ياسمح المحيا جر الهجنية

الجزء السادس والثلاثون

الـجـزء الـسـادس والـثـلاثـون،،

لااله الا الله وحده لاشريك له له الملك وله الحمد وهو على كل شي قدير..
.
.
يـاأخـوي وإن ضـاقـت بـك بـيـوم دنـيـاك..
وإن مـابـرا لـك حـال أو صـفـا لـك..
خـذنـي عـلـى يـمـنـاك وإن طـحـت ويـاك..
واطـلـب تـرا مـاعـنـدي إلا حـلالـك..
.
بتال على نفس وضعه شبه جالس ومتكي بظهره ع ادراج المطبخ وساند اكواع يديه الممدودة ع ركبه المثنية ساند راْسه على كتفه مثبت عينه عاللي قدامه بوسط دوامة أفكاره ولاجلس ابد رغم خدر رجوله وتعب جسمه
غازي واقف على مدخل المطبخ يطالعه وهو مميل فمه مو عاجبه المنظر
جسّار واقف جنبه وبتوتره:اخوك ذَا بيذبح نفسه
غازي:رح نام جسّار
جسّار اتسعت عيونه:صاحي انت!!
غازي التفتت له:جسّار رح نام ولاابن امه يدري ان بتال بالمطبخ
جسّار:بس
غازي:اذا فيه شي قلت لك رح،،دخل للمطبخ،،
جسّار واقف بمكانه ماتحرك وهو بينفجر من اخوانه اللي كل واحد أعند من الثاني
غازي جلس قباله
بتال طالعه عن طرف ولاابدى اَي ردة فعل
غازي مد يديه ومسك رجول بتال وسحبها بشويش
بتال جلس عدل راْسه والتقت عينه بعين غازي وابتسم ابتسامة اقرب للضحكة
غازي ثنى رجوله ولامست ركبه لصدره وهو يضمهم بيديه وابتسم لابتسامته:وش طرا لك؟!!
بتال سند راْسه ع درج المطبخ وراه:طرت لي سوالف
غازي ضحك بخفة:وش طرا الفضايح عليك!!
بتال:تذكر ذيك الليلة
غازي:اوه ياكثرها بيني وبينك!!
بتال:ذيك الليلة ياغازي
>
>
غازي(17سنة)شايل بيده صندوق فيه قوارير غازيات القزاز القديمة اللي ترجع لصاحب البقالة بعد مايخلصون منها وعلى وجهه تكشيرة
بتال(14سنة)شايل صينية مليان قطع كيك
غازي وقف وهو يدق الباب
بتال وراه
سند(جارهم)فتح الباب وبابتسامة:هلا ياهلا حيا الله عيال عادل،،طالع اللي بيديهم وزادت ابتسامته وهو يمد يده وياخذ من العصير والكيك،،مبروك مبروك عقبال الوظيفة،،اكل من الكيكة،،
غازي بتكشيرة:ابوي يسلم عليك ويقول دعواتك لنا ننجح بالدور الثاني
سند وقفت اللقمة بحلقه وهو يطالعهم بصدمة
بتال بغصة:ابوي يسلم عليك ويقول اذا مانجحنا حياك الله بعد الدور الثاني على واجب الرسوب
سند:لا لا الله لايقوله ماعليهم وانا عمكم لكل مجتهد نصيب المرة الجاية تصيب معكم معاليكم من احد وانا عمكم
غازي مد الصندوق اكثر وبتكشيرته:خذ لعيالك ورانا لفة بالحارة!!
سند:مشكور مشكور مايبون يأكلونها بنجايحكم ان شاء الله موفقين،،قفل الباب،،
غازي مشى وهو يزفر
بتال يمشي وراه بوجهه المتغير من الإهانة اللي يحس بها:غازي
غازي وهو يوقف عند باب جار ثاني:خلنا نخلص بسرعة يابتال قبل يروحون للصلاة ووقتها الكل بينتبه علينا،،التفت عليه وطالع كسرة خاطره عض شفته وبغبنة:تعال معي
بتال باستغراب:ها؟!! غازي مشى بخطوات سريعة
بتال يمشي وراه
غازي دخل للبيت اللي بحوش اقل مايقال عنه حوش مجرد ممر صغير للباب البيت الداخلي وقف وهو يطالع بتال:ادخل!!
بتال بتردد:ماوزعناه!!
غازي بحدة:ادخل بس!!
بتال دخل
غازي قفل الباب وجلس بمكان ماهو واقف ورفع عينه لبتّال:اجلس!!
بتال جلس وهو مو مرتاح وشايل هم
غازي فتح قارورة ميراندا ومدها لبتّال
بتال يطالعه بتردد
غازي بحدة:وش فيك انت؟!!خذ!!
بتال اخذها وشرب وهو يتلفت حوله ينتظر الكارثة تجيه
غازي فتح كل العلب وصار يشرب بس بدايتها
بتال يطالعه بصدمة
غازي سحب صينية الكيك وأخذ قطعة ومدها له وهو يطالعه بحدة
بتال اخذها ساكت
غازي حط الصينية ع رجوله وياكل بس بداية الكيك وهو مو راضية تهنى له لقمة يحسها نار
ابو غازي خرج من البيت بيتجه للمسجد اتسعت عيونه وهو يطالعهم صرخ صرخة سمعوها اخر الحارة:غازي وبلااااا!!!!
غازي وقفت لقمته بحلقه بلعها وبجرأة:حياك ياابو غازي على خير يمينك
ابو غازي وهو يدخل يده بجيب ثوبه ويخرج سلسلة حديد معلقة بنهايتها مفاتيحه وبحدة:لعلك ماانت من اهل اليمين ياغويزي قل امين
غازي وقف وبغبنة:ماهو بامين يبه!!وش هالدعوة الشينة!!
ابو غازي مشى له وضربه:داري هاللسان ماجا من فراغ،،التفت لبتّال،،اكيد قايل له هرجة يابتال
بتال بهدوء:ماقلت شي!!
