ياسمح المحيا جر الهجنية

الجزء الخامس والاربعين

،،الـجـزء الـخـامـس والاربـعـيـن،،

اللهم صل وسلم على نبينا محمد لاحول ولاقوة الا بالله
.
.
غيث بحدة:واللي مايحشمنا مانحشمه ولا له قدرن بينّا طس ماتلحقك حشيمة من يمنا ابدن والمكان يتعذرك ياسعود طس الله لايردك
سعود وهو يجلس وببرود:مير اني ماني بلافين لخاطرك ابد لافين لعزومة الشيخ اللي غدت يم أهل ام جـلاجــل كل ابوهم،،طالع مناور،،ولّا به علمن ثاني ياشيخ؟
غيث طالع ابوه وهو يغلي
الشيخ مناور:حياك الله حياك الله محدن يرد ضيفن للشيخ مناور ابدن
غيث طالع ابوه بحدة:يبه!!
الشيخ مناور طالعه بحدة وبهمس:اقعد ياغيث
ابو هليل وهو يضيع سالفة الهوشة:الكروة لااااإله الا الله يالكروة ماظنتي احدن عمل مثلها بالديرة ابدن ابدن كروة غيث قماشة يسد ثوبين لافين به من أوساط الحسا وغترته معه والسيف والخنجر من ديار نجد نجد العذية والتمر من مزارع القصيم لااله الا الله ماهو بتمرن من زينه تحسبه عسل يذوب بفمك ذوب من حلاه والحظيظ اللي يفوز بها الليلة
غيث رغم انه يغلي من داخله:وابشروا محل الكروة كروتين فوقها(يعني ثلاث)
الشيخ مناور طالعه بابتسامة:حقن علينا حق ،،اعتلت الأصوات بالمدح له ولابوه ودعوات بالخير لهم،،
ابوهليل:ياعله دايم ووافر يااهل العطية الجزلة ماهو بغريبن عليكم يااهل الجود والكرم
الشيخ مناور:ولد ياهليّل
هليل وقف:سم ياعم
الشيخ مناور:قلط الكروات قلطهن
هليل:على امرك،،مشى،،
ابوهليل:اللي يفوز مرة يكب اللي بعدها لغيره اوحيتوا العلم،،مشى لبداية المجلس وانحنى للحطب اللي بزاويته واخذ عود من الحطب وهو يخط عالارض خط البداية
راشد همس:مين بيبدأ؟
جسّار بغبنته:شف عاد انا بأساعدك بس عشان اكسر خشم هالشايب اللي مايستحي على وجهه هو واللي يسمعونه وساكتين له فوقها
بتال تنهد:انا مااضمن لكم شي وضعي للحين هـه
راشد:خلاص انا ببدا اول،،وقف واتجه للخط وصف مع الواقفين،،
ابو هليل:هالنوبة الكروة ماهو انك تقضب الشارة وتحصل عليها لا هالنوبة ملزمون تعود يمنا حتى تغدي لك ها عملتوا العلم حتى محدن يغتاظ علينا،،طالعهم وهو يرفع سلاحه،،
جسّار:وش ذا صعبة!!
بتال ميل فمه بابتسامة:سهلة سهلة وأسهل منها مافيه
جسّار قطب جبينه وهو يطالعه
بتال:يبي لها شوية تفكير بس
جسّار:قولي طيب!!
بتال هز راسه بلا
جسّار كشّر بوجهه:اناني
بتال بابتسامته:اعتمد على نفسك!!
جسّار بتكشيرة:اصلا ماني بمحتاج ثيابهم ذي بس عشان راشد
بتال:شد حيلك اجل دامها لخاطر راشد
راشد وهو يربط ثوبه لوسطه باستعجال يستعد وعينه عالشارة وفكره وشلون يحافظ عليها لحتى مايرجع لنقطة البداية
ابو هليل اطلق الطلقة وهو يسمي ،،وانطلقوا الواقفين يجرون وكانت الكروة الاولى من نصيب راشد رغم صعوبة المحاولة الا انه ظفر فيها،،
راشد جالس على بداية المجلس وبيده الشارة بأنفاسه السريعة اللي مو راضية تهدا
ابو هليل وقف عنده وهو يبتسم:ماشاء الله ماشاء الله مبروك مبروك ياعله مبروك عليك الكروة،،مد يده لراشد،،
راشد ارتفعت حواجبه باستغراب منه ومع ذلك حط يده بيد ابو هليل
ابو هليل ساعد راشد يوقف
راشد وقف وترك يد ابو هليل وهو ينفض نفسه
ابو هليل بهمس لراشد وعينه عاللي يتجمعون عند الخط الممسوح من اللي جروا فوقه:اغدا للشيخ كروتك يمّه وتشكره زين أوحيت
راشد ارتفعت حواجبه من اللي يسمعه
ابو هليل:اغدا علامك واقف وش تحتري!!
