ياسمح المحيا جر الهجنية

الجزء الخامس والعشرون

لاحول ولاقوة الا بالله
.
..بيت الشلة..
،،غرفة بتال،،
راشد دخل لغرفة بتال وهو كاشخ بيروح لدوامه:هيه جساروه هيه
جسّار نايم عالارض بفراش بتال ماصحى
راشد تنهد:ياصبري عليك،،دخل وحرك جسّار برجله بشويش،،جسّار ووجع قوم!!
جسّار بنومه:شوي يمه تكفين
راشد كشر بوجهه وشات جسّار بقوة بفخذه:ماينلام فيك بتال!!
جسّار جلس وهو يتوجع ماسك فخذه
راشد:كل خشونة الصوت ويمه!!
جسّار بعصبية:وجع وجع وجع رشيد ووجععع!!
راشد:يوجعك ان شاء الله قم عني المفروض مالي فيك لكن قلبي رهيّف،،مشى،،
جسّار وهو يوقف:قطع لهالرهافة!!من وراك مانبيها!!،،تلفت حوله وهو يخرج من الغرفة،،وينه بتال؟
راشد:وينه يعني اكيد يكمل الهوشة اللي يدينها البارح
جسّار ابتسم ثم زعل:وليش ماصحاني!!يتهاوش لحاله!!مايصير!!
راشد التفت عليه وبحدة:اذلف لدوامك وانت بأول يوم متأخر يارداة الحظ!!
.
..بيت مناور..
مناور داخل للبيت وبصرخة وحدة:صـيـفـة!!!
،،نوفة وشريفة جالسات بوسط البيت ينقون القهوة،،
نوفة وقفت بفجعة:سم يبه عسى ماشر
مناور دفها عن وجهه وبصراخ:صيفة وقطع!!
شريفة وقفت وبخوف وهي تشوفه هايج:يبه تعوذ من ابليس
مناور بحدته:واللي يخبركم ياوجيه ابليس يعيّن خير،،صرخ،،صيفة وصريمة!!
غيثة ونايفة صحوا على صراخ ابوهم وخرجوا من غرفتهم
هدية تطالعهم من الشباك ماتقدر تخرج بسبب وجود غيث بالبيت
ام غيث خرجت بخطوات سريعة وهي تلف طرحتها:سم سم ياابو غيث سم
مناور ضربها كف على وجهها بكل قوته
،،نزلت صدمة عالواقفين يطالعون مو مصدقين،،
ام غيث تطالعه مصدومة
مناور بحدة:ماحسبت حساب انه بيوم بيغدي بمجلسي رجلن يشكي علي ويوم انه جته الصملة غادين يشكيني بمرتي ويشكيني وسط الرجال!!!،،نزل عقاله،،كود إنش ماعقلتي للحين وانتي غازيش الشيب انا أعقلش ياصيفة،،بدا يضربها بالعقال وسط صراخ البنات اللي يمسكونه عن امهم ويضربهم معها وبصراخه،،ياعلشن للصرايم كل ابوشن يابنات صيفة
هدية خرجت ووقفت جنب عمها تسحبه:تكفى ياعم كبّ عمتي تكفى
مناور دفها بقوة عنه
هدية ابتعدت خطوات عن عمها من دفته
مناور:طسّي عن وجهي لاأذبحش معهن!!
هدية مسكته بيده:حرام عليك تصدق الغريب يمكن يتجنّى!!
مناور ضربها كف
غيث خرج من غرفته وهو يتأفف على ذَا الصراخ من الصبحية اتسعت عيونه من اللي يشوفه
مناور بحدة:تعقبين عيال الشميلي ماينطقون زور لو حد السيف على ارقابهم!!،،رفع عقاله يضربهم،،سويدات وجه سودتن وجهي بين القوم اللي لايبارك فيتشن!!
،،اعتلى صراخ ام غيث وبناتها،،
غيث دف ابوه عنهم وبصراخ:يبه!!
مناور بابتسامة:ها!!!اقبل اقبل اقبل وينك!!ابطيت؟!!