غازي صرخ:ماله دخل ماله دخل ماله دخل!!لااتدخل بتال بشي!!كله من راسي كل اللي تشوفه سواتي بتال حتى ماذاق الكيك من الخوف منك!!
ابو غازي عض شفته وهو يطالع الكيك بيد بتال
غازي:الى متى الى متى وانت تسوي فيه كذا!!الى متى وانت تسوي فينا كلنا كذا!!خاف ربك!!
ابو غازي اتسعت عيونه:وشو!!
غازي وهو يسحب بتال وراه:كل شي سوه فيني انا!!انا اكبرهم
ابو غازي:اعقب!!ترفع صوتك علي!!
غازي:ارفعه هو اللي نشوفه شي بسيط يبه!!
،،ع نص الليل،،
جسّار نايم بفراشه عالارض
بتال نايم ع فراشه عالارض جنبه
غازي بوجهه المتلون من ضرب ابوه وشماغه ع كتفه منحني شبه جالس عند راس بتال يصحيه
بتال رفع راْسه وسط نومه وهو بالقوة يفتح عيونه:هممم
غازي بهمس وهو يتلثم بشماغه:قم قم بسرعة
بتال جلس:وش فيه
غازي:عرفت وين اهل امك مشينا يالله
بتال اتسعت ابتسامته
،،بالسيارة،،
بتال:كيف عرفت؟
غازي بابتسامة وهو يسوق:ابوي وجدي ذاك اليوم زلوا عندي
بتال شد يده بخوف:غازي خلنا نرجع
غازي:وش قلت لي اول!!!
بتال:بس ابوي
غازي قاطعه:ابوي بسابع نومة ثم هذا حنا مسكنا الخط مايمديه يلحقنا وسيارة مامعه هاذي هي معنا انت ارتاح بس نام واذا وصلنا لبيت امك صحيتك
،،ماحسوا الا بسيارة تضربهم من ورا وانفجعوا الاثنين،،
بتال لف يطالع ورا وتغير وجهه:غازي سيارة عمي خالد!!
غازي عرف انه ابوه وبعناده دعس البنزين وكمل طريقه
ابو غازي بسيارة خالد تقدم وتجاوزه ثم وقف قدامه وهو يهدي يجبر غازي يهدي
بتال برعب من ابوه:غازي وقف والله يذبحنا خل نوقف!!
غازي عض شفته:موديك لامك موديك يابتال اربط الحزام بس أربطه!!
بتال ربط الحزام ووعينه على غازي المتوتر ،،وبعد دقايق معدودة كانت بعين غازي وبتّال وابو غازي بعد سنين،،
غازي ماقدر يتجاوز ابوه ابد ووقف بالسيارة معلن استسلامه لابوه
ابو غازي فتح باب السيارة ونزل منها وهو يسحب مفك الكفرات وقفل باب السيارة بقوة وراه
غازي وهو يشد يديه عالدريكسون يخفي رجفتها عن بتال وعينه على ابوه:اقفل الباب عليك
بتال هلت دموعه وعينه على ابوه وبخوف وهو يلتفت له:لاتنزل!!
غازي نزل وقفل الباب وهو مرعوب مثله مثل بتال اللي سواه شي كبير وجدا هرب من البيت ومعه بتال وبصوت عالي اهتز للحظة:بتال من حقه يعرف امه ويشوفها
ابو غازي رفع المفك وضرب غازي على رجله وكسرها
غازي صرخ للحظة وهو ينحني ويمسك رجله مكان الضربة وكتم صرخته
ابو غازي وهو يرمي المفك عالسيارة بقوة
بتال غمض عيونه ،،المفك ضرب قزاز السيارة الأمامي وكسره،،
ابو غازي بصراخ:تهج من البيت وتأخذه معك ياغازي!!
غازي بعناد صرخ وسط المه:من حقه يعيش مع امه!!
ابو غازي بصراخ:ماتت!!جعلك ماتروح مراحها!!
بتال انصدم
غازي صدمته اكبر
ابو غازي انصدم انه جاوبه طالع بتال وبهدوء:كل اللي لازم تعرفه امك وسمية وابوك حتى لو تغير اسمه يبقى عادل وإخوانك غازي وجسّار وأمجاد،،طالع غازي وهو يزفر وبتهديد،،ان شفتك سارين مثل هالمسرى مرتن ثانية واللي خلق سبع وبسط سبع خليتك تكمل مسراك لقبرك!!
>
>
بتال بابتسامة وسط وجه مكتّم من سواده هو يطالع غازي:بعد ذيك الليلة لاعاد بتال سأل عن شي ولايهمه شي تقبل كل ماجاه ببرود ولاعاد غازي يتدخل بشي ماغير يجي شايل تكايته(مسند)ويتمدد جنبه بعد اللي حصله بتال ويظلي ساكت
غازي ابتسم:وغازي ظل فاتح لك صدره
بتال:وعيّا بتال يقول اللي بصدره
غازي بعتاب:وغازي كل ليلة ينتظرك تجيه
بتال:وجاك!!
غازي هز راْسه بايه:جا لكن ماجا لشين عيونه تنطقه ولسانه مانطق منه شي
بتال زفر:وبتّال ماطاوعه قلبه ينكسر من اخوه شي ثاني ابد لانه يدري به اذا درا عاد السالفة من جديد
غازي:وغازي راضي ينكسر ويتفتت قطعة قطعة لعيون بتال
بتال ضم رجوله لصدره وتكى بطرف دقنه ع ركبته:ضحكت ياغازي
غازي تربع وهو يتكتف ويطالعه:وثم؟
بتال:رقصت ياغازي
غازي اخذ نفس:وثم؟
بتال:جريت هجينيات مو هجينية ياغازي
غازي:وثم؟
بتال:للحين صدري شابّ ياغازي
غازي تنهد:عرفت؟
بتال:وليتني ماعرفت
غازي قطب جبينه:ليش!!
بتال سكت وهو يطالعه
غازي كرر سؤاله بفضول:ليش يابتال؟
بتال:ماالوم ابوي لو هو يذبحني!!
