ياسمح المحيا جر الهجنية

الجزء الثاني والثلاثون

،،الـجـزء الـثـانـي والـثـلاثـون،،
.
.
لاحول ولاقوة الا بالله العلي العظيم،،اللهم صل وسلم على نبينا محمد،،لااله الا الله
.
>
نشمي بعصبية:اعقب!!
عادل(25سنة)بغبنة:يبه انت وافقت!!
نشمي:ترادد ياعادل!!
عادل:ايه ارادد ذي حياتي وانا باللي بأغدي بها يبه وشو له تظلمني!!علمني ليش بس ليش!!
نشمي:اقطع واخص ماظلمتك ياقطع لهاللسان يالغضيب!!علمتك اني زوجّتك وحبيت راسي وانت مستانس مطيور من الفرح!!وتقول ظلمتك!!
عادل:ايه بستانس يوم اللي بأخذها جميلة ماهي بوسمية!!
نشمي ضربه كف ع وجهه
عادل عض شفته بقهر وهو يحبس عبرته ويبلعها
نشمي بحدة:اوجسته لك ارعني زوجتك انت وفاهد وليلتكم وحدة ثمن قمت حبيت راسي والضحكة شاقتن وجهك غدا ولا ماغدا!!
عادل ضرب صدره بيده وبنبرة عالية من قهره:غدا غدا مير انه الخاطر جميلة ماهي وسمية يبه تكفى يبه حرام عليك تعمل بي هاللون!!والله حرام
نشمي بعصبية:تحرم عليك عيشة الهنا ياعادل تحرم قل امين!!
عادل برجفة صوته وبقلة حيلة وهو يعرف ابوه وطباعه:يبه فاهد اوجسه يبه اوجسه
نشمي بحدة:وهذا اللي انعمل مثل ماتراعي جميلة لفاهد ووسمية لك هذا اللي توجسه خواطركم!!
عادل انخطف وجهه من الصدمة
مسفر(23سنة)دخل:هذا هو فاهد يبه جا
فاهد(25سنة)دخل وراه وقفل الباب:سم ياعم
نشمي بحدة:فاهد
فاهد فز:سم
نشمي:اوجست لي قبل كمن يوم انك باغين جميلة وعادل باغين وسمية صحيح؟!!
عادل يحس قلبه وقف وهو يسمع كلام ابوه والتفت لولد عمه او بالأصح اخوه ماهو بس ولد عمه وهو الوحيد اللي يدري بعشق عادل لجميلة وياكم تغنى عادل عنده بسمرات اخر الليل بجميلة وحبه لها علق عيونه على فاهد ثبتها عليه وهو يتمنى ان اللي سمعه من ابوه كذب
فاهد:صحيح اوجسته
عادل تخدر جسمه من الصدمة وعينه للحين على فاهد
نشمي طالع عادل بحدة:اعقب وتوجس اني ظلوم(ظالم)ياعلّك بالظليمة ياعادل!!
عادل وهو ماسمع ولا كلمة من كلام ابوه تقدم لفاهد وبصدمته منه:ليش يافاهد ليش تعمل بي هاللون وانا اخوك ليش!!
فاهد يطالعه بتكشيرة مرتسمة على وجهه
نشمي بحدته:استح ياعادل استح هذا وليدي قبل مايصير وليد اخوي وانا مارضى له التهايم!!
عادل:كل شين بيدي وزان بعينك عطيتك اياه وانا اضحك لك لو خاطري به!!ليش تغدر بي ليش!!
فاهد بحدة:ماعملت شين بك لاتبلاني!!
عادل بصراخ وسط رجفة صوته:كل شي سلمته لك ولااوجست كلمة وانا خابرن عينك عاللي بيدي مايملى عينك اللي بيدك مير انه اوجست اخوي ويرخص له!!مير جميلة!!جميلة يافاهد جميلة!!عينك على قليبي يافاهد!!مارحمت قليبي!!
