ياسمح المحيا جر الهجنية

الجزء الخامس والخمسين

،،الـجـزء الـخـامـس والخـمـسـيـن،،

سبحان الله وبحمده سبحان الله العظيم
.
.
<كشتة راشد وخواته>
،،ع سفرة الغدا،،
راشد جالس عالسفرة:عباير انزلي الغدا
عباير داخل السيارة قافلة الأبواب والقزاز ماردت
راشد:طيب نزلي القزاز شوي!!
عباير ماردت
راشد:لايكون انخنقت،،بيوقف،،
بخوت مسكته من يده قبل يوقف:كبها عنك هاذي هي والله ان ماتطب الوادي وهي ارعته
عذبة زفرت وهي تاخذ غطا القدر وتحط لها شوي من الغدا
راشد مد يده:عنك يمه
عذبة:خلني عنك وتغدوا انتم،،وقفت وهي تدق قزاز السيارة،،
عباير طالعتها:اغدي ياعمة مااريد شي
عذبة:افتحي لي
عباير طالعتها ساكتة ماتبي تردها
عذبة:والله والله مابه شي ابد
عباير فتحت الباب شوي
عذبة دخلت لها الغطا:عاد ماحسبنا حساب الكلب انه بيروعك ولاتتغدين معنا
عباير كشرت وهي تحس الكلام اهانة
عذبة:تغدي وانا عمتك تغدي
عباير فتحت الباب وهي تنزل بتكشيرة:يبطي الكلب يردني عن غدانا يبطي!!
عذبة مسكت الغطا زين وبابتسامة:ياحياك ياحياك ياهلا
راشد:اوه الكلب
عباير صرخت وهي ترجع السيارة وتقفل الباب عليها
راشد تغير وجهه
بخوت تتلفت تدور عالكلب
حلايا ضحكت
عذبة:راشددد!!!
راشد:والله ماانتبهت يمه!!نسيت
بخوت ابتسمت
عذبة:حسبي الله على عدوك وش ينزلها الحين!!
.
بتال هايم على وجهه بهالبر ضايع وسط أفكاره وشلون بيتصرف وشلون بيتجرأ ويقابلهم وش بيقول وشلون يبدأ اعتذاره حاضره يفرق عن قبل بكثير ماكان يدري بكمية الإحباط اللي تحتويهم وهم يطالعونه وحتى يوم عرف الحين مو قادر يستوعب هالحقيقة الموجعة كيف كان يضحك بوجه أمه بدون اَي احساس وياترا ضحكاته أدمت قلبها كيف بيقدر يحط عينه بعين ابوه وهو الذنب اللي شوه سمعته واثبت هالاتهام عليه بجيته للدنيا بلع غصته من سوداوية هالافكار اللي شاغلته وقف وهو يرفع راْسه يطالع السما وتأمل وسعها للحظة وأخذ نفس بكل مافيه وهو يحاول يهدأ حتى تهدأ أفكاره اللي تعصف به لاشياء ماانتبه لها للحين كمل طريقه يمشي وعينه عالارض ضحك بخفة وهالضحكة كلها سخرية من نفسه وهو يتفادى الحصى اللي بطريقه همس لنفسه يلومها:خايف لاتتعور!!وهم!!كم لهم مقابلين وجهك ويبكون من وراك!!،،عض شفته وهو يحس بنغزات بصدره زفر وهو يتعوذ من الشيطان كمل طريقه وهو يفكر وشلون يرد هالمعروف الثقيل اللي عليه قطب جبينه وهو ينزل نظره لجيبه اليمين بعد ماوصل لمسامعه صوت الرسايل اللي انهلت على جواله ورا بعض وهو متعود مافيه إرسال دخل يده بجيبه وهو يطالع الطريق حوله والتفت يمين ويسار مايشوف سيارات طريق خاااالي ميل فمه وسط تفكيره باستغراب وهو مايشوفهم اتسعت عيونه وهو ينتبه لنفسه ثم ضحك بخفة بسخرية من نفسه:ولك وجه تبيهم ينتظرونك!!،،زفر وهو يمشي بهالطريق ولايدري هو وينه اصلا،،
.
.........****..........
..بيت عادل..
،،غرفة امجاد ورهايف،،
رهايف دخلت للغرفة وقفلت الباب بقوة وراها
امجاد فزت من النوم بفجعة:بسم الله،،ركزت وهي تطالع رهايف،،وش فيك!!
رهايف تطالعها وبوسط انفاسها:وش فيك نايمة للحين ماعندك دوام!!
امجاد زفرت وهي تكبح نفسها:استغفر الله بس،،رجعت تمددت وهي تعطيها ظهرها،،
رهايف وهي تنزل عبايتها:ماتبين تسألين وش فيني
امجاد وهي تغمض عيونها اكثر:ابي انام
رهايف وهي تتمدد عالسرير ووجهها جهة امجاد:اعرف ان الاخوات يشيلون هم بعض!!
امجاد زفرت وهي تجلس:ماراح تتركيني انام صح!!
رهايف جلست:دامك صحيتي اسألي طيب!!حسي فيني شوي
امجاد:قولي وش فيك وش سر هالدخلة اللي طيرتيني عشانها؟
رهايف بقلق:صار لي يومين أعيش بكابوس!!رعب يامجودتي رعب
امجاد:خير اللهم اجعله خير!!
رهايف:اشوف نفسي بأسطبل
امجاد:طيب حلو!!وين المشكلة؟!
رهايف:المشكلة اني بساحة التدريب واجري واصرخ ولااحد حولي يساعدني!!
امجاد:وانتي ليش تجرين!!وش اللي جابرك!!