غيث بصراخه:وشلون تضرب الحريم يبه وشلون!!!
مناور بسخرية:وشو!!وش اوجست!!الله أكبر راعوا من اللي يوجس الحكم!!،،كشر بوجهه،،راس الصرايم كل ابوها!!
غيث:وشلون يبه تهين امي وشلون!!
مناور:انكعم انت لاأوحي لك حس!!نسيت انك البلا كله!!تجنيت على بنات الناس ثم جحدتهن ثم اخذتها ثم هولت بها وطمحت عنك وهي ماكملت شهر من علومك!!والحين تعلمني ياسويد الوجه!!الصرايم ماجت الا من وراك
ام غيث صرخت:يعقبن يتجنن(يتهمن)على وليدي
مناور صرخ:انكعمي!!وليدش ذا كود ماعلمته وربيته من اول وتالي وانتن كل أبوكن معه مااكون مناور
غيث بغبنة:ماعملت شين يبه هذا انت دايم توحيهم ولاتوحي لي!!الظليمة شينة يبه وانا ماعملت شين ابد كله من عيال عبري!!
مناور صرخ:انكعم اوجس لك ماتوحي!!ثم طسّ عن وجهي انت هرجتي مع امك،،طالع ام غيث،،تغدين يمهم انتي وبناتش وحدة وحدة الحين تحبين روسهن ويدينهن ورجولهن وأتعذرين منهن وانا اوحيش عالباب والرجال انا أقوم بواجبهم لاقوّم الله حظش!!
غيث بغبنة:يبه ترضى المهانة لامي!!
ام غيث بدموع:يعقبن والله ماتخطي رجلي يمهم ابد!!
مناور بحدة وتشديد على كلامه:ثم لاخلصتي تغدين يم البيت اللي يعجبش وتخيرين لي احسن بنات هالبيت مرتن لي فوق راسش ولا لاتطب رجلش بيتي ابد
ام غيث انخطف وجهها من صدمتها
مناور خرج
.
،،عباير واقفة ع جنب الطريق اللي سيدين رايح جاي بنفس الوقت راجعة للبيت بعد ماعبّت الوايت ومن شين حظها بنشر عليها بعد ماعبته حاولت تغير الكفر اكثر من مرة لكن ماقدرت حاولت توقف احد يساعدها وللاسف محد يوقف لها وهم يعرفون السيارة واكيد اللي تسوقها عباير،،
عباير طالعت حلايا اللي نايمة بداخل السيارة اشرت السيارة الجاية من جديد وهي تحاول ماتيأس لكن مثل اللي قبلها مروا وتركوها عضت شفتها بغبنة وانحنت وهي تدعي عليهم(لاأبوكم من ديرة ياعساكم بالصرايم والنوايب الله يأخذ حقي منكم)وتحاول من جديد تغير الكفر لكن ماقدرت وقفت وهي تنفض نفسها من الغبار لكن مانظف الغبار تجمعت دموعها بعيونها ثم طالعت الكفر بحقد وشاتته واوجعتها رجلها وبكت اخذت هالوجع عذر حتى تبكي ماتقدر تسمح لدموعها تنزل بسببهم لانها بتعتبرها إهانة وذل لها بعد صبر السنين اللي فاتت وهلت دموعها بحرقة التفتت وهي تشوف سيارة من بعيد متجهة لها(عكس جهتها)انتظرتها تقرب اكثر انحنت وهي تاخذ فردة من صندلها بيدها ثم مشت للطريق ووقفت بنصه والسيارة متجهة لها ورمت الصندل عالسيارة بقوة وبصراخ وسط دموعها:أقـــف!!!!(أوقف)
بتال عقد حواجبه وهو يهدي بالسيارة ويشوف هالمجنونة بعينه واقفة بنص الطريق وناوي يبعد عنها:الله يكفينا شر المجانين بهالديرة،،انصدم وهو يشوف شي يضرب بقزاز السيارة ولف بقوة من فجعته وخرج عن الطريق للجهة الثانية عكس عباير وقف ونزل من سيارته وبصراخ وسط عصبيته،،هييييههه!!مريضة!!مجنونة انتي!!
