خرافات زمان ليبية💗

بنت الغوله

#خرافة_اليوم

ياحنااااا يامنا ربي يعطركم بالزهر والحنة ويجعل مقامكم من مقام الجنة
كان ياماكان كان فيه راجل في بلاد بعيدة عنده بنيتين والثالثة امها وهيا تولد فيها توفت رحمة الله عليها وقعد راد باله منهم هو البو والاميمة وكانت خدمته علي قد الحال تكفيه هو وبنياته وتزيد شوية يطلع من الفجر مايروحش كان المغرب ، كان يحب كل بنياته لكن الصغيرة بزيادة حان عليها بعد ماجابتها امها وتوفت راد باله منها ويرقد فيها بحداه لين كبرت زي خواتها وكانت هيا البنية زينة خواتها زي الغزيلة وخواتها كانوا يكرهوها وغايرين منها وحاقدين وديمة يقولولها انتي نحس قتلتي امنا ومن يوم ولدتي واحنا مارينا خير ، وهيا تسمع وساكتة تمسح دميعاتها وماتردش عليهم وبوها كان يعارك فيهم ويقولهم هذا امر ربي معاش تقولو لاختكم هالكلام .  وزايدهم زايد حتى من الناس والجيران كلهم يحبوها لفعالها الباهية وطيبتها وحانين عليها لانها يتيمة من اول ماولدت بلا اميمة.   بري يايام وتعالي يا أيام مكاتيب ربي البو مرض ماعرفوله دواء وبنيته الصغيرة كل يوم تعاني فيه ورادة بالها منه وتبكي وتغرد وخواتها زايدينها كله منك يا نحس  كله منك رزيتينا في آمنا وتوة حتى بونا بيمشي ويخلينا ومنو بينا ، وكانت مسيكينة تجي بحدا راس بوها وتبكي وهو مريض ماعاد عنده ليهم جهد يقلها ماتعدليش عليهم الموت والحياة بأيد ربي العالمين ولما زاد عليه الحال جمع بناويته الثلاثة وقلهم ردوا بالكم من بعض وبنيته الصغيرة تبكي وتمسح في دميعاتها، ومع الفجر توفى وقعدوا هدوكة الوخيات بروحهم ، ومرت ايام وهديكة المونة اللي مخليهالهم بوهم تمت وتجارة بوهم وقفت ومالقوش من يصرف عليهم ناضوا هدوكة الخوات في وخيتهم الصغيرة انتي ياوجه النحس كله منك انت السبب في اللي احنا فيه انتي توة بري اخدمي وجيبيلنا ماناكلو ومانلبسوا !! طلعت هذيكة البنية  في النهار شدت خدمة بوها وتروح في الليل بصوف تخدم فيه وتبيع فيه وتشري بحقه لخواتها ماياكلوا ومايلبسوا ، وقَعَدت علي هالحال ايام وشهور وكل ماتقول لخواتها تعالوا عاونوني يقولولها احنا مانعرفوش لانخدموا الصوف ولا نبيعوا ونشرو  زيك
.وفي يوم من الايامات كملت شغلها ومروحة باش تشري الصوف حست روحها عطشانة لقت روحها بحدا حوش كبير قالت خلي نطلب منهم يعطوني جغيمة امية، مشت لهداكة الحوش ماشاءالله جنانات ووسع طقطقت ونادت ماطلع لها حد خشت لقت بير نزلت فيه الدلو وشربت لين روت ولقت بحداه حليب مغطي صبت منه شوية وشربت وهيا طالعة سمعت صوت يقول صنة نصري في قصري من جابهولي ياكسري.  خافت مسيكينة ومشت تجري ادور وين تلبد مالقت شيء بحداها جت لليان كبير قاماته ولبدت تحته ، جت الغولة هايجة وتصيح شافت الحليب لقاته ناقص زاد عياطها وصياحها وقعدت ادور هني وهني والدجاج الاسود حايط بيها وادور  ، دورت لين عيت وبعدين حست روحها جاعت  خدت حاشاكم الجيفة اللي جايبتها معاها. حطتها علي النار  وتغرد . طابت هديكة الجيفة قعمزت عالليان وحطت قدامها القصعة وكلت ماخلت منها حويجة لين حست روحها اضايقت وحاشاكم طلقت الريح وهديكة الصنة قلبت الدنيا، وهديكة البنية تحتها شدت روحها معاش قدرت قعدت تعطس وتتحرك، سمعتها الغولة قلبت الليان وشمت عليها حليبها اللي شرباته ناضت فرحانة وتغني ياسعدودي جبت بنية من ركبية وجي الدجاج الأبيض حواليها ويدور عليها فرحان معاها. وهديكة البنية خايفة قامتها