رهايف:أها!!سألتي ليش اجري!!وانا وش اقولك باسطبل صحصحي معي الله يصحصحك
امجاد زفرت وهي تتحمل سماجتها عالصبح
رهايف:اكيد اني مااجري كذا!!شايفتني مهبولة!!
امجاد تطالعها بنظرات تاكيد لكلامها
رهايف:قولي طلعي اللي بقلبك!!
امجاد:تكفين خلصي حلمك وريحيني ابي انام
رهايف:طيب طيب اعرفك ماعندك صبر!!
امجاد تطالعها بغبنة
رهايف:وانا اجري والخيول تجري وراي وكلها سودا وأجري وهي تجري وأجري وهي تجري قطعت أنفاسي!!
امجاد:ماشاء الله عليك وانتي اسرع منها!!
رهايف:وش فيك تدققين على كل شي!!تراه حلم لاتكرهيني فيه وابطل اقولك الباقي!!
امجاد:صدق!!
رهايف كملت قبل توقفها امجاد:المهم من بين هالخيول اللي تجري فيه خيل واحد بس ابيض
امجاد صدع راسها وهي خمنت باقي الحلم:عساه جواد
رهايف كشرت:قل اعوذ برب الفلق اكيد لا المهم صرت انا وسط هالخيول بدموعي وانا للحين اجري وهالخيل سبقني وسبقهم وصار يجري على ورا وهو يناظرني!!
امجاد ضحكت بخفة وهي مالها نفس:يجري على ورا!!ويناظرك!!
رهايف:اصبري اسمعي وش قال!!
امجاد:وتكلم!!
رهايف:قال تبين مساعدة!!
امجاد:وساعدك؟
رهايف:صاحية انتي!!خيل يتكلم اقولك طبيعي انخرش منه!!والله لو ايش مااطلب مساعدة منه!!
امجاد:وبعدين
رهايف:سبقتهم اكيد والتفت وراي وانا تجري مابقي غير هالخيل الابيض كلهم اختفوا واسمعه يناديني رهايف يارهايف وأحاول اسرع واسمع صوته يقرب يارهااايف،،سكتت،،
امجاد تطالعها:وبعدين؟
رهايف:بس صحيت
امجاد:بس!!!!
رهايف:ايه
امجاد وهي تتمدد:استغفر الله العظيم بس استغفر الله
رهايف:لحظة لحظة خلص الحلم بس تفسيره صار صدق!!
امجاد طالعتها وهي متمددة:بسرعة خلصيني
رهايف:تخيلي نفس الحلم ساحة التدريب الحوش اللي بيننا وبين جد والخيل الابيض جواد
امجاد تطالعها بتكشيرة
رهايف:وهو يناديني وانا ينفض قلبي وأجري وهو يجري وراي ويناديني وتخيلي عاد من استقبلني
امجاد:الخيول السودا!!
رهايف بابتسامة:صح عليك!!اخواني
امجاد:اخمدي لاتتوطاك الخيول السودا لاسمعوك كلامك اخمدي
رهايف:مااقدر انام جدتي تنتظرني
امجاد:روحي لها طيب وخليني أنام
رهايف:والخيل الابيض!!
امجاد:جعله يأخذك لبيته ويفكنا ياشيخة
رهايف بزعل:والله تبكين ان رحت
امجاد:بأفرش الغرفة ورد الى سريرك وأقول تفضل خذها
رهايف بقهر وهي توقف:احسن لي اروح لجدتي لك كم يوم ولونك يغمق اكثر!!
امجاد عضت شفتها وهي ماتبي تغلط عليها
رهايف انغبنت وهي ماتسمع ردها:ان شاء الله تشوفين كوابيس كوابيس قولي امين،،مشت،،
.
،،سوق الخضرة،،
غازي اشترى كل الخضار من المستأجرين وتنازل عن ايجار العربيات هالشهر وزادهم فوقها مبلغ وحاول يرضي الكل بدون اَي غلط او اخذ حق لاحد
جواد يطالع كمية الخضار بصدمة
فيصل يطالعهم:وش بنسوي فيها!!!
غازي دخل يده بجيبه وهو يقفل جواله اللي يرن وعينه عليهم:بنبيعها وش بنسوي فيها يعني!!
جواد:نعم!!
فيصل سكت
غازي طالع جواد بتكشيرة:وش اللي نعم!!مو انت جاي معي تساعدني
جواد:ايه بس مو أبيع!!
غازي دخل يده بجيبه وقفل جواله اللي رن من جديد:وش عندك؟مو عاقبوك تأديبي وانت فاضي!!استفيد من وقتك
جواد:ابيع خضرة!!
غازي مد له اكياس النايلون بوسع عيونه:وش فيها!!
جواد مد يده ياخذ الأكياس وهو يجادله:مافيها شي والنعم لكن من جدك تبينا نبيع
غازي بدون اهتمام له رفع صوته:قرب ياولد قرب الكيلوين بريااااال قرب على ريال
جواد اتسعت عيونه
فيصل:تبيع بخسارة!!
جواد:صدق فيصل!!ماانت بصاحي!!
غازي رد وسط رنة جواله:تبون تخلصون ولا تتنقعون بسوق الخضرة
فيصل رفع صوته وهو يوقف ورا العربية:قرب الكيلوين بريال قرررررب
غازي وهو واقف قبال العربيات صرخ:وقرررررب
جواد فز من صرخته وهو يطالعهم مصدوم
غازي بصوت عالي:الزين عندنا قرب والسعر يحبه قلبك بريااااال الكيلوين بريااااال قرررررب
فيصل وقفوا عنده زباين وبدا يبيع
غازي قطب جبينه وهو يطالع جواد الواقف:وش موقفك!!شف شغلك!!
جواد يطالعه وهو يزفر من أسلوبه معه لكن هذا طبع عمه فطبيعي يكون مثله
غازي زفر بطفش من الجوال وهو يدخل يده بجيبه ولمح الاسم وهو يرد بعصبية:اعطيك مشغول يعني مشغول!!صبر شويات بس ماتعرف!!
