ياسمح المحيا جر الهجنية

الجزء الثاني والثمانين

،،الـجـزء الـثـانـي والـثـمـانـيـن،،

سبحان الله وبحمده عدد خلقه ، سبحان الله وبحمده رضا نفسه ، سبحان الله وبحمده زنة عرشه ، سبحان الله وبحمده مداد كلماته
.
.
،،بـعـد أسـبـوع،،
.........****..........
يوم جديد
.........****..........
.
..بيت خالد،..
،،غرفة عذاري،،
عذاري جالسة على سريرها وبزعل:وبعدين ياغازي وبعدين ماصارت!!
غازي:وش فيك!!
عذاري:اشوف اليومين صارت سنة
غازي:الله اكبر عليك يالظالمة!!طيب تبين أجيبك وتسحبين وتنزلين وتنظفين وبعدها اوديك المستشفى ينظفونك
عذاري كشرت وبزعل:وش فيك علي!!
غازي؛انتي اللي وش فيك علي!!
عذاري:طفشت وانا محبوسة بالغرفة
غازي؛اطلعي من الغرفة!!لايكون مسجونة!!
عذاري بنبرة هادية اقرب للهمس:اخاف أقابل ابوي
غازي:ابوك ذَا!!وش فيك؟!!،،سكت للحظة وبحدة،،عذاري للحين ماتكلمين عمي؟
عذاري مبوزة:مو مااكلمه
غازي:ايييوووه!!!
عذاري:مدري كيف اكلمه
غازي:عذاري!!
عذاري:هممم
غازي:العني الشيطان اللي برأسك وانزله لابوك وسلمي على راسه ويده وانتي تبكين هذا ابوك كيف مرتاحة وهو بخاطره شي عليك!!
عذاري زاد تأنيب ضميرها وبنبرة زعل:غازي
غازي بنفس نبرتها:تراني مو ابوك الزعلان ياعذاري
عذاري بنرفزة:خلاص فهمتك اصلا من اول بروح له بس ابي دعم معنوي وانت ماتقصر ماشاء الله،،كشرت،،يازين دعمك!!
غازي ابتسم وهو عارف انه رفع ضغطها:جاهز باي وقت افا عليك بس اذا مادعمتك ادعم مين!!
عذاري باستعباط وسط تعصيبتها:اي والله تدعمني(تصدمني)صدق تسويها مايردك شي
غازي بهدوء وسط ابتسامته:الا يردني ومو شي اشياء بعد
عذاري تنحنحت بخفة وهي تبتسم:مثل ايش؟
غازي:باب بيتكم،،انفجر يضحك،،
عذاري كشرت:الحق علي والله انا اللي مااتوب من حركاتك اللي ماتبطلها
غازي بابتسامة:انا مااعرف بالجوال لايف فقط يالحب
عذاري:صدقتك!!
غازي:هيا روحي لعمي واستسمحي منه دقايق وانا عندك واوريك اللائق حقي كيف
.
..بيت الشعر..
راشد باحراج:ياعم هالمرة الرابعة اللي اقولك رفضت والله مستحي منك وانا كل شوي اردك
نشمي ابتسم:ماعليه ياراشد ماعليه يحق لها ومامن ملامة يمها اخطيت والخطا بعيني قـبـل عينها كبير مير نشمي ذاك الوقت ماهو بنشمي هالوقت لو تردني عـشـر باعود وأطلبها لامن قلبها يلين ولايغدي بي الموت عنها
راشد:استغفر الله ياعم وش هالكلام!!
نشمي ضحك:ولد ياراشد
راشد:سم ياعم
نشمي وعينه عالاكل بابتسامة:فطوركم دايم بهاللون؟
راشد طالع الاكل باستغراب:لا مير عشانك ضيف
نشمي:وضيوفكم دايم تفطرونهم هالجريشة؟
راشد باستغراب:مرات على حسب
نشمي بابتسامة:ولد ياراشد كل مالفيت وهالجريشة قبالي تخبر اني أريد الجريش
راشد انصدم وهو يطالعه ماتوقعه من امه
نشمي بابتسامة:اوح العلم ياراشد أوحه
راشد:سم ياعم
.
..بيت عادل..
ابو غازي متمدد عالسرير على ظهره ومغطي عيونه بيده
ام غازي جالسة جنبه:قم ابيك بسالفة
ابو غازي:وش تبين اسمعك!!
ام غازي:ابي أقابل فاهد
ابو غازي بنفس وضعه:مامنعتك قابليه
ام غازي اتسعت عيونها:وبالبيت بعد
ابو غازي:بكيفك
ام غازي بغبنة منه:اجل ليش مانع بتال!!
ابو غازي ببروده:مامنعته
ام غازي مدت يدها وهي تدف يده عن عيونه وبنرفزة:ارعني وانا اوجس يمك
ابو غازي زفر:لااله الا الله!!وش تبين!!
ام غازي؛اقولك ابي أقابله وتقول لي قابليه وملأنا موافق لبتّال!!وش فيك قول لي ياعادل!!
ابو غازي جلس وسط ملامحه المحتدة:بتقابلينه وانا ماني بالبيت وبتكرمينه وانا ماني بالبيت مردّه اخوش مير عيني ماتراعيه وثمن بتال مارديته
ام غازي ضحكت:ايه مارديته صحيح صدقت مير بتال يخبرك مثل مايخبر روحه ولذالحين يحتريك ياعادل كود انت ياللي رحمته وهو صغير ماترحمه ذالحين وهو بطولك!!