الغولة تحسابها بنيتها حق غسلتلها ونظفتها ولبستها حويجات ووكلتها ورقدتها بحداها في دارها، وهديكة البنية تخمم ياحليلي تو راهو خواتي يستنو فيا جيعانين وقعدت تفكر كيف بتهرب منها . فات اليوم الاول ووراه التاني وهديكة الغولة فرحانة بيها و تحبها وحنينة عليها ماسيبتهاش حتى شوية باش تهرب وهيا تخمم تو راهو خواتي تم عليهم الماكلة وقاعدين جيعانين وبعدين بدت الغولة تطلع ادور ماتاكل ولما تروح وترقد تجيها تسلتلها في شعرها الهايج وتقصلها في ضوافرها الطوال تنوض الغولة تلقى روحها نظيفة تفرح ببنتها وتقول ياسعدودي جبت بنية  من ركبية تغسلي وتنظف ليا .
وفي يوم من الايامات بعد ماسلتتلها شعرها وقعمزت تفلي فيها قالتلها ياميمتي بنقولك حاجه لكن اعطيني الامان !!.قتلها قولي بنيتي قتلها اني راني مش بنتك وحكتلها علي قصتها وعلي وخياتها اللي يستنو فيها تجيبلهم ماياكلوا ،  هذيكة الغولة قعدت تبكي وتمسح في دميعاتها وقتلها  انتي  شربتي من حليبي وتنظفي وتفلي فيا كأني اميمتك حتى كان ماجبتكش من بطني!!!  والناس كلهم يعرفوا انك بنتي .  قتلها يااميمتي الغولة  عندي وخيات تو راهو مشغولات عليا باهي خليني نمشي حتى انشوفهم ونطمن عليهم، قتلها هما وخياتك مايحبوكش وغايرين منك شن بديري بيهم ومرات حتى ينوولك علي نية باش يفتكوا منك راهي الغيرة تذهب الشيرة وتعمي البصيرة وكانك استاحشتيهم بري شوفيهم واطمني عليهم لكن انتي بنتي لازم تعيشي معايا هني ، قتلها باهي وباست علي راسها.
قتلها الغولة ارفعيلهم كل مالازمهم تعالي معاي فوق نوريلك اللي عمرك ماريتيه ولا سألتي عليه!!!ركبتها فوق وكانت فيه هلبة ديار مسكرات وبدت تفتحلها بالدار وتوري فيها كل دار معبية حاجة ذهب علي مجوهرات علي حرير علي ماكلة شكال وألوان وبعدين فتحتلها زوز اماجن مدفونات تحت الوطا وقتلها خششي ايدك في المطمورة الأولى، دخلت ايدها طلعت سوداء زي ظلام الليل، قتلها بري اغسليها . علي قد ماغسلت هديكة اليد شيء ماباش يتحول منها السواد!!! قتلها ياميمتي الغولة شن درتيلي؟!! قتلها ماتخافيش !! وفتحت المطمورة التانية وقتلها خششي ايدك !! خششت ايدها وليت بيضاء زي الشمعة وناعمة زي الحرير خير من قبل وبعدين غطستها كلها وهديكة البنية من قبل زينة وزاد زينها وبهاها. قتلها الغولة سر المطمور الابيض يقعد سر بيني وبينك لين ربي ياخد امانته حتى خواتك ماتقوليلهمش عليه كان هذا نغضب عليك ، وخدت منها وعد ماتقول لحد . وتاني يوم خدت من كل دار شوية ومشت لخواتها محملة كل خير . وأول ماشافوها زايد زينها وحلاوتها  غاروا منها و,ناضوا فيها وين كنتي لينا ايام جيعانين لا من يعطينا ولا يحن علينا مدتلهم الماكلة اللي جابتها واعطتهم الرزق والخير اللي جاباته، قالولها هذا منين حصلتيه ؟؟ حكتلهم حكايتها مع امها الغولة وكيف تحسابها بنتها !! ضحكوا عليها وباتت وهدرزت وبدت كل يومين  تجي تزورهم  وتبات معاهم وتجيب معاها الخيرات وهما ياكلوا ، وبدوا هدوكة الخوات يشبحوا في أختهم في خيار الخير وهما يستنو فيها لين تجي تحن عليهم غاروا منها وقالولها انتي عايشة في الخير و العز واحنا مخليتينا هنايا ارفعينا حتى احنا معاك لحوش الغولة  قتلهم راهو طبعها واعر ولما يلود عليها الدجاج الأسود ماتعرف والي غير اني تعودت عليها وعلي طبعها، قالولها عادي نتحملوا زي ماانتي تحملتي المهم مانقعدوش,نستنو لين انتي تجينا وتحني علينا
قتلهم خلوني نشاور امي الغولة قبل!!