بتال بصوت متغير عليه وبربكة:اااه طيب سلام
غازي تكلم بسرعة وهو متعود لو قاله هالكلام بيتكلم بتال عليه مثل العادة لكن هالمرة فيه شي غريب بصوته وبشك:لحظة لحظة لحظة
بتال مارد وهو يكتم عبرته لاتفضحه
غازي:وش صاير
بتال بلع ريقه وضحك بخفة:وش فيك خفت!!
غازي:لاتكذب علي!!
بتال رغم انه يمشي بالشمس من فترة همس بغصته اللي وضحت وجدًا بصوته:بموت من البرد الشمس مااشرقت للحين ياغازي
غازي رمى الأكياس من يده وجرى وهو يدري انه ينتظره
جواد اتسعت عيونه وترك اللي بيده ولحقه
فيصل جرى وراهم وترك كل شي
غازي يجري متجه للسيارة وبوسط انفاسه:وينك؟
بتال ضحك:مدري
غازي وقف وبعصبية:وش ماتدري!!وينك فيه!!
بتال:يهمك؟
غازي وقف عند سيارته وبعصبيته:وش اللي تقوله الحين!!وينك اخلص علي!!
بتال من كثر ضياعه مو قادر يفكر حتى يعرف مكانه:والله مدري ياغازي
غازي زفر وهو يركب سيارته دخل مفتاحه وشغلها وبابه مفتوح:اجل خلك بمكانك لاتحرك دقايق وانا عندك،،قفل الجوال ثم قفل الباب ،،
جواد وقف عنده وهو يلهث
فيصل وقف جنب جواد وبوسط انفاسه بفجعة:وش فيه؟!!
غازي:خلصوا اموركم شغلة بدوامي وراجع،،حرك وتركهم وراه،،
.
..بيت مسفر..
ابو غازي دخل للمجلس وابتسم وهو يطالع خويه الجالس:السلام عليكم ماشاء الله ماشاء الله وش هالجلسة!!ولاتعلموني من بدري!!
ابو صايل وقف وهو يرسم ابتسامة على وجهه:ياحي عادل ياحيّه
ابو غازي سلم عليه وبابتسامته:اشوفك خايني ورايح لمسفر
ابو صايل ضحك وهو ماسك يد ابو غازي وجلس
ابو غازي جلس جنبه
ابو صايل بضحكته:الظاهر اني بأخونك واجد
ابو غازي قطب جبينه مافهمه
ابو جواد بابتسامة احراج وهو ياخذ ثلاجة القهوة ويصب لهم:حيهم ياحيهم تو مانور المكان
،،بـعـد ماصب لهم وأخذوا اخبار بعض،،
ابو صايل نزل فنجاله:الصراحة انا جاي اليوم ياابو جواد طالبن بنتك حليلتن لي على سنة الله ورسوله
ابو غازي انصدم من الطلب وغم هدوء ملامحه وتقهوى وعينه بفنجاله ماطالعهم
ابو جواد:حياك الله ياابو صايل ازين الناس وأحسنهم من جانا ويبي بنتنا ياحيّه
،،وبدوا يتكلمون بالتفاصيل وسط صمت ابو غازي اللي يسمعهم بهدوء،،
.
.........****..........
ام جـلاجـل
.
..بيت بادي..
راشد وقف بالسيارة عند الباب
حلايا اللي جالسة بحضن عذبة قامت وهي تقرب من راشد باسته ع جبينه ثم حاوطت رقبته بيديها
راشد اللي انخنق من ضمتها لكن ابتسم من حرمانها البريئة
حلايا باست خده وهي ضامته وبابتسامتها:انت ازين الحلوين
راشد ضحك
بخوت ميلت فمها بابتسامة
عباير:كل ذا عشان بس كشتنا!!يمه منك!!
راشد:احلى من جسار؟
عذبة طالعته بصدمة من سؤاله
بخوت تطالعهم بفضول وهي تنتظر ردها
حلايا:تل ابوتم(كـل ابوكم)حلوين
راشد ضحك:وش هالردود الدبلوماسية يابنت طالعه عليه والله!!
بخوت مدت يديها وهي تسحب حلايا من عندهم:ادني يمي
حلايا مشت معها بسحبتها وجلست بحضنها
بخوت فتحت الباب وخرجت حلايا وخرجت:يكثر خيركم ياراشد
راشد:يسلمك ماسويت شي يااختي
بخوت مشت للبيت ودخلت
عباير فتحت الباب:اغناكم الله ياعمة
عذبة:الله يسلمكم ماسوينا شي يابنتي
عباير خرجت
راشد خرج من السيارة:عباير
عباير وقفت وهي تطالعه:سم
راشد:عسى مازعلتي مني؟
عباير باستغراب:على وش؟!!
راشد:على سالفة الكلب بس ها لاتلوميني كل طلعتي مع عيال يعني اذا زعلتك تـرا والله مااقصد
عباير بابتسامة:يااخوي انت مامن غيظ الله لايورده يمنا(لايجيبه)اعمل على ماتريد محدن يزعل من راشد الطيب
راشد ذاب قلبه من سمع يااخوي منها وزادت مشاعر حبه الأخوية الجديدة اكثر وهو يسمع كلامها اللطيف انحنى وهو يمد يده ورا راسها ويقربه منها ويلوي جبينها من فوق طرحتها:الله لايحرمني منك ياعباير
عباير ابتسمت من تحت نقابها باحراج وهي تنزل عينها بالأرض ثم كشرت بغيظ وهي تلتفت للصوت اللي تسمعه
.
..السيارة..
