ياسمح المحيا جر الهجنية

الجزء التاسع والستين

،،الـجـزء الـتـاسـع والـسـتـيـن،،

استغفرك ربي وأتوب اليك،لاحول ولاقوة الا بالله
.
.
..العصر..
.
..بيت الشلة..
،،ام غازي وفيصل ورهايف والجدة منيرة يتقهوون بوسط الحوش،،
رهايف:يمه تكفين!!
ام غازي:لا
رهايف:الله يخليك يمه أمانة
الجدة منيرة:وسمية الفلوس علي خليها تشريه
رهايف ابتسمت وطالعت امها بأمل
ام غازي:ياعمة السالفة ماهي بفلوس
فيصل:ايه مين بيمسكه هاه
ام غازي:حتى فيصل فهمها على طول!!
رهايف:يمه انا بأهتم فيه تكفين
ام غازي:لاا
بتال خرج من غرفته وهو يتمدد واتجه لهم وجلس جنب امه وهو يتمدد ويحط راسه على رجول امه
ام غازي ابتسمت وهي تحط يدها على راسه وتمسح عليه
بتال زفر وهو يعدل راسه زين
ام غازي:امجاد جيبي غدا بتال معك
رهايف:يممممه!!
ام غازي:لاتزعجيني رهايف قلت لا وخلاص!!فيك خير قومي ساعدي اختك
الجدة منيرة طالعت بتال:صحيت!!مابغيت
بتال وهو مغمض عيونه ومتكتف:اذكري الله لااحسدك ترا وحدة بوحدة
الجدة منيرة:اعوذ بالله منك
رهايف:بتال تكفى قول لامي توافق
بتال فتح عيونه وهو يطالعها:وش تبين؟
رهايف:ابي أرنب وأمك رافضة!!
امجاد وقفت عندهم وهي تنزل غدا بتال قدامه وتجلس طالعت فيصل:فيصل جيب الشاهي من المطبخ
فيصل وهو يوقف:ان شاء إلى الله
امجاد وهي تطالع رهايف:وان شاء الله مين بياكله وينظفه هاه!!بتتزوجين وتتركينه عندنا اكيد هاذي سوالفك دايم!!
ام غازي زفرت بطفش منها:غثتني الله يصلحها ناشبة من الصبح فهمي اختك،،مسكت بتال من كتفه،،قم تغدا قم
بتال جلس وهو يطالع رهايف:يمّه جيبيه لها
رهايف وقفت ونطت جنبه بابتسامة عريضة وهي تسلم على راسه:ايه هذا الاخو ايه
ام غازي بتكشيرة:خلاص جيبيه،،طالعت بتال،،بس انت المسؤول عنه انا مالي شغل لو يموت
بتال يتغدى وهو فوت الغدا ماتغدا معهم الظهر:ابشري ماطلبتي شي
فيصل نزل الشاهي وهو يصب لهم
امجاد قطبت جبينها بشك ثم انفجرت تضحك
بتال ابتسم وعينه عالغدا
رهايف قطبت جبينها بشك وهي تطالعهم يضحكون ثم اتسعت عيونها:تحلمووووون
ام غازي ابتسمت وهي تشرب الشاهي
بتال:انتي بس سمنيه(سمين)وبيلحق لاتو(أرنب لرهايف وهي بالثانوي)
فيصل:الله بناكل كبسة أرانب
رهايف بنرفزة:وجع اكانوا لاتو وسكت مو بكيفكم تأكلون ارنولد الجديد يامفاجيع
فيصل:خليه يجي اول ذا الجديد
بتال طالعها:بالله لاتو ذا اسم!!وبعدين احنا رحمناه لاينتحر من سواياك فيه
رهايف بغبنة وهي تبعد عنه:وذبحتوه يااهل الرحمة الله يحفظكم
بتال:وصار احلى كبسة
الجدة منيرة:عاد صادق كبسة الأرانب مامثلها
رهايف بغبنة:جدة!!!
بتال:والله اذا ماتبين كبسة بلاتو جديد خليه عند صاحبه احسن
رهايف بزعل:ووجعوه اَي والله ووجعوه
ام غازي بعصبية:يوجع عدوينك اَي والله تدعين بالوجع ليش!!
امجاد:هانت لارحتي بيتك اشتري عايلة مو واحد
رهايف بزعلها:عشان أتورط فيها!!
فيصل ضحك:انكشفت النوايا!!
امجاد طالعتها:والله مدري وش اقول
ام غازي:انا اقول عنك مافيه يارهايف أرنب ارتاحي ولاتزعجيني
رهايف وقفت:انا بروح لعباير
امجاد:ماشاء الله من متى الصحبة!!
رهايف:هي امس قالت لي العصر بتوديني للغنم
بتال بتكذيب وهو يطالعها:عباير قالته!!
رهايف كشرت:ايه قالت ليش!!
ام غازي والجدة منيرة يطالعونه باستغراب
بتال وهو ياكل:غريبة عباير ماتعزم للغنم!!كيف تعزمك وهي ماتبيها!!
رهايف:وش دراك ان شاء الله انها ماتبيها!!
بتال:المهم ماتروحين وخلصنا
رهايف:ابوي وافق
بتال يطالعها بتقطيبة جبينه شاك فيها
رهايف:لاتطالعني كذا!!
ام غازي:ومتى ان شاء الله؟!!
رهايف:قبل يروح قلت له وجدتي شاهدة
.
~بالسيارة~
،،وسط هدوءهم والحالة الكئيبة اللي مخيمة عليهم،،
فاهد:ماودك توجس شي؟
يوسف يسوق وبدون لايطالعه:اَي بالله ودي وودي اوجس علومن واجدة
فاهد:اوجس هذانا منكعمين طول الخط
يوسف بغبنة:الى متى الى متى وانت منكعم يبه الى متى!!
فاهد ابتسم
يوسف:كلن يلفيك بشيانة نفسه وفعله وانت منكعم ليه ليه!!ماهم بهم لحالهم اللي عاثت بهم الصرايم!!حتى انت عاثت بك صرايمن واجد وماطشيتها يم احد
فاهد ضحك
يوسف طالعه بقهر منه:وش اللي اضحك!!مااوجست شين يضحك!!
