ياسمح المحيا جر الهجنية

الجزء السادس والسبعين

،،الـجـزء الـسـادس والـسـبـعـيـن،،

استغفر الله العظيم واتوب اليه،،لاحول ولاقوة الا بالله
.
.
.
..السيارة..
ابو غازي يسوق السيارة بسرعة جنونية رغم اللوحة الصغيرة اللي متكفل بها مناور قريب ومثبتة على طرف الطريق ترحب بالزايرين بدخولهم لام جلاجل يسوق وسط تكشيرة معتلية وجهه ماهدا باله كل تفكيره يوصل قبل يوصلون
.
..المركز..
الضابط يطالعه باستغراب منه
غيث بابتسامة:وبس طال عمرك!!مير مااوجس غـيـر حسيبهم الله الظلومين
الضابط خرج الخاتم:تعرفه
غيث انصدم للحظة ورسم ابتسامته من جديد
الضابط ميل فمه بابتسامة وهو لاحظه ثم طالعه وهو يخفي الابتسامة:تعرفه؟
غيث؛اول مرة ارعيه!!
الضابط:طيب ذاك اليوم وين كنت؟
غيث:بالزواج يعني ويني!!
الضابط بحدة:جاوب عالسؤال وبس!!
غيث زفر:كنت بالزواج وأنشد اهل الديرة كل ابوهم يوم هالاثنين جحدوني!!
.
..بيت جسّار..
حلايا جالسة عند امها بطفش
بخوت تجهز الغدا وهي تدري انه على وصول:حلايا اغدي يم المخزن وهاتي إسفر(سفرة)
حلاي متكتفة:مااريد
بخوت التفتت لها بحدة:اغدي!!
حلايا وقفت بتكشيرة وهي تتجه للمخزن وفتحته وطالعت السفرة اللي بعيدة عليها ومن مكانها بصوت عالي:مااحرز لها بعيدة!!
بخوت زفرت وهي تسرع بخطواتها دخلت المخزن وهي تاخذ السفرة وخرجت وهي تطالعها وتأشر بطرف فكها لقدام
حلايا التفتت تطالع وراها
بخوت:اقعدي هنياك لامني أولم الغدا واغدي يمش
حلايا:مااريد اقعد اريد اغدي يم بعاير يم الحلال
بخوت بنرفزة:وش اوجست يمش اليوم!!علامش علي!!بكرة بكرة ان شاء الله،،مشت للمطبخ بسرعة،،
حلايا تطالعها وهي تدخل المطبخ بتكشيرة مشت لجلستهم وابتسمت وهي تطالع باب البيت وتسللت بخطواتها وهي تفتح الباب وتخرج
.
..بالوايت..
عباير مسرعة وهي نبضات قلبها مليون من الخوف طالعت بالمراية لورا قطبت جبينها وهي ماتشوف احد من الغبار اللي يتطاير وراها من سرعة الوايت طالعت لقدام وهي تنتظر احد يطلع ومتأكدة انه فيه احد بيطلع لان هالطريقين يتقاطعون ولازم تلتقيهم هدت بالسيارة وهدا الغبار زفرت براحة وهي ماتشوف احد وراها براحة قطبت جبينها بشك وهي متاكدة مابيتركونها وقفت بالسيارة وهي تنتظره عالاقل يخاصمها عالسرعة نزلت بتوتر ورفعت راسها تطالع لفوق الوايت اتسعت عيونها بصدمة وهي ماتشوفه:يمه!!وكاد دعسته ومات!!،،رجف قلبها من الخوف ركبت السيارة بسرعة وهي تطرد هالفكرة عن بالها ورجعت تدور له على طريقها وهي متاكدة انه طاح على طريقها بعيد عنهم،،.
.
..بيت جسّار..
حلايا قطبت جبينها وهي تطالع سيارة جسار مشت للسيارة وهي تنط تبي تشوفه اذا داخلها او لا دارت السيارة وهي تناديه:زسار زساااار،،وقفت قدام السيارة وهي تطالعه بمسافة كم متر قبالها ابتسمت وجرت له بطت بخطواتها وهي تطالعه وقفت وهي تحس بخوف
جسّار ضاغط على جرحه بيمينه ويساره ترجف من الم جرحها فوق الم الطعنة يجر خطواته الثقيلة ببطئ وهو يتصبب عرق زفر بصوت وسط آلامه وهو يحس البيت اللي قباله بعيد وجدا طالعها وابتسم وهمس:حلايا،،خانته رجوله ولاعاد قدر يمشي اكثر وارتمى عالارض بقلة حيل،،
حلايا غرقت عيونها دموع وهي تعطيه ظهرها وتجري للبيت وبصراخ متواصل:مامااااا ماماااا
بخوت قطبت جبينها باستغراب وهي تسمع صوت خفيف جدا وبعيد ويشابه لصوت حلايا غسلت يديها وهي تخرج من المطبخ:حلايا،،خافت وهي تسمع صوت صراخ حلايا اللي يقرب وجرت لمكان جلستهم وبخوفها وعيونها تدور بالمكان،،حلايا
حلايا دخلت من الباب وبشلال دموع انهمر على خدودها من محاجرها وبوسط شهقاتها وهي تجري لها:زسار زسار
بخوت انحنت شبه جالسة وهي تمسح دموعها:علامش!!شوي شوي وش غدا بش!!
