ياسمح المحيا جر الهجنية

الجزء السابع

ستغفر الله العظيم وأتوب إليه..
..لاحول ولا قوة إلا بالله..
.
.........****..........
بيت عوض
،،جالسين بمكان جلستهم المعتاد وسط نقاش حاد بينهم،،
ابو فارس(عوض عّم طلق وتزوج ام طلق بعد ماتوفى اخوه وتكفل بعيال اخوه وعاشوا بنفس بيته):ياولدي ياطلق تعوذ من الشيطان تعوذ!!
طلق بعصبية:وشو له تزوجيني اياها وانا ماابيها؟!!
ام طلق توسعت عيونها:قم إمحّط عمك ياطلق احسن!!
ابو فارس اشر لها بيده بمعنى تتركه يتكلم
طلق:انا مااابي شامة وبالأصل ماابي الزواج كله ليش تبلشوني بها ليش!!
ابو فارس:ياولدي وعسى ان تكرهوا شيئا وهو خير لكم
طلق:الخير اللي من وراها ماابيه!!امنعوني منها ومن ابوها العلة!!فكوني تكفون!!
ابو فارس:طلق ياابوك
ام طلق قاطعته:اسمع ياطلق عمك عطاك العلم والرجال اخذوا كلمته والله ورب البيت ان نزلت كلمة عمك بالقاع لاأعرفك ولا انت ولدي
ابو فارس:اعوذ الله استغفري ربش يامرة!!
طلق وقف وبعصبية:ليش يمه ليش!!
ام طلق:العلم وانكت ببطنك وانت بكيفك!!شاري آخرتك ولا بايعها!!
ابو فارس:عتيقة!!وش بش عليه!!
طلق:ليش هالقسى بقلبه علي يمه ليش!!
ام طلق:انت كتبت نصيبك من سنين ارضى ياطلق واطحن الحب اللي برأسك وأنسى ان اللي تبيه يصير
طلق بقهر:اجل اسمعوني زين إنتوا بعد انسوا اللي تبون يصير!!،،خرج،،
ابو فارس بحدة وهو يطالعها:وش بش عليه؟!مايكفي خاطره اللي انكسر!!
ام طلق:خله خله ياعوض لازم ينسى لازم مابيدبر عمره اذا ظل يذكر
.........****..........
ابو غازي نزل من السيارة ومشى متجه للبيت وسط أنظار الكل عليه خصوصا انه اول من نزل من السيارة طالعهم وبجديته المعتادة:مابه الا العافية يعني ماشفتوا خباله اول مادخلنا مع الباب!!،،كمل طريقه لبيته وهو يهاوش ببتّال بينه وبين نفسه،،
ام غازي اسرعت بخطواتها للسيارة
ابو جواد نزل وفتح الباب اللي وراه:انزل وبالهون لاتخطي بسرعة
بتّال وهو يمد يده لعمه
ابو جواد طالعه للحظات يستوعب
بتّال بصوت يرجف:اخاف ادوخ مرة ثالثة ياعم ماعاد فيني شدّة للمستشفيات
ابو جواد وهو يشاور نفسه للحظات مد يده له وهو يزفر:بِسْم الله
بتّال نزل وهو يسمي ويتسند على عمه
ام غازي وقفت وبخوفها:ياروحي انت وش صار عسى ماشر
ابو جواد:الحمدلله بسيطة وعدت على خير الحمدلله
بتال تنحنح
ابو جواد:بس داروه هاليومين لايدنق(لاينحني)واجد ولايشيل شيّن ثقيل وخلوه يتريح وأن شاء الله ماقدامه الا العافية
ام غازي:الله يطمن قليبك ياابو جواد ماقصرت
ابو جواد بابتسامته وهو يحط يد بتال بيد امه:استأذنكم انا واخليك تشوفين ولدك زين،،مشى،،
بتال اللي مافوت الفرصة انحنى وحضن امه وهو يتنهد:ياعروق قليبي انتي خوفتك علي
ام غازي تدفه بخوف عليه:ابعد ابعد توك مابريت لاتدنق!!