فاهد التفت لنشمي وبحدة:يرضيك ياعم يهرج بعرضي يهرج به عيني عينك يرضيك!!!
عادل هجم عليه ومسكه من رقبته وهو يخنقه وبقهر:تعقب ماهي بعرضك
فاهد وهو يدفه عنه:تعقب عرضي غصبن عنك
عادل وهو يضربه وسط دموع ملت محاجر عيونه:جميلة لي لي انا!!تعقب تلمس لو هي شعرة من راسها تعقب!!،،ماحس الا بسحبه قوية له أبعدته عن فاهد،،
نشمي سحب عادل عن فاهد ودفه بعيد بكل قوته عن فاهد
عادل طاح عالارض وطالع ابوه بقهر
نشمي بحدة:استح على وجهك ماربيتك على سواد الوجه ياعادل!!
فاهد ورا نشمي وهو يمسح وجهه ويتأكد صار له شي او لا
عادل بترجي وسط دموعه:يبه تكفى لاتذبحني يبه تكفى طلبتك
نشمي صرخ:انكعم ياعادل انكعم
عادل صرخ:لا يبه لا كل شين على هواه هالفاهد من سنين مير جميلة لا يبه لااا!!
نشمي صرخ:انكعم لايصير الزواج عزا الليلة
عادل ماعاد قدر يكبح دموعه اكثر وفضحته قدامهم
نشمي بحدة:الليلة ليلة زواجك من وسمية وسمية بنت عمك وسمية ماغيرها ياعادل وجميلة لفاهد واقطع هالطريا ولاعاد اوحيها مرتن ثانية ولاتفضحنا بين العربان،،خرج،،
>
الجد نشمي اللي نايم بصالة بيته صحى بدخلة راشد
راشد وقف وهو يطالع قفا جده اللي متمدد عالارض وسط النور المفتوح عنده
الجد نشمي لف على راشد ورفع راْسه وهو للحين متمدد وطالع راشد وباستغراب من وجوده:راشد!!
راشد رغم وجهه اللي مليان تعب ابتسم ودخل ووقف عنده وانحنى شبه جالس وهو يسلم على راس جده ويده:سامحني ياجدي مادريت انك نايم هينا
الجد نشمي زفر وهو ينزل راسه:مسموح وماله داعي هالهرج رح تريح بس رح
راشد وقف:اخليك تكمل نومتك اقفل اللمبات عليك؟
الجد نشمي:لا كبّهن عنك بأغط(غفوة)الصلاة قريّبة
راشد:على راحتك ياجدي،،مشى،،
الجد نشمي بضيقة وهو يغمض عيونه بقوة ويهمس لنفسه:ياشين دعوتك يانشمي صابت ولدك الظليمة وهو ماله بد(شغل)!!
.
..مــكـة..
الجد بادي نايم بالساحة الخارجية بالحرم فز من نومته وجلس وهو يتعوذ من ابليس مسح وجهه بيديه وهو يبلع غصته وبينه وبين نفسه:رحتي وماحللتش ياجميلة ولا انتي اللي حللتيني وانا ابوش!!،،قفل قبضته وهو يكبح عبراته اكثر،،اااه واخيبتك يابادي ذبحت عيالك كل ابوهم بعنادك!!وينك يانشمي ابطيت عني!!ماسدّتك(كفاك)خمس وعشرين سنة!!مابقليبك رحمة لابوك!!،،تمردت دمعة من عينه غصب ومسحها بطرف يده اللي واضح عليها اثار عمره،،
يوسف صاحب الملامح الأجنبية عيون زرقاء وشعر اشقر وبشرة بيضا جلس بجنبه وبكل يد كوب موية زمزم ابتسم له وهو يمد له كوب:ياعم احنا بالحرم مافي شي صعب على رب الحرم!!
.
..بيت عادل..
جسّار بتوتره ورا الباب:ماهو بناقص مردغة والله!!
