ياسمح المحيا جر الهجنية

النهايه

،،الـجـزء الـرابـع والـثـمـانـيـن والأخـيـر،،

اللهم صل وسلم على نبينا محمد،،استغفر الله العظيم الذي لاإله إلا هو الحي القيوم واتوب اليه
.
.
.........****..........
،،بـعـد سـبـع شـهـور،،
.........****..........
.
..بيت عادل..
،،الصالة،،
ابو غازي شايله بين يديه وهو يبوسه على خدوده وبابتسامة وهو يرفعه وينزله يغني له:مرحبن حييت ياصقرن لفى
ام غازي جالسة عن يساره مدت يدها ليد ابو غازي اليسار وهي تمسكه:بشويش نفضت قلبه فجعته حرام عليك!!
ابو غازي سحب يده منها وبتكشيرة:كبيني انا وحفيدي نتصافى مالك بنا بد وباسه ع خده وهو يغني قريب من اذنه:ومرحبن حييت ياصقرن لفى
ام غازي جنبه ضربته على كتفه بشويش:لاتغني باذنه حرام عليك صغير مايتحمل،،مدت يدها وتسحبه لها وتاخذ عادل من يديه،،جيبه جيبه دفش انت ذبحته
ابو غازي سحب يده:علامش انتي علامش ماتكبيني يوم معه على راحتي!!
ام غازي بعناد سحبت يده وهي تاخذ عادل منه:جيبه بس جيبه الحين يتخلع على امه المسكينة ووقتها مابينفعها صقرك،،باسته ع خدوده:ياروح جدتك ياعويدل
ابو غازي يطالعها بتكشيرة:صبي قهوة لعادل اللي قدامك اول
ام غازي وهي تنزل عادل عالارض وتفتح كوفالته وتمسجه:اخدم نفسك مشغولة مع عادل الصغيرون
ابو غازي:وينها امجاد؟
ام غازي:اتركها تنام اهلكتها فرفرة المولات
ابو غازي:تقعد بالبيت دام اهلكتها وشو له العنا!!
ام غازي وهي تلعب عادل:انت اللي عنيتها مدري متى تترك طبعك!!
ابو غازي:ازين هاللون وش فايدة العرس بعد فترة طويلة اسبوع يكفي
ام غازي زفرت بيأس وهي تفضل تسكت ماتناقشه بهالموضوع
فيصل راجع من برا دخل وجلس عندهم:سلام عليكم
ابو غازي طالعه:هلا هلا اخيرا جيت الحمدلله عالسلامة أستاذ فيصل!!
فيصل:الله يسلمك يبه
ابو غازي بحدة:وينك اليوم ولاتكذب تقول الجامعة دفنتك
فيصل وهو يخفي ربكته:عادي يبه مابكذب عليك مريت المحل قبل يفتح اشيك عليه
ابو غازي بابتسامة سخرية:ماشاء الله!!ذيب ذيب!!ليتك معطي الجامعة بال مثل المحل الله يخلف علي فيك
فيصل:يبه وش فيك علي مستلمني من الصبح
ابو غازي اتسعت عيونه وصرخ:ولد!!
عادل الصغير انتفض بفجعة وصرخ يبكي
ام غازي رفعته بسرعة لحضنها وهي تسمي عليه:بسم الله عليك بسم الله
ابو غازي التفت لفيصل بعد ماكان يطالع عادل وبحدة:طقم صلب لابارك الله بعدوك نفضت قليب المسكين قم
فيصل:وش دخلني يبه!!انت اللي فجعته!!
ابو غازي صرخ:وشو!!!
عادل الصغير اللي هذا صوت بكاه للحظة صرخ يبكي من جديد
ام غازي صرخت:اهب ياعادل اهب خلعت وغيدنا اهب
فيصل فز وهرب
ابو غازي فز وراه:فيصللللللل
.
،،جناح غازي القديم،،
عذاري فتحت غطى السرير بشويش وهي تطالعه نايم تحركت ونزلت رجولها بتقوم من السرير
غازي مسك يدها وهو مغمض عيونه
عذاري تنهدت:غازي باشوف عادل
غازي وهو مغمض عيونه للحين وماسكها ماتركها
عذاري زفرت:صباح الخير حبيبي
غازي فتح عيونه وابتسم:صباح النور حبيبتي العذرة
عذاري كشرت:متى تبطل هالدلع ذا!!
غازي:اذا بطلتي تتسحبين وتهربين عني
عذاري رجعت جلست عالسرير وهي تتربع وتقابله والله مااهرب منك كيف اهرب من روحي!!
غازي سحبها له
عذاري قاومت سحبته:دولتي اكيد يبكي
غازي كشر:عادل عادل وش دولتي وبعدين مع اني لاتشيلين همه،،سحبه له بقوة،،
عذاري استسلمت له وهي تزفر وتمدد جنبه
غازي حاوطها بيديه وضمها لحضنه
عذاري وهي ملاصقة صدره ولامس راسها طرف دقنه
غازي وهو يغمض عيونه:خليني اشبع منك زين وهالنشبة بعيد عنا
عذاري بزعل وهي تضربه على صدره بشويش:حرام عليك مسكين مايسوي شي والله انك شرير
غازي:والله ان هالنتفة هو الشرير مناشبني فيك كل ماحضنتك(يقلد بكاه)واااااع واااع كنه يدري
عذاري ضحكت:يغار على امه
غازي:على شحم عرفتك قبله
عذاري ابتسمت:طيب وبعدين
غازي تنهد وهو يضمها له ويستنشق ريحتها بكل مافيه:ابي اشبع منك بس ابي اشبع بعيد عنه
.
..بيت الجد نشمي..
،،غرفة استقبال الضيوف،،
هيفاء عالسرير
الجدة منيرة وهي شايلة صحن التمر اللي خالطته بأعشاب وقفت جنب السرير وهي تمده لها:ها سمي وكلي منه
هيفاء بتعب:والله ياجدة مالي به نفسي منسدة عن العيشة
الجدة منيرة:راعي وجهش وشلون مصوفر من قل عيشتش(ماتاكل)وشلون بتشد روحش وتقومين ببنتش ورجلش وانتي غادية هاللون!!