راشد زفر واتجه للشيخ
بتال التفت لجسار:قم انت انا الاخير
جسّار طالعه عن طرف:ترا حتى انا تعبان راجع من شفت
بتال:اتعبتك الجلسة ورا المكتب قم بس قم بالله
جسّار وقف وهو يستغفر بينه وبين نفسه
الشيخ مناور وقف وعلى وجهه ابتسامة
راشد تقدم له بخطواته ووقف قباله
الشيخ مناور وهو يمد يده ويسلم عليه:مبروك ياولدي مبروك عساها بالعافية عليك
راشد ترك يده بدون لايرد
الشيخ مناور قطب جبينه وترك الموضوع وهو يشوف هليل داخل المجلس
هليل شايل اغراض الكروة ووراه واحد شايل السيوف وقف جنب الشيخ وهو يمد له اغراض الكروة:تفضل ياشيخ
الشيخ مناور:عطها لراعيها يستاهل
راشد اخذ الكروة بدون اي كلمة واتجه بها لسعود ووقف قباله وهو ينحني ويحطها قدّامه:سم ياسعود
سعود بابتسامة:سلمت وسم عداك،،اشر بيده جنبه،،
راشد جلس جنبه بهدوء
الشيخ مناور قطب جبينه من اللي يصير
غيث احتدت نظرته وهو يطالعهم ،،بهالوقت بدت المنافسة عالكروة الثانية وللاسف خسر جسار،،
جسّار متجه لمكانه جنب بتال يجر خطواته وهو صاد بوجهه عن راشد اللي عن يمينه وهو يحس باحراج وجالس عن يمين بتال يتخبى من نظرات راشد اللي أحرقته
بتال بشماتة وهو يمد له شماغه اللي نزلها عن راسه:خذ امسح باقي دموعك مابتكفي شماغك ترا
جسّار سحب شماغه اللي على رجول بتال وبنفس الوقت سحب شماغ بتال:قم قم بس
بتال التفت لراشد بنظرة سريعة وهو يوقف وسمى بنفسه وهو يقطب جبينه من نظرات تهديده وزفر وهو يطالع لقدامه ويوقف عالخط والتفت وهو يشوف هليل وطلق واقفين عالخط معه ابتسم وهو يطالعهم:منورين والله!!
طلق كشّر بوجهه
هليل طنشه وهو يطالع لقدام
ابو هليل اطلق من سلاحه
،،الكل جرى بعد ماسمع الطلقة،،
بتال الوحيد اللي ماجرى وسط استغراب الكل عدا الخط بكم خطوة ووقف يطالع اللي يجرون بمكانه
طلق هو اللي اول من اخذ الشارة وبعد مقاومة لكل الي حوله ابتسم وهو يلتفت لوراه ومحد قدر يلحقه منهم
بتال وقف قباله وهو يمدد نفسه ويستعد وسط ابتسامة
طلق طالع لقدامه وانصدم وهو يشوفه قدّامه بمسافة بسيطة
بتال جرى له
طلق هدا سرعته بحيرة من الوضع حاول يتفاداه
بتال استغل ربكته ومسكه وهو يسحب الشارة منه بنفس الوقت وجرى قدّامه بدون لايعطيك فرصة يتصرف وعدّا الخط وهو يبطي خطواته ويطالع جسّار وهو يرفع اكتافه لبساطة الموضوع
جسّار يطالعه بحقد
طلق جالس عالارض يطالع بتال بغبنة وسط انفاسه السريعة
بتال اتجه للشيخ واخذ الكروة وسط ابتسامة مجاملة ثم اتجه لراشد وانحنى وهو يحطها قدامه:تفضل حلال عليك ياولد العمة
راشد ابتسم:مشكور مشكور
بتال اتجه وجلس بمكانه جنب جسّار
جسّار:طول عمرك حسود ليش ماقلتي لي!!
بتال:عندك عقل تفكر فيه مو ذنبي انك غبي!!
جسّار:هين هين والله
بتال قاطعه وعينه عليهم:جسّار
جسّار التفت يطالع اللي يطالعه
سعود وقف وهو يتنحنح وعدل بشته ع كتوفه وهو مرتسمة على وجهه ابتسامة عريضة
راشد وقف معه وهو شايل بيديه أقمشة الثياب والاشمغة وع كتفه اليمين معلق السيفين وع كتفه اليسار الحزامين اللي تتدلى منه الخنجرين والتمر عند رجولهم
سعود التفت عليه ووجهه بوجه راشد وطالع التمر اللي عند رجولهم:عـــز الله بيتغنم الحلال الليلة ياراشد
غيث كشّر بوجهه
سعود:علف شي شي فوق العادة(يقصد التمر)،،وهو يسحب الأقمشة ويرميها فوق كراتين التمر،،وبيتذرا(يدفى)عن البرد بالشتا(يقصد الأقمشة يغطي بها الشبوك)،،مد يده وهو ياخذ السيوف ويحط سيف ع كتفه والسيف الثاني ع كتف راشد وبتهديد،،وهالسيف حتى تجز(تقص)روسن كبرت بالحيل وعجزت تلاقي لها والي
،،الكل احتدت نظرته لهم وهم مستغربين التعامل بين الاثنين،،
بتال ميل فمه بابتسامة عاجبه اللي يصير
جسّار يراقب الوضع بهدوء وسط تفكير بهالعداوة اللي عجز يلقى لها تفسير
راشد بابتسامة:ابشر أعين وأعاون ياسعود ابشر
سعود اخذ أحزمة الخناجر من ع كتف راشد اليسار حط حزام ع كتفه والحزام الثاني فتحه وهو ينحني لوسط راشد ويلبسه الحزام:احتزمت بك يالعضيد احتزمت،،اعتدل بوقفته وهو يحط يديه ع كتوفه،،ياهلا ومرحبا ياهلا
راشد بابتسامته:انا عضيدك لاجفتك الليالي ابشر وانا اخوك ابشر ابشر بعزك يااخوي
سعود التفت يمرر نظره عليهم بتحذير:راشد
راشد:سم ياسعود
سعود وهو للحين يطالعهم:غدينا وانا اخوك غدينا
.
