ياسمح المحيا جر الهجنية

جزء الواحد والعشرون

يوم جديد
...........****..........
أم جـلاجـل .
بعد صلاة الفجر
.
..بيت عوض..
أم طلق بأجمل ابتسامة مرتسمة على محياها من زود فرحتها جالسة عالارض وهي تزفر براحة بعد مارتبت أغراضها وقفت واتجهت تلبس عبايتها ثم رجعت وهي تطالع التجهيزات بابتسامتها ،،التجهيزات عبارة عن صحون سعف بوسطها اكياس وكل كيس به كحل وروج وقطعة قماش وللاطفال هواية وحلاو،، ،،دق الباب،،
نورة(أخت طلق)فتحت الباب
ام مزون دخلت وهي تزغرط وبابتسامتها:ياعساه مبروك وألفين مبروك ياام طلق ياعساك تفرحين بعياله وعيالهم من وراهم،،زغرطت،،
ام طلق سلمت عليها وهي تضحك بخفة:امين امين
ام مزون:ها ولمتوا؟غدينا نوزع الكَرْوة؟(تقليد متبع يوزعون فيه بصباحية الزواج)
ام طلق انحنت وشالت اكبر سبت(سلة خيش)مليان بقش صغيرة حنا وكحل وقطع قماش التفتت على ام مزون وابتسامة:كود ماتولمت اليوم متى اتولم!!غدينا
،،ام مزون شالت من صحون السعف وبنات ام طلق بعد وكانوا لابسين جلابيات تغطيها طرحة واسعة تشبه الخمار توصل لتحت الركبة وبراقع مطرزة بعملات ذهبية صغيرة ويدورون عالبيوت بيت بيت تتقدمهم ام طلق اللي تدق الباب توزع الكروة ووراها بناتها واللي يساعدونها من جاراتها وهم يغنون:
يـاأم طـلـق تـهـنـيـتـي..
نـلـتـي مـاتـمـنـيـتـي..
حـول الـكـعـبـة تـخـطـيـتـي..
ولـربــش لـبـيـتـي..
ومـرادش خـذيـتـي..
ويـافـرحـش بـولـيـدش..
تـنـقـيـتـي(اخترتي)لـه مـن حـور الأرض حـوريـة..
لـش بـنـيـة ولـه قـمـريـة..
ويـاعـسـاهـم مـبـروكـيـن..
للرحـمـن مـرضـيـن..
ام طلق وقفت قبال باب بيت بادي ودقت الباب
حلايا تنتظر عند الباب بحماس وهي تسمع أصوات غناهم من بعيد
بخوت تطالعها بابتسامة فتحت الباب ومدت يدها وهي تقرب تبي تسلم عليها:مبروك ياخالة مبروك والفال للبنات
ام طلق مدت يدها بابتسامة تصافحها وهي تبعد:الله يبارك فيش وآمين يسمع منش الكريم
بخوت تضايقت من حركتها بس ابتسمت عادي ومشتها
ام طلق مدت لحلايا من كروة الاطفال بابتسامة ثم مدت الكروة لبخوت وهي تطالعها:عقبال اخوش ونلحق نرعي كروته وحنا حيين
بخوت كشرت بوجهها
عباير سمعتها وهي جاية لجهتهم وبابتسامة:ان شاء الله بتغنمين وبتراعين وغدانه قبل ولدش!!
ام طلق تعكرت فرحتها وكشرت بوجهها وبحدة:اعوذ بالله منش!!تفاولين على ولدي؟!
عباير توسعت عيونها:والله محدن فاول على ولدش غيرش!!كل مقصدي اخوي بيعرس ان شاء الله وبنفرح به مثل ولدش!!
ام طلق عضت شفتها وهي تعدي الموضوع ماتبي مشاكل بيوم زواج ولدها
عباير:كود سريرتش(نيتها)قادتش يم الشينة عليم الله ماقادتني أنا بشر!!،،سحبت كروة بخوت وحلايا ورجعتها لصحن السعف اللي بيد ام طلق،،وهاذي كروة سعود بالأولة وعقب ابشري بعزش
ام طلق توسعت عيونها بصدمة
عباير:مير انه مبروك عليش البنية ومبروكة على ولدش،،رفعت يديها،،يالله عساهم مبروكين
ام طلق زفرت وهي تغلي:امين،،وبكره لها،،حياش الله انتي واختش الليلة،،مشت مبتعدة عن بيتهم بخطوات سريعة وهي ودها تذبح عباير،،
.