هيفاء:عذبتني ياجدة ليت عمتي سمعتها عذاب بدل ماانها عذوب
الجدة منيرة بفجعة:استغفر الله العظيم خافي ربش بوغدتش عني لو يصيبها كبر راس الذرة ان نياحش يوحونه اللي باقصى الديار
هيفاء كشرت:الله يحفظها ياجدة
الجدة منيرة:اغتظتي!!هذا وجسش مايغيظ ياهيفاء،،مدت الصحن بوجهها،،هاش بس هاش اتعبتيني وانا احتريش
هيفاء اخذت الصحن بضيق
الجدة منيرة:كلي وتحمدي الله عالنعمة ولا بأرسل مراسلي يم ثريا تغدي يمش
هيفاء اكلت:لا لا انا باغدي يمهم ياجدة لاترسلين المراسيل تكفين
.
،،بالصالة،،
راشد منحني شبه ساجد وهي عالارض تحته ماسكة خنصره بيدها الصغيرة:يمّه يالوحي يمه يالصعيلونة اتلتي عدلي(اكلتي عقلي)يمه يالحلا يمه يازينة
الجد نشمي ضحك:ولد وش فيك ضاع كلامك!!
راشد تنهد وهو يلتفت لجده:ضيعت عقلي وش الكلام عاد ياجد!
ابو جواد:أعطني اياها خل اسلم عليها
راشد:لحظة ياخال لحظة ماشبعت للحين
ابو جواد كشر:من اليوم مزعجها والحين ماشبعت!!
راشد وعينه على بنته:مناشبني ياخال ببنتي!!
الجد نشمي ضحك
ابو جواد شهق:انهبلت!!
عذبة دخلت وهي شايلة القهوة وجلست بين راشد وابوها:اَي والله انهبل هاذي وهي لها اسبوع وش بيصير له لاكبرت شوي!!
راشد جلس على ركبه وهو يمسك صدره:يمّه بموت وانا اتخيل
عذبة ضربته على كتفه وبحدة:ولد!!
الجد نشمي بضحكة:من اول ضايع عقلك والحين تفلت زيادة!!
فيصل دخل وهو يلهث
،،كلهم طالعوه باستغراب،،
فيصل وهو يجري لجده ويتخبى وراه:ياجد بوجهك
الجد نشمي:وش فيك!!
ابو غازي دخل وبعصبية:فصيللل
راشد رجع ينحني شبه جالس وهو يمسك يدين بنته يبوسها ويهمس:بسم الله عليك بسم الله ياروح بابا بسم الله
الجد نشمي:لااله الا الله!!ماتعقل ياعادل ماتعقل!!
ابو غازي:وهو خلا بي عقل!!،،ابتسم وهو يطالع طرف الكوفالة الوردي اللي واضح طرفه من تحت راشد مشى له بخطوات سريعة ووقف جنب راشد وهو يرفع رجله ويدف راشد من جنبه اليمين،،قم عني
راشد طاح على جنبه اليسار وبصدمة:خاالي!!
ابو جواد ضحك:تستاهل يارويشد ذنبي!!
ابو غازي:قم قم بس قم عني
راشد:هيبتي ياخال قدام بنتي!!
ابو غازي:قم لاأمحطك واوريك الهيئة قم
راشد ابتعدت عن عذوب بهدوء وسط تكشيرته
عذوب بكت بصوت هادي
ابو غازي وهو يجلس:هلا ياهلا بهالصوت اويلي عالبنات وش هالصياح اللي ياخذ القلب
الجد نشمي ضحك:واحد عقله والثاني قلبه!!
ابو غازي رفعها من عالارض لحضنه وهو يسمي
راشد فز قلبه:بشويش تكفى ياخال!!
الجد نشمي غمز لفيصل
فيصل وقف وهو يتسحب بشويش
ابو جواد كتم ضحكته وهو يطالعه
فيصل خرج وجرى لسيارته وحرك لجامعته
ابو غازي طالعه بحدة:علمني احسن!!وبعدين يومك صادق وين فراشها حاطها بالارض كذا!!
عذبة:العناد أكلمه وهو طاير معها ورايح مايسمع
راشد:وش اسوي يمه ماعاد انتبه لشي وهي معي
ابو غازي:من اول ضايع ماهي بجديدة عليك
راشد:خالي!!من اليوم مستلمني وش فيك علي!!
ابو غازي تذكر فيصل والتفت:فصيل العلة!!
الجد نشمي وهو يتقهوى:ارسلته مالك فيه
ابو غازي:ليش يبه!!
راشد:عطني بنتي ياخال
ابو غازي رفع عذوب عن رجوله بيديه ومد رجله لراشد يدفه:طسّ عني طسّ علامك مبلشني كن محد عنده بزر غيرك طس!!
راشد:ياخال
ابو غازي بحدة:اوص
عذبة ضحكت وهي توقف؛بشويش عالبنت لاتذبحونها بودي فطور امها وراجعة لها
راشد:يمه عند ابوها لاتوصين!!
عذبة:وهاذي المصيبة
ابو جواد ضحك
عذبة:وفوقها وسطكم كلكم رجال بتطيرون قلبها من مكانه،،مشت،،
ابو غازي يبوس خدودها:والله اني متنعم ياربي لك الحمد هناك واحد وهينا واحد
.
..بيت خالد..
سهام نازلة عالدرج جاهزة لدوامها خرجت من البيت ووقفت عند مكان جلستهم بالحديقة:السلام عليكم
ابو صايل وام صايل ردوا السلام
سهام تقدمت لسريره وانحنت وهي تبوسه وهو نايم:ياروح ماما
ابو صايل وقف:يالله مشينا
سهام وعينها على ولدها:اذا بيتعبك عادي أوديه لامي
ام صايل بابتسامة:لا لا وين تودينه خليه معي يونسني
سهام تنهدت بضيق:اوك على راحتك مشكورة ماتقصرين
ام صايل وقفت وهي تنحني وتشيله من سريره:خلاص يكفيه تشمس روحي دوامك ويزن عندي لاتشيلين همه بعيوني
سهام:تسلم عيونك مشكورة
ام صايل اتجهت لداخل البيت
ابو صايل مشى:يالله الحقيني
سهام مشت وراه وهي تحبس دموعها
ابو صايل التفت لها وهو يحس بخطواتها البطيئة:وش فيك؟
سهام برجفة صوتها وهي توقف جنبه:مو مطاوعني قلبي اروح واتركه
ابو صايل ابتسم وهو يحط يده على كتفها ويضمها لحضنه ويمشي:وين الهمة اليوم اول يوم دوام لك بعد إجازتك!!ماهي بسهام اللي تقول هالكلام
سهام؛ويزن؟
ابو صايل بابتسامته:عند خالته بعيونها لاتخافين انتي روحي دوامك وبعدها بتتعودين عالوضع
سهام تنهدت بضيقتها
ابو صايل ترك كتفها وهو يمسك يدها ويمشي بسرعة
سهام وراه:وش فيه!!