عباير بحرقة وسط دموعها:ايه مجنونة ومهبولة!!هو اللي يظلي بهالديرة يظل به عقل!!اهبوا اهبوا ياويلكم من ربكم!!خابرتن مابكم رجولة مير حتى قلوبكم سودا!!يانعنبوكم مابقى بقلوبكم رحمة!!،،بصراخ،،تف عليكم من رجال تف
بتال رغم إهانتها الا انه سكت وهو يسمع نحيبها وعرف انها نفس البنت اللي بكل مرة تتهاوش معه زفر وهو يبلع غيظه ويصد عنها:وش فيك؟و
عباير قاطعته بغبنة وسط دموعها وكأنها تنتظر هالسؤال من أي أحد من فترة:وش اللي مافيني ضيم وظلايم!!تجني ونظرات وحقد وغبنة كلها مرتن وحدة ولاحولي احد أشكي له!!ماحولي احد يأخذ بحقي!!سعود واعزتي له مااقدر قليبي مايطاوعني اطشه عليهم وهو ان درا بهم بيغدي يمهم ثم يصيب اللي ماصابه من خمس سنين وهالمرة ماهي بسجن هالمرة ثابتة بيذبحهم ثم يقصونه ونظلي لحالنا مامن سند ولاظهر بينهم!!وجدي!!اااه ياجدي والله ان يموت بمكانه من الغبينة!!وبخوت الضعيفة هاذي هي تحيا وتموت لالمحت زول رجل وان اوجست سالفة بها رجل إتراعد(ترجف)تقل نازلتن بها صريمة!!وين اغدي بروحي ولمن أشكي!!ويل حالي ويل حالش ياعباير تصكين روحش بوسط هالضلعان(الجبال)من الضيم اللي يجري بش وتسكتين!!اااه ياقليبي ااه اموت وأحيا دهر باليوم ولااحدن درا بي!!اااه!!،،جلست عالارض تنتحب وهي تخرج قهرها طول هالفترة اللي راحت،،
بتال اكتفى بوقوفه وهو صاد عنها مشى لسيارته ورجع وبيده علبة موية وانحنى وهو يحطها عندها بدون لايطالعها وكمل طريقه للوايت وهو يفك ترسيمة شماغه ويربطه على راْسه وهو يبدا بيبدل الكفر المبنشر وصدح بصوته وهاذي طريقته الوحيدة اللي يعرفها ويواسي فيها عادةً اَي احد قريب منه انحنى شبه جالس يفك الكفر وهو يصدح بصوته وسط زفرة طلعت من أعماق صدره:
يـالـلـه إلـيـا ضـاقـت عـلـيـك الـتـسـاهـيـل..
عباير التفتت له وهي تطالعه بهدوء وسط شهقات تفلت منها
بتال وقف وبوسط انفاسه من سحبته للكفر ومكمل شغله:
يـالـلـه إلـيـا ضـاقـت عـلـيـك الـتـسـاهـيـل..
عـلـيـك مـاتـصـعـب الأمـور الـكـلـيـفـة..
فـيـك الـرجـا لاوقـفـن الـمـحـاصـيـل..
وصـكـت مـغـالـيـق الـظـروف الـعـنـيـفـة..
اقـبـل دعـاء مـن مـد لـك تـالـي الـلـيـل ايـديـه..
وانـظـر لـه بـعـيـنٍ لـطـيـفـة..
تـغـنـي عـن أصـحـاب الـفـلـل والـمـلايـيـن..
أهـل الـتـجـارة والـرتـب والـوظـيـفـة..
عباير هدت بشهقاتها وهي تطالع قفاه وهو يشتغل
بتّال خلّص شغله ووقف وهو يلتفت عليها ورفع كف يمينه اللي قافله ماعدا سبابته اليمين اللي مأشر بها لفوق وبابتسامة هادية:تراه موجود دايم
.