حلايا مسكت يدها وهي تسحبها:زساااار دم ياماما كله دم
بخوت انرعبت وهي تسترجع كلام غيثة سحبت عبايتها وطرحتها ولبست العباية ولفت طرحتها اَي كلام وهي تجري لجهة الباب
حلايا خرجت وهي تجري
بخوت خرجت وراها تجري وهي تتنافض برعب اكيد حلايا غلطانة اكيد حركاته المعتادة وقفت وهي تحس بنفسها المتسارع انقطع من فجعتها باللي تشوفه
جسّار مرتمي عالارض على بطنه
حلايا جلست عنده وهي تحركه وبدموعها:زساااار زسار قم
بخوت تقدمت وهي تحس بثقل برجولها فظيع جلست وهي تحس بقلبها يخرج من نبضاته السريعة بلعت ريقها حتى تنزل غصتها العالقة وتسيطر على أعصابها مافي بالها بهاللحظة الا تهديد غيثة وهذا اوله مدت يديها اللي ترجف بوضوح وهي تعدله على ظهره وبوسط صوتها المخنوق همست:جسّار
جسّار انقلب معها بهدوء فظيع مختلف عن عادته دم يغطي صدره وأثر دمه عالارض
بخوت بكت:جسّار لاإتضحك علي
حلايا تطالع امها بدموع انفجرت تبكي بصوت عالي:ماما زسار مات!!
بخوت وهي تهز راسها بلا وسط دموعها وتمرر يديها على جيوب بنطلونه بسرعة وبحدة:لاااا جسّار مافيه شي انكعمي
حلايا جلست عند جسّار وهي تبكي بصوت اربك بخوت اكثر
بخوت زادت دموعها وهي ماحصلت اللي تدور له بكت وصرخت:وين المفتاح!!،،طاحت عيّنها على لابكوته اللي قدامهم بمسافة جرت للابكوت وهي تنحني تاخذ المفتاح ورجعت تجري لسيارة تعثرت وطاحت ووقفت وكملت وسط دموعها وقفت عند السيارة وهي تدخل المفتاح ومن ربكتها طاح من يدها نزلت واخذت المفتاح وانهارت تبكي وهي اقتنعت انه مات،،
.
..عند الحلال..
بتال وقف وتحرك بعدم اتزان وهو يحس الدنيا تدور فيه ثبت وقفته وهو يطالع يساره وهو يثبتها ع جسمه بيمينه يرجف من الالم وتأكد انها مكسورة براسه اللي ينزف وفمه وأنفه بعد من قوة الطيحة ووضعيتها الغلط
فارس بتكشيرة وهو يطالعه:لاحول من هالصريمة!!صريمتن فـوق صريمة!!وش عملت بك هالمبلوسة!!لفت باجلك قبل نلفيك به!!
بتال وهو يبلع ريقه من الوجع اخذ نفس وهو يغمض عيونه ثم فتحها وهو يطالعه وهو ياخذ انفاس بطيئة من الالم:خير وش تبي؟
فارس بابتسامة:ابدن مير اريدك تغدي معنا يم القرية
بتال قطب جبينه:وش تبون!!
سويلم زفر وهو ينزل من السيارة:اغد يمّنا وانت منكعم!!وشو له تنشد!!اتخبر كل شين لاغدينا!!
بتال ميل فمه بابتسامة:غصب!!
سويلم بحدة وكره:تحمّد ربك غدا بك هاللون ولا تليناك غصب مثل ماتوجس!!
بتال بتحدي:واذا قلت لا
سويلم وهو يمرر نظره من فوق لتحت عليه وسط ابتسامة سخرية:واشيب حالي نفسن عزيزة وحالن ردي!!
بتال قشعر جسمه وهو يطالع السيارة اللي مرت من جنبه بسرعة جنونية وصدمت سيارة فارس اللي صدمت بالسيارة اللي جنبها
.
