ياسمح المحيا جر الهجنية

الجزء الثامن والسبعين

،،الـجـزء الـثـامـن والـسـبـعين،،

سبحانك ربي لااله الا انت استغفرك واتوب اليك،،سبحان الله وبحمده سبحان الله العظيم
.
.
..قرية عيال عبري..
مجلس الشيخ وتحديدًا عند نار المشب الجد بادي والجد نشمي ونشمي وفاهد وابو غازي جالسين ومحاوطينهم مجموعة بأسلحتهم من عيال عبري،،
ابو غازي جالس بعيد عنهم شوي ويلصق باللي واقف عنده وهو صاد عنهم
الجد بادي جالس قريب منه زفر وهو يطالعه:عادل
ابو غازي مارد
الجد نشمي جالس على مسافة بسيطة عنه وجنبه فاهد ونشمي بينه وبين الجد بادي:ولد ياعادل
ابو غازي مارد
فاهد كشر بوجهه وهو يطالع ردة فعله:ترا ماهو انت بروحك اللي ضايقتن به الوسيعة!!
ابو غازي اتسعت عيونه وهو يسمعه والتفت له:وشو!!
فاهد:خابرن جمايلك يم وغدي مير مردّه وغدي ياعادل
ابو غازي فز واقف وبصراخ برزت معه عروق رقبته:انكعم يافاهد انكعم وغدك على وريقات وينك عنه يوم انه بعازته!!
فاهد وقف وبحدة:هذاني غديت يمّه أريده وأريد له العوض ياعادل
نشمي ثنى رجوله وتكى بكوعه على ركبته وسند راسه ع كف يده وهو يزفر
ابو غازي ضحك:راع راع وش عملت به غديتك!!
فاهد:مير اني خابرن بيغدي هاللون ولا من الاولة وشو له هجيت!!
ابو غازي:انا اللي هجيت ماهو بأنت
فاهد كشر بوجهه
ابو غازي:هجيت به عن ام جـلاجـل عقب ردى فعولك لاتلحقه دسيته(خبيته)واوجست اكذاب من يمين ويسار اتعقى(اتفادى)الصرايم وهاذي هي نزلت يوم اللي عودت يافاهد
فاهد:هاذي هي اكبر الصرايم وغديت يمّها كود امنع شرها عنه ياعادل
ابو غازي بحدة:وثمن يافاهد وثمن؟
فاهد:اوجست يمك ياعادل عودت تايبن واوجست يمي اطس مير مانيب طاس ولاني معودن الى مني اتخبر وش تاليتها مع وغدي اللي صاك عليه وراده عني
ابو غازي:راده عنك لاني مااخبر وش تاليتك اجل اجدعه يمك وثمن تعمل صريمة وتهج وتكبه وسطها!!
فاهد بحدة:الله غفور رحيم قبل التايب ولاصك بيبانه علامك مابقلبك رحمة!!
ابو غازي:الرحمة انمزعت(انشالت،اختفت)من ارعيت فعايلك يافاهد
فاهد:هذا انت قنقك قنق ياعادل!!
ابو غازي بسخرية:من اللين اللي ماصعن رقبتك يافاهد!!
فاهد يطالعه وهو يعض ع شفته مايبي يغلط وتكبر المشكلة
الجد بادي بحدة وهو يطالع فاهد:عادل مااوجس غير الصحيح
الجد نشمي وعينه على الجد بادي:وفاهد اوجس الصحيح مير عادل قنقه قنق!!
الجد بادي وهو يطالع الجد نشمي:نشمي!!
نشمي زفر:والله ماينلام بتال بكم يوم تبرا وجحدكم مير انا المخطي يوم اني لفيت معكم،،وقف وهو يبتعد عنهم وجلس وهو يعطيهم ظهره،،
ابو غازي جلس جنب الجد بادي وعينه بعين فاهد يتبادلون نظرات غيظهم
>>بزاوية احد البيوت اللي تلف مجلس الشيخ>>
فارس:ياجد انتم توجسون راعي اذية!!علامكم توحون له!!
سويلم بغبنة:عسى صدقته!!
ضبعان ساكت يفكر
سويلم بقهر:علي الحرام انه يوجس اكذاب وربي وربي كودني اكذب ياعلي بصرايم مالها اول من تالي
ضبعان زفر:عوذا منك ياسويلم
سويلم:ياعم انت أوجست رايي يسري
ضبعان:مير اللي غدا غير عن اللي نخبره
سويلم اتسعت عيونه:صدقته!!
فارس:جدي!!
ضبعان التفت لسويلم:سويلم وانا عمك
سويلم:لاتومن له ياعم لاتومن(لاتستأمن)
ضبعان:سويلم ياسويلم
سويلم كشر بوجهه وبحدة:اوحيك
ضبعان:اللي باوجسه لايغيظك لانه صحيح ابوك وأخوانك وطامي وحتى انا والقبيلة من اول راعين صرايم لنا صولات وسط العربان(يعتدون عالناس)وانت خابر هالعلوم
سويلم بحدة:وثمن؟
ضبعان:فاهد من اول يوحي لإخوانك وطامي اكثر من اهله ولااوجس اكذاب كود اوجست ان طامي وإخوانك هم البلا بفعوله
سويلم:عمي!!
ضبعان:التالي ياسويلم ان اللي عدا(هجم)يم اخوي ووغدانه وحتى وغدي وكب هالخنجر وراه رايدن علمّه يصل يمّنا
فارس قطب جبينه:يعني فاهد قطع العلم!!
سويلم رجف قلبه:لا ياعم لا
ضبعان زفر:هذا هو راعي هالخنجر عمل العلم هو وربعه رايدن صريمة بيننا وفاهد ماله علم باللي غدا
سويلم بقهر:وحق ابوي واخواني يغدي!!!
