Heart Like Brilliant Words || ဘာသာပြန် 《Completed》

Chapter 44

တောင်းပန်ခြင်းအပြင် လင်းယွီရန်သည် လွန်ခဲ့သည့် ခြောက်လအတွင်း ဖြစ်ပျက်ခဲ့သည့်ကိစ္စနှင့် ပတ်သက်၍ တစ်ခွန်းမှမပြောခဲ့ပေ။သူက ထိုကိစ္စကိုမပြောချင်သည့်ပုံပေါ်သောကြောင့် ကုယောင်ယန်ကလည်းဆက်မမေးတော့။အစွမ်းကုန် ကြိုးစားနေခြင်းဖြစ်သော်လည်း လင်းယွီရန်၏အခြေအနေမှာ မကောင်းပေ။

သူ့ခန္ဓာကိုယ်က မယုံနိုင်လောက်အောင် ပိန်ပါးနေ၏။သူက ယခင်ကတည်းကပင် ကိုယ်အလေးချိန်သိပ်မရှိခြင်းဖြစ်သော်လည်း ယခုပွေ့ဖက်လိုက်သောအခါ၌ ပို၍ပိန်လာသလိုခံစားရလေသည်။

သူ့မှာဘာတွေဖြစ်ခဲ့တာလဲ?

ကုယောင်ယန်မှာ ရေချိုးခန်းတံခါးကိုမှီရင်း ရေကျသံကိုကြားသောအခါ အနည်းငယ်မျက်မှောင်ကြုတ်သွားမိလေသည်။တစ်နိုင်ငံလုံး စာမေးပွဲများပြီးသွားခဲ့လေပြီ။ သူကျောင်းရွေးခဲ့ပြီးပြီလား? အချိန်ကျလာတဲ့အခါ လင်းကျစ်ယွမ်က သူတို့ရဲ့ဆက်ဆံရေးကိုသဘောတူမှာလား?

သို့သော် သူသဘောတူခဲ့လျှင် လင်းယွီရန်မှာယခုကဲ့သို့ချက်ချင်းပြေးလာမည်မဟုတ်ဘဲ သူလုံခြုံကြောင်းပြောရန်အတွက် ဖုန်းခေါ်လာလိမ့်မည်ပင်။ဤအချိန်အတောအတွင်း လင်းယွီရန်၏နေရာကိုကူညီရှာဖွေပေးပါရန် သူကမမလင်းအားတောင်းဆိုခဲ့လေသည်။လင်းကျစ်ယွမ်ကသာ လင်းယွီရန်ကိုတကယ်ခွင့်ပြုလိုက်သည်ဆိုပါက မမလင်း၏အဆက်အသွယ်များက သူ့ကိုရှာမတွေ့စရာအကြောင်းမရှိပေ။

သူတွေးတောနေစဉ်၌ ရေချိုးခန်းထဲမှတိုးတိုးလေးအော်ဟစ်သံကိုကြားလိုက်ရလေသည်။ကုယောင်ယန်က အလျင်စလိုပင်အထဲသို့ဝင်သွားလိုက်ရာ လင်းယွီရန်မှာကြမ်းပြင်ပေါ်၌လဲနေပြီး နာကျင်စွာဖြင့်ညည်းညူနေသည်ကို တွေ့လိုက်ရ၏။

သူကလင်းယွီရန်ကို ချက်ချင်းပွေ့ဖက်လိုက်ချင်သော်လည်း လင်းယွီရန်၏ညာဖက်ခြေထောက်ပေါ်ရှိ ထင်ရှားနေသောအမာရွတ်တစ်ခုကိုမတော်တဆ တွေ့လိုက်ရလေသည်။လင်းယွီရန်မှာ သူဤသို့အလျင်စလို ဝင်လာလိမ့်မည်ဟု မမျှော်လင့်ထားပေ။ထို့ကြောင့် အလျင်အမြန်ရေချိုးတဘက်ကိုဆွဲကာ ၎င်းကိုဖုံးအုပ်ပစ်လိုက်သော်လည်း ကုယောင်ယန်ကမြင်ပြီးသွားခဲ့ပြီဖြစ်ကာ တုန်လှုပ်နေခဲ့လေသည်။