الجد بادي بعصبية:راع راع شورك الشين وش عمل بنا وش عينا من وراه راع!!
نشمي شد بيديه عالدريكسون وهو يكتم غيظه وقلقه بعد مسح جبينه المتعرق بهم يحتويه وهم فعلا ضيعوه صار لهم فوق الساعتين وهم يدورون عليه ولاحصلوه وان صار له شي فذنب بتال برقبته
الجد بادي:والدبرة يانشمي كود عينوه والدبرة!!
نشمي زاد همه هم:محدن يخبرنه
الجد بادي:وكود نشدوه!!
نشمي:طيب طيب مابه خلاف ولااحدن معينّه(يلاقيه)غيرنا
يوسف واقف بالحوض وهو عيونه تدور بالمكان بخوف وش صار له ووين اختفى فجأة وكيف يختفي اصلا وجده يعرف المكان زين ضرب عالتندة(سقف السيارة)بقوة من غبنته كيف تركوه
الجد بادي ونشمي فزوا من ضربته
الجد بادي خرج راْسه من السيارة وهو معصب وبصراخه:ياعلك بالروعة فوق ماحنا مرتاعين روعتنا الله يسلط عليك
.
بتال تعب من كثر مايمشي ولا يدري هو وين ولاقابلته حتى لوحة حتى يعرف مكانه والمصيبة انقطع الإرسال من جواله وقف وهو يتلفت كم له يمشي على هالطريق اكيد هالطريق مهجور ومحد يمر فيه فك لثمة شماغه وهو يكمل طريقه ولفها زين دخل يديه بجيوب ثوبه وهو بيموت من برودة اطرافه زفر وهو يطالع جبل تمسخر عليه هو وجسّار مرة وعرف انه بطريق المحافظة تنهد وهو يدري بهالوقت محد يمر ابد وباقي كثير على نهاية دوامات الموظفين غير وجهته اللي يمشي فيها للعكس وعرف طريق الديرة عكس الاتجاه اللي يمشي به زفر وهو يمشي راجع اللي مشاه كله عقد حواجبه وهو يشوف سيارة متجهة للمحافظة تنهد بضيق تمنى محد يلاقيه حـتـى يصير له اَي شي ومايقابل احد من اهله ابد
،،وقفت السيارة عنده،،
بتال طالع اللي بالسيارة وصد بوجهه وهو يضحك غصب عنه وبصوت مسموع للي بداخل السيارة:هذا اللي كان ناقصني صدق!!
.
..بيت بادي..
عباير تطالعه بتكشيرة وهي حاقدة عليه ويحق لها كل هالحقد ماتلام ابد
غيث بحدة واضحة بصوته:وينه بادي يابنت؟
راشد كشر بوجهه وهو يهمس لعباير:ادخلي للبيت،،طالعه،،والرجال يكلمون رجال!!
غيث بسخرية:ادعني أرعيهم بالاول
راشد بنرفزة:رجال وغصبن عنك ياشبيه الرجال انت ولك وجه تجي لهالبيت!!
عذبة انفجعت وهي اول مرة تشوف راشد يتكلم بهالاسلوب التفتت ورا وهي تطالع اللي يتكلم معه راشد
غيث بعصبية وهو يدور شي يحط حرته فيه:اقصر الشر تراه غاديتن على طريف
راشد:توكل توكل ولااشوفك توكل!!وطريفك ارمه بأقرب زبالة!!
غيث:لاغديت من اهل البيت ادنى واوجس يمي!!
راشد بحدة:من اهل البيت وكبيرهم وتوكل لايجيك شي مايعجبك
غيث وهو يبيه يبدا:ادعني ارعي هاللي مايعجبني مثل ماتوجس
راشد فهم حركاته:لاتتلفظ وانت هنااااك اذا صادق قرب خلني اشوف هالمرجلة اللي عندك،،بسخرية،،هذا اذا بقى منها وانا متاكد بعد
غيث ثابت وهو يغلي بمكانه مايقدر يلمسه وهو توه الصباح طالع من السجن
سعود وقف بسيارته ورا سيارة راشد ونزل وهو يقفل الباب بقوة وهو يطالع غيث وصار قباله بمسافة بسيطة وبحدة ملامحه:خير!!
راشد تقدم بخطواته ووقف ورا سعود
عذب توترت وهي تشوف الشر بعيون سعود
غيث:مالي وجس مع الوغدان
سعود ارتفعت حواجبه وهو ضحك بخفة
غيث:اغد يم بيتكم ازهم لي بادي
سعود:تبدا بك العلل والصرايموى ولاتقضي منهن شي ابد
راشد:امين يارب
غيث كشر بوجهه
سعود مسك راشد من يده وقدمه لقدامه:هذا بادي قدامك عينته قبلي اوجس يمه ماتريد
غيث احتدت نظرته
سعود بسخرية وهو يمشي لبيتهم:احتريك بالبيت يابادي واوجس مايريده الوغد لاقضيت
غيث بصرخة:عطوني بنتي
سعود وقف
راشد:مالك شي عندنا توكل
سعود التفت وسط تكشيرته:اوحيت مااوجسه يمك تيسر
غيث ابتسم بثقة:هذاك اول مالي شين يمكم ذالحين كودها تعرس بخوت انا أولى بها تعود يمي
راشد ضحك:ليه ناسي انك متزوج!!
غيث: المرة غير والرجل مايتبعه شين من جيزته
راشد كشر بوجهه
سعود:خابرن وش اوجست من سنين قدام اهل الديرة!!
