ياسمح المحيا جر الهجنية

جزء الثالث والعشرون

لاإله إلا الله عدد ماذكره الذاكرون وعدد ماغفل عن ذكره الغافلون
.
..بيت بتال..
بتال جالس بالحوش لحاله بعد ماتعاند هو وراشد على شغلة بالبيت وخرج راشد وتركه يتقهوى وهو يحس بتأنيب ضمير عالحركة بس ماعليه اهم شي يسوي اللي براسه دق الباب استغرب كشّر بوجهه وهو ممكن يكون احد من أهل الديرة وقف وهو يزفر واتجه للباب وبنفسه:وش بيصير مثلا..طيب طيب جاي،،فتح الباب وطالعه لثواني يستوعب وجوده،،
جسّار بابتسامة:بتيل!!
بتال قفل الباب بوجهه بدون اي لحظة تردد
جسّار توسعت عيونه ورجع يدق الباب:بتال تكفى افتح لي ارحمني ارحم اخوك المسكين ماهذا الجور والعدوان؟!ارحم امرؤٍ هام على وجهه في هذه البران(البر،الصحرا)
بتال فتح الباب وبي نص وجهه واضح من ورا الباب:وش جايبك؟
جسّار بترجي:تكفى بتال افتح لي لاتصير نذل
بتال:حلو حلو!!نذل خلك برا الحين تعلم وشلون تكلم عمك،،بيقفل الباب،،
جسّار حط رجله عالباب حتى مايتقفل:اخو غازي
بتال ارتفع حاجبه وبتهديد:شيل شيل(يقصد يبعد رجله)
جسّار يمدحه:كريم شجاع زعيم ذعار ماتخاف لو كثرت علينا الحشودة
بتال تنحنح وهو يرخي شدته للباب ويرفع خشمه بغرور ويفتحه شوي وبان وجهه كله
جسّار صرخ:أسد!! بتال فز:بِسْم الله
جسّار:أسد تخوف جميع الأسودة فتين متين بطل
بتال قاطعه وهو متكي براسه عالباب:ليش جاي؟
جسّار بابتسامة وهو يلصق وجهه بالباب ويطالعه:خلني ادخل وأقولك
بتال وهو يبعد راْسه عن الباب وبيقل الباب:مدام هذا كلامك فمان الله
جسّار باستعجال:طلبتك ياولد فاهد ودم عادل
بتال مايرد احد يقوله هالكلمة لو كان عدوه ترك الباب ورجع داخل البيت يتربع بمكانه وتكى يتقهوى
جسّار دخل وهو يقفل الباب بطرف رجله متشقق من الوناسة ثم اخفى حماسه وابتسامته وهو يتصنع الزعل:ايه ايه هاذي نهاية الأخوة بدل ماتلمني بالاحضان
بتال نزل فنجاله ورفع عينه له:وش فيك انت والثور الثاني؟
جسّار عقد حواجبه
بتال:فيكم جفاف!!اذلفوا وتزوجوا وفكوني!!الله!!!
جسّار جلس جنبه وهو يطالعه بتركيز:وش فيك معصب؟
بتال مارد عليه
جسّار:من هو اللي تبيه يتزوج ويفكك؟!!
بتال:جسير ترا توك وصلت ارحمني من الصداع اللي يجي من وراك لاأشوتك
جسّار توسعت عيونه ثم ميل فمه بابتسامة خفيفة ع جنب:لا لا لاتقول راشد زعل منك!!
بتال صدّ بوجهه وهو يتحاشى يطالعه
جسّار اتسعت ابتسامة ويدقه بطرف كوعه وبنظرات جانبية وسط ميلت راسه:يارجل ياتأنيب مؤنب انت!!وش قايل له عشان اشوف هالزعل بوجهك المليح
بتال التفت له:ورا ماتذلف عني لاأشوتك ترا الباب ماتسكر للحين
جسّار حط يديه عالارض وهو يرفع نفسه وهو جالس مبتعد عن بتال بمسافة بسيطة وبغثاثته المعتادة:ياويل حالك ياجسار وينك ياوسمية تشوفين وليدك المسكين وش صاير له،،حط يده ع صدره،،اااه
بتال مد رجله وشات جسّار من جنبه وسدحه عالارض:اعوذ بالله منك يالغثيث ماتنبلع ابد عجزت
ابلعك!!هذا وانت توك واصل!!وش بيصير لي وانت بتنثبر عندي!!