بتّال همس لها:ياروح روحي انتي طيب طيب وربي طيب هذا اتفاق صغيرون بيني انا وعمي
ام غازي توسعت عيونها ودفته وهي ترفع نفسها تبي تضربه على كتفه لكن كالعادة تصيب نص ظهره:ووجعوه بتالوه يامال العافية
بتال ضحك وهو يضم امه لحضنه بسرعة ويهمس لها:تكفين يمه خليني الليلة لاتفضحيني طلبتك يمه
ام غازي زفرت وهي تمسح على ظهره:كيف جرحك يمه؟
بتّال بابتسامة:الحمدلله طيب
ام غازي:يوجعك؟
بتال بابتسامته:وانا عندك مااحس بالوجع
ام غازي:تكذب علي؟!!
بتال تنهد بابتسامة حنونة:انتي دواي تكفيني يمه
ام غازي:الحمدلله على سلامتك ياروح امك
بتّال:الله يسلمك ويخليك لي،،رفع عينه وهو يشوف اخوانه وراشد واقفين عندهم ضم امه اكثر يغيظهم،،ابي انام معك الليلة يمه،،ركز عينه على جسّار،،وبحضنك
ام غازي دفته:تبي رضاعة بعد؟!!
بتال ضغط عليها:اذا بأظل بحضنك عطيني إياها يمه
غازي تقدم لهم خطوة وفك بتال عن امه وحط يده على كتف امه:ترا عطيناك وجه راعينا وضعك وتركناك تأخذها منا لكن خلاص مايصير اللعب بالمشاعر يااخوك!!
ام غازي دفت يده:غويزي انت عندك عذاري اترك بتال
بتال ضحك وهو يضم امه يغيظ غازي:رح لعذاري لاتزعل عليك ترا خلاص مالك مكان
غازي ابتسم:مقبولة منك الليلة الله يعينا عليك
ام غازي دفت بتال عنها متضايقة من ضمته الزايدة لها
غازي ابتسم وهو يسلم على بتال:الحمدلله على سلامتك
بتال:الله يسلمك،،تركه ولف على جسّار اللي جنبه وسلم عليه عادي،،
جسّار ردت فعله غريبة بالنسبة له سلم عادي ولانشب له كالعادة:الحمدلله على السلامة بتال
بتال:الله يسلمك،،ولف لراشد اللي سلم عليه وتحمد له بالسلامة ثم استأذنهم يروح للبيت يتركه يرتاخ،،
ام غازي:اتركوا باقي الشغل الليلة وخلوه بكرة وتعالوا نتعشى كلنا مع بعض استناكم لاتطولون،،مشت،،
بتال ناظر فيصل اللي كان يناظره بنظرات مابين فرح وخوف وقلق تقدم له وهو يشوفه ماتحرك من مكانه من بدا يسلم عليهم ووقف قباله وهو يرفع صوته شوي،،طيب ورب البيت طيب فصيل
فيصل يناظره ساكت وهو شاد على قبضتيه اللي داخل جيوبه يخفي رجفته
بتّال:هيه فيصل انت يافيصل اخوك طلع بالسلامة ولاسمع شي!!
جسّار ضرب فيصل على قفا رقبته وهو يطالعه بحدة
فيصل طالع جسّار بنظرة حادة
جسّار توسعت عيونه مستغرب هالنظرة من فيصل خصوصا انه متعود عالضرب منهم
بتال:الحمدلله صحى فيصل
فيصل خرج يده من جيبه ومدها وهو يحاول يسيطر على مشاعره
بتّال صافحه وسحبه لحضنه وبابتسامة:ترا مو عيب تصيح صيح عادي انت البزر حقنا!!
فيصل دفه وبعصبية واضح فيها رجفت صوته:معصي!!اصيح قال!!هذا اللي ناقص!!
جسّار عطاه قفا مرة ثانية
بتال ضحك:يمه يمه منك يالصيوح نسينا صيح صيح ووعد مني عنا كلنا مابنقول لرهايف صيح وهالمرة معذور
فيصل بتعصيبته:الحمدلله عالسلامة يالعامود ومعصي ومعصيين كلكم أصيح مرة ثانية قدامكم مهبول انا؟!!
بتال توسعت عيونه:وشو؟!!
فيصل هرب
جسّار وراه
بتال ابتسم وهو يستعد بيجري يلحقهم ووقفه غازي
غازي:بتال
بتال التفت يطالعه:نعم
غازي بجدية:وش وراك يابتال؟
بتال باستغراب:وش تقصد؟!
غازي:شيله يابتال وتكلم
بتال زاد استغرابه وتوتر:بِسْم الله الرحمن الرحيم وش فيك ياولد انهبلت وش اللي اشيله؟!!