..بيت جسّار..
ابو غازي اللي وقف بالسيارة عقد حواجبه وهو يطالعها تجري ونزل لها اول ماشافها توقف عند السيارة اتجه لها وهو متاكد فيه شي صاير وقف عندها:بخوت وش فيك يابنت!!
بخوت رفعت راسها لها وبانهيارها:جسّار مات ياعم مات
ابو غازي رجف قلبه من قوة كلمتها واحتدت ملامحه:كبي هالوجس الشين وينه به؟
بخوت اشرت بيدها وسط دموعها وهي تبكي
ابو غازي جرى له:اغدي بالسيارة يمي،،جلس عنده وهو يطالعه رفع لحضنه وهو يخفي خوفه وارتباكه وبغبنة،،ياعلش بالصرايم التي تنزل بش ياام جـلاجـل ياعلش
.
..عند الحلال..
عباير داخل السيارة رفعت راسها من عالدريكسون وهي تحس بآلام بكل جسمها لكن مو هذا اللي يهمها بهاللحظة مدت يدها وهي تفتح الباب اللي ماانفتح معها وهو من الاساس يعلق ومع اللي سوته بجنونها مو راضي ينفتح
سويلم يطالع اللي صار بصدمة
فارس جرى للسيارة الثانية بصدمة من اللي صار بيتطمن على اخوياه وبصراخ:ابوك يافارس!!
بتال تقدم بخطواته اللي بالقوة يثبتها وعينه عالوايت وقف وهو يطالع وجهيته(مقدمة السيارة)اللي انعدمت قطب جبينها وهو يلتفت للصوت اللي يسمعه داخل السيارة
عباير رفعت رجولها وهي تثبتها عالباب ودفته بكل قوتها وهي تفتحه بيدها بنفس الوقت وانفتح معها نزلت وهي مو حاسة بألام جسمها وطالعته وبغبنة:هماني اوجست يمك إدرك!!!
بتال احتدت ملامحه وبصراخ:مهبولة انتي!!!
عباير بغبنة:ايه مهبولة لاغدوا عيال عبري مهبولة!!
سويلم انفجر يضحك وهو يطالعهم
بتال التفتت يطالع سويلم بتكشيرته
عباير خرجت المسدس الربع اللي أعطاها جدها وصوبت على سويلم وسط رجفة يدها اللي اتضحت باهتزاز المسدس:خذ ربعك وطس!!
سويلم قبالها وبابتسامة:بنطس بنطس مير ناخذ غريضنا معنا بالاول
فارس وقف عند سويلم وهو يصوب ببندقيته عليها وبحدة:ياعلش الصريمة!!ماوراكن غير الصرايم يابنات متعب!!
بتال وقف بينه وبينها وهو يطالعه بحدة:خل علوم الرجال بين الرجال!!
سويلم عض طرف شفته بقهر من كلامه
فارس صرخ:انكعم يالخسيس!!
بتال ابتسم:الخسّة واضحة عند مين!!
فارس اتسعت عيونه وهو يعشق البندقية
سويلم مد يده وهو يحطها على بندقية فارس وينزلها
فارس التفت يطالعها وبقهر:ياعم!!!
سويلم وهو يطالعه:مالنا بالحريم بدّ يافارس!!اللي لافين يمه رجل
بتال زفر بضحكة وهو يسمع تاكيد كلامه
فارس كشر بوجهه وبغبنته:عاد على هواك،،مشى باتجاه سيارته وركب،،
سويلم:حنا لفينا نريدك تغدي يمنا
بتال:وتم بس اترك البنت
عباير اتسعت عيونها وهي تسمعه:انخبلت تغدي يمهم!!
سويلم زفر:تم،،مشى وتركهم،،
بتال بدون لايلتفت لها:دبري عمرك ولااحد يدري
عباير بقهر منه:علامك!!احدن يغدي يم صريمة عيال عبري برجيلاته!!
بتال:ماعليك مني!!دبري عمرك وانا بأدبر عمري ياعباير،،مشى وركب ببدي ددسن سويلم وفارس،،
عباير مدت السلاح وهي مرعوبة
بتال انتبه لها وبحدة:قلت لك لا ياعباير لا!!
فارس كشر بوجهه وهو يمد يده للباب بيفتحه
سويلم بحدة:مالنا بها يافارس أقضب محلك!!
فارس التفت له وهو يغلي
عباير وجهت السلاح لفارس وهي تطنش بتال
فارس اتسعت عيونه وهو يطالعها وفتح بابه بينزل وقف وهو يسمعه
بتال صرخ:ماني برجال!!ماني مالي عينك!!
