ياسمح المحيا جر الهجنية

الجزء الرابع والثلاثون

الـجـزء الـرابع والـثـلاثـون،،

سبحان الله وبحمده عدد خلقه ورضا نفسه وزنة عرشه ومداد كلماته
.
.
غازي ميل فمه وهو يطالع بتال
ابو غازي صرخ بحدة:بتال اقفله لااقفل عليك اليوم باب غرفة المستشفى
بتال مستمر يدبك باستمتاع وبدون اي اهتمام لابوه
غازي مرّ من جنب ابوه وهو يسرع بخطواته متجه لبتال
ابو غازي شد ع قبضته وهو يطالع بتال بغبنة كيف يكسر كلمته قدام الموجودين حس بيد تمسك يده والتفت للي مسكه
الجد نشمي يطالع بتال بهدوءه
ابو غازي عض شفته بغبنة من ابوه اللي واقف بينه وبين بتال على طول
غازي والفاصل بينه وبين بتال مسافة متر تقريبا دخل يده اليمين بجيب ثوبه وخرج سبحته وهو يرفع يده اليمين ويحرك سبحته ورفع يده اليسار بوسط ابتسامة ارتسمت على وجهه وصرخ:هـيــه!!،،وبدا يدبك،،
،،الكل انصدم من ردة فعل غازي،،
ابو غازي اتسعت عيونه من المنظر
غازي وصل لبتّال وحط يده بيد بتال وهو يدبك معه بنفس حماسه وسط ترديده للأغنية
بتال بحماسه:ليش هالطعون ياابو ردين لييييششش!!
ابو غازي سحب يده من يد ابوه واتجه لهم بخطواته السريعة ووجهه ينطق غضب وويل لهم
غازي يده بيد بتال وهو يدبك معه وعينه على ابوه يطالعه ثم التفت يطالع بتال ابتسم وهو يشوف نظرة بتال الحادة رغم الابتسامة اللي ع وجهه وكمل دبكته بدون اي اهتمام للي بيصير
ابو غازي شب قلبه زيادة وهو يطالعهم مر من عندهم ووقف قبال السماعة ومد رجله وهو يدفها بقوة وطاحت السماعة عالارض وانقطع صوتها مثل مايبي
بتال وغازي وقفوا والتفتوا لابوهم
ابو غازي بحدة:قطع لذي الوجيه اللي مابها حيا!!
بتال ببرود:الحيا مرسوم على وجهي البلا باللي مايقدّر!!
غازي اتسعت عيونه بصدمة
ابو غازي اتجه له ومسكه وهو القتل بعينه قليل ببتال بعد اللي قاله:وشو؟!!
بتال بحدة:ليتك تمسكني مثل هالمسكة وانت تقولي الصدق
ابو غازي دفه:انت مامن شرهة عليك عقب اللي قلته!!
بتال ضحك:وش اللي قلته حتى تشره علي وانت حتى ملكة رهايف ماتركتهم يقولون لي عنها!!
ابو غازي:وليش يقولونك عقب سواتك اليوم!!
بتال:اااه فهمت الحين،،بحدة،،ماهو انا ماني من عيالك
الجد نشمي صرخ وهو قاصد يسكتهم:بتاااال!!
بتال التفت لجده وبتحدي:اذا ماقلتوا لي اللي ابي اعرفه بروح لبادي بنفسي وان سوا مثلكم دقيت ع بيوت أهل ام جلاجل باب باب!!
ابو غازي بغبنة:اعقب تهددنا!!
الجد نشمي كشّر بوجهه
بتال بحدة:كل شي عن ابوي ابي اعرفه كل شي ومحد له حق يمنعني من اللي ابي اعرفه
ابو غازي:بس!!رح باللي مايردك!!
ابو جواد بتوتر:عادل!!!
بتال قطب جبينه بشك من كلام عمه ثم طالع جده
الجد نشمي يطالعه ساكت
بتال ميل فمه بابتسامة:تتوقعون مااسويها!!،،عطاهم ظهره ومشى،،
ابو غازي شد ع قبضته بغبنة من بتال المتهور وهو يشوفه يبتعد
الجد نشمي وقفه:بتال!!
بتال التفت وهو يخفي حماسه
الجد نشمي:إلحقني،،دخل بيت الشعر،،
.