ابو صايل:يالله يالله لاتتاخرين على اول يوم لك
.
..بيت مسفر..
،،المطبخ،،
شذى تتثاوب وهي تحرك الشوربة التفتت تطالع الطاولة من وصلها صوت الاهتزاز زفرت وهي تقرأ اسمه تقدمت بخطواتها وهي تسحب جوالها وبطفش:نعم!!
جواد:كلمتي رهايف الصباح؟
شذى:مايكفي اجهز الشوربة لكم بعد اهتم بمواعيدكم عن بعد!!
جواد:كل شي بحقه ياام لسان طويل!!
شذى:كلمتني عالساعة ثلاث
جواد سكت
شذى:ليش!!لايكون تعبت مرة ثانية
جواد اتسعت عيونه:اسكتي لاتسمعك امي ويوصل لعمتي فضيحة انتي فضيحة!!
شذى بوزت:اسفة اسفة خلاص لاتعصب
جواد زفر:استغفر الله بس قفلي انتي خليني اشوف نهايتها معها هالرهايف
شذى:طيب،،قفلت،،استغفر الله مضغوط بدوامك وش ذنبنا تنفس علينا!!،،اتسعت عيونها،،والشوربة مابيجي لها!!،،رفعت جوالها بتتصل له وبطلت وبتكشيرة،،ارسل السواق ولايذلني،،قلدته،،كل شي بحقه
.
..بيت فاهد..
يوسف حاط اكل له لوحده بصحنه وجالس يفطر وهو مايطالعهم
فاهد ونشمي جالسين عالارض يفطرون
فاهد زفر بطفش منه وطالعه:وثمن معك انت هاه!!وثمن؟!
يوسف وهو مايطالعه:انا بأغدي يم عمي عادل هو اللي بيفزع معي
نشمي ابتسم وهو فاهم حركته
فاهد طارت عيونه من اللي سمعه وبحدة:وشو!!!
يوسف:ايه انت وعمي ماتدانون(تطيقون)بعيضكم مير عمي لاطلبته فزع اخو عذبة كفوووو
نشمي ارتفع حاجبه:لاتدخل عذبة بالسالفة!!!
فاهد:وانا وين غديت عنك هاه!!جبتك ونسيتك!!
يوسف:انت معيي تنشده!!
فاهد بعصبية:وصريمة يايوسف وصريمة اوجس امين
يوسف بعناد:ماني بموجس
فاهد بعصبيته:قبل البارح خاطبين لك تريد يوجسون تم من اولها!!العرب لزوم يتقصون سواد وجهك!!
يوسف بتكشيرته:وجهي ابيض راعه!!
نشمي ابتسم
فاهد:ياربي صبرنا على هالولد يارب حتى اخوك ماغثني مثلك
يوسف:لانه ماهو بمعك دايم ولا أغث واحدن هو انشد عمي
فاهد كشر بوجهه:يازين غثاه يمك!!عليتني ياعل عداك للعلل
يوسف:الظاهر خالي بيغدي برزقته وانا للحين مااوجسوا يمي شي
نشمي كشر:اذكر الله مابغت ترضى!!
فاهد:ياشين ياشين خاف ربك مالك يومين وفوقها عمتك بنفسها خاطبة لك يعني المفروض انك مرتاح وقاضي!!
يوسف:ليش تأخروا طيب!!
فاهد:يمكن البنت تستخير للحين اصبر لااله الا الله!!
يوسف:لا لا انا مالي بهالوضع الا عمي عادل يمسك اخوه من أذنه ويخليه يوافق
فاهد صرخ:غصب هو غصب!!ولا أعجبك عادل وهو يمشي كل شي بيده
يوسف:ورجوله بعد والله يبه ياعليه شوتة تفقدك الذاكرة
نشمي ضحك
فاهد فز واقف
يوسف رمى صحنه ونط ورا الكنبة:يبه يبه صبر نتفاهم
فاهد:انا اللي بأفقدك الذاكرة على هالصباح
يوسف وهو يدور الغرفة من ورا الكتب ويدف يدين ابوه عنه لايمسكه:ارتقي يبه لاتصير مثله انت العزة والشموخ!!
فاهد:اَي والله بأعتز واتشمخ فوق راسك تعال
يوسف جرى لغرفته:ليه مهبول انا اسلم روحي لك!!
فاهد يجري وراه:ان ماخليتك تحرم تجيب طاري الجيزة ماني ولد ابوي
.
..بيت جواد..
جواد وقف قبال باب بيته راجع من دوامه وهو يتصل فيها ولاترد بدا يدخل قلبه القلق بعد ماكان مجرد توتر وهو خرج البارح وهي تعبانة دخل لبيته:رهايف رهايف،،اتجه لغرفة الضيوف اللي تنام فيها اذا مافيها حيل تطلع فوق زاد قلقه وهو ماحصلها لف الدور الأرضي كله وهو يناديها مو موجودة طلع الدرج ثنتين ثنتين بخطواته السريعة وجرى لجناحهم وهو يفتح الباب قطب جبينه وهو يطالع انارة الـجـنــاح خافتة وبنفسه،،معقولة نايمة!!،،مر من مدخل الجناح البسيط،،
رهايف جالسة بزاوية نهاية مدخل الـجـنــاح وهي تنتظره واول ماسمعت فتحت الباب انصتت لخطواته واول ماقرب مدت عصا المكنسة اللي ملبسة نهايتها شراب اسود وهي تحركها بطريقه بسرعة عالارض قدامه وبصرخة:فاااااار
جواد شهق وهو يوقف على رجله اليسار ويرفع رجله اليمين لفوق ويديه لفوق:يممممممهههه
رهايف انفجرت تضحك وهي تطالعه
جواد وقف وهو يحط يده على صدره يحس بنبضات قلبه للحين ماهدت
رهايف وقفت وهي تتنهد من ضحكتها:ليش تأخرت تدري كم لي جالسة عالارض انتظرك!!