...........****..........
الليل
...........****..........
.
..بيت بادي..
الجد بادي واقف عالباب وبعصبية:ياسعود علامك ابطيت!!
حلايا وقفت عند جدها بابتسامة بفستان ابيض كت لتحت ركبتها وجزمة باللون الابيض وطوق ورد مثبت خصل شعرها اللي ع وجهها لورا وروج احمر يزين شفايفها مسكت فستانها بيديها وهي ترفعه وتدور بوناسة وفرحتها زايدة لانها حاطة روح اللي من الممنوعات عليها
الجد بادي ابتسم:ياماشاء الله ياماشاء الله وش هالزين ياتبارك الله،،مسكها وهو ينحني يبوس خدودها،،اويل حالي عالزين كله ياماشاء الله،،اتسعت عيونه وهو يشوف روجها ومسحه بأطراف اصابعه،،اويلش ياحلوة البيت اويلش
حلايا تحرك راسها ماتبيه يمسحه:لا لا
الجد بادي:تراعيش بخوت والله ان ماتدعيش تغدين للجواز
عباير بجلابيتها السماوية الكت بموديلها الواسع الطويل وشعرها اللي رافعته كله مجرد خصل مبعثرة ع جوانب وجهها وذهبها المعتاد بناجر بيدها اليسار تزيّن نقش يدها اللي ماوضح لونه زين وساعة اللون الذهبي بيدها اليمين والعقد العريض اللي يزين رقبتها ومكياجها الناعم متجهة لهم خارجة من المطبخ بخطوات سريعة وبيدها المبخرة:كبها ياجد كبها عنك بخوت هي اللي مولمتها
الجد بادي وهو يعتدل بوقفته باستغراب:متوكدة؟!!
عباير وهي توقف عنده تبخره:ايه متوكدة
الجد بادي قطب جبينه وهو يطالع الحنا وأكمام جلابيتها:وش هاللون ياعباير؟!!
عباير وهي تطالع نفسها باستغراب:علامي!!
الجد بادي وهو يضربها بخفة على عضدها:ذا؟
عباير وهي تغمز له وبابتسامة:محدن يعلم وش يعدي بهالديرة من علوم!!
الجد بادي تنحنح:اقضبي اباليسش عن الخلق بلكن تنقطع طواريهم الشينة
عباير وهي تهز راسها:ابشر ابشر
سعود خرج من غرفته وهو يعاجل بخطواته لهم ويعدل نسفة شماغه:سم ياجد،،اتسعت ابتسامته،،ماشاء الله ماشاء الله ووش هالزين،،سلم على عباير،،الحافظ الله الحافظ الله
عباير بغرور:الحمدلله كاملة كاملة الله يحفظني
سعود اللي انحنى لحلايا واخذها بحضنه وهو يعتدل بوقفته:مير انا عانين(قاصد)حلايا واوجست مااكسر خويطرش،،يبوس حلايا،،ياحلوة الخد اي بالله انش حلوة البيت
عباير بتكشيرة وهي تمد يدها وتسحب حلايا من يده تنزلها وتقول المبخرة اللي بيدها الثانية له:تبخر تبخر الناقة ماارعت عرجة رقبتها تبخر تبخر
سعود ابتسم وهو يطالع زعلها:الحمدلله انش خابرة روحش ياناقتنا
عباير اتسعت عيونها وطالعت جدها:ها ياجد أوحيت أوحيت!!وثمن تخنفر علي لااوجست يمهم شي
سعود ضحك بخفة وهو يسحب المبخرة من يدها:اغدي يم المطبخ تجرّعي من الما كود يبرد قليبش
الجد بادي بحدة:سعوود!!
حلايا تدف عباير بشوفة نفس:يالله يالله
سعود انفجر يضحك:عشتي عشتي
عباير بغبنة:ياجد!!!
الجد بادي بتهديد:سعود عز الله بتغتاظ كود اوجست هرجة
سعود وهو يمد لعباير المبخرة:خلاص خلاص
عباير سحبت المبخرة منه بقوة وهي تحط من كسر البخور اللي بيدها بالمبخرة وتنحني لحلايا تبخر شعرها:انت تحمد ربك اني خيتك وانت توجس هاللون يمي
سعود التفت لجده:ها أوحيت!!
الجد بادي بنرفزة:لااله الا الله علامك اليوم ياسعود!!اعقل يارجل اعقل!!
بخوت متجهة لهم بكامل زينتها على غير العادة فستان ابيض مخصر ع جسمها ميدي بأكمام طويلة وحزام باللون الاسود يلتف ع خصرها النحيف سادلة شعرها الطويل الناعم على ظهرها بمكياج ناعم زاد جمالها جمال
سعود بابتسامة:أقبلت أقبلت الزين كل ابوه ياهلا ياهلا
عباير وهي تطالع سعود عن طرف ووجهها لبخوت:ايه الكلام لخلق وخلق،،طالعت بخوت وبابتسامة،،مير اشبعي به مااريده لقيت لي معواضن يازينه
سعود كشّر بوجهه من جحدتها له
الجد بادي بحدة:عباير!!