.........****..........
أم جلاجل
.
..بيت بادي..
سعود جالس بالعشة برا البيت وهو على أعصابه وكل شوي عينه عالباب
هلال مر من قدامه ثم وقف والتفت له:ولد ياسعود
سعود طالعه بتكشيرة
هلال باستغراب:كن شايبك ابطى؟!
سعود بحدة:يتعبد ربه مال بد به وثم مير ان هو ابطى ولا عجّل مايتبعك من وراه لوم
هلال:وعلامك طايرن بي!!نشدتك مارجيت من وراك شي
سعود بتهديد:ولاني بمدعيك ترجي من وراي شي!!وثمن خابر العلم وموجسينه لك كم مرة امنعنا منك كود نمنع ارواحنا عنك!!
هلال زفر:هيه مير ياخسارتك ياسعود!!شينت جمايلك بفعولك!!
سعود ابتسم:ياعلكم بالخساير وأردى
هلال اتسعت عيونه وبحدة:سعود!!
سعود بنفس الابتسامة:مير انك غادين يمي من راسك وثم ماودك توحي هرجتن توجعك!!تحمل ماياصلك دام خابرن سواد وجيهكم!!
هلال:تخسي محدن غيرك سويد وجه بهالديرة!!
سعود بنظرات تنطق شر مثبتها عليه وهو يوقف ويمشي له:حشمنا وأرعيناكم ماتحشمون
هلال يطالعه بحدة
سعود:مير غادين يمي وتخسيني وتوجس هرجتن مالها قاع!!هذا اللي والله غادين يم موته برجوله!!،،وقف قباله وهو يبتسم،،
هلال:اخر الدهور يوم انه وغيد يتهددني!!
سعود بابتسامة:زين زين كود اني وغيد!!كل اللي اعمله ماعلي ملامة من وراه!!وغيد أنا!!
،،داخل البيت،،
ام غيث جالسة قبالها بعبايتها ونقابها
بخوت مدت لها فنجال القهوة بملامح جامدة
ام غيث:البارح العشا علامكن مالفيتن يمّنا!!ولا هونتن!!
عباير خرجت من غرفتها بوجهها الشاحب عقدت حواجبها وهي تشوف ام غيث
بخوت بحدة:مامن احدن موهن عن حقه
ام غيث كشرت بوجهها
عباير وقفت عندهم وهي ترفع يدها وتلامس جنبها الايمن(تتخصر)بوسط ابتسامتها:مير اللي اوحيناه العشا ماهو بمعمولن لنا لضيفانكم
ام غيث:ايه للضيفان وأنتم ضيفاني!!
عباير:لا لا العلم ماهو بهالطريا!!اللي عملتيه البارح كود ترضى عنش ثريا وبنيتها
ام غيث عضت شفتها وهي تغلي
عباير:مير بشرينا عسى رضين عنش؟!
بخوت:عباير!!
ام غيث:ماغدت البارح مير انها معذورة
عباير ضحكت
بخوت حزنت عليها:هالايام ماهي بجايزتن لنا ثمن كبيها لوقتن ربش يسرها
عباير بحدة:لاااا تجيز لنا هالايام وماهو برادنا عن حقنا غير الموت ياام نوفة
بخوت:عباير!!
ام غيث بدموع ملت عيونها من هالاهانات اللي ترتمي عليها من كل مكان وقفت:الشكوى لله مير الأيام دوراة وتفطني لها زين ياعباير
عباير بحدة:هاذي هي دارت بش وغدت بش يمّنا من جديد
بخوت انجلطت من رد عباير ووقفت وهي تطالعها بحدة
ام غيث:وش اوجس وانتي ماتحشمين احد!!
عباير:لاتدورين الحشمة وانتي مانش من أهلها!!
ام غيث بقهر:الله حسيبش
عباير:والحمدلله هذاني أراعي اخرة الظلم بعيوني!!
ام غيث عضت شفتها:الله يذوقش الردى
بخوت بحدة:اقضبي لسانش ياام غيث!!
عباير:الردى ذقناه من وراكم وهذا انتم تجازون بفعايل يديكم!!
ام غيث:مالكم حقن ابد بعد هالعلوم الشينة
عباير:تعقبين!!
ام غيث بحدة:مايعقب غيرش ياللي محدن عرف يقضبش!!
