✳ الجزء 13 ✳
♥نـــــــــــــية سلطــــــــــــــان♥
🔥 رابحة زين العابدين 🔥
✏ حكايات تيما ✏
🌸تيما مبارك🌸
وصلات رابحة لخيمتهم و دخلات كيف الحنش كتسلت طلعات نيشان البيت الخزين حيدات عليها الحايك ديالها و لتلك خبعاتو و خرجات من تما بحال الا مدارت والو هي تلاقا مع باها في الباب رما عليها الشوفة و حجبانو عگدهم حتى بقات دور بلابز عينيها
قاسم:فين كنتي ا دواحة مو الخيام
رابحة:ااا غير هنا ا با في بيت الخزين
قاسم:اش كديري تم
رابحة:كن كن كنصايب الگمح في بلاصتو انت عارف لصيف جاي و العيبدا يدود لينا عاود
قاسم:الله يعميها ليك و نشوفك درتي شي حاجة
رابحة:انا لا كون هاني ا با مدايرة والو
باست ليه يديه و مشات كتجري البيت كدور راسها هنا و هنا لا يكون شي واحد كي شوف فيها جبدات الخنجر و تبسمات
رابحة:العود لي تحكرو العميك ا وليدي الغريب ها انت عنتلاقاو نتلاقاو و نشوفو كدوبك فين يوصلوك واش انت غريب او سلطان من شي بلاد اخرى جاي تقلب على معنى كلامك ولكن انت فمك مفيه لجام انت لي نلجمو و بيديا نسرجو خلاوها ناس زمان لهلا يحرق فيهم شي عظم في هذه النهار نوصيك يا واكل الراس في البير أَرَمِ عطامه اضحك والعب مع الناس فمك متن له لجامه
خشات الخنجر وسط مخدة و خرجات هزات التشيشة من تما و جلسات في المرح كتنقيها باش تسگدها ليهم العشاء حتى كتبان ليها مها داخلة و في يديها هازة عصى و كدخل الكسيبة الزريبة غير هزات راسها بانت ليها رابحة دخلات الكسيبة و رجعات عندها و جلسات
طامو:فين كنتي
رابحة(تنهدات):وا مي واش وقت الكلام دابا
طامو:اح اح ا بنت كرشي كنخافك غير ديري شي موصيبة لي تصيفطك و تصيفطنا معاك
رابحة:متخافيش على بنتك ا مي قادة نسير قبيلة و تجيني قليلة
طامو:ااام حنا عنشوفو
رابحة:انت لي دخلتي الكسيبة فين مشا ولدك كحل السيفة
طامو:راه مع صحابو في سوق الخسارة و الا مدخلتها انا شكون يدخلها
رابحة:لا تخافيشاي ا مي الكسيبتنا هي منا و حنا منها دور دور حتى تعيا و ترجع لينا نوض نوجد الدشيشة العشاء
طامو:غادا عنمشيو عند خيمة يطو في سروية نفتلو معاها الطعام و نجيبو معانا حقنا في المدونة و الغربال
رابحة(شافت فيها):ا مي واش بنتها محنية يديها لي نفتلوه معاها حنا البنت طالعة كيف مها اللسان ماضي و الدراع گاضي قْلَبْ الكَدْرَة على فَمْها تطلع البنت لأمها
طامو(تبعات بنتها الكشينة):اوا قالوها اللي أم في الكُشِينَة ما يموت بالغَْبينَة
رابحة:وا قولي اللي عندو أُمُو لاتَرْفَدْ هَمُو
كانو:هذا لله ا بنتي هذا لله صايبي العشاء راه باك مبقا ليه والو و يدخل
رابحة:ها هما جوج يدين ا مي كنقضي بيهم سيري ترتاحي سيري
هزات براسها و مشات تستاراح اما رابحة كتحرك في العصيدة ديالها و بالها ماشي معاها حتى سمعات تحنحين و صوت البلغة خرجات و حطات فوق الميدة الماكلة و تجمعو على ما قسم الله و كلها شد بلاصتو يطيب نعاسو
أنت تقرأ
نية السلطان ( الدارجة المغربية ) تيما مبارك
حركة (أكشن)🌙 رمضان كريم و كل عام و انتم بخير 🌙 #لا_يــــــــــــــــحلل_النشر #حــــــــــــصريا_عـــــلى_وردات_المــــــلوك 👑 كان حتى كان في قديم الزمان لمّا كان الحبق والسوسان في حجر نبينا العدنان عليه الصلاة والسلام بسم الله العظيم أستهل الحكاية "ن...