غيث بابتسامة:هذاك اول مااوحيتني ذالحين به علومن ثانية
سعود كشر بوجهه وبنفسه:ماهي بمعرسة ابدن الله يسلط عليك
غيث بابتسامة:مير لاعود بادي غديت يمكم سلا،،سكت،،وجيهن ودرة ماتستاهل السلام،،مشى وهو يحس بانتعاش بعد اللي قاله وسواه،،
راشد مشى وراه ناويه
سعود وقفه:راشد
راشد وقف والتفت له وبغبنة:ماسمعته!!يبي له كسر أسنان قبل رجوله!!
سعود:كبّه هو يريدها من الله
راشد:بس
سعود قاطعه:لااحد يدري بالعلم الى مااوجسه لجدي ياراشد
راشد زفر وهو يمشي لسيارته:ابشر مايحتاج توصي،،ركب سيارته،،توصي شي محتاج شي؟
سعود زفر وسط تكشيرته:سلامتك سلامتك
راشد حرك بسيارته
سعود دخل للبيت وقف وهو يطالعها قباله بمسافة بعيدة خارجة من المطبخ
بخوت ابتسمت وهي تطالعه ومشت له بابتسامة:هـلا ياهلا ياحياك الله
سعود ابعد تكشيرته عن ملامح وجهه وهو يبتسم لها:يسلمها ويبقيها
بخوت وقفت عنده وهي تسلم على راسه:تريّح على ماولم لك شين تأكله،،مشت،،
سعود:بخوت تغديت يسلم عمرش
بخوت بشك:صحيح؟
سعود:اَي بالله
بخوت:ودي اوجس يمك علم كود انك تريحت
سعود قطب جبينه:علامش؟
بخوت:بالاول تريح
سعود بقلق:اوجسي عسى مابش خلاف!!
عباير خارجة من غرفتها بعبايتها اللي زامتها بيدها اليمين وابتسمت وهي تطالعهم:ياهلا بسعود ياهلا،،مشت وسلمت على راسه،،
سعود يطالعها باستغراب:وين غادية؟
عباير:يم مزون ماارعيتها كم يوم
بخوت:لاتبطين يعود جدي ومايراعيش ثمن تخبرينه
عباير هزت راسها بايه
سعود:اغدي معش،،مشى،،
عباير وقفته:مامن داعي مامن داعي مير تريح،،مشت،،
سعود زفر وعينه عليها:تحرصي زين
عباير رفعت يدها اليمين وهي مكملة طريقها ولاالتفتت لهم وتركت عبايتها تنسدل وبيدها السكينة اللي معطيها إياها
بخوت كشرت بوجهها
سعود ابتسم
عباير خرجت
بخوت طالعت سعود المبتسم:مونسك اللي تعمله هالعباير صحيح!!
سعود:ويتريح قلبي لاعملتي مثلها
بخوت زفرت وهي تطالعه مو عاجبها الكلام
سعود بجدية:كبيني عنش انا وعباير وعلميني علامش
بخوت طالعته بتردد
سعود:وش بش؟
بخوت استجمعت شجاعتها:انا صليت وقلبي متريح ياسعود مير خوفي ردني عنه
سعود قطب جبينه:وثم؟
بخوت:قبلت به ياسعود والله يكتب اللي به الخير
.
..مستشفى المحافظة..
جسّار جالس ورا مكتب الطوارئ نعسان وهو يطالع الساعة عالجدار باقي له نص ساعة وينتهي دوامه زفر وهو يصبر نفسه بنفسه رن جواله فتح الخط بابتسامة ووصل له صوت منبه السرعة حق السيارة قبل يرد
غازي بدون اَي مقدمات:وينك ياجسار؟
جسّار بشك وهو يعتدل بجلسته ويصحصح:بالمستشفى خير؟
غازي:ماشفت بتال اليوم؟
جسّار:ليش وش فيه؟
غازي زفر:مافيه شي،،قفل بوجهه،،
جسّار:الو الو،،رجع يتصل،،
غازي:خير
جسّار:وش ذا تتصل تقلقني وتقفل وش فيه؟
غازي:مافيه شي كلمني وصوته ماعجبني بس
جسّار بشك:بس!!
غازي:المهم اذا وصلت البيت وحصلته اتصل فيني،،قفل،،
جسّار ميل فمه بشك وثبت عينه عالساعة مابقي شي ع نهاية الدوام تكتف وهو يكبح نفسه لايخرج
.
نشمي جالس بظل شجرة ماتبعد شي كثير عن الطريق
الجد بادي يروح ويجي عنده وقف وهو يطالعه وبحدة:وشلون تطاوعه ونقعد في ذا ها!!
نشمي زفر:يبه يوسف يعرف اللي يسويه
الجد بادي صرخ:ويكبنا وراه!!
نشمي التزم الصمت
الجد بادي:هذا آخرتها وغدن يمشيك على هواه!!
نشمي همس:استغفر الله العظيم
الجد بادي بغبنته:ماااش ماااش ماانت بنشمي ولدي اللي خابره
نشمي قطب جبينه وهو يطالع ابوه
الجد بادي بشك:من عودت من ديارك وقليبي ماهو بمتريح
نشمي شال عينه عن ابوه
الجد بادي وهو يطالع صده:الله يستر من العلوم اللي وراك يانشمي الله يستر منك
.
يوسف نزل من السيارة وهو يسمع ضحكته وكلامه وجرى له وضمه
بتال اتسعت عيونه بصدمة من هالضمة
يوسف اخذ نفس:حسبتك مت
بتال فكه عنه بشويش وهو يشوف هالاهتمام من هالغريب اخذ نفس وهو يحاول يجمع شتاته:وش يهمك!!انا وانت مابيننا شي
يوسف وهو يطالعه:تسد انسانيتي!!
بتال ضحك غصب
يوسف قطب جبينه
بتال زفر بابتسامة:إنسانية!!الظاهر مهما تكلمت بهاللهجة يظل اختلاف الثقافات موجود صدق!!