      تاني يوم روحت لحوش الغولة وقتلها خواتي قاعدات بروحهم منو بيهم خليني يانروح نعيش معاهم يانجيبهم هنايا معايا، قتله الغولة خواتك هدومة غير طامعين وحاسدينك وبيديرولك المشاكل زي قبل ، قتلها خواتي مانقدرش نسيبهم وبوي الله يرحمه قبل مايموت موصينا انردوا بالنا من بعض .  قتلها الغولة خلاص جيبيهم المهم ردي بالك منهم .
ومشت جابتهم في الاول خايفين من الغولة ساكتين وخلاص وبعدين بدوا ماعاجبهم عجب وكل مرة يطلعوا بحاجة والغولة علي خاطر بنيتها ماتبيش تزعلها وفي يوم  من الايام البنت واقفة في روشن دارها تشوف في شاب  من لبسه يبان ولد  عز ودز راقد تحت الروشن في ظل شجرة وفي الشجرة كانت فيه لفعة حاشاكم نازلته من فوق وهو مايندريش عليها.خافت عليه بتوقضه مشت تجري جابت سطل امية وصبتها عليه، انخلع وناض وطايرتله بيشوف هذا مني اللي بزع عليه المية ؟ شاف يمين شاف يسار مالقي حد.  في رقبتها خناق فل حولاته وحذفاته عاللفعة تبيه يشبحها ويرد باله شاف فوق شبحها وعجبه زينها وخدي السيف وضرب بيه اللفعة راسها تنطر، شاف للروشن تاني بيشكرها علي اللي داراته مالقي حد في الروشن ، نفض حوايجه وناض ويشبح للروشن ماطلعله حد ، قال هاذي مني زعمة البنت السمحة ماعمري ماريتها قبل؟بنت مني؟ وشن قصتها؟ وخيرها هربت مني؟ غدوة إلا مانجي ونعرف قصتها!!
وناض ونفض حوايجه وصمم انه يجي كل يوم لين يشوفها ويتكلم معاها وروح لقصر بوه السلطان ، تاني يوم طلع الامير من قصر بوه السلطان وجي تاني تحت الشجرة وقعد يستنى نهار كامل وبنية الغولة تشبح فيه من الستار ومابتش تطلعله، قعد لين ليل الليل ومشي علي حاله وقعد كل يوم يجي وفي يوم شافاته الغولة وسالت بنيتها ولد السلطان شن جاي يدير هنايا حكتله قصته وكيف نقداته من اللفعة ولقت بنيتها عاجبها والفرحة في عيونها لما تتكلم عليه راجتها لين خشت وخدت الغولة خناق الفل وحدفتهوله من وراء الستار، فرح الامير قال اخيرا شافتني وحتى حذفتلي الفل مايحسابهاش الغولة .  وبدي كل يوم يجي وهديكة الغولة تحذفله في خناق الفل وفي يوم من الايامات فاقت بيها بنيتها قتلها علاش ياامي تحذفيله في الفل هذا أمير البلاد وبوه السلطان بياخدله اميرة زيه وكان يعرفني بنت الغولة معاش يجي بكل، قتلها الغولة كان يبيك حتى يعرفك بنت الغولة يرضى بيك وانتي عاجبك وتبيه مانبيشي يمشي ويسيبك هدوكة خواتها في الحوش وسمعوها وهيا تتكلم مع الغولة عالامير وعجبهم الكلام وحسدوها ناضت الكبيرة قالت اني الكبيرة ومفروض  ياخدني اني!! والوسطية قالت اني مش بنت الغولة وحياخدني اني!!
