ياسمح المحيا جر الهجنية

الجزء الحادي عشر

لااله الا الله عدد خلقه ورضا نفسه وزنة عرشه ومداد كلماته
.
بيت عادل
..المطبخ..
،،امجاد تجهز القهوة وأغراضها ورهايف تجهز كيكة بسيطة للبنات اللي جايين وأم غازي تعجن عجينة بكمية بسيطة تجهز عشا لعمها وعمتها وسط هدوء تام،،
بتّال دخل للمطبخ وبابتسامته:السلام عليكم
،،البنات طالعوه وكملوا شغل،،
ام غازي ماطالعته
بتّال كشر بوجهه وهو يشوف امه ماطالعته جلس بنص المطبخ وهو يتوجع ومغمض عين ويسرق نظرات لامه بعينه الثانية:ااااه صداع ذابحني مااشوف منه وبطني يمه ااااه يابطني بموت بمووووت
ام غازي تنهدت وهي تعجن:امجاد
امجاد التفت تطالع امها اللي معطيتها ظهرها:نعم يمه
ام غازي:أعطي أخوك حلتيتة(عشبة معروفة🌚❌)
بتال فز واقف وبعيون متسعة وصدمة:حلتيتة يمه!!
ام غازي مكملة شغلها ولا التفتت له حتى:تقول بطنك يوجعك!!
بتال وقف ومشى لها ثم وقف جنبها وبزعل:تكرهيني يمه صح؟!!
ام غازي ساكتة وواضح على وجهها الضيق
بتال:محد يعطي احد حلتيتة الا يكرهه!!
ام غازي زفرت:ايه أكرهك ومااطيقك ارتحت
بتّال وهو يشدد عالكلمة:يمممممه!!!!
ام غازي:بتّالوه رح عني شف لك صرفة
بتال ناشب لامه:طيب يمه والله بطني يوجعني يعني بتتركيني اتوجع!!
ام غازي بعصبية وبدون لاتطالعه:بتّال واللي يرحم والديك اذلف عني خلني اشوف شغلي
بتّال مكشر بوجهه:يمه اقولك بطني يوجعني تقولين اشوف شغلي
ام غازي:ورب البيت يابتّال ماذلفت عني تزعل
بتّال تكتف وبغثاثته:طيب اعطيني الحلتيتة بطني يوجعني
ام غازي لفت عليه وهي ترفع يدها اللي فيها عجين بوجهه تهدده:واللي رفع سبع وبسط سبع يابتال
بتال مسك يدها وحطها ع خده الأيمن بعدم اهتمام للي تقوله
ام غازي توسعت عيونها وسحبت يدها من على دقنه وبصدمة:ولد!!!
بتال لزق بوجهه وشعر دقنه عجين من يد امه ولازال مثبت يدها على دقنه:ياام غازي كان أزعلتك غزل عادل فاللي رفع سبع وبسط سبع ترا بتّال يفديك والله ياام غازي إنك غزل بتّال وروح بتّال ودنية بتّال ياعيون بتّال انتي
امجاد ورهايف يتحاشون يلفون عليهم يطالعونهم وسط وجيههم المليانة ابتسامات وهم عارفين بتّال اللي مايرضى على امه كيف زعلها
ام غازي خالطت ملامحها الرضى اللي تحاول تخفيه من كلام بتال وتسحب يدها:اتركني يابتال
بتّال رفع يدها وهو ينزّل راْسه لها وحط يدها على راْسه:ترا هالراس وراعيه فدا
ام غازي وهي تسحب يدها بقوة منه:بِسْم الله عليك الله يحفظك انت وإخوانك لي
بتال بتكشيرة زعل وهو يرفع نبرة صوته شوي:يممممممه!!
ام غازي انفجعت:بِسْم الله وش فيك؟!!
بتال:ذَا الحين كل ذَا الغزل اللي عشانك وعشان هالعيون الله لايحرمني وتقولين وإخوانك!!ادعي لي لحالي وهم لحالهم
ام غازي بعصبية منه وهي تضربه ع كتفه:ياجعل عدوينك بالمرض!!
بتّال من قلبه:ااااممممييين اخيرا دعوة لي لحالي مابغيتي!!