ضبعان:لا ماهو بغادين ياسويلم
سويلم قطب جبينه وبحدة:وثمن؟!
ضبعان طالعه:تريد حقك كل ابوه ولاهو بباردن دمك ياسويلم؟
سويلم وقف وهو ياخذ سلاحه؛اَي بالله ياعم
ضبعان وقف:اجل طاوع شوري كل ابوه ولااوجس شين ابد،،مشى ومشوا وراه فارس وسويلم،،
.
..المستشفى..
سعود دخل وهو يتجه لبخوت بعد ماعرف بسالفة جسّار من غازي اللي قابله صدفة بالمستشفى وقف عند انتظار النساء على مسافة بسيطة وهو ينادي:بنت يابخوت ام حلايا
بخوت فارشة السجادة بزاوية الانتظار وجالسة تستغفر بعد ماصلت استخارة للي ناوية تسويه
حلايا متمددة عالكراسي ونايمة صحت بصوته وطالعت بخوت:ماما سعود؟
بخوت زفرت وهي تتوكل على الله بينها وبين نفسها وقفت وهي تطبق السجادة وهمست لحلايا:ايه سعود
حلايا جلست وهي تنط من المراسي وجرت برا الانتظار اتسعت ابتسامتها:سعووود،،جرت له،،
سعود فتح يديه وهو يشيلها لحضنه ويضمها:ياعين سعود وروحه،،بوسها،،
بخوت طلعت له
سعود نزل حلايا وهو يشرع لها وسحبها لحضنه:بسم الله على روحش ياأخت سعود بسم الله
بخوت بكت وهي بحضنه
سعود:الحمدلله على سلامته قرت عينش ماعليش بكرة ان شاء الله تزين اموره ادعي له
بخوت وهي تتركه:سعود
سعود:ياعينه
بخوت:اريد اغدي يم محل
سعود باستغراب:ذالحين!!
بخوت هزت راسها بايه
.
..قرية عيال عبري..
ضبعان وقف قبالهم
،،الكل وقف وسط ملامح جدية من جدية الموقف بينهم،،
الجد بادي:اوجس علمك ياضبعان؟
ضبعان:مير حنا ماتريد عسير امرنا هين
الجد نشمي:وتم
ضبعان:نريد فاهد يغدي يم المركز
سويلم:عمي!!
ضبعان:ويوجس العلم كل ابوه ولاعلينا كود انه طال من قومن عامل بهم صريمة
سويلم:خاف الله ياعم بنا خاف الله!!
ضبعان التفت له:نسيت وش اوجست يمك نسيت!!
سويلم عض شفته وهو يطالع فاهد بحقد
ضبعان طالع فاهد بحدة:وش علمك يافاهد؟
فاهد اخذ نفس:تم على ماتريدون ابشروا
شاب من عيال عبري يجري وقف على مدخل القرية:الدوريااااات ياعبرية!!
،،الكل صوب بالسلاح عليهم،،
ضبعان يطالعهم بحدة:اهبوا وصريمة تنزل بكم!!
سويلم وهو مصوب بصراخ:ارعيت!!هماني أوجست ياعم لاتومن لهم!!
الجد نشمي بحدة:لو انا رايدين به شرطة لفينا من اولها معهم ياضبعان!!
ضبعان:اعقب!!
الجد بادي بحدة:ضبعان يارجل اغدوا بهالبلاوي جوا لاتغدي علومن قشرا!!
ضبعان عض شفته للحظة بقهر:عبرية كل البنادق بالبير اعجلوا
،،دخلت الدوريات للقرية،،
،،الكل جالس حول النار بهدوء وهم يتقهوون،،
ضبعان وقف:حيهم ياحيهم القهوة ياعيال القهوة
الضابط وقف وبابتسامة:سلمت سلمت ماشاء الله ماشاء الله عساها دايمة بس وين ضبعان؟
ضبعان:وصلت اسلم؟
الضابط بابتسامته:تفضل على قهوتنا انت وضيوفك واللي يسمعون أساميهم معهم
.
.........****..........
يوم جديد
.........****..........
.
..بالسيارة..
ام غازي جالسة ورا الجدة منيرة وهي على أعصابها تكبح عبرتها مابين مصدقة ومكذبة للأخبار اللي وصلت لها
امجاد جالسة جنب امها وهي كل شوي تلتفت تطالعها بقلق
عذبة جالسة جنب امجاد وهي تهمس بأدعية
هيفاء جالسة ورا راشد وهي كل شوي تطالع المراية تطالع ملامحه تتطمن عليه
الجدة منيرة جالسة بمكان الراكب:اعجل ياراشد علامك بطي!!
عذبة:لا لاتسرع ياراشد،،طالعت امها،،يمه بنوصل ان شاء الله وجسار مافيه الا العافية ادعي له انتي مسافرة ادعي يمه ادعي
.
..بيت طلق..
طلق واقف عالباب:تحرصي على روحش
شامة بابتسامة:ابشر
طلق:لاتبطين بالبيت اغدي يم بيت عمي وباتي يمهم الليلة
شامة:ان شاء الله بس انجز كم غريضن حولي
طلق:كبيه لامني اعود يم البيت واعمليه على هونش
شامة:تريدني اكب التمر والقط(المضير)لامنك تعود!!يعدم(يخرب)
طلق زفر؛لاتتعبين روحش على هونش اليوم اغدي يم اهلش مثل مااوجسه وبكرة عودي مع خياتش واعملي ماتريدين ثم عودي يمهم وثمن معود انا ونادي يم البيت
شامة زفرت:ان شاء الله ان شاء الله
طلق بتأكيد على كلامه:شامة اوحيتي العلم؟
شامة؛اوحيت اوحيت
طلق:تراش مانش بلحالش معش وغد خافي ربش به
شامة كشرت وبزعل:طلق!!ذال عليه ماهو بعلي!!
