ياسمح المحيا جر الهجنية

الجزء السابع عشر

لااله الا الله عدد ماذكره الذاكرون وعدد ماغفل عن ذكره الغافلون
.
..........****..........
أم جـلاجــل..
.
..مستشفى المحافظة..
عباير جالسة ع كراسي الانتظار لازالت متلثمة بشماغ جدها وعليها مشلح(بشت)طلق وبعيونها اللي تهل الدموع تطالع الداخل والخارج من عند سعود وهي مرعوبة عليه لمحته وفزت واقفة بسرعة ومشت له بخطوات سريعة
طلق متكي بظهره عالجدار وهو متكتف وواقف بنهاية الممر وعينه عليها عقد حواجبه وهو يشد ظهره ويسند طوله يعتدل بوقفته وكشر بوجهه وهو يشوف لوين رايحة ومشى لها
ناصر جالس عالكرسي جنب طلق اللي واقف عنده وقف ولحق طلق
بتال ثاني يده بعد ماتبرع لبنك الدم كتعويض عن اللي اخذوه لسعود وهو يتكلم مع ممرضة عن وضعه
عباير وقفت قباله وبينهم مسافة وبدموعها اللي تحاول تحبسها قدّامه هو والممرضة:تكفى عليك وجه الله انشدهم عنه محدن يعلّمني ولا يوجسون شين لي؟!
بتال نزل عينه ماطالعها ابد:لاتخافين طيب الحمدلله بعد شوي يطلعونه
طلق وقف عندهم وهو يعطي عباير ظهره وبتّال وجهه وبنظرات حادة يطالع بتال
ناصر وقف جنبه وهو يمد يده ويمسك طلق ويرجعه خطوة لورا وهو يهمس له
بتال استغرب نظراته لكن مااهتم له ابد وقال:هاذي الممرضة شوفيها اساليها عن اللي تبين استأذنكم أنا،،مشى،،
عباير مسكت الممرضة بدون اهتمام للي يصير حولها وسحبتها لها وهي تسألها عن سعود
طلق التفت عليه:اصبر اصبر
بتال التفت وطالعه وهو رافع حاجبه ويمرر نظره على طلق من فوق لتحت
طلق بحدة:على وين طاسّ(ذالف)؟!!
بتال باستغرابه من هالحدة:نعم؟!!
طلق:على وش مستعجل؟!!ولا تبي تهج وتجحد(تنكر)سواتك؟!!
بتال انصدم منه ووضح على وجهه:وشو؟!!
..........****..........
..الـمـسـتـشـفـى..
جواد خارج من غرفة العمليات وهو ينزل كمامته عن وجهه ودخل لغرفة التعقيم ووقف وهو ينزل القفازات عن يديه ومد يديه يغسلها حس بكتمة ماتحمل يظل واقف جلس وهو ينزل راْسه بين يديه يلقط انفاسه ولازال ماسك طرف حوض الغسيل بيديه عض شفته بغبنة وهو يذكر اللي صار وقت قبل العملية
،
،
،
الطوارئ
جواد واقف بعد ماجهز للعمليات وقف يطالعه بصدمة
فيصل بملابسه المقطعة من الحادث بوجه اصفر وبكدمات وجروح بوجهه وبجرح عريض بوسط ساقه واضح معه تفاصيل الساق الداخلية وهالجرح ينزف بغزارة وامتلى حوله المكان دم واقف وهو مستند بيده ع طرف السرير وبيده الثانية اللي تهتز ماد المشرط وبتهديد:ماابي علاج عندكم
دكتور واقف قباله وبحذر:اوك اوك ماراح نعالجك انت بس اهدأ
فيصل بعصبية صرخ:لاتستغفلني!!
جواد اخذ نفس:فيصل اسـ
فيصل بحدة:انت بالذات تسكت!!
جواد قطب جبينه بعدم رضا
فيصل بقهر:اطيح بيد جزّار ولاتلمسني انت لو العافية بيدك مت ولا أخذت منك شي
جواد انصدم منه
دكتور:مايلمسك خلاص بس انت اترك اللي بيدك
جواد احتدت نظرته بغبنة منه وهو يتقدم له بخطوات سريعة
فيصل وهو يحرك المشرط بوجهه ويصرخ:ابعد عني ابعد!!
جواد دف المشرط اللي بيده وهو يدف فيصل عالسرير:بلا بزرنة!!!
