ياسمح المحيا جر الهجنية

الجزء الرابع والعشرون

سبحانك اللهم وبحمدك استغفرك وأتوب اليك
.
جسّار شايل بيده كيس ويده الثانية بجيب بنطلونه الواسع يمشي وسط القرية ضيّع البيت بوسط هالظلام حتى لمبة الشارع الوحيدة اللي قبال بيت الشيخ طافية زفر وهو واقف عندها يتلفت يمينه ويساره مايدري من وين يروح وبضيقة وهو يهمس:حسبي عليك يابتالوه الحين وين اروح،،زفر..ياليل الليل حتى ارسال مافيه وش ذَا الحظ!!،،لمح انوار بعيدة وكانت هالانوار من بيت ابو فارس اللي هو زواج طلق مشى يجر خطوات بنفس اتجاه هالبيت اللي قدّامه بمسافة،،
أم هليّل بنرفزة:علامك عالرجال تهججه من اولها؟!!
هليّل يمشي جنب امه:يمه ماهججته!!ثم هاذي جزاتي خايف على خيتي!!
ام هليّل:امنعنا من خوفك البايز(ماله داعي)وانت تهدده بهالعلوم اللي توجسها له كود انها ماهي بخوف اجل وش انهي!!
هليّل:طيب طيب خلاص يمه ابشري وعلى رايش وش تبغين بعد،،اضطر يلف مع الطريق اللي يجبرك تلف وسط البيوت وجنبه امه وتقابل مع جسّار،،
ام هليّل سكتت وهي تشوف جسّار
هليّل قطب جبينه من هالغريب الموجود بالديرة
جسّار تنحنح ونزل عيونه وكمل طريقه قدامهم
ام هليّل همست لهليل:وش هالرجال اللي مابه حيا!!
هليّل يطالعه وهو مميل فمه وسط تقطيب جبينه
ام هليّل بهمس:وش ذَا الشراميط اللي يمشي بهن وسط الديرة بلاحيا ولامستحى!!
جسّار لابس بنطلون واسع رمادي وتيشيرت عودي
هليّل همس:يمكن انه عامل يمه
ام هليّل شهقت:ياوجه الله عامل وغادين يمشي وسط الديرة تقل بيته!!
جسّار شد ع قبضته وهو يسمع كل كلامهم اخذ نفس وزفره وهو يهدي نفسه
ام هليّل دقت هليّل بطرف كوعها مع جنبه:وانت مابك خير!!راعه أنشده من يبي
هليّل بتكشيرة وهو يطالع امه ثم طالع جسّار اللي قدّامه:هيه انت
جسّار طنشه مارد عليه
هليّل بحدة:ياصديق
جسّار عض شفته والتفت:نعم تكلمني؟!أي خدمة؟
هليّل وقف ووقف امه معه وباستغراب:لا بس ظنيتك عامل
جسّار بابتسامة:والعامل مايقضي اموره بوسط بديرتكم يعني!!لازم ياخذ اذنكم!!
ام هليل كشرت بوجهها وهي تطالعه من فوق لتحت
هليّل:لا مير انه الوجه غريب ماهو من أهل الديرة ولاراعيتك مـ
ام هليّل قاطعت هليّل وبحدة:ماعلينا لوم وانت هذا ملبسك!!
جسّار ابتسم:ليش ياخالة عسى ماشر؟وش فيه لبسي؟
ام هليّل:راع روحك!!
جسّار بابتسامة وهدوء:اللي اعرفه ياخالة العورة من السرة للركبة وانا مو واضح مني شي لافوق ولاتحت!!عندك اعتراض لاسمح الله؟
هليّل احتدت نظرته وهو يشوفه يكلم امه بهالاسلوب وبحدة:هاللبس ماهو بمنّا ولا هو من عوايدنا برا البيوت!!
جسّار:عوايدكم لكم ماهي بلي!!ودامني ماخالفت شرع ربي ولامشيت بالشوارع متعري مالك كلمة علي لا انت ولا غيرك!!،،مشى ولاأعطاهم مجال يردون وبهمس،،استغفر الله العظيم!!وش هالناس!!،،وقف وهو يتذكر انه ضايع ومافيه احد غيرهم يسأله كشّر بوجهه وهو يحس الجو صار حار مشى وهو يطالع الارض مو منتبه لطريقه ومسك بلوزته بأطراف اصابعه من على صدره يهوي نفسه من الحر والإحراج اللي يحسه كيف يسألهم وهو متهاوش معهم ولاانتبه للي قدّامه تمشي بوسط هالظلام وصدمها،،
.