ابو غازي كشر:مارديته ابدن ياوسمية مارديته واللي يريده مااحرز عليه مااحرز ابد
ام غازي:اجل الله يقويك على ذنبه لافطس وغدك بمكانه وانت خابره رهيّف مثلك
ابو غازي شهق بوسع عيونه:وسمية!!
او غازي قطبت جبينها وبسخرية:ذال عليه!!لاتذل ابدن هذا الصحيح بيفطس من الغبنة قبل يومه،،تمددت عالسرير وهي تعطيه ظهرها،،لاتغتاظ وانا اعلمك الصحيح ياعادل لاتغتاظ
ابو غازي بحدة:قومي طفي اللمبات
ام غازي وهي بنفس وضعها:الضحى وانت ماتريد نومة الضحى اغد يم عمتي ازين لك
ابو غازي:قومي اريد ارقد طفي اللمبات
ام غازي زفرت وهي توقف
ابو غازي تمدد وهو يغلي من كلامها
ام غازي وهي تجر خطواتها:الله يعينش ياوسمية الله يعنيش ويعين عييلش
ابو غازي شهق وبحدة:وسمية علامش علي اليوم هاه!!
ام غازي قفلت النور وماردت عليه وتمددت عالسرير وهي تعطيه ظهرها بوسط ابتسامة
.
..بيت خالد..
،،الجو يعمه الصمت بوجودها،،
عذاري تطالع فنجالها اللي برد بين يديها استجمعت شجاعته وهي تاخذ نفس عميق ووقفت:يبه
ابو صايل طالعها باستغراب وخاصة بعد تعاملها الرسمي معه طول فترة جلستها عندهم:هلا يابنتي
عذاري مشت له وهي توقف قباله وسلمت على راسه ويده
سهام وقفت وخرجت من المكان تتركهم براحتهم
ابو صايل سحب يده منها:كرمتي كرمتي
عذاري برجفة صوتها وسط عيونها اللي تلتمع من يدها:سامحني يبه غلطت عليك وجرحتك بحركاتي معك سامحني تكفى
ابو صايل وقف وهو يضمها لحضنه؛مسموح مسموحة ماغلطتي ياعين ابوك الغلط من ابوك هالمرة سامحيه انتي سامحي ابوك ياعذاري
عذاري ضمت ابوها لحضنها بقوة وهي تبكي:محشوم ياابو عذاري ماتغلط ابد محشوم
ام صايل ابتسمت وهي تطالعهم
ابو صايل:ياعين ابوك اشتقت لهاللمة اشتقت
.
..بيت الجد نشمي..
،،المطبخ،،
هيفاء تساعد عذبة بشغل المطبخ
راشد ابتسم وهو يطالعهم:والله اني صباحاتي احلى الصباحات
هيفاء ابتسمت وهي تغسل الصحون
عذبة ترفع الاشياء:وصباحنا احلى بوجودك
راشد مشى لامه ومسكها من يدها وسحبها وراه:يمّه ابيك بسالفة
عذبة قطبت جبينها وهي تمشي معه:خير عـسـى ماشر؟
راشد مشى فيها وهو يدخل غرفة الضيوف ويقفلها عليهم وجلس وجلسها جنبه
عذبة:وش فيك خوفتني
راشد:يمه عمي نشمي
عذبة زفرت بطفش:راشد!!
راشد:اسمعي وش بأقول وبعدها ماني بقايل لك شي ابدا
عذبة بنرفزة:خير
راشد:يقول ياعذبة غديت مهلي وغديتي ناديته علي
عذبة تغير وجهها
راشد وهو يطالعها:هاه يمه
عذبة وهي تبلع غصتها:وغيره؟
راشد:ابد خرج ولاقال شي
عذبة:يومه خرج وشلون خرج؟
راشد قطب جبينه باستغراب:مع الباب يمّه!!
عذبة كشرت وعصبية:ماهو بوقت مزوحك ياراشد!!
راشد:وهذا الصدق خرج مع الباب كيف وشلون خرج!!
عذبة زفرت وهي توقف:تبي شي ثاني بس؟
راشد:سلامتك وصلت اللي يبيه وبس
عذبة مشت وهي تحبس دموعها:حسيبك الله يانشمي ذالحين غديت عليك نادية!!محدن عمل بنا هاللون غيرك محد!!
ــــــــــــــــــــــــــــــــــــــــــــــــــ ــــــــــــــــــــــــــــــ
‏الله يانادية كان ما تدرين بمهلّي..
‏من سبّتك من يشوفه قال: عزاله..
‏أمشي وقلبي سوات القدس محتلّي..
‏عليك قلبي جريح وحالتي حاله..
معقول ياسيد الخثرات ياخلي..
مستعمر القلب مايدري عن أحواله؟!!..
اخذت قلبي تكرّم واخذني كلي..
يانور عيني سهوم الهجر قتّاله..
يامشغل البال في نومي تخيّلي..
دايم نديم الشقا ماغبت عن باله..
ياأعز الأحباب قلي يالغضي قلي..
متى عميلك بحبل الوصل تسعى له..
أنـا تعلقت فيك ولاانت حاصل لي..