رهايف جنبه طالعته:كله منك يالثور كان اتصلت وقلت لنا انكم جايين
جسّار:انطمي انطمي لاصكك الحين
امجاد وراهم وبنرفزة:اوص إنتوا الاثنين اوص
ام غازي صحت لصلاة الوتر صلت واستغربت ان ابو غازي مو موجود نزلت وشافتهم معطينها ظهورهم عرفت قفا جسّار اسرعت بخطواتها وبابتسامة:ياهلا والله
جسّار التفت لامه وشقت وجهه الابتسامة وجرى له وهو فاتح يدينه:يالله حيها يامرحبا يامرحبا،،ضم امه ثم سلم على راسها ويدها ورجع ضمها،،اشتقت لك يمه اشتقت
ام غازي ابتسمت وهي بحضنه:كيفك يمه وكيف اخوك،،تركته وبحماس،،جا معك هالشين؟
جسّار بزعل:يمه وانا طيب خذي علومي؟!!
ام غازي:ماعليك قدامي طيب مافيك شي!كيفه اخوك جا ولا لا؟!
رهايف:يمه بتال عند ابوي
ام غازي اتسعت عيونها:وش تقولين؟!!وينهم؟
رهايف اشرت بيدها للباب
ام غازي أسرعت بخطواتها ومسكت الباب بتفتحع
جسّار من وراها مسك يدها:يمه
ام غازي دفت يده وبعصبية:اجل يذبح اخوك!!
جسّار:يمه بتال هو اللي بيزعل اذا صار شي بينكم والسبب هو
ام غازي:خله يزعل اجل يذبحه عادل!!
امجاد:يمه خليهم يتفاهمون ابوي حار وبتّال نسخته حار مثله
ام غازي:وانا اناظرهم يشبّون(يولعون)ببعضهم!!
امجاد زفرت:يمه هم بيولعون ببعض خليهم يمكن يهدون شوي
.
واقف قباله بهيبته المعتادة ملامح وجهه مرتسم عليها القسى بنظراته الحادة رغم هدوء انفاسه وبصوته الغليظ اللي وصل لمسامع بتال ويحمل بنبرته شي غريب على غير العادة:ايه انا انا ماغيره يابتال
بتال يطالعه بصدمة من وجوده ماتوقع يخرج له حتى ولو خرج له اكيد ماهو بساكت له اخذ نفس وقطع هالنفس صوت ابوه
ابو غازي ارتفع حاجبه وهو يطالع اثار الضرب الباقية على وجه بتال وبهدوءه:علامك؟غدت بك ام جلاجل للجلا(المصايب)؟
بتال يطالعه ساكت وهو للحين مصدوم ان ابوه يتكلم معه بهالهدوء
ابو غازي زفر:ايه ماتنلام!!هاذي ام جلاجل ماهو باي شين والسلام
بتال بصدمته:يبه تراك تكلمني؟!!
ابو غازي قطب جبينه وبنبرة عالية يكتم فيها حدته:خابرن اني اوجس لك!!تراعيني امهبول!!
بتال قطب جبينه من اللهجة وفوقها هالتعامل من ابوه اللي للحين مامردغه
ابو غازي وهو يطالع تتنحية بتال صرخ بحدة:ووجعوه بتال
بتال فز:بِسْم الله!!
ابو غازي بحدة:اذلف وجب لي حليب خلفات(ابل)،،عطاه ظهره بيدخل للبيت،،
بتال باستغراب:الحين؟!!
ابو غازي التفت له وطالعه بحدة
بتال:وين ألقى بهالوقت!!ماحولي احد!!
ابو غازي ارتفعت حواجبه من اللي يسمعه
بتال:اقرب واحد تسعين كيلو والحين محد منهم بعزبته(يقصد حظيرة الابل)!!اكيد نيام!!
ابو غازي ابتسم:مشكلتك ماهي بمشكلتي!!
