ياسمح المحيا جر الهجنية

الجزء الثالث

.........****..........
الـمـغـرب
.........****..........
بيت عادل
الكل جالسين بالصالة يتقهوون مع ابوهم ماعدا وسمية وبتال،،
ابو غازي متكي يتقهوى مد فنجاله لأمجاد اللي على يمينه وطالع غازي اللي على يساره لكن بينهم مسافة بسيطة:خلصت أمور العشا الليلة؟
امجاد صبت قهوة ورجعته له
غازي:ايه يبه كل شي جاهز وعلى ماتحب يبه ابي،،سكت شوي،،خلاص خلاص مرة ثانية
ابو غازي طالعه بشك:وش تبي تقول؟عندك شي أنطقه؟
غازي:يبه كل شي جاهز وجسّار بيضبطه على ماتحب
ابو غازي اعتدل بجلسته:وانت وينك؟
غازي:انا وعذاري بنسهر عند عمي
ابو غازي:اول شي صاحي انت توكل جسّار!!
رهايف وفيصل زموا شفايفهم وهم ينزلون نظرهم للأرض يكتمون ضحكتهم
جسّار كشر بوجهه:ليه يبه؟!!يعني ماني بكفو!!
ابو غازي:انت قلته!!
جسّار انجلط من قصف ابو وسط ابتسامات اخوانه اللي يكبحون الضحكة
ابو غازي بتكشيرة:نسيت سواتك انت وهالخبل بتالوه!!قم قم جب الخيزرانة للحين قلبي مابرد!!
جسّار:يبه كنا صغار و
ابو غازي:اعقب صغرت عيشتك اَي والله
امجاد:استغفر الله حرام يبه
ابو غازي زفر:اسكت اسكت لااعيد ذيك الليلة عليك انت وأخوك،،طالع غازي،،أنا مااستاثق بغيرك ثم عمك واهله معزومين عندنا ماله داعي تروحون
غازي:ادري يبه ادري لكن عذاري حاجزة شاليه تعرف عشان عمتي ووضـ
ابو غازي قاطعه:الشاليه كنسلوه الليلة وابشروا بالعوض من شاليه وعشا وكل شي لكن مو بالليلة
غازي تضايق:كثر خيرك يبه ورايتك بيضا لكن
ابو غازي قاطعه بحدة:خلاص ياغازي خلاص
غازي سكت وهو متورط ثم قال:ان شاء الله يبه ان شاء الله
رهايف نطقت تبي تكسر الجو:يبه ابي اروح لبيت عمي مسفر
ابو غازي:وشو له؟
رهايف:ابي اقول لشذى سالفة
ابو غازي:شوي بتجي وتشبعين سوالف
رهايف بترجي:يبه الله يخليك ابيها ضروري
ابو غازي طالعها بحدة:رهايف!!
امجاد:يبه انا بعد ابي اروح لبيت عمي مسفر موصية سهام على شغلة وبكملها عندها
ابو غازي سكت كل شي عنده الا امجاد تنهد:فيصل
فيصل:سم يبه
ابو غازي:رح مع خواتك
رهايف شقت وجهها البسمة وفزت من مكانها تجيب عبايتها
فيصل بحلطمته:يبه بيت عمي قريب ماله داعي اروح معهن!
ابو غازي:وشو ماسمعتك
فيصل وقف بسرعة:طيب طيب،،صرخ،،امجاد رهايف بسرعة ولا تركتكم!!
ابو غازي رفع صوته بنبرة حادة:فصيل!!بالهون على خيّاتك بالهون!!
فيصل وهو خارج:ان شاء الله يبه،،وقف على مدخل المطبخ والصالة بنفس الوقت وصرخ،،يالله!!،،مشى،،
ابو غازي طالع غازي وجسّار:وينه بتال وين ذالف؟
غازي:بالبيت يبه ماراح لمكان
جسّار:بعد ماخلصنا تنظيف قال ان جسمه يوجعه ويبي ينام
ابو غازي توسعت عيونه:للحين ماصحى!!،،بعصبية،،والصلاة وينها؟!!حمار هو حمار ياكل ويخمد لاشغلة ولامشغلة!!