راشد وقف بسيارته عند بيت حمدان
حمدان نزل من السيارة وقفل الباب وطالع راشد بابتسامته ومد يده يصافحه:مشكور ياعسى ربي يجازيك بالخير
راشد بابتسامة:ويجزاك ماسويت الا الواجب وانا اخوك تردها لنا بالافراح
حمدان ابتسم بابتسامة يخالطها حزن وسط زفرته:اي أفراح وسط هالديرة الله يهديك
راشد اختفت ابتسامته وهو يطالعه باستغراب من كلامه
دلال قاطعت جوهم بصوتها العالي اللي كله فرح وهي تجري من بيتهم متجهة لابوها بحماس ووناسة:يبه
حمدان التفت لها بابتسامة شقت وجهه وهو ينحني لها فاتح يدينه:ياعين ابوها
دلال ارتمت بحضنه
حمدان ضمها وهو يوقف بها وياخذ نفس كله حب وعطف لبنته
راشد نزل ووقف عندهم بابتسامته يبي يسلم عليها
حمدان:ياعيني راعي عمش يبي يسلم عليش
دلال تعلقت بابوها ماتركته
حمدان طالعه بابتسامة:وش الدبرة مير معيّة تكبّني
راشد ضحك بخفة وهو يبوس كتف دلال وهي بحضن ابوها:تجي الأيام ان شاء الله وتلاحقيني وأقولك لا مافي لعب مع راشد
حمدان ضحك بخفة:مير ان الله يسلمك ويبقيك،،مسك راشد بيده اليسار واليمين مثبت فيها دلال بحضنه،،اقلط يمنا تعشّى معي الليلة
راشد مسك يده وهو يضغط عليها:كثر الله خيرك لكن ماني بعندك اخوياي ينتظروني خلها مرة ثانية
حمدان:توعدني؟الصدق؟
راشد بابتسامته:أبشر ماأرد عزيمتك لكن خلها مرة ثانية
حمدان ترك يده:سواة الله خير هذا البيت وعرفته متى مابغيت تتقهوى ولااشتهيت اكل البيت هذا هو بيتي
راشد:بيض الله وجهك ماتقصر اشوفك على خير،،مشى لسيارته،،
حمدان:جعل رايتك بيضا ماقصرت فمان الله
راشد وهو يركب سيارته رفع يده:بحفظ الله،،ركب وحرك،،
.
عباير تمشي بابتسامة كلها رضا بعد اللي صار ووراها حلايا وبخوت بمسافة التفتت لهم وبصوت كله وناسة:علامشن بطيات اعجلن كود نولمنا عشيّ(تصغير عشا)يسر الخاطر
حلايا ركضت
بخوت:بالهون بالهون
حلايا تعثرت وطاحت وظلت جالسة عالارض وهي تحبس دمعتها
عباير رجعت لحلايا بسرعة وانحنت شبه جالسة وهي توقف حلايا رفعت عينها تطالع بخوت:كملي دربش وراش ماحنا بمبطيات،،طالعت رجول حلايا تربط لها حبل جزمتها،،
بخوت زفرت وكملت طريقها تجمدت مكانها وهي تشوف جسّار يمشي لها ومو منتبه لها حاولت تتحرك ماقدرت تجمعت الدموع بعيونها واكتفت بالوقوف وسط رجفة شلت اطرافها
جسّار صدم فيها وانصدم من وجودها:بِسْم الله!!،،رجع خطوة لورا وهو يطالعها،،
عباير التفتت بسرعة لبخوت وهي تسمع صوت رجل
جسّار وهو يصد بوجهه ويبعد اكثر عنها:معليش اختي ماانتبهت
عباير مشت لهم بسرعة وتركت حلايا وراها ووقفت جنب بخوت وكلها خوف عليها:بخوت بخوت
بخوت تطالع جسّار بصمت
عباير تنهدت وهي تشوفها ثم التفتت لجسّار وبحدة:علامك انت ماتراعي دربك!!تبي من يكفيك حتى إتنبه للي قدامك!!