ولو يقدر القلب ينسى حبك أشوى له!!..
ــــــــــــــــــــــــــــــــــــــــــــــــــ ــــــــــــــــــــــــــــــ
.........****..........
ام جـلاجـل
.
..بيت مناور..
ام غيث على أعصابها تدور بالبيت مـاهـي بمرتاحة اليوم لها يومين ماشافته
غيثة وقفت جنبها:يمّه علامش بيلفي مثل كل ليلة اصبري
ام غيث وهي تطالعها بحدة:انتي بينهم انكعمي مااريد لش حس ولا شوف
غيثة قطبت جبينها:ليش يمه وش عملت؟!
ام غيث دفتها عن طريقها:اغدي جوا ارعي لش شغلتن بعيد عني
غيثة مشت لداخل البيت وهي تطالع امها للحظة بشك دخلت للمطبخ وهي تطالعها واتسعت عيونها:نايفة!!
نايفة ماسكة إبريق الموية الحار وهي تصب منه بابريق الشاهي وامتلى وصار يكب ويقطر لتحت عليها وهي مو حاسة التفتت ببرود لغيثة وسط وجهها الذابل وهالاتها السودا اللي مرتسمة عليه بوضوح
غيثة اسرعت لها وهي تسحبه من يدها بقوة:علامش!!انخبلتي
نايفة بهمس:كل مالتفت ياغيثة ارعيها تراعيني
غيثة ضربتها كـف على وجهها
نايفة طالعتها بدموع
غيثة بهمس من بين اسنانها:ماهو بذنبش ذنبي تريحي وكبي الملامة يمي اوحيتي!!
.
..المستشفى..
بتال جالس بالإسعاف وسماعاته باذنه:ها قولي لي كيف ضروسك ياانستني الجميلة؟
الجدة منيرة كشرت:لاعاد تقول لي هالكلمة وبعدين وش عليك بضروري هاه؟
بتال:لا بس شاري كرتون خلاص يحبه قلبك واخاف تاكلين منه وينشب ضرسك بالتمرة،،ضحك،،
الجدة منيرة بتعصيبة:ضحكت من سرك بلا اَي والله بلا استح تقولي هالكلام
بتال بضحكة:ايه وانتي وش يفكني من لسانك لانشب ضرسك بالتمرة صدق هاه!!
الجدة منيرة وهي ترفع يدها ومن قلب:يالله يارب جعل ضروسك كلهن يطقنك(توجعه)
بتال:اعوذ بالله منك ياام قليب بدل ماتدعين لحفيدك!!
الجدة منيرة:اَي حفيد هاه اللي يتطنز؟!!
بتال:نسيتي نسيتي هاه مانسيت يوم عادل جلدني لان التميس حق امس اوجعك بضروسك ترا مانسيت
الجدة منيرة:وتلحقني ذنب ابوك فيك!!!
بتال:ليش مابللتيه بموية او شاهي اللي كان قدامك وانتي تدرين فيه حق امس هاه؟
الجدة منيرة:عاد عادل خبل تلومني على فعوله!!
بتال زفر بضيق:ايه ياجدة ايه احل يرضيك اللي يسويه فيني حتى امي مايخليني أكلمها ياجدة
الجدة منيرة شهقت:تقوله صادق ياولد؟
بتال وهو يشتكي لها:ياجدة ابوي فوق انه زعلان علي اخواني مهددهم محد يكلمني منهم ولاالومهم هذا عادل وانتي تعرفينه
الجدة منيرة بعصبية:اوريك فيه انا اوريك
بتال:ياجدة ماسالتيني عن زعله ليش؟
الجدة منيرة:مايبي له ادري اكيد عن فاهد هو به غير هالسالفة ذا الشهر
بتال:ياجدة غلطان انا عشان يسري فيني كذا؟قولي لي تكفين؟
الجدة منيرة:لا والله ماانت بغلطان ابوك
بتال:انا ماابي أقابله وانا ادري ان قلبه ماهو براضي يظل ابوي مهما كان ياجدة
الجدة منيرة زفرت:من طيب اصلك يابتال من طيبه
بتال تنهد:ماعاد ادري ياجدة اللي اسويه صح او لا
الجدة منيرة؛الا صحيح ولو انه انا عز الله ماتصير الصبح غـيـر وهم كلهم متكسرين وانا جدتك
بتال ضحك:قايله انا ام قليب ماتتركين حقك يروح
الجدة منيرة:الله اكبر عليك اذكر الله اهب
بتال بضحكة:ليش اذكر الله عليك وانتي تهببيني ياام قليب
الجدة منيرة:هين هين وين تروح تجي تجي والله والله،،رفعت عكازها،،لاامحطك بهالعصاة
بتال ضحك:خليني اجيك اول يالله العفو والعافية ماتدرين مين حي ومين ميت وقتها!!