غازي بحدة:مو انا اللي تلعب عليه يابتال!!
.........****..........
بيت هلال
هلال جالس متربع قبال هليّل يطالعه بتكشيرة
هليّل جالس جنب امه تمسح له جروحه وهو يتوجع
ام هليّل:ياعله بالوجع اللي مايطيب اَي والله اوجعك ياقلب امك انت حسبي الله عليه الله ينتقم منه
هلال وهو يمد رجله ويضرب رجل هليّل:وتف عليك ايوا الله مابك خير وتف
هليّل:اااه وش سويت يبه؟!!
ام هليّل بعصبية:علامك عليه وش فيك عالضعيف؟!!
هلال:وضعف يصيبك ياالمِروح!!متوزّي(متخبي)وراي وتوايق(تناظر)عن شق(طرف)وانت بالمجلس ووسط الرجال فضحتني حسبي الله عليك من ولد اهب مابك خير!!
ام هليّل:لاتدعي عليه خاف ربك!ثم هو من وين له الحيل بعد اللي جاه هاه!!من وين يجيه حيل يردح بالمجلس وياخذ حقه هاه!!زين انه للحين حي بعد سواة ذاك الخسيس!!وتلوم وليدي ياهلال هاه تلومه؟!!
هلال:اَي ألومه وهو حتى نفس مااوحيته!!نعنبوك انقطع حسك مرتن وحدة يالرخمة!!
هليّل وقف وبعصبية:يبه انا ماني برخمة وحقي بأطلعه من عينه ولاتحسب اني ساكتن له خوف!!لا وربي كله افكر وش اكثر شيّن يمزع قلبه من مكانه بدون لاألمسه
هلال وقف وبعصبية:اقصر الشر ياهليّل!!نسيت ياهليّل نسيت!!يكفيك ماصار!!ولا ماكفاك ماجاك!!تبي الموت!!هذا سعود ياهليّل سعود اللي ماينضحك عليه!!واذا عدّت عليه مرة ماهو بمخليها تعديه مرتن ثانية ابد!!
هليّل بقهر:فاتته مرة وبتفوته مرتن ثانية وثالثة فوقهن!!وحقي واللي خلقني مايتعداه بأخذه لو على حد السيف وانا ولد ابوي،،مشى،،
هلال بصراخ:هليّل هليّل
ام هليّل بعصبية:اتركه خله عنك ضايقن وقافلتن معه
هلال:ولدش ذَا ناوين على عمره!!
ام هليّل:الله يلوم من لامه من حر مايوحي اجل يمردغ بنص بيته ويسكت!!انا بنت ابوي الا خله يأخذ حقه طرقن عن خشم هالسعود الله لايربحه!!
هلال بعصبيته:انتي اسكتي يامرة تسوقين الشر لولدش!!اعوذ بالله منش!!
ام هليّل:الا انت اللي وراك ماتليته من اذنه واخذت حق اهلك هاه!!وراك ماألجمته بنص المجلس بكف حتى يعرف ان الله حق!!
هلال زفر:إعقلي يابخيتة وعقّلي ولدش لاتجيبين لنا مصيبة من ورا علومش ذي،،مشى وهو يهمس لنفسه،،اقطع من ولد يبي يجيب اجله بنفسه!!
.........****..........
بيت بادي
بخوت بصدمتها:وهذا اللي مشغلش الحين؟!!
عباير ماردت وعينها على سعود
سعود بجديته:مافكه من يدي وارحمه من سكيني غير طلق وانا اخوش
عباير ميلت فمها بطيف ابتسامة
سعود:لولا طلق كان الليلة يدورون به وسط سراير المستشفى
بخوت بعصبية وهي تطالع عباير:عساش ارتحتي وتوسعت سرايرش!!
عباير ماطالعتها ابدا للحين عينها على سعود
بخوت طالعت سعود وبنفس عصبيتها:وانت مستانس ومبسوط ماشاء الله عليك!!لو انه وسط سراير المستشفى على قولك كان انت الحين وسط سجن الإمارة من سجن لسجن!!
سعود:خليني أضيع ليلة من عمري عشان اختي راضي مامن خلاف
بخوت صرخت:ليلة؟!!تقول ليلة!!لو صابه شي كان مو ليلة من عمرك ليااالي ولا نهايتن لك تحت حد السيف ياسعود!!