طلق ابتسم وهو يبوس جبينها:ذال عليكم كل ابوكم ياشامة كل ابوكم،،فمان الله
شامة مسكت يده:تحرص على روحك
طلق ابتسم:يومين والثالث يمش ان شاء الله،،سحب يده،،فمان الله
شامة:حافظك الله ياعيني حافظك الله
طلق خرج
شامة قفلت الباب وراه واتجهت لداخل البيت وجلست عالسرير الحديد اللي فوقه عناقيد التمر وهي تنقي(تختار الزين وتقصه)وتحطه فوق الفرشة اللي عالسرير حتى يجف وهي تهمهم بابتسامة
،،دق الباب،،
شامة عقدت حواجبها وهي ماتتوقع واتجهت للباب ومن وراه:مَن؟
.
..المركز..
،،بعد ساعات من الانتظار الى ان بدا الدوام الرسمي،،
،،غرفة الضابط المناوب،،
سعود جالس بتكشيرة وزعل مرتسم على وجهه وحلايا بحضنه
بخوت ضامة يديها بتوتر
الضابط:تفضلي ياأخت بخوت وش المهم بخصوص القضية؟
بخوت:انا ابي أتنازل عن غيث
سعود عض شفته وهو يغلي بقهر منها
الضابط:الموضوع مو لعبة عشان تتنازلين!!انرفع للمحكمة وبدا امر رسمي!!
بخوت برجفة صوتها؛مير انا مااريد اجر ابو بنيتي بالمحاكم وثمن حنا محله بيننا وسط القرية
الضابط تنرفز منها:وش تخليته وسط القرية!!لعبة الموضوع
بخوت:اللي تريدونه ومايحل بس عقب التنازل راضيتن به
.
،،التوقيف،،
ابو غازي ماغفت عينه ابد من الحرقة اللي يحس فيها وهو يتوعد بتال بينه وبين نفسه
فاهد بالجهة المقابلة له مكشر بوجهه
الجد بادي والجد بادي وضبعان ونشمي وفارس يفطرون
سويلم يمرر نظره عليهم بتكشير
فاهد بتكشيرة:هاذي تالية تربيتك ياعادل!!
ابو غازي طالعه وبغبنة:مير ماغدا بهاللون غير يوم خبرك!!
فارس كتم ضحكته وهو يطالعهم
ضبعان ارتفعت حواجبه وهو يطالعهم
الجد بادي ابتسم برضا عن رد ابو غازي
فاهد:لو انك مخزين ابليسك ماغدا هاللون!!
ابو غازي:لو انك كاف شرك ولاعودت يمّنا ماغدا هاللون!!
ضبعان تنهد:دايم كذيا؟!!
سويلم:مير عادل يوجس صحيح
الجد بادي وهو ينزل الخبزة وبشعور انتصار:ارعيتوا!!!حتى الغريب اللي مايخبر شين اوجس صحيح!!
ضبعان؛مير سويلم مايريد فاهد يريد يمه الصرايم
سويلم كشر:عمي
ضبعان:هذا الصحيح!!
الجد نشمي التفت لبادي:اوحيت!!
نشمي مرر نظره بين ابو غازي وفاهد:لاحدن يلوم احد توحون
ابو غازي وفاهد التفتوا له
نشمي:ماتخبرون وش اوجس يمكم غازي؟
،،الكل طالعه،،
نشمي:غيظه شين وهذا اوله مير عينوا لكم دبرة لاطلعتوا يرضى يواجهكم مع اني عقب سواته هاذي ماظنتي والله بيرضى
ابو غازي كشر بوجهه:معصي
ضبعان زفر بسخرية:عصّه الى ما ينفقش(يروح)قنقك لانه دام هذا علمه عز الله ان لاارعاكم يمين ضرب اليسار
سويلم:ماعلي منهم،،طالع فاهد وبحدة،،مير عيني ماتزل عنك الى من الشرطة توجس تالية العلم اوحيت!!
.
..المستشفى..
غازي دخل للطوارئ وهو يهرول بخطواته وقف عنده وهو يهمس من بين اسنانه بغبنة:بتال
بتال متغطي كله وهو نايم
غازي سحب اللحاف وبغبنته:بتال ووجع!!
بتال صحى وهو يتثاوب ومتمدد على سريره بيساره الملفوفة بجبيرة وطرف شفته العلوية من جهة اليمين اللي بها غرزتين وفوقها ضمادة وبأنفه اللي واضحة عليه الكدمات:خير
غازي بغبنة:وين الخير قولي وينه؟!!!
بتال فز جالس وهو يخفي وجع جسمه وبقلق:وش فيه جسار فيه شي قالوا لك شي؟؟
غازي بعصبية:يعني فوق همي تزيديني هموم!!
بتال بحدة:لاترفع ضغطي اكثر قولي وش فيه جسار!!
غازي زفر:هو لو قالوا شي شفتني قدامك!!
بتال تنهد براحة وهو يرجع يتمدد ويسحب اللحاف معه:الحمدلله شويات وصحني
غازي سحب اللحاف:بتال!!!
بتال كشر بوجهه وبصراخ:فجرت أذني!!اسمعك ترا وش تبي؟!!
غازي:ابوي وجدي راميهم بالتوقيف وتسال!!
بتال ببرود:قلتها ابوك وجدك!!
غازي اتسعت عيونه:بتال لاتطير عقلي!!
بتال جلس وهو يزفر:وش فيه وش اللي مزعلك روح طلعهم على كفالتك وانتهى الموضوع ليش جاي ومزعجني!!
