《 ALYA 》

16

♕ 𝐮𝐧𝐢𝐜𝐨𝐝𝐞 ♕

Empire X Hotel, Naypyidaw

မီးရောင်ခပ်မှိန်မှိန်။လေထုမှာခပ်အေးအေး။

ဖွင့်ထားသောနောက်ခံသံစဉ်တီးလုံးလေးများမှာလည်းသဘာဝတောနက်လေးတစ်ခုထဲသို့ရောက်ရှိသွားသလိုခံစားချက်မျိုးဖြစ်ပေါ်စေသည်။

သစ်သားအမိုးတန်းလေးများအောက်မက်မွန်ပွင့်လေးများပြည့်နှက်နေသော(၈)ပေအရှည်ရှိမက်မွန်ကိုင်းတစ်ခုချင်းစီကိုအလျားလိုက်အနေထားဖြင့်လှပသေသပ်စွာချည်ထား၏။မက်မွန်ကိုင်းများနှင့်အတူသစ်ခွပန်းခက်အဖြူများ၊ပန်းနုရောင်ဂျူးလိယက်နှင်းဆီပွင့်များကိုလည်းရောယှက်ကာအလှဆင်ထားလျက်။

ပိတ်စအဖြူခင်းထားသောစားပွဲများအထက်၌ခပ်သေးသေးဖန်မီးလုံးလေးများကိုတင်ထား၏။

မီးလုံးလေးများ၏တစ်ဘက်တစ်ချက်ဆီ၌တော်ဝင်ဆန်ဆန်ဖယောင်းတိုင်ဖြူဖြူများနှင့်ပန်းနုရောင်ဂျူးလိယက်နှင်းဆီပွင့်ကလေးများကဝန်းကာခြံရံထားသည်။

လေးထောင့်စားပွဲအရှည်(၃)ခုနှင့်စားပွဲဝိုင်း(၇)ခုတိတိ။

ကြီးမားလှသောရေကူးကန်၏ဘေး၌တည်ခင်းထားသောဤအပြင်အဆင်မှာမှော်ဆန်ဆန်နတ်သမီးပုံပြင်တစ်ခုအလားထင်မှားရစေနိုင်သည်။

"ကိုကို"

နှင်းဖူးကိုဘာမှမပြောဘဲကိုကိုတစ်ယောက်ကျိတ်ပြီးပြင်ဆင်နေသောအစီအစဉ်မှာသူမ၏အသက်(၁၉)နှစ်ပြည့်မွေးနေ့ပွဲတဲ့လေ။

"ကြိုက်ရဲ့လား" လှိုင်းဝေ့ပါသောဆံပင်လေးကိုလှပစွာထုံးဖွဲ့ထားသောနှင်းဖူး၏ဆံနွယ်လေးများကိုကိုင်လျက်ကိုကိုမေးသည်။

"အရမ်း" ပါးချိုင့်လေးများပေါ်သည်အထိပြုံးလိုက်သည်။

"ဖူးကြိုက်ရင်အိမ်မှာဒီလိုလေးလုပ်ပေးမယ်လေ"

ရုပ်တည်တည်ဖြင့်သူမ၏နားရွက်လေးကိုကိုင်ကာပြောလိုက်သောကို့ကို့ကြောင့်နှင်းဖူးရယ်မိသွား၏။