،،مسكوه مجموعة مابين ممرضين ودكاترة،،
فيصل يقاومهم وبصراخه:وربي لاشتكيكم!!والله لاوصلها لاكبر راس!!،،ثبتوه وحقنوه بمهدئ لازال يصرخ فيهم،،جواد انت خصيمي قدام رب العالمين اذا حطيت يدك علي!!الله لايسامحكم كان ساعدوته علي!!،،خف صراخه تدريجيا لحد مااستسلم لهم،،
،
،
،
جواد رفع راْسه وهو يعتدل بوقفته غسل يديه مرة ثانية وهو يزفر ويطرد الموقف من باله خرج من غرفة العمليات ووقف وهو يشوف عمه بوجهه كشر بوجهه وهو يشوف عسكر وراه
ابو غازي بحدة:هذا هو شرّف حضرته!!
...........****..........
يــوم جــديــد
..........****..........
بيت عادل
ابو غازي يفطر برواق وعن يمينه امجاد ويساره رهايف
رهايف وأمجاد جالسات عالسفرة زيادة عدد مامدوا يدهم عالفطور
ابو غازي بدون لايطالعهم:أمكم مارجعت؟!
امجاد:لا يبه
ابو غازي زفر وعينه على امجاد:مابه الا العافية وشو له طايرة له؟!!
رهايف:امه يبه امه!!!
ابو غازي طالعها بحدة:انتي انكعمي لااسمع لك حس
رهايف وقفت بتمشي
ابو غازي بنبرة عالية محتدة:رهاااايف
رهايف طالعته بتكشيرة
ابو غازي:انثبري قدامي ولاتتحركين لو شعرة
رهايف ظلت تطالعه وهي واقفة بحدة
ابو غازي بعصبية:اضربيني احسن!!!
رهايف جلست وهي تعض طرف شفتها
ابو غازي بحدة:انثبري لاصكك بهالصحن
رهايف صدت بوجهها وهي تحبس دمعتها
ابو غازي:لو ادري انك معتبّة باب هالبيت ذبحتك!!
امجاد:يبه عمي ينتظرك للحين
ابو غازي بعدم اهتمام وهو يفطر:خليه ينتظر
الجدة منيرة دخلت وبعصبية:عااادل
،،البنات وقفوا،،
ابو غازي ابتسم وهو يطالعها:ياحيها ياحيها حياك ياام عادل حياك
الجدة منيرة:والله والله ياعادل ان ماتنازلت عن جواد مو بأحسن لك!!
ابو غازي اختفت ابتسامته:المفروض يمه تحبون راسي مادفنته للحين!!
الجدة منيرة:صاحي انت صاحي!!الولد مالمس البنية!!كل اللي قاله لها تحتريه وانت شبّيت(عصبت)بدل ماتستانس
ابو غازي بحدة:الخوّان خوّان يمه
الجدة منيرة:خلف الله عليك!!اقولك الولد يبي بنت عمه ولاّ ماواجهها(صارحها)ماتوحي انت!!
ابو غازي بحدة:سكتنا يمه يوم انه واقفن لنا
رهايف وأمجاد طالعوا بعض بصدمة انه يدري
ابو غازي مكمل:لكن مانسكت يومه تعدّا على محارمنا!!
الجدة منيرة بتهديد:اسمع عاد والله لو ادري انه مارقد الليلة عند امه وابوه والله ياعادل لاأقبلت(جيت)يمي صديت عنك ولا أجلس في مكان انت فيه وصلك العلم ياولد نشمي،،مشت،،
ابو غازي وقف وبحدة:وينه عمك يابنت؟!!
.
.
في اطهر بقاااع الارض..
ذاك المكان المزدحم بذاك الازدحام الجميل المحبب الى كل قلبٍ مسلم..
روحانية تلف المكان..
تهليل وتكبير..حمد وثناء..
أدعية تردد بصوت عالي وأخرى خافتة..
سجدات طاهرة نقية يُناجى بها العزيز الكريم الرحيم..
..فــي مــكــة..
بساحات الحرم الخارجية..ازدحام عند البرادات..