جسّار وهو متمدد عالارض مكشّر بوجهه:اذكر الله!!،،اعتدل بسدحته ع جنب وهو يطالع بتال زين ويتكي بيده عالارض وراسه فوق يده يرفعه شوي وبابتسامة،،اشتقت لك ياصاحب الشامة
بتال كشّر وبتهديد:وربي ان تمردغ ومحد يفكك!!
جسّار تنهد وهو ينرفز بتال زيادة:مردغني!!مردغني واترك بي علامة!!
بتال فز وهو يتوعد:ابشر ابشر
جسّار سحب التكاية وهو يحطها قدّامه يدافع عن نفسه بوسط ضحكه وهو يترجى بتال:خلاص خلاص والله ماأعيدها
بتال سحب التكاية ورماها وهو يجلس فوقه:والله لاأربيك ياولد عادل والله
...........****.......... الليل
...........****..........
..بيت ابو فارس..
>
عباير قافلين عليها الباب بغرفة بنات ام طلق بعد اللي صار
>
ام طلق فتحت الباب ومعها ام غيث
عباير حاطة شنطتها مخدة لها ومتغطية بعبايتها وبسابع نومة
ام طلق لأول مرة تتغير نظرتها لعباير بعد ماقالت لها بنتها اللي صار كله ومستحيل بنتها تكذب ابتسمت وهي تشوف عدم اهتمامها كالعادة
ام غيث اتسعت عيونها وهي تغلي صرخت:وجعلش ماتقومين ياعباير جعلها نومة القبر قومي
عباير صحت من فتحت الباب لكن تتظاهر بالنومة جلست ببرود وهي تتمغط(تمدد يديها)وتطق رقبتها بعدم اهتمام لام غيث
ام غيث بغبنة من بين اسنانها:عبااااير!!
عباير طالعتها:هذا انتي؟والله اني ظنيتش جاثوم
ام طلق كتمت ضحكتها
ام غيث بغبنتها:ياعلّش بجاثومن يبرك(يجلس)عليش!!
عباير رفعت يديها:اامين،،طالعتها بنص عين،،بس عقب مايفطسون(يموتون)الظالمين
ام غيث وهي ودها تذبحها وبنبرة عالية:قومي يم الحريم لاقام حظش قومي!! عباير تغيرت نظرتها وقفت:الحشيمة مو لش الحشيمة للي ربوني ولاأنا أعرف ارد عليش ولساني يلوط أذاني(لسانها طويل)،،ضربت كتفها بكتف ام غيث وهي تمر من جنبها خارجة تتبختر بمشيتها،،
ام غيث خرجت
ام طلق وراها
عباير وقفت وهي تكشر بوجهها وتشوف المنظر
،،كبار الحريم جالسات صف بطول جدار البيت وباقي الحريم عن يسار ويمين هالصف ملتزمات الصمت وقبالهن غيثة المنهارة ونايفة محتضنتها تبكي وثريا جالسة وبحضنها هيفا تبكي بعد وبخوت تطالع نظراتهم الهجومية بصمت وكلها خوف وهي حاضنة حلايا وتغطي عيونها لاتشوف هالنظرات وحلايا كل شوي تدف يديها تطالع اللي يصير باستغراب،،
عباير قطبت جبينها وهي تفهم الموقف مشت لعندهم ورجعت شعرها لورا باستفزاز لهم وتكتفت:ياماشاء الله ياماشاء الله وش هالعيون اللي تراعيني تقل درابيل(منظار)حرب!!
ثريا طالعتها بوسط قلبها المحروق وعيونها الحمرا من البكا على هيفا وقفت ومشت لها ووقفت قبالها وضربتها كف على وجهها بكل قوتها
عباير توجعت وتلون خدها من الكف بلعت غصتها وتقطع قلبها المجروح من هالديرة زيادة ابتسمت وهي تلتفت لثريا تطالعها
غيثة ونايفة ارتسمت ابتسامات خفيفة على وجيههم واختفت بسرعة
هيفا تطالعهم بدموعها ثم طالعت ثريا وزادت دموعها اكثر
بخوت وقفت بينهم ودفت ثريا بقوة عن عباير بوسط صراخها وقهرها:علامش انتي علامش!!طرشا(ماتسمع)طرشا ماتوحين!!اقولش اختي امنعت بنتش من الظليمة أتجنين(تضرب)عليها علامش!!مهبولة!!