..بيت طلق..
شامة شبه جالسة بطرف حوش البيت اللي مفروش فيه زولية صغيرة وعليه الفطور تجمع الصحون وتوديها للمطبخ وترجع بوسط دموع متجمعة بعيونها ومع اخر صحن حطته بصينية الشاهي وكاساته انفجرت تبكي وجلست وهي تمسح دموعها وتحاول توقفها لكن مو قادرة بكل اسف كيف توقفها وهي فوق فطور اهله الي وصل مع صلاة الفجر للعرسان صحت وطبخت له يمكن يتغير كلامه اللي البارح وصدمها اكثر وقت شاف الفطور ورده لها(لاتعنين روحش وتطبخين فطور ارقدي والغدا بالمحطة اتغدا دايم والعشا لاتحتريني عليه ارقدي اصرف لش)زاد بكاها وبنفسها:وين التقدير اللي يوجسه لي هذا اولها ياشامة هذا اولها!!،،طالعت صحن الفطور والشاهي ووقفت واتجهت للمطبخ بخطوات سريعة وهي ترجع كل الفطور وجلست وسمت وهي تاكل وسط دموعها وبغبنة،،أنا أعلمك ياطلق هين أنا أعلمك
.
راشد متجه للمدرسة ورن جواله بنغمة الرسايل وهذا يعني وجود الشبكة خرج جواله من جيبه بسرعة واتصل لامه وابتسم:السلام عليكم
عذبة ردت بهدوء:وعليكم السلام والرحمة
راشد:افا!!الغالية زعلانة!!
عذبةبزعل:ومن غيرك يزعل الغالية حقته؟!!
راشد:افا يَاذَا العلم!!الغالية زعلانة!!امي زعلانة علي!!يقطع الدنيا اللي تزعل امي مني وش ابي منها خلاص انا رايح انتحر لاتكلميني!!،،اسرع بسيارته ورن جرس السرعة،،
عذبة بخوف ملا صرختها:راششدد!!
راشد وهو مستمر بسرعته:ياعيونه
عذبة:هد!!هد سرعتك
راشد وسط رنة الجرس الواضحة:راضية علي؟
عذبة قفلت بوجهه
راشد توسعت عيونه وهو يهدي ويرجع يتصل وبعد كم دقيقة مسك معه الخط
عذبة بعصبية تكتمها:نعم
راشد:أحبك
عذبة سكتت وهي للحين معصبة
راشد:اميمة راشد عيون رشود يمه
عذبة بعصبية:ياعساك بالعافية قل امين!!ماتبت!!يعني تبي تسوي حادث من جديد الله يكفينا الشر
راشد:يستقبلني بتال وبعده جسّار
عذبة صرخت:راشد!!
راشد:استغفر الله استغفر الله ماقصدت يمه!!ويعزين ترا زعلك كانه صاير لي حادث كيف بيمشي يومي بيوقف كل شي باللحظة اللي زعلتي فيها
عذبة تنهدت:الله يصلحك بس هالكلام ماابي اسمعه مرة ثانية
راشد:على خشمي ابشري
عذبة:أفطرت
راشد:واللي يسكن مع المجنن يفطر؟!
عذبة:رشود عيب عليك اخوانك
راشد:انا مو مصبرني على هالاشكال الا انتي
عذبة بابتسامة:ووش فيهم هالاشكال!!!
راشد:ووش اللي مو بفيهم يمه!!غثاثة!!مناقر!!عناد!!زنّ عالراس!!ومالي كلمة ابد!!
عذبة بابتسامة:وماتقدر تعيش بعيد عنهم
راشد:بالضبط!!وهم بعد يموتون بدوني يضيعون!!