ام غازي ابتسمت ولفت للمغسلة تغسل يدها بعد حركة بتال ورجعت للعجين وهي تنزله بالصينية:رح عند جدك لايطب ابوك ومايشوفك معهم وتعرف وش يصير
رهايف تكلم امجاد:انتبهي للكيكة رايحة شويات وراجعة،،مشت بخطوات سريعة خارجة،،
بتّال انتبه لها وهي خارجة سلم على راس امه:تبين شي ياام غازي؟
ام غازي بابتسامة:سلامتك بس رح رح قبل يجي ابوك
بتّال خرج من المطبخ يبي يلحق رهايف شافها وهي متجهة للدرج:رهايف
رهايف اسرعت بخطواتها بدون لاتلتفت له وترد عليه
بتال عقد حواجبه وكذّب نفسه وأقنع نفسه ماسمعته رفع صوته:رهايف
رهايف جرت عالدرج بسرعة
بتّال جرى وراها
رهايف جرت بكل سرعة متجهة لغرفتها قبل يلحقها
بتال لحقها بحكم انه اسرع منها بكثير ومسكها من بلوزتها من ورا وسحبها له وهو يلقط انفاسه:وجع رهيفة ايوا والله وجع اتعبتيني
رهايف منزلة راسها ولا طالعته
بتال:وش سارقة عشان تهجّين؟
رهايف ماردت
بتال:ثم يالحسود ياللي ماعندك رحمة من امس ماجيتيني ماتقولين اخوي تعبان ارفق به اتطمن عليه ام قليب اسود صدق!!
رهايف منزلة راسها ونزلت دموعها وهي تحبس شهقاتها
بتال عقد حواجبه وهو يشوفها ماترد وميل راْسه يطالعها انصدم وهو يشوفها تبكي توسعت عيونه وبفجعة:وش فيك؟!!
رهايف بدموعها:كيف تبيني اجيك وانا اللي تسببت فيك هاه؟!
بتال يطالعها وهو يرمش مصدوم
رهايف وهي تشاهق:ادري اني غثيثة وملسونة وسرّاقة وأم قليب اسود وكل شي شين لكن ماتوقعت بيوم اذبح اخوي
بتال ابتسم:يعني هالدموع عشاني!!
رهايف صدت بوجهها وهي تمسح دموعها
بتال بعباطة:لحظة لحظة لاتوقفين صياح خليني أنادي العيال،،لف بيمشي،،
رهايف لفت عليه تطالعه وصرخت:بتّال ووجعوه ماصدقت!!
بتال التفت عليها بابتسامته ومسك يدها وسحبها لحضنه:تعالي تعالي يالصيحة
رهايف زادت دموعها
بتال:أووه ماشاء الله تعديتي سُرتّي الحمدلله زاد طولك سانتي
رهايف دفته عنها وهي تمسح دموعها وبزعل:ماتضحك
بتال وهو يضحك:وش ذنبي اذا انتي قصيرة
رهايف:محد شفط جينات الطول بالبيت غيرك يالعملاق ماعندك إيثار وجع
بتال ضحك:رضيتي الحين!طاح اللي برأسك خلاص
رهايف سكتت وماطالعته
بتال:رهايف اللي صار مكتوب وانتي مالك شغل،،بنذالة يبي يستفيد شوي،،
هو صح انك متسببة جزئيا يعني لو رتبتي الصحون بذمة وضمير ولو ماقرصتيني،،شهق وهو يوسع عيونه ويحط يديه على فمه،،يالمجرمة مخططة من البداية تذبحيني!!
رهايف وقفت بكا وبحلطمة ونرفزة:عاد انطم انت انطم لاتسوي لي فيها كونان اصلا لو ماتخاصمنا انا وأمجاد بعد سواة الخايس جوادوه فيها ماكان صار اللي صار
بتال عقد حواجبه بشك:ووش مسوي ان شاء الله هالبثر
رهايف سكتت
بتال زاد شكه وبحدة:رهايف لاتحديني على شي ماابي أسويه وانتي تعرفيني
رهايف بلعت ريقها وهي تعرف ان بتال مايفرق عن ابوها اذا عصب:ماسوا شي
بتال مسكها من يدها وضغطها بقوة وهو يشوف ترددها وبحدة وهو يطالعها:انطقي يارهايف ولا ورب البيت ان محد يفكك مني الليلة
رهايف غمضت عيونها مو من الالم على كثر ماكان من الخوف وهي تعرف بتال وطبعه الشين:انا وجواد تلاسنا
بتال بملامح واضح يكتم فيها غيظه وأنفاسه الحارة تضرب بوجه رهايف:وبعدين؟
رهايف طالعته وهي تقوي نفسها:بس
بتال من بين اسنانه وهو يهددها:اكذبي عليهم يابنت عادل مو انا!!