بخوت اتسعت عيونها:البيت يتعذرش ياام غيث
ام غيث:مايحتاج توجسينه مالي به الله لايعيده
عباير بابتسامة:مير تولمي بكل بعزيمة بتراعيني قبالش وبتراعين وشلون الناس يراعونش بعيونهم اللي توجس يمش يالكذوب
ام غيث:محدن كذوب غيرش ياقليلة الحيا
بخوت وهي تأشر عالباب:البيت يتعذرش ياام غيث
ام غيث مشت بخطوات سريعة:حسيبكن الله يالمقويات حسيبكن،،خرجت،، .........****..........
..بيت الشعر..
الجد نشمي متربع عالارض وهو قافل قبضتينه وممدد يديه بحيث تلامس نهاية ذراعه وبداية قبضتيه لركبه وهو يطالعه بجدية:وش اللي تبي تعرفه يابتال؟
بتال بجدية:كل شي عن اهل امي وابوي وش سالفته معهم وهالمرة ماابي اَي شي تسكتوني فيه ابي الصدق ياجد الصدق ماغيره
الجد نشمي زفر:لاتلومني يابتال كود أوحيت علمن مايسر!!
بتال تسارعت نبضات قلبه بتوتر وهو يستوعب جدية الموقف اخذ نفس:اسلم ياجد؟
الجد نشمي زفر:ابوك كان موذي يابتال
بتال رمش يستوعب
الجد نشمي:مابه ادمي ولاحيوان ولاشين يطري على بالك بذيك الديرة ماتسبب به راعيته وتحرصت عليه بالأول لكن عجزت عنه
>
>
نشمي بوسط حوش بيته وخيزرانته بيده يضرب فاهد وبصراخ:الله يسلط عليك من ولد ذبحتني فضحتني وسط الناس وجيهي ماعاد به سحى(حيا)
عادل ومسفر فكوه من يد ابوهم
نشمي ضرب عياله معه ومسك فاهد من جديد:اعقب حتى اليتامى تاخذ عيشتهم من يديهم لابارك الله بك وش مقصرن به عنك الله يقصر بعمرك
فاهد(20سنة)دف عمه عنه بقوة وبصراخ وهو يطالعه:علامك انت علي علامك!!ارعيتني اتصدد عنك ولااوجس لك كلمة!!تراك ماانت بملزومن بي انك عمي عمي ماانت بابوي!!
عادل ومسفر انصدموا
نشمي:وشو!!
فاهد بعصبية:ويوم انه غادين مابك سحى وشو له تمد يدك علي كمل جميلك وخلك ساكت!!
نشمي مسكه من رقبته ومشى فيه ورماه برا بيته وبحدة:دام ذي علومك صرف عمرك برا بيتي وفكني من سواد وجهك
فاهد بصدمة:تطردني ياعم!!
نشمي:الحين غديت عمك!!
فاهد:ابي التركة(الورث)
نشمي:اغد يم الشبك(مكان الحلال)وتخير مابدا لك وطس الله لايردك
فاهد بصراخ:وسمية ادني يامال العمى
نشمي بحدة:تعقب مالك بوسمية بد!!
فاهد:اختي!!
نشمي:خاوتك الصرايم قل امين مالك بها أوحيت
فاهد:معصي
نشمي اتسعت عيونه:وشو!!،،صرخ،،وسمية وسمية وعمى
وسمية بعبايتها خرجت من احد غرف البيت الصغير ووقفت على بعد خطوات منهم
نشمي بحدة:اخوش ولا عمش؟
وسمية تطالعهم بتردد
نشمي صرخ:اوجسي يابنت
وسمية فزت من صرخته وغمضت عيونها ماتبي تشوف ردة فعله:عمي عمي
فاهد اتسعت عيونه
نشمي:أوحيت العلم طسّ الله لايردك!!
فاهد احتدت نظرته وهو يطالعها:وشو!!