غازي اتسعت عيونه:وش اللي عرفته يابتال
بتال:بعد ماكنت بأعلى دور ياغازي انسفت العمارة من ساسها فجأة
غازي فار دمه:طيب ليش!!قولي وش فيه؟!!
بتال ضحك:اكتشفت اني طعنة!!طعنة بقلب ابوي وطعنة بقلب امي!!
غازي بعصبية:وش هالكلام!!
بتال مسك لسانه مايبي يقول شي اكثر واكتفى يطالعه بحزن على نفسه
غازي بعصبيته:لاتطالعني كذا وانت ماتنطق كلمة هالنظرات تذبح!!
بتال:وان قلت لك وش بتسوي؟!!
غازي:ريّح شوي طالع وجهك وشلون قالب كأنك شوي وبتموت!!
بتال:يمكن موتي راحة!!
غازي سكت واكتفى يطالعه بحدة وهو يغلي
بتال ضحك وهو يتربع:لاتاخذ من كلامي شي واسمع ياغازي مو هذا اللي تنتظره؟!! غازي زفر بضيق
بتال:الليلة صدمة وبكرة بأنسى
غازي:وشلون بتنسى تكذب على نفسك!!
بتال:مو شرط أنسى اهم شي أتناسى
غازي وهو يبي يصكه على وجهه من هالكلام:وغيره؟
بتال:امم سلامتك!!مافيه شي ثاني
غازي ظل يطالعه
بتال ضغط على نفسه ووقف وهو يحس برجفة عظامه
غازي فز ومسكه من يده يساعده
بتال سحب يده وهو يعتدل بوقفته وبابتسامة وسط وجعه:لاأحد يشوفك بس يحسبني مريض!!
غازي زفر:ونهاية عنادك!!
بتال:قلتها لك وباقولها:مافيني شي،،مشى باتجاه مغسلة المطبخ وهو يتحامل على نفسه من المه لكن ماتحمل وانحنى شبه جالس وهو يمسك راْسه والمغسلة قدامه بخطوتين،،
غازي بعصبية:خل جسّار يشوفك ماهو بذابحك!!
بتال بسخرية:ماحط نفسي بين يديه ذَا يكمل الناقص!!
غازي بغبنة:استغفر الله العظيم وأتوب اليه
بتال:وبعدين مافيني شي!!اعرف نفسي!!
غازي هز راْسه بيأس وهو يدري بعناده واذا ساعده بيقوم الدنيا بعدين
بتال وقف وهو يضغط على نفسه واستند بيديه ع حافة المغسلة وهو ينزل راْسه ويلقط انفاسه حس بيد سحبته وتلفه وبتكشيرة وبحيله المهدود:غا،،سكت واحتدت نظرته،،
غازي التفت لجسّار وهو يطالعه بحدة
ام غازي واقفة بوجهها المتغير وهي تبلع غصتها وحاطه يدها على فمها تطالعهم بصمت
جسّار ضيع نظره بالمكان وهو يتقدم لابوه وبتّال
ابو غازي بملابسه الداخلية وبحدة:كب عنادك وخل اخوك يشوف وش فيك؟
بتال سحب يده وبحدته:انا مالي شغل باللي سواه فاهد
ابو غازي اتسعت عيونه:ومين اللي قال هالكلام؟!!
بتال وهو يكتم غصته:اللي سواه فيك وبامي وسمية وحتى امي جميلة مالي شغل كل واحد يتحمل مسؤولية افعاله
ابو غازي زفر:وش قلت لك انا يابتال!!
بتال مكشر بوجهه وساكت
ابو غازي:انت ولدي امك وسمية وابوك انا عادل لو تغير الاسم انت ولدي انا وأفعالك من زين وشين تلحقني انا ماهي بلاحقتن فاهد!!
بتال بغبنة:وليش كل هالغل بقلبك علي ليش!!،،جلس ماعاد قدر يوقف،،
ابو غازي جلس قباله وبقلق واضح على ملامح وجهه:خل اخوك يشوفك يابتال اترك العناد ياولدي
بتال:يبه انا رايح ادور لجدي بادي
ابو غازي:تم تم لكن خله يشوفك
بتال تمدد على ارض المطبخ وهو يحط راْسه فوق يديه اللي ثناها وهو يغمض عيونه من تعبه وبهمس:تراك وعدت!!
ابو غازي:أبشر بس اترك عنادك!!
بتال:مافيني شي يبه بس تعبان مانمت زين
ابو غازي تربع عند راْس بتال وهو يرفعه ويحطه على رجوله ويمسح عليه ويسمي
بتال استسلم للنوم وهو يأن بألم مو حاس
ام غازي وهي تكابح غصتها:هذا وهو مادرا ياعادل!!
غازي وبتّال التفتوا لامهم باستغراب من اللي تقوله
ابو غازي تنهد وعينه على بتال وكله قلق:وكلي امرك لله وجيبي لي الزيت اللي مقري به،،طالع جسّار،،وانت وش تحتري تعال شف اخوك وش فيه!!
..........****.......... يوم جديد
.........****..........
..بيت عادل..
..غرفة رهايف وأمجاد..
رهايف رفعت راْسها وهي تسمع هزة جوالها عالكومدينة اللي أزعجها كشرت بوجهها وهي تسحبه بدون ماتشوف مين وبنرفزة وهي تحط راسها عالمخدة:ووجع
جواد بابتسامة:صباح الخير
رهايف صحصحت وجلست طالعت جوالها رقم غريب
جواد بروقان:وينك نمتي؟!!
رهايف بحدة:من وين اخذت رقمي وكيف تتجرأ وتكلمني؟!!
جواد:زوجتي!!ورقمك بسيطة أجيبها عادي المهم وين الفطور صار لي نص ساعة انتظر!!
رهايف ارتفعت حواجبها:نعم!!
جواد:افا متطلعين سرعة على امك!!وانا ماارجع من الصلاة الا وريحة قهوتكم تصك براسي!!لايكون مالك دور بالفطور وكل شي على امك،،ضحك،،طلعتي رفلا!!!