فاهد:الا وانا ابوك رحومين وبالحيل
يوسف اتسعت عيونه:يبه!!
فاهد:صحيح عاثت بي صرايم مايخبرونها مير انهم يرعوني قدامهم ويكبوني اغدي ولايعملون بس شين!!هاذي والله من طيب اصلهم يايوسف
يوسف وقف بالسيارة على جنب وهو مو متحمل كلام ابوه وطالعه:يبه
فاهد قاطعه:اوح العلم يايوسف وعليك الحسبة
يوسف قطب جبينه باستغراب:اسلم
فاهد:اول مرتن يرعوني يايوسف من سنين عقب الـلـي غدا بهم من وراي!!عادل ولاعمل بي شين احد ولده وغدا!!وسمية وصدت عني خوف اني اخذ الولد منهم وعمي نشمي مااوجس شين ابد عيونه اتحمد الله اني سالم على كثر اللي عملته وعمي بادي ولو ان عصاه موجعة مير قليبه متوجع على عييله ومحدن يلومه
يوسف:وثمن يايبه وثم!!
فاهد:خواطرهم تعدي وتعود مابين الفرقى والشوق والخوف
يوسف باستغراب:خوف!!
فاهد تنهد بضيقة:هالصد كوده بيبطي بيطي من كثر الخوف والله يلوم من لامهم يايوسف
.
..بيت جسّار..
،،غرفة النوم،،
جسّار نايم عالسرير فز جالس من نومته مفجوع وهو يطالع مكانها مافيه احد وقف بسرعة وهو يترنح للحين ماصحصح وضرب اصبعه رجله اليمين بطرف السرير عض شفته وهو يوقف عند الباب ويمسك رجله ترك رجله وهو ياخذ نفس وسط تكشيرة وجهه وفتح الباب وانصدم منها
بخوت واقفة عالباب ورجعت خطوة لورا وهي تطالعه قبالها وبربكة وإحراج وهي تبعد عنه اكثر:وعيت؟
جسّار زفر براحة وهو يطالعها قباله ساكت
بخوت نزلت نظرها للأرض وهي تحس بقشعرة سرت بجسمها من نظراته وضمت يديها ببعض؛ولمت الغدا اللي لفوا به يمّنا من اليوم وانا احتريك تعي(تصحى)
جسّار تقدم لها وهو يمد يده لها ولامس أسفل فكها
بخوت غمضت عيونها بخوف وهي تبلع غصتها
جسّار تنهد وهو يطالعها ورفع راسها بشويش لفوق وبهدوء:بخوت
بخوت مافتحت عيونها
جسّار نزل يده
بخوت نزلت راسها على طول
جسّار مد يديه ومسك يديها:بخوت
بخوت سحبت يديها منه
جسّار تنهد:بخوت ناظريني
بخوت رفعت راسها بشويش
جسّار:عيونك ماتنزل الارض ابد وانتي تكلميني وش اتفقنا عليه اليوم!!
بخوت بلعت ريقها وهمست:ان شاء الله
جسّار ابتسم:وين الغدا ميت جوع
بخوت بهمس:بغرفة الحريم
جسّار:وين؟ماسمعت؟وين فيه
بخوت:بـ
جسّار مد يده لها وهو يقاطعها:وديني للغدا
بخوت عقدت حواجبها
جسّار غمض عيونه:بآخذ لي غفوة على مانويل
بخوت وهي تطالعه تستوعب كلامه
جسّار وهو ينحني بجسمه بشويش حتى يجلس:بتمسكين يدي ولا تشيليني
بخوت مسكت يده بسرعة قبل يجلس
جسّار ابتسم وهو مغمض وبتهديد:عالغدا عالغدا بسرعة لاأجلس
بخوت اسرعت بخطواتها متجهة لغرفة الحريم وهي تسحبه وراها
جسّار فتح عيونه وهو يطالعها بابتسامة
بخوت دخلت الغرفة ووقفت عند السفرة وهي تهمس له:هذانا يمها
جسّار اللي غمض عيونه اول ماوقفوا عند السفرة فتح عيونه وهو يطالع الاكل:الله اكل،،انحنى بيجلس،،
بخوت اللي مافكت يده وهي تشاور نفسها عالموضوع من صحى ومو عارفة كيف تقوله رجعت بخطواتها لورا وسحبته
جسّار اعتدل بوقفته ماجلس وباستغراب:وش فيه؟،،اتسعت عيونه،،لايكون الاكل فيه شي!!
بخوت بسرعة وبصوت واضح:لااا مابه خلاف!!
جسّار ابتسم وهو يرفع يديهم:اجل ليش ساحبتني!!
بخوت انخفض صوتها وهي تتحاشى نظراته:صل اول بعدين كل
.
..عند الحلال..
،،قبال الشبك بمسافة وتحت احد الأشجار القليلة المتواجدة بالمكان،،
هيفاء تطالعه بتكشيرة
راشد جالس قبالها متكتف وبيده غصن صغير وهو يكتم غيظه واشر بطرف الغصن عالدفتر اللي بينهم:يومين يومين بس ونسيتي كل اللي قلته!!
هيفاء:وانت علامك مخنفر علي!!انت بلسانك اوجسته يمي لاصكيتي الدفيتر خلاص مانطري شين ابد!!
راشد:صح!!قلت مانجيب سيرة للحروف مو تنسين اللي علمتك!!
هيفاء:تراني سهيت عن نقيطة وماتعل ابدن علامك شاشت ابلايسك يمي!!
راشد ضحك:والله!!ماتعل!!الظاهر الطيبة ماتنفع ابد لازم الشدة معك!!
هيفاء اتسعت عيونها:هاه!!
ثريا اللي وقفت على مسافة بسيطة منهم وهي تنزل جك الحليب اللي حلبته من الغنم وهي تغطيه:ايه شد عليها وانا عمتك شد،،وقفت،،
هيفاء طالعتها بصدمة:عمة!!انتي معه علي!!