جسّار:والله يبه كثر الله خيره بعد اللي جاه نظف معنا!!زين يقدر يتحرك
ابو غازي مد رجله ودف جسّار بطرف رجله:اذلف لبيت الشعر بس
جسّار:يبه والله اني صادق كفخته الين قال امين ونظف معنا وهو يون(يئن)كل مادنق(انحنى)تقل شايب
ابو غازي بتهديد:ورا ماتذلف الحين؟
جسّار وقف ومشى:رايح رايح
ابو غازي:جسّار
جسّار التفت عليه:سم يبه
ابو غازي:خذ راشد معك وزهبوا القهوة وبخروا البيت سمعت
جسّار:حاضر على امرك،،مشى،،
غازي وقف:استأذنك يبه
ابو غازي:الله معك لكن مثل ماعلمتك اقطع سالفة الشاليه الليلة
غازي:ان شاء الله تامر يبه تامر،،مشى متجه لغرفته وهو شايل هم مو هم زعل عذاري لا ابدا شايل هم ردة فعل ابوه اذا درا،،
ابو غازي بعد ماتأكد انه صرف الكل وقف واتجه له
..غرفة بتال وجسّار..
ام غازي واقفة ع طرف السرير:ها يمه كيفك الحين؟
بتال جالس على سريره توه صحى ابتسم وهو يطالعها:بخير جعلك دوم بخير ياخزينة الخير
ام غازي ضحكت:قم قم ابوك يتقهوى تحت اكيد سفّل فيهم واحد واحد قم ابي ألحق عليهم
بتال قام بسرعة ووقف قبالها وحنى نفسه يحضن امه:لا لا يمه خليني ماشبعت منك للحين كله مناشبيني فيك
ام غازي بضحكة:اترك الدلع عنك متى بتعقل؟ثم يناشبوني فيك لانهم اخوانك لهم حق يناشبونك
بتال ترك امه وبزعل:شكل كلام جسّار صدق يومه يقول لقيناك عند باب المسجد!!
ام غازي وقفت على أطراف أصابع رجولها حتى توصل لاذنه ووصلت ومسكته من اذنه وشدته بقوة
بتال:اه اه أذني يمه ابيها ابيها
ام غازي:يامعايرتك انت وجسّار بالله اذا انت مو ولدي اجل ولد مين!
بتال:العلة جساروه يمه غثيث للحين منغث من كذبته وحنا صغار!!
ام غازي تركته وضحكت:تستاهل يعني ماتشوف سواياه بفيصل؟
بتال بحلطمة:ادري يمه انه قايل له لقيناه عند الزبالة وللحين فيصل يعاني لكن حتى انا يمه،،وهو يحط يديه على صدره وبدلع على امه،،للحين مو قادر اطلع من معاناتي اثار الكذبة بقلبي كل يوم أعاني!!
ام غازي ابتسمت وهي فاهمة حركاته:وش تبي طيب؟وش اللي يطيب خاطرك؟
بتال شقت وجهه ابتسامته:ابي تحضنيني
ام غازي سحبته لحضنها:وهذا الحضن
بتال حضنها بابتسامته:وتدعين لي
ام غازي:كل يوم ادعي لك انت وإخوانك
بتال تركها وبزعل:لا يمه ابيك تخصصين لي دعوة لحالي ماابيهم معي حتى بالدعوات مناشبيني!!
ام غازي توسعت عيونها:بتال!!
بتال:ايه وأبيك تحضنيني قدامهم وتدفين جساروه ذَا الغثا بعيد عنا،،ابتسم،،ابي اقهرهم كلهم
ام غازي:ماحولك عقل الظاهر تتهاوش مع اخوانك علي!!