رهايف:رفلا بعينك!!وانا مو على ذمتك حتى اطبخ لك!!امك عندك!!
جواد بتهديد:اقول لعمي!!
رهايف عضت شفتها وهي تعرف ابوها وسكتت
جواد ابتسم بوناسة:انتظر الفطور سلام
رهايف:لحظة لحظة لحظة مااقدر اسوي لك شي
جواد ارتفعت حواجبه:والله!!!
رهايف:ابوي نايم بالمطبخ
جواد انفجر يضحك:أكذب عذر مر علي ولايترقع!!
رهايف:وش مصلحتي اكذب عليك!!ابوي نايم بالمطبخ هو وبتّال!!
جواد زفر:وفطوري؟!
رهايف:وسم ان شاء الله ماني مصحية ابوي عشانك!!،،قفلت،،وجع شكله بينشب لي صدق!!
.
..بالمطبخ..
بتال متمدد ع ظهره ومتغطي بلحاف خفيف فتح عيونه وهو يحس جسمه مكسر وصداع بيفجر راْسه وعقد حواجبه وهو يشوف ابوه
ابو غازي متكي براسه ع درج المطبخ ونايم ورأس بتال ع طرف رجله
بتال اخذ نفس وهو يسترجع اللي صار البارح
انقلب وجهه من الاحراج اللي يحسه وهو يعض طرف شفته ويسب نفسه بنفسه رفع راْسه بشويش عن رجول ابوه وسحب اللحاف وغطى رجول ابوه ولف بشويش بدون لايطلع صوت وهو يحبي يبي يهرب من المكان من إحراجه وصل مدخل المطبخ ووقف وهو يتخطى بهدوء
ابو غازي كتم ضحكته وهو يتظاهر بنومته حتى مايحرجه
بتال جرى وطلع الدرج ودخل لغرفتهم وهو يمسك راسه من فداحة الموقف بعينه وانحنى وهو يجمع اغراضه بسرعة وقف عند جسّار وضربه ع راسه وتألم من يده
جسّار تألم
بتال:قوم ولامشيت وتركتك!!
.
..بيت نشمي..
،،الجد نشمي والجدة منيرة وعذبة ع الفطور،،
الجد نشمي وهو يفطر:وينه رويشد؟
عذبة:صلى ورجع ينام
الجدة منيرة:اهب ياعادل مايرحم!!كرف عويلتي كرف الويل!!
عذبة:متعودين يمه ماهو جديد عليهم سواته فيهم
الجدة منيرة بزعل:بس البارحة غير البارحة فرحة مابعزيمتن مثل دايم
عذبة:الحمدلله عدت على خير والكل مبسوط
الجد نشمي رفع عينه لعذبة:بنت ياعذبة
عذبة:سم يبه
الجد نشمي:متى بتعلمينه؟
الجدة منيرة تنهدت
عذبة:وشو يبه؟!!
الجد نشمي:متى بتعلمين راشد عن اخوانه؟
عذبة سكتت
الجدة منيرة بعصبية:صاحي انت!!تطشه على هالشايب!!مايكفي طشينا بتال عليه!!
الجد نشمي طالعها:انكعمي يامرة محدن اوجس يمش هرجة،،طالع عذبة،،يابنت الولد ملزومن يتخبّر اخوانه كود قلبيش للحين به مريّة(علامة)من اللي غدا فالعيال مايلحقهم شي وانا ابوش
عذبة تطالعه ساكتة
الجد نشمي:ثمّن اللي فات مات واللي انعمل غدا وغدوا ربعه معه
عذبة تنهدت:صدقت يبه صدقت لزوم راشد يتخبّر اخوانه الصحيح من غدا راشد يم ام جلاجل وانا ودي اعلمه مير اني مدري وشلون اعلمه
الجد نشمي ارتسمت ابتسامة على وجهه:يجمل حالش ويكملش بزينش ياعذبة صح منطوقش يابنيتي راشد لازم يدري عن اخوانه وان كان اللي رادش وشلون كبيها على ابوش
الجدة منيرة:لا ماهو بالحين!!والله ان يصلي بهم بادي شرق!!بتال وراشد دفعتن وحدة!!عز الله عويلتي غدوا يم الصرايم!!
الجد نشمي خف حماسه وسكت وهي معها حق
عذبة:نعلمه يبه مير انه
جسّار دخل وهو يلهث:السلام عليكم،،سلم عليهم،،وينه رشود بتال طاير وحالف يتركه ويتركني معه لو تاخر!! راشد وهو يدخل عندهم بيده شنطته:استغفر الله من هالاشكال اللي بلاني معهم!!وش فيه طاير اخوك ذَا
جسّار وهو يطالعه،،:امش امش تراه يتكلم من جده بيتركنا،،سلم عليهم،،سلامو عليكو دعواتكم ياحاج،،خرج،،
راشد سلم عليهم وأمه مشت وراه للباب ضمها وهو يودعها وسط ابتسامته خرج واختفت ابتسامته وهو يفكر باللي سمعه قبل شوي
.
..بيت عادل..
غازي نازل عالدرج وهو ميت نوم للحين يحس بتعب اتجه للمطبخ وقف وهو يشوف امه وابوه جالسين بالصالة
ابو غازي بطفش من كثر أسئلتها:يابنت الحلال ماانتي مصدقتني اتصلي وانشديه وفكيني من القرقرة الزايدة!!
ام غازي:شفته شفته انت ولا قالوا لك البنات؟
ابو غازي زفر وهو يستغفر:شفته شفته محدن قالي شي
غازي:صبحهم بالخير،،سلم عليهم،،مشوا؟!!
ابو غازي:استغفر الله!!ايه مشوا مشوا راحوا لاشغالهم اجل يظلون هينا!!
غازي مرر نظره على ابوه وأمه:وش اللي ماتبون بتال يعرفه؟
ابو غازي بحدة:غويزي ماهو بوقت لعبك!!
غازي:يبه سكت سنين لكن لاتظن ان السكوت كان من خوف!!كنت انتظرك يبه تقول لي وش السالفة حتى لامن صارت الصدقية محد بيفزع لبتّال غيري!!