بخوت اخذت المبخرة وهي تتبخر وبهدوء:ابطينا ياعباير
سعود:الف من ذكره لااله الا الله والله اللي يراعيش يحسبش العروس
بخوت كشرت بوجهها
عباير بحدة:اعوذ بالله وش هالعلم!!الله لايجعله!!
الجد بادي بعصبية:وليه الله لايجعله!!الا الله يجعله ونغيظ قلوبن رايدة يمنا الصرايم!! عباير:انا ماودي الجيزة انا ودي غيث
سعود بحدة:معصي والله لو ماظل بهالديرة غيره معصي
بخوت تتبخر بهدوء
الجد بادي زفر والتفت لبخوت:ماشاء الله ماشاء الله صدق سعود مااوجس اكذاب وانا جدش
بخوت:ملزومة ياجد ملزومة
الجد بادي قطب جبينه:بوش!!
بخوت:نذرن نذرته ياجد واليوم وقته
.
..بيت الشلة..
ابو غازي جالس بتكشيرة معتلية وجهه وهو يتقهوى وقباله جسّار وراشد وبتال مصلبين معطينه ظهورهم ووجيههم عالجدار
راشد بينهم همس:تكفون بموت واحد منكم يشوف لنا حل
بتال متكي بجبينه عالجدار نايم
جسّار:حتى جدي سوا انسحاب تكتيكي تبيني اتكلم مهبول انت!!والله مالي شغل لاتكلمني بشي
الجد نشمي خرج من الغرفة وهو على وجهه ابتسامة فرح من سنين مادخل الديرة واليوم فوق جلسته بالديرة بيحضر عرس وبيشوف اهلها
ابو غازي قطب جبينه وهو يطالع ابوه:على وين؟
الجد نشمي:يم العرس
ابو غازي:وانت مطاوعه يبه!!
ابو جواد خرج من الغرفة:ووش المانع؟!
ابو غازي بنرفزة:يبه وشلون متطمن له انت هاه وشلون!!عني وراه بلا!!
الجد نشمي ببرود:وش ورا اللي حصل ياعادل!!
ابو غازي:يبه!!
الجد نشمي طالع الشباب:للحين هذا مكانكم
راشد لف بسرعة:تعبت ياجد والله تعبت
ابو غازي بحدة:اعقب وش هالضعف اللي بك!!
جسّار لف:والله يبه حتى انا مثله الرحمة ياابو غازي زينة
ابو جواد:خلاص ياعادل فكها شوي وش فيك معصب!!
ابو غازي بحدة وهو يوقف ويطالعهم:الظاهر جيتكم للديرة الشهبا ذي ريحتكم ونستكم اول وش يصير بكم!!
بتّال لف وهو يتثاوب:امحق راحة يبه الا والله قرادة
ابو غازي بحدته وهو يطالع ابوه:ملزم تروح؟
الجد نشمي اتسعت عيونه:ماني مشاورك!!
ابو غازي:زين زين دامك بتحضره بأحضر معك لكن محد يردني بشي سمعتوا،،مشى بخطوات سريعة للغرفة،،
الجد نشمي تنهد:الله يستر منك وعليك بالراس اليابس
ابو غازي وقف والتفت عليهم يطالعهم عن طرف:بتّال تريح
بتّال اتسعت عيونه:بس يبه
ابو غازي قاطعه بحدة:توك طالعن من السيل خاف ربك بعمرك!!
بتّال:يبه
ابو غازي:انثبر مكانك ولايكثر
جسّار:يبه وانا ماابي اروح ميت من التعب
ابو غازي لف بجسمه عليهم وبابتسامة:لا والله!!واترك الدشير مع بعضهم وارجع والاقي مصيبة تنتظرني!!حلفت عليك والتعب اللي ذابحك!!قدامي انت اول واحد
جسّار بترجي:يبه والله تعبان!!
ابو غازي طالعه وهو ساكت
جسّار:طيب طيب فهمت خلاص!!
...........****..........
..بيت عادل..
،،غرفة فيصل،،
رهايف دخلت للغرفة ووقفت وهي تتكتف:وبعدين معك خلصني ماصارت ترا!!
فيصل جالس عالارض قبال التلفزيون يلعب بالاكس بوكس:اطلبي وانا بدفع ماني بفاضي الحين
رهايف اتسعت عيونها:خف علي ياولد الراجحي انت!!
فيصل:يوووه رهايف فكيني قلت لك اطلبي وبعدها يصير خير
رهايف:ومن وين لك الفلوس،،قطبت جبينها،،لايكون تلعبها علي!!لااااا مو على كيفك تصرفها علي
فيصل وقف لعب والتفت لها:الحمدلله وجه نعمة ماني بمثلك
رهايف ضحكت:والله!!وجه نعمة اجل!!،،عقدت حواجبها وهي تطالع الاكس بوكس وتدخل عنده،،حق مين ذَا؟
فيصل:حقي يعني حق مين
رهايف انحنت الجهاز وهي تتفحصه
فيصل سحبه من يديه:تخربينه علي!!
