خرافات زمان ليبية💗

عصافير فوزيه والغوله💕

#خرافتنا_الليلة
عصافير فوزيه والغوله.. خرافه ليبيه..

كان ياما كان.. بين قصر الغوله وحوش فلان ..
كان في راجل اسمه عياد ومرته اسمها فوزيه ..كانوا عايشين في حويش صغير ..وعايشين على قد حالهم زي ما يقولو دراويش وعلى نياتهم ..
السي عياد كان ايفيق من صبحك يا كريم يصلي الفجر ويطلع يخدم علي راسه ..ايلقط الحطب وييبيعه في السوق .. باش يقدر يعيش روحه هوا ومرته..
وبري يا ايام وتعالي يا ايام ..حملت فوزيه بعد صبر سنين وسنين.. والعاطي حي ..
في الجيهه التانيه من القريه كان في غولة عايش في قصر مهجور ..سمعت بإنه فوزيه حامل .. شوره رعشت منها ودارت سحر واتنكرت علي هيئىة خالت الراجل وجت طقت علي باب حوشهم.
طبعا امتا شافها عياد يحسابها حق خالته واقعد ايسلم عليها ويرحب بيها وشن حالك ياخويله ووين جيتي وشن حال صحتك وبرا من هالكلام الباهي ..
المهم رحب بيها ودخلها للحوش .. وفوزيه تسمع في صوتهم طلعت تجري ..قاللها تعالى سلمي هادي خالتى جت بتشوفنا ..
طبعا المراة شورها حست وما حبتهاش وما ارتاحتلهاش بكل .. امتا روحت قعدت تقول شن خطرها علينا من زمان ما جت غير توة .. هالمراة في من وراها قصة وربي يستر ..
المهم فاتوا ايام وشهور وفوزيه وصلت شهرها السابع .. والغوله ماشيه جايه عليها زعميتها خالت راجلها زي ما قلنا .. اتمسح على بطنها واتدلع فيها وتراجي في هداكا العيل بالساعه والدقيقه..
المهم ابصر كيف مدت ايديها طلعوا ظوافرها شي الله لا تروعك .. شبحتهم فوزيه وقالت في قلبها .. نشهد بالله هالمرا ماهي طبيعيه ولازم نقول لعياد ..
قالت للسي عياد راهو انا مش مرتاحتلها وحتى ظوافرها ابصر كيف شكلهم ياعياد ..
رد عياد .. شورك تتوحمي وجاتك عليها ..خلى المرا في حالها هدي خالتي وانا نعرفها ..
فوزيه ماعارضتش زوجها ووكلت امرها لله وسكتت .. لكن من خوفها عالعيل اللي في بطنها بدت كل يوم اتفيق الفجر اتصلي وتقعد تدعي لبعد ما تطلع الشمس .. ياربي احفظ اللي في بطني .. يارب رانا ضعاف وانت القوي ..وياربي احميه واحرسه من الشر اللي حايط بيه ..
هيا تدعي وكانوا فيه 3 عصافير كل مايسمعوا صوت فوزيه ايجو طياره من بعيد يقعدوا يسمعو لدعائها الباهي وصوتها الحلو وهى تطلب في ربي .. ولما تكمل دعاء ايطيروا بعيد ومعاد ايبانو .
خشت فوزيه للشهر التاسع وخلاص جى موعد ولادتها .. والحكايه جتها فجأه ..وبدت اتعيط على طول بطنها واتضبح على عياد ..وعياد يجري زي المطفوش مش عارف شنو ايدير ولا كيف يتصرف ..
وفي نص هداكا الجري والتفركيس ..خشت خالت عياد ..اللي هيا الغوله ..فرح عياد وقاللها جيتي في وقتك يا خالتي ..خشي بسرعه راهو فوزيه بتجيب خلاص ..
خشت الغوله وكانت حاطه في رداها جريو متع كلبه حاشاكم ... وشاده في ايدها قفه ( أو شكاره ) ...