الجدة منيرة صرخت فيه:الله اكبر عليك
بتال انفجر يضحك
الجدة منيرة:والله محدن بيذبحني غـيـر عيونك يالحسود
بتال:ليت كل الناس مثلي بالحسد ياجدة
الجدة منيرة:الحمدلله ولاّ كلنا موتنا(ميتين)
بتال ضحك:الا والله انكم بخير وعافية اصلا الحسد مااعرفه انتي اللي تخافين بزيادة يالمتطيرة(من الطيرة)
الجدة منيرة:صابتني الطيرة منك ياللي حاسدني تحسب علي الدقايق من عرفتك
بتال ضحك:ياجدة احسبهن خايف عليك ابيك معي
الجدة منيرة:انت علامك اليوم تفاول علي هاه علامك؟
بتال بضحكة وهو يشوف ترقيعته مافادت معها:الله يطول بعمرك ياجدة واشوفك على عكازك جنبي وانا على عكازي
الجدة منيرة:الحمدلله قلت شي سنع مابغيت
بتال ضحك:تبين شي ياجدة؟
الجدة منيرة:سلامتك سلامتك انتبه على نفسك
بتال بابتسامة:ان شاء الله ان شاء الله يالله سلام
.
.........****..........
الليل
.........****..........
.
..بيت جسّار..
جسّار خارج من غرفة النوم اللي صارت مقره ونادرا يخرج منها الا للضرورة عقد حواجبه وهو يسمع صوت غريب وخفيف واتجه له وقف على طرف باب المطبخ وهو يميل راسه بشويش يطالع داخله
بخوت منهارة تبكي وهي تغسل الصحون
جسّار عض شفته بقهر وهو يطالعها رجع طريقه بهدوء وهو يتركها بدون لاينطق لها كلمة
.
..مزرعة هلال..
هليل قفل باب المزرعة وهو متجه لسيارة ماحس الا باليد الليي هجمت عليه من ورا والتفت حول رقبته تخنقه حاول يدافع عن نفسه لكن الطرف الثاني كان اقوى منه وبآخر لحظة وهو يفقد قوته بالوقوف ويحس انفاسه تنقطع ارتحت هاليد الملتفة وهي تعطيه المحال يتنفس ووصله الصوت وهو يحس بدوخة
غيث:اعقب يالخسيس اعقب ياللي مابك مروة!!
.
..بيت بادي..
عباير جالسة جنب جدها عند المشب وبحلطمة:لفانا الحر شابين ناركم وشو له!!ذبحتونا بالحر
الجد بادي:اغدي عني كودش ماتريدين المشب
عباير حاوطت ذراعه:مير اني اريدك وشلون اغدي واكبك وراي!!
الجد بادي طالعها بنص عين:ايه ايه مير وش تريدين علميني؟اعجلي
عباير شهقت:مااريد غيرك ياجد
الجد بادي ميل فمه:اللي عقبه؟
عباير بابتسامة:وتمنعني من الحلال بكرة
سعود ضحك
الجد بادي:خابرن من اول ان وراش علوم علوم وين تريدين تغدين؟
عباير:فراشي والله ماغيره فراشي اريد نومة الضحى
الجد بادي كشر:عجز عجز(عجوزة)ماترقد هالوقت غير العجز
عباير ميلت فمها:اراعيك ماترقد الضحى!!
سعود كتم ضحكته
الجد بادي:ايه لأجل اني شباب اجل وش رايش شايب!!
عباير:وسيد شبابهم كل ابوهم لولا هالشعيرات البيض،،فزت وهي تتركه وتبعد عنه قباله،،
الجد بادي رفع عكازه:اعقبي مابش حيا
عباير جلست جنب سعود وهي تتخبى فيه:هذا الصحيح ياجد شايب
الجد بادي شهق:والله لاقبرش ياعباير ماانكعمتي عني
عباير:شايب مير القلب شباب اخضر تزهاهم كل ابوهم تزهاهم ياشيخهم
الجد بادي تنحني وهو يرفع فنجاله له:خابره خابر
سعود بابتسامة:ياجد
الجد بادي بعصبية:خلاص ياسعود يسد خابرن ان بتال مغتاظ خابر!!
سعود ابتسم؛مير اني مااريد اوجس هالعلم!!
الجد بادي وهو يطالعه من فوق لتحت وسط تكشيرته:وش وراك اجل دام ماهو بعلمك هالعلم وانت مغير يمه!!
سعود بنص عين:اوجس الصحيح ياجد حاسدني وتريد انك محلي تواجهه
الجد بادي اتسعت عيونه:استح!!
سعود بابتسامة جانبية:تشوقت له ياجد علمني مااوجسه يم احد علمني
الجد بادي بنرفزة:ماعلي منه ولااشقاني!!!
سعود:والله ياهو يجر هجينيات تالي الليل يمه تهيض قليبك ياجد تغدي شباب صحيح
الجد بادي بعصبية:علامك انت وخيتك متسلطين علي الليلة هاه هاه؟!!
سعود:ياجد بتال خطب
عباير التفتت لسعود تطالعه
الجد بادي:وشو!!متى هالعلم!!مع من غدا!!ومن هاللي خطب يمهم!!
عباير تطالع جدها بابتسامة:توجس مااشقاك ياجد!!وانت ماقصرت بالنشدة!!
الجد بادي:انكعمي عني ياعباير توجس الصحيح ياسعود؟
سعود:وهالامور بها اكذاب!!
الجد بادي:من غدا معه؟فاهد!!
سعود:محدن ابد بروحه
الجد بادي اتسعت عيونه:وش هالعلم!!واهله على وجدهم ماغدا معه احد!!
سعود:ماهو انتم رضيتوا بالقطيعة وش تريده يعمل!!
الجد بادي احتدت ملامحه:سعود!!