رهايف اعتدلت بوقفتها وهي تتكتف:هذا اخر إصدار وابوي لو تموت مايعطيك الا مصروفك،،بشك،،من وين لك فلوسه فيصل؟
فيصل:ابد سارقهن
رهايف اتسعت عيونها
فيصل:من وين يعني!!ارزاق حتى الرزق بتحاسبيني عليه!!
رهايف ميلت فمها بشك وهي تطالعه
فيصل:وش فيك!!لايكون صدق بتحاسبيني!!
رهايف زفرت:بتروح بس؟
فيصل:ايه وش تبين غيره؟
رهايف:ماابي شي
فيصل طلع من الغرفة
رهايف مشت وراه:لحظة لحظة والفلوس
فيصل:مايحتاج معي،،مشى،،
رهايف وقفت بمكانها وهي كلها شك
.
..جناح غازي..
عذاري جالسة قبالها تطالعها بصدمة:بـــــس انا قلت لابوي!!
امجاد اتسعت عيونها:وانا ماقلت لك موافقة قلت افكر وارد لك!!
عذاري:ماتوقعتك ترفضين!!
امجاد:وليش يعني!!من حقي اخذ القرار اللي يريحني وهاذي حياتي!!
عذاري:ماقلت شي بس محد تقدم لك وتوقعتك تقبلين بابوي .
~
امجاد كشرت بوجهها:انا مو ميتة عالزواج الحمدلله وحتى لو محد تقدم لي قبله مو معناه اني بوافق على طول!!
عذاري تنهدت:ماقصدت امجاد والله ماقصدت انا ابيك انتي لانك فاهمة وضع امي وبنفس الوقت تفهميني ونعرف بعض وانتي اولى من اي وحدة غريبة مااعرفها ولاتعرفني
امجاد زفرت:وانا صعب علي اقبل بإنسان كنت اشوفه مثل ابوي والآن اشوفه مثل ابوي
عذاري:تكفين امجاد فكري شوي لاتستعجلين تكفين
امجاد تنهدت:اجازف بكل شي عذاري الا حياتي
عذاري:وانا اضمن لك بيسعدك ومايزعلك ابد وبيحطك بعيونه
امجاد:وانتي ياعذاري؟
عذاري قطبت جبينها:وش فيني انا؟!!
امجاد:وش يفكني منك بكرة اذا غرتي وصرتي تدورين الزلة
عذاري:مستحيل اسوي هالشي ممكن اسويه بغيرك لكن فيك لا ياامجاد!!
امجاد تنهدت:الله يوفق ابوك ويرزقه ببنت الحلال اللي تسعده
عذاري احتدت ملامحها:هذا اخر كلامك!!هذا ردّك الاخير!!
امجاد:قلتها وباعيدها لك أجازف بكل شي الا حياتي
عذاري وقفت واتجهت للباب وفتحته وعينها على امجاد وبحدة:مشكورة
امجاد وقفت بهدوء ومشت لعندها وبابتسامة:عفوا ماسويت شي،،خرجت،،
عذاري قفلت الباب ورا امجاد بكل قوتها
امجاد فزت والتفتت تطالع وراها همست:يمه وتبيني اتزوج ابوك!!
.
..بيت مسفر..
ام جواد بتموت بمكانها من الرعب واتسعت عيونها وهي راحت عن بالها الفكرة ورفعت جوالها تتصل
شذى على اعصابها وهي جالسة عند امها تخاف تدري باللي درت فيه:يمه على مين تتصلين؟
ام جواد والجوال على اذنها:عالمستشفى
شذى اتسعت عيونها
ام جواد:اكيد عندهم خبر وش ذَا العملية اللي ماخلص منها للحين؟!!
شذى قامت من مكانها وسحبت الجوال وقفلته
ام جواد بحدة:وش فيك!!
شذى وهي تجلس وتسحب الثلاجة تصب لها قهوة:يمه العمليات اكيد زحمة وابوي مو موجود واكيد هو اللي أكلها مضغوط اتركيه لاتزعجينه
ام جواد بشك:شذى
شذى بابتسامة:نـعـم
ام جواد:وش وراك؟
شذى التفتت وراها:الكنبة
ام جواد بعصبية:بلا عباطة وش اللي تعرفينه ومخبيته علي؟!
