. خدتها ونزلت ثالث مرة للوادي وجابت دلاعة خداها منها راجلها وقلها ايه هادي باهية وتستر فتحها وكلو منها ووكل ضيفه وباقيها قلها دخليها للصغار خلي يتبردو بيها ..الحكيم استغرب وقاله وانت عندك حتى صغار ..؟! قاله ايه بنيتين ووليدين داخل في الحوش ... الحكيم زاد اصر وعاود سؤاله للراجل وقاله توة نبيك تقولي هالعشبة ولا الدواء اللي تاخد فيه بيش حافظت علي صحتك وشبابك شنو هو السر قولي ...؟! ضحك مولا الحوش وقاله لاهي عشبة ولا دواء .. لكن السر في صحتي وشبابي هيا مرتي ..قاله الحكيم وهو مستغرب كيف..؟؟ قاله هالمراء اللي تشبح فيها قدامك من يوم تعاشرت اني وياها وعندي منها توة اربعة صغار ماسمعت منها كان كلمة حاضر ونعم وماريت منها كان الود والرحمة والقدو .. ساتراني وصاينة عرضي ومطولة رقبتي قدام القاصي والدوني وماتشوف منها كان الوجهه البشوش وماتسمع منها كان الترحيب والكلمة الطيبة ...
سكت شوية وبعدها قاله ... هل تعلم ياحكيم انه في سانيتي مافيش الا دلاعة وحدة وهيا عارفة ان عندنا دلاعة وحدة و نزلت ثلاثة مرات للوادي وفي كل مرة تجيبلنا في الدلاعة نفسها واني نرد فيها ونقولها جيبي التانية وشيء ماقالتش كلمة كان حاضر ونعم وحتى وجهها مابانش عليه اي علامة غضب بيش ماتنقصش من قيمتي قدامك ... تعجب الحكيم من هالمراء ووسعة بالها ورحابة صدرها وطيبة منبتها ... وعرف السر اللي ليه سنين يدور فيه وان السعادة وراحة البال والصحة والشباب تصنعه المراء الصالحة بحبها وعطفها واهتمامها بصغارها وحوشها وراجلها ولا تنفع معاها لا دوايات ولا اعشاب ... المراء الصالحة هيا اللي تخلي الراجل شباب وصحة وحيوية والمراء الطالحة اللي زي مرت الخو هيا اللي تكبر الراجل قبل وقته وتقصرله في عمره ورقبته مع ضيوفه واهله ويموت ناقص عمر من الحسرة وتقشير الوجه ...
الحكيم شكر مضيفه علي ضيافته ليه وهناه بمرته ودعاله بالخير هو وصغويرته وودعه وقاله عرفت سر الشباب والصحة وتو بروح لسلطاني باش نقوله عالسر
... ودعه مولا الحوش ولقي مرته موتيتله صرة فيها كل مايحتاجه في الطريق وامية حطهوله علي سرج فرسه وقاله سلامتك في امان الله طريقك زينة ... وشد الحكيم الطريق طول لين وصل لبلاده بعد غياب سنين واول ماوصل حتى حوشه مامشالاش مشي طول لقصر السلطان بيقوله علي سر الشباب والصحة وطولة العمر قالوله السلطان اعطاك عمره بعد مارحلت من هني ماسكرتش سنة قلق وعيي من المراجاة وجاه واحد من العرافين وعطاه دواه قاله يوقف الشيخوخة ويطول في العمر خداه من هني مافاتش اسبوع ولا عشرة ايام لين لقوه ميت في فراشه وشد ولده سلطان من بعده ...
فرح الحكيم وقال جاك الفرج ياطالب الفرج ومشي لمرته وصغويرته وكمل عقاب عمره معاهم وحتى السلطان الجديد لا مشاله ولا دوره عيي من عشرة السلاطين وهمهم ماباش يقوله حتى رجعت البلاد ولا عرفت السر ... ومشيت عليهم وخليتهم بوذني سمعتهم وبعيني ماريتهم وتمت حكايتي وان شاءالله عجبتكم