يوسف فتح له الباب:جدي يحترينا
بتال ركب
يوسف اتجه لمكان السواق وركب وحرك:وين غديت به؟ماعينتك ابطيت وانا ادور بهالبر عليك
بتال وهو صاد بوجهه عنه:تبي الصدق
يوسف يطالعه باهتمام
بتال:النية كانت اختفي ومحد يلقاني،،زفر بضيقة،،بس اعرفهم يحفرون الارض ويطلعوني
يوسف قطب جبينه ماعرف من يقصد وتكلم:الواحد منا ماتخير لا امه ولا حتى ابوه
بتال كشر بوجهه
يوسف:لكن الواحد يتعايش مع هالشي خصوصًا اذا انت ماتعرفه ولاشفته من قبل
بتال ساكت
يوسف:وثم هل فعلا افعال الأب تلحق الابن؟مااتوقع!!ممكن لكن اول مو بهالوقت
بتال بضيقه وبدون لايطالعه:وش رايك تسكت فضلا
يوسف:انا اسف ماكنت اقصد احرقك
بتال التفت يطالعه وهو اخيرا انتبه لطريقة كلامه:انت مين؟
يوسف وقف بالسيارة
بتال اتسعت عيونه وهو يطالع جده اللي متجه لهم ولف شماغه بسرعة على وجهه
الجد بادي يعاجل بخطواته وهو شوي ويجري له
نشمي فز ورا ابوه
الجد بادي وقف عند السيارة وهو يفتح الباب من جهة بتال ومد يده ومسكه من ياقة ثوبه وهو يسحبه
بتال نزل مع سحبته وهو منزل عينه ماعنده الجرأة يطالعه
الجد بادي ضربه بالعكاز ع ظهره
يوسف اتسعت عيونه بصدمة وهو ينزل
نشمي سحب ابوه وهو يوقف بينهم وظهره لبتّال:يبه!!
الجد بادي بصراخ:وصريمة يابتال وصريمة!!
بتال زفر بهدوء ولارد ولا أبدى اَي رد فعل وهو متعود عالضرب فهذا شي طبيعي
الجد بادي:بردت عظامي وين طسيت!!اوجست غدا بك شي!!
بتال رفع عينه وبهدوء:وليش له هالخوف كله!!
الجد بادي قطب جبينه وسط تكشيرته
نشمي:خلاص يابتال
بتال:انت اللي تقول شوفتي تجيب لك اوجاع وتمرضك
الجد بادي تغير وجهه
نشمي التفت يطالع بتال:ابوي ماعنى هاللون يابتال
الجد بادي وهو يطالع بتال المتلثم وفهم وشلون كلماته اثرت فيه صدق زفر:حتى لو ان ابوك فاهد انت ولد جميلة مالي بهالفاهد شي علي بك انت يابتال علي ببتال ولد بنيتي
بتال يطالعه ساكت مو مصدق
الجد بادي تقدم وهو يطالع نشمي وبحدة:توخر عني
نشمي ابتعد لكن ظل بنفس المكان
الجد بادي رفع يده ومدها لوجه بتال:ادنى يمي
بتال حط يده ع شماغه ورجع خطوة لورا
الجد بادي اتسعت عيونه ثم كشر:كب عنك الهواجيس يابتال!!
بتال مشى وتركه وطلع بالحوض
الجد بادي امتلى قلبه غيظ على هالحركة ثم ركب مكان الراكب والتفت لنشمي ويوسف وبحدة:وش تحترون!!غدينا!!
.
..بيت ابو مزون..
،،غرفة مزون،،
عباير تتقهوى
مزون بابتسامة:زين لفيتي يمّنا زين
عباير بابتسامة وهي تطالعها بنص عين:هالوجه لااشرق وراه علمن يسر
مزون:علمن يسر!!الا بتعطيني البشارة
عباير؛وصلتش
مزون:صحيح!!،،ضحكت،،عساش سالمة
عباير:اعجلي وعلميني
مزون:هدية جدعت غيث بالسجن
عباير بوناسة:عليش وجه الله!!
مزون:وربش!!
عباير سلمت على راسها وبابتسامة:صحيح هالعلم اللي يستاهل البشارة،،اختفت ابتسامتها،،مير الله يسد رزقه ارعيته على بابنا،،وهي تطالعها بشك،،كبّي عنش الاكذاب
مزون:ام طلق وام هليّل اوجسنه يم امي
عباير:عاد دام ام هليّل به فالعلم صحيح
مزون بزعل:يعني اكذب عليش!!
عباير ضحكت:لاتكدرين الخاطر طلبتش!!
مزون زفرت:البشارة متى تغدا يمي
عباير:لااعرست بخوت
مزون بتكشيرة:هه راعوا من اللي يوجس اكذاب ذالحين!!
عباير:والله اني اعلمش الصحيح
مزون اتسعت عيونها وهي توقف:عليش الله
عباير ضحكت وهي تطالعها
مزون:بخوت بتعرس!!
عباير وقفت وهي تتنهد من ضحكتها:لفيت يمش حتى اراعي هالفرحة خابرتن محد بيفرح معنا غيرش
مزون صرخت وهي تحط يديها على اكتاف عباير وتحركها:بخوت بتعرس،،صرخت،،
عباير ماتت ضحك:للحين مااوجست يمّه علم
مزون تركتها بخيبة:اجل بتعيي!!
عباير حركت راْسه لفوق بخفة:ماظنتي
مزون قطبت جبينها:ليش؟
عباير:حلايا طايرتن به وانتي خابرة حلايا وطبوعها
مزون ابتسمت:من ولده؟
عباير وهي ترجع شعرها لورا بغرور:دكتور دكتور بالمستوصف
مزون بتموت من الوناسة:صيفة بتفطس(تموت)!!،،مسكت يد عباير وبترجي،،عليش الله لاعلمتيها العلم اغدي معش
عباير ضحكت
ام مزون فتحت الباب بقوة وبعصبية:وشو له تغدون يم ام غيث ها!!