   وهداكة ولد السلطان قعد ايام وايام يجي وبنية الغولة بدت هيا تحذفله في خناق الفل وتخش ، وفي يوم قال ولد السلطان لامتى بنقعد هكي خلي ننشدوا عليها بنت مني ونكلم بوي السلطان، مشي بعتلها مراء وجت طقطقت عالحوش طلعتلها الاخت الكبيرة ولما سألتها علي اختها الصغيرة قتلها هديكة مش اختنا هديكة بنت الغولة
    وراهي تاكل في البنادمية زي امها . مشت هديكة المراء لولد السلطان وقتله راهي بنت الغولة
سمعت الغولة باللي داروه خواتها في بنيتها وجتهم تجري بتاكلهم والدجاج الاسود حايط بيها وقعدوا هدوكة البنات يتباكوا ويتراعشوا شافتهم اختهم قتلها يااميمتي الغولة ماهما الا خواتي سامحيهم هالمرة معاش يعاودا صنعتهم ، قعد ولد السلطان ايام يفكر وبعدين قال حتى بنت الغولة نبيها، وبعتلهم مراء مشتلهم وقالتلهم ولد السلطان يبي يتزوجها حتى لوكانت  بنت  الغولة!! طبعا هذا الكلام ماعجبش خواتها وقعدو يسحنو وقالوا كله من الغولة هيا اللي حامية اختنا احنا لازم نفتكو منها باش نديروا مانبوا ، وفي يوم بعتوا اختهم لحوش بوهم قالولها نبوا حاجات جيبيهولنا ووتوا كدس لحم وطيبوه وحطوه في ليان وبحداهم بير فرشو عليه حصيرة وشدوا حواشيها برشادات واول ماجت  الغولة قالولها اليوم احنا برضوك وهانا طيبنالك الغدي اللي تحبيه باش ترضي علينا، وجت هديكة الغولة تشبح في اللحم جت تجري لليان وقعمزت علي الحصيرة وبدت تأكل ويجو الخوات يحولوا الرشادات  وطاحت الغولة في البير. وصبوا في البير قاز وعود وقيد وولعوا فيها النار، انحرقت هديكة الغولة وماتت في وسط البير . روحت أختهم من حوشهم قالتلهم وين امي الغولة قالولها قتلناها وحرقناها في البير وكان تتكلمي كلمه تو نلحقوك ليها ، بكت غردت لين عيت وأعطت أحكامها لله وسكتت.
اول ماجو خواتها بيعيشوا معاها في حوش الغولة اختهم ورتهم كل ديار الذهب والحرير وموريتهم المطمور الاسود لكن الابيض واعدة امها الغولة ماتوريه لحد. دبرت الاخت الوسطية علي الاخت الكبيرة قتلها الغولة وافتكينا منها مازال اختنا مانبوهاش تاخد ولد السلطان سادها رزق امها الغولة وقتلها   تتفكري ياوخيتي لما حطيتي صبعك في المطمور الأسود ولتوة ماباش يتنحي منه اللون ردت أعليها ايه وياريتني ما غطسته  قتله شن رايك عندي دبارة لاختنا تخلي ولد السلطان معاش يشبحلها بكل !!! قتلها شن هيا؟ قتلها نغطسوها  في المطمور الاسود معاش يعرفها وانت والا اني ناخدوه ونعيشوا مع بعض في قصر السلطان ، قتلها يازينك كلام.
راجت اختهم لين جت وقالتلها تعالي بنفتحوا المطمور الأسود وحتى اني بنغطس فيه صبعي زي وخيتي ويقعدلنا زي الحنة احنا الزوز تعالي حتى انتي غطسي صبعك معانا، جت وخيتهم فتحت المطمور الأسود  وطبست بتغطس صبعها ذفوها فيه وبعدين طلعوها وقالولها توة من بيعرفك يحسابوك  الخادم متاعنا.
