ياسمح المحيا جر الهجنية

البارت التاسع عشر

سبحان الله،الحمدلله،لااله الا الله،الله اكبر،لاحول ولاقوة الا بالله،اللهم صل وسلم على نبينا محمد..
.
مناور يطالعه مقطب جبينه:ووش اللي غدا بك يم بك هالديرة؟!!
بتال ارتفعت حواجبه باستغراب من سؤاله:الرزق كلن ونصيبه!!
مناور بفضول:عمّانك يدرون؟
بتال طالعه بشك من أسئلته:ووش عليهم عمّاني؟!!أهم شي ابوي يدري!!
مناور انصدم:ابوك؟!!!
بتال ابتسم:الظاهر انك قاصد احد مو أنا
مناور:انت مو من بني فالح الشميلي؟!!
بتال:وصلت!!
مناور يطالعه وهو عاقد حواجبه ومميل طرف فمه بتفكير
بتال:يمكن ياعم فالح اللي تقصده مو فالح اللي اقصده
مناور:انت جدك مو
غيث دخل ووراه ناصر وطلق
بتال اخذ نفس وهو يصبّح بحلطمة بينه وبين نفسه وقف:عاد استأذنك أنا ياعم نلحق الدوام
مناور وقف ومسكه:العشا الليلة عندي تراعي(تشوف)أهل الديرة كلهم يعرفونك وتعرفهم
بتال:خلها مرة ثانية الليلة معزوم
مناور قطب جبينه:عند من؟!!
غيث بدون نفس:عند مين يعني يبه؟!!اكيد عند سعود
بتال بسرعة:ايه عنده
مناور:عاد هو احق بالواجب منّا دامه معلمّك
بتال زفر براحة
مناور:لكن تخيّر ليلة انت على هواك وتعشّ معنا
بتال بورطة:كثر الله خيرك لكن والله
مناور قاطعه:لاتحلف وأوحي هرجتي لآخرها
بتال زفر بضيق
مناور:العشا حاصل بك وبليّاك مير انت اقلط على وجاهتن تليق بضيف ام جلاجل وتعرّف على اهل ديرتها اهل الخير
بتال:عساها دايمة عامرة وش اقول بعد كلامك غير أبشر على امرك!!
.
..بيت بادي..
سعود يفطر وواضح عليه ضيق خاطره
عباير زفرت وهي تنزل لقتمها وتطالعه:علامك؟يوجعك شي؟
سعود ابتسم:مابي شي مابي شي لاتوجسين شين مااطريته
بخوت تطالعه وبقلق:وهي صادقة وانا خيّتك كان توحي(تحس)شين يوجعك غدينا بك يالله
سعود:بِسْم الله علامشن طايرات!!،،شهق،،مابي شي
عباير:أفزع يمّه يداويك
سعود توسعت عيونه
بخوت باستعجال:وش تحترين فزي يمّه!!
عباير وقفت بتمشي
سعود:لاإله إلا الله!!بنت لاتغدين يمّ الرجل كبّيه(اتركيه)عنش!!والله لأغدي يمّ المستشفى ولاأغدي يمّه!!
عباير:هااااا!!راعيت!!انا موجسته أنا ان بك وجع
سعود بنرفزة:عباير علمتش انا بخير ونعمة الحمدلله
عباير:طيب علمني وش بلاك؟
سعود باحراج:كل الهرجة ان قليبي يرقص الرجال عيّا عن حقه ومدري وشلون أغدي يمّه وانا سويد وجه!!
بخوت بزعل لسعود:مقصوص لسانه من قال عنك سويد وجه!!
عباير:بـــس!!!!
سعود طالعها بوسع عيونه
عباير:وهاذي أهون منها مافيه حلّها عندي
سعود قطب جبينه
عباير:ماتوجس إنه معيي؟
سعود:اَي والله
عباير:كل يوم فطوره وعدته وعشاه عندنا
سعود:ماانش بصاحية اَي والله!!اوجس لش معيي يافديغة(غبية)!!