مزون بوناسة:يمه
عباير قاطعتها:نسلم عليها مرت الشيخ لزوم نتفقدها
ام مزون بشك:كبي عنش مزون واغدي يمّها بروحش
عباير زفرت
ام مزون:وثمن كم مرتن علمتش ماعاد تطبين هالبيت هاه!!
عباير وهي تمشي لها ووقفت عندها:ماهو من قليبش خابرتش تريديني حتى لو إنش توجسين هاللون
ام مزون بحدة:امحق ريدة كاني اريدش انتي واختش
عباير سلمت على راسها
ام مزون اتسعت عيونها
عباير:والله محدن يريدنا كثرش لو توجسين علومن ثانية خابرينش ياخالة عاد اترخصكم،،مشت،،
ام مزون تطالعها بصدمة من ردودها وهي خارجة ثم طالعت مزون:امزينة!!
مزون:يمه عاد تخطين ولاتريدين الخطا لروحش
ام مزون اتسعت عيونها وبصرخة:مزوووون!!
.
..بيت الشلة..
جسّار دخل للبيت
راشد استقبله عالباب
جسّار ابتسم:هـلا بالعاطل الباطل
راشد كشر بوجهه:فكنا من سماجتك تكفى
جسّار كشر بزعل:صاير حساس اعوذ بالله ماتتحمل شي
راشد:ابعد ابعد ابي احمي السيارة على ماتجهز امي
جسّار:طالعين!!
راشد:ايه بمشي امي شوي
جسّار مشى مبتعد عنه
راشد خرج
جسّار التفت وهو يرفع صوته:راشد ياولد
راشد اللي توه ماخطى خطواته مبتعد فتح الباب:نعم
جسّار مشى له:مارجع بتال؟
راشد قطب جبينه:على طاري بتال قالك شي هو؟
جسّار باستغراب:هو انا شفته عشان يقول لي شي!!
راشد:تراه جا وتحس فيه شي صاير معه شي حتى امي لاحظت
جسّار بتقطيبته:وبعدين؟
راشد:سألناه ورد عادي مابه شي واخذ من اغراضه ومشى
جسّار:قال وين رايح
راشد:لا
جسّار زفر وهو يخرج
راشد:وين رايح انت بعد؟وش صاير بالاول
جسّار:مدري ومدري ياراشد
راشد مشى وراه:خلني تجي معك
جسّار ابتسم وهو يطمن راشد:مايحتاج شوف عمتي وماعليك،،مشى،،
راشد زفر وهو يطالعه
عذبة وقفت عنده:وش فيكم؟
راشد ابتسم وهو يلتفت لها:مافينا غير الصلاة عالنبي
عذبة:الله صل وسلم عليه
راشد:مشينا؟خلاص يمه
عذبة:خلاص!!ايه خلاص الله يستر من مشوارك
.
..بيت بادي..
،،غرفة سعود،،
يوسف يجمع اغراضه بوجهه الأحمر من كثر الغيظ اللي مالي صدره
نشمي واقف عنده ومتكتف يطالعه:يوسف
يوسف مارد عليه ولاطالعه مكتفي يرمي اغراضه اللي بعثرها بهالسرعة بالمكان داخل شنطته وقف وهو يحط شنطته ع كتفه اليسار ومر من جنبه
نشمي مسكه من يده وبحدة:يوسف!!
يوسف سحب يده بقوة من نشمي وبالإنجليزي:اسف لاأستطيع المكوث بهذا المكان فترة اطول
نشمي:ليش!!
يوسف بغصة وهو يطالعه بنفس اللغة:اشعر وكأنني حشرة تقتات على أحزانهم وجراحهم انني اكره نفسي كلما مكثت اكثر اشعر بالاختناق لاأستطيع التنفس حقا!!
نشمي كشر بوجهه وبحدة:وانت وش عليك!!وش لك باللي انعمل من قبل لاتخلق حتى!!
يوسف ضحك وهو يسمع نفس الكلام اللي قاله لبتّال باختلاف الأسلوب وبلهجته:واااه ياخال مهما اوجست من علوم تظل الحقيقة توجع،،مشى،،
نشمي مشى وراه:يوسف يوسف
الجد بادي وسعود جالسين بالحوش يتقهوون طالعوهم باستغراب
نشمي وقف وبحدة:جوزيف!!
يوسف وقف والتفت يطالعه وبالانجليزي:اسف انني اسف حقا لكن سأموت من هذا الشعور ان بقيت لحظة واحدة بهذا المكان،،مشى خارج بخطوات سريعة،،
نشمي مشى وراه بسرعة
سعود قطب جبينه بشك من كلامه وهو يطالعه
الجد بادي:ولد ياسعود وش اوجس هالاطخم؟
سعود:يقول مايريد يظلي بهالديرة
الجد بادي وهو يتقوى:ايه مامن ملامة وش خبره بالبداوة وانا جدك وش خبره!!مايقواها لو انه يرطن وجستنا ليل ونهار مايقواها،،تنهد وهو ماغاب عن باله بتال ويبي يطرد الضيقة عنه،،ولد ياسعود جرها
سعود التفت:ياجد مامن زين(يقصد صوته)
الجد بادي مافيه حيل يناقشه جرها وهو ينحني للدلة ويطرد همه اللي زاد بعد كلامه لبتّال وهو يدري ماله ذنب ويصب له فنجال:
يـاسـعود دور الـبـدواة راح..
دور الـسـلـف والـمـظـاهـيـري..
بـس الـحـسـد والـخـون مـاراح..
صـارت كـتـام ومـعـاصـيـري..
والـيـوم لـو نـبـعـد الـمـسـراح..