رهايف:هذا اللي صار بس
بتال مسكها وسحبها وراه ودخلها لغرفته هو وجسّار وقفل الباب عليها ونزل بخطوات سريعة ودخل المطبخ وطالع امجاد
امجاد اللي التفتت اول ماحست بأحد جاي
بتال بحدة:امجاد تعالي
امجاد استغربت من حدته:وش فيه
بتال مشى لها ومسكها من يدها وسحبها وراه
امجاد وهي تمشي معه:بِسْم الله وش فيك
بتال طلع الدرج بسرعة وفتح الغرفة ودفها عند رهايف وقفل الباب وراه وهو يدخل
امجاد طالعت رهايف اللي مرعوبة من بتال ثم رجعت تطالع بتال:وش صاير؟
بتال:العلم عندك ياامجاد انطقي
امجاد شدت ع قبضتها تخفي رجفتها وهي فاهمة خوف رهايف زين:جايني معصب علي وانا ماادري وش السالفة!!
بتال ابتسم بقهر من استعباطها:جواد ياامجاد جواد
امجاد تغير وجهها للحظة وهي تدري بتصير كارثة اذا درا بتال وهو المتهور بينهم:زي ماقالت لك رهايف
بتال عض طرف شفته وهو يقطب جبينه بتفكير ثم اعتلت الصدمة وجهه:لاتقولينه؟!!
امجاد لقطت تفكيره وبعصبية:استغفر الله العظيم حرام عليك لاتتهم الرجال ظلم!!
رهايف بكت
ام غازي برا الغرفة تدق الباب:وش فيكم؟بتال افتح لي يمه افتح،،دقت بقوة وهي تسمع صراخ بتال داخل،،
بتال انفجر بصراخ وغبنة:اذا صدق تكلمي قولي الصدق ماابي امد يدي عليك ياامجاد ارحميني!!
امجاد بحدة:قلت لك مافيه شي،،ماخلصت كلمتها الا وبتّال طبع كف قوي بيده اليمين على خدها اليسار،،
بتال بصراخ:لاتكذبين علي وانتي تحطين عينك بعيني ياامجاد!!
امجاد وعيونها غرقانة دموع وبعناد:ماكذبت يابتال
رهايف انفجرت بدموعها وهي تخاف يغلط بتال اكثر وبعدها ماتتصلح بينهم الأمور وتكلمت بسرعة وهي تبيه يبعد عن امجاد:جواد طردنا من بيت عمي وسكتّه يابتال وكان يبي يضربني ووقفت امجاد بوجهه وشاتها واغمى عليها هذا اللي صار والله بس ماصار شي غيره
بتال توسعت عيونه وهو يسمع كلامها امتلى وجهه غيظ وغبنة واكتساه السواد من الغبنة اللي ملت صدره ونطق ببحة صوته اللي تقطعت من غيظه:وشو؟!!
امجاد صرخت وسط دموعها اللي نزلت:رهاااايف!!
رهايف وهي تحاول تهديه بوسط دموع تنزل من خوفها عليه من اللي بيسويه اكثر من خوفها من اللي بيسويه فيها:والله ماسوا غيرها شي وانا انا متاكدة ماكان يقصدها يابتال تعرفني تعرف ان لساني طويل وازودها شوي وهو ماتحـ
بتال ضربها كف ع وجهها يسكتها
امجاد عضت شفتها السفلية وهي تكتم شهقتها المصدومة من ضربته لرهايف
رهايف حست بوجهها تقطع من ضربته زمت شفايفها وهي تكتم بكيتها من الالم
بتال مسك ثوبه بيده اليمين من عند صدره ويزمّه وهو يحس بوجع مالي صدره من القهر ورفع راْسه لفوق ونطق وهو يأخذ نفس ويزفره:ااااااه يابتّال ااااه!!
امجاد انرعبت وهي تشوفه هالمرة اكيد جواد بيموت بين يدينه مسكت يده اليسار وهي ترفعها وتضغط عليها وبخوف:بتال ماصار شي والله ماصار شي
بتال نزل راْسه بسرعة وسحب يده منها بقوة وهو يطالعها بملامح محتدة تشابه حدة ابوه لاعصب ومن بين اسنانه:اسكتي انطمي لااسمع لك صوت
امجاد سكتت وهي تحس برجفة اجتاحتها من نظرته
بتال بغبنته وهو يطالعهم:يمد يده ويتعدى حدوده وأنتم مستمرين تدافعون عنه!!