بتال كشر بوجهه من شاف الابتسامة وعرف ان ابوه يبي يبهذله
ابو غازي:يأذن الفجر والحليب قدامي
بتال ابتسم:أبشر ياابو غازي
ابو غازي كشر بوجهه وبزلة لسان:مالك مطب بهالبيت ان إذن وهو ماهو قدامي
بتال اتسعت عيونه:ادخل للبيت؟!!
ابو غازي انتبه لزلته ولايقدر يتراجع وبتكشيرة وهو ينحرق من نفسه من داخل:اللي سمعته
بتال ارتسمت ابتسامة عريضة ع وجهه:كلمتك ياابو غازي ماأثتنى!!
ابو غازي بحدة:اعقب ماهو انا اللي يقول ويثني!!
بتال عطا ابوه ظهره وهو يمسك طرف ثوبه ويرفعه لوسطه ونط الثلاث درجات اللي قدام باب بيتهم مرة وحدة وهو يجري بكل حيله
ابو غازي كشر بوجهه وهو يطالعه ثم دخل لبيته وشافهم قباله وبحدة وسط تكشيرته:وش تنتظرون!!كلن على سريره!!
ام غازي مشت ومرت من جنبه وهي تفتح الباب وتطالع تدور عليه
ابو غازي التفت لها:ماهو بفيه بس ارجعي كملي نومتك!!
.
..مــكــة..
الجد بادي من فز من نومته مارجع ينام وكل شوي يدق بجواله الكشاف على سعود وهو مايرد ودخل قلبه القلق
يوسف وهو يشوف تكشيرة وجهه:عسى ماشر ياعم؟
الجد بادي وعينه بجواله:هالافدغ مايهرجني!!
يوسف قطب جبينه:من هو؟
الجد بادي:سعود
يوسف وهو يطالع ساعة الحرم:ياعم يمكن نايم الوقت متاخر
الجد بادي رفع عيونه للساعة ثم ضيقهن وهو يبي يطالع الوقت هز راْسه:صحيح صحيح يمكن انهم رقود،،انتبه ليوسف والتفت يطالعه وبحدته،،وانت من اوجس لك طاري!!
يوسف انصدم:هاه
الجد بادي بشك:علامك تتابعني(لاحقني)؟
يوسف:بيت الله!!
الجد بادي بتعصيبة:وعلى كبر الحرم ماعينت غير جنبي!!
يوسف:ياعم المكان شرح ويكفي!!
الجد بادي وهو يطالع ملامحه الأجنبية كشر بوجهه يخبي جواله تحت ركبته ويرفع مركوعه اللي عالارض ويوقفه بحيث طرف الارض والطرف الثاني ع كتفه:والله مانك بمضبوط متوبعني من الساحة للحرم وشو له؟!!وش غادين يمّه؟!!
يوسف وقف وهو يكتم ضحكته من سخافة الموقف:تراه الحرم ياعم مو كلن يتوبعك!!
.
..السيارة..
بتال يتثاوب وهو يسوق بالخط السريع وسط صوت منبه السرعة اللي كسر هدوء السيارة طالع الساعة بجواله قطب جبينه وهو يحسب الوقت كشر بوجهه وهو يستوعب انه مايمديه يوصل لراعي الإبل وياخذ الحليب ويرجع الا والناس انتهت من صلاة الفجر تنهد بضيقة وهو يهدي سرعته ولف راجع للبيت وبهمس لنفسه:انت منجلد منجلد خذها قبل الصلاة والناس نايمة ارحم واصرف لكرامتك
.
..بيت عادل..
ام غازي جالسة قباله وهي مبوزة وجسّار حاط راْسه على رجلها ونايم
ابو غازي جالس قبالها وبنفس الوقت وجهه عالباب:روحي نامي يابنت الحلال وخلي هاللي على رجلك يرتاح
ام غازي كشرت بوجهها:ياسبحان الله راحم جسّار!!ولا تبي تفتري بالمسكين؟!