جواد كشر بوجهه
رهايف وهي ترجع لورا وتمد يديها لقدام:لحظة لحظة خل نتفاهم حبيبي
جواد يمشي لها:نتفاهم!!
رهايف وهي ترجع لورا للحين:يالحب يالروح،،لفت وجرت وهي تصرخ بعد مافهمت انه مابيتركها،،يمممممهههههههه
جواد جرى وراها وهدّا بخطواته وهو يذكر حملها وتعب وحمها اللي طفش منه:شوي شوي مابسوي لك شي والله
رهايف وهي تجري للحمام اهم شي توصل له ابتسمت وهي مابيننا وبين الباب الا شعرة ومدت يدها
جواد جرى بسرعة اكثر لحقها وحاوطها من خصرها ورفعها وهو يلف فيها عن الباب بسرعة
رهايف ثنت رجولها وهي تنزل راسها لتحت شوي وتغطي اذانيها بيديها تصرخ بين يديه طايرة بالهوا؛جواااااد
جواد وقف فيها وهمس بأذنها:والله عاللي سويتيه يبي لك ضرب محترم بس احمدي ربك انك حامل
رهايف ارتاحت وهي تسمع كلامه مدت رجولها للارض وهي تلامسها ونزلت يديها وهي تلامس يديه وبزعل:يعني مااستاهل تخاف عشاني شوي!!
جواد:لا ماتستاهلين!!
رهايف كشرت:نعم!!!
جواد ابتسم وهو يرفع يمينه ويبعد شعرها عن رقبتها ويدفن وجهه برقبتها وغطاه شعرها وهمس:تستاهلين روحي ياروحي
رهايف ابتسمت:الله يخليك لي،،اتسعت عيونها،،
جواد عض رقبتها بقوة
رهايف:اااااه
جواد تركها وهو يضحك:عشان مرة ثانية لاتخوفيني
رهايف غرقت عيونها دموع وهي تحط يدها على مكان عضته وتطالعه بتكشيرة
جواد اختفت ابتسامته:زعلتي!!
رهايف ماردت واتجهت للحمام بخطوات سريعة
جواد لحقها
رهايف دخلت الحمام وقفلت الباب وراها
جواد دق الباب:رهايف لاتصيرين نفسية
رهايف ببكاها:مدري مين النفسية والله
جواد زفر وفتح الباب
رهايف ماسكة الشطاف قباله وهي تطالعه بشر
جواد اتسعت عيونه
رهايف رشته بالموية وهي تضحك بصوت عالي وتطالعه:تستاهل هالدمعتين اللي نزلت،،تضحك،،
جواد رجع بخطواته لورا وهو يغطي وجهه بيديه وتحرك بيمشي وزلق
رهايف ماتت ضحك وهي توقف رش عنه ومشت له وقفت عنده
جواد عالارض وهو يمسح وجهه بيديه مد يده لرجلها وسحبها بقوة
رهايف زلقت وصرخت:جوااااااد!!!
جواد اللي نسى حملها اتسعت عيونه وانقلب وجهه من فجعته وهو يمد يديه لها ويحاول يمسكها وطاحت بجسمها على صدره صرخ من المه:اااااه
رهايف رغم ان جسمه خفف طيحتها لكن توجعت شوي وبكت
جواد يتالم تحتها
رهايف قامت عنه بدموعها على خدودها وضربته على صدره بقوة
جواد كح وسط المه:اااه
رهايف:احسن!!
جواد وهو متمدد على ظهره ويطالعها:اسف والله نسيت!!!
رهايف بكت بصوت عالي
جواد زفر وهو يعتدل بتمدده على جنبه اليسار ويطالعها بوجه مرتسم عليه الوجع:الله يعدي الشهور الجاية على خير
.
.........****..........
ام جـلاجـل
.
..مزرعة مناور..
مناور جالس بزواية بيته اللي بوسط هالمزرعة زفر وهو يطالع بيته الفاضي
فضة(زوجته الجديدة)بكامل زينتها المعتاد عليها عندهم جلابية خضرا قصيرة واكمامها الكت بعشر بناجر بيمينها وخمس أسوار عريضة بيسارها خواتم بيديها ورشرش يزين رقبتها بصوت خلخالها اللي وصل له قبل تخرج من الغرفة خرجت من غرفة نومهم وعلى وجهها ابتسامة:حي هالصباح اللي يزهى وتقر عيني بشوفة راعي القلب
مناور ابتسم:الله يحييش يافضة الله يحييش
فضة وقفت قباله وهي تنحني وتسلم على راسه ويده
مناور سحب يده:استغفر الله!!
فضة سحبت يده:كود ماحبيت يد رجلي احب يد من!!محد يستاهلها غيرك ياعين فضة
مناور:سلمتي سلمتي
فضة:افا ياشيخ علامك ماوعيتني!!العادة لذالحين راقد!!
مناور؛ارعيتش راقدة قلت اكبش اتريحين عقب تعب البارحة
فضة زفرت بضيق:مناور
مناور قطب جبينه:علامش
فضة:ماودك تراعي مرتك وبناتك حالتهم تضيق الصدر
مناور بعصبية:اقطعي طرياهم يافضة لااغيظش
فضة تنهدت:زين زين لاتغتاظ والله مااريد غير اراعيك مستنانس ياعين فضة
مناور:قومي ولمي القهوة ولاتوجسين هالطواري مرتن ثانية اوحيتي
فضة فزت واقفة:ابشر ابشر ياعيني ابشر ذالحين وهي قدامك،،لفت عنه باتجاه المطبخ بابتسامة على وجهها وبنفسها،،الله يجعله ياعلك ماتريدهم دايم
.
..بيت مفلح..
ثريا بوجهها المرسوم عليه الضيق:مفلح
مفلح نزل فنجاله بطفش منها وبعصبيته:عليتي مفلح ياعلش ماتفلحين ياثريا اوجسي امين
ثريا:ماني بموجسته الى منك توجس ابشري
مفلح:ماني بغادين بس مير تريحي ياثريا تريحي
ثريا بترجي:تكفى طلبتك يامفلح تكفى
مفلح:ماني بغادين يم هالديار الصعيبة كبيني يامرة كبيني عليتيني عوذا منش عوذا
ثريا بعصبية:الا عوذا منك انت يالوجه الاقشر!!مابك رحمة خابرته من اول مير اوجست بلكن عود عقب ماغدت عنا وغدا بقلبه محنّة مير مالك خير يامفلح تف
مفلح اتسعت عيونه وهو ياخذ فنجاله ويرميه عليها:اعقبي اتفيني!!