سهام دخلت وهي تمد جوالها لامها:يمه جواد يبيك
شذى اتسعت عيونها:جواد!!،،فزت وسحبت الجوال،،جواد وش صار معك؟صدق اللي سمعته؟والله انهبلت وانا انتظر تتصل؟
ام جواد سحبت الجواد منها بقوة وهي انرعبت من سمعت كلام شذى:وش صاير معك؟والله ماني بمرتاحة من تأخرت اليوم
جواد بهدوء:ولا شي يمه ماتعرفين شذى يعني اكيد فاهمة الموضوع غلط
ام جواد:حلفتك بالله وش فيك وش صاير معك
جواد:مو صاير معي شي يمه والله كل الموضوع ام زميل لي صار معه خطأ وتوفى المريض والحين انا معه بالشرطة انتظر
ام جواد بفجعة:يمه ياقلبي أمنتك ياجواد مو انت!!مو صاير معك شي
جواد:افا يمه انا أخطي!!هونيها يمه وادعي له الله يستر عليه ويفرجها عنه
ام جواد:امين امين الله يسترها معه ويكفيه شر كل من فيه شر
جواد تنهد من كل قلبه وهو يبلع غصته:امين امين يمه الله يسمع منك
ام جواد:متى جاي للبيت؟
جواد:مااقدر اتركه يمه ماله احد
ام جواد:الله يعينيه الله يعينيه
جواد:ابوي مارجع للحين؟
ام جواد:بيرجعون الليلة ان شاء الله هذا على كلامه اول
جواد:يرجع بالسلامة ان شاء الله وارتاحي يمه لاتنتظريني الليلة ببقى معه
ام جواد:الله يكتب اجرك الله يكتبه
جواد قفل
ام جواد طالعت شذى وهي تضربها:وش اللي سمعتيه هاه!!تفاولين على اخوك!!
شذى وهي تتألم وبعدت عن امها:اسفة اسفة يمه والله توبة
ام جواد بعصبية:زميله زميله مو بهو!!
شذى قطبت جبينها بشك وهي تطالع امها
ام جواد بنفس عصبيتها:اللي مسوي الخطا زميله مو بجواد هذا انتي ظالمة اخوك دايم ماتشوفين الخير اللي يسويه لك
شذى:طيب يمه قلت لك اسفة اذا رجع بابوس راْسه خلاص رضيتي!!
ام جواد:غصبن عليك وانا اسحبك له اذا مارحتي له ووجع!!
.
..بيت الجد نشمي..
،،الجدة منيرة وحصة وام غازي وعذبة جالسين عالقهوة،،
الجدة منيرة قدامها فنجالها اللي مالمسته وهي كل شوي تطالع جوالها تنتظر خبر منهم عن بتّال وهي الوحيدة اللي تدري باللي صار له منهم
عذبة تتقهوى:يمه مين اللي تنتظرين اتصاله شاغلك هالجوال حتى عن قهوتك!!
حصة بابتسامة وبنص عين:ايييه لنا الله حتى انتي يمه تشتاقين!!
الجدة منيرة وهي تطالعها بتكشيرة:ورا ماتطسين يم بيتش وتمنعيني منش ومن لسانش
ام غازي ابتسمت
عذبة كتمت ضحكتها:تستاهلين ليش اللقافة؟
الجدة منيرة:وانتي مثلها مليقيفة!!
عذبة اتسعت عيونها:انا يمه!!
حصة:احسن ذوقي ماذقت
الجدة منيرة:وش عليش مني ومن اللي احتريه هاه!!
عذبة زفرت:يمه هاذي جزاتي ماابي اشوفك مشغول بالك!!
الجدة منيرة:ماطلبتش تنشغلين بي كبيني عنش!!
حصة:الا والله انك مشغولة وبتموتين من القلق على ذَا العصبية
الجدة منيرة:انكعمي ياحصة ولا طسّي يم بيتش
حصة:يمه!!
الجدة منيرة:اوووص
ام غازي سحبت فنجال الجدة وصبت القهوة الباردة بفنجال ثاني:محد له كلمة على عمتي
الجدة منيرة طالعتها بتكشيرة
ام غازي صبت قهوة جديدة بالفنجال وهي تمده للجدة:سمي ياعمة
الجدة منيرة طالعتها وزفرت وهي تاخذ الفنجال:يسم ربي عدوينش ياوسمية
ام غازي:امين ياعمة امين ياعل اللي تحترينه بنعمة ومايلحقش مالحقني بذيك الليلة من طواري
الجدة منيرة ابتسمت وهي تذكر ذيك الليلة وبكل اسف ان الليلة وذيك الليلة تخص نفس الشخص:الشكوى لله ياوسمية الشكوى لله
ام غازي ابتسمت وهي تشوف ابتسامتها:تخبرينها ياعمة تخبرين؟
الجدة منيرة:وشلون مااخبرها ياوسمية وشلون!
ام غازي:وتخبرين وش اوجستي يمي!
الجدة منيرة ضحكت وهي يهدا بالها:مير اني عطيتش ذاك الكف على وجيهش اللي متنقع بدميعاته
ام غازي بابتسامة:واوجستي يمي مامن احدن تودعتيه ربش يغدي يم بقعا!!
>
>
وسمية ضامته بحضنها وهي تبكي:تكفى ياعادل تكفى لاتغدي به يمهم تكفى
عادل واقف قبالها بوجه ماسيه السواد من الضيقة عاللي ناوي يسويه وبحدة:لاتحديني اعمل بك شين مااريده ياوسمية هاتيه
بتّال هادي باستغرابه يطالعهم مو فاهم اللي يصير وليش امه تبكي
وسمية ضمت بتّال ابو الست سنوات بحضنها:لاياعادل لا
عادل انحنى وهو يمسك يد بتّال يسحبه منها بالقوة
وسمية تعلقت فيه وبصراخ:بيذبحونه والله ان يكبه جده ويذبحونه حرام عليك ياعادل حرام
الجد نشمي اللي ساكن معهم بنفس البيت وجا لهم على صوت الصراخ
الجدة منيرة تسرع بخطواتها وراه
الحد نشمي وقف عندهم واتسعت عيونه وبحدة:عادل!!