وسمية فتحت عيونها وطالعته بلعت ريقها وهي تشوفه
فاهد اسرع بخطواته لها
وسمية ضاقت انفاسها وهي تشوف نظراته الحادة
عادل اعترض طريقه ووقف بوجهه:تعوذ من ابليس يافاهد
فاهد بحدة وهو يدفه:طسّ عن وجهي،،ماحس الا بسحبة عمه المعروف بقوته وحذفه بعيد اختل توازنه وهو يرجع ورا لكن ماطلع ابد واعتدل بوقفته وهو يطالعهم بشر،،
نشمي بحدة:طسّ يم الشبك وتخير مابدا لك من الحلال وبيتي هذا يتعذرك مالك مكان به تقلّع عيني لاتراعيك الله لايردك يالموذي
فاهد عض شفته وهو يطالعهم بشره وخرج
>
>
بتال بهدوء:وبس!!
الجد نشمي:ومن قال السالفة خلصت!!عقب اللي صار ماعاد أرعيناه بالديرة ابد وقضت(مرت)تسع اشهر مااوحينا له طريا ولااحدن يخبر له مكان والصدق ان الناس متريحة ومستانسة ومعينة خير الله عقب ماهو ماذيهم ولا به رحمتن بأحد
بتال حزت بخاطره الكلمة لكن اخفى هالشي كعادته
الجد نشمي:وبليلتن وانا راقدن بوسط الحويش ليلتن لاحت بها بروق الخير والناس رقود دق الباب بتالي الليل وانا افز
>
>
نشمي وهو جالس ع فراشه بوسط الحوش والمطر يرش عالخفيف وسط نسمات هادية وبصوت مبحوح وهو توه صاحي من نومه:يالله أجعله خير،،وقف واتجه للباب،،لافيك لافيك ياللي غادي لافيك،،فتح الباب واتسعت عيونه،،
فاهد واقف عالباب
نشمي كشر بوجهه وهو يطالعه لكن استغرب من منظره
فاهد بلحية وبجسم أنحف من قبل بثوب قالب لونه وهو اللي مايتحمل يلبس بثيابه لمدة طويلة واقف قباله يطالعه بعيونه غرقانة دموع
نشمي بحدة:خير وشو له غادين يمي تبيني أسفل بك من اول وتالي!!
فاهد انحنى بجسمه وهو يسحب يد عمه ويبوسها بين دموعه اللي هلت واختلطت بالمطر اللي زاد وبترجي:السموحة ياعمي السموحة تكفى سامحني
نشمي سحب يده من وهو يدفه وبحدة:وش عقبه غادين يمي؟وش عاملن ولافي تبّلانا به!!
فاهد بحرقة قلبه:والله ماعملت شين مير انعمل بي ياعم
نشمي قطب جبينه
فاهد:اخذوا ماوراي ودوني وكبوني ياعم
نشمي:وش توجس ياولد!!
فاهد:من طردتني تخطفوني وهم كل واحدن يضيفني(ضيف)عنده أكرموني ماخبرت بالنية القشرا
نشمي بحدة:ووشو له تغدي يمهم كم مرتن معلمك لاتغدي يمهم هالناس ماينقربون!!مالهم خوة(صحبة)!!
فاهد برجفة صوته:طشوني ياعم يوم اخذوا العازة اللي غادين من شانها
نشمي:معك شهود حتى نغدي يمهم
فاهد:ومن يشهد لي ياعم وانت خابرن علومي
نشمي زفر بضيق وهو يطالعه بحزن على حاله:اقلط الحين ومن اصبح افلح
>
>
بتال:تقول انه موذي وشلون سامحته ياجد!!
الجد نشمي:بعد ذيك الليلة غدا فاهد ماهو بفاهد اللي نخبره يفزع للمحتاج ويبدي الخلق على روحه وامور اهل الديرة بيده يحلها على احسن ماقيل ومحدن يتعرض اهل ام جلاجل ابد وهو بها
بتال:ونسيت اللي سواه كله عشان كم شهر!!دايم تقوله ياجد الموذي طول عمره موذي!!
الجد نشمي كشر بوجهه:صدقت الموذي طول عمره موذي
بتال قطب جبينه وهو يشوف الكره واضح على ملامح جده
>
نشمي:ها يافاهد اوجس وش عندك؟
فاهد:ياعم انا غادين يمك وساطة
نشمي شهق:وش غادين يافاهد عسى ماخلاف؟!!
فاهد ضحك بخفة:خير خير مير اني غادين اخبرك ان عادل هون يوجس مايبي بنت بادي
نشمي وقف وبحدة:وشو!! فاهد مسك يد عمه:اوحني ياعم اصبر لاتفضحنا!!