بذاك البيت السعيد اللي امتلى فرح وبهجة بهاليوم المنتظر وأحداثه اللي بتكون ذكرى سعيدة بيوم بذيك الغرفة باحد زوايها طلق ساجد وهو يبكي بحرقة على سجادته يدعي ان الله يصرفها عنه من كل قلبه مايبيها دعا واستمر يدعي وكل تركيزه ان الله يصرفها عنه حتى لو بموتها ونسى شي مهم ان الخيرة فيما اختاره الله حتى لو كان هالشي ضد رغبته
...........****..........
..بيت مسفر..
،،غرفة النوم،،
جواد دق الباب
ام جواد قبال تسريحتها تلبس اكسسواراتها:ادخل ياجواد
جواد دخل وبابتسامته:السلام عليكم
ام جواد التفتت على يمينها وهي تطالعه بابتسامة:حياك الله
جواد سلم على راسها:يمه وش عندك الليلة؟
ام جواد طالعته باستغراب:ماعندي شي ليش؟
جواد بابتسامة:الخطبة اللي تأجلت كم يوم بنتممها الليلة
.
..بيت عادل..
،،المجلس الصغير،،
يزيد جالس قباله وبابتسامة:الحمدالله عالسلامة
فيصل بابتسامة:الله يسلمك والفال عندك
يزيد بزعل:تدعي علي ألا قبحك الله!!
فيصل ضحك بخفة:وش فيك!!تأثرت به!!
يزيد بتقليد:هلم إلحق بالجمع ونتسابق معًا الى الجنان!!
فيصل انفجر يضحك:يلعن ابو شكلك ياشيخ قتلتني
يزيد بتكشيرة:يقطع شكله هو وضروسه ذَا الدب غثنا بلا
فيصل باهتمام وسط ابتسامته:وش صار على علي؟
يزيد رفع اكتافه:مدري!!بس اكيد الشباب على نفس الموال
فيصل بابتسامة:اها!!قفل قفل المواضيع نتفاهم على كل شي بعدين
غازي واقف برا بملامح غضب وهو يكبح غيظه وبيعرف نهايتها مع هالفيصل
...........****..........
أم جـلاجــل .
..بيت بتال وراشد..
بتال صحى وهو متاخر وأخر الصلاة جرى من غرفته متجه للحمام اللي قبال غرفته وبينهم الحوش وع كتفه منشفته وملابسه وقف وطالع للحظة بصدمة
راشد جالس بوسط الحوش مروق وقدامه فطور يفتح النفس وقهوة وشاهي
بتال قطب جبينه بغضب وكمل طريقه للحمام استحم ورجع لغرفته بخطوات سريعة بدون لايطالع راشد ثم صلى لَبْس ملابس دوامه ورجع لراشد وقف جنبه
راشد رفع راْسه يطالعه بابتسامة:صباح الخير والنوير على قولة جارك
بتال ابتسم له:صباح النور والسرور حبيب ألبي تؤبرني شو زريف تؤبرني هالكشِرِة
راشد ارتفعت حواجبه باستغراب:سلامات وش فيك؟!!
بتال كشّر بوجهه وانحنى له وشاله بنفس وضعيته وهو جالس وشد عليه
راشد بصرخة وحدة:يرحم والديك نزلني
بتال:وصلت ع بيروت ابن عمي!!
راشد:تكفى بتال تكفى طلبتك
بتال:ليش الخيانة من بدري وانت مو قدها
راشد:اخررر مرررة وربي اخررر مرة
بتال رماه وهو مو قادر يشيله اكثر وجلس مكانه
راشد طاح عالارض وتوجع وبحقد:هين بتال مل شي عند امي والله تاخذ حقي من عيونك
بتال ضحك وهو ياكل من الفطور اللي قدّامه:ماتقدر تسوي لي شي عذبتي ذي
راشد جلس بتكشيرة:اهب ياوجهك ماتنلام تتوظف مسعف
بتال وهو ياكل بسرعة بدون اهتمام:عقبال مااحطك عالنقالة وأشيلك
واشد توسعت عيونه:قلب أسيود(اسود)صدق جسّار!!
بتال:مالت عليكم يالاثنين مسوي طالع منها يالقلب الابيض!!