عذبة ضحكت:فديت المتواضع وليدي
راشد:وشلون امي وابوي؟
عذبة:ماعليهم
راشد:اكيد النشمي مرتاح من الإزعاج
عذبة:الا انه مشتاق للهجينيات بيموت من شوقه لها بصوت بتال قول لي بس ماحولكم جية؟
راشد:اكيد انا نازل نهاية الاسبوع لكن الشباب مدري
عذبة:كيفك مع الدوام ياعيني؟
راشد:مرتاح مرتاح الحمدلله يسلمون عليك
عذبة شهقت وبصدمة:مين؟!!
راشد:مين يعني!!الصغار،،ضيق عيونه بتفكير،،يمه لايكون تحسبين قصدي المدرسين؟!!
عذبة توترت وباحراج:ولد عيب عليك!!
راشد:بسيطة يمه المدير يمدحونه وش رايك؟
عذبة بعصبية:رشيد!!
راشد ضحك:امزح امزح وش فيك يمه عصبتي!!لايكون عينك عـ
عذبة قاطعته:انتبه على نفسك مع السلامة،،قفلت بوجهه،،
راشد ضحك بصوت على امه ثم ابتسم وزادت ابتسامته وهو يعرف هالقفا زين من كثر مايشوفه ولف بسيارته عنده وهو يهدي وبابتسامة:السلام عليكم
حمدان بيده شنطة سودا التفت له وابتسم:هلا هلا ياحيّه ياحيّه ارحب
راشد بابتسامته:على وين؟
حمدان:يم الشغل
راشد:اطلع اوديك
حمدان رجع خطوة لورا وباحراج وربكة:لا لا امنعني من كثر الجمايل!!
راشد:لاتخليني انزل وادخلك غصب اطلع بس اطلع وينه شغلك
حمدان:ماهو بعلى دربك انا بالمدرسة
راشد ابتسم بوناسة:صدق!!انا بعد بالمدرسة اطلع اطلع بس
حمدان طالعه بتردد للحظة ثم ركب معه
راشد حرك بابتسامة:من بكرة كل يوم معي
حمدا اتسعت عيونه:وش
راشد قاطعه بإصرار:مالك كلمة ابد بهالموضوع،،ابتسم،،الله يحييها من وظيفة دام اصبّح بهالوجه الطيب
.
..المستوصف..
جسّار بلبس دوامه السكراب وفوقه اللاب كوت ومن وصل لدوامه وهو رايح جاي بين الطوارئ ومواقف سيارات الإسعاف ينتظر بتال على نار
بتال وقف سيارته ونزل بثوبه اللي انعدم من تصليح السيارة مشى وهو يسرع بخطواته يبي يسجل حضوره خصوصا انه متاخر
جسّار لمحه وهو متجه للطوارئ واسرع بخطواته يلحقه
بتال خرج جواله اللي ناسيه عالصامت وهو اصلا نساه نهائيا من وصل هالديرة لعدم وجود الإرسال وقف وتوسعت عيونه وهو يشوف عدد المكالمات غير الرسايل
جسّار من وراه نط بخفة وضربه ع رقبته وبعصبية:ووجعوه ابتيل ووجعوه!!
بتال التفت عليه وهو عاقد حواجبه وباستغراب:خير!!
جسّار:وينك متاخر؟!ذبحني القلق!!
بتال مسكه من يده ولفها ورا ظهره
جسّار وهو يضرب على يد بتال بيده الثانية بشويش:اااه اااه ااه
بتال:وهذا مو عذر حتى تطول يدك علي!!
جسّار بألمه:حنا مو بالبيت بتال فكني فكني
بتال دفه وهو يمشي لمدخل المستوصف:ذابحك القلق مو تضربني!!وش ذَا الأسلوب
جسّار وهو يمشي جنبه ويهمّز يده بعد اللفة:من زين أسلوبك عاد!!المهم ماشفت جوالك ابوي يبيك
بتال وقف ويطالعه مو مصدقة ويحس بقلبه بيخرج من مكانه من سرعة نبضاته
جسّار لف عليه وهو مكمل يمشي ع ورا ويديه بجيوب لابكوته وباستغراب:وش فيك؟!!