نشمي وهو يسحب يده وعصبية:وعقب رداة هالوجه وش اوجس ها وهي محيرة له من سنين!!
فاهد:ياعم عادل باغين وسمية اختي وسمية من مدة يرد بنت بادي وهو خابرن وش بيحصل لاوجس كلمة
نشمي:ياعله لابغاها ياخذها ورجله فوق رقبته!!
فاهد:ياعم علامك شبيت اصبر اوح الدبرة!!
نشمي:مامن دبرة حسبي عليه!!بادي بيشبها كود يأخذ بنتي على بنته!!
فاهد:وليش يعرس عالثنتين ياعم
نشمي طالعه باستغراب
فاهد:علمتك اوحني!!كب عادل على هواه يأخذ وسمية وجميلة أبشر ياعم مالك الا اللي يحفظ سحاك انا لها
نشمي:عادل صدق يبي وسمية يافاهد
فاهد:اوجس لك وساطة ياعم من اللي غدا بي يمك!!مير لاتوجس له شي خله على ماهو لاعود من المدينة انا اعلمه >
الجد نشمي زفر بضيقة:ليتني ماطاوعته عرفت رداه وأنه على ماهو يوم ارعيت حرقة عادل على جميلة بيوم العرس
بتال:يمكن ابوي يحب امي ياجد ليش تظلمونه!!
الجد نشمي طالعه وبنرفزة:اوجسته بخويطري يمكن انه يبيها وهاذي حيلته وسكت عنه كسرت قليب وليدي من شان خاطره!!وليتني ماعملتها ظلمت عادل وجميلة ووسمية معهم
بتال ساكت يسمعه
الجد نشمي:ليته يحبها الا مايبيها فاهد مثل ماهو مافت(تحرك)اشعرة عن شينة والله اعلم كود ان هاذي طواريه من اول وصبر حتى يعمل اللي بنيته
بتال:ياجد انا ابي اعرف عن اهل امي جدي بادي وشو له مقاطعكم؟وليش إنتوا ماتبوني أقابلهم؟!
الجد نشمي بعصبية:وليش مايعمل هالعمايل!!وثمن ابوك خلا به وصل!!ابوك موذي يمسي بها ويصبح بكفوف مستقوي عالضعيفة حتى شعيراتها قصصهن ماكب منه شي ويوم خبرته انها عازّتن بك(حامل فيك)اول شي عمله طعنها بخنجره وثم عراها،،طالع بتال اللي مو فاهم عراها بنبرة عالية،،اتهمها بالكبيرة يوجس انك ماانت بولده
بتال انصدم ووضح عليه
الجد نشمي بنفس عصبيته:عقب كل هالسوايا طلقها وكب الديرة وشلون تبي بادي يبي لك شوف بعد اللي درا به زين ماجرّ اميمتك وغدا بها يم الخلا(وادي)لأجل تسلب(تجهض)وعاد عقب كل هالتعب اللي حصلته جميلة وهي عازّة مرضت عقب ماتريحت(ولدت)وعافتك عوف مابعده ماتبي لك مراعاة(تشوفه وتسمع صوته)وهالعادل المسيكين غدا هو امك ترضعك وسمية ولا عذبة وهو يلبس وينظف ويسهر ولا غدا يم دوامه حطك عند منيرة وحلّفها محدن يعمل بك شي الى منه جا ذاك اليوم
بتال ميل فمه بابتسامة خفيفة
الجد نشمي:اللي بادي غادين به يمّنا ناوين يأخذ بنيته يمه،،زفر وسكت وهو يطالع بتال،،
بتال بسخرية:وش قال؟مانبي الولد!!
الجد نشمي اتسعت عيونه:من علمك!!
بتال ابتسم بهدوء
الجد نشمي:هاذي قولة بادي ووكدت العلم جميلة!!
بتال زم شفايفه وهو يبللها ويقفلها بقوة
الجد نشمي:مير انه عادل ماطاوعه قليبه ابوك وغدا واميمتك بعد!!غدا بك يمهم وعقبها لان قليب امك لكن جدك تسلط!!ويوم انها عيت تعود معها كبها وقطع كل شين بينا وبينه!!
بتال:ووش ذنب امي!!حتى لو انه مايبيني ليش يقطع امي!!