راشد زفر:هيفاء لنا ثلاث أسابيع وانتي للحين ماخلصتي خمس حروف!!بالله هذا يرضي احد؟
هيفاء ميلت فمها وهي تمسك كلامها
ثريا:هيفاء ماسدش يومنا ندوج بالمستشفى تدور احدن يقرا يمّنا وش اللي بالورقة تريدين ينعمل بش هاللون وانتي مع عييلش؟
هيفاء:لا مااريد
ثريا:كود ماتريدين عزي روحش وكبيه يعلمش هالعلم زين لش ينفعش،،مشت للغنم،،
راشد تنهد:ادري ماتبين تتعلمين وانتي هينا بس قلت أغير الجو يمكن تتعلمين اسرع ونفسيتك تكون احسن
هيفاء زفرت:مااريدك تعلمني
راشد انصدم:هاه!!!
هيفاء وهي تصد بوجهها عنه بخجل:وحدة من البنات تعلمني مير انت لا
راشد سكت يستوعب سبب رفضها تنهد:حاضر ابشر على ماتريدين
هيفاء طالعته بابتسامة:صحيح مااغتظت؟
راشد:ليش ازعل هالشي لك ولمصلحتك وانتي حرة
هيفاء ابتسمت وهي ترفع نفسها وتبوسه على خده:مشكور
راشد تنحنح وهو يطالع عمها وعمتها:فضحتينا!!
هيفاء:رهايف تعلمني
راشد طالعها بوسط اتساع عيونه:مين!!
.
..عند الغنم..
عباير جالسة بالسيارة مانزلت
رهايف واقفة عند الشبك متكتفة قبالهم تطالعهم بتكشيرة:عاجبكم حتى البنت مانزلت واضح انصدمت وهي تشوفكم معي!!
بتال:اقول اوص اوص بس وبعدين صاحية انتي تروحين انتي وهي لحالكم!!!وبعدين عباير متعودة نروح أنـا وهي للغنم مو شي جديد!!
فيصل:انا مثلك ماابي الغنم مسحوب غصب ترا
رهايف صدت عنهم بزعل
بتال:قولي الصدق ليش متفقة معها لحالكم؟اعترفي
رهايف سكتت
بتّال بتهديد:قولي بسرعة لااخليك انتي وهي تخلصون امور الغنم وانا متربع
رهايف طالعته:ماتعصب؟
بتال زفر:احاول مااوعدك
رهايف وهي تسحب فيصل بينه وبينها
فيصل:وش دخلني الحين!!
رهايف وهي تتخبى ورا فيصل وترجع بخطواتها لورا وتسحبه معها:تعلمني السواقة
بتال:بس!!
رهايف انصدمت ودفت فيصل:صدق!!!
بتال مسكها من يدها وبضغط عليها:سواقة هاه!!!
رهايف:ااه ااه بتال لحظة طيب لحظة اسمعني بس
بتال:قولي اسمعك!!
رهايف:بس كذا مجرد فضول خلني اجرب
بتال خفف ضغطته وهو يميل فمه
رهايف:وبعدين اسوق بهالبر ولا اسوق هناك عالاقل مافيه شي هينا اصدمه
بتال تركها وهو يقتنع بكلامها:معكم الى مااخلص الغنم وبعدها مااسمع طاري تجربة فهمتي
خايف ابتسمت وهي تلف وتجري لعباير:فهمت فهمت
.
..بيت بادي..
،،العشّة الداخلية،،
سعود بعصبية:ليش كبيته يغدي بها ياجد!!
الجد بادي وهو يخرج خيشة التمر من تحت السرير الحديد:ابوها ياسعود!!
سعود:معصي ياخذها وهو اللي متبرين منها من اول!!
الجد بادي زفر وهو يعتدل بجلسته ويفتح الخيشة ويوزع الصحون قدامه وبهدوء:بيغدي بها يمنا بالمغرب كل ابوها ساعتين وتعود
سعود بغبنة:وشو له ماكبيتها تغدي مع عباير يم الغنم!!كل ابوه ولا يغدي بها يمهم!!
الجد بادي رفع عينه وطالعه:ماهو بصابرن عليها ساعة ياسعود مير اخز ابليس عنك
سعود:والله ان خبرت العلم بخوت ان
الجد بادي قاطعه بحدة:سعوووود!!!
سعود عض شفته بقهر
الجد بادي:حتى عباير مااريدها تخبر العلم وحلايا بتعود شوين لاتعلني فوق علتي ياسعود
سعود:ياجد اللي يحصل
الجد بادي قاطعه:اغد يم ضيوفك بالعشا وكود ماردّها المغرب يخبر وش يعين مَن ورانا
.
..بيت مناور..
حلايا واقفة عند الباب وهي منهارة بكى
غيث يتقهوى قبالها بمسافة بهدوء
مناور نزل فنجالها بضيق من بكاها وطالعه:غيث رد البنية يم اهلها
غيث بدون مايطالعه وهو ياخذ تمر:انا اهلها يبه
ام غيث زفرت:ردها ياوليدي يم أمها راع البنية متمزعن قليبها من الصياح
غيث:اتخبرنا شوين ثم تعود يمّنا
ام غيث:هذاك اول ماهو بذالحين!!
غيث بنرفزة:تعود يمّه تعود شوين شوين تعود علامكم علي!!!
مناور:غيث كب القنق اللي براسك واللي تريده ماهو بغادين لك لو تكب رجلها اللي ذالحين
غيث نزل فنجاله وبحدة:مااشقوني يبه لاهي ولارجلها انا اريد بنتي اتخبرني
ام غيث:كان غديت بها يم الدكان اتقضى(تشتري)اللي تريد بلكن ماتصيح هالصياح كل ابوه تهدي شوي!!
غيث طالعها وبحدة:حلايا
مناور بحدة:غيث!!!