عباير:انت الفديغ مو بأنا
سعود اتسعت عيونه:وشو؟!!
بخوت كشر بوجهها:اعقبي عيبن عليش!!
عباير:كلكم فدغان!!اوجس لكم نعمل له فطوره وغداه وعشاه على حكره(قدّه)وأنتم تخنفرون علي!!
سعود ابتسم برضا على فكرتها:رحم الله والديش ياوجه السعد!!
عباير ابتسمت:انا مدري بلياي شلون تغدي اموركم؟!
بخوت:ولمي عمرش وشوفي حلايا علامها روحي يمّها
عباير عقدت حواجبها:وين هي به وعلامها؟!!
بخوت:بالغرفة ثم توجس تعنقلت
عباير هزت راسها وهي تمشي انا أغدي يمّها وأعرف طبّها
...........****..........
..بيت خالد..
،،غرفة عذاري،،
غازي نايم ع سرير عذاري صحى فيها وهو مغمض عيونه للحين ارتسمت على وجهه ابتسامة وهو يحس بيديها اللي التفت حول وسطه تحاوطه
عذاري اللي محاوطة غازي وهي تدفن جسمها الصغير قدام جسمه ميلت راسها وخدها يلامس ظهره بابتسامة واسعة
غازي حط يده فوق يدها وهو يسحبها ويرفعها لخده ويحطها تحت خده ويدفنها بين خده ويده وهو مغمض عيونه وبصوته الثخين من نومه:صباح الخير ياحبي
عذاري:صباح النور يالقلب،،تنهدت وهي تدفن خدها بظهره اكثر تبي تحس فيه وبغنجها،،اشتقت لك،،اخذت نفس،،ابي اشبع منك
غازي كان نيته يعتابها ع زعله شوي لكن ماتحمل يسمع صوتها وراه بدون لايطالعها تنهار قوته قدامها لاتغنجت بهالاسلوب فك يدها عنه والتفت عليها وحاوطها وهو ينزل راْسه لها يطالعها
عذاري اللي فكت يديها بلحظة التفاتته لها ثم رجعت شبكت أصابعها من ورا ظهره وهي تضمه من جديد بنفس الملامح الهادية المبتسمة
غازي تنهد وهو يطالعها بوسط ابتسامته:اذا انتي اشتقتي وش اقول؟!!
عذاري تطالعه بصمت تتأمله بنظرات كلها حب
غازي ابتسم:شبعتي؟
عذاري هزت راسها بلا
غازي طالعها:مطولة؟
عذاري كشرت بوجهها:أوووش مفسد الجمال اتركني
غازي ابتسم بخباثة:عادي اتركك تتأملين براحتك
عذاري تغير وجهها وتركته وهي تقوم
غازي ضحك وهو يجلس بسرعة ويمسك يدها قبل تبتعد وسحبها له
عذاري جلست عالسرير جنبه من سحبته لها
غازي مسكها من خصرها وحطها بحضنه وهو يحاوط خصرها بيديه ثم غمز لها وسط ابتسامته:الحين بتتأملين براحتك
.
..بيت نشمي..
،،ابو غازي وابو جواد والجدة منيرة عالفطور،،
الجد نشمي يفطر وهو قافله اخلاقه ولايكلم أحد
ابو غازي بعد فترة من الصمت:عسى ماشر يبه
الجد نشمي زفر وكأنه ينتظر هالسؤال من وقت ماجلسوا:أرعيته
،،طالعوه باستغراب،،
الجدة منيرة:من هو؟!!
الجد نشمي:بادي
،،تغيرت وجيه الجالسين وهم يطالعونه،،
ابو غازي بحدة:عسى ماتعرّض(واجهه)لك؟!
الجد نشمي:وين يتعرض لي وحنا بالحرم!!إلا أنا تعرضته
ابو جواد:ليش يبه ليش الله يهديك!!