ثريا فزت واقفة:اَي بالله ولا الضعيفة غدا لها اسبوع والد وانت ماصحى قلبك يغدي يمّها
مفلح بعصبية:طسي لحالش ياعلش ماتعودين طسي!!
ثريا:اَي بالله بطس ماني محتريتك احتريتك لامني اوجست واللي خلقه!!والله لاغدي يم بلك(الابل حقته)واتخير ازينهن واغدي بها يمّنا ام جـلاجـل واعطيها عطية للي يغدي بي يم هيفاء
مفلح يطالعه بصدمة:وشو!!اعقبي
ثريا؛وانت خلك هنيا،،مشت،،
مفلح فز واقف ومشى وراها:ثريا
ثريا جرت وهي تسمع صوته وراها:والله لأخذ أزينها كود ماغديت بس يم بنيتي يامفلح والله
.
..بيت ناصر..
ناصر واقف عالباب ماسك الحافظات الصغيرة بيده يطالعها بابتسامة
مزون قباله بيدها كيس وهي تاخذ من الحافظات وترتبها بالكيس وعينها عالحافظات والكيس:هاذي بها رز وهاذي بها ايدام وهاذي بها لحم وكل زين وكب عنك،،رفعت عينها له وابتسمت وهي تطالع ابتسامته،،علامك؟
ناصر طبع بوسة على جبينها:الله يقر عيني بش دايم ياإمزينة قليبي
مزون:امين امين ياعيني مير تغدا الشبهة ماهي بنافعتك لااعتليت(مرضت)
ناصر بابتسامة:ذالتن علي يامزون
مزون:وذي يريد لها نشدة!!كود مادلين عليك اذل على من ياعين مزون
ناصر تنهد بحب وهو يطالعها:والله ماودي اغدي ودي اقعد معش ونفطر
مزون زفرت:اغد اغد لاتوخر ويقومون عليك اباليس هالديرة اللي مايثمر بهم شين اغد حافظك الله
ناصر باس جبينها مرة ثانية:الله يحفظش لي الله يحفظش،،خرج،،
.
..بيت طلق..
فارس دخل للبيت وهو يلهث وبصراخه:يمّه يمه
ام طلق خرجت من المطبخ وهي مفجوعة من صراخه:علامك ياولد!!
فارس بوسط انفاسه:طلق يمّه طلق
ام طلق شحب وجهها:علامه خيّك!!
طلق دخل للبيت بابتسامة:السلام عليكم
ام طلق نزلت دموعها وضربت فارس على كتفه:روعتني،،مشت لطلق وهي تزغرط،،ياهلا ومسهلا يامرحبا الف
طلق هرول بخطواته لامه وهو يفتح يديه لها وسط ابتسامته
ام طلق ضمته لحضنها وهي تبكي:يامرحبا بمطول الغيبة يامرحبا
طلق وهو يبوس راسها ويدها وبرجفة صوته:تشوقت لش يمّه تشوقت
ام طلق:ياهلا باللي مزع(شال)قليب امه ورده بلفيته ياهلا
.
،،بمكان نائي تمامًا خالي من البشر ماعدا خيمتهم اللي تتوسط هالوادي،،
تتخطى بخطواتها الضعيفة وعينها على قفاه بحقد
حمد قبال ناره اللي بطرف الخيمة يغني مبسوط وهو يجهز دلته
غيثة بجسمها الهزيل ووجهها الشاحب اللي تغطيه الكدمات بيدها خنجر حمد وقفت وراه وهي تنحني وتوجهه له تبي تذبحه وبغبنتها:متتتت
حمد التفت لها بسرعة وسط ابتسامة وهو يمد يده بسرعة ويمسك يدها اللي ماسكة فيه الخنجر ويوقف
غيثة انخطف وجهها وهي تطالع ابتسامته
حمد ضغط على يدها بقوة وهو يطالعها ببابتسامة
غيثة طيحت الخنجر وهي تبكي من المها:كبني كصمت(كسرت)يدي!!
حمد ترك يدها وهو يرفسها برجله
غيثة طاحت عالارض
حمد بابتسامته:تريدين موتش يوم تعملين هاللون!!
غيثة:ليتني ميتة ولا عيشتي القشرا معك
حمد انفجر يضحك
غيثة:مايصيبك علل بيديك ورجولك
حمد بابتسامة:ليه!!تريدين تصيبني علل!!
غيثة بقهرها:يالله ياكريم ان تنزل بك يالله
حمد ضحك:بتنزل بي مير عقب مااقبرش!!
غيثة:ماورا فعولك بي!!
حمد باستمتاع:ماارعيتي شين لذالحين!!ماارعيتي نورة(زوجته الاولى)وش غدا بها!!
غيثة بدموعها تترجاه:تكفى اذبحني تكفى
حمد انفجر يضحك
غيثة:الموت اشوى لي منك
حمد:صحيح أشوى لش الموت مير والله عقب سواتش ذي ان ماتراعينه!!
غيثة وهي مرعوبة منه وهي تدري اللي سواته مابينا مرور الكرام انهلت دموعها بغزارة وبصراخ:ماتخبر من انا!!انا بنت الشيخ مناور!!والله ان ماتغدي فعولك بي على خير
حمد بابتسامة:امحق شيخ وامحق ابو،،التفت لناره وهو يحركها،،اللي ماعزش وحذفش يمي مثل حذفته للكلاب وهو خابرن فعولي بالحريم وش يريد بهاللون!!،،التفت لها بابتسامة وهو يسحب منه عود حطب طرفه مجمر(بدا يصير جمر)ووقف وهو يتجه لها،،
غيثة رجعت لورا:يلفي والله ان يلفي واتندم على سواياك بي!!