راشد بتكشيرة:اخلص علي وينها المدرسة بذا القرية
بتال رفع اكتافه بمعنى ماادري:من جاب هالأكل خسارة فات جسّار
راشد رفع كاسة الشاهي بيشرب منها:قلت لك جارك
بتال توسعت عيونه ووقف اكل والتفت له وبنبرة عالية:وليش تاخذ منه؟!!
راشد:بِسْم الله جارك يامسلم جارك!!
بتال وقف:اخر مرة الليلة بأقوله
راشد رافع راْسه وبتكشيرته:انطم بس انطم مو بكيفك عالاقل لحد مانضبط امورنا!!
بتال:راشد!!
راشد وقف:اسمع كلامي هالمرة لاتجادل امش اوصلك للمستوصف وثم باروح للمدرسة اشوف اموري
بتال:لا تعال بسيارتي انا يدك تعبانة وبعدين امرك
راشد:لا تعال انت
،،طالعوا بعض بعناد،،
راشد ميل فمه وهو عارف ان بتال بيعانده للاخير:كل واحد بسيارته احسن .
>>راشد بسيارته>>
راشد يسوق بيد وحدة وهو يتحلطم بينه وبين نفسه من بتال وطبايعه اللي ماتتغير عقد حواجبه وهو يشوف الرجال اللي على جنب الطريق هدا بالسيارة
حمدان بثيابه المقطعة يعرج بخطواته وهو يتألم من كل جسمه
راشد وقف عنده وهو ينزل قزاز الراكب رفع صوته:يالطيب محتاج مساعدة؟
حمدان خاف منه ورجع بخطواته لورا بوجه شاحب
راشد نزل من السيارة ووقف قباله وهو يقطب جبينه باستغراب من تصرفه:يالاخو والله مو بقاصد شر ولا أذية لك اركب معي اوديك المستشفى
حمدان هز راْسه بلا وبهمس من وجعه:لا تكفى لاتدنى مني،،برجفة صوته،،تكفى
راشد رجع بخطواته لورا مبتعد عنه وهو يشوف خوفه:ابشر ابشر بس أنت اهدا شوي
حمدان دخل يده بجيبه وخرج كيس صغير منه وهو يرفعه لفوق وبصراخ وسط غبنته ورجفته:كل اللي غادين له أعطي الأمانة لصاحبها علامكم علي؟!!وش عاملن بكم أنا؟!!والله ماني برايدن(ابي)شين منكم!!خلوني أغدي يمّهم وأعطيهم عطيتهم!!
راشد وهو متجه لسيارته:خلاص خلاص بأتركك والله بأتركك انت بس اهدأ،،ركب سيارته وحرك وهو يخرج جواله ويتصل ببتال،،
..عند بتال..
بتال جالسة باستراحة الدكاترة وهو عاقد حواجبه:صاحي انت؟!!
غازي:والله قلبي مو مرتاح لهالفيصل يابتال
بتال بعصبية:وش تنتظر!!جرّه من رقبته لأقرب خلا(بر أو صحراء)واجلده لحد مايعرف ان الله حق!!
غازي زفر:انت تبي تهججه عنا!!السالفة يبي لها ركادة!!
بتال:ايه ركادة لحد مايجيب العيد بنفسه
غازي:هيه انت عادل2 وش فيك!!خير!!
بتال:خل عني مهايطك وأأدبه ذكره وش ينتظره بيلف علينا بالدور ويآخذ اللي يستاهله
غازي بعصبية وزعل:الحق علي والله انا الغلطان اللي أكلمك وداري انك نفس طباع شايبنا!!
بتال بعصبيته:لايكون بتاخذه بالأحضان وتسلم عليه وتعطيه مصاصة وبتقوله ها ياعيوني وش الغلط اللي سويته اليوم!!
غازي:أنا ماقلت كذا ابد!!لكن فيصل ماهو بفيصل اللي نعرفه يابتال هذا محرض ويقول ماسويت شي!!
بتال توسعت عيونه:يقوله كذا؟عيني عينك!!
غازي:واللي سمعته يخوف والمصيبة يتكلم وكأن الموضوع شي عادي!!
بتال بغبنة:وتقول ماينفع هالاسلوب!!واحلالاه من مسكه ومحطّه(ضربه)ولسّعه تلسيع بالعقال
غازي تنهد:بتال فيصل متغير ومتغير بالحيل لازم اعرف من اللي وراه ومن اللي يخطط معه
بتال:وليه مستبعد مايكون هو المخطط!!