جسّار ارتفعت حواجبه وهو يطالعها باستغراب
بخوت شهقت بصوت مسموع وطاحت عالارض مغمى عليها
عباير جلست بفجعة وهي تأخذها لحضنها وتسمي عليها وتصحيها وبرجفة صوتها:بخوت بخوت،،طالعت جسّار وبقهرها،،الله ينتقم منك ماتراعي دربك!!ذبحت اختي!!
أم غيث بخطواتها السريعة وصلت لهم وهي تطالع حلايا اللي قبالها بمسافة بسيطة ارتسمت ابتسامة شر وهي تسرع بخطواتها لحلايا ومادة الملقط:حلايا
حلايا التفتت تطالعها ببراءاتها وهي واقفة بمكانها ماتحركت
عباير التفتت للي ينادي حلايا واتسعت عيونها بصدمة وهي تشوف ام غيث وفهمت اللي ناوية عليه
ام غيث وقفت عند حلايا ومسكتها من يدها:هاكن نصيبكم يابنات متعب انتن وخلفكن،،مدت الملقط،،
عباير انقطع نفسها من اللي تشوفه بردت اطرافها وثقلت ولاقدرت تتحرك وتطالع ام غيث بصدمة مو مصدقة اللي بتسويه
نوفة صرخت:لاااا يمه لااا
شريفة جرت لامها تبي توقفها
جسّار اللي كذب نفسه بالبداية وهو يشوفها متجهة لحلايا لكن تأكد اول ماشافها تمسك يدها وجرى لهم وقف عندهم وضرب الجمرة بأطراف أصابع يده اليسار وهو يمسك حلايا بيده اليسار ويسحبها من ام غيث بقوة بنفس اللحظة وبحدة:هيييييهههههه انننتييييي!!!!
حلايا بكت بسكات بدون اَي صوت وهي تطالع جسّار اللي يصرخ معصب وأم غيث اللي ناوية عليها
عباير تحركت من مكانها وهي يرجع لها نفسها وسحبت حلايا من يد جسّار تعطيهم ظهرها ووجهها ع بخوت وتلف حلايا تتطمن عليها وتطالعها بعيون كلها خوف:يمه حلايا يمه ياقليبي،،ضمتها لحضنها وهي تمسح ع ظهرها،،ياقليبي ياحلايا يمه يمه
هليّل اسرع بخطواته ووقف بينه وبين ام غيث وبحدة:انتي اللي هيه!!وش باغي!!غادين تتهاوش مع الحريم!!مابك حيا!!
بتال اللي خرج يدور جسّار بعد ماشافه تاخر وتأكد انه ضيع البيت عقد حواجبه وهو يسمع صراخ اسرع بخطواته وسط شكه
جسّار بصراخ وهو يدفه بكتفه لورا:ايه اتهاوش لاشفت السالفة فيها تعدّي!!
هليّل مافهم اخر كلامه لكن رد:ايه ايه افرد جنحانك عالضعيفات وهن لحالهن!!
جسّار:اذا هذولي ضعيفات اجل الشيطان وش يكون بوقتها
بتال وصل عندهم وطالع بخوت اللي عالارض انحنى لها ومد يده ليدها يبي يشوف نبضها
عباير انتبهت له من وصوله وقفت بسرعة وهي تسحب حلايا وراها بسرعة ومدت رجلها وشاتته من كتفه وهي تطالعه بحدة
بتال جلس وهو يطالعها بصدمة ثم كشر بوجهه وهو يعرفها:هذا انتي!!
عباير بحدة:طسّ لاأقص هاليد من اقصاها!!
بتال وقف وهو يبتسم وينفض يديه وببرود:بكيفك!!خليها تموت اجل!!
عباير تغير وجهها خصوصا وهي تذكر انه أسعف سعود تقدمت له وهي تمسك ذراعه بدون شعور منها وكلها خوف على بخوت:علامها؟،،شحب وجهها وهي تضغط على ذراعه وبهمس،،لاتوجسه!!تكفى لاتوجس ماتت؟!!