الجد نشمي وهو يكتم الموضوع:هذا العلم عنده ماهو بعندي يابتال والحين عقب ماعرفت تريح راسك ولا ودك تدق باب اهل الديرة باب باب!!
بتال:ماابي اهل الديرة هو باب واحد اللي بأدقه واعرف وشو له الغيظ اللي اشوفه بعيونكم!!،،وقف،،
الجد نشمي:بتال
بتال:سم ياجد
الجد نشمي:أعيدها لك مثل اول تحرص من اهل هالديرة يابتال!!
بتال قطب جبينه:وشو عشان ابوي؟!!
الجد نشمي:ايه لاحدن يدري انك ولده منهم
بتال زفر:على امرك ياجد على امرك،،خرج،،
.
..بيت عادل..
ابو غازي مشغل العيال وكارفهم وهو جالس عالكرسي ع مدخل الباب وعينه ع بيت الشعر:جسّار
جسّار مشغول ماسمع مع الإزعاج
ابو غازي التفت لجهة البيت وبحدة:جسّار وعمى!!
جسّار جرى له ووقف عنده:سم يبه
ابو غازي اشر له بيده:اقرب
جسّار انحنى باستغراب
أبو غازي بهمس:عينك على اخوك الليلة لاتغفل عنه دقيقة
جسّار عقد حواجبه:اَي واحد؟!!
ابو غازي كشر بوجهه ومسك جسّار باذنه وبعصبية:انت متى بتترك الثوارة عنك!!
جسّار وهو يشوف بتال خارج من بيت الشعر قبالهم:ااااه اااه خلاص طيب طيب يبه عرفت عرفت
ابو غازي تركه وهو يشوف بتال
جسّار اعتدل بوقفته:شي ثاني يبه؟
ابو غازي وعينه ع بتال:اذلف لشغلك
جسّار مشى وهو يتحلطم بينه وبين نفسه
ابو غازي قطب جبينه باستغراب من هدوء بتال وهو اللي قبل شوي قوم الدنيا وقف
بتال وقف عنده وبابتسامة:ها يبه وش اللي علي اليوم؟
ابو غازي ارتفعت حواجبه باستغراب:ابد ماعليك شي!!ماهو انت زعلان!!
بتال:ايه زعلان وماني براضي لكن اختي وهاذي فرحتها ولايطيب خاطري اخرب عليها فرحتها
ابو غازي زفر وهو يميل فمه:رح لغازي اكيد عنده شي،،مشى وتركه،،
بتال اتجه لغازي
ابو غازي وقف وراه وهو يطالعه بشك واتجه بخطوات سريعة لبيت الشعر دخل:يبه
الجد نشمي طالعه:اسكت ياعادل
ابو غازي تنهد
الجد نشمي:للحين عقلي براسي ماني بمهبول اطشه للموت بيديني
..........****..........
أم جـلاجــل
.
..مجلس الشيخ..
،،سعود مامد يده على هلال لكن مسكه من ياقة ثوبه ومشى به وسط بيوت أهل الديرة وهو يجره بيد وحدة وراه والكل يطالعهم ولاأحد تدخل وماقدر هلال يفك نفسه من سعود رغم محاولاته وبعد مااخذ سعود فيه لفة بين البيوت رجع لمجلس الشيخ وحذفه،،
سعود جالس ع يسار مناور باخر المجلس ويطالعهم بابتسامة
هلال جالس ع يمين مناور وهو يطالعه وكله حقد
مناور يطالع هلال:ياابو هليّل صحيح كلامه؟!!
هلال بعصبية:ايه صحيح مير انه يستاهل ماجاه!!
سعود:ياشيخ لولا ان الجبر صعب عليه كان اخذت حقي منه
هلال بحدة:معصي
سعود وقف وعينه على مناور:انا ماغديت يمك حتى أوحي شين مايسر انا غادين يمك ابي العلم يوصل للي ماهم لافين المجلس بهالساع،،بتهديد،،أوحوني زين وعلمهم اللي يوجس كلمة مااحتريته ينهيها واللي عويناته توجس شيّن شين عز الله بيبطون وهم مالقوا له دوا،،مشى،،
مناور طالع هلال وبحدة:انت ماتقر!!اخلص من الوغدان تلفيني انت!!
هلال بحدة:علامة منكعم عنه!!