غازي سكت
بتال:اسمع ياغازي احشره بغرفة وحقق معه واجلده وألعن خيره لحد مايقولك الحقيقة
غازي:لا يابتال لا!!ماعاد ينفع هالاسلوب بالعكس بيتمادى اكثر وأكثر اذا مشيت على رايك
بتال بعصبية:وليش متصل فيني تشاورني وانت مابتسمع لي!!
غازي زفر:بتال
بتال قاطعه:انت اسمع الحين لاجيتكم اجازة ورب النعمة وهو ماتعدّل لاأمسح فيه البلاط رايح جاي وصوته واصل لأقصى(اخر)الحارة وهو يترجاني ولاأرحمه وأنا عند كلمتي،،قفل وهو يزفر بغبنة عقد حواجبه وهو يشوف موجود من راشد،،
............****..........
..بيت نشمي..
،،بمكان جلستهم المعتاد،،
ابو غازي يتقهوى مع عذبة وهو محتضن كفها بين كفوفه يسمح عليها ويطالعها بابتسامة:خاطري اطلع أغير جو وين تبين نتمشى؟
عذبة:أنا مالي نفس اروح لمكان رح انت ووسمية
ابو غازي:تعرفين المخفات اللي عندي مايتركون احد يتهنى بطلعته
عذبة ابتسمت:عادل قل الصدق؟وسمية للحين زعلانة؟
ابو غازي بتكشيرة:مالها شغل وسمية انا ابي أتمشى معك،،ابتسم،،ونمر حصيص نأخذها معنا
الجدة منيرة دخلت عندهم:ايه ايه تنفّهوا(يأخذن نفس،يغيرون جو)وكبّوني وراكم
ابو غازي:افا!!،،قام وسلم على وأسها ووقف جنبها،،انتي أولهن يالغالية
عذبة بابتسامة:الله يهنيكم بس والله مالي الخاطر اطلع من البيت
ابو غازي تكلم بلهجته بعد ماابتعد عنها عمر ومايتكلم بها الا نادرا وجدا:كبي عنش العلوم المايصة ياعذبة القلب واغدي معنا يم ذاك المطعم اللي بياخذ عقلش،،غمز لها،،وبطنش!!
عذبة ضحكت:عاد لانوا ابو غازي من يرده!!
.
..بيت عادل..
،،غرفة جسّار،،
جسّار بابتسامة وهو جالس على سريره:ايه..طبعا..اكيد اكيد،،ضحك،،لاوالله حلفت عليك!!..لكن المشكلة
رهايف دخلت بعصبية:جسّار
جسّار انفجع وهو يأخذ نفس ثم طالعها بنظرة حادة
رهايف سكتت وهي تتكتف قباله
جسّار:على خير على خير مع السلامة،،قفل وطالعها وبحدة،،ووجعوه يارهايف ووجعوه
رهايف بعصبية:ووش يدريني انك تكلم رجال!!
جسّار بنرفزة:ش تبين طيب؟
رهايف:مو أنا اللي ابيك ابوي يبيك
جسّار فز وقام من السرير وجرى:ليش ماقلتي!!،،خرج،،
رهايف تنهدت وهي تخرج من غرفته وتتجه لفيصل فتحت الباب وهي تطالعه:فصيل فيك حيل شوي؟
............****..........
العصر
............****..........
أم جـلاجــل .
..زواج طلق..
خيمة كبيرة مفتوحة من الجوانب منصوبة برا الديرة بمسافة ماتقل عن كيلوين وقبالها بمسافة جبل يعتبر اهم معالم الديرة..تزين جوانبها عقود لمبات مابين صفرا وبيضا..زوليات(فرش)كثيرة مفروشة حتى يجلسون عليها الضيوف..وبنهاية المجلس مشب كبير يجهزون عنده القهوة والشاهي..وخلف الخيمة وايت كبير مليان موية حتى يجهزون منه القهوة والشاهي ويغسلون الكاسات والفناجيل..هالمكان هو المكان المعتاد إقامة الزواجات فيه..وكل أهل الديرة مجتمعين..وتلف القهوة والتمر رمز الضيافة بينهم..