حلايا فزت ووقفت عيونها بحلقها من الرعب
غيث:ادني يمي
حلايا انفجرت صياح بصوت
شريفة منحنية قبالها شبه جالسة وبيدها فلوس مادتها لها:هاك الفلوس لاتصيحين حتى تغذي يم الدكان تشرين اللي تريدين
حلايا هزت راسها بلا وهي ترجع يديها ورا ظهرها وببكاها:لديني(رديني،رجعيني)يم بحوت وبعاير مااريد هنيا
غيث اللي عاض ع لسانه وهو مو متحمل نفسه انفجر وهو يسمع كلامها وفز واقف متجه لها:هماني اوجس ادني يمي
حلايا انرعبت وهي تطالعه يمشي لها وتقدمت لشريفة وهي تتخبى وراها بقلة حيلة
غيث انحنى شبه راكع قبال شريفة وهو يسحب حلايا من يدها بقوة
حلايا صرخت بصوت وهو مغمضة عيونها
غيث بصراخ وهو يهزها:انكعمي انكعمي انكعمي وشو له هالصياح!!ذابحك انا!!
شريفة مسكتها وسحبتها من يده وهي تضمها بحضنها وبعصبية:غيث!!
غيث مد يده وهو يسحبها من شريفة بالقوة:كبيها عنش بنتي ان شاء الله اقبرها مالش بها بد!!
شريفة دفته بقوة وهي توقف وبحضنها حلايا اللي متعلقة فيها طالعته وبصراخ وهي تضمها:علامك!!روعت الوغدة كبّها عنك خاف ربك!!
غيث ضرب شريفة كف على وجهها
شريفة طالعته بصدمة
غيث بعصبية؛كبيها عنش اوجست يمش كبيها
مناور واقف وراه مسكه من كتفه وهو يلفه عليه وضربه كف بكل قوته وبصراخ:اعقب
غيث يطالعه وهو عاض شفته بقهر
مناور:تمد يدك على بنيتي وبوسط بيتي!!اعقب ياغيث اعقب!!
غيث بحدة؛بنتك هي اللي اخطت تمنع بنتي عني!!
مناور:شريفة ماتخطي ابد اوحيت!!وثمن مالك وغد ولّا نسيت علمك وسط الرجال تريدني اخبرك!!
غيث بصراخ:بنتي ومحدن له وجسة يمي
مناور:معصي!!شريفة اديني حلايا
شريفة أعطت حلايا لابوها
مناور وهو يضم حلايا لحضنه:هالبنية مالها ابو لامنك اتسنع عقبها انا اغدي يم الجماعة واتوسط تاخذها،،مشى،،
غيث وقف بوجهه وبحدة:يبه
مناور بحدة وتهديد:طسّ عن وجهي ياغيث لاتحدني يم شين مااريد اعمله
غيث صرخ:يبه!!
حلايا ضمت رقبة مناور وهي تدفن نفسها فيه اكثر
مناور:وصريمة العلم اوحيته ياغيث انكعم عني،،مشى،،
غيث طالعه وهو يخرج بحلايا صرخ بغبنة وهو يرفس الباب بكل قوته
.
~بالسيارة~
رهايف وهي تسوق السيارة بشويش وكل ماعدت من حجر وارتفعت السيارة صرخت
عباير اللي كل شوي تفز منها ندمت على اقتراحها لرهايف
رهايف بغرور:ياولد ياولد والله اني حريفة سواقة المفروض يحطوني مع الفورميلا ون
عباير قطبت جبينها مو فاهمة وش تقصد:عينش يم الخط لاتحيدين عنه
رهايف:طيب طيب وش فيك خايفة،،تقلدها،،ماني بحايدة
عباير ميلت فمها:راعي الخزان الكبير حق الغنم لااقبلتي عليه طفي الددسن
رهايف كشرت:عباير تكفين لفة زيادة أمانة تكفين هاذي اول واخر مرة ماتعرفينه اذا قال شي يسويه أمانة تكفين
عباير تنهدت:طيب لفة بس
،،وصلوا عند الخزان،،
رهايف لفت من وراه
بتال واقف برا الشبك يطالعهم:يالله خلاص يكفيكم!!
رهايف خرجت راسها وهي تطالعه على يسارها ومهدية بالسيارة ولفت بدون ماتنتبه:عباير تقول باقي لفة
عباير مسكت الدريكسون بسرعة تعدله وبنرفزة:متى اوجسته يالكذوب!!
بتال:خلي الكذب عنك ووقفت بس يالله ورانا عشا ولانسيتي!!
عباير شهقت وهي تذكر ان جدها وصاها عالذبايح اللي معزولة بشبك لوحدها تجيب منها راسين:عودي يم الشبوك عودي
رهايف:تكفين بس شوية
عباير:عودي ابطيت على جدي والله ان يذبحني لكم عشا الليلة
رهايف:طيب خلاص اخر طلب والله اخر طلب
عباير زفرت:وشو
رهايف:ابي اسوي حركة دايم أشوفها بالأفلام
عباير قطبت جبينها:وشو!!
رهايف:ابي ارجع بالسيارة لورا بس
عباير تنهدت:طيب مير بالهون واحرصي
رهايف بحماس؛ان شاء الله
سعود وقف بالسيارة عند بتال وفيصل
بتال التفت يطالعه بابتسامة:حياك
سعود بوجه واضح عليه الضيقة:الله يسلمك
بتال باستغراب:وش فيك!!
سعود زفر:مابي شي
بتال طالع فيصل:فيصل روح جيب موية
فيصل اتسعت عيونه:من وين!!
بتال:من الخزان روح خلصني
فيصل:خلاص فهمت،،مشى،،
رهايف ضغطت عالبنزين وهي ترجع بالسيارة لورا بكل سرعة
عباير اتسعت عيونها:بالهون بالهون
رهايف بوناسة وصوتها العالي:ابي اسوي نفسهم وش بالهون
فيصل اللي واقف عند الخزان اخذ الجك اللي عليه وهو يفتح عطاه اتسعت عيونه وهو يطالع السيارة وهرب بسرعة
عباير صرخت:رهايف هديييي!!