بتال احتدت ملامحه:ورب البيت لو تكذب ياجسار ان مدير المركز والشرطة الشرطة بحد ذاتهم مايفكونك من يديني!!
جسّار وقف وهو يخرج يديه وبنرفزة:وش فيك انت وأبوك شغّالين تسفيل فيني!!يبيك يتصل فيك وشو له أكون واسطة بينكم!!تدري عاد الحق علي اللي اقولك انه يبيك خله يتصل بعد مايطفش مني بدون رد وذاك الوقت خذ لك انت احسن تسفيل،،مشى عنه بخطوات سريعة،،
بتال حس بندم على تسرعه بالكلام مشى وراه بدون لايكلمه وطالعه وهو يمشي قدامه
،،اافترقوا وجسّار يتجه لمكتبه وبتّال يتجه للتوقيع،،
بتال بعد ماوقع اتجه لغرفة الطوارئ ومنها لمكتب الدكتور المناوب دق الباب
جسّار جالس ورا مكتبه وهو يقرا بلاب الدوام ببحوث طبية من الطفش طالع الباب:تفضل
بتال فتح الباب
جسّار رجع عينه بدون اهتمام
بتال يعرج:دكتور حالة طارئة،،جلس عالسرير اللي قبال المكتب بمسافة،،
جسّار وعينه باللاب:وش عندك؟
بتال:قلبي يوجعني
جسّار طالعه وهو رافع حاجب وبتكذيب لبتّال:تعرج واللي يوجعك قلبك!!!
بتال ارتفعت حواجبه:وتسمي نفسك دكتور!!يمكن
جسّار قاطعه:بتقول علامات جلطة العب غيرها رح وتيسر لشغلك
بتال مسك صدره وهو يتمدد وصرخ:اااااه ااااه،،تكور على نفسه على جنبه اليسار وصار معطي جسّار ظهره وحط يديه ع صدره وبنفس صراخه،،بموت بموت الحقوني ججججللللطةةة!!بأنجلللللطططط!!
جسّار فز من كرسيه من صراخه اللي غطى المكان ووقف عند السرير وهو يحط يده ع فم بتال بتوتره وعينه عالباب
ممرضة وقفت عالباب وبوسط انفاسها بعد جريها وهي تدخل:اَي مساعدة دكتور
جسّار بابتسامة:عارض بسيط والأخ متوهم فقط تقدرين تشوفين شغلك
الممرضة تطالع تحاول تشوف المريض بس مو واضح لها لان وجهه عالجدار وظهره على جهتها
جسّار بابتسامته:اذا احتجتك الجهاز موجود
الممرضة باحراج وهو تفهم الطردة:اه اوك،،مشت،،
جسّار بهمس:اوص اوص فضحتنا الله يقطع ابليسك!!
بتال وهو يدف يد جسّار عن فمه بقوة ويأخذ نفس بصوت مسموع ويرجع يده فوق يده اللي على صدره وهو يعتدل على ظهره:صدري بموت دكتور بموت!!
جسّار:موت وريحني!!
بتال بزعل:وويهون عليك فراقي
جسّار السامج عجبته السماجة اللي نطقها بتال لكن كابر وسحب الشرشف حق السرير وغطى بتال به:اَي يهون ياتخمد(تنام)ياتذلف من عندي
بتال شال الشرشف عن عيونه:ياعديم المشاعر والإحساس والرقة جرحت مشاعري وياحنيني وأشواقي لجسّار الكسّار اللي كسر مشاعر وحدتي وناشبني بكل تفاصيل حياتي،،حرك حواجبه الواضحة فوق وتحت وبسماجة،،انا اشتقت انت للحين تكابر؟!!