طلق جالس بصدر المجلس بدون بشت وهو يطالع الرايح والجاي وكأن الزواج مو له ولايعنيه ابد
ناصر يعاجل بخطواته وبيده بشت باللون البني بأطرافه المذهبة وقف جنبه وهو يحطه ع اكتاف طلق ويضغط على اكتافه ويطالعه بحدة وهو يعض شفته
طلق كشّر بوجهه وهو يعدل البشت عليه بس عشان خاطر ناصر
بتال وراشد اضطروا يحضرون بعد اصرار ناصر اللي ماتحرك من قدام بابهم لحد ماخرجوا جالسين بطرف المجلس ويتبادلون نظرات حادة مع غيث وهليّل
راشد دق بتال بركبته:هيه بتيل
بتال رد وهو يطالع غيث وهليّل بنظراته ومميل رقبته لراشد:نعم
راشد:ماجاكم واحد يعرج وكله جروح وكدمات
بتال التفت وطالعه باستغراب:ماجا غير شايب شيّب بروسنا وهو يضربنا بعكازه مو قادرين عليه
راشد بتكشيرة وهو يعتدل بجلسته:لا يارجال ولد شباب بعمرنا او اكبر بكم سنة ماهو بعيد عنّا
بتال:لا ماجا احد الا اذا بعد مارحت!!بس اصلا يقفل المستوصف يموتون لو كملوا دوامهم لست(6)!!
راشد ميل فمه باستغراب من الموضوع:اقولك لايكون مات ومحد درا عنه
بتال ابتسم:من جدك!!يموت احد بهالديرة ومايدرون!!عنّي ينتحرون اذا تأخر الخبر عنهم دقيقة!!تطمن بس الرجال اكيد انه طيب واذا زاد وضعه بيجي للمستوصف لاتشيل هم
ابو فارس وقف وهو يرحب:يامرحبا ارحبوا ارحبوا حياكم الله ياحيهم أسفرت وأنورت اول شي بنغدي بالعلم الصامل الله ميز يحييكم على زواج طلق وكروته(عادةً شماغ وثوب وعقال واذا أغنياء اصحاب الزواج يكون موجود بشت وخنجر بعد)
بتال وراشد طالعوا بعض باستغراب من معنى كروة!!
ابو فارس مد سبابته اليمنى وهو قافل قبضته يأشر باتجاه الجبل:مثل ماترعون دايم الشارة(هدف على الجبل تحت الهدف موجودة الكروة وواقف رجال عند الهدف)هذيك هي وكلن وحظه من يبي ينازل(يتحدى)عالكروة؟
،،وقفوا مجموعة من شباب الديرة،،
غيث وهليّل وقفوا وهم يطالعون بتال بابتسامة
بتال طق فيه عرق وهو يطالع ابتسامتهم ووقف بعناد لغيث وهليّل
ابو فارس اخذ عوّد من الحطب وخط به(رسم خط)على التراب بنهاية فراش المجلس واعتدل بوقفته وبابتسامة:صفوا والله يرزقكم جميع
(العادة يوقفون المتسابقين صف عند الخط اللي يرسمه ابو العريس او من ينوب عنه واول مايسمي يجرون للهدف والشخص اللي ينتظر عند الهدف اذا شاف اثنين متقاربين او متساوين بالمسافة وقريبين منه ياخذ اغلى شي بالكروة ويهرب فيه والمتسابقين يلحقونه وكلن ونصيبه)
راشد طالع بتال وهو يأشر له بنظراته بمعنى اجلس
بتال طنشه ومشى وراهم وهو يشوفهم يصفون وصف جنبهم
غيث طالع هليّل وغمز له
هليّل ابتسم وهو يغير مكانه ويوقف جنب بتال
ابو فارس:بِسْم الله
،،الكل جرى،،
بتال جرى معهم وكل اللي فهمه يتجه للهدف وبس وهو مو فاهم سالفة الكروة
،،صار باول المتسابقين هالثلاثة بتال وغيث وهليّل،،
بتال تقدم عنهم بكم خطوة وعلى وجهه ابتسامة
هليّل قرب من بتال ودفه وهو يتصنع الجري وانه مو قاصد
بتال تعثر وطاح وهو يتقلب عالارض وصقع بكل حجر قدّامه
راشد وقف مصدوم من اللي يشوفه ،،اعتلت أصوات اللي بالمجلس مابين اللي يسمي على بتال واللي يقول اذكروا الله نضلتوا(حسدتوا)الرجال واللي يقول اللي يستر عليه واللي يدعي له بالسلامة،،
غيث ابتسم وهو يشوفه يتقلب قدّامه وكمل طريقه وفاز بالكروة
بتال وقف جسمه من التقلب ووجهه عالارض
هليّل وقف عند بتال وهو يطالعه وينحني له يعدله:سلامات سلامات!!