عباير رفعت يدها لبخوت بمعنى اسكتي
ثريا برجفة صوت تخفيها:لاتقربين بنتي ولايلامس طريقش طريقها
عباير ميلت راسها بموافقة:ابشري على امرش ياخالة
ثريا تركتها ورجعت لهيفا وهي تحاول تلبسها طرحتها بتمشي
ام غيث:راعن راعن قواتهن!!مااردى من ذي الا اختها!!يتجبرن يتسلطن وياطول يديهن والسنتهن مامن حيا ولا مستحى!!والحين من غلّهن(قهرهم)يبن يشبّن ببنياتي!!أوجسوا لي يااهل ام جلاجل وش الدبرة؟وش الحل؟شوروا علي الله لايوليكم ظالم(لايصير والي)
عباير بحدة وهي تحط كفوف يديها فوق بعض:بنتش مااحرقتها وهاذي الاولة ثم انا مغير روعتها(خوفتها)حتى تحرص على ملافظها اللي انتي ماحرصتي عليها ياأم نوفة!!
ام غيث:هاااا!!راعيتن راعيتن والله ثم والله لو ان اميمتهن حية ان مايوجسن هرجة لكن هالمقوية عجزت(ماقدرت)عنها اميمتها وهي حية عاد راعوا وش غدت واميمتها تحت التراب
عباير سكتت لان هالكلام صحيح بسالفة صارت قبل
بخوت بحدة:عاد حدش ياأم غيث امي مربيتنا احسن تربية واحشمي لسانش عن طريا الوالدين وكلنا نواجه بالوالدين مثلش لكن اللي ربتنا امنعتنا ثم عباير صادقة بناتش ياأم غيث قليلات تربية ماعرفتي لهن
ام غيث انصدمت من بخوت
بخوت:وكود مافطنتي لهن(انتبهتي)نوعيّش ونعلمش ونربيهن لش وتحمدي ربش إن يتشفع لش صحبة نوير(امهم)ولا كان جزيت(قصيت)لسانش قدامهم!!
ام غيث مشت لها وهي ترفع يدها بتضربها:تعقبين ياقليلة التربية
بخوت مسكت يدها:ربّي بناتش قبل بنات الناس،،دفت يدها بقوة ثم مررت عيونها عالجالسين،،عباير صادقة ووقفت مع الحق وماعملت شي شين ابد،،مدت يدها على هيفا،،صاحبة الشان بينكم هاذي هي انشدوها
ام غيث وهي تحترق:كود إن صاحبة الشان كذبتش وش قولش؟
بخوت:مابغيتي
ام غيث ميلت فمها بابتسامة:الفحمة على جبينش؟
عباير اتسعت عيونها وتقدمت خطوة بتتكلم
بخوت مسكتها بيدها ترجعها وراها وعينها بعين ام غيث وبتحدي:تم ياأم غيث
،،اتجهت الأنظار لهيفا،،
هيفا ماسكة طرف عباية ثريا مغطية أسفل وجهها وعيونها بس اللي واضحة تطالعهم وهي كلها خوف ورجفة
ام غيث مشت لهم وانحنت وجهها بوجه هيفا
هيفا رجعت لورا من قرب ام غيث ثم صدت وهي تدفن وجهها بثريا
ام غيث وهي تجبر نفسها عالابتسامة:هيفا يابنيتي،،اشرت على عباير،،هالمبلوسة عملت بك شي؟
هيفا ماردت للحين دافنة نفسها
ام غيث:كود عملت بك شي ابشري برضاش واللي يجبر خاطرش راعيها يابنيتي راعيها
هيفا وهي تحرك راسها بهدوء وسط خوفها حتى تشوف عباير
ام غيث ابتسمت ومدت يدها لعباير:هالشينة عملت بش شي أوجسيه ولاتخافين من شين ابد اوجسيه ياعيني
هيفا طالعتها للحظة وسط عيون غرقانة دموع ثم انفجرت تبكي وهي تصد عنهم وتدفن نفسها بثريا
ثريا بقهر وهي تطالع عباير:حسبي عليش من بنت كود هوّلتي(أقصى درجات الخوف)بهالضعيفة ماخفتي ربش بهاليتيمة اهبي عليش من الله الصرايم يابنت متعب اهبي!!