الجد بادي يتمشى بساحات الحرم التفت يطالع البرادات وهو خاطره يشرب منها لكن تردد وهو يشوف الزحمة ميل فمه بطيف ابتسامة وهو يشوف الزحمة تخف على احد البرادات عاجل بخطواته ووقف وهو يصب له موية التفتت للصوت اللي وراه
الجد نشمي بابتسامة:لاهنت يالاخو صب لي معك الله يسقيك من حوض نبيه ويكتب اجرك
الجد بادي صب له موية والتفت له وهو يمد الكوب:سم
الجد نشمي اختفت ابتسامته وهو يشوفه
الجد بادي بتشديد:سم
الجد نشمي اخذ الكاس وشرب وهو للحين عينه على بادي
الجد بادي شرب ومشى
الجد نشمي مشى وراه:بادي
الجد بادي التفت له وهو رافع حاجبه:خير؟
الجد نشمي:مالان قلبك يابادي؟
الجد بادي بتكشيرة:انت بالحرم يانشمي!!حرمة المكان!!،،مشى،،
الجد نشمي:بادي
الجد بادي ماطالعه
الجد نشمي:وعشان حرمة المكان يابادي؟
الجد بادي مشى ولارد شد ع قبضته بغضب وهو يردد وسط زفرته:استغفر الله العظيم استغفر الله
.
راشد يتمايل راْسه يمين ويسار وهو نايم صحى وهو يتلفت حوله بتعب عقد حواجبه وهو يشوف غرفة غريبة عنه طالع نفسه وتوسعت عيونه وهو يشوف نفسه مربوط عالكرسي تحرك وهو يحاول يفك نفسه بدون فايدة شحب وجهه وهو يشوف اربع رجال حوله متلثمين مو واضح منهم اَي شي حس بقشعرة سرت بجسمه تكلم وهو يخفي الرجفة اللي حس بها:وش تبون مني؟مين انتم؟!!
الرجال اللي قباله انحنى وهو يمد كتاب مفتوح بوجهه
راشد عقد حواجبه وهو يبعد راْسه عن الكتاب:سلامات!!
الرجال اللي قباله بحدة:اقرأ عشان تعرف وش نبي
راشد رجّع نفسه لورا:ماني بقاري!!
الرجال اللي قدامه ضرب رجله بالأرض:اقولك اقرأ
راشد صرخ:تموت ماقريت
الرجال اللي وراه مسكه من رقبته وهو يقربه من الكتاب:اقرأ!!
راشد غمض عيونه وصرخ:مااااااني بقاري قول اللي تبيه
الرجال اللي على يمينه ضربه ع وجهه بكل قوة وطيحه عالارض
الرجال اللي على يساره رفعه وجلسّه
راشد وهو يتألم من الضربة:وش اللي تبوني اقرأه؟!!
الرجال اللي قدامه:اقرأ ياراشد اقرأ!!
.
..........****..........
أم جـلاجــل
.
عباير جالسة جنب السرير متكية براسها عند يده ونايمة
سعود صحى وهو لازال مابين وبين غمض عيونه وفتحها بتكرار منزعج من النور فز جالس بسرعة وهو يذكر خواته
عباير صحت فيه وفزت واقفة لاشعوريا:سعود
سعود تألم من جرحه وحط يده ع جرحه وهو يطالع عباير بعين والثانية قافلها وهو عاض شفته يكتم ألمه مد يده ومسك يدها وهو يزفر بخفة:بِسْم الله عليش ياقليب سعود بِسْم الله على قليبش ياروح سعود
عباير تطالعه بفجعة وتتأكد انه بخير:سعود؟!
سعود سحبها بيد وحدة وهو يجلسها عالسرير جنبه ويده الثانية ع جرحه ضغط على يدها بيده وهو ماترك جرحه وبابتسامة باهتة من ألمه:سعود سعود واللي يخليش لي هذا انا سعود بشحمه ولحمه
عباير طالعته وهي تحبس دموعها ودفت يده عنها بزعل:أخلعتني(خوفتني)وبردّت حيلي(انفجعت لاقصى درجة وماعرفت تتصرف)
سعود ابتسم وهو يمد يده للمرة الثانية ويرفع يده الثانية عن جرحه ويمسك يدها وهو يضغط عليها ويطالعها:السموحة ياخيّة سعود مادرينا بالغيب ولاّ عهدن علينا مانخلعش ونبرد حيلش
عباير نزلت دموعها غصب وهو تطالع عيونه وبعتاب:انفجعت بك وبالحيل ياسعود انكسر ظهري وسودّت الدنيا بعيوني
سعود بحنية:وقطع لي كاني سويت بش بهاللون
عباير ضغطت على يده وبخوف:اعوذ بالله
سعود بحدة:ماينكسر لش ظهر وانا بي نفس ياعزة وعزوة سعود
عباير بابتسامة وهي تسحب يدها:وتلومني لاتروعّت!!
سعود:وينها بخوت؟!