الجد نشمي:إلى متى؟إلى متى والقلوب شايلة!!
ابو غازي:حنّا ماشلنا شي ورحنا له وقلنا الحق وبالحق عملنا لكن هو مابراسه رضا ولا بقلبه خاطر!!
الجد نشمي:نسعى نسعى له ياعادل
ابو غازي بحدة:اكثر من اللي عملته يبه ماهو بسعي الا مهانة!!
الجد نشمي زفر:جبر الخواطر ياعادل!!
ابو غازي بحدته:وطز يجبر خاطر وراه ذلة نفس!!
الجد منيرة تقاطعهم:افطروا افطروا واللي فات مات افطروا وخلوا عنكم اللي راح
،،الكل انسدت نفسه مايبي اكل،،
الجد نشمي:ماابي فطور صبي لي قهوة بس
الجدة منيرة رفعت الدلة بتقهوي
ابو جواد سحب الدلة من يد امه:محد يقهوي غيري خليها عنك
الجدة منيرة تركت الدلة وهي تبتسم:ماني برادتك يامسفر
ابو جواد مد الفنجال لابوه ثم لامه ثم اخوه جلس وهو يصب لنفسه
الجد نشمي وهو ينزل فنجاله بعد ماارتشف منه:جواد صبّح علي اليوم
ابو غازي وابو جواد طالعوه باستعجال للي يبي يقوله
الجد نشمي:يقول يبي اني أعجّل له بملايكه على رهايف
الو جواد وابو غازي طالعوه ساكتين بصدمة
الجدة منيرة:ياعساه مبروك ياعساه مبروك مبروك ياعادل مبروك يامسفر قرة عيونكم عسى ربي يوفقهم لبعضهم ويصلحهم،،مدت يدها لأبو غازي اللي على يمينها وهي تقرصه برجله،،
ابو جواد ابتسم وهو يشوفهم
ابو غازي بحلطمة:يمه!!،،ميل راْسه لها،،غازيني الشيب وتقرصين فخذي!!وش بيقولون عيالي لامن شافوني!!
الجد نشمي ابتسم
الجدة منيرة:خلف الله عليهم عيالك الله عوضهم بأمهم ياربي لك الحمد،،ضيقت عيونها وهي تميل فمها،،ماهو انت يالمطيور(مستعجل وحار)
ابو غازي بنرفزة:خليهم يتسنعون
الجدة منيرة:متسنعين مير انت مايملى عينك غير التراب!!
ابو غازي شهق:يمه!!
الجدة منيرة وهي تمد سبابتها اليمين بوجهه وتحركها:ماعرف لك وسنعك غير بتال!!
ابو غازي كشر بوجهه:لاتطرينه يمه!!
الجد نشمي ميل فمه بابتسامة:والله مدري من اللي سنّع الثاني
الجدة منيرة:والله ام جلاجل هي اللي بتسنّعهم كلهم!!
ابو غازي تنحنح وهو يتقهوى
ابو جواد:والله مثل ماسنعت ام جلاجل عادل بتسنع بتال يمه!!
ابو غازي بنبرة عالية وهو ينزل فنجاله:مسفر!!
الجدة منيرة:كبّ مسفر عنك علامك عليه!!
ابو غازي تنهد:وينها عذبة؟
الجدة منيرة زفرت:الله يعينها
ابو غازي:يعني أشغّل الموتر الليلة؟
ابو جواد نزل فنجاله وهو يتنهد ويوقف:الظاهر مواتر بتشتغل أسبوع مو بموترك بس
...........****..........
أم جـلاجـل
.
..بيت الشيخ مناور..
ام غيث تمشي بخطوات سريعة
غيث يمشي وراها وهو يجاري سرعتها
ام غيث دخلت غرفتها
غيث دخل وراها
ام غيث دخلت وقفلت الباب
غيث باستغراب:خير اميمتي وش هالشي اللي أعجلتيني به وتوجسين محدن يدري به
ام غيث:ابوك
غيث بقلق:علامه؟
ام غيث:أرعه الليلة بيعزم على زواجك
غيث توسعت عيونه بصدمة:هاه؟!!