بتال سحب يدها وباسها وبابتسامته:ايه انتي الرضا والحياة كلها
ام غازي سحبت يدها:يمه منك ومن لسانك ماينقدر عليك!!
بتال حضنها:الله يخليك لي يمه
ام غازي:خلاص بأسوي اللي تبيه بس ها من الحين اقولك مرة وحدة بس
بتال تركها وبزعل:ليش يمه ليش؟
ام غازي:يوووه يابتال ريح راسي بس
بتال جلس ع طرف السرير وحط يده ع صدره:ااه يمه يوجعني بالحيل ابوي اهلكني
ام غازي ضحكت وهي تمشي بتخرج من الغرفة:بتال اعقل يابتال!!
بتال وقف واتجه للدولاب وهو يحوس بملابسه وبزعل:طيب يمه طيب شكله جسّار صادق يوم قال لقيتوني عند باب المسجد!!
ام غازي وقفت عند الباب:لااله الا الله!!عنّي انك طيب مافيك شي تبي شي انا تحت،،خرجت،،
بتال توسعت عيونه:هين ياجسار هين لابس فنيلتي!!هين،،اتجه الحمام ودخل يتروش،،
ام غازي متجهة للدرج بتنزل وقفت وهي تشوفه
ابو غازي واقف على بداية الدرج
ام غازي زفرت ومشت له:سم ياعادل وش فيك تارك القهوة وجاي؟،،شهقت،،يمه عيالي!!وش سويت بهم ياعادل!!
ابو غازي كشر بوجهه:وسمية!!تراني ابوهم!!ماني بذابحهم!!
ام غازي:ابد بس تبي تذوقهم اللي ذاقه بتال صح؟
ابو غازي احتدت نظرته:اقصري الشر ياوسمية!!
ام غازي زفرت وهي تستغفر ثم قالت:وش فيك طالع فوق العادة هالوقت متجه لبيت الشعر تجلد اللي فيه
ابو غازي كشر من كلمتها:وش تشوفيني؟!سوط متحرك!!
ام غازي بنفسها(الحمدلله انك داري)
ابو غازي:قولي اللي بخاطرك لاتطالعيني وانتي ساكتة!!
ام غازي تنهدت:وش تبي؟أساعدك بشي؟
ابو غازي رغم جلافته لكن يظل اب يخاف على عياله سأل وهو يحس بإحراج:وشلونه؟
ام غازي ابتسمت لثواني ثم تنهدت وهي تشيل ابتسامتها:ااه ياعادل منك ااه متى بترحم هالمسكين!!لايغرك طوله وعرضه!!لاتحسبه جدار مايحس ترا ورا هالجسم قليبن رهيّف ياعادل
ابو غازي من الأساس يحس بذنب بس يكابر وبنبرة واضح فيها التردد:بالحيل موجوع؟!
ام غازي هزت راسها بايه:هذاني رايحة اجيب له كمادات
ابو غازي باستعجال وعصبية:عجلي عليه وشو له مرتزة قدامي تناقريني وهو يتوجع!!اعجلي بس واتركي القرقرة الزايدة عنك،،مشى،،
ام غازي توسعت عيونها منه وطالعته وهو يسرع بخطواته متجه له
ابو غازي دخل الغرفة وماشافه عالسرير لكن سمع صوت الدش واتجه للحمام ووقف وهو يحاول يسمعه
بتال يتروش مسك جنبه توجع:اااه
ابو غازي عقد حواجبه برا وهو يسمع صوته
بتال عقد حواجبه وهو يفكر:اااه
ابو غازي توتر وشال همه وهو يسمعه يتوجع تكدر خاطره ولا وده يدق يشوفه يعرف حركات بتال البايخة بعينه
بتال غنى بابتسامة لسميرة:اااه يالا للي..واااه يالا لي..عاللي تغرب بعيد..ولا قال لي
ابو غازي غمض عيونه وعض شفته السفلية منجلط من بتال
بتال منسجم بأغنيته:اللي غايب عن عيني..امتى ياناس يجيني..بحنانه يدفيني
ابو غازي توسعت عيونه من اللي يسمع
بتال:ويشوف ماحصل لي،،صرخ بانسجام تام،،وااااه
ابو غازي فز
بتال:ااااه يالا للي
ابو غازي قاطعه وهو يدق الباب بقوة
بتال فز:جساروه!!وجعوه ان شاء الله!!