عباير شهقت وهي نستها من البارح
سعود طالعها بتمعن وهو توه يلاحظ ملابسها وحالتها قطب جبينه:عباير وش اللي غادين بعدي؟!!
..........****..........
..المستشفى..
راشد فز من نومته على هالكابوس المرعب وهو يتصبب عرق
عذبة جنبه سمت عليه وهي تشوف حالته حطت يدها على كتفه وهي تهمّزه(مساج)وترفع صوتها بالتسمية:بِسْم الله عليك يمه بِسْم الله
راشد تلفت حوله وهو يستوعب انه بالمستشفى حس بألمه وتغير وجهه
عذبة وهي تمسح على ظهره:ياروح امك بِسْم الله عليك الحمدلله على سلامتك يمه الحمدلله
الجدة منيرة بطرف الغرفة جالسة طالعته وهي توقف ومشت له وهي على تتركع(تستند)على عكازها:الحمدلله على سلامتك ياراشد،،وقفت عنده وهي تسلم على راْسه،،الحمدلله على سلامتك معوض خير بالحديد ولا بك ياوليدي
راشد طالع يده المجبسة للحظة توسعت عيونه وهو يذكر الحادث وبخوف:فيصل!!
عذبة مدت له الموية اللي كانت عالدرج جنبها ابتسمت:ماعليه ماعليه طيب وانا امك ان شاء الله انه طيب
.
..عند فيصل..
ام غازي واقفة جنب سريره وهي تمسح على راْسه بوجهها اللي باقي عليه اثار دموعها التفتت لجسار:وشلونه راشد؟
جسّار واقف جنبها:ان شاء الله انه طيب يمه ان شاء الله
ام غازي طالعت فيصل من جديد وهي تشبع من شوفته بعد فجعتها فيه:الحمدلله اللي سلمهم
فيصل رفع يده ومسك يد امه وضغط عليها وبصوت مهزوز من التعب:يمه شوفيني طيب الحمدلله بخير بفضل الله
جسّار:يمه تريحي الله يهديك من اليوم وانتي واقفة انهد حيلك
ام غازي بدون لاتطالعه:اتركني ياجسار اتركني خلني ابرد على قلبي
جسّار تنهد:يمه الكرسي جنبك مابتتعبينه اذا جلستي ولا تريحينه اذا ظليتي واقفة!!!
فيصل:يمه اجلسي انتي بتقعدين معي محد بيقول شي اقعدي
ام غازي زفرت وهي تطالعه
،،دق الباب والتفتوا يطالعون اللي دقه،،
يزيد دخل:السلام عليكم
جسّار طالعه وسلم عليه وحيّا فيه
ام غازي همست لفيصل:انا بروح لراشد ولا راح خويك رجعت عندك،،مشت،،
فيصل:جسّار
جسّار:لاتقول شي ادري بك،،طالع يزيد وبابتسامة،،المعذرة وانا اخوك
يزيد قاطعه:خذ راحتك خذ راحتك
جسّار خرج
فيصل باستعجال:وش صار
يزيد سلم عليه:اركد ياولد!!اول شي الحمدلله عالسلامة
فيصل:الله يسلمك وش صار
يزيد:ماصار شي شاهر لمسكم عالخفيف وقال انه مستعجل
فيصل زفر براحة:يعني طلع منها؟
يزيد هز راْسه بايه وسط ابتسامته:لاتخاف امورك تمام
غازي وقف عندهم مستند ع عكازه الصغير وسط ملامحه المحتدة وهو يمرر نظره عليهم ومن بين اسنانه:وش مسوي يافيصل؟!!
فيصل ناظره وهو موسع عيونه
غازي وهو يكتم غيظه:انطق فصيل!!
يزيد تلعثم:مااحنا مسوين شي
غازي التفت عليه يطالعه وميل فمه بابتسامة
فيصل بلع ريقه
غازي سند طوله وهو يرفع عكازه ويمسكه من نهايته بيده ومشى له بخطوات ثابتة وهو يلصق نهاية العكاز بكتف يزيد ويدفه:ايه وش اللي ماسويتوه بالضبط؟
..........****..........
أم جـلاجــل
.
..بيت هلال..
هليّل من دخل البيت وهو يدور عليها وطلع لفوق وشافها وهي تشتغل
شامة ع سطح البيت تنشر الملابس
هليّل مشى لها:السلام عليكم
شامة التفتت وطالعته للحظة ورجعت تكمل شغلها وبهمس:وعليكم السلام والرحمة
هليّل جلس قبالها وهو يطالعها ثم ابتسم:وش شعورش اليوم؟
شامة التفتت تطالعه باستغراب من سؤاله:وشلون يعني؟!!