ام غيث:اوجست أعلمك قبل ترّوع الليلة قدام الخلق وانا خابرة سلومك
غيث بعصبية:وليش ماشاورني!!علامه يزوجني على رأيه هو انا اللي بأتزوج ولا هو!!
ام غيث بنرفزة:انت خابرن ابوك مزوجك بنت عمك من اول
غيث:وأنا معيي!!عييت من الاولة وأبعيي بالتالية!!
ام غيث:عاد ماهو بشورك طاوعناك قبلها ماحنا مطاوعينك هالمرة!!
غيث:ايه تربطوني بها!!حتى لاحصل شين مااقدر أوجس شي!!
ام غيث:ماهو بحاصلن شي انت علامك تفاول!!
غيث:يمه أنا
ام غيث قاطعته:طاوعني محد بيصبر عليك ويداريك مثلها ياغيث قلبها رهيّف وفوقه ملهوف عليك ياوليدي
غيث تنهد بضيقة
ام غيث:شف ياغيث ابوك مزوجك مزوجك غصبن عنك طاوع وخله بالطيب لاترعي شين لله أمره!!
غيث كشر بوجهه:اجل علمي ابوي وأوجسي له زين غيث دامك زوجّته على ماتحب هو يعمل على مايحب!!
.
..سيارة الإسعاف..
بتال متمدد عالسرير داخل السيارة وهو يطالع جواله اللي ماسكه بيده وينتظر زفر وهو يشوف محد اتصل فيه ولافقده جلس وهو يتصل بأمه ومكشر بوجهه وكله زعل
رهايف بغرفة امها وأبوها سحبت الجوال من على التسريحة وردت:نعم!!
بتال مكشر:مين عينك سنترال انتي!!
رهايف:كيفي والله!!ارد من اَي مكان وزمان!!
بتال:جنية جنية مو أدمية اعوذ بالله منك!!
رهايف:ومنك يالجني الكبير
بتال:هه هه هااا ماتضحكين!!
رهايف:وش تبي ياعامود الكهربا؟!
بتال:ماابيك شفتيني داق عليك!!
رهايف:مالت بس!!
بتال:جايتني بشرك انتي!!بدل ماتشوفين اخباري!!اعطيني امي بس ماابيك انتي وجهك
رهايف:الله عاد وانا اللي ميتة عليك!!اذلف بس اذلف ماني بمعطيتك امي!!
بتال بتهديد:والله يارهايف
رهايف بتحدي:وش بتسوي مثلا تخرج من الجوال!!
بتال:هين هين خليني أجي والله لأجرك من شوشتك
رهايف باستهزاء وهي خارجة من غرفة امها:يمممه خوفتني تعال انت بالأول بعدين تحدّى يالعملاق
بتال:لاحظي ترا تسبين وانا محترمك!!
رهايف:الله!!وينه هالاحترام اللي تقول عنه مااشوفه
بتال بتهديد:طيب طيب كلها برصيدك يابنت عادل طيب
رهايف دخلت لغرفة فيصل وهي تطالع امها:تبي امي بس؟!
ام غازي تخرج غيارات لفيصل من دولابه
بتال:امي عندك؟
رهايف:ايه قدامي تبيها؟
بتال:هونت ماابي أكلمها بس حطي سبيكر
رهايف قطبت جبينها:ليش؟!!