ابو غازي:اطلع اطلع!!
بتال انصدم:طيب يبه طيب
ابو غازي استمر يدق بسرعة:اطلع اطلع بسرعة اطلع
بتال مانشف نفسه حتى لبس ملابسه وهو مبلول والمنشفة على راْسه خرج:سم يبه
ابو غازي ضربه على قفاه بكل قوته
بتال:اااه يبه وش سويت!!
ابو غازي بحدة:تسأل وش مسوي؟!!
بتال بلع ريقه وتغير وجهه أيقن بموته:دريت يبه؟!لحظة بس افهمك
ابو غازي:وش تفهمني هاه ااه واغبنتي غبناه منخمد ومافيك الا العافية!!
بتال زفر براحة:الحمدلله
ابو غازي:ايه ايه الحمدلله على نعمه ماقلنا شي،،كشر بوجهه وبعصبيته االمعتادة،،والحمدلله على قضاءه وقدره بعد!!
بتال وهو يرجع بخطواته مبتعد عن ابوه:يبه والله كنت تعبان
ابو غازي واقف بمكانه ويأشر له بيده:تعال تعال
بتال لف وعطاه ظهره وهو بيجري
ابو غازي صرخ بحدة:بتاال
بتال وقف والتفت عليه
ابو غازي بتهديد:تاخذ المقسوم وانت قدامي ارحم من مطارد ومقسومن يوجع
..غرفة غازي وعذاري..
عذاري جالسة عالسجادة اللي عالارض ملاصقة لللسرير وهي تطبق الملابس طالعته لثواني وهي تستوعب كلامه ثم رجعت تطالع الملابس وهي تطبقها
غازي زفر وانحنى شبه جالس:عطيني داخلية؟
عذاري سحبت من ملابسه الداخلية اللي مطبقتها قدامها ومدتها له بدون لاتطالعه
غازي سحب الملابس
عذاري اخذت نفس وزفرته بهدوء وهي تمد يده تسحب بلوزة تطبقها
غازي مد يده ومسك يدها
عذاري ناظرته وهي مقطبة جبينها
غازي:اتركي البلوزة وافتحي يدك
عذاري رمشت مو فاهمة
غازي:افتحيها
عذاري فتحتها
غازي دخل يده بجيب بنطلونه وخرج شي يخفيه عنها ثم حطه بيدها وترك يدها وبابتسامته:تفضلي
عذاري ناظرت البسكوت اللي حطه بيدها
غازي:البنات طلبوني أغراض وذكرت وش كثر تحبينه وجبته لك
عذاري ابتسمت:مشكور ياغازي ماتقصر
غازي:لاتزعلين عذاري المرة الجاية ان شاء الله وعد يصير مثل ماتبين لاتزعلين خلاص
عذاري:مازعلت ياغازي مازعلت انا اللي تسرعت وأدري ان هاليوم هو المعتاد للجمعة
غازي وده يطيب خاطرها لكن ماعرف واكتفى:تتعوض ان شاء الله لاتخافين تتعوض،،وقف،،تبين شي؟
عذاري:سلامتك
غازي دخل للحمام يتروش
عذاري وقفت وهي تحبس دموعها فتحت الشباك وطلعت يدها وسحبت صحن صغير وفتحت كيس البسكوت وخرجته ثم خرجت يديها وهي تفتت البسكوت بالصحن للعصافير بلعت غصتها وهي تهمس لنفسها:وش توقعتي ياعذاري!!وش بيجيب لك يعني هذا هو غازي مايتغير!!