حمد ضحك:مير اني لفيت يمّه عقب مااخذتش بزمن واوجس يمي مايريد لي شوف ولايريد لش طريا
غيثة اتسعت عيونها بصدمة؛اكذاب اكذاب
حمد انحنى وهو يجلس قبالها ويطالع العود اللي بيده:تخبريني اعمل كل شي الا الاكذاب مااريدها
غيثة تجمدت وهي تظلم الدنيا بعينها بعد مافقدت اخر خيوط املها بالفكة من حمد والفكة من حياتها معه
حمد مسك رجلها وهو يحرقها بطرف العود
غيثة صرخت بالم من حرقها
حمد:هالوسم(الحرق)حتى اتخبرين ماتعملين مية مرة قبل تعملينه ياغيثة انا حمد كود ماخبرتي حمد لذالحين اخبرش وافهمش
.
..بيت غيث..
هدية البارز بطنها جالسة قبال عمتها بتعب واضح عليها مدت الفنجال لها:هاش ياعمة
ام غيث اللي تطالع لقدام ساكتة بشرودها
شريفة جالسة جنب امها اخذت من هدية الفنجال وهي تحط يدها على رجل امها المتربعة:يمّه
ام غيث ماردت
شريفة هزتها ورفعت صوتها:يمّه هاش قهوتش
ام غيث انتبهت لها والتفتت لها وأخذته منها ورجعت لشرودها
نوفة متجهة لهم وبيدها صحن التمر جلست قبالهم وهي تقرب الصحن من هدية:هاش كلي حتى إتيسر ولادتش
هدية زفرت:الله يستجيب لش يانوفة الله يجعله رقدت نايفة؟
نوفة؛أعطيتها الدوا وحرستها لامنها رقدت الله يعين ويشفيها رقدت مير ياشين رقدتها،،طالعت امها وزفرت بضيق،،يمّه القهوة أبردت
ام غيث ماردت
شريفة مدت يدها لامها من جديد وهي تهزها:يمّه القهوة
ام غيث طالعت شريفة باستغراب
شريفة:القهوة يمه
ام غيث بكت
هدية غرقت عيونها دموع:عمة!!
شريفة بلعت غصتها وهي تمسك يد امها:علامش يمّه ذالحين علامش!!
نوفة غرقت عيونها دموع وهي تصد بوجهها عنهم
ام غيث اعتلى صوت شهقاتها
شريفة ضمت امها لصدرها:الحمدلله يمّه الحمدلله على كل حال الحمدلله
نوفة:يااميمتي بدل هالدميعات ادعي لمن مات بالرحمة والمريض الله يرفع عنه والغايب الله يرده
.
..بيت جسّار..
جسّار واقف قبال المراية بلبس دوامه يقفل ساعته وهو يهمهم
بخوت بفستانها النيلي القصير لتحت ركبتها المخضر على جسمها بقصة مستطيلة نازلة من الاكتاف عالصدر ومايلة من اليسار على شكل سبعة فاردة شعرها الطويل المغطي ظهرها كله دخلت للغرفة بابتسامتها الهادية وبيدها المبخرة
جسّار ابتسم وهو يطالعها
بخوت وقفت قباله وهي تبخره
جسّار مد يديه وحاوط خصره وهو يسحبها له ويلصق جسمها بجسمه
بخوت ابتسمت باحراج وهي تبعد يدها اللي بها المبخرة
جسّار:كيف اروح للدوام وهالحلا كله قدامي
بخوت بغرور:ماألومك والله
جسّار ضحك:اموت عالثقة يحق للزين يغتر يحق له
بخوت رغم محاولات استعادت ثقتها الا انه تتحرج بسرعة نزلت راسها وهي تحس بخدودها بتنفجر من حرارتها
جسّار عقد حواجبه وهو يشم بصوت:تشمين ريحة؟
بخوت رفعت راسها له وهي تطالعه بنص عين وبزعل:ريحة خدودي اللي انشوت!!
جسّار انفجر يضحك وهي فاهمته
بخوت فكت يده بيدها وهي ترفع لابكوته وتبخره
جسّار:وصلك الصوت؟
بخوت رفعت عينها له:صوت وش!!
جسّار اتسعت عيونه:يمّه لايكون فيني بلا
بخوت ميلت فمها وهي تطالعه بشك:مابك خلاف بسم الله عليك كب الوسوسة عنك
جسّار همس:سمعتيه الحين؟
بخوت سكتت وهي تنصت ثم رفعت عينها له:مابه حس!!
جسّار بهمس:قلبي يدرقن دربق ربق
بخوت كشرت:عنيت درقن درقن ماهو بدربق دربق!!
جسّار ضحك وهو يبوسها بقوة على خدها
بخوت:اااه
جسّار ضمها لصدره وبصوت عالي:ياعالم ياناس ولكم وجه تلوموني بحبها!!
حلايا اللي نايمة على سريرهم جلست وصرخت:اوووووص
جسّار وبخوت التفتوا لها يطالعونها
حلايا:ادوشتوني(ازعجتوني)كبوني انام كبوني
جسّار فك بخوت من حضنه وهو يمسك يدها؛نامي نامي وانا وأمك عندنا سالفة
بخوت نزلت المبخرة على التسريحة
جسّار خرج ويده بيد بخوت وقفل الباب على حلايا ووقف قبالها وطالعها وتنهد بحب وهو يتأملها
بخوت تطالعه بابتسامة ورفعت نفسها على اطراف أصابعها وهي تبوس خده بخفة
جسّار مسكها قبل تنزل:لا اقوى ماترضيني
بخوت رفعت يديها وهي تحاوط رقبته وشدته لها وهي تبوسه بقوة
جسّار ضحك بخفة وكله رضا
بخوت ابتعدت عن خده وهي للحين محاوطة رقبته وبابتسامة:ارضتك ذالحين؟
جسّار حاوط خصرها ورفعها وهو يمشي باتجاه الباب ودافن وجهه بكتف بخوت
بخوت بابتسامة:وثمن بتاخذني معك يم دوامك
جسّار وقف عند الباب وهمس وهو ضامنا له للحين:ياليت والله مااخليك تروحين عن عيني
بخوت:جسّار
جسّار مارد
بخوت:حبيبي
جسّار ابتسم وهو ماتركها
بخوت:ياروح بخوت
جسّار مارد
بخوت:ابرقد الليلة يم جدي
جسّار تركها بوسع عيونه:نعم!!