هليّل غمر لها بابتسامة:شعور إنش غديتي عروس
شامة ميلت فمها بابتسامة سخرية:خلف الله علي كاني عروس!!
هليّل تغير وجهه:افا الا زين العرايس وشيختهن!!
شامة:لايوحونك بس اقصر حسك
هليّل قطب جبينه:وليش ان شاء الله؟!!
شامة التفت له وبدموع تحبسها:وش عروسه والعريس هج!!حتى عشا الفرحة ماذاقه!!
هليّل وقف قبالها:هذا بدال ماانش تنبسطين وتستانسين!!
شامة تطالعه باستغراب
هليّل ابتسم:المفروض إنش تشقين وجهش بالضحكة وتوضح ضريساتش وان زوجش راعي واجب وفزعة
شامة ضحكت بخفة وهي تتكتف:هالعلم اكذب به على اهل الديرة مهو انا!!
هليّل كشر بوجهه وبحدة:علامش انتي علامش؟!!
شامة فزت:بِسْم الله انت اللي علامك!!
هليّل:اوجس لش الرجل راعي واجب وفزعة!!وهذا ان دلّ دلّ على جميله مع انه اللي فازع له مايستاهل الفزعة
شامة تطالعه بتكذيب
هليّل:وثمّن طلق من يوم يومه وهو يحتري هالفرحة من أولها وانتي ناويتن عليه!!
شامة ميلت فمها من كلامه
هليّل بنصح يخالطه تهديد:افتحي لي مسمعش(أذنك)ياشامة زين الرجل جا وطلبش على سنة الله ورسوله جا بالحق وعالوجه الصحيح وابوي عطاه اللي يبيه لاتجين يم الرجل بعلومش الشينة ثم يطَمْح(يتركها)عنش وتخنفرين علينا!!
شامة تطالعه بتكشيرة
هليّل:ماتبين الرجل من الحين أوجسيه ماتبينه
شامة قاطعته بسرعة:لا ابيه ابيه
هليّل يطالعها بتكشيرة:ويوم إنش تبينه علامش مخنفرة علينا تقل غاصبينش عليه!!
شامة وسعت عيونها:مااوجسته متى اوجسته لاتتبلاني(لاتتهمني)!!
هليّل ارتفعت حواجبه:الله اكبر عليش!!كل هالعلوم ولا اوجستي شي!!
شامة كشرت بوجهها وهي تلف عنه:رح رح يم اشغالك وكبّني لاشغالي
هليّل هز راْسه بيأس منها وهو يبتعد عنها:الحق علي والله يوم اني ادور رضاش!!،،نزل الدرج وهو يفكر وشلون يحل الموضوع،،
.
..مركز الشرطة بالمحافظة..
سعود خارج من المركز وهو مستند على عباير
طلق وناصر يمشون وراهم بمسافة
بتال واقف على باب المركز ينتظرهم يبعدون اكثر حتى يمشي مايبي يقابل احد ويفجر الغبنة فيهم تحرك وهو يشوفهم يبعدون
سعود وقف عند سيارته وترك عباير فتح الباب ومد يده لداخل سيارته وهو ينحني وسحب فرشة كشتاته اللي ماتفارقه ابد من تحت المقعدة(الكرسي)وحطها على عباير وهو يسحب البشت من عليها بقوة ثم التفت على طلق بنظراته حادة رغم وجهه الباهت من تعبه ورماه بقوة عليه
طلق مسكه وهو حس بطرف البشت يضرب وجهه
سعود بحدته وهو يدف عباير تدخل للسيارة:مشكور لكن هالمشلح مكانه ماهو كتوف اختي ياطلق
عباير دخلت للسيارة بسرعة وقفلت الباب بقوة من ربكتها من الموقف
طلق كشر بوجهه
ناصر قطب جبينه بعدم رضا
سعود:وانا أوجستها لك من أول وأعيدها عليك من جديد فزعة من وراكم يااهل الديرة مانبي،،مرر نظره عليهم،،واولهم انت وخويك
طلق بغبنته:حتى ولو انك بين الحياة والموت!!