سعود زفر بصوت وهو يشوفها تتلفظ عليه لكن يدري من خوفها
عباير التفتت تطالعها:يوووه يابخوت خلاص!!
بخوت بصراخها:وش خلاصه انتي اسكتي!!محد يعبي راْسه ويملاه غيرش!!نسيتي ذيك الشهور نسيتي!!
عباير تكتفت وهي تشد ع قبضتها وتخفيها تكتم غيظها لاتنفجر فيها
سعود وهو يأخذ نفس يسيطر ع اعصابه:بخوت خلصنا وانا اخوش خلاص!!
بخوت طالعته وبحدة:اذا هي نست انت وش حالك هاه؟!!نسيت نسيت اللي حدا بك(مريت فيه)!!
سعود كشر بوجهه وهو يذكر ومن بين اسنانه:مايحتاج تذكريني يابخوت!!
بخوت بعصبية قاطعته:ويوم انه مايحتاج اني اذكرك وشو له هاجم عالرجّال هاه!!ترا العين بالعين والسن بالسن والجروح قصاص ياسعود مايحتاج افهمك بعد!!
سعود مسكها من يدها اللي توجعها بقوة وسحبها له
بخوت تأوهت بصوت خفيف من الم يدها ثم عضت ع شفتها السفلية تكتم اهاتها
سعود بحدة وهو يطالعها بعيون بتخرج من مكانها من تعصيبته:الظاهر تبين باقي غبنتي تطلع بش الليلة يابخوت!!
عباير بحدة:اضربها ياسعود اضربها!!
حلايا واقفة بزاوية العشة تطالعهم برعب
سعود ترك بخوت وهو يستغفر
بخوت بلمعة دموعها في محاجرها:اكسرها حلالك ياسعود!!
سعود طالعها بتكشير من كلامها ثم نطق بهدوء:بخوت انـ
بخوت قاطعته برجفة صوتها:كلي حلالك ياسعود انت الولي وانا الرعية سو اللي تبيه،،مدت يدها وبجدية،،اكسرها!!
سعود صد عنها وهو يستغفر وسط زفراته
عباير بحدة:بخوت كبّي هالخمبقة عنش!!تدرين ان سعود ماهو بقاصد هالشي ابد!!
بخوت طالعتها وبدموعها:اللي يطلع بحزة الزعل هو الصدق ياعباير مثل قولش قبل شوي!!
عباير:لاإله إلا الله!!ولا كنت اقصد اللي أقوله لش يابخوت طلع غصب!!
بخوت:وهذا البلا!!اللي بقلوبكم طلع!!اللي كاتمينه بصدوركم سمعته ياعباير وياسعود!!
سعود:بخوت انتي تدرين بغلاتش ومعزتش عندي واللي طلع لحظة غضب ماقصدت شي وربي
بخوت صدت بوجهها وهي تتكتف وتقاوم دموعها لاتطيح
عباير:اجل اسمعيني وأملي اذانيش زين
بخوت لفت تطالعها وهي مقطبة جبينها
سعود يطالعها بحواجبه المرتفعة وكله فضول
عباير:ايه قصدناه وتعبنا منش ومن حركاتش اللي تغث!!
بخوت توسعت عيونها
سعود بنبرة عالية:عباير!!
عباير:تعبنا وحنا نحاوطش ونراعيش تمزعت قلوبنا من الغبنة عليش ثم طاحت الغبنة وجا مكانها برود!!ايه بردنا من كثر عنادش!!نقولش عيشي يابخوت وبيعي من باعش لكن انتي لا ربطتي عمرش وربطتينا معش!!
سعود ضرب عباير كف
بخوت تطالعها وسط دموع وشهقات مكتومة
عباير مررت عينها عليهم تطالعهم بغبنة وهي تكبح عبرتها بالقوة ثم طالعت بخوت:مو هذا اللي يدور في سرش يابخوت ها؟!!هذا اللي يمليه عليش الشيطان وتظنين فينا الشينة وانتي اخبر وحدة بقلوب اخوانش!!
سعود عض طرف شفته بندم على تسرعه
بخوت جمدت دموعها بعيونها من كلام عباير
عباير بهدوء:ايه يابخوت انتي خابرة قليب سعود الرهيف وقليب عباير الحار اللي مايرضون حتى الزلة يابخوت!!شيلي هالوسوسة من بالش!!حطي كل ظنونش بخلق الله ماعاد خلق هالبيت اللي انتي عاجنتهم وخابزتهم يابخوت!!