وبدت زعميتها اتولد في فوزيه وتعاون فيها .. ولما ولدت فوزيه خنبت العيل حطاته في القفه ..وطلعت الجرو من رداها ووحطاته تحت فوزيه وناضت اتعيط على طول بطنها ..
يا ولد اختي الحق .. وووك عليك .. مرتك جابت جرو ..تعالى شوف.. وطلعت تجري زعميتها خايفه ..
طبعا عياد قعد مصدوم ومش عارف شنو ايقول .. خش يجري لمرته وهي طايحه من التعب وقعدت اتقوله الحقها انا جبت بنت وهيا خنبتها وحطت جرو ..الحقها ياعياد راهي غوله مش خالتك هدي ..
مشي عياد يجري الحقها قدام القصر .. قاللها حرام عليك اعطيني بنتى يامرا ..و طبعا طلعتله وشفاشيها يااا لاطيف .. لهلوبة نار وسنونها ابصر كيف وشكلها موحش خليقة والعياد بالله ..
عياد انصمت في مكانه من الخوف ..لكن واجعاته بنته .. ويقوللها بالله عليك اعطيني بنتي ..سنين وانا نراجي وفي الاخير تاخديها مني ...!!
ردت عليه الغوله .. امشي درق وجهك لا نعطيك بنت لا سو ..انا ماعندي شي ..وكان مزال اتجيني ناكلك ..
روح عياد لمرته ما يفرز في شي من الحزن والخوف والهم والغم .. وقاللها طلعت غولة يا فوزيه .. ياريتني صدقتك ..ضحكت عليا يا فوزيه والبنت عليها العوض ..وربي يصبرنا وخلاص ..
قالته اانى قلبي حاس من الاول ..لكن الله غالب .. غير خش ارتاح يا عياد ..ربي موجود ..
المهم كانوا مساكين على قد حالهم وما عندهم ما يديرو ولا عندهم جهد للغوله ومايجي منها وما ليهم واحد كان ربي.. وفوزيه ما بطلتش دعاء وصلاه كل فجر وهي متونسه بهدوكا العصفيرات ..
برا يا زمان تعالى يالاخر.. قعدت هاديكا البنيه تربي فيها الغوولة وكان شكلها جمييل هلبا ..سبحان من صور وابدع .. كانت من كتر الزين لما توقف تقعد مدايرة بهرة ضي .. ومن القنانه امتاعها لن الغولة سمتها جميلة ..
المهم اتنوض الغولة من الفجر اتدير خط من اهني وتطلع تصطاد من اهني .. وتقعد جميلة في القصر بروحها .. وامتا تروح الغولة في عقاب الليل تقعد اضبح علي جميلة ..
يا جميلة اوقفي في الروشن. باش ضيك اينورلي الطريق .. توقف جميلة في الروشن ااتمد ايديها ويطلع نور تشوفه الغوله وتعرف الطريق ..
المهم نهار من النهارات وجميله تتفسح في جنان القصر .. وهي تتفرج عالورد والنوار ..فجأه شافت تلات عصافير .. وين ما تمشي هم وراها .. فرحت بيهم وقعدت تلعب معاهم ..
المهم وهي تلعب مع العصافير سرحت لن طلعت من القصر..وبالصدفه كان ولد السلطان خاطم عالفرس متاعه ..ومن جمالها قعد يشبحلها وشوره عجباته ..قال هكي واقرب منها ..
قاللها شن جيبك لي قصر الغولة يا بنت .. حي عليك تو تاكللك ..
حكتله قصتها وقالتله انى مربيتنى الغولة وما نعرفش لا امي ولا بوي .. من لما كنت صغيرة مربيتنى هيا ..
المهم شورها وجعاته و قعد مره مره يجي يشوف فيها ويطمن عليها ويهدرز معاها ومع الوقت شوره حبها وحباته ..وقعد يجيها كل يوم ..
