Heart Like Brilliant Words || ဘာသာပြန် 《Completed》

Chapter 22

နောက်တစ်နေ့တွင်လင်းယွီရန်သည်အပန်းဖြေဥယျာဉ်သို့သွားကာ ၃၈ဒီဂရီရှိပြီးပူပြင်းလှရာသီဥတုအောက်တွင် ကျောက်ဟန်နှင့်အတူပူးပေါင်းခဲ့လေသည်။

ကျောက်ဟန်၏သူငယ်ချင်းအနည်းငယ်နှင့် အောင်မြင်စွာချိန်းဆိုခြင်းပြုနိုင်ခဲ့သော တတိယနှစ်စီနီယာအစ်မတို့ပါဝင်လေသည်။တောက်လောင်နေသောနေရောင်ခြည်အောက်၌ ချွေးများထွက်နေကြကာ ရေကူးဝတ်စုံများကိုလည်းဝတ်ဆင်ထားကြ၏။

သူတို့အထဲ၌အသားဖြူကာသပ်ရပ်လှသည့် ရွှီဇယ်ဟုအမည်ရသောကောင်လေးတစ်ယောက် ရှိလေသည်။သူကလင်းယွီရန်နှင့်ကောင်းမွန်သော ဆက်ဆံရေးရှိပြီး ယခင်ကလည်းအကြိမ်အနည်းငယ်စကားပြောဖူးခဲ့လေသည်။

တစ်ဖက်လူအားယနေ့တွင်တွေ့လိုက်ရခြင်းက သူ့အတွက်တော့အနည်းငယ်အံ့ဩစရာပင်။ပုံမှန်အားဖြင့် ရွှီဇယ်သည်ယခုကဲ့သို့ပူပြင်းသောရာသီဥတုမျိုး၌ အပြင်ထွက်လေ့မရှိပေ။

သူကနေရောင်အားကာရန်ထီးတစ်လက်ကိုကိုင်ထားရင်း သူ့အားနှုတ်ဆက်လာ၏။

လင်းယွီရန်ကသူ့အားပြုံးပြလိုက်ပြီး ပါးစပ်ပင်မဖွင့်ရသေးချိန်၌ သူကတစ်ဖက်လူ၏ထီးအောက်သို့ဆွဲသွင်းခြင်းခံလိုက်ရလေသည်။

ရွှီဇယ်: "နေရောင်အောင်မှာမရပ်နဲ့ မင်းခဏလောက်လေးရပ်နေရင်တောင် ကျောက်ဟန်လိုအသားမဲသွားလိမ့်မယ်"

လင်းယွီရန်ကပြုံးကာ ပြောလာ၏။

"ခဏလောက်ပဲဆိုရင်တော့ အဆင်ပြေမှာပါ"

ရွှီဇယ်သည် အရေပြားထိန်းသိမ်းရေးပစ္စည်းများနှင့် နေရောင်ကာခရင်မ်များအပြည့်ရှိသော အိတ်ကြီးတစ်လုံးကို ဆွဲထုတ်လာခဲ့၏။သူကရေကူးကန်၌ဆော့ကစားရန်ရောက်လာခြင်းဖြစ်သည့်တိုင် မသိသည့်လူများကတော့ သူခရီးရှည်သွားလိမ့်မည်ဟုထင်ကြပေလိမ့်မည်။

သူသည်နေရောင်ကာခရင်မ်ပုလင်းကို ဆွဲထုတ်လိုက်ပြီး လင်းယွီရန်အားမပေးမီ သူ့လက်အားအရင်လိမ်းလိုက်ပြီးနောက်

"ကောင်းပြီ ငါတို့အားလုံးကယောက်ျားလေးတွေဆိုပေမယ့် ငါတို့ကကိုယ့်ကိုကိုယ်စောင့်ရှောက်ခွင့်ရှိနေတုန်းပါပဲ"