بخوت ضحكت بخفة:ماتوحي لي الا بهاللون
جسّار كشر:تمزحين صح؟
بخوت:اعجل تراك متوخر هماك توجس ريسك متقعدن لك
جسّار:تقعد عليه علة تفكني منه
بخوت:استغفر الله خاف ربك
جسّار باس خدها:فمان الله،،خرج،،
بخوت ابتسمت وهي تقفل الباب وراه والتفت بتدخل للبيت قطبت جبينها وهي تطالعها:علامش!!
حلايا واقفة قبالها:واخزياه يابخوت واخزياه
بخوت ارتفعت حواجبها:علامش
حلايا:والله لاوجس يم جدي انكم مابكم حيا تسلمون على بعيضكم بوضح النهار!!
بخوت تغير وجهها:ياعين امش انتي
حلايا قاطعتها:وهالكذوب جسّار يوجس يمي بالليل مابه خلاف
بخوت اتسعت عيونها بصدمة:وشو!!!
حلايا:انشدي الكذوب رجلش يعلمش،،مشت للغرفة،،
بخوت جرت لها تلحقها:حلايا حلايا اصبري وش هالعلوم!!ادني يمي علميني يابنت بنت
.
،،بسوق المحافظة،،
سعود واقف وراه انحنى شبه راكع وهو يهمس لجده:ياجد محدن ذالحين ياخذ هاللون
الجد بادي جالس بمحل أقمشة:انكعم عني،،زفر،،خياتك مابهن خير ولا وحدتن فزعت معنا
سعود:ياجد والله ماقصرن انت اللي رديت القطع مااعجبتك!!
الجد بادي:اَي بالله اجل احدن يشري قماش لمرة مايتلامع!!
سعود زفر:جدي والله محدن يعمل هاللون علامك ماتوحي لي
الجد بادي رمى قطعة القماش اللي بيده وهو يلف ويلتفت لسعود وبحدة:ولد ياسعود
سعود:سم ياجد
الجد بادي:من اخبر بالعلوم والسلوم؟
سعود تنهد:انت ياجد انت
الجد بادي:اجل انكعم وكبني اتقضى لزواجك على مااريد وكود ماتقوى تاقف طسّ يم السيارة لامني اقضي أموري
سعود زفر بتكشيرة:بي حيل بي حيل تقضى ياجد على هواك تقضى
.
،،شبك غنم فيه غنم بعدد لابأس فيه وعن يمين هالشبك بركة صغيرة وحوض صغير وقبال هالشبك بمسافة ست امتار تقريبا عشة تحتها مشب ودولاب صغير باللون البني وجلسة مرتبة وورا الشبك والعشة بمسافة خيمة متوسط حجمها وهالشي والخيمة والعشة بوسط وادي فاضي مافيه اَي احد،،
بتال يسوق سيارته راجع من شفته الليلي متجه لهالغنم ابتسم وهو يطالع سيارتها واقفة جنب العشّة ودخان نارها يتصاعد وقف جنب سيارتها ونزل وهو يمدد جسمه وسط اصوات طالعه منه زادت ابتسامته وهو يطالع عبايتها وطرحتها معلقتها بعامود العشّة اتجه لشبك الغنم وضحك بخفة وهو يلمحها داخله اسرع بخطواته وهو يرفع صوته بالغنا:
الـزيـنـة يـومـن يـطـروهـا..
أصـيـلـة مـاعـذربـوهـا..،،وقف على باب الشبك وهو يفتحه ودخل وقفله،،
تـربـت مـن كـف أخـوهـا..،،لف للشبك وغمض عيونه وهو يحس بالضربة،،
عباير بجلابتيها العودية الواسعة بشعرها المجدول جديلتين مسدولة على اكتافها وبعض الخصل النازلة اللي تتطاير على وجهها مع هبوب الهوا جالسة عند احد الغنم ماسكتها وتحلبها وهي تتحلطم فزت واقفة وهي تترك الغنمة وحتى جك الحليب وجرت لخزان الشعير وهي تفتحه وتاخذ بكف يدها كمية من حب الشعير وهي تسمع صوته واتجهت لباب الشبك وعلى التفاتته ضربته بوجهه بكل قوتها بالشعير
بتال يتفل الشعير اللي بفمه وهو مغمض
عباير تكتفت وهي تطالعه وبنرفزة:ماعاد إتضحك علي بهاللون ياولد فاهد!!
بتال فتح عيونه وقطب جبينه وهي ماتناديه ولد فاهد الا اذا زعلانة مرة:ياعبرة القلب وشريانه للحين زعلانة
عباير لفت عنه بتكشيرة وهي ترجع لخزان الشعير:ادنى عاوني ادنى،،سحبت الشراع(تتغطى فيه الخيام وشبوك الغنم وقت المطر)الملفوف على بعضه جنب خزان الشعير وهي تحاول تفرشه عالارض،،
بتال قبالها بمسافة ضم يمينه لصدره وهو يتصنع الالم:لااله الا الله وكرف البارح والمرضى اللي شلتهم
824
.
~
عباير زفرت بيأس منه وهي فرشت الشراع عالارض ووازنته:يومك ماانت براعي غنم ليش تبلشني بها!!
بتال تقدم بخطواته وهو يوقف بوسط الشراع تنهد:قلبي غزاه حبها ياعباير وش العمل بالقلب دام القلب هاويها
عباير اخذت الزبدية اللي بوسط الخزان وهي تشيل بها كمية من الشعير وترميها عند رجوله:ويومك هاويها قم بها ياعلها للذيابة!!
بتال ينطنط وهو يرفع رجوله لاعلى شي يبعد عن الغنم اللي تجمعت حوله عالشعير
عباير هزت راسها وهي تطالعه:ماشاء الله يازين هواك ماشاء الله!!،،انحنت وهي تزفر وتاخذ من الشعير وتحط عالشراع للغنم،،
بتّال متكي بظهره عالشبك يطالعها وهو متكتف بوسط ابتسامته
عباير قفلت الخزان بعد مارجعت الزبدية داخله وانتهت من الغنم واتجهت لباب الشبك
بتال مشى وراها
عباير فتحت الباب وقفلته وراها بسرعة وراها ومسكته وهي تطالعه بتكشيرة
بتال بابتسامة:عبرة القلب
عباير:خلك عند الغنم اللي تريدهن هماك هاويهن!!
بتال:ماهو يكثر هواي الزين!!
عباير ميلت فمها بشك
بتال جر هجينيته وهو يغمز لها:
الـــــــــزين مثل الحيا متبوع..