غازي:صاحي انت ولا مهبول!!وش فيك صاير بزرنجي!!كبر عقلك وش هالحركات!!
بتال زفر بسخرية:الحمدلله مكبر عقلي مع انه المفروض العكس!!
غازي بحدة:استح يابتال!!
بتال:ترا ماسويت شي غلط بس اخذ حقي وادفع المصايب عني!!
غازي بتقطيبة جبينه:ابوي وجدي صاروا مصايب!!
بتال بانفجار:وابوي وجدي وخالي كلهم كلهم مصايب حلت على راسي واللي يصدع براسي اطرده عني ماهو بشي جديد علي!!
غازي بحدة ملامحه:الحين اهلك صاروا مصايب!!ياعيب والله عيب عليك يابتال!!
بتال بغبنته:ايه مصايب مصايب انا فارقت راحة البال طارت ياغازي طارت ماعادني مرتاح حتى النوم ماانام الا بعد تعب وإرهاق ماعاد هنت لي نومة منهم!!
غازي زفر:بكيفك يابتال بكيفك،،لف عنه بيمشي،،
بتال وهو يتمدد:غازي
غازي التفت له بتكشيرة
بتال:شويات وصحني سمعت
غازي مشى وهو يعض شفته بغبنة منه
.
.........****..........
..السيارة..
يوسف يسوق
ابو جواد جالس جنبه وهو يزفر:كلمت اخوك
يوسف:جواله مغلق
ابو جواد:لاحول ولاقوة الا بالله وش هاللي سواه!!
يوسف بقهر:اكيد فيه شي احد قايل له شي
ابو جواد بحدة وهو يفهم تلميحه:يوسف!!وبعدين ابو غازي معهم لاترمي التهايم!!
يوسف زفر:السموحة ياعم غصب عني والله
ابو جواد تنهد:الله يعين وييسرها من عندها
.
..بيت خالد..
عذاري اللي باتت عند اهلها من سافر غازي نازلة عالدرج وهي تتثاوب ابتسمت وهي تطالع سهام
سهام شايلة من الفطور وتمشي متجهة لحديق البيت وبابتسامة:صباح الخير
عذاري بابتسامة:ياعيني عالسناعة يعني تركتي دوامك عشان تطبخين وتنفخين!!
سهام ابتسمت:اموتك سناعة انا وش عرفك بس!!
عذاري ضحكت وهي تمشي جنبها:يمّه يالسنعة،،انصدمت وهي تطالع ابوها قدامها،،يبه!!،،ابتسمت وهي تسلم على راسه،،صبحت بالخير
ابو صايل:صباح النور ياعيني صباحه،،مد يديه لسهام،،عنك
عذاري قطبت جبينها باستغراب
سهام استحي من عذاري:لا عادي بأشيله مو ثقيل
ابو صايل اخذه منها غصب وهو يطالع عذاري بابتسامة:عذاري بيجيك اخو ولا أخت
سهام تغير وجهها بخجل من كلامه
عذاري بابتسامة:مبروك الف مبروك يبه،،التفتت لسهام،،الله يتمم لك على خير مبروك ياسهام الف مبروك
.
..الفندق..
جواد خرج من الحمام بعد مااستحم وهو يمسح يديه بالفاين اللي معه رماه بالزبالة وزفر وهو يطالعها
رهايف معطيته ظهرها وهي متمددة على طرف السرير ومتغطية زعلانة منه
جواد وهو يجلس عالسرير:لاتاخذين راحتك بالنوم ترا هالفندق مؤقت
رهايف قطبت جبينها وهي تسمع كلامه
جواد تمدد وتغطى وهو يغطي عيونه بيمينه وبنوم وتعب:بس نريح وبعدها نغيره
رهايف بدون لاتلتفت له:وليش ان شاء الله!!
جواد:فيه فيران
رهايف تقلبت بالسرير وهي تلصق بجنب جواد الايمن ومعطيته ظهرها
جواد للحين بنفس وضعه ابتسم وزم شفايفه وهو يخفي ابتسامته:ترا قالي اللي ينظف انهم كبار مرة
رهايف قشعر جسمها وهي تلف له وتحاوطه بيدها اليمين:جواد
جواد:هممم
رهايف:قوم خلنا نغيره
جواد؛تعبان تو واصلين مافيني حيل
رهايف:تكفى جواد يالله حبيبي
جواد:الحين حبيبك!!وانتي منفسة علي بالطيارة!!
رهايف:لاتصير حقود ماتنسى شي،،ضمته اكثر،،قوم حبيبي يالله
جواد نزل يمينه وهو يضمها له:نامي انا معك
رهايف:ترا فار مو لعبة والله مااقدر
جواد:خليني اريح ساعة وابشري بس ساعة
رهايف بترجي:جواد تكفى
جواد استسلم للنوم وتركها وهي تترجاه
.
..بيت خالد..
،،بعد الفطور،،
سهام شايلة صينية الأكواب
عذاري وراها وبابتسامة:اتركيها لاتشيلين شي ثقيل
سهام كشرت بزعل وهي تلتفت لها:عذاري
عذاري ضحكت
سهام تعثرت بخطوتها وزلقت
عذاري صرخت وهي تمسك طرف بلوزتها وتشدها لفوق قبل تطيح ومسكت يدها اخيرا:سهام
سهام طاحت الصينية منها واعتلى صوت تكسير الأكواب اللي طاحت عالارض وغمضت عيونها بقوة وهي تنتظر الطيحة
عذاري انخطف وجهها وهي تحس بوجع أسفل بطنها من مسكتها لسهام
ابو صايل وقف وهو يطالع عذاري وسهام وفهم الوضع غلط وبوسع عيونه صرخ وهو يجري لهم:عذاااااري!!،،وقف وهو يضرب يد عذاري بيساره ويرفع سهام بيمينه،،
عذاري اتسعت عيونها بصدمة
ام صايل وقفت عندهم وهي تطالعهم بفجعة طالعت عذاري بوجهها المخطوف:يمّه فيك شي
ابو صايل وهو يطالع سهام اللي بين يديه:فيك شي تعورتي
سهام وهي تبلع غصتها بخوف هزت راسها بلا
عذاري همست وهي تبتسم وتخفي المها:مافيني شي يمه
ام صايل:وش فيه وجهك يمه
ابو صايل وقف وهو يوقف سهام وبحدة وهو يطالع عذاري:ايه وجهها يتغير يازهرة لان اللي تبيه ماصار
عذاري قطبت جبينها باستغراب
سهام اتسعت عيونها
ام صايل باستغراب مثل بنتها:وش قصدك ياخالد؟!!!