بتال اعتدل معه وجلس وهو يطالعه
هليّل بابتسامة سخرية:ماتشوف شر ماتشوف شر
بتال تفل(بصق)بوجه هليّل وهو يرسم ابتسامة عريضة ع وجهه رغم فمه الدامي
هليّل امتلى وجهه دم من بتال وهو يطالعه مصدوم
بتال:قليل فيك ياقليل الخاتمة
.
..عند غنم مفلح..
ثريا شايلة حزمة من البرسيم من زريبة العلف متجهة فيه لزريبة الغنم التفتت يسارها تطالعه وهي مترددة
مفلح جالس تحت الشجرة شاب ناره بمكانه المعتاد وعليها دلته اللي يتقهوى منها وهو مروق
هيفاء جالسة بعيد عنه وهي تسرق نظرات له وثم ترجع تناظر الصحراء الخالية
ثريا اخذت نفس ومشت له بخطوات سريعة وقفت قباله وبعصبية:اهب ياوجهك تكب(تترك)الضعيفة تقعد بالشمس ياللي ماتخاف الله!!
مفلح رفع عينه للسماء وهو يطالعها يمين ويسار:وينها الشمس؟!!حنا على مغيب!!(يقصد المغرب)
ثريا تنحنحت وبنفس عصبيتها:مير لو انك على مغيب للحين مابردت الارض ثم تزارط(يشرب وبالتحديد يبلع)بهالقهوة والضعيفة تراعيك ولامديت يمها شي!!ياويلك من ربك يالقلب الاسود اهب ياوجهك!!
مفلح نزل فنجاله وبشك:اخلصي يامرة وش وراك؟!!
ثريا توسعت عيونها:ماوراي شين ابد!!
مفلح بنص عين:اراعيك من اليوم وانتي توايقين(تطالعه مترددة)يمي مدري علامك؟
ثريا:والله ودي اوجس لك شين بخاطري مير خابرتك يازين لسانك
مفلح وهو يرفع فنجاله له يكمل قهوته:افا ياثريا افا!!اوجسيه ولش ماطلبتي
ثريا ابتسمت ولو ان داخلها شك:تكفى يامفلح تكفى طلبتك ماتردني
مفلح بابتسامة:دامش توجسينه هاللون اطلبي وجاش تم
ثريا ابتسمت:تكفى يامفلح خلني اغدي يم جواز(زواج)طلق
هيفاء شقت الابتسامة وجهها والتفتت تطالعه تنتظر جوابه
ثريا:من مبطي ماغدينا يم جيزة بالديرة ولاأرعينا أحد ودي اشوف أهل الديرة واخذ هيفاء معي كود انها تبرا
مفلح نزل فنجاله وبهدوء:عاد لو إنش طالبة سوق المحافظة غديت له حافي وهو بعيد عشانش لكن هالطلب لا ياثريا لا
هيفاء كشرت بوجهها
ثريا:ليش لا؟اقولك هيفاء تراعي الناس وتبرأ
مفلح بحدة وهو يرفع عينه لها:طسّي لحالش كان ودش تراعينهم وكبّي هيفاء عنش ولا راعيتيهم وخلصتي لاتعودين ابد!!
ثريا:علامك انت علامك!!وش غادين بك الناس نست وانت للحين
مفلح بعصبية:خلي الخرط(الكذب)عنش انتي براسش للحين مانسيتي ياثريا ووالله ثم والله لو انه يعطوني وزني ذهب مانسيت اللي غدا بي من هالديرة القشرة وربي بيراعيني أنا،،أشر على هيفاء،،وهالضعيفة سواته بهم لو اني على فراش الموت
ثريا:خلاص يامفلح خلاص تعبنا من هالعيشة تعبنا هالبنية حتى لو بها طب قطعته عنها وانت ملقّيها هالضلعان!!(فوق الجبال بمعنى عازلهم عن الناس)
مفلح:والله لو اني ماني بمشتهي الكيف وطاخ(ضرب)براسي اني لاأتهبّد بش(يضربها)
ثريا زفرت والتفتت تطالع هيفا:راعها(شوفها)ودها تغدي يمهم
مفلح التفت بسرعة لهيفاء اللي ماعمرها طلبت شي ولاخاطرها بشي من سنين اعتدل بجلسته ولف كله عليها:هيفاء ودش تغدين وانا عمش؟
هيفاء طالعته وهي تضم نفسها خايفة منه ساكتة
ثريا:روعّتها يمال العافية اللي تملاك!!