عادل اعتدل بوقفته والتفت لابوه
الجد نشمي بصراخ:لا عــز الله مابك عقل!!وش تعمل انت مهبول!!
عادل:محد يوجس يمي شي ابد
الجد نشمي:اجل تبينا مراعية وانت تذبحهم ونكبك!! عادل:انا اللي بتحاسب عالامانة ولا واحدن منكم بيتحاسب عليها غيري
الجد نشمي:محد اوجس شي مير انه ماهو بهاللون!!
عادل:اغدي به يمّه وهو على مايريد
وسمية وهي ضامة بتّال:جده عيّا عنه طول هالسنين اللي غدت وش يبي به ذالحين!!والله ان يكبه للصرايم ياعادل!!
عادل:هالمرة بيقبل به ياوسمية غصب يقبل به،،طالع بتّال،،بتّال
بتّال فز:نـعـم يبه
عادل:تعال
وسمية ضمته:لا ياعادل هو ولدي انا ماهو بولدهم لاتاخذه مني حرام عليك
عادل بدون اهتمام لترجيها له:وسمية ان ماتركتيه علي الحرام ماتشوفين عيالك
وسمية بردت عظامها
الجدة نشمي صرخ:عادل!!وش ذَا اللي توجسه انخبلت!!
عادل بحدته:تخيري ياوسمية تخيري
وسمية عضت شفتها بغبنة وسط دموعها:حسيبك الله ياعادل حسيبك الله
عادل مد يده لبتّال اللي بحضن وسمية:يالله يابتال
الجد نشمي زفر بقلة حيلة وهو يدري ان كلامه مابيغير راي ولده
بتّال مد يده ليد ابوه ووقف وهو يشوف امه ترتخي يدينها وتتركه
وسمية تطالع عادل بنظرات او تحرق احترقت عادل وشوهته
عادل خرج وهو يسحب بتّال وراه
وسمية ماتحملت تجلس وهي خايفة من المصيبة اللي بتصير له وقفت ولحقته
الجدة منيرة مسكت يدها وبتكشيرة:وين غادية؟
وسمية وهي تسحب يدها وبخوفها الواضح:أرد ولدي هذا اللي غادية يمّه!!
الجدة منيرة:وحلف رجلش والله ان يسويها ياوسمية ولاضرب يمش حساب
وسمية:خليه يعمل اللي يريده ولاتصيب بتّال صريمة ياعمة
الجدة منيرة ضربتها كف وبحدة:ماأردى منه غيرش!!
~تكملة البارت بالصورة~
وسمية تطالعها بدموعها
الجدة منيرة زفرت:اقضبي بيتش وراعي عييلش وكبي قنقش اللي ماله سنع
وسمية:مير انه
الجدة منيرة قاطعتها:قليبه مايصخى به(يتركه)للصرايم ياوسمية!!وثمن مامن احد تودعتيه ربش يغدي يم بقعا وانا عمتش
>
>
الجدة منيرة زفرت:صحيح صحيح
ام غازي:تقهوي ياعمة تقهوي وعيّني من الله خير دامش ودعني اللي مقلقش ربش فانه بخير بخير ياعمة
.
فيصل واقف بسيارته بمواقف السوبر ماركت وهو متكي بظهره عالسيارة وكل شوي يطالع جواله وهو يتأفف من تأخيره
يزيد وقف قباله بالسيارة وبابتسامة وهو يرفع صوته:مررررحبا بالحبييييب
فيصل اعتدل بوقفته ومشى لعنده وهو ينحني ويتكي باكواعه على الباب مكان الراكب وبتكشيرة:وش فيك تأخرت؟
يزيد:ابد اكمل الامور،،مد له الفلوس،،
فيصل مد يده وسحب الفلوس منه وبتكشيرته:لاتتاخر مرة ثانية
يزيد بنرفزة:مو انت ماترضى تجمع من احد شي
فيصل:هذا اللي ناقص!!
يزيد:اصلا احسن انا ماتجمع
فيصل ارتفع حاجبه
يزيد:لان لو انت اللي تجمع منهم كان محد دفع منهم شي!!
فيصل عض شفته وهو يكتم غيظه وضرب على تندة السيارة بيده اليمين وهو يدخل الفلوس بـيـده اليسار بجيب بنطلونه:امش امش بس،،عطاه ظهره وهو يتجه لسيارته،،
يزيد تأفف من بروده وحرك
فيصل ركب سيارته وهو يفكر متى بيترك هالشغلة
...........****..........
ام جـلاجــل .
..بيت الشيخ مناور..