عذاري اتسعت عيونها وهي تفهم:يبه!!لايكون
ابو صايل قاطعها بلحظة غضبه:ايه ماتبين حملها يتم ولا وش معنى اللي سويتيه!!
سهام بفجعة:لا ياخالد لا!!
عذاري غرقت عيونها دموع وهي تحس بكلام ابوها سكين اخترق صدرها كيف يفكر فيها بهالطريقة وهي وحيدته صحت(ااااه ماني بوحيدته الحين ماعاد يهم وجودي)
ام صايل بحدة:خالد!!كيف تفكر ان عذاري ممكن تسوي كذا!!!
ابو صايل بحدته:اذا ناوية تكملين هالحركات لانشوفك الى ماتولد سهام
سهام بعصبية:خالد عذاري مادفتني!!انا تعثرت!!
عذاري طاحت دموعها وهي تطالع ابوها بقهر
ابو صايل التفت لسهام بصدمة:نعم!!
سهام:عذاري حاولت تلحقني وتساعدني مادفتني ابدا!!
ابو صايل التفت لعذاري بوجه مخطوف من سوء الموقف:عذاري
عذاري قاطعته بقهرها:ابشر ياابو صايل ابشر
ابو صايل حس بخنقه وهو يطالعها وبهمس:عذاري
عذاري:حتى بعد ماتولد حرمك المصون ماراح تشوف وجهي
ابو صايل تنهد:عذاري يابنتي
عذاري رفعت صوتها الراجف وهي تكمل:حتى لايصير بولدك شي وأكون انا السبب وانا مدري!!اااه ويمكن أكون اللي باذبحه بيوم محد يدري!!
ام صايل:عذاري!!
ابو صايل:حقك علي يا
عذاري دخلت للبيت بخطوات سريعة
ام صايل لحقتها:عذاري يمه
عذاري ماترد ولاتطالعها حتى طلعت لغرفتها اخذت أغراضها ونزلت وهي تلبس عبايتها
ابو صايل واقف ينتظرها عند نهاية الدرج طالعها:عذاري يابنتي
عذاري مرت بدون لاتطالعه ولاترد
سهام بتأنيب ضمير:عذاري
ام صايل بحسرة:يمه عذاري
عذاري ماطالعت احد تتفادى نظراتهم وهي تحبس دموعها قد ماتقدر ولاردت على احد نزلت شنطة أغراضها الصغيرة عند الباب وهي تلف طرحتها:السموحة ياابو صايل نبي اخر خدمة من سواقك ولاتخاف بنعطيك حقه وترانا كريمين فوق الحق نحط كرمنا
ابو صايل زفر وهو يلتزم الصمت
عذاري طالعت امها:يمّه تعرفين بيتي حياك الله متى مابغيتي،،لبست نقابها وانحنت وهي تشيل شنطتها والتفتت لهم،،ايه قبل اطلع احب أبشركم تراني حامل من ثلاث شهور
ابو صايل اتسعت عيونه بصدمة
عذاري:مع السلامة،،خرجت،،
.
.........****..........
.
..المستشفى..
ام غازي جالسة ع كراسي الانتظار قبال غرفة العناية المركزة وعيونها مثبتة عالغرفة وهي بين عذبة والجدة منيرة
امجاد واقفة جنبهم وهي متكية بظهرها عالجدار
غازي مشى متجه لهم
الجدة منيرة التفتت له وهي توقف:ها ياوليدي وش العلم؟
غازي وقف عندهم:يمه انتي بس تدخلين ماينفع كلنا
ام غازي وقفت وهي تحس قلبها يرجف من الخوف:اهل اخوك
غازي قاطعها:عند اختها يمه اختها مريضة بنفس المستشفى
الجدة منيرة:لااله الا الله وش هالصرايم اللي نزلت بنا مرتن وحدة!!
عذبة:لاحول ولاقوة الا بالله
غازي مد يده لها:يالله يمه
ام غازي زفرت وهي تحط يدها اللي ترجف بيده
غازي شد على يدها وهو يحس برجفتها:بيقوم يمّه بيقوم ان شاء الله ويغثك باللي صار له لاتشيلين هم
ام غازي بكت وهي تسمع كلامه
غازي ضم امه لصدره وهو يكبح عبرته
امجاد بكت
غازي برجفة صوته:يمه ادخلي وهاوشيه قولي له باقي كم ساعة من الأربع والعشرين ياويلك ماتصحى ان ماصحيت بيذبحك غازي بنفسه
ام غازي بحضنه تبكي
.
..بالسيارة..
هيفاء جالسة جنبه قدام وبزعل:علامك علي!!ليش غديت بي!!
راشد زفر:يابنت الحلال وش بتسوين وانتي معنا!!