عباير نزلت السلاح وهي تبلغ غصتها:مير اللي يغدي يمهم
بتال قاطعها بحدته:عليك بعمرك روحي المستشفى سمعتي!!،،جلس وهو ماعاد قادر يتحمل الوقفة اكثر،،
فارس حرك وحركت وراه الدداسن
بتال تمدد على ظهره وهو يحس الدنيا تظلم شوي شوي وغمض عيونه باستسلام
عباير جلست عالارض وانفجرت تبكي بقهر
.
الجد بادي يمشي متجه للغنم عقد حواجبه وهو يشوف السيارة المصدومة تمر من جنبه بسرعة ووراها سيارتين بنفس السرعة زفر وهو يكمل طريقه اتسعت عيونه وهو يطري بباله عباير وبتال جرى بجريه المناسب لسنه وهو يردد:عوذا ياابليس عوذا!!فالك يابادي ماقبلناه ماقبلناه!!
.
..بيت بادي..
،،العشّة الخارجية،،
،،الجد نشمي ونشمي وفاهد بضيافة سعود،،
سعود جالس قبالهم بتكشيرة
الجد نشمي:ياولد علامه جدك ابطى؟
سعود:عند الحلال وهذا هو الحلال
فاهد زفر وهو ضام يديه ببعض ينتظر بادي على احر من الجمر
سعود طالع الجد نشمي:مير ياجد ماظنتي جدي بينكعم عنك هالنوبة
الجد نشمي كشر بوجهه وهو فاهم مقصده:مير حتى لو انه ماانكعم هالنوبة ياسعود بينكعم النوبة اللي بعدها!!
سعود هز راسه بابتسامة وهو يرفع فنجانه يتقهوى:ايه ايه صحيح
نشمي اتسعت عيونه:سعود!!
سعود نزل فنجاله:سم ياخال
نشمي اخذ نفس:خلك وجه خير ياتوجس زين يااما انكعم!!
سعود:مير اني مااوجست شين ابدن!!
الجد نشمي وقف
سعود رفع راْسه
الجد نشمي بحدة:ولد ياسعود اغد قدامنا يم الحلال
.
.........****..........
..بيت الجد نشمي..
الجدة منيرة تزغرط:مبروك يارب مبروك ياراشد مبروك
راشد:الله يبارك فيك الله يبارك ياجدة وعساك تزوجينه
الجدة منيرة ضحكت:يالله حسن الخاتمة
راشد:الله يطول بعمرك ياجدة
الجدة منيرة:الله يسخر لك ياوليدي وين عيال عادل عنك
راشد غمز لها:وش فيك ياجدة!!تراني راشد عيال عادل مايجون بثقلي!!
عذبة ضربته على رجله بشويش:خل عنك بس!!والله انك مثلهم طالعت هيفاء بابتسامة،،الله يتمم لك على خير يابنتي ويقر عيونكم به
راشد مسك يدها وباسها:اللهم امين ويجزاك خير ياروح راشد
عذبة:ها وش البشارة؟
راشد التفت لهيفاء:عندها
هيفاء بابتسامة:تخيري ياعمة مابدا لش وسمي كودها بنية ولا وليد انتي تخيري وعلى هواش
عذبة اتسعت عيونها وهي تسحب يدها من راشد:لا!!لا والف لا!!
راشد:ليش!!
عذبة:هي اللي تتعب وانا اللي اسميه!!لا والله لا!!
الجدة منيرة:اجل انا اسميه عنش
راشد:اَي والله اذا ماسميتي يمه تسميه جدتي
عذبة:ياويلك من الله والضعيفة اللي جنبك!!
هيفاء:انا اللي تخيرت البشارة ياعمة انتي تخيري ماعليش من احدن ابدن هذا أولهم وحقن علينا انتي تخيرين اسمه
عذبة زفرت:يابنتي ياهيفاء
راشد:يمه سمعتيها عليك وخلصنا
.
..صالة المطار..
جواد متمدد عالكراسي وهو مغمض عيونه ماارتاح بالطيارة من ازعاج الصغار وفوقها رهايف يحاول ياخذ غفوة على مايوضح موعد رحلتهم
رهايف جالسة عند راسه وهي تطق برجلها عالارض
جواد زفر وهو مغمض للحين:شوية هدوء ممكن؟
رهايف اتسعت عيونها:الحين على ازعاج المطار ازعجتك انا!!!