بتال بنرفزة:حطي سبيكر وانتي ماكلة حلاوة يالله
رهايف زفرت وهي تحط سبيكر:حطيت
بتال اخذ نفس وهو يغني لسميرة:
سلّم على محبوبي الغالي..قلّه ماهو حبي ناسي..ليش عليّ قلبه قاسي..وانا من بعده عم أواسي..وحيد وناري محترقة،،تنهد وهو يتصنع الزعل،،اااه بس قولي لها بالاخير تتخيل رسمة قلب مكسور وقولي لها إهداء من كهوف النسيان
رهايف مدت الجوال لامها:معك النسيان بحد ذاتها
ام غازي وهي تبتسم هزت راسها بلا تقصد تمسك لها الجوال وهي تجهز اغراض لفيصل:ياهلا بعيني ياهلا
بتال مارد
ام غازي عقدت حواجبها:ولد وين رحت؟!!
بتال مارد
رهايف تنرفزت:بتالوه وين ذلفت؟!!
بتال:تكلموني؟
رهايف عضت طرف شفتها وهي تحبس كلامها اللي تبي تقوله
ام غازي ابتسمت وهي تشوف عباطته
بتال:يعني توقعت تكلمون احد غيري مو أنا اخر من بالقائمة الله يالدنيا وذاك الوداع والحزن والخواطر المكسورة الظاهر محتفلين من وراي اني ذلفت عنكم!!
رهايف بعصبية:ايه مو انت ماتد
ام غازي قاطعتها وهي تسحب الجوال من يدها بقوة وتطالعها بنظرات حادة
رهايف خرجت من الغرفة بزعل
ام غازي حطت الجوال ع اذنها وبابتسامة:ياحي هالصوت ياحي قطعة قليبي الناقصة
بتال بزعل:ايه الحين تذكرتي بتال!!
ام غازي:ومن قال اني نسيتك!!
بتال:محد قال بس أفعالك يمه
ام غازي:طيب مافكرت ان فيه شي رادني عنك؟
بتال:ابوي مايقدر عليك يمه وانتي لابغيتي الشي تجيبينه
ام غازي ميلت فمها بابتسامة وهي ساكتة
بتال عقد حواجبه بشك:يمه فيكم شي؟
ام غازي:مافينا شي يايمه
بتال توتر وتربع عالسرير وبجدية:يمه حلفتك بالله فيكم شي؟ابوي اخواني فيهم شي؟جدي صاير له شي؟!!
ام غازي:بِسْم الله علينا وعليك يمه اهدا شوي ياروح روحي اهدا مابنا شي والله مابنا شي
بتال تنهد وهو للحين شاك
ام غازي:بس تعرف ابوك مايترك احد يرتاح مستلمنا عزايم
بتال:يمه حبيبتي
ام غازي:ياروحها
بتال:فيك شي؟يوجعك شي
ام غازي:مافيني شي الحمدلله بصحة وعافية
بتال بقلقه اللي ماهدا للحين:طيب صوري لي نفسك اااه لا لا بيذبحنا ابوي صوري لي
ام غازي قاطعته بابتسامتها:بتال
بتال قام من السرير ونزل من السيارة:سمي يمه فيك شي جايك الحين
ام غازي:لاتجي
بتال وقف:وليش تكذبين علي ان مافيكم شي!!
ام غازي:قلت لك والله مافينا شي
بتال سكت وهو مو متطمن
ام غازي تضيع الموضوع:مااشتقت للبيت واهله
بتال زفر:لا مااشتقت بس لك يانور العين انتي وعمتي عذبة
ام غازي ضحكت:لايسمعك جدك
بتال يمشي:جدي ماهو بفاقد إلا هجينياته ولا أنا مادرا عني
ام غازي بضحكة:ياويلك من ربك يابتال يالجحود
بتال ابتسم:الا اشتقت لكم كلكم حتى ابوي مشتاق له بس انتم مااشتقتوا ولا واحد فيكم رفع تلفونه واتصل
ام غازي بابتسامتها:اصبر شوي توك مالك يوم المهم توصي شي ناقصك شي
بتال:ماناقصني الا شوفتك يالغالية
ام غازي:استودعتك الله ياعيني فمان الله وبحفظه،،قفلت،،
بتال قفل وهو واقف قبال غرفة مدير المستوصف دق الباب وابتسم:السلام عليكم
بتال ارتفعت حواجبه من كلامها وهو يميل فمه على جنب بنرفزة:نعممم!!!