ام غيث وقفت وعلى وجهها ابتسامة عريضة وهي تطالع بخوت وعباير
عباير تطالعها بتكشيرة
بخوت تقدمت بخطواتها لهيفا وانحنت شبه جالسة وبهدوء:هيفا ياعيني راعيها زين!!هاذي هي اللي اوجست لش شي؟تكفين ياهيفا راعيها تكفين؟!
هيفا زاد بكاها بحضن ثريا وهي تضمها اكثر
ثريا دفت بخوت بقوة
حلايا انفجرت تبكي بصوت عالي
بخوت جلست من دفتها
ثريا بحدة:اهبن هاذي اختها غادية تكمل الناقص!!
ام غيث بابتسامة وثقة:حتى محدن يقول اني ظلوم وتبليت عليهن(اتهمتها ظلم)راعيتوا واوحيتوا اللي اوجسته البنية!!ماخافن ربهن بها،،طالعت بخوت بحدة،،وغادية يمّها ناصية(قاصدة)تهولها فوق التهول اللي غدا بها!!
بخوت وقفت وبحدة وهي تمرر نظرها بين غيثة ونايفة:الظالم مرده يذوق ظليمته لو انه غدا ملك الملوك
ام غيث ضربتها كف بكل قوتها
بخوت اللي تتظاهر من البداية بالقوة وتتحداها بكل قواة عين فضحتها دموعها اللي انسابت بغزارة ولاقدرت تمسكها اكثر وهي تطالع ام غيث بصمت
عباير اتسعت عيونها وصحت من هدوءها
ام غيث بحدة:تعقبين مالظالم الا انتي واختش!!تجبرتن قبل خمس سنين وتحسبنّا بنسكت لشن هالمرة!!لا وميـ
عباير قاطعتها بكف على وجهها وسط صدمة الكل ومن بين اسنانها وبحقد:قبل خمس سنين انتي وولدش الظالمين والحين بعد خمس سنين انتي وبناتش الظالمات مير هالمسكينة ماتقدر تهرج ولقيتها فرصتن لش إتجبرين علينا وتقطعين السالفة الاولية بالتالية مير تعقبين ثم تعقبين ياصيفة
ام غيث ضربتها بكل قوة على وجهها:كود ماتربيتن يالرديات انا اربيشن،،رفعت يدها مرة ثانية بتضربها،،
عباير مسكت يدها وبابتسامة:خليتش تضربيني كود يبرد قليبش عالمقسوم اللي من شوي مير تعقبين تعيدينها،،دفت يدها،،وامي ربتني احسن من تربيتش لبناتش،،بابتسامة شر،،ولا تبيني اذكرش قدامهم باللي مضى
ام غيث تغير وجهها وهي فاهمة وش تقصد زين وبحدة:البنت توجس انه انتي ياعباير،،طالعت بخوت بابتسامة،،وش جرى عالشرط يابخوت؟
عباير:تم مير انه ماهي بخوت اللي اوجسته أنا اللي اوجسته والشرط يجري علي ماهو بعليها
بخوت بطيف دموعها:لا ياعباير لا مـ
عباير رفعت صوتها بحدة تقاطع بخوت وهي تطالع ام غيث:اعملي بي اللي تريدين وماهر بجمرتن وحدة اللي يطري على هواش!!
ام غيث ابتسمت وعينها على عباير:بنت ياهدية
هدية تغير وجهها:نعم ياعمة
ام غيث:فزي للمشب وهاتي الجمر والملقط
نورة تقدمت بتتكلم وهي تحس بغبنة من اللي يصير ولااحد تكلم رغم انهم يعرفون الحقيقة
ام طلق اللي جنبها مسكتها بيدها ورجعتها وهي تضغط عليها بقوة وتطالعها بحدة
هدية رجعت وهي جايبك بقصدير مجموعة جمر وملقط ومدتها لام غيث
ام غيث مسكت القصدير بيمينها والملقط بيسارها وهي تاخذ جمرة بالملقط وتطالع عباير اللي قبالها:أنا اوجس تحبين روسنا اهون لش!