سعود تنهد؛ياجد هذا اوله الجيزة بلياكم وثمن العيال وعقايقهم وكل اموره بلياكم وهذا اللي تريدونه انتم!!
الجد بادي صد بوجهه
سعود:خطب يمّنا ياجد
الجد بادي التفت له بسرعة:هاه!!
عباير ماانتبهت للي ينقال وهي مشغولة تحرك الدلة وسط المشب واعتدلت بجلستها وهي ترفع فنجال قهوتها لفمها تقهوى
سعود بابتسامة:خطب عباير ياجد طلبها حليلتن له
عباير شرقت بالقهوة وهي تسمع كلامه وكحت وسطهم
سعود مد يده ومسح على ظهرها:بسم الله عليش بسم الله
عباير دفت يده عن ظهرها بقوة من الاحراج اللي احسه
الجد بادي اتسعت ابتسامته:صحيح ياسعود؟
سعود:مير الرأي يمها ياجد مااوجست يمه علم لذالحين
عباير ضمت يديها وهي تطالع الارض تحس بحرارة فضيعة
الجد بادي طالعها وبابتسامته:غدا شوقش ياعباير غدا!!
عباير فزت واقفة:انا بأغدي ارقد وراي حلال بكرة،،مشت بخطوات سريعة وهي تحس حرارتها تنتشر بالمكان حولها وتفضحها،،
سعود كتم ضحكته وهو يطالعها تبتعد
الجد بادي رفع صوته:هماش توجسين مابه حلال عودي عودي واوجسي علمش يمّنا يابنية
عباير هرولت بخطوات اقرب للجري وهي تتجه لغرفتها وبهمس وهي بتموت من احراجها:ياربي الليلة وش هالعلم !!،،دخلت وقفلت الباب بقوة وراها،،
سعود ضحك:كبّها ياجد كبّها الليلة
.
..بالسيارة..
هليل يسوق بنظراته المحتدة
غيث بغبنة:هاذي تاليتها تعمل بي هالعلوم ياهليّل!!
هليل بحدة:مااخطيت
غيث صرخ وهو يضرب بيديه اللي قدامه:انكعم انكعم انكعم!!ماظل غيرك يوجس يمي علومن بها جمايله علي!!انكعممم!!
هليل عض شفته بقهر
غيث بغبنة:ااه اااه مير اني اخطيت بك ليتني غديت بالمراسيل يمك دون اختك!!
هليل التفت له بصدمة يطالعه:هاه!!
غيث بحرقة صدره:اااه واغبينتك ياغيث واغبينتك!!ليت مراسيلي صابتك انت وأختك كل ابوكم مرتن وحدة ليت!!ليت ماغدا بخيتك غدا بك ليتكن ياخياتي فزعتن وعملتنا به ليت ياليت!!
هليل غرقت عيونه دموع وهو يطالع قدامه بصدمة من اللي يسمعه
غيث يطالعه بحقد:عديتك خوي مير الظاهر اخطيت بك اخطيت ليت مراسيلي صابتك ولا زليت عنك
هليل نزل يمينه لتحت مقعدته وسط دموعه اللي ملت محاجر عيونه وهو يسحب خنجره من غمده المثبت بالمعقدة تحته وسدد خنجره بدون اَي تردد حتى لو للحظة لرقبة غيث
غيث شحب وجهه
هليل سحب الخنجر من رقبة غيث وبقهر وسط دموعه اللي طاحت وبدون اَي ذرة رحمة او حتى ندم:شيطان وحقك الموت موتك على يدي ياغيث حق شامة مايحيد عنكم ابدن ابدن دوني الموت كود حاد عنكم،،دعس عالبنزين وتحركت السيارة بكل سرعة عدادها،،
.
..بيت مناور..
مناور جالس بطرف الحوش ومتكي عالمين بضيق واضح وهو يفكر بمصيبة ولده
ام غيث مرت من قدامه وهي خارجة من غرفتها متجهة للمطبخ اللي قبالها وطالعته بوسط تكشيرتها:امحق شيخ اللي قاعدن يمي بالبيت وهو خابرن عيال عبري يعيثون ورا وغده!!
مناور اعتدل بجلسته وبحدة وسط نبرته العالية:طسي عن وجهي ياصيفة يسدني وغدش طسي لاتغدي الصريمة صرايمهم واحدة طسي!!
ام غيث ميلت فمها وحملت طريقها وهي تتحلطم منه بينها وبين نفسها
نايفة وقفت عنده:يبه
مناور رفع راسه واعتدل وهو يزفر ويطالعها:خير وش تريدين انتي بعد؟
نايفة بدموع:يبه انا وغيثة ذبحنا شامة
مناور وقف شعر جسمه وهو يطالعها بصدمة
.
.........****..........
.
..بيت الجد نشمي..
ابو غازي دخل للصالة وهو يرفع يده بالسلام:السلام عليكم
عذبة بابتسامة:وعليكم السلام والرحمة ياهلا
ابو غازي تقدم لها وهو يبي ينحني يسلم عليها
الجدة منيرة سحبت عكازها ورفعته بينها وبينه وبزعل:لاسلام ولاكلام ولا هلا ولامسهلا ولامرحبا ياعادل
ابو غازي شهق:وش فيك زعلانة علي يمّه!!
الجدة منيرة:والله مدري عنك شاور روحك وتعرف خطاك!!