و أعطوها هداريش حوايج لبسوهولها وبدت تخدم فيهم وهما مقعمزات    فاتو ايام وولد السلطان بعت المراء تاني لحوش الغولة باش يشوفوا شن ردهم طقطقت طقطقت طلعولها خواتها قتلهم وين الغولة وبنتها قالولها رفعت بنتها وهجت من البلاد. فوت ايام وايام وفي يوم قال خلي نمشي تحت الروشن إلا مانشوف شن صاير ، قعد قعد يستنى في خناق الفل وينادي ويقول:
محلى طلتك ياللا، يالي زي القمر تعلى.. وين خناق الفل يافلة ولشبحتك مشتاق والله. ردت عليه بنت الغولة وقالت:  اميمتي الغولة مشيت وخلتني  وانا حايرة كيف نلظمه ماورتني لكن هاذي ليك ياغالي اميمتي قالتلي أعطيهاله هدية. ونحت حديدتها اللي اعطتهولها امها الغولة من ايدها وحذفتهاله،  عرفها الامير من صوتها وخدي الحديدة وروح فرحان ومشي لامه السلطانة وقالها بنت الغولة قاعدة ماهجتش وراني ليا ايام نسال عليها وعرفت انها مش بنت الغولة اخت البنيات اليتيمات
  الصغيرة اللي عايشين في حوش الغولة وتوة تمشوا للحوش  واللي تجي عليها لحديده بنتزوجها.  بعتوا المراسيل لحوش الغولة وقالولهم أمير البلاد قال اللي بتجي عليها الحديدة بتكون مرت الامير.
فرحوا هذوكة البنات وكل وحدة قعدت تخشش في الحديدة بالسيف في ايدها وشيء مابتش تخش قد ماداروا . قالولهم مازال عندكم بنت ثالثة نادوها تقيس,الحديدة!! نكروا قالوا ماعندناش إلا خادم وبعدين طلع صوت من قعر البير قاللهم غايتكم كان تبوها في تركينة المطبخ تلقوها ، عظام الغولة تكلموا من البير. خشت الخاطبة للمطبخ لقت خادم سوداء حوايجها مهرتشات  مقعمزة علي الوطا  ، قالت زعمة هادي بيخطبها ولد السلطان ؟ قاستلها الحديدة جت عليها بالزبط حاروا وقالو توة شن بنقولوا للامير بعتوا مرسول للامير جي يجري شافها ماعرفهاش ولما تكلمت عرفها من صوتها قالها احكيلي شن صايرلك؟ وشني اللي خلاك هكي؟ حكتله اللي داروه فيها خواتها ، قلها انتي من الموت انقذتيني وبزينك فتنتيني اني مستحيل نخلي الزمان يفرقنا ونخليك لرحمة خواتك تعالي معاي لقصري ، قتله هذا حوش امي الغولة ومانطلعش عروسة الا منه ، قلها خلاص اقعدي وحكم علي خواتها يولوا لحوش بوهم ودار عليهم حرس مايطلعوش منه بكل ويجيهم ماكلتهم ومالازمهم وبعت براح يلود في الشوارع ويقول الخميس الجاي عرس ولد السلطان وسبعة ايام وسبعة ليالي الماكلة والشراب من قصر السلطان وقامت الزينة والمآذب للناس وبدي العرس والناس فرحانة ويوم  الخميس الصبح بنية الغولة فتحت المطمور الابيض وخشت فيه وطلعت اية من آيات الرحمن ، جوها الجواري بيزينوها وبيجهزوها . لما شافوها فتحوا فمهم لقوها صيفة الرحمن مش محتاجة شيء قالولها شوره السحر طار ضحكت ومابتش تقولهم عالمطمور الأبيض  ماهي واعدة امها الغولة ماتقولش عليه لحد، لبسوها الحرير وكسوة بناويت السلاطين ورفعوها بكروسة للقصر شافتها السلطانة فتحت فمها والناس كلهم قعدوا غير يتفرجوا علي زينها. وخش الامير فرح بزينها وقالها شوره السحر طار ضحكت وشدت ايده ونزلت هيا وياه لصالة القصر والناس حايطين بيهم وفرحانين وعاشوا احلى أيامهم ومشيت عليهم وخليتهم بوذني سمعتهم وبعيني ماريتهم
وان شاء الله عجبتكم الحكاية