عـلـى الـعـلـف والـمـخـاسـيـري..
نشمي رجع بوجهه المرتسم عليه الضيق
الجد بادي طالعه زفر:اقعد اقعد لاتلوم روحك وانا ابوك عملت اللي عليك وش ترجي منه
نشمي احتدت نظرته
الجد بادي:كبّه كبّه على مايريد وادنى يمّنا تقهوى
نشمي بحدة:مااريد قهوة مااريد،،مشى للغرفة،،
الجد بادي ابتسم رغم ضيقته:ايه يابادي ايه
.
.........****..........
الـمـغـرب
.........****..........
..بيت عادل..
رهايف وقفت ع باب المطبخ كاشخة تنورة بيج كلوش لتحت الركبة وفوقها شيفون بنفس اللون وبلوزة سودا هاي نك قماش حرير وباكمام طويلة رافعة شعرها ذيل حصان بمكياجها الخفيف كحل اسود ومسكرة وقلوس وكعب عالي اسود وعبايتها بيدها اليمين وجوالها باليسار تنحنحت وبهدوء:السلام عليكم
امجاد ببجامتها تجهز خليط كيكتها التفتت باستغراب لهدوء صوتها واتسعت عيونها:وعليكم السلااااام والرحمة!!
رهايف دخلت وهي تاخذ لها علبة موية من الثلاجة وتشرب
امجاد مثبتة عينها عليها تطالعها بشك
رهايف بعد ماشربت:الحمدلله،،طالعتها،،وش فيه؟
امجاد بضحكة:هالمرة مابتهربين من الخيل الابيض صح!!
رهايف كشرت بوجهها:غلطان اللي يقولك احلامه!!
امجاد:وليش هالكشخة كلها!!
رهايف:يمه منك يعني مااكشخ!!
امجاد:لانلعب على بعض رهايفوه
رهايف:بروح لجدتي واستسمح منها
امجاد اتسعت عيونها:مارحتي للحين!!
رهايف باستغراب:ليش؟!
امجاد:كلهم مجتمعين
رهايف وهي تطالعها:حلو حلو ألحق عالقهوة والاعتذار سريع سريع
امجاد؛ابوي عندها ترا
رهايف تغير وجهها
امجاد بضحكة:كاشخة وبتستقبلها احلى كشخة هناك،،انفجرت تضحك،،
رهايف وهي تلبس عبايتها بسرعة وتجري للصالة حتى تخرج من الباب الخلفي:ووجع ووجع بس تضحكين مالت عليك!!،،مشت بتخرج،،يوووه ماتعطرت
امجاد مشت وراها ثم تكتفت وهي تكي بكتفها اليمين ع مدخل الصالة وبضحكة وهي مبسوطة:فوق كشختك بيتستقبلك ابوي ويعطرك
رهايف اخذت معطر الصالة وبخت على نفسها بسرعة
امجاد اتسعت عيونها:ولد ولد انا قايلته واحد من اخواني مو اخت ابدا
رهايف وهي تلف طرحتها:اوص اوص الحاجة تبرر الوسيلة
امجاد هزت راسها وهي ترجع للمطبخ
رهايف:اكخشي اكشخي وتعالي
امجاد بدون لاتطالعها:الحمدلله دايم كاشخة ماني بمثلك
رهايف خرجت وهي تجري وتدعي بينها وبين نفسها ابوها مايشوفها وقفت ع مدخل بيت جدها وهي تطالع عمها اللي خارج وعالباب قبالها اتسعت عيونها وهي تسمع صوت ابوها
ابو غازي بعصبيته ورا ابو جواد:هين يارهايف هين انا اعلمك
ابو جواد عطاها ظهره بسرعة وهو يغطي الباب:عادل!!
ابو غازي قطب جبينه:وش فيك؟!!
رهايف نزلت كعبها بسرعة وهي تشيله بيديها وجرت بكل سرعتها لبيت عمها وهي تشوف بابه الرئيسي ينفتح
ابو جواد بربكة:بغيتك بسالفة؟
ابو غازي طالعه بشك:هذاني وراك حتى تعلمني باللي تبيه!!
ابو جواد:ايه ايه صح
ابو غازي:مسفر علامك؟
ابو جواد:وش رايك نتقهوى على مايجي ابوي
ابو غازي باستغراب:ماهو انت اللي تقول نحتريه!!وش فيك يامسفر!!
رهايف وصلت بيت عمها اتسعت عيونها وهي تقابله عالباب خارج
جواد واقف عالباب ماسكه بيده بيقفله يطالعها باستغراب من وجودها وبهالمنظر:وش فيك!!
رهايف بصدمتها:وش جايبك توقعت اقابلك عند جدي!!
جواد جاوبها باستغراب وهو يقفل الباب:بيتنا!!!
رهايف حطت يدها عالباب مضطرة:لاتقفل
ابو جواد:مافيني شي!!بس
ابو غازي اتسعت عيونه وهو يدفه عن وجهه وبصراخ:رهاااايفوه!!
رهايف قشعر جسمها وهي تلتفت تطالعه
ابو جواد:تعوذ من ابليس ياعادل تعود
ابو غازي انحنى وهو يرفع طرف ثوبه وجرى لها
رهايف تجمدت مكانها وهي تطالعه
جواد اتسعت عيونه وهو يطالع عمه مصدوم مسكها من يدها وسحبها لداخل البيت وهو يقفل الباب بقوة
{اللهم اصرف عنا الوباء والبلاء،اللهم طمئن قلوبنا،اللهم احفظنا بحفظك وبعينك التي لاتنام،اللهم انا نستودعك أنفسنا واهلنا وبلادنا وسائر بلاد المسلمين يالله}
.
.
<اللهم صل وسلم على نبينا محمد>