رهايف صرخت بوجهه:وانا وش علي منه؟!!انا علي فيك انت واخواني
بتال بصراخ:وانتي وش عليك منّا!!اللي يغلط بحقك تقولين!!اتركي الرجال يخلصون امورهم مع الرجال ومالك شغل باللي يصير وهالخوف خليه لك مااحنا بمالين عينك!!
امجاد بحدة:اذا بيصير لكم شي من ورا هالسالفة ايه بدافع عنه وماانتم بمالين عيني
بتال انجن من كلامها وهي تستنقص رجولته وأنعمت عينه عن خوفها عليهم رفع يده بيضربها ويبرد قلبه
رهايف وقفت بينهم واخذت الضربة عن امجاد وسال الدم من انفها وهي تطالعه وبحدة وهي تحبس دموعها:دايم تقول عديم المروة اللي يمد يده على مرة(حرمة،أنثى)
بتال شحب وجهه من كلامها
رهايف:وانت ماانت بأقل منه مديت يدك على مرة والمصيبة خواتك!!
بتال انتفض جسمه من كلامها طالع الارض وبنبرة هادية وهو كله ندم عاللي سواه بخواته:وهالاخت ماحسبت حساب لإخوانها!!
رهايف تطالعه ساكتة وأمجاد وراها
بتال رفع عينه يطالعهم وهو كله غبنة:انتي وأختك نزلتوا قدرنا بالأرض يوم ماتكلمتوا بوقتها وارخصتونا له وهو يبتسم بوجيهنا ورا سواته الشينة
امجاد تقدمت وهي تبعد رهايف:بتال الشاهد الله انّا مانبي
بتال رفع يده بوجهها يسكتها:اووووووص،،طالعهم وهو يتفحصهم بعيونه رهايف وحالتها اللي تقطع قلبه امجاد وكيف تترجاه وأثر يده مطبوع ع وجهها اكل قلبه الندم وهو يشوف اللي سواه فيهم عض شفته بغبنة من نفسه وشلون يمد يده بسبب واحد مايستاهل وفوقها هالواحد غلطان بحقهم ولادروا وحضر العزيمة بكل وقاحة وبدون ندم تكلم بوجهه اللي امتلى شر بعد لحظة هدوءه،،الشاهد الله ياامجاد ان مابي خير ولا ذرة رجولة اذا تركت واحد يضحك بوجهي وهو ماد يده على خواتي حي،،عطاهم ظهره وفتح الباب،،
ام غازي انفجعت وهي تشوف وجهه الاسود:وش فيك بتال؟
بتال مر من جنبها بدون لايرد وخرج يجري متجه لبيت عمه
امجاد جلست عالارض بصدمة
رهايف جرت وراه بخوف من اللي بيصير وهي تترجاه:تكفى يابتال اتركه الله يخليك اتركه
ام غازي مشت وراهم بسرعة وهي ماتدري وش اللي صاير بينهم لكن عرفت ان فيه مصيبة من وجه بتال
.
.........****..........
الـديــرة
.........****..........
مجلس الشيخ
،،الليلة عزيمة كبيرة ببيت الشيخ بمناسبة تخرج ولده ورجعته للديرة..كل عزيز وغالي موجود..قريب وبعيد وأهل المواجيب متواجدين..يلف المجلس تباريك تهاني..وأصوات تسولف بأطراف المجلس وهالسوالف مليانة ضحك ووناسة..ريحة العود تغطي المكان..شباب القرية يقهوون..نفوس مجتمعة كلها فرح وطيب..،،
بادي دخل بوجهه المليان ابتسامة وظهره المنحني وهو يتركع ع مركوعه ووقف ع مدخل المجلس ورفع مركوعه يأشر فيه بالسلام:السلام عليكم
سعود وقف وراه شايل الترمس
،،سكتوا اللي بالمجلس واختفت ابتسامات البعض والبعض محتفظ مجاملة لجو المناسبة،،
بادي بابتسامة:مبروك مبروك يامناور والحمدلله اللي ردّ ضناك يمك
الشيخ مناور تنحنح وهو يعدل جلسته:الله يبارك فيك
بادي ضحك:لاترّوع(لاتخاف)لاترّوع ماني بناشدك(بسألك)وشو له ماتعزم والباب عالباب وهاذي فرحتك مالها بدّ(شغل)باللي يحصل والنسب ماينقطع والدم موجود
غيث كشر بوجهه
الشيخ مناور عض شفته بغبنة وهو وده يذبح غيث وهليّل كلهم
بادي بابتسامة:خابرك خابرك بتقول هالشور اللي تمشون وراه ومابه سنع ومتعبين أرواحكم به!!