مناور:غازي يمّه ومغتاظ!!
هلال:انت ماراعيت. وش عمل بي!!هالخسيس مالقى له والي
مناور:واحلالاه من يتولاك انت ياهلال
هلال بحدة:مناور!!!
مناور بحدة:الشيخ ياهلال الشيخ مناور
هلال انصدم وطالعه مو مصدق كلامه
مناور وهو يمرر نظره عالموجودين:محد يتعرض بيت بادي واهله الى من ربي يرد إعداهم بنحورهم اوحيتوا؟!!
هلال بغبنة:على امرك ياشيخ على امرك،،وقف وخرج بخطوات سريعة،،
..........****..........
المغرب
..........****..........
،،جهز ابو غازي وعياله كل شي خصوصا ان هالمناسبة عائلية ماعدا الجيران وصحبات رهايف وبإصرار منها انها تكبرها قد ماتقدر رغم معارضة ابوها والتنسيق كان من شغل منسقة كالعادة ورجعت رهايف وامها واخيرا من المشغل،،
رهايف تطلع الدرج البيت البسيط
راشد خارج قبالها من البيت وقف وبينهم مسافة ابتسم:الـسـلام عليكم
رهايف وقفت:وعليكم السلام والرحمة
راشد:مبروك مبروك الله يوفقك ويتمم لك
رهايف استحت وبهمس:الله يبارك فيك وعقبالك
راشد:اووووه اخر زمن البزران يتزوجون قبلنا!!
رهايف كشرت:بزر بعينك محد غيّرك البزر
راشد ضحك وطالع ام غازي اللي تطلع الدرج:كيفك ياخالة
ام غازي بابتسامة:ياهلا براشد ياهلا الحمدلله كيفك انت ياعيني وكيف امورك؟
راشد:بخير جعلك بخير مبروك ياخالة مبروك عقبال امجاد والخمة اللي معي
ام غازي ضحكت:الله يبارك فيك والفال عندك
راشد:عاد استأذنكم امي تنتظرني ومبروك الله يتمم لهم على خير
ام غازي:ربي يبارك فيك رح درب التوفيق وحافظة الرحمن ياعيني
راشد مشى لبيتهم
رهايف نزلت الغطا وهي تتأفف وفتحت الباب ودخلت
ام غازي دخلت وراها
رهايف اتسعت عيونها وهي تشوفهم
،،غازي وبتال وجسّار وفيصل جالسين بالمدخل وعندهم ثلاجة قهوة وساحبين صينية من صواني الحلا اللي بالاستقبال ويتقهوون ويحلون،،
رهايف صرخت:ومــغــص!!!
،،بتال وجسّار ابتسموا بنفس اللحظة وهم يوقفون مع بعض،،
بتال بابتسامة:اعوذ بالله من الفتن!!
رهايف رمشت باستغراب
جسّار:الله الله الزين اليوسفي!!
رهايف خجلت
بتال وهو يمشي لها:اللهم الثبات لقلبي الصغير وش هالفتنة المضلة!!
جسّار وهو يمشي جنبه:وش هالجمال ياربي صدق من قال ماتلقى الجمال اليوسفي غيّر عندها!!
رهايف وهي ترجع خصلات شعرها الملفوفة لورا اذنها بخجل:يعني
بتال قاطعها وهو يمر من جنبها ويدفها على جسّار عن طريقه:وخري بس
جسّار كمل يدفعا عن طريقه بعد:نشبة طول عمرك وخري عنّي
رهايف بصدمة وهي تمشي مع دفاتهم والتفتت عليهم تطالعهم
بتال وقف عن يمين امه
جسّار وقف عن يسار امه
بتال وهو يسلم على راْسها وبصراخ:تبااااارك الرحمن
ام غازي فزت وضربته ع كتفه
جسّار سلم عليها هـو بعد:ارحموا من فالأرض يرحمكم من فالسماء
بتال:ياربي فتنة فتنة ليتني شاعر حتى اتغزل بالفتنة اللي قدامي
ام غازي ضحكت بخفة وسط خجلها
جسّار بعصبية:لاتضحكين
ام غازي ارتفعت حواجبها
جسّار باابتسامة:محد يشوف جمال الضحكة غيري
بتال ضرب جسّار ع كتفه وبعصبية:وجع امي!!،،سلّم على راسها ويدها،،غلطانة غلطانة وكلك غلط
ام غازي:وش فيه؟
بتال:ليش تحرمينا من الجمال ذا كله يمه ليش مالك حق!!