المهم في الليل زي ما قلنا الغولة اتروح تبي ترقد ..وكانت اتقول لي جميلة تعالي يا بنتي خربشيلي شعري لين ياخدني النوم ..تقعد جميلة تخربشلها في هديكا الغفه .. لن مره شافت في رقبتها عقد فيه سبعة خرزات ..
قالتلها هدا شنو اللي في رقبتك يام .. قالتلها هدا يا بنتى خناق فيه سبعة خرزات وكل خرزة ادير حاجة خرزة نحدفها بينى وبينك تولي نار.. وخرزة كان نحدفها بينى وبينك تولي حطب.. وخرزة تولي حديد ..وخرزة تولي شوك .وخرزة تولي اميه ..والسادسه تولي حصحاص...والخرزه الاخيره اتولي شجره كبيره وتنبت في اي مكان ..
المهم جميلة تفاهمت هيا وولد السلطان وخلتها لن ترقد .. وطلعت للروشن دارت اشارة بايدها شافها ولد السلطان عرف انه الغولة رقدت وجى خش للقصر باش يعرف الطريق والبيبان ويفهم الخريطه..
شورها غوله النحس هدي .. استاقضت بي ريحته ..وقعدت تقول لي جميلة صنة نصري في قصري.. شن جاب هولي يا حصري ..
تقعد جميلة تقوللها لالا يام ..ما فيش حد ..راهو انى نشوي في اللحم هذي ريحت اللحم المشوي ما فيش حد .. تقعد جميلة تشوي باش ما تحسش الغولة بي ولد السللطان ..
المهم نهار من النهارات وبعد ما افهم ولد السلطان المداخل والمخارج متع القصر .. قاللها اليوم وتي روحك بنجيك وبنهربو من الغولة وباش تاخدي العقد امتعها مرات ينفعنا ..
جى نص الليل و قعدت جميله تستنى في الغوله لين روحت وقالتلها ..يام ارقدي خلي نخربشلك شعرك . اتكت هاديكا الغولة ومدت شفاشيفها وقعدت جميله اتخربش في شعرها ..المهم ابصر كيف غفلتها وخنبت منها هاداكا العقد وخلتها لين رقدت ..
قالت هكى وطلعت تجري هربت هيا وولد السلطان .. وعاد الغولة ما تخفى عليها خافية .. استاقضت بيهم وقعدت تجري وراهم يقوللها ولد السلطان احدفيلها خرزة ..تحدف خرزة تولي نار .. وبسبقوها شوي ..
تختفي النار وتعاود تقرب منهم ..و تحدفلها خرزة الشوك ويقعدو يجرو ويسبقوها ...يمشي الشوك تحدفلها خرزة الحصحاص..ويسبقوها ويمشي الحصحاص. وتلحق عليهم .. يحدفولها خرزة الميه .. وهيا تجري هاديكا الغولة .. تحدفلها خرزة الحديد.. يتنحى الحديد تقعد تجري عليهم.. لن قعدت اخر خرزه وهيا خرزة الشجره ..دستها جميله وما حدفتهاش ..
المهم الغولة تعبت خلاص.. فقعدت تنادي يا جميييييلة يا بنتى تلفتيلي خليني نشوفك اخر مرة بس. تلفتيلي يا بنيتى انى بنموت خلينى انشوفك .. تربحي يا بنتى ..
المهم وهما يجرو قاللها ولد السلطان تلفتيلها ياجميله ..شوفيها اخرة مرة .. وجميله تقوله فكنى منها خلينا نهربو ..قاللها تلفتيلها اخر مرة بالك تعتقنا ونفتكوا منها ..
وتتلفت جميلة من هني تمشي الغولة تحدف عليها زي السحر في وجهها وتقوللها ... يا زينهااااا تعالالي ويا شيني برااالها ..
وصار اللي صار .. شيانت الغولة كلها جت في جميله..وزين جميله كله خداته الغولة ..وقالتلها اقعدي هكى يا بنت الكلب خلي الناس كلهم ايعافوك..