.........****..........
بيت بادي
الكل جالسين بوسط الحوش حول القهوة ماعدا عباير
الجد بادي كالعادة محتضن الراديو حقه ويلف فيه يدور اخبار
سعود يلعب مع حلايا ويضحكها تنهد بحب وهو يطالعها رفع عينه لبخوت اللي جالسة قباله تتقهوى:وينها فيه المربوشة؟
بخوت:بالغرفة
سعود توسعت عيونه:الله!!!عباير بغرفتها!!!،،ميل فمه بتفكير ثم اشر بخفى على جده،،مزعلها؟
بخوت:مافيه شي جديد ملاسن مثل دايم لكن راحت ورِدِت وعودت وهي نفسها شينة
سعود:حلايا
حلايا طالعته
سعود بابتسامة:طيري للددسن وانا اخوش تلقين شي يسرش جيبيه
حلايا تشققت من الوناسة وطارت جري للددسن
سعود طالع بخوت:روحي لها وقولي لها ترا سعود جاب لش ورق شجر يحبه قلبش
الجد بادي كشر بوجهه وهو ينزل الراديو:الله يديمها نعمة!!وش جايب انت تبي تروحِنا(شي معفن)!!
بخوت وقفت وراحت لها
سعود:استغفر الله ياجدي حرام نعمة
الجد بادي:الحمدلله ماقلت شي لكن ذَا عفنة حتى البهم(صغار الغنم)نرحمه مانحطه لهم
سعود سكت وهو يستغفر ويتحمّد عالنعمة وهو عارف جده وعناده
حلايا راجعة بوناسة
سعود ابتسم:لقيتي غرضانش(أغراضك)؟
حلايا مدت له صحن ورق العنب ثم باست راْسه وناظرت بوسط كيس معها مليان حلاويات:مشكور يااخوي يااحلى اخو،،تربعت عالحلاويات،،
بخوت رجعت:لااله الا الله!!وش ذَا؟!!تبي تمرضها؟!
سعود:وينها عباير مااشوفها معش؟
بخوت وهي تجلس:عيّت تقول مالها نفس
سعود وقف وراح لغرفتها ودخل
عباير:بـ،،سكتت وهي تشوفه ووقفت بسرعة وسلمت على راسه،،
سعود:أفا من العصر ولاطلعتي تسلمين تشوفين خيّش(اخوك)؟
عباير:سلمت يانظر عيني لكن تعبانة
سعود:اخص علي تتوجعين ولاادري جعله بي امشي اوديش المستوصف
عباير:وش مستوصفه الحين سكّروا بالليل حنا
سعود:اوديش المستشفى الكبير؟
عباير:والله ياسعود مابي شي بس خاطري متكدر شوي!!
سعود حط يده على كتفها وضمها لحضنه:وش مكدر خاطر غلاي؟
عباير:لا بس تعرف اني ام نفيسة(تقصد نفسية)
سعود ضحك:والله لو احد منّا قايلها لش ذبحتيه بمكانه
عباير دفته وبزعل:ايه اجل تبون اسكت لكم لا والله اخر سلومكم!!
سعود بابتسامة:امشي معي تقهوي وتطعّمي ورق الشجر مع إبريق الشاهي اللي مزينه لش الشيخ سعود
عباير طالعته وهي ودها تقول لا بس بعد كلامه ماتقدر
سعود باسها على جبينها وهو يشوف حيرتها وحط يده على كتفها ومشى وهي معه لجلستهم
.........****..........