هيفاء:اعاونهم كود اعتازوا شين وارني حولهم
راشد:محد يبي منك شي بهالوضع وبعدين انتي الحين خليك بنفسك ارتاحي
هيفاء:الحمدلله مريحة مير انت
راشد قاطعها:تراك ماسكة طريق وانتي حامل مايصلح ابد يعني انا اقول لك!!
هيفاء:هذاني قدامك مثل الغزال مابي شي
راشد كشر:اذكري الله وبعدين بتجلسين ببيت عمك وارتاحي لاتسوين شي ابدا وانتهى الموضوع
هيفاء تكتفت وهي زعلانة
راشد:اذا احتاجوا شي جيت عندك وأخذته ارتحتي
.
..المستشفى..
ام غازي دخلت للغرفة الكبيرة اللي قدامها وقشعر جسمها من حست ببرودتها الفظيعة واضاءاتها الساطعة مشت ورا الممرضة اللي تمشي قدامها وقلبها تتسارع نبضاته فوق سرعتها سرعة اكبر عيونها تلف المكان اللي كله باللون الابيض السيراميك الابيض اللي به لمعة خفيفة أسرة بيضاء ستاير بنية كحاجز بين كل سرير وسرير عضت شفتها ونزلت عينها عالارض بسرعة من وصلها صوت اللي تبكي عن يمينها واكيد تبكي على زوج او ولد او اخ مرت وهي تسمعها تقول(يالله انها عليك يالله ردّه لي وارفع عنه ياكريم)بلعت ريقها وهي تسمع شهقاتها بللت شفتها وجمعت ريقها وبلعته بمحاولة منها تكبح عبرتها لاتنفجر بالمكان
الممرضة وقفت قبال الستارة
ام غازي وقفت وراها وهي تاخذ نفس بكل مافيها تطرد هالضيقة اللي اجتاحتها شدت على قبضتها وهي ترفع
الممرضة مدت يدها للستارة وفتحتها والتفتت لام غازي:خمس دقايق ياخالة خمس مو اكثر
ام غازي هزت راسها وبحة صوتها؛ان شاء الله
الممرضة مشت
ام غازي سرت بجسمها رجفة اول ماطاحت عينها عليه تقدمت لذاك الجسد الهادي على غير عادته فوق السرير بمنظر غريب عليها وعليه بنفس الوقت أسلاك تلف ذاك الجسد بأماكن مختلفة تقدمت له بخطوات واضح صوتها عمد وهي تتمنى باخر مراحل اليأس عندها لعله يصحى فيها وخاب املها وهي توقف جنب سريره اللي مااختلف عن باقي أسرة المتواجدين حوله انحنت له وهي تطبع بوسة على جبينه وسط عيونها اللي هلت دمعها غصب:اجر وعافية ياعيني اجر وعافية،،اعتدلت وهي تمسك يمينه بين يديها وتطالعه بهدوء،،
جسّار عالسرير بدون اَي حركة ولا حتى طيف احساس باللي حوله
ام غازي زفرت وهي تطرد بكيتها وبرجفة صوتها الواضحة:ياشينك ياجسار وياشين هالمزحة!!ياويلك من غازي ينتظرك برا وهو يتوعد وبتّال اكيد مابيترك هالسماجة تمر عليه وهو ماجلدك،،ابتسمت،،والاهم ابوك قبلهم كلهم بيذبحك،،طالعته وهي تنتظر رده نزلت دموعها،،يايمه لاتبطي علينا خابرة انك موجوع مير لاتبطي علي وانا امك لاتوجع قلبي عليك لاتفجعني ياجسار تكفى لاتفجعني فيك،،عضت شفتها وهي تكتم شهقاتها وهي تطالعه بدون رد بكت وهي تنحني شبه جالسة وتنزل راسها بين يديها وجبينها لامس طرف ركبتيها وهي شادة على يده،،يارب مالي حيلة حيلتي انت يارب هو عظيم عـلـي و عليك هين ياااارب رحمتك فيه وفيني يارب قلبي لاتفجعه يارب
.
،،عند عباير،،
عباير واقفة قريب الباب وهي تلبس طرحتها معطيه ظهرها لبخوت كتبوا لها خروج مكشرة بوجهها ولاتطالعها ابد
بخوت جالسة عالسرير وجنبها حلايا:عباير
عباير ماردت
بخوت:الى متى بتغتاظين علي!!ولا اغتاظي مير لاتبطين علي
عباير التفتت لها وبقهر:هاذي تالية التعب!!تعفين عنه!!كل ماغدا بنا جحدتيه يابخوت!!
بخوت برجفة صوت:ماترعين وش غدا من وراه!!
عباير بعصبية:وش غدا هاه وشو!!
بخوت بنفس نبرة عباير وحدتها:انتي وجسار واخوه!!كل ذا وتنشدين!!،،نزلت دموعها،،راعي جسار راعي الضعيف اللي ماعمل شي وش غدا به من وراي،،وبشهقاتها،،لاهو اللي حي ولا هو اللي ميت!!
عباير بقهر:وظنش جسار بيسر خويطره ماعملتي!!
بخوت بدموع وصراخ:امنع الشر عنكم!!هذا جزاتي!!
عباير:ليش ظنش بيكبش!!
بخوت:يكف أذيته عنا دام غدا مايريد
عباير ضحكت بقهر:ايه بالحيل بيكبش!!مير انتي كبيتيه يغدي بعملته!!كبيتيه يغدي من ذنب جسار!!اقلها يوم غديتي المركز عمدتيه(رحتي له)واوجستي بوجهه تعقب يغدي كل شين على هواك ياغيث تنقع بالسجن وذوق شوين مما ذقناه بدال هاللون اللي عملتيه!!
بخوت بحسرة:عباااير!!