ابو غازي كشر:لا والله اني راحم رجولك من هالحمار اللي متعبك!!،،صرخ،،جسّار ووجع
جسّار نايم ماتحرك
ام غازي:اتركه نايم علي ماهو بعليك!!
ابو غازي وقف ومشى لهم ووقف عندهم وضرب جسار ع كتفه:جساروه
جسّار توجع وهو نايم
ابو غازي توسعت عيونه:ياربي من هالولد!!بكل مكان يتبطح ويرقد!!
ام غازي بنرفزة:اذكر الله بِسْم الله عليه ثم كبّه عنك انا مرتاحة
ابو غازي مسكه من اذنه وهو يشده بها ويرفعها
جسّار رفع راْسه وهو مغمض عيونه:ااه اااه
ابو غازي صرخ:وهواه ياجسار قم قامت عليك!!
جسّار فتح عيونه وبنوم:يبه وش صاير
ابو غازي تركه:رجل امك وسادة يامال العمى اذلف وانخمد على فراشك
ام غازي بنرفزتها:انا مرتاحة اتركه اقول لك!!
جسّار يطالعه بتكشيرة:يبه الغرفة شينة بدون بتال
ابو غازي اتسعت عيونه:شانت ايامك ياجسار اَي والله
ام غازي وقفت وبعصبية وبخوف من دعوته:اعوذ بالله منك خاف ربك ولدك!!
ابو غازي صد بوجهه وهو يستغفر ثم طالعه بحدة:رح ارقد باي مكان لاتشوفك عيني راقد عند امك
جسّار بتكشيرة وهو يجلس ويمسك يد امه وجلسها جنبه ويتكتف:ماني براقد بانتظر معكم
ابو غازي بتهديد:والله لو اشوف عينك هه هه حولها شين من الغفى اني لاخليك تغفى زين
جسّار:ماني براقد يبه ماني براقد
ام غازي صدع راسها من تعصيبته وتطالعه وهي تبلع الكلام
ابو غازي رجع لمكانه وجلس والتقت عينه بعين ام غازي:وش عندك؟قولي اسمعك!!
ام غازي زفرت:ودي يوم لو هو يوم بس يوم كامل مااشوفك معصب ومبهذل الضعوف
ابو غازي اتسعت عيونه:من هم الضعوف؟!!عيالك؟!!
ام غازي كشرت بوجهها
ابو غازي:الله يكفينا شرهم بس كان تشوفينهم ضعوف!!
جسّار بنبرة هادية:يبه اذكر ربك ترا مايضرك!!
ابو غازي نزل نعلته وحذفها عليه
جسّار مسكها بيده وباستعباط:زي العسل والله!!
ابو غازي بحدة:انكعم ليتك خامد!!
جسّار:ان شاء الله ان شاء الله نسكت امرنا لله
ابو غازي اتسعت عيونه وهو يشوفه يرد عليه لكن قاطعته دخلته
ام غازي اتسعت ابتسامتها وهي تشوفه بعد ماالتفت له ووقفت
بتال دخل
ابو غازي بحدة:اقف ماتخطي خطوة
بتال زفر ووقف وهو مرجع يديه ورا ظهره ومنزل راسه:سم يبه
ابو غازي وقف واتجه له ووقف قباله بكم خطوة:مسرعك راجع!!،،ابتسم،،ماعينت شي!!يالله عطني مقفاك برا برا يالله!!
بتال رفع عينه لابوه وابتسم
ابو غازي كشر بوجهه
بتال خرج يديه اللي ورا ظهره ومدها لابوه
ابو غازي قطب جبينه وهو يشوف العلبة اللي بيد بتال
بتال ماسك بيده علبة حليب ابل جاهز ومدها لابوه وبابتسامة:سم
ابو غازي للحين مو مستوعب
ام غازي كتمت ضحكتها وهي تطالعهم
بتال بابتسامة:انت ماقلت من وين كل اللي تبيه حليب خلفات وبس!!