جواد اخذ نفس وهو يزفره وباستسلام مافيه يناقش:حقك علي
رهايف تكتفت وهي تطالع لقدام وتتنهد بصوت:اااه
جواد غطى عيونه بيده وهو يكتم غيظه
رهايف تنهدت من جديد:ااااه
جواد زفر وهو يجلس:خير وش فيه؟
رهايف ابتسمت:وش رايك نلعب
جواد بتكشيرة:وش تلعبين!!
رهايف بحماس:اَي شي بألعاب الأطفال مثلا
جواد:رهايف من جدك!!
رهايف:اَي والله
جواد:والله ان يعطونك غرامة ونقعد بها اقول نامي بس خذي لك غفوة
رهايف:صدق يليق لك هادم الملذات
جواد رجع يتمدد وهو يطنشها وحط راسه على رجولها وهو يغمض عيونه:مشكورة يازوجة الهادم
رهايف:جواد
جواد بنرفزة:خير!!
رهايف:قم العب معي غميمة
جواد:وش يضرك تنامين وتتركيني انام ها؟
رهايف:مااقدر انام بمكان كذا!!من جدك انت!!
جواد تنهد وهو يطالعها:يعني بتزعجيني طول الرحلة
رهايف بابتسامة:قم نلعب احسن لك ولي
.
.........****..........
ام جـلاجـل
.
..عند الحلال..
الجد بادي انفجع وهو يطالع شكل الوايت وجرى لها
عباير جالسة بالوايت وهي تشغله مو راضي يشتغل معها ابد
الجد بادي بوجهه المخطوف وقف عندها:علامش يابنت!!وش اللي غدا!!
عباير انفجرت تبكي اول ماطالعته
الجد بادي التفت وهو يدور له:وينه بتال؟
عباير بدموعها:اخذوه ياجد اخذوه وانت خابرن اللي يغدي يمهم تنزل به صريمة
الجد بادي بحدة:من اوجسي العلم؟
عباير صرخت:عبري عبري ياجد عيال عبري
الجد بادي انخطف وجهه وهو يطالعها:من هو؟ضبعان؟
عباير:لا فارس وعمه
الجد بادي تنهد براحة طالعها:عسى مابش علة؟،، مد يده ليدها يمسكها،،
عباير صرخت من الالم
الجد بادي تركها بسرعة:علامش!!
سعود وقف بسيارته ونزل وهو يجري لهم بصدمة وهو يطالع الوضع:علامكم!!
الجد بادي وهو يرجع يده من ورا أكتافها ينزلها:ادنى مني عاون خيتك نعدي بها يم المستشفى
.
..قرية عيال عبري..
..بيت ضبعان..
ضبعان جالس بمجلس بيته وهو لاف الشماغ شبه متلثم يجهز دلته الصغيرة وللحين بحالة حزن على مرزوق
فارس دخل وهو يجلس قدامه
ضبعان زفر وهو يصفى القهوة بالدلة ماطالعه:وش وراك هالنوبة؟
فارس:ياجد غدا يمّنا الظهرية هليل
ضبعان رفع عينه له وسط تكشيرة:عوذا منه!!هماني اوجس يمك لاتخاويه!!
فارس:مير ياجد هاللي ماتريده اوجس يمّنا علمن شب بصدورنا نارن تلظى
ضبعان بحدة:وش عملت من وراي يافارس!!
سويلم دخل بابتسامة:كل مايسر خويطرك ياعم مايسره
ضبعان بحدة:سويلم!!
سويلم:هالنوبة وكاد ياعم وكاد ماهو بطواري
.
.........****..........
المغرب
.........****..........
.
..المستشفى..
ابو غازي متكي بظهره عالجدار متكتف وهو واقف قبال غرفة العمليات بوجه كاسيه السواد من همه بعد كلام الدكتور اللي مايطمن ابد تأخروا فيه تأخروا بفترة والله يستر من نتيجة هالتاخير زفر بصوت وهو يكبح كل افكار شينة ممكن توصله ويحاول يتفاءل
بخوت جالسة عالكرسي جنب عمها وهي ضامة يديها وتنزل دموعها عالصامت وهي تلوم نفسها على كل اللي صار له
حلايا جالسة جنب امها طالعتها بهدوء ورفعت راسها وهي تطالع ابو غازي نزلت من كرسيها وهي توقف قباله
ابو غازي طالعها وهو ياخذ نفس
حلايا طالعته:عم
بخوت مدت يدها وهي تسحبها وبرجفة صوتها:ادني يمي
حلايا سحبت يدها وهي تطالعه
ابو غازي زفر وهو يفك تكتيفته:نعم
حلايا فتحت يديها وهي تحاوط رجوله وبدموعها:عمي زسار يطيب ماتذل ياعم لاتذل(لاتخاف)
بخوت زادت دموعها
ابو غازي غرقت عيونه دموع وهو ينحني شبه راكع يفك يديها عنه ثم انحنى شبه جالس قباله وهو يضمها لحضنه وبغصة:ادعي وانا عمش ادعي يوجسون دعوتش مستجابة
حلايا ضمته وبكت:زسار مابه شي ياعم لاتذل
.