مفلح رجع يلتفت لدلته وهو يزفر ويصب له فنجال:خلي الكذب عنش هيفاء ماتغدي لأحدن أبد!!هاذي كلها علومش المايصة ياثريا!!
ثريا بعصبية:مالمايص غيرك انت وعـ،،سكتت وهي تطالعها بصدمة،،
مفلح رفع راْسه يطالعها مستغرب منها
هيفاء قامت من مكانها وجلست جنب مفلح ومدت يديها ومسكت يده مفلح اليمين اللي بها الفنجال وهي مغمضة عيونها ترجف
مفلح التفت لها طالعها مصدوم وهو يحس برجفتها الواضحة
هيفاء ضغطت على يده
مفلح:ودش تغدين ياهيفا؟!
هيفاء هزت راسها بايه وسط محاجر عيونها اللي هلت دموع
مفلح مد يده اليسار وحطها فوق يدها وهو يبتسم بفرحة:والله لعيونش لأغدي يمهم لو انهم يواجهوني بالطعون ياعين عمش
ثريا بابتسامة عريضة:اغدي بالبهم(صغار الغنم)يم الزريبة ثم نعود يم بيتنا نتولم(نتجهز)،،أسرعت بخطواتها متجهة للزريبة،،
هيفاء التفتت تطالع ثريا بابتسامة مثلها بالضبط
مفلح ابتسم وهو يشوف وناسة ثريا والتفت لهيفاء اللي لازالت ماسكة يده وترجف لكن هالمرة مبتسمة قرب منها وهو يطبع بوسة عطوفة على جبينها
هيفاء توسعت عيونها بصدمة
مفلح برجى وحزن وخيبة:مالان قلبش على عمش بعد هالسنين وتسامحينه ياهيفاء؟!
هيفاء تركته وقامت وهي تجري تلحق ثريا وصلت لها وحاوطتها من ورا وهي مرعوبة وهي تشاهق وسط دموعها
ثريا انفجعت ولفت عليها وهي تضمها لها:بِسْم الله عليش بِسْم الله ياروح ثريا بِسْم الله!!وش غدا بش؟علامش؟؟؟!!!
مفلح تمردت من عينه دمعة ومسحها بطرف سبابته اليسرى وهو يشوفهم ونزل عيونه لفنجاله وهو يكتم عبرته عنهم
.
..بيت بتال..
بتال متمدد بالحوش وهو حاط منشفة مبلولة بالموية الباردة ع كل وجهه:ياعسى رجلك بالكسر يالمـ** الله ينتقم منك اااه اااه
راشد جالس وبينهم مسافة بسيطة وهو يغلي من بتال وحركاته وقف وانحنى وهو يسحب المنشفة من على وجهه ويضربه فيها بيده
بتال جلس وهو يمسح على يده على مكان الضربة وبعصبية:خير!!!
راشد بعصبية:من وين يجيني الهير وانت معي؟!!هاه؟!!
بتال تنهد:وش فيك؟وش اللي مزعلك؟!!
راشد:الحمدلله انك كملت كذبتك بالكحة!!ولا كان صار شي ثااااني
بتال ببرود:طيب وبعدين؟!!
راشد بغبنة:وبعدين!!!البارح متهاوشين معهم واليوم صارت هالمشكلة وربي ان يوقفون معهم وحنا اثنين يدفنونا ومحد درا عنا!!
بتال احتدت ملامحه:يخسون!!واللي يسوي لي شي ارد الصاع صاعين!!
راشد بينجن منه:بتال!!
بتال وقف:اقول امش قدامي نروح للمحافظة نخلص امورنا الناقصة قبل تقفل المحلات،،مشى،،
راشد بحدة:للحين ماخلصت كلامي!!
بتال وهو يمشي ولا التفت له:بتروح معي ولا اتركك؟
.
.
<اللهم صل وسلم على نبينا محمد>
.....