جسّار مبسوط لكن مستمر بمكابرته وسحب الشرشف وغطى عيون بتال وهو يضغط عالشرشف ويثبته تحت راس بتال بقوة:اخمد وفكني،،انتبه لرجول بتال وشوي من سيقانه اللي طالعة من الشرشف ومو مغطيها نزل جزمة المستشفى اللي لابسها ومسكها بيده وضرب بتال بقوة ع رجوله،،محد لعب بميزانية ابوي غيرك يالعملاق
بتال جلس من الضربة
جسّار دفه عالسرير:اخمد بس اخمد ادري بك هاج عن الدوام،،لف ومشى متجه لمكتبه،،
بتال تحرك ع جنبه تحت الشرشف وزفر بصوت:ااه
جسّار عقد حواجبه وهو يلتفت وطالعه للحظة ثم كمل طريقه لمكتبه وجلس
بتال عالسرير ماتحرك
جسّار طالعه بشك للحظة ثم قام من مكتبه وهو يتجه لبتّال وبجدية:وش تحس به؟وين الوجع بالضبط؟،،وقف عند السرير،،
بتال مارد
جسّار سحب الشرشف وباستغراب:هيه ابتيل
بتال معطيه جنبه ولارد
جسّار توتر وحركه
بتال وهو يتحرك معه رفع يديه من على صدره ومدها بوجهه بحركة قلب:مع خالص الحب وخالص الأسف
جسّار طار توتره وانفجر يضحك رجع بخطواته لورا وهو يمسك بطنه من ضحكه:يمه يمه صادق يوم تقوله ماتليق لك السماجة!!
بتال كشر بوجهه
جسّار:اااه بموت بموت،،خرج جواله،،تكفى عيدها واللي يسلمك ابي أصورها للمخفات اللي بالبيت تكفى
بتال رمى الشرشف عنه وهو يوقف:خلصت ضحك؟رضيت؟يالله عاد عطني سكراب او اَي شي ماتشوف حالة البهذلة اللي صايبتني!!
جسّار ارتفعت حواجبه:مامعي شي
بتال طالعه بتكشيرة
جسّار نزل اللاب كوت:مش عمرك به لنهاية الدوام!!
بتال:لاياشيخ ترا اسعاف مو لعب!!
جسّار:وش تبيني اسوي لك!!شايفني مصنع أقمشة!!
بتال:ماتضحك والله
جسّار طالعه بشك:كل ذَا تهرُّب؟!!
بتال:كيف يعني؟!!
جسّار اتجه لكرسيه وهو يطلع جواله وجلس ولفه على بتال وجواله عليه مكالمة لكن عالصامت:رد وريحني ترا طفشت
بتال تنهد:طيب طيب اذا بغيت شي
جسّار وعينه بجواله:مابي منك شي وانت متنقّع بالحر!!رح بس
بتال توسعت عيونه:هين هين مصيرك ترجع لي هين
جسّار بدون اهتمام فيه او لكلامه اشر بيده بمعنى روح
بتال خرج وهو يطالع اسمه بجواله دخل وقف عند الإسعاف وهو يحس بتوتر فظيع ماله مثيل اخر مرة حس به وقت الرخصة اخذ نفس وسط سرعة نبضات قلبه اللي يسمعها وهو يتصل عليه حط الجوال على اذنه ووصل لمسامعه ذاك الصوت الثقيل المليان قسوة
ابو غازي:نعم
.
..بيت بادي..
بخوت بغرفتها نايمة وصحت من النوم على صوت دق الباب القوي قامت وهي تحس بصداع فظيع وتحاول تستوعب وش صار لها لكن الأسف الصداع مو تاركها تذكر شي خرجت من غرفتها وهي تتسند عالجدار بيدها وقفت ورا الباب وبصوت كله تعب:من؟
ام غيث:فكي لي
بخوت فتحت الباب وأول ماالتقت عينها بعين ام غيث توسعت عيونها وهي تذكر اللي صار البارح كله .
~
ام غيث رمت نفسها على بخوت وهي تأخذها بحضنها وسط دموعها:العذر منش ياام القلب الأبيض
بخوت قشعر كل جسمها ودفتها عنها بقوة وبصرخة:عبااااايررررر!!!
.
..السيارة..