عباير بابتسامة تحدي:أتمرغ وسط المشب ولا أحب راسش لانتي ولا العلل بناتش
ام غيث كشرت بوجهها:هذا اخر علومش؟!
عباير:علامش؟وراش ماتخلصين علينا!!،،مدت راسها تقربه منها،،اعجلي علي احتريش!!
ام غيث طالعت اللي حولها:احدن عنده علم باللي جرى؟حتى ماتوجسن ظليمة ماخافت ربها؟
،،الكل سكت والبعض صد مايبي يدخل بمشاكل معهم،،
ام غيث وهي تزفر وتتصنع الضيقة:أعانش الله على مصابش ياعباير،،مدت الجمرة لجبين عباير،،
بخوت غمضت عيونها وهي تغطي عيون حلايا وسط بكاها اللي يقطع القلب
ام غيث مدت الجمرة اللي بينها وبين جبين عباير شعرة
هيفا فزت بسرعة من حضن ثريا وهي تدف ام غيث بقوة وهي تطالعها بحقد وسط دموعها
ام غيث تحركت من دفت هيفا لها وطار الجمر على بناتها
غيثة لامسها الجمر برجولها وصرخت وهي تدف نايفة عنها وتوقف وتنفض الجمر من عليها
نايفة لامسها الجمر بيديها وصرخت لكن نزل عنها على طول من دفة غيثة ووقفت
عباير ابتسمت وهي تطالع اللي صار
ام غيث بصراخ وهي تطالع هيفا:علامش يابنت!!ضيعتي!!الشينة وراش علامش فازعتن لها!!
هيفا تطالعها هي وبناتها اللي وراها وسط زفرات كلها حقد ثبتت نظراتها على غيثة وجرت لها ومدت يديها وشدت شعر غيثة
غيثة دفتها عنها وسط صراخها
نايفة تحاول تفككها من يد هيفا وحتى لمى فكتها هيفا لازالت هجومية وخدشت وجه غيثة ورقبتها ووسط صرخاتها الجنونية اللي كلها حقد مستمرة تجرح غيثة بأظافرها واذا ماوصلت لغيثة تجرح نايفة اللي تدفها
ام غيث مسكت هيفا من شعرها وسحبتها لورا ورفعت يدها الثانية بتضربها وهي ماسكتها للحين بشعرها:يالمهبولة
ثريا وقفت ومسكت يد ام غيث ودفتها ثم سحبت شعر ام غيث من تحت الطرحة وصارت ماسكة شعرها وطرحتها بنفس الوقت وبحدة:مالهبول غيرش انتي وبناتش!!كبّي بنيتي لاأقص يدش وعقبها لسانش!!
ام غيث تركت هيفا
ثريا دفت ام غيث وهي تتركها وتسحب هيفا لعندها طالعت عباير:السموحة منش يابنت الاجواد مير تخبرين أمانة برقيبتي ولاارضى عليها القولة(الكلام)
عباير بابتسامة رضا:محشومة ياخالة محشومة المهم الظليمة تجلّت(انكشف كل شي)
ثريا طالعت ام غيث وبحدة:لاتظنين إنش مرة الشيخ بأراعيش واسكت لش تعقبين تحمّدي ربش ماقصيت يدش اللي مديتيها على هيفا،،طالعت غيثة ونايفة،،وانتن قليل بشن ماحصلتنه من هيفا مير سواد وجيهكن ذَا مرده عند الشيخ بين الرجال!!
ام غيث وبناتها تغيرت وجيههم
ثريا بنفس حدتها:الظلايم اللي اوجستنها ببنيتي قولن باطل ماينسكت عنه والحق حق وهين مااكون ثريا ان ماخليتشن من اكبركن لأصغركن تحبّن راس هيفا ويدينها قدام القوم كلهم وتعذرن منها على هالباطل هين،،سحبت هيفا وراها ومشت خارجة،،
ام غيث التفتت لام طلق وبغبنة:وش قلة السنع اللي تحصل ببيتش ياام طلق وانتي صامتتن(ساكتة)عنها!!