عباير استوعبت اللي قالته سكتت وهي تنحني وتجمع الصحون
بتال صد بوجهه عنها وهو يشد ع قبضته بغضب وهو اللي مايرضى ان خواته ينطقون حرف مع غريب حتى لو ماانتبهت الوحدة منهم على نفسها وهذا طبع اَي شاب يغار على اهله فكيف هالغريبة اللي تجرأت تضربه برجله وفوقها رمت كلام عليه زفر وهو يهدي نفسه ثم ابتسم بسخرية بدون لايطالعها:البعير مايشوف عوج رقبته!!(يقصد تتكلم عليه وهي قصيرة)،،مشى،،
عباير اتسعت عيونها من كلامها رفعت راسها وهي تشوف قفاه اخذت الصحن ورمته عليه
بتال ضرب الصحن بظهره التفت لها يطالعها بصدمته من جرأتها
عباير وقفت وهي ماسكة الصحن بيدها وبحدة:عليم الله لولا جميلك مع سعود كان علمتك ضيافتنا بام جلاجل وش لون غادية!!،،مشت،،
بتال انخرس من صدمته وهو لأول مرة ينحط بموقف مثل هالموقف ظل يطالعها لحد مااختفت عن أنظاره بدون لاينطق حرف
...***...
..المستشفى..
،،غرفة فيصل،،
فيصل بسريره جالس لكن مريح بجلسته ساند ظهره عالسرير ومنزل عينه يطالع يديه مو قادر يرفع عيونه يطالعه
غازي واقف قبال فيصل متكي بظهره عالجدار وهو ثاني رجله التعبانة وواقف ع رجله الثانية ومتكتف يطالعه بنظرات غضب اخترقت فيصل
جسّار زفر وهو يطالعه:خلاص غازي!!أمي والبنات الحين يجون!!
غازي بحدة:مو لحد مايعترف بغلطه!!
فيصل رفع عينه وبتعصيبة:وش الغلط!!ماسويت شي انا؟!!
غازي شد ع قبضته يكبح نفسه لايذبحه ويحاول يكون متفاهم معه
فيصل ماحس الا بضربة على قفاه غيرت وضعية جلسته خلته يعتدل بالجلسة زين
جسّار ضرب فيصل على قفاه بكل قوة وهو بينفجر ثم مسك فيصل من ياقته وهو يشد عليه يخنقه
غازي ابتسم وهو يشوفه ولاتدخل بينهم
جسّار بعصبية:وبلا فصيل وبلا!!كل ذَا وماانت مسوي شي!!
فيصل توجع من رجله بسبب الحركة اللي تحركها فجأة:ااه،،دف يدين جسّار عنه وبإصرار،،قلت لكم ماني مسوي شي ليش ماتفهمون!!
جسّار بقهر منه:ابد طال عمرك ماسويت شي لكن والله لو يدري ابوي بسواد وجهك ان يدفنك وانت حي ولااحد يقدر ينطق كلمة ويردّه عنك!!
غازي شهق بملامح هادية وهو يطالع جسّار:جسّار!!وش فيك عليه!!
جسّار طالعه وهو يرفع حواجبه باستغراب
فيصل كشّر بوجهه
غازي:الله يهديك حنا بنوقف معه وبعدين هو ماسوا شي!!وش فيك طاير فيه!!
جسّار قطب جبينه
غازي طالع فيصل بملامح تغيرت لحدة:اذا هاذي فعولك وماسويت شي اجل وش اللي ماندري عنه ومسويه يافيصل؟!
فيصل بلع ريقه
جسّار التفت طالع فيصل بسرعة برعب من الأفكار اللي فكر فيها
غازي بتهديد:اذا هاذي محاولة تحريض عالقتل وماسويت شي ابي اعرف اللي سويته يافيصل وتدري فيه ومتأكد منه؟!