..قرية عيال عبري..
بتال متمدد عالارض ع جنبه اليمين صحى وهو للحين مغمض عيونه تحرك وفز جالس بوجهه المخطوف من الم يده تلفت حوله وهو يطالع المكان غرفة بيت عادية طالع الفراش تحته قطب جبينه باستغراب وهو توقع استقبال غير هالشكل وقف وهو بيموت من صداعه اللي يحسه اتجه للباب وهو فارد يساره مايحركها فتح الباب وارتفعت حواجبه وهو يطالع اللي واقفين عالباب باسلحة:سلامات ياابوي!!
(1و2التفتوا له يطالعونه)
1بحدة:عود يم فراشك
بتال بتحدي:واذا قلت لا بتذبحني!!
1و2رفعوا الأسلحة بوجهه جواب على سؤاله
بتال ابتسم:يالله اذبحوني
ضبعان وقف وبحدة:فالح
1التفت له:سم ياشيخ
ضبعان بحدة:استح على وجهك!!بهاللون تكرم ضيفانك!!
1:مير هذا ماهو بضيفن ياشيخ
ضبعان بحدة:انكعم!!سويلم ماهو بنافعك مرده يوحي لي كب هالنعرة(عناد)عنك،،طالع بتال،،اتبعني ياولد،،لف بيمشي،،
2 بغبنة:ياشيخ!!مايغدي برا ابدن
ضبعان التفت له:علمني ياناير كود اني رايدن اصيبك ذالحين احدن يمنعني؟
2كشر
ضبعان وهو يمرر نظره عليهم:سويلم يحرز يمنعني عنكم ياعيال عبري!!
1و2سكتوا
ضبعان طالع بتال وبحدة:علامك واقف وش تحتري!!اتبعني!!
بتال مر من بينهم وهو مبتسم
.
..المستشفى..
،،الطوارئ،،
عباير جالسة عالسرير طرحتها على أكتافها بيسارها المجبسة من كفها لتحت الكوع بكم سانتي وجرح فوق حاجبها الأيسر مغطى بضمادة عريضة بعد ماخيطوا جرحها بكم غرزة وكدمة باللون البنفسجي على طرف فمها من جهة اليسار وبيدها مغذي ومسكن بنفس الوقت
الجد بادي جلس جنبها:عباير
عباير طالعته وهي كلها تعب:سم ياجد
الجد بادي:كود غدا يمش احدن ونشدش اوجسي صدمت إشجرة ماارعيتها
عباير اتسعت عيونها:مير ياجد
الجد بادي قاطعها وهو يمسك يمينها ويضغط عليها:عباير يابنيتي اوحيني
عباير بحدة:لا والله لااوجس العلم الصحيح!!هذولا عيال عبري مايمنعهم احدن ابد يغدون يم القصاص وهم يتضحكون!!مايردهم شين ابدن
الجد بادي:كود غدت بها الشرطة وانا جدش كبرت بالحيل وثمن مايمنعهم شين صحيح
عباير سحبت يدها منه:وبتال؟
الجد بادي زفر:عباير
عباير صدر بوجهه عنه:كودك بايعه انا ماابيعه يسد ماغدا بنا عقب بخوت
الجد بادي:هالنوبة مايغدي بنا شي ياعباير ماهو بغادين شي
عباير ماردت ولاطالعته
الجد بادي وقف:اوحيتي العلم لاتوجسين شين ابد اللي صدمتيها إشجرة ياعباير إشجرة،،خرج،،
عباير شدت بيديها عاللحاف وهي تغلي كل شي مجبورة تنفذه برأيهم
.
..المواقف..
سعود واقف قبالهم:ياجد اغدوا الليلة يم البيت مايصلح تواجهونه ابدن
الجد نشمي زفر:وشلونه خيتك
سعود تنهد:ان شاء الله طيبة ماعليها
نشمي متكتف وساكت
الجد نشمي:انا بأغدي يم جدك اتحمد له بسلامتها
فاهد:وبتّال وينه؟
سعود كشر
فاهد:اذا غدا يم الحلال مع البنية وين به بتال
سعود وهو يكره ويكتم غيظه:مامعي علم لفيت وعينت جدي وعباير وبتّال محدن اوجس شين عنه!!