حلايا نزلت من السرير وهي توقف عند عباير وضربتها وبدموعها:انكعمي عن ماما يابعاير انكعمي
عباير طالعت حلايا ثم رفعت عينها لبخوت وبحدة:دام عملتي هاللون مايرده شين يابخوت مايرده هالنوبة جسار والنوبة التالية حلايا
بخوت هزت راسها بلا:عباير تكفين ياعباير
عباير بصراخ:سلم وش اللي يمنعه عنش يابخوت هاه!!دام سلم نوبة يعملها نوبات وانتي تطاعمي(ذوقي بس بشويش)ماعملت يديش،،خرجت وتركتها بدون لاتودعها او تسال عن وضع جسار،،
بخوت وقفت وسط دموعها وهي تتغطى مسكت يد حلايا وهي تخرج من الغرفة ووقفت وهي تطالعه
سعود بتكشيرة؛اغدي يم اهل رجلش ولاتغدين محل لامني اغدي بعباير واقضي شغلتي ومعود يمش،،لف بيمشي،،
بخوت:سعود
سعود وقف والتفت وببرود:تريدين شي؟
بخوت همست:لا
سعود مشى بخطوات سريعة وهو يتركها وراه
بخوت مشت متجهة لغرفة العناية وهي تكبح دموعها اللي ماوقفت تجر خطواتها بثقل من وضعها ماحست بطعم الفرح زين للحين وغيث مابيتركها ابد وقفت وهي ترفع عينها للي يناديها
ام غازي قبالها:بخوت يابنتي
بخوت جلست عالارض وانفجرت تبكي بصوت
ام غازي اسرعت لها وهي تجلس وتضمها لها:بسم الله عليك بسم الله
بخوت:سامحيني ياعمة سامحيني
ام غازي هلت دموعها:مسموحة يابنتي مالك ذنب باللي صار مالك ذنب يابخوت
بخوت:سامحيني تكفين سامحيني
.
..بيت طلق..
شامة جالسة قبالهن وهي تضيفهم مدت فنجال القهوة لغيثة
غيثة اخذت الفنجال بابتسامة:سلمتي سلمتي
شامة بيدها الفنجال صبت ومدته لنايفة:سمي
نايفة وهي تاخذه بابتسامة:يسم عداش ياشامة سلمتي
,,بعد القهوة والسوالف العادية,,
غيثة:والله ياشامة حنا غادين يمش نطلبش طلبة
شامة قطبت جبينها باستغراب:ابشري باللي احرز عليه
غيثة:ان شاء الله تحرزين عليه ان شاء الله
نايفة:وحنا مانصيناش عبث وكاد تحرزين
شامة زفرت:باْذن الله باْذن الله وش تريدين ياغيثة
غيثة:نريدش تقنعين رجلش
شامة كشرت بوجهها
غيثة:كود يعود عن الاكذاب اللي اوجسها هو وخويه على خيي(اخوي)
شامة:مير علوم الرجال ياغيثة مالي بها
غيثة اتسعت عيونها
نايفة بربكة:وش هالوجه ياشامة!!حنا ناصينش
شامة قاطعتها وهي ماتحملت اكثر:ليتش ناصيتني على شين يسر يانايفة كان عـيـنـي فداش مير هالعلم لو هو علي حتى خيي جدعته يم خيكن
غيثة احتدت ملامحها
نايفة بحدة:كود خيش سويد وجه فان خيي شيخ قومه!!
شامة:امحق شيخ دام هاذي علومه
غيثة بغبنة:اعقبي!!
شامة بحدة:الخيّة النشمية راعية الحق تفزع لخيها لو انه على خطا مير ماهو بهاللون تفزع يمه توعيّه كود يراعي خطاه ويعود سواد وجه بدنياه ولا سواد وجه باخرته!!
غيثة:غيث على اسمه ياشامة غيث حتى اللي أخطو يمه يكرمهم من جزيل غيثه
شامة تنهدت:انا اللي بأطلبكن ذالحين ماهو بأنتن قنعن خيّكن كود خيي يعود يمي
غيثة:شامة!!
شامة:خيكن اخطى لاتغدن معه ردنّه عن خطاه يابنات الشيخ وخوات الشيخ!!
غيثة:هاذي تالية نصيتش ياشامة
شامة وقفت:مير لاقضيتن من قهوتكن ورايدات اتهرجن معي بغير هالعلوم حياكن وكود غيره تخبرن الدرب،،مشت باتجاه السرير وهي تزفر بضيقة ماتبي تستخدم هالاسلوب معاهم،،
نايفة فزت وراها ولحقتها مسكتها من يدها وهي تلفها بقوة
شامة شهقت بفجعة من السحبة وهي تلف لها
نايفة بحدة وهي ماسكتها:اوحي العلم ياشامة كود ماعود رجلش عن علمه الشين والله والله ان كل ماطا يطاه نارن تأكله اوحيتي!!
شامة سحبت يدها وبحدة:ماهو بعلى هواش يانايفة
غيثة وقفت وهي تدف شامة من كتفها بيدها
شامة رجعت خطوة لورا وهي تطالعهم بحدة
غيثة بحدتها:ازين له وأزين لش معه توحون مايوجس يمكم من علوم ولايغدي شين مايسركم
شامة ضحكت وبسخرية:علامه ماغدا لذالحين!!وش تحترون!!
غيثة ضربتها كف بكل قوتها
نايفة ابتسمت برضا
غيثة بحدة:وهذا اوله واهونه
شامة طالعتها بحدة:تعقبن يغدي على هواكـ(ش)ـن شين يابنات الشيخ!!
نايفة دفتها بقوة
شامة رجعت لورا
نايفة:هيه انتي ياهييييه مخبولة انتي مخبولة!!
شامة بحدة:يسدكن ماعملتها مير اغدن برا بيتي لاصوت وألم اهل الديرة عليكن!!