بخوت وسعود ماردوا
عباير لفت ومشت متجهة لغرفتها:تصبحون على خير
سعود:عباير
عباير مكملة طريقها وسط دمعتها اللي طاحت:تصبحون على خير ياقليباتي!!!
بخوت ضمت نفسها وهي تحاول توقف دموعها اللي زادت بعد لومها لنفسها بتفكيرها الشين بأخوانها
سعود اوجعه قلبه وهو يشوف قفاها ومتأكد انها تبكي نزل راْسه بزعل وتبخرت فرحتهم بالي ضار بلحظة
حلايا انفجرت تبكي بصوت عالي
سعود ويخوت اسرعوا لها
وعباير رجعت طريقها بسرعة متجهة لها وهي تمسح دموعها
،،تجمعوا حولها،،
بخوت شبه جالسة قدامها مدت يدها ومسكت يد حلايا:وش فيش ياحلوتي؟
عباير:انا بنت بادي علامش ياروح عباير؟
سعود مسك يد حلايا الثانية:افا وانا اخو بخوت وعباير مين مزعل حلوة الخد؟!!
حلايا سحبت يدها منه وبوسط بكاها:ليش ياسعود ليش؟
عباير رفعت يدها ضربت سعود على قفاه بقوة لدرجة سعود انحنى لقدام شوي ورجع بجسمه لايصقع بحلايا
سعود توسعت عيونه والتفت يطالعها بصدمة
بخوت اللي مو بعيدة عن سعود تطالع عباير بصدمة من اللي سوتها
عباير بابتسامة وهي تمد يديها وتقرص خدود حلايا وبنبرة دلع لحلايا:الله يجعلني ليش لش ياروحي وهذا سعود واخذ قسمه انتي بس لاتكدرين خاطرش يابعد ليش كلهم
حلايا وهي تكبح شهقاتها مدت يديها واحتضنت وجه عباير بين كفوفها:انتي لسانش وصخ
عباير انصفق وجهها من الكلام
بخوت قفلت ع شفايفها تكتم ضحكتها
سعود ابتسم وهو يكبح الضحكة بابتسامته
حلايا:بس سعود يستاهل الضربة يابعاير
عباير ابتسمت:حسبي عليك ياعدوي اخر عمري أتسمّى بعاير
حلايا مسحت على وجه عباير مكان الكف بكفها بشويش:احبش يابعاير حقتنا
عباير سحبتها باستها ع خدها بقوة وحماس:جعلني بعاير لش ولمواطيش ياعيون بعاير
بخوت ابتسمت وهي تطالعهم
حلايا طالعتها بزعل:بحوت انتي اليوم ماانتي بحوت
بخوت توسعت عيونها باستغراب:اجل وش؟!
حلايا بزعل ارتسم على شفايفها:انتي الحوت كله بكبره
بخوت التفتت تطالع عباير بزعل
عباير ضحكت:اي والله انها حوت ياروحي
سعود ابتسم بحب وهو يطالع خواته ماحس الا بيدينها تدفه وجلس من دفتها وطالعها مستغرب
حلايا:وانت يالبعير المعلوت(المغلوث>>المسعور)
سعود بصدمة:انا؟!!
حلايا:ايه انت يبي لك نادة(ناقة)تكتم حسك وتعندلت(تعنقلك>>تعلقك)من ردبتت(رقبتك)
عباير:سلّم هالفم اي والله صدقتي
سعود:ولد ابوي انا!!،،طالع عباير،،كلامش الماصخ امنعي حلايا عنه!!
عباير:وش لي انا؟!!تفاهم معها!!
الجد بادي من غرفته وبحدة:مصخت السالفة ياعيال شمايل وسكت لكم واجد!!
،،فزوا وسط ابتساماتهم وكل واحد اتجه لغرفته لكن بخوت عدلت طريقها ودخلت ورا عباير لغرفتها،،
عباير:وش تبين؟!!
بخوت:بأرقد معش
عباير برجى:لا واللي يرحم والديش حلايا بتمتر الغرفة وبتشوتني!!(تقصد تتقلب وتتحرك بنومتها)
بخوت دخلت:بعد علومها الماصخة المفروض ترقد معش كل ليلة!!
...........