ان ما تلى الناس يــتــــلونه..
عباير تكتفت وهي تنتظر الزلة:وثمن؟؟؟
بتال ترك البيت اللي هي تنتظره(الشين مثل المحل مقطوع..يمشون لين يتعدونه)وكمل:
من ذاق حب امهات اردوع..
اهل الهوا مايلمونه..
ياشوق عنك الخطا مرفوع..
وانتي عن الشين مصيونه..
عباير تنحنت وهي تفتح له الباب ومشت
بتال قفل الباب ومشى وراها:للحين زعلانة؟
عباير التفت له وهي ترفع يديها وتفتحهن بوجهه وبضيقة:راع راع يديني من راعاهن يوجس خشبة من يبسهن!!
بتال مسك يديها وهو يبوس باطن كفوفها:ازين الخشب واجوده
عباير سحبت يديها منه وهي مستغلة انحنائه ومسكته من اذانيه وشدته وهي تعض طرف شفتها
بتال غمز لها ورسل لها بوسة بالهوا:ذبحتني عضة هالشفاه ياعبرة بتال
عباير تركته وبتكشيرة:بتااال!!
بتال بابتسامة:ياعيونه
عباير:ذالحين مستانسة ربي فكني منها يوم جدي باعها تغدي يمه وتشريها منه ليش!!هاه ليش!!
بتال عاد الكلام:قلبي غزاه حبها يا
عباير تنرفزت:بتااال!!
بتال:والله ياعباير احبها والله
عباير زفرت ومشت باتجاه العشّة
بتال مشى وراها
عباير سحبت طرحتها من عامود العشّة ولفتها اَي كلام وجلست عند المشب وهي تحرك الحطب وبدت تجهز القهوة
بتال جلس قريب منها بنفس جهة جلستها ويمينه موازي ليسارها وبينهم مسافة ابتسم وهو يشوفها مجهزة الفطور وتنتظره:افطرتي؟
عباير بزعلها:اجل احتريك!!
بتال رفع كم سكرابه اليسار وهو يلف جسمه لها يبيها تطالع جرحه وبتكشيرة:شوفي انحرجت ولااحد طالع فيني!!
عباير:احسن تستاهل
بتال كشر وزفر وهو يقرب بجلسته منها وكمل:تخيلي الحادث لااله الا الله وقوته!!وصلنا الموقع وجريت للسيارة فتحت بابها بعد معاناة ودخلت للسيارة ومسكت المصاب ورفعته وضرب راسي بالتندة
عباير كتمت ضحكتها وهي تتربع
بتال وهو يميل بجسمه جهتها:وجاتني دوخة دوخة ماعاد اشوف شي،،ارتمى بحضنها ووازن راْسه على رجولها وهو يتكتف ويغمض عيونه،،دخت دخت
عباير ميلت فمها بابتسامة وهي تمسح على راسه:عاد لحقوا عالوجعان ولا عليك يالدايخ؟!
بتال:مدري الظاهر انا الوجعان
عباير ضحكت:لاترقد الى منّا نفطر
بتال:وين النوم وريحة القهوة تضرب راسي
عباير مدت يدها لسكرابه ترفعه وشهقت وهي تطالع جرحه:اهبوا هذول مستشفى!!كود ماراعوا دكتورهم وشلون بيغدي مستشفاهم ياعله للصريمة!!
بتال فتح عيونه وهو يطالعها:محد يمي ياعبرة بتال
عباير:ابشر العبرة تفزع بك ابشر غدينا يم جدي ماازين من مشعابه
بتال فز جالس وبزعل:عباير!!
عباير انفجرت تضحك:علامك مشعاب جدي من ترعيه تطيب
بتال:ايه اضحكي وش عليك انا اللي بأنكوي!!،،رجع يتمدد على رجولها وغمض عيونه،،
عباير تلعب بشعره بابتسامة
بتال بتكشيرة:لايدري جدي
عباير:ان شاء الله
بتال فتح عيونه ورفع راسها لها بتأكيد:لايدري
عباير وهي ترفع راسه عن رجولها بيسارها وتمد يمينها للدلة اللي عالنار
بتال جلس
عباير مدت له الفنجال بعد ماصبت له وبابتسامتها:سم
بتال اخذ فنجاله:سلمتي
عباير طاحت طرحتها من على راسها وهي تصب لها فنجال تاففت وهي تنزل فنجالها والدلة وتفتح طرحتها عن رقبتها
بتال ضحك وهو يطالعها
عباير قطبت جبينها وهي تطالعه وتفرد طرحتها اللي بين يديها بتلبسها وباستغراب:علامك؟!!،،لمست وجهها بيديها،،بس شين؟
بتال نزل فنجاله وهو يمد يمينه بيمينها ويمسكها وسحب الطرحة منها بيساره وينزلها جنبه وهو يذكر هجينية جده وزفر بوسط ابتسامته العريضة:صدقت ياجد مايكمل يومي الا بشوفة طخمتها!!
عباير مو فاهمته:بتال علامك!!
بتال سحبها من يدها له
عباير انحنت بجسمها تقرب منه وهي ترمش باستغراب
بتال احتضن وجهها بين يديه وهو يطالعها بابتسامة زفر ورفع يده يبعد شعرها اللي يلعب به الهوا عن جبهتها طبع بوسة عميقة على جبينها وبابتسامة:صباح الخير ياعباير صباح الخير ياعبرة بتال وشريانه
عباير ابتسمت:ياعل صباحاتي سمحة بمراعتي لك(بشوفتك)ياسمح المحيا،،وبنص عين،،مير علامك اليوم ياشوق عباير؟
بتال ضحك وهو يتركها وياخذ فنجالها وجر هجينيته بوسط ابتسامته:
تـو ماشافت غزير الزين عيني..
‏طارت الغدفه وشفت اللي تحتها..
‏ناطحتني والجدايل سبحتيني..
‏ياصباح الخير ياشوف طخمتها..
‏مير عذروب الحبيب شارتيني..
‏مع سواد عيونها طول رقبتها..
.
.

الـنـهـايـة...

~تمت بحمد الله وفضله..

~وأخيرا أتمنى تكون هالرواية نالت إعجابكم وارتقت لمستوى توقعاتكم
~❤❤
~~حساب الكاتبه بالانستقرام:rwuiit28~~