سعود بكره:الله يعجّل بيومي كان الفزعة اللي بتحييني من وراك
ناصر همس:استغفر الله العظيم
طلق بتعصيبة:اسمع ياسعود
سعود لمح بتال والتفت له يطالعه زين وبدون اهتمام لطلق وكلامه:يالنشمي
بتال مكمل طريقه وعينه بالأرض يتحلطم بينه وبين نفسه ماانتبه له
سعود رسم ابتسامة عريضة على وجهه قاصد بها يغيظ اللي عنده ورفع صوته وهو يضغط على نفسه:ياولد الاجاويد
بتال وقف والتفت للصوت ابتسم غصب وهو يطالع ابتسامة سعود ثم مشى له:ماعليك زود ياحيّه سم امرني،،وقف عنده،،امرني ياوجه الخير
سعود حنى نفسه شي بسيط ومد يده وهو يمسك يد بتال يصافحه
بتال يطالعه باستغراب يحاول يخفيه قد مايقدر
سعود احتضن كف بتال بكفوفه وهو يضغط عليها وبترجي انصدم منه طلق وناصر:العذر والسموحة منك عليك وجه الله ان تعذرنا تكفى يااخوي اعذر سواد وجهي ياوجه الخير
بتال سحب يده منه وهو يرجع خطوة لورا مبتعد عنه ويستغفر:استغفر الله ماجا منك الا كل خير
سعود وهو يتقدم ويمسك يده ويضغط عليها بقوة:اعذر واصفح عن ماشفت عليم الله اني ماعلمت بشي وانت اعلم باللي غدا بي
طلق مشى بخطوات سريعة وهو يغلي من تصرفات سعود
بتال مسك يد سعود بين يديه وبابتسامة:ياابن الحلال الحمدلله على سلامتك والحمدلله اللي نجاك من الموت واللي صار مالك ذنب فيه معذور وانا اخوك معذور
ناصر تكلم يكسر المسافة بينهم:اجل يومك توجس انه معذور واجبك الليلة عندي
سعود اختفت ابتسامته وهو يلتفت عليه وبحدة:لااااا!!
بتال توسعت عيونه من نبرة سعود وهو يطالعه باستغراب من الوضع لكن هالاستغراب اقل من العادة بعد اللي مر فيه من جا للديرة
ناصر ارتفعت حواجبه للحظة ثم كشر بوجهه:واجب الرجال مالك فيه الكلمة بيني وبينه!!!
سعود طالع بتال بابتسامة:الواجب انا أولى به انا الصويب وهو ابيض الوجه اللي ماقصر الاولة عندي ثم يغدي بكيفه تالي
ناصر يطالعه بغبنة وهو يبلع كلامه مايبي هوشة بينهم قدام الغريب
بتال ابتسم وهو يترك يدين سعود:كثر الله خيركم وجاد الله عليكم يالاثنين وانا قمت بالواجب اللي علي ولابغيت من وراه لا حق ولاشكر واعتبروا خيركم واصل
سعود مسكه بالقوة:تكفى ياوجه الخير طلبتك
بتال:والله ماالمسه وخيب الله حظي اذا بغيت من وراه جمايل
سعود بزعل:استغفر ربك يارجل
بتال:والله مااذوقه وانتهى الموضوع
طلق وقف بسيارته عندهم وهو يضرب على بوري السيارة
ناصر تنهد وهو يشوف طلق:استأذنكم انا خويي تعبان،،طالع سعود،،توصي شي محتاج شي
سعود طالعه بتكشيرة:انت خابر علمي
ناصر مد يده يصافح بتال:نشوفك ان شاء الله على خير اذا بغيت تنشد شين عن المستشفى اغد يمي وأبشر
بتال بابتسامته:مشكور مشكور ماتقصر
ناصر مشى
بتال:عاد استأذنك أنا
سعود مسكه:وين؟
بتال:راجع للبيت
سعود:طريقنا واحد يارجال ومامعك سيارة اغد معي بس
بتال:لكن
سعود قاطعه:الحق وأمرنا لله عييت عنه لكن الروحة معنا مالك مفر منه
بتال وهو يحس باحراج خصوصا بوجود عباير قبل حالة سعود:بأخذ لي
سعود قاطعه ومسك يده يضغط عليه:والله ماتغدي مع احدن غيري!!
بتال تنهد بإحراجه الواضح
سعود التفت عالسيارة:يابنت
عباير طالعته من داخل السيارة ولاردت
سعود:انقزي يم الصندوق
بتال انخطف وجهه ومسك يد سعود ومن ربكته تكلم بنفس لهجة سعود:داخلن عالله ثم عليك ماتردني اتركها بمكانها وانا بأغدي يم الصندوق
.
.
<اللهم صل وسلم على نبينا محمد>
..........