رهايف بعصبية:تحقحقت عظامكم يالمفاجيع من سمح لكم تأخذون صينيتي ها؟!!
جسّار التفت لها يطالعها:احنا مانعرف بنات خلي عنك صينية عاد!!
رهايف وهي تتكتف وبعصبيتها:ها ها ها ماتضحك يالسخيف!!
بتال وهو يضم امه بحضنه:يمه يالغيرة!!،،ينفث على امه،،قل اعوذ برب الفلق ناس ماترحم اعوذ بالله
رهايف بغبنة:لو ماهي امي عرفت ارد عليك
بتال:ايه لانك دارية هي الأصل وانتي التقليد،،باس راس امه،،بِسْم الله عليك حصنتك باسم ربي من عين الغيّارة!!بِسْم الله بسم الله
رهايف:انتوا يالاثنين من سمح لكم تأخذون الحلا ها؟!!
جسّار:اعوذ بالله من الظلم والاثنين ذويلك مالهم شغل يعني ولا بس انا وبتال!!
رهايف:ايه لان هالحركات ماتطلع الا من ورا روسكم
غازي وهو ياكل قطعة من الحلا:صدقتي جينا انا وفيصل وهم يبلعون
رهايف التفتت يسارها تطالع غازي بعصبيتها:وانت بطيني تشارك معهم!!
غازي:باسكت لك لان اليوم ملكتك
رهايف:غصب عنك تسكت مشارك بالغلط وتتشكى بعد!!،،التفتت لجسار وبتال وبصراخ،،والحين كيف بتصلحون اللي خربتوه!!
بتال ترك امه وبنظراته الحادة وهو يمشي لها:هيه انتي!!
رهايف بلعت ريقها وهي تطالعه
بتال وقف عندها وانحنى وسط تكشيرته:وش ذا؟
رهايف طالعت نفسها شيكت ع عبايتها:وشو؟
بتال بابتسامة:الزين ذا كله
رهايف ميلت فمها وبزعل:ايه واضح!!
بتال حضنها وباس راسها:مبروك يارهايف ربي يسعدك
رهايف حست بغصة وهي بين يديه
بتال:ويارب تطلعين روحه ونفتك منه
رهايف ضحكت:امين
بتال تركها من حضنه وهو يقيس طولها عليه:خلاص وقف طولك مافيه امل تطولين بتظلين قزومة للأبد
رهايف:هيه انت تراك مضيع!!لاتقيسني فيك وانت العملاق حق العايلة كلها!!
بتال:اااه نسيت!!الحين مايهمك طولك عندنا اهم شي وين توصلين عنده هو!!
جسّار اتسعت عيونه:ابوك يالجحدة!!هيه رهايف صدق كلامه
رهايف وهي ترجع شعرها بحركة غرور وسط رمشت عيونها وغنت:هو حبيبي للأبد ولاابي غيره احد،،ماحست الا وهي ترتفع عن الارض واعتلت صرختها المكان،،
بتال شالها ودار فيها
رهايف:يمممممهههههه!!
ام غازي بضحكتها:نزلها بتال حرام عليك!!
بتال:خليه يجي يفكك هالحبيب!!
رهايف بترجي وهي تمسك رقبته وتثبت نفسها:أمانة بتال أمانة وقف
جسّار وهو يتجه لإخوانه وجلس يتقهوى معهم:لاترحمها ماعندنا هالسوالف
بتال:هالحين ذكرتيني!!
رهايف:ماعندي حبيب اصلا انت الحب كله!!
بتال:والله؟!!
رهايف:تكفى بتال يخرب شعري أمانة
بتال نزلها وتركها
رهايف وهي تحس المكان يدور فيها ومو قادرة تتوازن وسط أصوات ضحكات اخوانها وطقطقتهم
بتال مسكها وهو يكتم ضحكته:ايه مقيولة وماالحب الا للحبيب الأولي الله يرحم أيام حبنا!!
رهايف سحبت يدها منه وبعصبية:الصينية وش اسوي بعد ماخربوتها لي!!
.
.
.
<اللهم صل وسلم على نبينا محمد>