عباير وهي تمر من قدام ام غيث وهي تتبختر وتسلم على راس ام طلق:مبروك ياام طلق مبروك والفال لخواته عسى أفراحكم دايمة
ام طلق طنشت أم غيث وهي تنتقم منها ومن بناتها عاللي قالوه لنورة:وين غادية تو الناس تعشي انتي وخياتش
ام غيث طالعتهم بقهر:هين هين ياام طلق هين،،مشت وهي تدف عباير من طريقها وبناتها وراها،،
عباير ضحكت ضحكتها المعروفة العالية وبصوت عالي:سبحانك يارب قادر كريم
ام غيث عضت ع شفتها من كثر غيظها والتفتت لبناتها اللي وراها وبصراخ:وش الميتة اللي نازلة بشن(بطيئات)أعجلن قدامي يالله
عباير:فمان الله،،مشت ووقفت عند الباب جنب ام غيث وبناتها وطالعتها بابتسامة كلها سخرية،،يالله من فضلك تعجّل اللي خاطري به،،ضحكت بصوت عالي وخرجت ووراها بخوت وحلايا،،
ام غيث لفت طرحتها اَي كلام وهي تشتعل غبنة وحقد ورجعت للمشب وسحبت ملقط بجنب المشب وتاخذ به جمرة وخرجت تلحقهم بسرعة
.
راشد راجع بسيارته من المحافظة جايب معه عشا يتحلطم بينه وبين نفسه:العملاق كان خاطري اشوف وجهه وهو يقابل جسّار اكيد طرده،،زفر،،اااه منه هالبتال يجي يوم ويندم على عناده اللي ماله حل،،عقد حواجبه باستغراب وهو يشوف شخص يمشي بهالطريق المظلم بدون خوف،،
حمدان يمشي وهو يعرج على جنب الطريق شايل بيد أغراض وبيده الثانية شنطة سودا صغيرة
راشد جنّب عالطريق وهو يهدي حسّ بقشعرة سرت بجسمه وهو تطري ع باله الفكرة حرّك بسيارته مكمل طريقه:بِسْم الله الرحمن الرحيم اعوذ بالله من الشيطان الرجيم،،مشى مسافة وهو شاغل تفكيره هالشخص هل هو ادمي او من العالم الثاني حس بتأنيب ضمير وهو يتركه لف بالسيارة راجع طريقه ووقف اول ماشافه ونزل قزاز السيارة وهو يطالعه،،السلام عليكم يالاخو
حمدان تغير وجهه اول ماشافه وعرفه رغم الظلام اللي يلف المكان وبحدة:لاهلا ولامرحبا وش تبي مني انت؟!!ملاحقني!!عوذا منك!!
راشد لازال بقلبه الشك وبشجاعة رغم خوفه اللي يخفيه:هو سؤال واحد بس انت منّا؟ولا من الثانين؟
حمدان قطب جبينه مو فاهم
راشد:إنسي ولا جني؟
حمدان انصدم من سؤاله ثم اخفى ضحكته من هالسؤال وبحدة:ايه جني!!وش عندك طسّ عني!!
راشد:الجني مايقول انه جني
حمدان ترك الاغراض اللي بيده وشبك يديه يحركهم ببعض ويحرك رقبته:تبيني اخذك تسلم على الجماعة
راشد ضحك
حمدان كشر بوجهه وهو يطالعه يضحك
راشد:وش رايك انا اوديك لجماعتك؟
حمدان ابتسم:من تكون يارجل؟ماانت من اهل هالديرة؟
راشد بابتسامته:المفروض انك جني؟واللي اعرفه تعرفون كل شي ماشاء الله عليكم ونعوذ بالله وبسم الله منكم!!
حمدان ضحك بخفة:إلا والله انك ماانت من هالديرة الوحشة يارجل وش اللي طشك(رماك)عندنا؟
راشد بابتسامة:عاد هالموضوع أقولك عنه اذا قبلت أوصلك للمكان اللي انت رايح له
.
..بيت طلق..