ام غيث اللي طايرة من الفرحة تحس الدنيا مو واسعتها من كثر فرحتها تدور بالبيت تشرف على كل شي وسط نظرات حادة لبناتها تبي كل شي على ماتحب واحلى وكيف لا وهاليوم تنتظره من سنين
ام طلق مسكتها:الله يصلحش ياأم غيث والله ان كل شي على ماتريدين اغدي يم الملعبة وارقصي ذَا عرس الغالي اغدي معي
ام غيث ضحكت:خابره خابره مير ماودي ينقص شي
ام طلق تدفها قدامها وسط ابتسامتها:ماهو بناقصن شي اغدي بـــــس اغدي يم الملعبة قبل يبدون الملعبة الجديدة
ام غيث مشت وسط ابتسامة
عباير دخلت برجلها اليمين وهي تسمي بينها وبين نفسها وهي تنزل نقابها وطرحتها بسرعة
بخوت دخلت وراها وبيدها اليسار كيس ويدها اليمين ماسكة يد حلايا ومدت الكيس لحلايا
حلايا مسكت الكيس
بخوت نزلت نقابها وبدت تنزل طرحتها
عباير زغرطت باقوى ماعندها ،،الكل التفت عليهم،،
ام غيث كشرت بوجهها للحظة ثم رسمت ابتسامة وهي تبي تنبسط بهاليوم
عباير بصوت عالي:الف صلي وسلم عليك يارسول الله،،زغرطت وبابتسامة،،مبروك مبروك ياأم نوفة ياعله مبروك عسى الله يتمم له على خير ويفكنا من شره ويشغله عنا مبروك مبروك
ام غيث بابتسامة وهي تبلع الكلام وتطنشها وطالعت بحلايا وهي تنحني بنفسها شوي ومدت يديها ترحب فيها:ياهلا ياهلا بالزين ياهلا
حلايا كشرت بوجهها وتخبت ورا بخوت
عباير وهي تمد يدها وتمسك يد ام غيث المنحنية:اعوذ بالله اعوذ بالله يعز مقدارش ياأم نوفة يعز مقدارش
ام غيث اعتدلت وهي تسحب يدها بقوة منها وعطتها ظهرها:بنت ياشريفة
شريفة اللي قريبة من امها وبيدها الدلة:سمي يمه
ام غيث بحدة:قهوي المعازيم من الدلة المبهرة بالهيل الهندي املي الدلة وبهريها عالكيف ذَا جواز غيث غيث وهدية اللي صحيح هدية ماهو بوحدتن لفت يمنا بشر وغدت بشر!!
عباير برواق:افا ياأم نوفة افا ماخبرتش تضيفين ضيوفش بهاللون مير اني مااوجس يمش ملامة اكبّش الليلة إتهنين بجواز وليدش
ام غيث قطبت جبينها بشك من هدوءها
ام طلق:بنت ياشريفة ضيفي المعازيم،،مسكت ام غيث من يدها،،وانتي غدينا يم اللعب غدينا،،وسحبتها للملعبة اللي توها بدت،،
بخوت مشت وهي نزلت عبايتها وعدلت شعرها المسدول ورتبته وماسكة بيدها حلايا تسحبها وراها وعينها عالملعبة:غدينا ياعباير غدينا يم الملعبة
عباير ابتسمت برضا وهي تسرع بخطواتها وراها
بخوت وقفت وهي تسمع الملعبة والتفتت لعباير اللي واقفة جنبها وهي تأشر لها براسها توقف
عباير وقفت
بخوت انحنت وهي تسحب الكيس من يد حلايا ومسكته وخرجت الفستان الكحلي المزين بالورد الفوشيه الصغيرة والمطرز من اكمامه وأطرافه بالخيوط الذهبية وهي تحطه على رقبتها وتمسك أطرافه كل طرف بيد وطالعت حلايا:ادخلي للملعبة ياحلايا
حلايا قطبت جبينها بتوتر
بخوت بحدة:ادخلي
حلايا دخلت ترقص وهي منزلة عينها بالارض وكلها خوف وتوتر مو متعودة عالناس وكثرتهم
.
مـاقـد جـرحـنـي مـن يـقـول بـدويـة.. أصـلـي تـعـلّـى فـوق وأرفـع بـه الـراس..
.
بخوت دخلت على بداية بيت الملعبة
عباير دخلت وراها واتجهت لحلايا ووقت قبالها وهي تتمايل بخفة
حلايا رفعت راسها بوسط ابتسامة وهي عرفت جلابيتها
عباير مدت يدها لحلايا
حلايا حطت يدها بيد عباير
عباير وهي تتمايل بخفة وتدور بحلايا حول الملعبة ،،وبدوا يرقصون،،
ام غيث المبتسمة اللي تغني مع الحريم اختفت ابتسامتها وانقلب وجهها وهي تشوف الفستان .
مـاعـيـرونـي بـالـعـلـوم الرديـــة..
.
بخوت وقفت قبال ام غيث وهي تطالعها للحظة ورمشت بعيونها بغرور وهي تنحني وتلفح بشعرها يمين ويسار
ام غيث عضت شفتها بغبنة وهي ساكتة ماردت الملعبة مع الحريم
.
ولامـشـيـت بـدربٍ تـمـشـيـه الأنـجـاس..
حـنـا هـل الـصـحـرا نـسـوق الـمـنـيـة..
درب الـخـطـر مـنـا عـلـيـه الـقـدم داس..
وإن جـيـت بـيـن الـورد وردة نـديـــة..
مـايـقـتـطـفـها غـيـر شـهـمٍ مـن الـنـاس..
.
،،خلصت الملعبة،،
ام غيث وهي تطالعها بحدة
بخوت واقفة قبالها رسمت ابتسامة على وجهها وسط انفاسها السريعة وهي ترفع أطراف الفستان بيديها:خابرته ياأم غيث؟خابرته؟
.
.
.
<اللهم صل وسلم على نبينا محمد>