ابو غازي:يمّه جايك اتقهوى معك وتقهويني هالكلام!!
الجدة منيرة بحدة:علامك انت علامك!!بعير بعير الا والله بعير صدق
عذبة كتمت ضحكتها
ابو غازي:يمّه!!
الجدة منيرة:مير حتى البعير اهون منك يرحم عويلته(عياله)
ابو غازي كشر وهو فهم الموضوع:اخلص من وسمية ألقاك انتي يمّه مثلها!!
الجدة منيرة:والله ان وسمية فالها الجنة وبإذنه انها فالها على هالعلوم اللي تعمل بها
ابو غازي بنرفزة:والله يمه اللي يسمعك يقول اني فرعون!!
الجدة منيرة:الا شي بسيط
ابو غازي كتم غيظه:وش تبين يمّه مني الحين
الجدة منيرة:بتال
ابو غازي كشر:وش فيه؟
الجدة منيرة:سلامتك ابد ماانت مسوي له شي!!
ابو غازي ضحك بقهر:ضربني وبكا سبقني وشكى!!
الجدة منيرة:اَي والله هاذي حالته
ابو غازي بحدة:يمّه انا مااطيق فاهد ولاابي له مراعاة
الجدة منيرة:تكذب ياعادل تكذب
ابو غازي:يمه!!
الجدة منيرة بعصبية:وصمة اوحيك هذاني قدامك!!اسمع ياعادل كود مااخذت بخويطر هالمسيكين فانا مالي خويطرن يمك واللي مالي خويطرن يمه مااريد له شوف
ابو غازي عض شفته بغبنة
عذبة اتسعت عيونها:يمّه تعوذي من الشيطان!!
الجدة منيرة صدت بوجهه؛وهذا علمي ياعادل
ابو غازي بغبنته:يعني قدر فاهد ازين بعينش مني يمه؟!
الجدة منيرة التفتت له وبحدة:وصريمة تصرم هالفاهد اللي ابلشتونا به ماعلي منه فاهد ولااشقاني ابدن!!
ابو غازي بصراخ:اجل ليش!!
الجدة منيرة اتسعت عيونها:يازينك ياعادل يازينك وانت حسك يطول امك يازينك!!
801
.
~
ابو غازي زفر وبغبنته:استغفر الله العظيم
الجدة منيرة:خابرتك فطين مير الظاهر الحقد عمى قليبك!!
ابو غازي يطالعه بتكشيرته
الجدة منيرة:مااشقاني فاهد ياعادل واللي عمله بينه وبين ربه ودام غدا يمكم وطلبكم الحل كلن وكيفه يقبل به او يرده محدن له وجس على الثاني مير دام ظاهره ذالحين زين ادناة الدون تحشمه لأجل هالمسكين اللي يدوج(ضايع)بينكم مايعرف ارضه من سماه!!
ابو غازي بقهر:مايستاهل الحشيمة يمه مايستاهلها مااقدر مااقدر أتحمل لا الخوان ولا الكذاب يمّه مااقدر
الجدة منيرة:عين العقل لاتقبل به ياعادل مير يومه جالس يم بتال انكعم عنه لأجل بتال لاتوجس شين الى منه يطس عن عينك
ابو غازي ضحك:يمّه هذا اخر علومك!!
الجدة منيرة كشرت وهي تمد عكازها عالباب:هذاك الباب ارعه مالي يمك وجس الى من تعمل مااريده
ابو غازي بعصبية:اجل استودعتك الله،،مشى،،
الجدة منيرة لتقلب وجهها
عذبة فزت وهي تجري وراه:عادل ياعادل ابو غازي تكفى اصبر
الجدة منيرة بغبنة وصوت عالي:كود تبعتيه ياعذبة لاتعودين اوحيتي
عذبة وقفت وهي تطالع ابو غازي اللي يبتعد والتفتت تطالع امها بحيرة بينهم
.
،،غرفة راشد،،
هيفاء متربعة عالسرير قباله وهي متوترة منه:علامك اوجس ماوراك روعتني!
راشد جالس قبالها عالسرير وبملامح جدية تنهد:والله مدري وش اقولك
هيفاء:ياابن الحلال اوجسه،،شهقت وبخوفها،،عمي به شي!!ولا عمتي صابتها شي!!
راشد:لا لا مافيهم الا العافية تطمني
هيفاء بنرفزة:اجل علامك اوجس يمي اعجل مغير روعت بي!!
راشد:ماهو انا مدري كيف اقول مستحي اقولها مدري كيف اطلبك
هيفاء:ياابن الحلال تم وأبشر مير اوجس
راشد ارتسمت ابتسامة:صدق!!
هيفاء:وانا ماارجع عن كلمتي من أغلى عندي منك ابشر عويناتي لك
راشد ضمها لحضنه:سلمت العيون وصاحبتهم سلموا لي الله يخليك لي ولايحرمني منك
هيفاء ابتسمت وهي بحضنه؛وش تريد اوجس
راشد تركها ويديه على اكتافها وبابتسامة:ابي عتقى
هيفاء قطبت جبينها:كيف تريدها؟!!