ابو غازي:اسمع ياغازي اللي يحصل مع بتال مالك فيه لاانت ولااخوانك!!
غازي:وبتّال يبه!!نسيت انه اخوي!!
ابو غازي زفر:لامن صارت الصدقية اللي تقول عنها محدن بيفزع لبتّال غيري وانت عليك تحرس اللي وراي ياغازي
....السيارة..
راشد جالس بمكان الراكب سارح بتفكير وسط اللي سمعه قبل شوي وفوقها اللي يصير معه بدون اَي تفسير منطقي والتفسير الوحيد يتجنب التفكير فيه
جسّار يسوق وهو يتحلطم:ايه يمسكني الخط وهو ينخمد!!وش ذَا!!اسمع اسمع!!
بتال متمدد ورا ونايم وصوت شخيره مغطي المكان
جسّار:ويشاخر بعد!!وانا لو اخذ ذَاك النفس المتقطع وانا نايم ذبحني بوقتها يقول أزعجتني ماتركتني انام!!
راشد بنرفزة:اوف ياجسار منك اوف!!اللي يسمعك يقول ماانت بكيس النوم حقنا!!لاتعيب وانت العيب كله فيك!!
جسّار ارتفعت حواجبه من أسلوب راشد والتفت يطالعه مصدوم منه
راشد:وبعدين تبي تنام وقف وانزل انا اسوق وانت اخمد ونام لاتزعجني
جسّار:لا مشكور اقدر أسوق وآسفين أستاذ راشد اذا ضايقناك حقك علينا
راشد نزل الكرسي لاخر شي وتمدد وهو يغطي عيونه بيده:دامك بتسوق انتبه لاتنام
.
..بيت عادل..
..جناح غازي المتواضع..
غازي دخل للغرفة وهو كله حيرة من كلام ابوه وقف وهو يشوفها تبكي تغير وجهه:وش فيك
عذاري تبكي وهي تلبس عبايتها ولاردت واتجهت للتسريحة بعد ماحسبت شنطة يدها من عالسرير وهي تحط جوالها بشنطتها
غازي تقدم لها ومسكها من يدها ولفها عليه:بنت وش فيك؟!!
عذاري:ابوي ياغازي
غازي:وش فيه؟!!
عذاري بدموعها:يبي يتزوج ياغازي
.
..بيت مسفر..
ابو جواد بالمطبخ يحوس يجهز له فطور
رهايف دقت الباب الخلفي بشويش وبصوت هادي:شذى شذى ووجعوه
ابو جواد عقد حواجبه باستغراب واتجه للباب وفتحه
رهايف ابتسمت وهي تشوف عمها:صبحك بالخير عمي
ابو جواد ابتسمت:هلا والله هلا برهايف
رهايف سلمت عليه ونزلت الطرحة اللي راميتها على وجهها متغطية بطرفها
ابو جواد حاوطها بيده وهو يدخلها بابتسامة:هلا هلا حياك الله
رهايف وهي ترجع يدها لورا وحاوطت وسط عمها من ورا:الله يحييك ياابو جواد
ابو جواد ضحك:يازينها من فمك
رهايف خجلت:عمي وش ذَا الكلام دايم اقولها لك
ابو جواد بابتسامة وهو يدخلها للمطبخ لطاولة الطعام:حياك اجهز لي فطور افطري معي
رهايف:تسلم ياعم عساها دايمة أفطرت،،طالعت النواشف عالطاولة،،هذا فطورك!!
ابو جواد وهو يتركها ويجلس عالطاولة:نعمة من الله الحمدلله
رهايف:طيب وين الشاهي الحليب اقلها؟
ابو جواد وهو يسحب كاسة العصير:احسن من الشاهي والحليب
رهايف وهي تجلس:يوووه ياعمي والله انك تجنن راحة راحة وقنوع راضي بنواشف وعصير يازينك والله!!بِسْم الله عليك الله يخليك ويحميك لعمتي عواطف ويكثر من امثالك يارب
ابو جواد ضحك:امين امين
رهايف:عاد ابوي مايرتاح الا اذا صبح عالقهوة وبعدها الفطور!!وأ الله والفطور عاد تحسبه اَي شي!!لااااا هذا الفطور الفطور اللي يملي العين!!سؤال بس انت متاكد انك انت وابوي اخوان!!يعني صدق صدق ابوي اخوك؟انت عمي الحقيقي؟
ابو جواد ضحك:يقطع شرك يارهايف!!ابوك على طبعه وانا تغير طبعي
رهايف:يارب يتغير طبعه ويريحنا!!
ابو جواد:لا خليه مثل ماهو!!اخوي عادل ماابيه يتغير حتى لو انه حمق يظل حنيّن!!
رهايف زفرت:عمي وينها بنتك الدايخة ذي جاية ابيها بشي ضروري
ابو جواد:اطلعي لها بغرفتها اكيد
رهايف:طيب شوف لي الطريق ولاعليك امر
ابو جواد:محد غريب الغريب صار محرمك
رهايف ابتسمت وبنفسها:هذا اللي انا خايفة منه،،وقفت،،انا طالعة لها توصي شي ياعم؟
ابو جواد:درب السلامة يابنيتي
رهايف:بالعافية ياعم عاد لو يشوفك ابوي بيسوي سالفة بيقول
ابو جواد سبقها:هذا ماهو بفطور ذَا غدا وش هالولية القشرا
رهايف ضحكت بخفة:بالضبط يالله سلام ياعم،،سلمت على راْسه ورمت الطرحة ع وجهها تتغطى وطلعت للدرج وهي تمشي واسرعت بخطواتها الى ماعدت غرفة جواد اللي على يمينها زفرت براحة وهي تلف باتجاه غرفة شذى وقفت بصدمة وهي تشوفه،،
جواد خارج من الحمام اللي عند غرف اخواته ببرمودة سودا وتيشيرت بيج ومنشفته ع راْسه قفل الباب ووقف وهو يشوفها ابتسم وهو يعرف زولها:حياالله من زارنا!!