.
..بيت مسفر..
شذى دقت باب غرفة نوم امها وأبوها
ام جواد اتجهت للباب وفتحته بعد ماصحت بدقته وبنوم:وش فيك؟!
شذى:يـمـه صحي ابوي عمي وعياله قايمة قيامتهم
ابو جواد جلس عالسرير:عواطف فيكم شي؟
ام جواد التفتت له:اخوك وعياله مدري وش فيهم
ابو جواد فزّ من السرير مثل ماهو بتوتر وقلق مابدل ولا فكر يبدل اساسا مشى بخطوات سريعة ووقف ع باب البيت وهو يطالعهم اختفى توتره وقلقه وهو يشوفهم
.
..بيت نشمي..
الجد نشمي متمدد بالصالة ينتظر الاذان قطب جبينه وهو يسمع أصوات وقف وهو يتعوذ من الشيطان بينه وبين نفسه خرج وهو يتسند ع عكازه ووقف عالباب وهو يطالعهم:يالله صباح خير!!
ابو غازي ماسك جسّار من قفاه من ياقة ثوبه يسحبه وراه وهو يطارد ورا بتّال بالحوش وبصراخ:اقولك تعال تعال
جسّار وهو يحاول يفك نفسه لكن ابوه مثبتة:يبه تكفى اتركني مالي شغل انا!!
ابو جواد ابتسم وبهمس:رجع بتال!!،،زفر بوسط ابتسامته ورجع بيته،،
ابو غازي وقف وهو يدف جسّار بقوة لقدامه وبحدة:ورب البيت يابتال ماجيتني دفنتك!!
جسّار بالقوة توازن والتفت لابوه وصار بين ابوه وبتال
الجد نشمي زفر وسط تكشيرته وهو يطالعهم
بتال وقف وطالع ابوه:ماسويت شي!!
ابو غازي بصراخ وسط غبنته:وتقولها بقواة عين!!ماسويت شي!!اصغر عيالك انا!!تستعبط على راسي!!،،اشر بـيـده،،اقرب اقرب بس!!
بتال:يبه هدّ نفسك ماله داعي الفضايح
ابو غازي بحدة:خل حركات المبزرة تمنعك من الفضيحة الحين يابتال
بتال انتبه لجده وبرجى:جدي!!
ابو غازي معطي ظهره للبيوت ماانتبه لابوه:جدجد(حشرة)ياكل راسك يالثور!!للحين ماسك خط المبزرة!!ماتعقل انت!!تعال احسن لك،،بصرخة وحدة،،تعال!!
بتال:أجيك وتذبحني صاحي انا!!
ابو غازي صرخ:والله ان ماجيت من نفسك يابتال لاربيك من جديد تسمع والله لاربيك!!
بتال يطالع جده وهو ورا جسّار:تكفى ياجدي افزع!!
ابو غازي جرى له
جسّار مع انه ماله شغل بالسالفة لكن بردة فعل طبيعية متعود عليها جرى اول ماشاف ابوه يجري لجهتهم
بتال وقف بمكانه ماتحرك
ابو غازي مسك بتال من ثوبه من على صدره وزمه وهو ناوي يجلده
الجد نشمي وقفه:عادل
ابو غازي وقف والتفت لابوه
الجد نشمي:مابك طب ياعادل!!
ابو غازي بغبنة وهو يحرك بتال اللي مستسلم له:يبه ذَا الولد
الجد نشمي قاطعه:بوجهي ياعادل اتركه
ابو غازي طالع بتال بغبنة
بتال يخفي وناسته بعد تدخل جده
الجد نشمي:ماتلمس شعره منه وبعد الصلاة يصير خير!!،،عطاهم ظهره متجه لبيته،،
ابو غازي دف بتال وهو يتركه
بتال زفر براحة وارتسم طيف ابتسامة أخفاه بسرعة
ابو غازي بتهديد:الوعد بعد الصلاة يابتال
بتال بلع ريقه ثم ابتعد عن ابوه ولحق جده:ياجد انتظرني جاي وراك
.