فيصل طالعه بتكشيرة وهو يعض ع طرف شفته بقهر من هالتحقيق معه اللي يشوف ماله اي داعي
جسّار مسك فيصل من يده وهو يشوفه ساكت وكأنه يأكد كلام غازي ضغط على يد فيصل وبتهديد يخالطه توتر وخوف:فيصل وش مسوي؟!!انطق!!
رهايف فتحت الباب ودخلت
ام غازي وراها:السلام عليكم
أمجاد شايلة الاغـراض وداخلة وبهدوء:السلام عليكم
جسّار ترك فيصل بسرعة اول ماسمع فتحت الباب قبل تنتبه له رهايف وامه
غازي رسم ابتسامة واسعة:ياحي الله هالطلة
رهايف عقدت حواجبها بشك من وضعهم
ام غازي أسرعت له وضربته بخفة ع كتفه وبعصبية:يعني مايكفي اخوك!!نزل رجلك يالله نزلها!!
غازي ضحك بخفة وهو ينزل رجله:ابشري على امرك يالغالية تامرين امر
جسّار:مصلّب يمه الظاهر انه اشتاق للعسكرية ماشبع منها
ام غازي وعينها على غازي بحدة:اجلس وارتاح،،التفت على جسّار،،وانت اترك اخوانك عنك!!
امجاد بابتسامتها:اليوم لينور البيت فيصل بيرجع
رهايف تنحنحت وهي تنزل طرحتها:هو بينور اساسا باللي بيصير الليلة فيه
امجاد توسعت عيونها وهي تطالعها
،،العيال يطالعونها مو فاهمين،،
ام غازي:الله اكبر عليك وطول الطريق مأذيتني ماتبين تقابلين رقعة وجهه!!
امجاد تكلمت بسرعة:يمه خايفة طبيعي تقول هالكلام
ام غازي زفرت وهي تشوف الأسئلة بعيون العيال:الليلة شوفة اختكم
جسّار يطقطق عليها:بالله ذي وجه شوفات!!
غازي باستغراب:مين اللي خاطب؟!!
البنات سكتوا
ام غازي وهي تشغل نفسها بالأغراض تتفادى نظراتهم وهي عارفة رأيهم بجواد:تعرفونه ولد عمكم جواد
الكل سكت محد نطق كلمة
غازي سحب عكازه اللي جنبه وهو بيخرج:اسرعوا لاتتاخرون انتظركم تحت،،خرج،،
جسّار خرج وراه بدون لايقول شي لكن واضح عدم الرضا باللي يصير على وجهه ...........****..........
ام جـلاجــل
.
..بيت ابو مزون..
مزون واقفة عند الباب بتوتر وهي كل بعد شوي تفتح الباب وتنادي احد من الصغار تسأله عن عباير
ام مزون اتجهت لها وهي تلف طرحتها:علامش عجلة(مستعجلة)؟
مزون قلبها بينفجر وهي تنتظرها فتحت الطرحة وهي تحاول تأخر أمها:يمه ورا مانتقهوى اول ثمن نغدي يم ام غيث
ام مزون ضربتها ع كتفها:خالتي خالتي ام غيث متى تسنعين!!
مزون تطالع امها بتكشيرة وهي تمسح مكان الضربة :يمه علامش علي وش بش مهولتن(بهذلتها)بي؟!
ام مزون بعصبية:لفي مسفعش وأغدي قدامي!!