بيت مسفر
جواد راجع من صلاة العشا وقف وهو يسمع سوالف البنات اللي اصواتهم عالية وجالسين بالصالة المفتوحة عالدرج والمدخل
رهايف بوسط ضحكتها:اقولك أبوي شغّال قصف أرضًا جوًا بحرًا
شذى وهي تضحك:طول عمره عمي خفيف دم
رهايف:والله لو مرة بس تذوقين هه شي صغير من خفة دمه مااسمع هالمزحة السامجة
امجاد:رهايفوه عيب عليك استحي على وجهك هذا وانا فازعة لك
جواد عض شفته بقهر وبنفسه:ليتك مافزعتي!!
رهايف:امحق فزعة!!
امجاد توسعت عيونها:اهب يالجاحدة!!
سهام:بالله عليك وش توقعتي يعني؟تشكرك مثلا!!هذولا الثنتين اكبر جحادات على وجه الكرة الأرضية
شذى شهقت:الله لايسامح عدوك اَي والله
رهايف:اَي والله فزعاتك عشان بيت عمي ماابيها افزع لي بتمشية تذكرة سفر يالله لاتزعلين عشا من هنقر ستيشن ماابي مطعم هاذي الفزعات الزينة غيرها ماابي
امجاد بتكشيرة وهي تلف طرحتها:ام بطين انتي اَي والله!!
رهايف:وش دخلني كله من هالمفاجيع اخوانك عودوني!!
امجاد:ابلعي ابلعي لاتقصرين لكن لاشفتي الميزان لاتصجين راسي!!يالله ولا بامشي وأتركك
رهايف وهي تلف طرحتها:انتظري فيصل يرجع من الصلاة ولا تبينه يستقبل الضيوف بخشة مفلوقة!
امجاد:ننتظره عالباب اجهزي بس،،مشت،،
رهايف لبست نقابها ومشت وراها
جواد تنحنح
شذى فزت من الكنبة ولحقتهم
امجاد نزلت عينها ومرت من جنبه بسرعة ورهايف وراها
جواد وهو متجه للدرج:الحمدلله تذكروا عندهم بيت!!
شذى توسعت عيونها من كلامه
امجاد عضت شفتها من كلامه
رهايف لفت وطالعته وبحدة:عندنا بيت الله يغنينا عنك ولاصار ذَا بيتك تعال واطردنا!!
جواد توسعت عيونه والتفت عليها
امجاد لفت عليها ومسكتها من يدها وهي تهمس لها:امشي مانبي مشاكل امشي
جواد:وشو عيدي!!
رهايف سحبت يدها من امجاد:اللي سمعته!!
جواد:انطمي لااسمع صوتك ويالله من غير مطرود يالله!!
سهام وقفت تطالع اللي يصير بصدمة
شذى صرخت:جواد!!
رهايف تربعت عالارض قباله وبعناد وتكتفت:ماهو ببيتك وطلعة مو بطالعة!!
امجاد انحنت شبه جالسة جنبها:رهايف الله يخليك مشينا مانبي مشاكل اخسري كلامه
رهايف طنشت امجاد وكملت:سكت عنك وعن حركاتك كثير حاشمة عمي وعمتي والبنات لكن انت مو وجه حشيمة!!وتخسى تطردني ذَا بيت عمي!!ولاني بطالعة لحد مايجي عمي ونشوف من اللي بيطلع ياحمار تخسى تكون جواد!!
جواد جرى لها بسرعة مثل المجنون وبصراخ:جعل لسانك القطع تخسّيني انتي تخسّيني!!وربي لاذبحك الليلة ياقليلة الحيا!!
سهام تطالع مكانها بخوف ماتحركت
شذى مسكته
جواد دفها بقوة عنه ووقف قبال رهايف ورفع رجله بيشوتها
امجاد حضنت رهايف وهي معطية جواد ظهرها
جواد ضرب امجاد برجله بكل قوته
امجاد ارتمت عالارض قدامهم من ضربته بدون حركة وسط صدمة الكل
.....