،،الكل حقد عليه،،
بادي مشى
سعود مشى وراه
بادي وقف بنص المجلس وهو يتكي بيديه الثنتين ع مركوعه واشر لسعود ينزل الترمس
سعود نزل الترمس ووقف ورا جده
بادي :والله يالربع كلن يعامل الناس بطيب اصله وانا سعيت وابي اعاملكم بأصلي على مايقال،،انحنى وفتح الترمس،،هالقعود(البعير)وبرا المجلس ترمسن مثله به كم راس عطيّة عن سلامة هليّل من يدين سعود
ابو هليّل وقف وبعصبية وهو يشد ع قبضته:وش مغزاك من هالعلم يابادي
بادي وهو يرفع يده اليسار اللي فاتحها لفوق ورفع معها أكتافه:مغزاي كل خير ووجهن ابيض ياهلال،،ميل فمه بابتسامة،،وش اللي عنيته(قصدته)بمغزاي انت؟!!
ابو هليّل فاهم انه يقصد ان مافيهم خير ورخوم وبحدة:المغزى واضح ماله توالي(تفسيرات ثانية)
بادي:مير الله ان يسامحك كانك ظالمنا حتى بنوايانا حنا مانيتنا الا كل خير وهاللي تشوفه عطية مالها مغزى ياابو هليّل والوجه من الوجه ابيض
ابو هليّل بعصبيته:ماحنا بحاجة عطاياك حنا اللي نعطي عن ولدنا مو بأنت
سعود بابتسامة ثقة:عطايانا ماانت بواصل مواصيلها والمفروض تحب راس هالشايب اللي نصاك لسلامة ولدك ولو انه خابر انه مايستاهل
بادي ضحك بخفة ومااعترض على كلامه وذا دليل انه موافق وراضي باللي قاله وسواه سعود
ابو هليّل مشى لسعود وهو ناوي يضربه
بادي اللي كان واقف بطريق ابو هليّل رمى مركوعه وهو يعتدل بوقفته ويشد ظهره المنحني ومسك ابو هليّل بيد وحده ورماه بالأرض
،،ارتسمت الصدمة عالموجودين من قوة الموقف اللي صار،،
بادي بسخرية وهو ينحني لمركوعه ويوقف وهو يسند نفسه عليه:يارب الشكوى لك ماعاد بنا حيل نردّ العْدا(الأعداء)
سعود وهو يكتم ضحكته بابتسامة
هليّل وقف ومشى لابوه وهو مصدوم
غيث كشر بوجهه وهو فاهم زين وش اللي يبي يقوله بادي
هلال فز واقف يطالعه بقهر
الشيخ مناور بحدة:وصلت عطيتك يابادي وصلت
بادي بابتسامته:دامها وصلت عليكم بالعافيتين عاد ودنا نسمر معكم ونسولف عليكم بسلومنا اللي صيتها مالي المجالس لكن انتم خابرين سلومنا الزينة ماله داعي نثقل مجالسكم بجلستنا وطوارينا مشغلتها ابوك ياسعود
سعود:سم ياجد
بادي:افزع للشبك واختر الجزلة وحطها بشبك عمك هلال(ابو هليّل)
هلال صرخ:مانبي عطاياك جعلها للذيب
سعود:أبشر ياجد على امرك
هلال قرب من بادي وبحدة:مانبي عطاياك!!
سعود انحنى وهمس له بشر:خذ العطية لاتاخذها دية
هلال التفت يطالعه بصدمة
بادي بحدة:اعقب ياسعود للحين مرتز عندي!!
سعود لف شماغه على راْسه وربطه وانحنى ومسك طرف ثوبه وهو يربطه ع وسطه:أبشر بعزك أبشر الجزلة من حلالك والزين من حلالي ياابو نشمي،،هرول بخطواته خارج من المجلس،،
بادي ابتسم على فطنة سعود ونبهاته:عاد اترخصكم انا خابريني شايب مااداني الصجة واللجة(ازعاج)تصبحون على خير،،مشى وهو يهمس،،ياديرة عساها تذوق ماذقناه وأردى
............