رهايف صدمت بالخزان
بتال:سعود وش فيك؟وش اللي مضايقك؟
سعود وهو يلف شماغه ويرفع ثوبه قبال الشبك:غيث اخذ حلايا
بتال:نعم!!وجدي يدري؟
سعود رفع صوته وهو يجري ورا الغنم:هو اللي اداه إياها
بتال تنهد:اجل اصبر جدي يعرف وش يسوي
سعود مسك وحدة وهو يلمسها:وهذا اللي مانعني لااغدي يم غيث واتوطا ببطنه
بتال:الصبر وانا اخوك الصبر وبعدين ابوها
سعود وهو يوقف عند الباب:ياعله بالوبا
بتال فتح الباب ومسك الغنم منه:استغفر الله العظيم
سعود:وثقها(اربطها)زين
بتال بابتسامة:لاتوصي مايحتاج
،،التفتوا بفجعة ع صوت السيارة،،
بتال اتسعت عيونه وهو يترك الغنم ويجري لهم
سعود فتح الشبك وقفله بسرعة وهو يلحقه
فيصل يطالع الخزان اللي انفجر وغرق الدنيا من حوله بالحرية اللي داخله طالع السيارة اللي داخلة بالخزان من ورا وانتبه وجرى للسيارة:رهاااايف!!
.
..بيت بادي..
،،العشّة الخارجية،،
،،الجد نشمي والجد بادي ونشمي وابو جواد وابو غازي يتقهوون حول المشب،،
غازي يطالعهم وهو يحترق الكل يسولف ويضحك مبسوط طالع الجد بادي والجد نشمي اللي يسولفون عادي ولا كان فيه شي صار الصباح نزل فنجاله وهو ماعاد يتحمل اكثر:يبه اليوم ابو بتال لفى عند خيمة العرس
ابو غازي اتسعت عيونه
غازي وهو يطالع الجد بادي والجد نشمي اللي واضح عليهم الصدمة منه:ايه يبه اقصد فاهد
ابو غازي طالع ابوه بحدة:صدق يبه؟
غازي قاطع جده قبل يرد وهو يطالعهم بحدة:ايه صدق يبه ولاتخاف جدي بادي قام بالواجب عنك
ابو غازي ارتاح
غازي طالع ابوه:لكن يبه ليش ماسالت عن بتال!!
ابو غازي كشر:وش فيه اخوك؟
غازي طالعهم وهو يمرر نظره عليهم:الكل همه نفسه ولافكر ببتال وش وضعه بينكم!!
الجد بادي احتدت نظرته
الجد نشمي قطب جبينه
ابو غازي صرخ:غاااازي!!
غازي:مردغني يبه اذا تبي ماراح احرك شعرة لكن كلكم بتسمعوني وللأخير بعد
ابو غازي بيوقف
ابو جواد مسكه
ابو غازي اتسعت عيونه وهو يطالع ابو جواد
غازي:ازعلوا من هالفاهد اللي معذبكم وعذبوه وسووا اللي تبون محد معترض لكن انكم تلعبون ببتال بينكم هذا اللي ماراح اسكت عنه ابد
ابو غازي بسخرية:وعسى تبينا نستقبله بالبخور ونذبح له ونفتح المجالس لعيونه!!
غازي:ايه يبه قدام بتال وعشان بتال تسوي هالشي
الجد بادي بحدة:تعقب!!
ابو غازي صرخ:انهبلت ياولد!!
غازي طالع الجد بادي:ترا هو للحين ساكت ومتحمل اللي يصير بينكم لكن بيجي يــوم ويقلب عليكم كلكم ولايضرب لكم حساب،،طالع ابوه،،وانت يبه اكثر واحد تعرف بتال وأدرى بزعله
ابو غازي عض شفته بقهر من اللي ينقال قدامه
غازي مرر نظره عليهم:وبتال لاصد صد وماأشين منه احد اذا زعل
الجد بادي بحدة:وثمن؟!!
غازي:حلوا اموركم بينكم بعيد عنه وياليت تستعجلون وشوي احترام لبعض قدامه مابيضركم بالعكس بيرفع جميلكم بعينه فوق بـعـد اللي صار قدامه اليوم
الجد بادي وقف وصرخ بغازي؛انكعم!!،،طالع ابو غازي،،هاذي رباتك ياعادل!!!وغدك يتلفظ بعلومن اكبر منه!!
غازي وقف وبحدة:ابوي رباني احسن تربية ياجد وانا مااسكت عن الحق ابد واذا عيونكم أنعمت عنا
اللي يصير افتحها لكم انا!!
ابو غازي وقف وبحدة:انكعم ياغازي!!!
غازي رفع صوته بعناد وعينه بابوه:ازعلوا بكيفكم ماني براد احد عن شي ولا لي باموركم لكن انكم تضيقون خاطره وتجيبون له الغم لا والف لا هينا يجي دوري انا وأوعيكم واخليكم تنتبهون زين له،،طالع الجد بادي،،واذا طولتوا بالموضوع ترا ماهو بصالحكم ابد كثر الله خيركم عالعشا لكن اعذروني وراي عمل،،مشى،،
ابو جواد ابتسم:عيالكم يعلمونكم!!
الجد بادي جلس وهو يغلي ويشد على قبضته
ابو غازي:انكعم يامسفر انكعم!!
حلايا جرت لهم وهي تترك يد مناور:زدي
الجد بادي التفت لها بوسط تكشيرته
حلايا ضمته وهي تبكي
مناور:وهاذي وغدتكم لفت يمكم اترخصكم وراي مـجـلـس مليان بضيفاني،،مشى،،
.