.
يوم جديد
.
.
واخيرا بعد صلاة الفجر>>
..بيت الجد نشمي..
،،الصالة،،
الجد نشمي جالس متوسطهم زفر بضيقة منهم وهو يطالعهم
بتال ع يسار جده جالس قبال ابوه وبتكشيرة:جدي هالمرة مالي ذنب بشي!!
ابو غازي بحدة:اتبلاك انا!!!
بتال:انا سويت اللي قلته وانت ماعجبك وش ذنبي
ابو غازي وهو يرفع يده:اعقب!!
الجد نشمي بصراخ:بس!!
ابو غازي نزل يده وهو يزفر بغبنته
الجد نشمي:الى متى الى متى وأنتم بس تتذابحون ها!!،،طالع ابو غازي،،استح على وجهك هذا انت الشيب مالي رأسك وعاجزن تقضب روحك!!،،طالع بتال،،وانت اللي برأسك وعملته وللحين برأسك حرش!!حرام انه حلال من مددكم يالاثنين بهالصالة ودبغكم الى ماتوجسون امين
ابو غازي اتسعت عيونه:يبه!!
بتال:راضي ياجد ادبغني مثل ماتحب!!
ابو غازي كشر بوجهه وهو يسمع كلامه
بتال:بس جواد ماياخذ رهايف
الجد نشمي قطب جبينه وسط تكشيرته
ابو غازي:وشو!!مين انت حتى تعترض على شين خلصنا منه!!وانت بالذات انت مالك كلمة عليها!!
بتال كشر بوجهه:لي كلمة يبه اخوها!!
ابو غازي بحدة:تخاوت عليك ذيابة!!علمتك من الاول ماله داعي تجي وياليت تخففها علي وتفكني من وجهك
بتال بغبنة:وانا قلت لك اختي وشلون مااحضر فرحتها وشلون!!وبعدين انا مو موافق على هالزواج ابد!!
ابو غازي:ومين انت عشان ناخذ موافقتك!!احمد ربك انك للحين تكلمني بعد سواد وجهك!!
بتال بقهر:وش هو سواد الوجه اللي سويته يبه وش هو؟!!
ابو غازي ضحك بغبنة:ابد طال عمرك ماتسوي شي يازينك ويازين فعولك!!
بتال:رزقي يبه رزقي!!ثم انا ماضريت احد وانا ادور رزقي ولا تبي تصرف علي طول عمري!!
ابو غازي:عسى هالرزق مو مبروك يابتال قل امين!!
بتال كشر بوجهه:ماهو بآمين!!
ابو غازي:يا هالرزق اللي ماحلا بعينك الا من ورا ام جلاجل!!
بتال بعصبية:وش فيها ام جلاجل انا ماجيت احد حيلي بشغلي بس ماعرفت احد ابدد!!
ابو غازي بتعصيبته:وحدود الخرايط اللي باقية بوجهك!!
بتال سكت وهو يدري ان كذبته مكشوفة
ابو غازي:تقول لي انها ماهي بمنهم ها!!قوله بس حتى أذبحك وأخلص!!
بتال:ام جلاجل وهالكره كله لها ليش!!قول اللي عندك يبه لاتعلقني بشي وانت تعرفني!!
ابو غازي بنفس التعصيبة المستمرة وبلهجته: انت غديت يمهم وخلصت وشو له تنشدني بعد فعلتك!!مير ماانت بتايب الى منك تراعي عيال
الجد نشمي قاطعه بحدة وهو يطالعه بنظرة لو تذبح ذبحته:عادل!!!
بتال يطالعهم وهو تلعب فيه شكوكه واللي زاد هالشك ابوه اللي يأخذ ويعطي معه ماكأنه مهدده وطارده من قبل
الجد نشمي:خلاص ياعادل هالموضوع وقفله الولد وتوظف وباشر وخلص ماله داعي تصدع بروسنا على شين قضينا منه!!