شامة بفستان الزواج الأبيض بأكمامه الطويلة الدانتيل لابسته رغم معارضة امها له بانه مو من عاداتهم وبمكياج خفيف من لمستها هي وخواتها بشعرها المفرود الناعم الطويل لنص ظهرها جالسة بغرفتها فوق سرير بسيط وغرفة نومها بسيطة جدا راضية فيها ومبسوطة جدا مايهمها دام اخذت الرجال اللي تحبه وتبيه
ام هليّل بعد مازفت بنتها لبيتها ومعها بناتها واخواتها بهدوء هاذي هي عادة اهل الديرة رقصوا وغنوا عندها شوي وباركوا لها ثم اتجهوا للعرس ظلت واقفة برا الغرفة تنتظر وصول العريس
طلق وصل ومعه هليّل دخل وبجهور صوته:السلام عليكم
شامة داخل الغرفة تخالجها مشاعر توتر فرح خجل حماس لحياتها الجديدة ضمت يديها على بعض وهي تاخذ نفس تهدي به هالمشاعر
ام هليّل بابتسامة:وعليكم السلام والرحمة
طلق سلم على راسها
ام هليّل مسكت يده وهي تلقي عليه نصايح تخص بنتها وتخصه معها
طلق مكتفي بترديد ان شاء الله،على امرك،لاتوصين
ام طلق:اكبّك مع عروستك عسى الله يبارك لكم ويسعدكم
هليّل سلم على طلق ومسكه:شامة ياطلق
طلق:بعيوني
شامة تشقق وجهها من عرض الابتسامة
هليّل:مااوصيك عليها لاتضيق خاطرها
طلق:أبشر أبشر
ام هليّل مسكت هليّل من يده:غدينا وانا امك يم العرس غدينا
هليّل:ان شاء الله يمه ان شاء الله،،طالع طلق بنظرات محتدة وبتهديد،،تخبر علومي وسلومي ياطلق والسالفة مابها اختي
طلق كشر بوجهه
هليّل:عاد أبصر(شوف)وش بيغدي والسالفة بها اختي!!
ام هليّل ضربت هليّل ع كتفه وبنبرة عالية:علامك ياولد!!
طلق بنظرات حادة:ماني بخوّان ولا غدّار والأمانة أفديها بدم عروقي!!
ام هليّل حست بقشعرة وخوف من كلامه وكأن فيه شي ماتعرفه توترت وظلت تطالعه
هليّل ميل فمه بابتسامة:ادري بك عشان كذيّا(كذا)قبلت بك طوالي ولو اني راددت روحي شوين مير انك طلق ماتنعاف
طلق عض شفته بغبنة منه
هليّل بنفس الابتسامة:اكبكم الحين وعساكم مبروكين ببعض ولبعض استودعكم الله،،مشى وهو يسحب امه وراه وخرجوا وقفلوا الباب،،
طلق وقف قبال باب غرفة النوم اخذ نفس وفتح الباب:السلام عليكم
شامة ردت بهمسات ماتنسمع وهي تشد بيديها ع فستانها بتوتر من دون ماتطالعه:وعليكم السلام والرحمة
طلق نزل بشته وطبقّه وفتح الدولاب وحطه داخله نزل شماغه وحطه فوق البشت وقفل الدولاب التفت طالعها للحظات وهو يشوف خجلها:اسمعي يابنت الناس
شامة رفعت عينها تطالعه وكلها توتر وواضح ماوراه خير هالكلام
طلق بجدية:لش مني كل المودة واحترمش واخاف الله فيش واراعيش مير كود إنش تدورين محبة من هالقليب عوضش على الله لاتدورين محبة
شامة انصدمت من كلامه
طلق شال عينه وهو يدري بقوة كلامه عليها لكن هاذي حقيقته ولازم يكون معها على بينة من البداية نزل ثوبه وهو يعلقه بالدولاب
شامة غرقت عيونها دموع وهي تستوعب كلامه
طلق تمدد بعد مااخذ مكانه عالسرير وسمى بصوت مسموع لها
شامة قامت بهدوء واتجهت للحمام
طلق غمض عيونه بقوة وهو يسمع صوت سحب فستانها عالارض
شامة دخلت للحمام وانهمرت دموعها وهي تفكر اذا هاذي بدايتهم وش بيصير بهم بعدين!!
.
.
<اللهم صل وسلم على نبينا محمد>
.....