رهايف عطته ظهرها ومشت
جواد يمشي وراها:وين رايحة سلمي على زوجك!!مااشتقتي ليه!!
رهايف بنفسها:الله يأخذك وياخذ الساعة اللي ورطت نفسي فيها معك،،جرت،،
جواد جرى وراها
رهايف وصلت لغرفة
جواد اتسعت عيونه:لحظة لحظة لحظة
رهايف دخلت للغرفة وقفلت الباب بقوة وسط انفاسها السريعة
ام جواد صحت من نومها ع قفلت الباب القوية مفجوعة انصدمت وهي تشوف السواد قدامها وصرخت
رهايف انصدمت وصرخت مع عمتها ولاتدري ليش
.
..السيارة..
بتال صحى من نومه وعقد حواجبه باستغراب وهو يشوف السيارة موقفة بوسط الخلا(الصحرا)ولا احد حوله نزل بسرعة وهو يسمي ولا طرا بباله احد عير راشد تلفت حوله مرعوب طالع الرويّع(جبل صغير)قدامه بمسافة بسيطة جرى له وتسلقه بسرعة ووقف أعلاه وعض شفته بغبنة وهو يطالعهم
جسّار وراشد شابين نارهم قدام الغدير(موية تجمعت من السيول)وكل واحد قدامه دلته معطي الثاني ظهره
بتال نزل بسرعة
جسّار التفت يطالع الرويّع وابتسم وهو يشوفه
راشد طالع بتال وكمل يتقهوى عادي
بتال وصل عندهم وشات دلة جسّار وانكبت
جسّار اتسعت عيونه
راشد كشر بوجهه وهو يشوف تصرفه
بتال التفت لراشد وشات دلته بعد
راشد ضم نفسه ورفع رجوله لفوق عن القهوة اللي انكبت لاتحرقه
بتال صرخ بغبنة:ووجع وش ذَا الخبال اللي معكم!!!
جسّار عض شفته بغبنة بالاول كلام راشد وكملت الحين ببتال
بتال بعصبيته:تشوفوني نايم وتتركوني ليه!!ليه!!
راشد زفر:اخز ابليسك يابتال محد برايق لك!!
بتال بصراخ:انت اخر من يتكلم تدري وش اللي طرا لي وانا مااشوف حولي احد!!اول واحد انت قلت صار له شي اكيد!!
راشد وقف وهو من البداية قافلة معه:واذا صار وش بتسوي؟!!
بتال ارتفعت حواجبه:والله؟!!وش بأسوي؟!!
راشد قرب منه وهو رافع راْسه له يطالعه ويبي يتهاوش وبتحدي:ايه وش بتسوي؟
بتال بسخرية:شوي شوي لاتنكسر رقبتك!!اول شي أوصل لي بعدين تعال دور هوشة!!
راشد مسكه من ياقة ثوبه وبحدة:عيدها اذا انك صادق!!
جسّار وقف ومشى لعندهم وحط يديه كل وحدة على واحد منهم:تعوذوا من الشيطان
،،دفوا يديه عنهم مع بعض وهم يطالعونه بنظرات محتدة،،
جسّار رجع خطوة من دفتهم وانخرش وهو يشوف الشر بعيونهم
راشد طالع بتال:يالله وش بتسوي!!
بتال طالعه وميل فمه بابتسامة:ناوي على عمرك انت!!
جسّار جرى لهم وهو يمد يديه لقدامه ودفهم الاثنين بكل قوته
راشد طار بحكم خفة جسمه وطاح بالغدير وشهق من الموية اللي بللته
بتّال تعثر بخطواته وووقف بالغدير وطالع جسّار بحدة وصرخ:جساااار
جسّار معصب منهم:انتم الاثنين شياطينكم طيروها بعيد عني انا مالي شغل بصداع الرأس والتنفيسات!!،،ثبت نظره على راشد،،وانت تدور حرش من طلعنا السيارة ورب النعمة لانقعك بطا الغدير شهر،،طالع بتال،،وانت،،سكت وهو يطالعه ويطالع نفسه،،فرحان بجسمك!!لاتخاف بيجيك يوم ويجي اللي اطول منك!!ومو عشان شفتك تعبان ورحمتك تفرد عضلاتك علي!!،،مرر نظره عليهم وبعصبية،،التنفسية ذي ماني من أهلها وترا بتشوفون جسّار ثاني دام ذي حركاتكم،،تركهم ولف عنهم وجلس عند النار بتكشيرة على وجهه وهو يجهز له دلة من جديد،،
بتال طالع راشد وتنهد وهو يمد يده له
راشد حط يده بيد بتال اللي ساعده ووقفه واتجهوا لجسّار
جسّار واضح عليه الزعل
بتال جلس عن يساره
راشد جلس عن يمينه:جسّار انت تدري بي
جسّار مارد
بتال:جُسجُس والله مو لايق عليك الزعل
جسّار مارد ومتجاهل وجودهم تماما
بتال غنى:والله مايسوى أعيش بدنيا دووووونك
راشد وهو يسحب الدلة من يده:انا اضبطها لك
جسّار سحب الدلة من يد راشد بدون لايطالعه وكمل شغله
بتال:لا ولايسوى حياتي بهالوجود
راشد يكرر وراه ع أساس انه صدى:حياتي بهالوجود
بتال:دامك انت الليييي
راشد بهمس:انت اللي
جسّار زم شفايفه يكتم ضحكته
بتال:رحلت وكيف بأصبر
راشد من قلبه وبانسجام:ااااه كيف باصبر
جسّار اخذ نفس بصوت وهو يكبح ضحكته
بتال ابتسم يعرف سماجة اخوه وقف:على البعاد،،وانحنى وهو يشيل جسّار ويسرع بخطواته،،
جسّار اتسعت عيونه
راشد تكى بطرف دقنه على يديه وهو يطالعهم ومستمر:على البعاد اه يالبعاد!!،،وأشر بيده بمعنى مع السلامة،،
جسّار بصراخه وهو يتحرك بيدين بتال:تكفى تكفى يابتال!!