ابو غازي بغبنة من بتال اللي ابوه واقف بصفه: مالك شغل لا بجواد ولا رهايف سامع!!
بتال بعناد:الا لي شغل وانا ماني براضي على هالجواد ابد
ابو غازي:تعقب تمشي كلمتك علي تعقب!!
بتال:انت ليش ماتسمع لاحد ليش!!
ابو غازي:مابقي الا انت تسوقني على كيفك يابتال!!
بتال زفر وبنبرة هادية عسى ابوه يسمع له:محشوم يبه محد يمشي كلمته عليك لكن لازم تسمع لنا محد يبي جواد محد يبيه ولا واحد منا يبيه يأخذ رهايف
الجد نشمي رفع يده بوجه ابو غازي بمعني أسكت ثم طالع بتال:ليش ماتبي ولد عمك؟وش اللي ناقده عليه؟
بتال:ياجدي انت تشوف وشلون يتعامل معنا الرجال مايبينا ولايبي لنا شوف وشلون تزوجونه رهايف وهو كارهنا والله ان يذوقها القهر!!
ابو غازي بحدة:معصي يابتال معصي رهايف برأسها هي اللي تبيه وهي اللي متفقة معه على امورهم بينهم يالاثنين
بتال انصدم ووضح على وجهه:رهايف تبيه!!رهايف قالته؟!!
ابو غازي:ايه هي اللي تبيه ومالك حق تنطق حرف يابتال لكن انت ناويها شر ماترتاح ولا يهنى لك بال وانت تشوف عيالي مبسوطين
بتال اتسعت عيونه وهو يسمع التخصيص من ابوه لأول مرة بحياته وهمس:يبه
ابو غازي:وين تبعد عنه!!ايه ابوك ماانت بغادين بعيد عنه الحقد مالين قلبك مثلك مثله!!وين تبعد ياولد فاهد عن فاهد وين!!
الجد نشمي بحدة:عادل!!
ابو غازي انتبه لحجم الكلام اللي نطق فيه وركز عينه على بتال بوسط صدمته من نفسه
بتال الصابر على الكلام الجارح كلمة ورا كلمة سنة ورا سنة لحد ماصارت أكوام مشاعر مجروحة طوال سنين وكان هالكلام بداية تفجر هالمشاعر شد على قبضته وبحدة:ودامني ناوي شر وحاقد ومايهنى لي بال وانا اشوف عيالك مبسوطين ليه مخليني ببيتك!!
ابو غازي سكت وهو يختلج صدره الندم لكن ماوضح على ملامحه ولاتراجع عن كلمته
بتال بقهر وهو مثبت عينه على ابوه:كان عزلتني عنهم مثل اَي حيوان يعزلونه!!
الجد نشمي بحدة:بتال!!
ابو غازي ساكت
بتال:وليش اهدرت(مسفوك)دمك دوني!!كان تركت الوضع مثل ماهو وارتحت مني بدون مايكون لك يد باللي صار!!
الجد نشمي:بتال انت
بتال قاطع جده وعينه على ابوه للحين:بالعكس كثر خيرك الناس بتتشكرك على سواتك وبيدعون لك ضفيت هاليتيم لكن هو ماهو بوجه خير مابه سنع الأعوج اعوج!!
ابو غازي صد بوجهه عنه
الجد نشمي يطالع ابو غازي وانقهر منه اللي ساكت ولانطق حرف ثم التفت لبتّال:بتال ياولدي ابوك ماقصد اللي يقوله
بتال طالع جده وبحدة:اهل امي جميلة
الجد نشمي انصدم
ابو غازي ماكان بعيد عن ابوه بالصدمة
بتال بحدته:اهل امي ابي أتعرف عليهم
وأتواصل معهم
.
.
<اللهم صل وسلم على نبينا محمد>