،،عند الغنم،،
بتال واقف عند السيارة من جهة السواق وهو يطالع رهايف:فيك شي؟
رهايف اللي مرعوبة منه اكثر من المها وفجعتها باللي صار نطقت بصوتها اللي يرجف:مدري
بتال:خليك لاتتحركين،،انتبه لسعود اللي عند عباير،،
سعود يطالع عباير برعب:صابش شي؟غدا بش شي؟
عباير وهي تكبح دموعها:حنكي(فكها)يعوقني
سعود مد يده لها بيساعدها تنزل
بتال رفع صوته:لا لحظة اصبر لاتحركها دقيقة
بتال شيك على رهايف بتمرير يديه بسرعة على جسمها ثم التفت لفيصل:ساعد اختك،،مشى للجهة الثانية بسرعة،،
رهايف زفرت براحة وهي تحمل ربها بينها وبين نفسه عدت على خير وماذبحها بتال
فيصل مد يده لرهايف
رهايف حطت يدها بيده ونزلت
فيصل مشى بشويش
رهايف مشت معه وهي تتصنع التعب
فيصل يمشي معها التفت لها وبنص عين:مافيك شي صح؟
رهايف:اوص فصيل بموت قـلـبـي بيخرج من مكانه
فيصل بابتسامة:خوف من بتال
رهايف غرزت أظافرها بيده
فيصل:اااه اااه
رهايف:ماني ناقصني فصيل بتال ومشى الموضوع وراي ابوي
بتال وقف عند عباير والتفت لسعود:صد شوي لاهنت
سعود قطب جبينه باستغراب
بتال زفر وهو يطالع نظرات سعود ثم طالعها:اللي اسويه مجرد تشييك،،بدا يمرر يديه على جسمها يتأكد من سلامة عظامها،،
سعود اتسعت عيونه
عباير تغير وجهها من الاحراج
بتال تنهد وهو يطالع سعود:الحمدلله سليمة
سعود بربكة:الحمدلله،،مد يده لعباير،،
بتال تركهم وقف والتفت وهو يسمع صوتها
عباير حطت يدها بيد سعود بتنزل تأوهت بألم
بتال رجع لهم ووقف باستغراب وهو متاكد مافيه كسور:وين الالم؟
عباير بهمس:كتفي
بتال حط يده على كتفها وهو يضغط بشويش
عباير تألمت
بتال:ممكن كدمة الأكيد مو كسر،،طالع سعود،،روح فيها للمستشفى وانا امسك مكانك
سعود هز راسه بايه:ان شاء الله
عباير طالعت سعود:لا دامه ماهو بكسر بكمدها والله يعين
بتال:عالاقل شوي مراهم مسكنة
عباير وعينها بسعود:لا ياسعود لا الليلة ضيفان وثمن مابي خلاف اكمد لشوي
سعود تنهد:على راحتش
بتال اتسعت عيونه:سعود!!!
سعود:مير لاغدوا ضيفانا غديت بش يم المستشفى
بتال مشى وتركهم
عباير:ابشر على ماتريد
سعود مد يساره وحطها تحت أكتافها ثم مد يمينه وهو يحطها تحت رجولها وشالها
عباير اتسعت عيونها بصدمة:سعود!!
سعود مشى فيها:لااوحي حسش اوص
عباير:مير
سعود قاطعها:طاوعتش بغدية المستشفى مير ذي ماني مطاوعش لاتقلقيني
عباير سكتت وهي تحس باحراج فظيع وهي بين يديه قدامهم
بتال وقف قبالهم وهو يطالع رهايف
رهايف مو قادرة تحط عينها بعينه ولصقت بفيصل
بتال زفر وهو فاهمها ومنتبه لحركاتها:رهايف
رهايف بلعت ريقها وهي تطالع الارض:نعم
بتال مد يده لها
رهايف سحبت فيصل لقدامها بسرعة وهي تتخبى كلها وراه
بتال نزل يده وزفر وهو يطالع خوفها رفع يده وهو يثنيها على وسطه وبحدة:رهايف
رهايف ماردت
فيصل:بتال خلاص اخر مرة وهي اصلا اول واخر مرة بتسوق عدها
بتال من بين اسنانه:رهايف واخر مرة اقول رهايف تعالي قدامي!!
رهايف تحركت من ورا فيصل وهي توقف قباله بكم خطوة
فيصل:بتال ترا مااحنا بالبيت برا وحولنا ناس يعني شوية هدوء تكفى هاه؟تكفى تـ
بتال طالعه بحدة
فيصل سكت
رهايف عينها بالأرض وهي تنتظر الضربة القاضية منه
بتال طالعها ومد يده وهو مسك يدها وهو يسحبها له بقوة
رهايف نزلت دموعها غصب عنها من كثر خوفها
بتال سلم على راسها:الحمدلله على السلامة
رهايف وقفت غصتها بحلقها ورفعت عينها لـه:هاه!!
بتال:هذا درس لك ويأكد كلامي ماعاد تسوقين ابد ماتنفع لك السواقة اصلا،،مشى وهو يطالع سعود ركب الددسن،،
فيصل ابتسم ومشى وراه
رهايف واقفة تطالعهم تستوعب هدوءه وهي توقعت يذبحها جرت وراهم:ليش مااسوق!!وش المانع؟!!
بتال وقف والتفت لها وهو رافع حاجبه:رحمة بالمسلمين ولا انتي ياعليك حظ تضربه اللي حولك وتطلعين منها سالمة،،مشى،،
فيصل:اَي والله صادق
رهايف بتكشيرة:اذكروا الله بس
بتال همس:اوص لااسمع صوتك عند الرجال،،وقف من جهة السواق على مسافة،،سعود
سعود:اوجس يم اهلك يركبون بالغمارة
بتال:لا والله لا ان تجلس معنا بالصندوق بعد اللي سوته
رهايف اتسعت عيونها
فيصل التفت يطالعها بابتسامة
سعود نزل واتجه للشبك:وش هالوجس!!كبها تغدي يم الغمارة والحلال بنحطه ورا
رهايف مشت
بتال مسكها وهو يحط يده على كتفها ويضمها لحضنه
رهايف رفعت راسها له وطالعته برجى:بتااال
بتال وعينه على سعود:فيصل الحقه وساعده
فيصل اتجه لسعود
بتال:سعود
سعود التفت له وهو يفتح باب الشبك:سم
بتال:اللي صار مابي احد يدري به وابشروا بالعوض
رهايف طالعته بصدمة:بتال!!
سعود دخل للشبك رفع صوته:حصل خير ياابن الحلال بالحديد ولا بالعبيد
بتال:صدقت صدقت بس ماودي احد يدري ابد
سعود:يدري بوش؟!!
بتال ابتسم
سعود:بس انت اغد باهلك يم الغمارة
بتال:ماعليك ياابن الحلال ماعليك انت بس جيب حلالك وانا وأهلي ندبر امورنا بالصندوق ماعليك
رهايف:أمانة بتال تكفى لا
بتال:وهو يضمها له بابتسامة:هذا اقل شي تسوينه بعد الخساير يارهيّف،،حرك حواجبه،،وباصورك معها وأرسل لجواد على طول
رهايف دفته وبزعل:وجع ماتسوي شي لله
بتال ضحك:يازينك انتي وخرسانة بعد شوي بألقط لكن احلى سلفي موثق
.