راشد:ابي اعطيها هدية
هيفاء تغير وجهها بصدمة
راشد حزت بخاطره وهو يطالعها:خلاص ماابيها خلاص
هيفاء بلعت ريقها:لا والله ان تاخذها
راشد تركها:لا لا ماتبيها باشوف لي ناقة تواجه غيرها
هيفاء:هي لك ولو تعيي عنها ذبحتها وحطيتها بالثلاجة بنفسي
راشد:يابنت خلاص ماابيها اقولك
هيفاء:والله ان تاخذها وهاذي تالية العلم قضينا
.
.........****..........
.
..بيت بادي..
،،العشّة الخارجية،،
الجد نشمي:بادي
الجد بادي زفر بضيقة:تراك عليتني يانشمي عليتني
الجد نشمي:طاوعني يارجل ماهو من كثر غدياته
الجد بادي:وانغث لاارعيته سنة يانشمي سنة!!
الجد نشمي:ياابن الحلال لأجل عين تكرم مدينة خاف الله توك ارعيته وخبرته تحرم روحك من وغيد جميلة نوبتن ثانية!!
الجد بادي كشر
الجد نشمي زفر:يابادي والله ثمن والله مالك يمه غدية ولاتلتقيه بدرب كود بالسنة نوبة ماتهون هالنوبة لخويطره؟
الجد بادي بحدة:انكعم يانشمي عني انكعم!!
الجد نشمي:يابادي
الجد بادي صرخ:نشمي!!
الجد نشمي:يرضي جميلة هاللي تعمله ذالحين يرضيها؟
الجد بادي بحدة:كبّ جميلة عنك يانشمي لااغتاظ منك صحيح
الجد نشمي زفر:لك الله يابتال لك الله ياوغيد جميلة لك الله
الجد بادي كشر بوجهه
الجد نشمي وقف
الجد بادي:وين غادين به؟
الجد نشمي:غادين يم بيتي لاتقشعني(تضربني)بهالمركوع وارني بوسط المشب،،مشى،،تصبح على خير
.
..بيت مناور..
شريفة ونوفة بفجعة وخوف مرتسم على وجيههم من اللي يسمعونه
ام غيث متربعة وهي مغطية فمها بيدها وتطالعها
غيثة واقفة قبالها شهقت وبصراخ:وشوووو!!تعقبين يالكذوب ماعديتي الصحيح!!
نايفة اتسعت عيونها وبصراخ نفسها:الا والله انتي اللي دفيتيها وحصل اللي حصل مير ماهو بنيتش يعدي هاللون
غيثة بحدة؛انكعمي ماظل غيرش يالمخبولة ايه راعي روحش وشلون غدا وجهش مير ايه اللي مايرقد بالأيام مردّه ينهبل وماناخذ منه لاحق ولاباطل
نايفة بقهر:اعقبي ياللي ماتخافين الله
مناور جالس يطالعهم قبالهم وقف وصرخ بحدة:انكعمن كل ابوكن انكعمن،،التفت لغيثة بنظراته الحارة ومسكها من يدها يسحبها بقوة له،،
غيثة انخطف وجهها وهي تبلع ريقها وبلعثمة:يييببه
مناور بحدته:صحيح اللي توجسه اختش؟
غيثة بدموعها:اكذاب يبه والله اكذاب
نايفة:وش ينفعني يوم اني اكذب عليش وانتي خيتي هاه!!
غيثة بدموعها:راعها يبه راع نايفة والله ان تخبر انها ماهي لنايفة اللي تخبرها
ام غيث ميلت فمها وهي تزفر بابتسامة سخرية من غيثة
غيثة:حتى انشد امي طول هالايام اللي مضت وحنا نراعيها لاتعمل شين بروحها
نايفة انقلب وجهها وهي تلتفت لامها
مناور التفت لام غيث وبحدته:اوجسي الصحيح ياصيفة
ام غيث زفرت وهي تنزل يدها:وثمن يامناور وثمن لاخبرت العلم!!كوده صحيح غدت يمك صريمة وكوده اكذاب غدت صريمتن تالية
نايفة طالعت ابوها وبدموعها:تكفى يبه تكفى لاتكذبني عليم الله ماتذوق عيني النوم من روعتي تكفى
مناور طالع غيثة بحدة ودفها:والله والله ياغيثة كود اوحيت طواري علوم بعلم شامة اني لااغدي بش بروحي يم المركز ،،طالع نايفة،،وانتي انكعمي عن اختش ولاتوجسين يمها شين ابدن،،مرر نظره عليهم ثم طالع ام غيث،،ياعيشة القرادة يوم رضيت واخذتش
ام غيث ميلت فمها وهي تتمنى يذوق ماتذوق منه
مناور مشى بيخرج والتفت لغيثة:لاتستانسين ياغيثة كود مااوجسته نايفة صحيح راعي غيث وش غدا به عقب سواياه ياعلكم للصريمة جميع،،خرج،،
.
..بيت بتال..