الجد نشمي التفت له:انا غادين يم بادي وبانشده احتروني بالسيارة
فاهد:لا ياعم هالنوبة لا
سعود بحدة:وش اللي لا!!
فاهد بشك:بتال وغدي ياعم والبنت كود غدا بها هاللون الله يستر وش العلم اللي مانخبره
سعود:كود ناوين تغدي يم صريمة اغد ماني برادك
فاهد مشى
سعود اتسعت عيونه
الجد نشمي مشى وراه بخطوات سريعة:ولد يافاهد فاهد
سعود مشى وراهم بخطوات سريعة
نشمي مشى وهو يوقف جنب سعود وبهمس:لاغدا العلم انكعم ياسعود لااوحي لك وجس
سعود وقف وسط اتساع عيونه:وشو!!
نشمي التفت له وبحدة:اللي اوحيته علوم الكبار كبّها بينهم
سعود بحدة:مالك وجسن علي وانت ماتخبر شين عنا ابد مردك ضيف
نشمي بحدة:استح!!خالك!!
سعود:خالي يوم انك يمنا بأيامنا الشينة والزينة ماهو توك لافين يمّنا وتومر(تتأمر)على روسنا!!،،مر من جنبه،،
.
ابو غازي برا المستشفى وتحديدا مدخل الطوارئ يتمشى بالمكان وهو يحس بضيقة تحتويه داخل المستشفى وهو ينتظر زفر وهو يطالع ساعة جواله:اعجل اعجل ياولد،،زفر وهو يهمس بدعوات بينه وبين نفسه لجسار،،
الجد بادي خرج وانصدم وهو يطالعه:عادل!!
ابو غازي التفت له بوسع عيونه وهو ماتوقع يصادفه:عمي!!
الجد بادي وهو ينزل درجات الطوارئ بسرعة وهو متجه له:من اوجسه يمك؟
ابو غازي قطب جبينه:وش وجسه!!،،زفر،،انا هينا عشان جسار
الجد بادي بفجعة:علامه!!
ابو غازي تنهد بضيق؛تصيدوه عيال الحرام حسبي عليهم
الجد بادي:وش هالعلم!!لااله الا الله!!وذالحين وش احويله هاه؟
ابو غازي:للحين بغرفة العمليات ويمكن بعدها يطلعونه بإسعاف لمستشفى باجهزة احسن
الجد بادي:لاحول ولاقوة الا بالله لاحول ولاقوة الا به يالله انها عليك!!يالله حنا بوجهك سلمها سلم سلم يالله
ابو غازي:وش اللي اوجسوه يمي ياعم؟
الجد بادي بربكة:هاه!!
ابو غازي بشك:وش العلم ياعم؟
الجد بادي:بتال
ابو غازي:علامه!!
الجد بادي بضيقه:قضبوه عيال عبري
ابو غازي انخطف وجهه وجرى لسيارته
الجد بادي جرى وراه:ولد ياعادل عادل
ابو غازي كمّل طريقه ماانتظره
الجد بادي وقف وهو يطالعه يبتعد واللي وقفه الصوت اللي يناديه التفت وراه باستغراب:نشمي!!،،اتسعت عيونه وبحدة،،ايه بالله من لفيت لفت يمّنا الصرايم لاعدت يافاهد لاعدت!!
فاهد:اوجس ماتريد ياعم ماتريد مااشقاني مير ياعم علمني وينه بتال وين به؟
الجد بادي بحدة:وينه به!!ولك وجهن تنشد!!
فاهد:اَي بالله ماهو بواحدن عشر مير علمني وين به ياعم!!
.
.........****..........
..بالسيارة..
غازي يسوق بالسيارة بسرعة مجنونة وهو متجه لام جـلاجـل بقلق من هالخبر الشين وبقلقه وخوفه وتوتره اطلق زفرة بصوت مسموع:الله***ياام جـلاجـل ماحصلنا من وراك غير الأذية
.
..المطار..
جواد يسحب بكل يد شنطة وهو يجري بكل سرعته وسط أنظار الأشخاص عليهم
رهايف تجري وراه وهي شايلة شنطتين ظهر وتباطؤ سرعته
جواد التفت وهو يطالعها وراه رجع لها وهو ياخذ شنطة منها:يالله بسرعة لاتروح الرحلة،،جرى،،
رهايف جرت وراه وفيها الصيحة:تعبت مااقدر اجري اكثر
جواد وهو يجري بدون لايلتفت لها:لو تروح الرحلة بتلعبين الغميمة من قلب معي
رهايف ضغطت على نفسها وهي تسمع تهديده
.