.........****..........
الليل
.........****..........
<صلاة العشاء>
.
..بيت الشلة..
،،الكل راح للعشا ماعدا اهل ابو غازي،،
غازي يتقهوى ببرود وسط نظرات ابوه اللي ماهدت ابد والكل ملاحظها
ام غازي وقفت عندهم بعبايتها:مشينا ترا الناس هينا وضعهم غير عنا!!الحين تلقاهم حطوا العشا
ابو غازي وقف ومشى بدون لايقول شي
ام غازي طالعت غازي:بسرعة قم البس وش فيك جالس للحين!!
غازي:انا اعتذرت عن العشا من أصحابه اليوم تعشوا وتعالوا بسرعة لاتطولون ورانا مشوار
بتال وقف وهو يقفل ثوبه:من جدك مابتحضر!!
غازي:اي والله
بتال ميل فمه بشك وهو يطالع ابوه اللي خرج:وش مسوي ابوي من اليوم عينه عليك؟
غازي:ماسويت شي بس امش امش يالله وابلع
بتال:امي ترا مابتروح معكم
ام غازي اللي وصلت للباب التفتت:بسم الله ليش!!
رهايف اللي تلف طرحتها جنبه وقفت وتخصرت:نعععمممم!!!ليش ان شاء الله!!
بتال غمز لها وهو يطالعها بابتسامة:رهايف!!نسينا!!
رهايف كشرت
بتال مشى لامه وهو يسلم على راسها:يومين عندي ونروح مع بعض طلبت اجازة
ام غازي:اشوف
بتال ضمها وبترجي:يمه!!!
رهايف بنرفزة:هيه هيه ابي اشبع منها زواجي بعد كم يوم تقعد معك ليش!!
بتال يطالعها بتقطيبة جبينه:الله والفاظك السوقية!!وبعدين ترا بتتزوجين مابتهاجرين!!انا اللي مهاجر مابتموتين اذا جلست معي يومين!!
رهايف:ترا بيتي بعيد
بتال وهو ضام امه:كم يبي لك هاه؟عشر دقايق!!اوص انا 12ساعة قال بيتي بعيد قال!!
رهايف طنشته:يمه وش تشوفيني الله يهديك بتتركيني!!
بتال بتهديد:والله ماسكتي يارهايف تعرفين وش وراي
رهايف سكتت
ام غازي دفته:وخر بس وخر أخرتوني
غازي بضحكة:لايسمعك ابوي ويجهز لك نفس مقاس راشد
ام غازي خرجت
فيصل وراها
رهايف وقفت عالباب:اصلا امي ماتقدر على فراق ابوي ياحرام،،هربت،،
بتال وقف عالباب:لاتستانسين بعد شوي راجعة تراك!!
امجاد تطالعهم بابتسامة وهي عند الباب تلف طرحتها
بتال وقف وطالعها وهو متعود على هدوءها:يالله،،مد يده لها،،
امجاد مسكت يده
بتال مشى ويده بيدها:علومك يالطيبة من زمان عنك
امجاد ابتسمت:بخير يالطيب بس فقدت اللي اسوي له صواني بنص الليل
بتال ابتسم وهو يترك يدها ويوقف قبالها ويمشي على ورا وهو ينحني لمستواها:ماتشوفين شي متغير فيني؟
امجاد قطبت جبينها:كيف اشوف بهالظلام!!
بتال قرب اكثر:والحين؟
امجاد وقفت:بلاعباطة بتال!!
بتال هز راسه وهو يمسك يدها ويمشي:انعدمت قوة ملاحظتك ماتشوفيني ذبلان!!
امجاد ابتسمت:غصب مكروف
بتال:لا والله فقدتك بأنصاص الليول وهينا مقطوعين مافيه شي ابد
امجاد بابتسامة:ابشر هالاسبوع بأخليك تزيد اربع كيلو
بتال:ياحول الحين يبلشون بي بالاسعاف فوق طولي اللي مثقل السيارة بيزيدهم وزني
امجاد ضحكت:بسم الله عليك اذكر الله وبعدين وش فيك!!يازينك!!
بتال وهو يعدل ياقته:امدحي امدحي وانا اخوك محتاج طاقة إيجابية من وراك
امجاد بابتسامة:فارع الطول ممشوق القوام لطيف وممتاز بشغلك وفوق ذَا كله بشاشة تخلي اللي قدامك بشوش مثلك غصب
بتال صرخ:يااااوك يابتّال
امجاد فزت:بسم الله!!
بتال:الحمدلله ان فيه امجاد بعايلتنا بدونك عايلتنا طول الوقت بحالة استنفار قصوى
امجاد ابتسمت:والله مدري وش اقول خليني ساكتة احسن لاينعدم هالجو
بتال اتسعت عيونه وطالعها ووقف:لا قولي قولي مو انتي مع هالخبلة وشكلها بدت تأثر عليك!!
امجاد مشت وهي تسحبه معها:بسرعة بسرعة ترا تأخرنا بسرعة
.
..بيت جسّار..
