Heart Like Brilliant Words || ဘာသာပြန် 《Completed》

Chapter 7

သူ့ကိုယ်သူတောင်ဂရုမစိုက်နိုင်သည့် သခင်လေးလင်းက တခြားသူကိုဂရုစိုက်ပေးဖို့ဆိုသည်မှာ မည်သို့ဖြစ်နိုင်ပါမည်နည်း?

သို့သော် စကားကြီးစကားကျယ်ကထွက်သွားပြီးသည့်နောက် သူကကျေပွန်အောင် ဆောင်ရွက်ရပေတော့မည်။ကုယောင်ယန်ကရေသွားချိုးနေကာ သူ့ကိုမီးဖိုချောင်သို့သွားပြီး ချက်ပြုတ်ရန်ပြောလာ၏။

လင်းယွီရန် မီးဖိုချောင်သို့တစ်ခါမှခြေမချခဲ့ဖူးသည့်အပြင် သူ့တစ်ဘဝလုံး၌အိမ်ရှိအန်တီကတူများပန်ကန်းလုံးများနှင့်အတူ သူ၏နေ့လည်စာ၊ညစာများကိုစားပွဲပေါ်သို့ အသင့်ယူဆောင်လာပေးခဲ့ခြင်းပင်။သူဟင်းတစ်ခုခုကိုစားလိုပါက ချက်ပေးရန်အမိန့်ပေးလိုက်ရုံသာ။

သူကိုယ်တိုင်ချက်ပြုတ်ရခြင်းက သူ့အတွက်တော့ခက်ခဲပေလိမ့်မည်။

သို့သော်သူက ဝက်သားလည်းစားဖူးပြီး ဝက်ပြေးသည်ကို*လည်းမြင်ဖူးလေသည်။ ဆီ၊ ဆား၊ ပဲငံပြာရည်၊ ရှာလကာရည်နှင့် သကြားဖြူစသည့် အခြေခံဟင်းခတ်အမွှေးအကြိုင်များကိုလည်း မှတ်မိသေး၏။

{T/N-စကားပုံက ကိုယ်တိုင်ကိုယ်ကျမကြုံဖူးပေမယ့် ကြားဖူး၊ မြင်ဖူး၊အနည်းငယ်နားလည်မှုရှိတဲ့လူတွေကို ဖော်ပြလေ့ရှိပါတယ်}

ကုယောင်ယန်၏ မီးဖိုချောင်သည်အလွန်ကျယ်ဝန်းလှသည်မဟုတ်ပေ။ရိုးရှင်းသော မီးဖိုချောင်သုံးပစ္စည်းများနှင့် တံခါးပေါက်တစ်ခုပါရှိသော ရေခဲသေတ္တာငယ်တစ်ခုနှင့် ကျဉ်းမြောင်းသောစတုရန်းပုံနေရာတစ်ခုသာ။

လင်းယွီရန်သည် မီးဖိုချောင်ထဲသို့လှည့်ပတ်ကာ ရေခဲသေတ္တာကိုဖွင့်ပြီးအတွင်းကို ကြည့်လိုက်၏။အဓိကအားဖြင့်ဘီယာ၊ အလုံပိတ်ချဉ်ရည်ပုလင်းအနည်းငယ်နှင့် ငရုတ်ဆီများပါဝင်လေသည်။၎င်းတို့မှာ စတိုးဆိုင်မှဝယ်ထားသည့်ပုံမပေါ်ဘဲတစ်စုံတစ်ယောက်က ကိုယ်တိုင်ပြုလုပ်ထားသည့်ပုံပင်။

ကုယောင်ယန်လုပ်ထားတာများလား?

လင်းယွီရန်သည် ကုယောင်ယန်အေပရွန်ကိုဝတ်လျက် မီးဖိုချောင်ထဲ၌ချက်ပြုတ်နေသည့်ပုံကိုမြင်ယောင်ကြည့်ရုံဖြင့် မဖြစ်နိုင်ဟုတွေးတောလိုက်၏။ရေခဲသေတ္တာထဲ၌ အသီးအရွက်များမရှိဘဲခရမ်းချဉ်သီးနှင့် ခေါက်ဆွဲခြောက်တစ်ထုတ်သာရှိလေသည်။