..بيت الجد نشمي..
،،الصالة،،
~القهوة عندهم~
راشد متربع عالارض قبالها يلعب معها اونو
هيفاء تطالع ورقها وهي للحين تحسها صعبة كشرت بوجهها وهي تطالع الورق نزلت(+2)
راشد ضحك:اسحبي اسحبي
هيفاء سحبت ثنتين وبتكشيرة وهي تطالعها سحب وبغبنة:اوجست كبنا نلعب شين اخبره علامك تلعب معي هالبلوى مااخبر لها
راشد ميل فمه بابتسامة وهو ينزل ورقة باللون الأصفر:العبي
هيفاء زفرت وهي تنزل سحب(+4)
راشد جلس على ركبه وهو يرفع يده:يسسسس اسحبي ولون اصفر
عذبة وقفت عندهم وهي تلبس عبايتها قطبت جبينها وهي تلف وتطالع اللي يصير
هيفاء بلعت ريقها وهي تكبح عبرتها ومدت يدها تسحب اربع ورقتها
عذبة:رشيد يالغشاش!!
هيفاء التفتت لعمتها
راشد:يمه روحي انتي لخالتي وسمية واتركينا عنك
هيفاء:ليش ياعمة اخطيت؟
عذبة انحنت شبه جالسة جنبها:اَيه غلطانة
راشد:يمه!!
عذبة وهي تأسر عالورق بيدها:نزليها يالله
هيفاء باستغراب وهي تنزل(+4)
عذبة:اختاري لون
راشد:يمه مبسوطين وش فيك علينا!!
عذبة ميلت فمها:ماكلمتك اختاري ياهيفاء
هيفاء:وش تريد؟
عذبة اتسعت عيونها:ليش تسألينه
هيفاء:هو علمني كذيا يتخير اللون وانا اخذ من الورق
عذبة تطالعه:يمه منك يارويشد!!
راشد رفع يديه:انا ماقلت لاتظلميني يمه
هيفاء وهي فهمت اخيرا:يعني من اليوم يوجس اكذاب يمي!!
راشد بابتسامة:ماكذبت انتي اللي سحبتي من نفسك وسالتيني انت تختار
هيفاء بقهر:وانت اوجست ايه يالكذوب!!
عذبة وقفت:عاد الحق عالقهوة
راشد اتسعت عيونه:يمّه تفتنين وأنشئت مايصير!!
عذبة:تحمل نتايج افعالك
راشد وقف وهو يمسكها من أكتافها:يمّه يمه لاتتركيني معها حامل ومعصبة مني
عذبة وهي تدفه عنها:وش بتسوي بتذبحك!!مسكينة هيوف بس يالله فمان الله،،مشت،،
راشد التفت لها:حبيبتي
هيفاء رمت الورق اللي بيدها عالارض بقوة
راشد ابتسم:هيوفتي
هيفاء وقفت
راشد:هلا ياهلا
هيفاء طالعته بتكشيرة:من اليوم بأزهمك كذيبان
راشد قطب جبينه:هاه!!
هيفاء مشت
راشد مشى وراها:ياروح كذيبان
هيفاء اسرعت بخطواتها وهي تحاول تبعد عنه
راشد جرى وهو يشيلها
هيفاء صرخت وهي تتمسك برقبته
راشد ابتسم وهو يتجه للدرج
هيفاء بتكشيرة:اندرني عنك
راشد بنص عين وهو يطلع اول درجة:انزلك!!انتي تبين شوفي وشلون متمسكة فيني
هيفاء تحركت بين يديه
راشد وقف وهو يضحك بخفة:بنت لاتتحركين ونطيح كلنا!!
هيفاء وقفت حركتها وهي تتكتف:اندرني
راشد وهو يطلع فيها:امزح معك
هيفاء:غظتني فزت علي واترقص واتشرط لك يومين وثمن تغدي كذوب!!
راشد ضحك:مااستاهل اتشرط يعني!!
هيفاء سكتت
راشد:اقولك كم لك بالحمل
هيفاء قطبت جبينها باستغراب:تونا بالثاني
راشد اخذ نفس بصوت:والله انقطع نفسي احس اني شايل بعير
هيفاء اتسعت عيونها:وشو!!
راشد انفجر يضحك
هيفاء تتحرك وبعصبية:اندرني اندرني
راشد ثبتها وهو يضحك:يابنت امزح معك انتبهي على نفسك لاتتحركين كذا!!
.
.
<اللهم صل وسلم على نبينا محمد>