جسّار واقف قبال التسريحة يعدل شماغه مسك عطره وهو يرش منه
بخوت بجلابية زيتي قطيفة ميدي ماسكة عالرقبة ومزمومة من تحت الصدر ومنسدلة باكمام واسعة ومزمومة من عند اعلى كفها رافعة شعرها من فوق اذنها من الجهتين لفة وحدة وتاركته مسدول ياخذ طوله على ظهرها بحلق ذهبي طويل وأسواره ذهب تلف معصم يمينها ودبلتها باصبعها بروج بني وكحلة ومسكرة وخلال ذهب يزين ساقها اليمنى دخلت وبيدها المبخرة وريحة كسرة العود اللي تتصاعد وصلت له
جسّار التفت يطالعها بابتسامة وهو ينزل عطره:ياهلا
بخوت بلعت ريقها وهي تحاول تكون طبيعية وقفت قباله بمسافة وهي تمد يمينها اللي ماسكة فيها المبخرة لاقصى شي حتى ماتكون قريبة منه:تبخر
جسّار وهو يميل راسه لها:هاه وش تقولين؟
بخوت رفعت صوتها:تبخر
جسّار مسك يدها وسحبها له
بخوت اتسعت عيونها وهي تكتم انفاسها
جسّار وهو يبخر شماغه صاد بوجهه عن البخور بدون لايطالعها:سلمتي سلمتي،،ترك يدها بعد ماتبخر،،هاه جاهزة؟
بخوت طالعته ساكتة
جسّار ابتسم:انتظرك عند الباب،،مشى،،
بخوت خرجت من الغرفة وهي تنحني وتنزل المبخرة بوسط الحوش
جسّار واقف عند الباب متكتف يطالعها بابتسامة
بخوت اعتدلت بوقفتها والتقت عيونها بعيونه ارتبكت وهي تطالع ابتسامته
جسّار:بسرعة
بخوت عقدت حواجبها
جسّار رفع صوته وهو يتكلم بسرعة:بسرعة بسرعة بسرعة بسرعة
بخوت ارتبكت منه وجرت للغرفة
جسّار كتم ضحكته وهو يوقف لثواني ياخذ نفس يكتم الضحكة زين وكمل وهو يهدي صوته:بسرعة بسرعة بسرعة
بخوت خرجت من الغرفة تمشي وهي تلبس عبايتها وعلى يدها اليسار تتدلى طرحتها ونقابها ماسكته بيدها اليسار بعد وتقفل ازارير عبايتها وواضح عليها الحوسة
جسّار يطالعها وهي تمشي رفع صوته:بسرعة بسرعة بسرعة
بخوت جرت له وهي تلف طرحتها بسرعة وقفت عنده وهي تلبس نقابها
جسّار بابتسامة:ها خلاص؟
بخوت ماردت
جسّار رفع نقابها وانحنى يطالعها وأنفاسه تضرب بوجهها
بخوت رجعت لورا بصدمة
جسّار بابتسامة:ردي علي لمى اسألك بسرعة احسن لك
بخوت:ايه ولمت
جسّار:يعني سمعتيني!!
بخوت كشرت بغيظ
جسّار ابتسم وهو يطالع ردة فعلها:هاه لبستيه؟
بخوت نزلت نقابها على وجهها
جسّار مد يده لها
بخوت طالعت يده باستغراب ثم طالعته
جسّار:يالله يالله مافي خرجة الا ويدك بيدي بس يالله
بخوت طالعته شوي وهي تفكر
جسّار نزل يده وجلس
بخوت اتسعت عيونها
جسّار مد يده وهو يطالعها
بخوت اخذت نفس وهي تحط يدها بيده
جسّار ابتسم وهو يوقف:توكلنا على الله،،فتح الباب ومد رجله بيخرج وقف،،لحظة!!
بخوت بنفسها:لااله الا الله علامه ذا الرجل!!
جسّار طالعها:مانسيتي شي؟
بخوت قطبت جبينها باستغراب وهمست:وش؟!!
جسّار:مدري ناظري نفسك
بخوت وهي تطالع نفسها اتسعت عيونها وهي ناسية تلبس صندلها
جسّار بضحكة:قولي من الاول انتي تبيني اشيلك!!
بخوت انصدمت وهي تطالعه
جسّار:ابشري ماطلبتي شي،،انحنى وهو ماسك يدها،،
بخوت سحبت يدها منه وبزعل:كله إمنك اعجلتني،،جرت للغرفة،،
.
..بيت بادي..
<<بعد العشا<<بعد ماراحوا الضيوف<<
جسّار واقف وهو ينتظر بخوت
بخوت خرجت له
جسّار ابتسم:حيها ياحيها اذا ودك تجلسين مع اختك شوي عادي بانتظرك هينا ماوراي شي
بخوت طالعته ساكتة
جسّار:وش فيه؟صاير شي؟
بخوت همست:حلايا
جسّار:اَي والله وينها ماشفتها ولاجت تسلم علي!!
بخوت برجفة صوت:ولاسلمت علي ولااوجست علمن يم احد مغير منكعمة ومنزوية بروحها
جسّار قطب جبينه باستغراب:وش فيها؟!!
بخوت سكتت
جسّار:ادخلي وجيبيها تجي معنا
بخوت ابتسمت بوناسة:صحيح
جسّار:روحي بسرعة
بخوت جرت لداخل البيت ورجعت لوحدها وهي تخنقها العبرة
جسّار:وينها!!
بخوت:عيت تلفي معنا
سعود خرج وهو شايل حلايا
حلايا متعلقة برقبته دافنة نفسها فيه
جسّار ابتسم:هـلا ياهلا
سعود وقف عندهم وهو يهزها بشويش:ها ارعيهم مو توجسين تريدين تراعينهم ترا بيسرون ذالحين وانتي ماارعيتهم
حلايا انفجرت تبكي بصوت وهي متعلقة بسعود
سعود مسح على راسها وهو عارف اللي فيها:لاتصيحين ياعيني لاتصيحين انا معش
جسّار انصدم:بسم الله عليك بسم الله
بخوت بلعت غصتها وهي تسمع بكاها وتقدمت وهي تمسك يدها تفككها من سعود:حلايا
حلايا سحبت يدها بقوة من بخوت وهي دافنة وجهها برقبة سعود وتبكي
بخوت هلا دموعها غصب
جسّار تقدم وهو يمسح على ظهر حلايا اللي بين يدين سعود:حلايا وش اللي مزعلك؟انا؟ولا بخوت؟
حلايا ماردت وهي تبكي
جسّار:ابشري بأخذ حقك من اللي مزعلك بس لاتبكين ياحلوتي لاتبكين
حلايا طالعته وهي تشاهق
جسّار مسح دموعها:وش فيك قولي لي من اللي مايستحي على وجهه وبكّى القمر
حلايا بكلامها الطفولي اللي مو واضح:ماتريدوني كبيتوه يأخذني
سعود اتسعت عيونه
بخوت بوجهها اللي شحب ورجفة قلبها:من اللي أخذك ياحلايا؟
جسّار قطب جبينه وهو يسمع بخوت
حلايا ببكا:غيث
.
.
<اللهم صل وسلم على نبينا محمد>