بتال وقف بسيارته عند بيته ونزل من السيارة وهو عاقد حواجبه من دخان مشبه زفر وهو يطالعه
الجد نشمي طول هالاسبوع يتردد على بتال اللي يكرمه مجاملة فقط بدون لاينطق له حرف جالس قبال المشب يجهز دلته ابتسم وهو يرفع عينه له:ارحب هـلا ياهلا
بتّال زفر وهو يوقف قباله:ماتعبت ياجد
الجد نشمي:كودك تعبت انا اتعب
بتال زفر وهو يميل فمه يطالعه
الجد نشمي:وثمن اقلط اقلط عالقهوة حياك
بتال زفر:أغير ملابسي واجيك،،دخل للبيت،،
الجد نشمي ابتسم وهو يطالعه بدا يلين معه عكس الايام اللي راحت
بتال رجع عنده بعد مابدل وجلس عن يمين جده وبينهم مسافة وعلى وجهه تكشيرة مو عاجبه الوضع
الجد نشمي مد له القهوة:سم
بتال مد يده اخذ الفنجال ونزله وهو يطالع جده:سلمت ياجد
الجد نشمي؛تقهوى ياولد
بتال مارد
الجد نشمي:وش مغيظك يمي
بتال سكت
الجد نشمي تقهوى ونزل فنجاله:صحيح فاهد اخطى يابتال لكن محدن مجبور يسامحه حتى لخاطرك
بتال عض طرف شفته السفلية وهو ينزل راسه
الجد نشمي:مير اني معك باللي قلته
بتال التفت له بسرعة
الجد نشمي:حتى ولو انه اخطى يظل حقك تشوفه ومرده يجي بأفراحك وحتى مصابك وثمن لاجا وش بيغدي بهم
بتال زفر:ياجد ادري اني غلطت لكن مابيسمعون لي الا بهالطريقة مافيه غيرها ياجد
الجد نشمي:ولك اللي يجيبهم عندك
بتال يطالعه وهو مميل فمه بتكذيب
الجد نشمي ارتفعت حواجبه:مكذبني ياولد!!!
بتال ابتسم:اخسي ياابو عادل اخسي أكذبك افا وانا ولد عادل
الجد نشمي ابتسم:اجل نتقهوى وبعدها أبيك توديني يم الضلع(الجبل)اللي عنده إرسال ابي اتصل على جدتك
بتال بنص عين وابتسامة:ذبحك الشوق ياجد ماتقدر عالصبر
الجد نشمي كشر:عيب ياولد وهذا وانت زعلان علي!!
بتال مافوت الفرصة:ياحظك ياجدة جدي مايقدر يصبر عنك
الجد نشمي بنرفزة:ولد!!
بتال ضحك:يالله ترزقني بحب مثل حبك ياجد
الجد نشمي:الله يرزقك ببنت الحلال بتوديني ولا؟
بتال بابتسامة:ابشر ياجد ابشر اوديك
الجد نشمي تنهد:مير قبلها جر يمي هجينية ياولد
بتال ابتسم:ابشر وش يقول بتال ياجده؟
الجد نشمي بابتسامة:يقول ياللي تهيجن على قلبين
بتال جر الهجينية:
يـالـلـي تـهـيـجـن عـلـى قـلـبـيـن..
مـع هـجـعـة الـنـاس بـسـكـاتِ..
بـحـرف واحـد ورا حـرفـيـن..
يـطـلـع ضـمـا ضـم وأفـواتـي..
وافـي ولـك عـزوتـن وافـيـن..
إفـعـولـهـم تـحـرق الـشـاتـي..
مـن حـاضـر الـقـوم والـمـاضـيـن..
مـن مـات لـه حـي مـا مـاتِ..
أقـولـهـا والـهـدف نـاريـن..
مـابـيـن حـاسـد وشـمـاتِ..
.
هليل وقف بالسيارة وسط صوت الأنفاس الثقيلة اللي كسرت هدوء المكان
غيث ضاغط على جرح رقبته اللي ينزف بتعب فظيع مرتسم اثره على وجهه وهو بالقوة يلقط انفاسه طالع هليل عن طرف عينه من تعبه وهو يادوب يلمحه وبهمس وهو باخر رمق قوة عنده:اغد بس يم المستشفى واكبك
هليل زفر بضحكة وهو يفتح الباب وينزل ويتركه مفتوح واتجه لمكان الراكب وهو يفتح الباب
غيث سند راْسه عالمقعدة بقلة حيله وهو يطالعه:هليل
هليل حط يده على كتفه وهو يسحبه بقوة
غيث طاح عالارض مافيه اَي حيل من كثر نزفه
هليل سحبه عالارض وسط انفاسه من ثقل غيث وهو مثبت عينه عالبركة اللي قدامه:هنيا ياغيث كبر راسك بالحيل فـوق كبره وتخطي الخطا وتراعي روحك مسموح ويحق لك،،ضحك،،وانا الفديغ(الغبي)اتوبعك احسب انك على حق!!
غيث تعالى صوت انفاسه وشهق باخر نفس له على هالدنيا معلن لهليل موته
هليل رجف صوته وسط محاجر عيونه الغرقانة بدموعه:مادريت انك يالنجس بأتجنى على خيتي الضعيفة اللي مااذت احد ابدن ليتك ذبحتني دونها ليتك،،وقف عند البركة وهو يسحب غيث ويجلسه ويتكي ظهر غيث على جدار البركة،،
غيث بدون اَي حركة وطبيعي وهو يعتبر جثة الان
هليل نفض يديه وهو يطالعه:لوم روحك ياغيث على صنايع يديك لومها،،عطاه ظهره وهو يبتعد وسط محاجر عيونه اللي امتلت دموع وانعصر قلبه وفاضت دموعه بحسرة على شامة وبخزي وكره وحسرة على صديق عمره اللي غدر به لكن ماندم ابدا على فعل يديه،،
.
.
<اللهم صل وسلم على نبينا محمد>