بتال وقف ع طرف الغدير ورماه وهو يغني بوسط انفاسه من ثقل جسّار:وكيف ابنثر هالورود!!
جسّار طاح بوسط الغدير
بتال كشر بوجهه وهو ينفض يديه:تخسي ماانت بورد!!
.
..بيت خالد..
عذاري دخلت بخطوات سريعة وغازي وراها
غازي دخل للمجلس وجلس
عذاري كملت طريقها لداخل البيت وهي تغلي دخلت وبقهر:وش هالرسالة يبه؟!!
ام صايل جالسة عالكنب
ابو صايل جالس عالارض جنب الكنبة يمسج رجول زوجته طالعها:لااله الا الله سلمي بالاول!!
عذاري:وش اللي ارسلته يبه؟من جدك!!تبي تتزوج على امي!!وش هالكلام!!
ابو صايل مستمر يمسج زوجته:انا ماسويت شي من راسي هذا شور امك!!
عذاري وهي تاخد نفس ماتبي تغلط ومهما يكون هذا ابوها:يبه وشلون ذا شور امي!!مستحيل!!
ابو صايل بتكشيرة وهو يلف عليها كله ويطالعها:هذا هي أمك قدامك اساليها!!
عذاري:بس امي
ابو صايل قاطعها بحدة:كذبتيني ومشيتها لك ياعذاري لكن إياك ثم إياك تغلطين بحق امك
عذاري بصوت عالي:يبه قل شي الواحد يصدقه!!
ام صايل طالعتها:انا اللي قلت له يتجوز ياعذاري
عذاري انصدمت:يممممهه!!
ام صايل:خلا البيت وابوك يبي له من يشيل اسمه ياعذاري
عذاري بعيون غرقانة دموع:انا فيه انا شايلة اسمه!!واذا على البيت انا بأمليه لكم عيال!!
ابو صايل زفر:عذاري ياابوك
عذاري قاطعته بوجه واضح عليه الصيحة وبرجفة صوتها:انا بأجيب لكم عيال كثر ماتبون بس زواج لا يبه لا!!،،مشت،،
ابو صايل تنهد:لاحول ولاقوة الا بالله
عذاري بخطواتها السريعة وقفت على باب المجلس وهي تلف طرحتها وطالعته:يالله
غازي تنهد وهو يوقف ويشوف وجهها المقلوب
عذاري تمشي بخطوات سريعة
غازي يمشي وراها على هونه
عذاري وصلت للباب بتخرج التفتت له:بسرعة!!
غازي اسرع بخطواته:وراك وراك،،دخل يده بجيبه وخرج مفتاحه وفتح لها السيارة،،
عذاري ركبت للسيارة وقفلت الباب وراها تكتفت وهلت دموعها بغزارة
غازي ركب وهو ساكت شغل السيارة وحرك
عذاري بصوت مقطع من شهقاتها اللي تكتمها:غازي
غازي:سمي ياعيونه
عذاري:على كثر ماانفس عليك لكن انت اكثر واحد تفهمني
غازي بابتسامة هادية:لانك حبيبتي وزوجتي وكل دنيتي
عذاري:غازي ابي عيال
غازي التفت لها مصدوم من جرأتها وهم متفاهمين على هالموضوع بينهم
عذاري طالعته بدموعها:ابي احمل قبل لاتروح الحد
غازي:هو بيدي!!بعدين انتي عارفة الوضع!!
عذاري:سو اي شي اهم شي ابي عيال بسرعة
غازي:على اساس اذا حملتي بنفس اليوم يطّلع!!!
عذاري بعصبية:مايهم اهم شي ابوي مايتزوج
غازي:وانا وش ذنبي!!قايل لك ماابي عيال لحد مااستقر مو بهالوضع كم يوم معك وبعدها هناك!!
عذاري:وانا طفشت مليت وانا لوحدي ابي بزر يشغلني!!كيفي ادور تعب حرة انا!!
غازي:لا مو بكيفك!!واذا صار لي شي وش بتسوين وقتها ياعذاري ها؟!!قلت لا وانتهى النقاش بهالموضوع
عذاري:لا ماانتهى ابي عيال ياغازي
غازي زفر:استغفر الله العظيم،،التفت وبابتسامة،،ابشري بروح السوق لانزلتك عند البيت وأجيب لك بس ماقلتي لي كم واحد تبين!!
.
..بيت مسفر..
ام جواد بفجعتها وهي ترمي اللحاف من عليها وتقوم:اعوذ بالله من الشيطان بسم الله الرحمن الرحيم
رهايف تتلفت حولها وهي تجري لعمتها:يمه بسم الله خبيني ياعمة عندك
ام جواد انتبهت للصوت وبخوف وهي ترجع بخطواتها لورا وبشك وتردد:رهايف!!
رهايف وهي تمد يدها وتمسك يد عمتها وبخوف:وش اللي شفتيه ياعمة لاتخوفيني تكفين
جواد فتح الباب ودخل
ام جواد عضت طرف شفتها السفلية بغبنة وهي تستوعب الموضوع وضربت رهايف كف على وجهها
جواد انصدم من ردة فعل امه
رهايف تطالع عمتها مو مستوعبة
ام جواد بصراخ:من سمح لك تدخلين غرفتي؟!!
رهايف بهدوء:انا بس كنت ابي شذى وضيعت الغرفة من ربكتي ماقصدت ادخل مكان مو مسموح لي ادخله
ام جواد بعصبية:وقفتي قلبي من الخوف حسبالي شي شين اعوذ بالله!!
رهايف:اسفة عمة عواطف بس والله ماقصدت
ام جواد صدت بوجهها وهي تزفر رهايف وهي تشد ع أطراف عبايتها اللي زامتها بيديها:امي تنتظرني وانا قلت لها مابتأخر ،،مشت من قدام ام جواد،،
ام جواد جلست ع طرق السرير وهي تذكر الله بهمس
رهايف مرت من جنب جواد بخطوات سريعة
جواد طالعها ومشى وراها وقف عالباب وهو يتلفت لامه وابتسم:هـه هاذي اللي تبونها لي!!