نايفة زفرت بضحكة:وشو!!
شامة:براااا
غيثة دفتها بقوة
شامة طاحت هالمرة من دفتها وبطيحتها ضرب راسها من ورا بحافة السرير وكملت الطيحة للارض
غيثة بصراخ:خيرنا كاسيش(مغطيها)وتوجسين هاللون يمّنا!!،،قطبت جبينها وهي تطالعها،،
نايفة تطالع شامة وبحدة:كبي التهول عنش!!
شامة مرتمية عالارض تطالعهم بهدوء وهي تحس بثقل براسها
نايفة انخطف وجهها وبرعب:غيثة!!
غيثة اتسعت عيونها وهي تطالع دم شامة اللي بدا يسيل عالارض ويوضح
نايفة جلست عالارض عندها وهي تكلمها:شامة
شامة ماترد تطالعهم
نايفة انحنت وهي تحط يدها تحت راس شامة وترفعها انخطف وجهها وهي تحس شي يتحرك بطرف إصبع يدها اللي تحت راس شامة قشعر جسمها ووقفت انفاسها وهي ترفع عينها برعب لغيثة وبدموع:غيثة!!
غيثة بلعت ريقها من الرعب وبلعثمة:قومي
نايفة رجعت عينها على شامة
شامة غمضت عيونها بهدوء
نايفة صرخت برعب:شامة!!
غيثة من بين اسنانها بحدة:انكعمي وصريمة!!قومي اعجلي علي!!
نايفة نزلت شامة وهي توقف
غيثة وهي تلف طرحتها:غدينا!!
نايفة بصدمة:وشامة!!
غيثة:رجلها يعود شوي وامها بتغدي بعد غدينا،،مشت،،
نايفة طالعت شامة
غيثة التفتت واتسعت عيونها وهي تطالعها واقفة مكانها وبحدة:نايفة وعلة تنزل بش غدينا!!،،مشت ووقفت وهي تطالع القهوة،،
نايفة بتردد وعينها على شامة:وشامة شامة نكبها بهاللون،،رفعت عينها عن شامة وهي تطالع غيثة باستغراب،،
غيثة اتجهت للمطبخ وبيدها فنجالها وفنجال نايفة دخلت له وهي تغسل الفناجيل بوسط رجفة يديها الواضحة ورجعت طريقها جري:كود تريدين تغدين معي بكيفش وكود غيره لومي روحش على مايغدي بش،،خرجت،،
نايفة جرت ورا غيثة وهي تترك شامة وراها
.
..المستشفى..
امجاد بترجي:بتاااال
بتال متمدد عالسرير ومغطي عيونه بيده عض شفته وهو مايقدر يرد لأمجاد طلب واكتفى بالصمت
الجدة منيرة بنرفزة:اترك العناد عنك
بتال:وش عناده ياجدة!!
الجدة منيرة رفعت يده عن عيونه وهي تضربه ع كتفه بيدها الثانية:بتال!!!
بتال زفر وهو يجلس:نعم نعم نعم!!
الجدة منيرة اتسعت عيونها:ولد!!!
بتال:جدة لاتخليني اشتكيك بعد!!
راشد اتسعت عيونه:بتال!!
الجدة منيرة تقرصه من جنبه
بتال:اااه
الجدة منيرة بحدة:استح على وجهك!!تكلميني بهاللون
بتال كشر بوجهه وهو يطالع لقدام ويحتفظ برده لنفسه
الجدة منيرة:بتال ادري انك زعلان مير هالزعل ماهو بمعود يمك بفايدة!!
بتال عض شفته يكتم رده
راشد:يازينك والله وانت حابس ابوك وجدك عز عز ياطيبه من عز!!
بتال التفت يطالعه بحدة:وانت وش دراك عن اللي يصير!!
راشد:ويعني!!اللي صار معك صار وانتهى لكن الغلط اللي سويته على اسمه غلط يابتال!!
بتال بوسع عيونه:واللي سووه ماهو بغلط!!
ام غازي دخلت وهي تسمع اخر كلامه:غلط وعين الغلط لكن امورهم ولادم تنحل
بتال بقهر:على حسابي يمه!!
ام غازي تنهدت:اذا ماتحملتهم انت مين يتحملهم!!
بتال بعناد:ماني بمحلول أتحمل ابدا!!لايكلف الله نفسًا الا وسعها!!وانا هاذي طاقتي وهاذي قدرتي معليش يتحملون مايجيهم
الجدة منيرة بعصبية:بتااااال!!
بتال مارد وهو معاند
ام غازي:براحتك يابتال لكن لاتكلمني ولاتسلم علي وانت ماسويت اللي ابيه
بتال طالعها وبغبنته:غصب يمه غصب!!
ام غازي:انا قلت اللي عندي وانت بكيفك
بتال:ابشري يمه ابشري لكن مالي اَي علاقة فيهم ابدا
ام غازي:هذا اذا هم وافقوا يستقبلونك بعد اللي سويته!!
بتال بعناده:بتنازل عشانك يمه لكن هم لي تصرف ثاني معهم،،رفع اللحاف وهو يمد يمينه لأمجاد وبحدة،،اسحبي الابرة(يقصد المغذي)
امجاد طالعته وهي ماتقدر تسوي هالشي
بتال رفع يساره المجبرة والبارزة أصابعه منها وسحب الابرة غلط وكتم المه ورمى لحافه وخرج
راشد لحقه
ام غازي تنهدت وهي تطالعه
الجدة منيرة:راس يابس لااله الا الله!!مدري على مين طالع!!
غازي دخل وهو يوقف قبال امه وبوسط انفاسه:يمه جسّار جسّار!!
.
.
.
<اللهم صل وسلم على نبينا محمد>