مزون وهي تحضن امها وتتصنع البكية:تكفين يمه طلبتش خلينا نتقهوى
ام مزون دفتها:والله ان وراش بلا!!اغدي قدامي يالله،،بحدة،،عجلي تغشّي(تغطي)
مزون تماطل بلفتها للطرحة وتطيح نقابها عالارض وهي تماطل اكثر
ام مزون تطالعها بحدة وهي تنتظرها تخلص
مزون واخيرا لفت طرحتها ولبست نقابها وهي زعلانة
ام مزون فتحت الباب بتخرج
عباير واقفة قبالها ورفعت نفسها وهي تسلم على راس ام مزون:مسيتي بالخير ياوجه الخير شوين واغدي معش بس شوين،،دخلت وهي تحشر ام مزون عالباب وكملت طريقها داخل البيت وهي تنزل نقابها،،
ام مزون تطالعها بصدمة من وجودها
مزون تشققت من الوناسة وهي تمشي وراها:حياش يالزين حياش يابعيرتي
ام مزون عضت طرف شفتها ومشت وهي تمد يدها ومسكت مزون توقفها:عباير
مزون وقفت وطالعت امها بزعل
عباير وقفت والتفتت تطالعها وبابتسامة:سمي ياعيني
ام مزون بحدة:علامش غاديتن يمّنا!!
عباير:ماني بغاديتن يمش وانا خابرة علومش معي
ام مزون كشرت بوجهها
عباير:ولو اني اغليش قدرش قدر اميمتي الله ينعّمها!!
ام مزون بشك:وش ناويتن عليه؟!
عباير وهي ترفع عبايتها:راعيها ياعلّ هالعوينات بالعافية تقل متمرغة وسط الزريبة
ام مزون:وراش ماعودتي يم بيتكم!!
عباير:بالله عليش ترضينها للمزينة اللي جنيبش!!
ام مزون ميلت فمها بعدم رضا
عباير:ماني معطلتش ولاني رادتش عن مسيارش بس اغسل عباتي وامشي،،مشت للحمام،،
مزون مشت وراها
ام مزون زفرت وهي ودها تذبح بنتها اللي تلاحق ورا عباير
عباير دخلت للحمام وهي تنزل عبايتها وحطتها بالمغسلة
مزون بفضول وسط ابتسامتها:وش علمش!!
عباير وهي تغسل عبايتها:افزعي لي بعباة من عبيش
مزون بابتسامة قاصدة تغيظها:اللي يشوفش وانتي داخلة تقل وايت منكت(انكب)عليش!!
عباير وهي تزفر:وانتي الصادقة تقل تريلة صابة حمولتها علي بس الشكوى لله طلعت بطريقي نخلتن وش طولها تهّول!!
مزون بحماس:وش غادين معش علميني
عباير وهي تطالعها بتكشيرة:صدمت لي نخلة وانا خيتش نخلة
مزون عقدت حواجبها باستغراب:ماني خابرة نخل بوسط الديرة!!
عباير:خبرش قديم!!نبتت بعدش نخلتن بالديرة ماأرعيت شين يشابها(يشبهّا)من النخل!! .
..بيت بتال..
بتال بوسط الحوش متمدد ع فرشته عالارض على جنبه وهو محتضن المخدة مغمض عيونه يحاول يأخذ غفوة تريحه قبل الصلاة مو قادر وهو يذكر الموقف اللي قبل شوي جلس وهو يحذف المخدة اللي طاحت بنهاية الحوش من غبنته وبعصبية وهو يكلم نفسه:تمرة تنشب بحلقك أي والله!!انا نخلة!!ووش فيها النخلة يعني!!،،اخذ نفس وهو يرجع يتمدد،،وش قلة الحيا اللي عندها ذي الحرمة بالأول شاتتني وبعدها رفعت صوتها بوجهي!!،،شد قبضته،،هاذي وشلون تتكلم مع رجل غريب عنها!!،،سكت شوي وهو يفكر وبرجفة سرت بجسمه خلته يجلس وهو يمسح على يديه،،يمه يخوفون حريم هالديرة وحدة تهاوش شايب!!والثانية تصوب بالسلاح وتتحدى!!وذي شاتتني وتهاوشني بعد وهي الغلطانة!!اعوذ بالله منهم الله يكفيني شرهم!!ياقليباتي على خواتي بس،،تنهد بشوق،،اااه ياقليبي ااه
،،دق باب بيته،،