قعدت جميلة تبكي قالتله قوتلك من الاول خلينا نهربو منها ..قاللها مش حنخليك تو نرفعك معاي للقصر ..
المهم وصل بيها للقصر والناس كلهم هربو منها ....قااللهم بنخليها تقعد في القصر وما نبيش حد يجي جيهتها ..وحطها في الدور الفوقي بكل . في أخر دور في القصر ..ما فيشي ولا بنادم ...
ونهار من النهارات جي ولد السلطان لي بوه قاله انى بنتزوجها .. بوه لزه وقاله تتزوج غوولة ...يفتحللك ربي ..
تعبت جميله من حظها النحس اللي انولد معاها .. وبدت كل يوم اتفيق من الفجر وتقعد تدعي في ربي ..هيا تدعي من هنا.. وامها الحقانيه فوزيه تدعي من غادي ..من غير ما يعرفوا ..
وفي فجر من الفجور وجميله تدعي وامها فوزيه تدعي من غادي .. طاح العقد من جيب جميله .. وطاحت الخرزه الاخيره متع الشجره على الارض ..و أول ما طاحت طلعت شجره كبيره في دار جميله لن اغصانها طلعوا من الرواشن ..
وفجأه وفي نفس الوقت العصافير اللي كانوا يمشو لفوزيه كل يوم الفجر طاروا من جنبها وقعدو ايحومو عليها ..لدرجة انها استغربت وحست بشي ..وقعدت اتضبح على راجلها عياد ..ياعياااد تعالي شوف ..
بدو هدوكا العصافير كل مره يطيروا لمكان وفووزيه وعياد يلحقوا فيهم .. وكل مره ايزيدو شويه وهم يلحقوا فيهم .. لن في الاخير وصلوا لقصر السلطان .. وطاروا فوق خشو للشجره اللي طلعت في دار جميله ..
قعدت فوزيه وعياد واقفين تحت القصر ويشوفوا فوق للشجره ..ومن حظهم اخطم ولد السلطان ..
اتفصلوا ..خيركم تشبحوا فوق ..
قالوله عندنا عصافير خشو للشجره متاعكم ..
اتلفت ولد السلطان فوق وشاف شجره طالعه في دار جميله ..
قاللهم تعالوا معاي كان تبو عصافيركم ..لكن راهو فيه بنت شكلها زي الغوله ما تخافوش منها ..
خشوا معاه وركبوا فوق .. واول ما فتحوا الباب لقوا العصافير ايحوموا على جميله وهيا امغطيه وجهها ..
قربت منها فوزيه وحست ان في شي مشترك بينها وبين جميله ..وقالتلها ..وين تعرفي العصافير هدو يا بنتي ..هدو كانوا ديما يجوني وما عمرهم غادروا مكاني لن انكمل صلاتي ودعائي ..ترا غير عري وجهك خلي انشوفك ..
جميله حست براحه كبيره من كلام فوزيه ..وقالت هكي نحت الغطا من على وجهها وايرك يطلع نور و ضي لن دار زي المسرب في السما ..وطلعوا العصافير يجرو في هداكا الضي لن مسو السما فوق ..وبعدها نزلوا كل عصفور بشكل.. واحد انزل زي البرق والتاني زي الرعد والتالت زي التبروري الكبير.. ونزلوا على قصر الغوله لن ولعت فيه النار ..
طلعت الغوله تجري واتعيط بصوت عالي وغليظ لن سمعوه الناس كلهم ..اتعيط واتقول ..
دعاك يافوزيه ولع نار الظلم فيا .. ودعاك ياجميله حرقني خلاني بلا حيله..
وماتت هديكا الغوله .. ورجعت جميله لشكلها الباهي .. وفوزيه وعياد فرحوا ببنتهم واتزوجها ولد السلطان وسبحان مغير الاحوال ..

اذكروا الله في السراء والضراء ..و تمت الحكايه وانشاء الله عجبتكم ..