عباير تسوق وهي وسط مشاعر مختلطة مابين استغراب ولوم لنفسها ونرفزة من نفسها وبحلطمة مسموعة:علامي انا غديت يمّه!!عزّ الله ماني بعقلي!!كتيت الاول والتالي عنده ولا حيا ولا مستحى!!اهبي ياوجهش ياعباير طشيتي روحش عالرجل،،عقدت حواجبها بتفكير ثم اتسعت عيونها،،الا يهبى هو!!اهب ياوجه غادين يطق حنك مع غريبتن عنه!!ويتغنى بعد!!،،سكت وبهمس،،صوته زوين،،انتبهت لنفسها،،اعقبي ياعباير ماتكفيش الصرايم غادية تعصين ربش وتنزل بش صريمة!!اهبي ياعباير اهبي ويهبى هالنخلة معش ايوا الله!!،،وقفت عند البيت وهي تصحي حلايا،،قومي ياحليوة الخد غدينا يم البيت،،اتسعت عيونها بفجعة وهي تسمع صرخة بخوت،،
.
..المستشفى..
بتال رغم القسوة الا انه اشتاق لهالصوت كثير وكثير جدا:صبحت بالخير يبه
ابو غازي سكت وهو وده يرد متشفق له ولسؤاله عن أحواله وكيف اموره لكن اللي سواه كبير بعينه
بتال:وشلونك يبه عساك بخير
ابو غازي وهو يكتم غيظه:بخير الحمدلله الله مغنيني عنك(ماني بحاجتك)
بتال حزت بخاطره وزفر:عساه دوم ان شاء الله
ابو غازي:ماني مطارد وراك لحاجة لاتغتر
بتال:وأعقب كانك تطاردني وانا مرتاح الله يشقيني ولايريحني
ابو غازي:امين امين الله يرزقك بولد مثلك يشقيك ويذوقك ماذوقتني
بتال:الله يصلحني لك يبه ترا دعوة الصلاح زينة
ابو غازي:اعقب!!
بتال:أبشر
ابو غازي كشر بوجهه:اسمع بس ولاتكثر هروجك ملكة اختك قريبة
بتال عقد حواجبه وهو يسمع الخبر ولايدري يتكلم عن اي أخت
ابو غازي:كان ودك تجي حياك مثلك مثل الضيوف ولو انه علي ماتطب بيتي لكن الشكوى لله امك على اخر عمرها انهبلت وليتك عاد تستحي وتحفظ ما وجهك ولاتجي تسوي فيني خير وكبير بعد
بتال ضحك بخفة وكله حزن:الحين تبيني أجي ولا لا؟!!
ابو غازي:الأكيد ماابي لك شوفة
بتال:وأمي؟
ابو غازي:عاشت بدونك وبتعيش كانك ماجيت
بتال بكسرة خاطره:يبه انت صدق ماتبيني أجي ملكة اختي وانت تدري ان ماعندي غيرهن!!
ابو غازي سكت
بتال:يبه هن حيلتي مالي غيرهن ثنتين بس بس!!ماتبيني افرح فيهن؟تقوله صدق يبه
ابو غازي بدون اهتمام:قلت لك مثلك مثل الضيوف تجلس بالمجلس وبيتي ماتطبه وكان دخلت لبيتي تحمل مايجيك مني
بتال:حاضر يبه نتحمل لعيونهن أتحمل يبه أتحمل
ابو غازي قفل بوجهه
بتّال تنهد وهو يطالع شاشة جواله بعد ماقفل ابوه زفر وهو ضايق خاطره من اللي سمعه دخل يديه بجيوبه بهم انخطف وجـهـه وهو يحس بألم براسه من ضربة حس فيها حط يده على راْسه مكان الضربة وهو يلتفت لوراه وطالع يده اللي كانت على مكان الضربة واتسعت عيونه وهو يشوفها تلونت بدمه تقدم بخطواته بسرعة لاإرادية وضرب بالباب الخلفي للإسعاف بعد الدفة القوية اللي جت له من جنبه وهو للحين مااستوعب الهجوم اللي يصير له
.
.
<اللهم صَل وسلم على نبينا محمد>
...........