ام جواد طالعت بحدة وهي تحس بنبضات قلبها السريعة اللي ماهدت للحين:عالاقل هالمسكينة ماتقصد ياجواد عكس اختيارك اللي تسوي الشي بقصد
جواد كشّر:تحبون تدورون الزلة!!
ام جواد:والله انا ماادور ورا احد!!لكن انت اللي صاير تتصيد وانا امك اركد اركد وترفق بعمرك!!
.
<الـلـيـل>
.
أم جـلاجــل
.
،،الشباب وصلوا اخيراً للديرة ووصلوا على اذان العشا،،
جسّار نزل من مكان السواق وهو يمدد جسمه:حسبي عليكم من اخويا!!اهلكتوني ماتخافون الله!!
بتال:مشينا نلحق الصلاة بس!!
،،وبعد الصلاة،،
جسّار وراشد يمشون ورا بتال
بتال مسرع بخطواته قدامهم وكل شوي يلتفت عليهم وهو مافيه صبر والتفت هالمرة وبحدة بعد سكوت عنهم:وبعدين معكم!!وش هالتاخير!!يالله!!
جسّار بعيون متسعة:نطير!!!
بتال:خلاص انتم ارجعوا للبيت وأنا عندي شغلة اخلصها وراجع ان شاء الله،،طالع جسّار،،انتبه له زين
راشد:ماني ببزر!!
بتال:ادري والله مايحتاج تقوله!!بس انت الحين لو نربطك من يديك ورجولك تسكت ماتتكلم
راشد كشر بوجهه وهو يدري بتال ماقال هالكلام الا من خوفه
بتال:انتبهوا على انفسكم ان شاء الله شويات وراجع،،مشى يعاجل بخطواته بدون لاينتظرهم يردون او يسمع اذا عندهم شي واتجه لبيت بادي،،
.
..بيت بادي..
عباير تتقهوى بنص الحوش
بخوت جالسة جنبها وهي تقرب لها صحن فيه شوي من العشا حاطته لحلايا:اخذي لش لقيمات على مايعود سعود
عباير بتكشيرة:ومن اللي أوجس اني باكل معه!!
بخوت عصبت:عباير!!
عباير ببرود وهي تتقهوى:اوحيش جنبش ماله بد هالخنفرة!!
بخوت:عاد انكعمنا عنش وكبيناش على هواش مير إنش تخورينها لا والله لا!!ماهو بهواش ياعباير
عباير بعناد:البطين وبطينتي والقنق وقنقي كبوني معه على مااريد!!
بخوت:الله يسلط على هالقنق!!
عباير:اعوذ بالله منش!!محد عازني غيره!!
بخوت بحدة:اعقبي!!وحنا وين غدينا!!
سعود دخل للبيت
عباير وهي تنزل فنجالها:ابدن ماغديتوا مير اني تفطنت اللي مابراسه قنق ولسانه يغدي أطول من القوم اللي معه مايظلي حي بهالدنيا الغبرا!!
بخوت اتسعت عيونها
سعود كشر بوجهه وهو يدري انها تقصده
عباير وقفت وهي تشوفه عالباب واقف:عاد مثل ماعلمتك مالي بالعشا معكم!!،،مشت،،
سعود:بت ياعباير
عباير التفتت تطالعه وهي مكشرة ولاردت
سعود:تعشي وادحري ابليس عنش وانتي ماغير تبولعين بالماء والقهوة الايام اللي قضن(راحت)
عباير:ماني بميتة لو اني ابولع بالما لحاله
سعود:راعي خلقتش وشلون غادية!!لو ماني بخابرن علومش تليتش(سحبها)من مقفاش وغديت بش يم المستشفى
عباير وهي تتخصر وبتحدي:والله لو اني اتلوى قدامك تلوي الويل ماغديت معك يم المستشفى
بخوت صرخت:عباير
سعود ميل فمه بابتسامة عن جنب
عباير كشرت بوجهها وهي تدري زودتها
سعود:مير الله يحفظش ولايحوجش للمستشفى وعلومه
عباير وهي ترفع يديها:امين،،اسرعت بخطواتها لغرفتها ودخلت وقفلت الباب وهي تجلس على طول وانقلب وجهها من وجعها اللي تخفيه عنهم وهمست بعناد،،لو اموت مارجيت شين من وراك ياسعود!!
بخوت وهي تقدم لسعود:لاتاخذ عليها وانا خيتك تخبر لسانها وعلومها
سعود ابتسم:ماني بأخذن شين عليها مير انتي لاتشوشينها علي زيادة
بخوت:اجل تطول واكبها بهاللون!!
سعود:كبيها يابخوت كبيها بلكن راسها يهدي شوين
بخوت:سعود،،سكتت وهي تسمع دق الباب،،
سعود:ولمي العشا الى ماراعي اللي يم الباب
بخوت:ان شاء الله
سعود مشى اتجه للباب وفتحه ابتسم وهو يشوفه:ياحياك الله تو مااستنار المكان ياحيّه
بتال بابتسامة:الله يسلمه ويبقيه،،وسلم عليه وبعد مااخذوا اخبار بعض،،
سعود وهو يمسكه بيده:حياك عالمقسوم
بتال شد على يده:والله مايكتب لي
سعود:استغفر الله!!
بتال:والله توي واصل طريق وتعرف تعب وانا جاي بسألك عن واحدن بهالديرة ورايح للبيت ارتاح
سعود ابتسم:جميلة جديدة؟
بتال ضحكة:لا ابي أسألك عن شايب يقاله بادي سمعت به؟
سعود قطب جبينه
بتال:لحظة لحظة هالمرة اعرف اسمه بادي سعد الـ**
سعود باستغراب منه:ايه جدي وش بغيت منه؟
بتال بصدمة:جدك!!
سعود:ايه جدي لزم
بتال اتسعت ابتسامته:تقوله صادق؟
سعود:وش بغيت منه؟
بتال فتح يديه وضم سعود بحرارة:ياهلا والله ياهلا
.
.
<اللهم صل وسلم على نبينا محمد>