Heart Like Brilliant Words || ဘာသာပြန် 《Completed》

Chapter 32

ကုယောင်ယန်စကားဆုံးသည်နှင့် ရှောက်ကျန့်မှာတဆတ်ဆတ်တုန်ခါနေသောဝမ်းဗိုက်ကို ပွတ်သပ်လိုက်မိတော့သည်။သူဗိုက်ဆာနေသော်လည်း အိတ်အတွင်းမှအဆာပြေမုန့်များကို လှမ်းမယူဝံ့ပေ။

လင်းယွီရန်၏ ရုတ်တရတ်လာရောက်လည်ပတ်မှုသည် ကစားသမားများအကြောင်းဆွေးနွေးခြင်းကိုမထိခိုက်စေသောကြောင့် ဆက်လက်ဆွေးနွေးနေခဲ့ကြလေသည်။လင်းယွီရန်သည် ကုယောင်ယန် ဘေးတွင်ထိုင်ကာ နားထောင်နေခဲ့လေသည်။သူကသိပ်နားမလည်သော်လည်း ငြိမ်သက်စွာနေခဲ့၏။

"ကိုးလ်ကရန်လိုလွန်းတယ် မိသားစုကိစ္စတွေကြောင့်ဖြစ်နိုင်တယ် စိတ်ပိုင်းဆိုင်ရာအကြံပေးမှုတွေ လုပ်ဖို့လိုမယ်ထင်တယ် မဟုတ်ရင်ကွင်းထဲကိုရောက်တာနဲ့ အလွယ်တကူထိန်းချုပ်ခံရလိမ့်မယ်..."

"Shh..."

မိနစ်အနည်းငယ်ကြာပြီးနောက် ကုယောင်ယန်မှာသူ၏ပခုံးပေါ်သို့အလေးချိန်တစ်ခုကျရောက်လာသည်ကိုခံစားလိုက်ရပြီး သေးငယ်သောခေါင်းလုံးလုံးလေးမှာသူ့ကိုမှီလာ၏။သူက လင်းယွီရန်လုံးလုံးအိပ်ပျော်သွားသည့်တိုင်အောင် အချိန်အတော်ကြာသည်အထိစောင့်ပြီးနောက် ထိုခေါင်းလေးကိုသူ့ပေါင်ပေါ်သို့ညင်သာစွာရွှေ့လိုက်ကာ ရှောက်ကျန့်ကို စောင်တစ်ထည်တောင်းလိုက်လေသည်။

ယနေ့ညအလုပ်များက ပြီးရမည်ပင်။၎င်းတို့သည် ကစားသမားတစ်ဦးစီ၏စရိုက်လက္ခဏာများ၊အားသာချက်များနှင့်အားနည်းချက်များကို ခွဲခြမ်းစိတ်ဖြာရမည်ဖြစ်ပြီး ထိုမှသာမနက်ဖြန်လေ့ကျင့်မှု၌ ၎င်းတို့ကိုသိသိသာသာတိုးတက်စေပေလိမ့်မည်။

ကုယောင်ယန်မှာအမူအယာမဲ့ဖြင့်ဖြစ်သည့်တိုင် သူ့လက်များ၏လှုပ်ရှားမှုကအလွန်ပင်ညင်သာနေခဲ့လေသည်။သူ့တွင်ခြေတံရှည်များရှိသဖြင့် ဆိုဖာလေးပေါ်မှ အနည်းငယ်ကွေးထားရလေသည်။ လင်းယွီရန်သက်တောင့်သက်သာလှဲလျောင်းနိုင်စေရန်အတွက် သူကကြမ်းပြင်ပေါ်သို့တစ်ဝက်မျှခြေဆင်းထားရသည့်ကိုယ်ဟန်အနေအထားဖြင့်ထိုင်နေပြီး
ထိုသို့ထိုင်နေရသည်ကပင် အလွန်အမင်းအဆင်မပြေသည့်ပုံပင်။