|| P A R A L L E L ||

Part 15

Parallel
Part 15

ချန်ယောလ် ညဂျူတီမပါသည့်နေ့ဖြစ်သောကြောင့် ဘတ်ခ်ဟျွန်းချိန်းထားသည့် ဆိုင်သို့ ညစာအတူစားဖို့ ထွက်လာခဲ့သည်။ ဘတ်ခ်ဟျွန်းက သူ့သူငယ်ချင်းတစ်ယောက်နှင့် မိတ်ဆက်ပေးမည်ဟုလည်းပြောသည်။ ဒီအချိန်အထိ ချန်ယောလ်က ဘတ်ခ်ဟျွန်းအသိအကျွမ်းများနှင့် အထူးတလည် မိတ်ဆက်ခဲ့တာမျိုး မရှိဖူးသေးပေ။ ဘယ်လိုလူမျိုးနဲ့တွေ့ရမလဲ မသိပေမဲ့ ချန်ယောလ်စိတ်တွေက လေးလံနေခဲ့တာတော့ သေချာပါသည်။

ဘတ်ခ်ဟျွန်းနာမည်နဲ့ အခန်းယူထားသည့် private room ထဲသို့ ဝင်ရန်လည်း အလိုလို တွန့်ဆုတ်နေမိသည်။ ဖြည်းဖြည်းချင်းတွန်းဖွင့်ကာ ဝင်သွားမိလေတော့ မျက်နှာချင်းဆိုင် အနေအထားနှင့်ရှိနေခဲ့သည့့်တစ်စုံတစ်ယောက်...။
နှစ်နှစ်ကျော်အောင် ချန်ယောလ် စောင့်နေခဲ့သည့် အချစ်ရဲ့ မျက်နှာ...။
ဒီလိုအချိန် ဒီလိုနေရာမှာ တွေ့ရလိမ့်မယ်လို့ ထင်မထားခဲ့ပေ။

ချန်ယောလ်ကို မြင်သော အချစ်က တစ်စက်မှ အပြောင်းအလဲမရှိသော မျက်နှာထားနှင့်ကြည့်နေခဲ့သည်။ ချန်ယောလ် ခြေလှမ်းတွေက အခန်းဝကနေ ဆက်မလှမ်းနိုင်ဘဲ ကြောင်ပြီးရပ်နေမိသည်။

"လာလေ သူများတွေစောင့်နေရတာ အားနာစရာကြီး"

ဘတ်ခ်ဟျွန်းက ချန်ယောလ်လက်မောင်းကို တွဲပြီးခေါ်မှ ခုံမှာဝင်ထိုင်မိသည်။ အစကတည်းက ဘတ်ခ်ဟျွန်းက ဂျောင်ဆူးဘေးကလူနှင့်မျက်နှာချင်းဆိုင်ထိုင်ထားတာဖြစ်သောကြောင့် ချန်ယောလ်က ဂျောင်ဆူးနှင့်မျက်နှာချင်းဆိုင် ထိုင်ရသည်။ ချန်ယောလ်က အခုအချိန်အထိ ဂျောင်ဆူးဆီက အကြည့်တွေကို မရုတ်သိမ်းနိုင်သေးပေ။ ဘာလို့အခုမှ ပြန်ရောက်လာတာလဲ၊ ပြီးတော့ ဘာလို့ ဒီလိုအနေအထားနဲ့လဲ အချစ်ရယ်။

"ကိုကို ဒါက ကျွန်တော့်သူငယ်ချင်း ခါအီတဲ့"

"တွေ့ရတာ ဝမ်းသာပါတယ်"

ဂျောင်ဆူးဘေးက အမျိုးသားက ချန်ယောလ်ဆီကို လက်ကမ်းပေးသည်။ ဝတ်ကျေတန်းကျေပြန်နှုတ်ဆက်ပေမဲ့ စိတ်ထဲ လုံးဝပါမနေပေ။ ဖြစ်နိုင်ရင် အချစ်ကို ဒီနေရာက ဆွဲထုတ်သွားချင်သည်။