ياسمح المحيا جر الهجنية

الجزء الرابع والخمسين

،،الـجـزء الـرابـع والـخـمـسـيـن،،

لااله الا الله وحده لاشريك له له الملك وله الحمد وهو على كل شي قدير
.
.
..بيت الجد نشمي..
ابو غازي جالس وهو يتقهوى بهدوء
ابو جواد ماسك الثلاجة وهو يقهوي اهله
الجد نشمي:والله ياان البيت مايسوى شعرة بليّا عذبة
الجدة منيرة:اَي بالله مير الله يستر عليها ويردها سالمة
ابو غازي طالع ابو جواد:ولد يامسفر
ابو جواد طالعه:ياهلا
ابو غازي:متى تبينا نتمم؟
ابو جواد:على ماتحب ياابو غازي متى تبي حنا جاهزين
الجد نشمي:اعجلوا اعجلوا بالجيزة ماغدت جيزة!!خلوها الاسبوع الجاي
ابو جواد انصدم ماتوقع بهالسرعة:يبه
ابو غازي قاطع ابو جواد:يبه الاسبوع الجاي مايصلح بنطلع الديرة وأبيك تروح معنا
الجدة منيرة ابتسمت
الجد نشمي قطب جبينه:وشو له؟!!
ابو غازي:جسّار ناوين يكمل دينه ورايحين نخطب له
الجد نشمي بابتسامة:ماشاء الله ماشاء الله الله يوفقه
الجدة منيرة:اسأله من بنته؟
الجد نشمي:صحيح من بنته؟
ابو غازي:بنت متعب
الجد نشمي بابتسامة:ماشاء الله ماشاء الله الله يوفقه ويسعده يازين ماتخيّر الله يوفقه
ابو غازي تنهد:اَي والله هو اللي تخير محدن تخيّر عنه
الجدة منيرة قطبت جبينها
ابو غازي:تخيّر إعزبة(مطلقة)وعليها بنت
الجد نشمي اتسعت عيونه:وشو!!
الجدة منيرة زفرت وهي تمسك لسانها عنهم
ابو غازي:مثل ماسمعت يبه
الجد نشمي بوسع عيونه:صاحي هو!!،،بعصبية،،ولد شباب ياخذ اعزبة!!اي وحدتن بهم هي الكبيرة ولا الصغيّرة؟
ابو غازي زفر:الكبيرة
الجد نشمي:اجل ماهي بمشكلة ياخذ اختها
ابو غازي:يبه جسّار خطبها وحنا رايحين نتمم الأمور
الجد نشمي بعصبيته:ماهو بعلى هواه يخطب الصغيرة وش هالهروج اللي مابها سنع
ابو غازي بغيظ:يبه جسّار خطب الكبيرة وعطاه بادي لاغديت يمه وش تبيني اوجس نريد اختها مانريدها!!
الجد نشمي بورطة:يغتاظون(يزعلون)ثمن يعودون
ابو غازي بنرفزة:يبه جسّار اختار البنت وخلصنا بياخذها هي دامهم عطوه والله يوفقه
الجد نشمي بعصبية:ابو حصة!!
الجدة منيرة تدخلت وهي تشوف الموضوع يقلب لمشكلة:البنت مايعيبها شي علامك معيي عنهم وثمن يازين مااختار وحدتن تنسل(نسل)مابها علّة
الجد نشمي:مير انها
الجدة منيرة:كبّ العلوم عنك وعادل يوجس انه هو تخيرها!!
الجد نشمي سكت وهو مو عاجبه الوضع
ابو غازي وقف:لاخلصنا من سالفة جسّار هالاسبوع نشوف سالفة جواد ورهايف فمان الله
.
.........****..........
أم جـلاجـل
.
بتال يمشي متجه لبيتهم وهو مكشر بوجهه
يوسف جنبه وبعد لحظات تردد:انت وش تشتغل؟
بتال برسمية:مسعف
يوسف:ماشاء الله!!انا 26سنة وانت؟
بتال وقف وهو يلتفت له ورافع حاجبه:تشتغل خطابة؟
يوسف انصدم:نعم!!
بتال:يعني شغلي والحين عمري اخاف بعد شوي تسألني عن حالتي الاجتماعية!!
يوسف يطالعه بصدمة من كلامه
بتال زفر ومشى وتركه وراه وهو يشوفه ساكت
يوسف اسرع يلحقه وهالمرة ترك مسافة بينهم وهو يمشي وراه
بتال ابتسم وهو يطالعهم قباله عند السيارة واسرع بخطواته لهم
سعود واقف قباله:المعذرة خابرن اني مغبّشن يمك(جاي بدري)
جسّار قبال سعود:وش هالكلام ياسعود حنا اهل الحين وش تقول الله يصلحك بس
سعود تغير وجهه وهو يسمع كلامه:الصحيح اني رايدك بعلمن يخصك
جسّار باستغراب:سم امر ياسعود
سعود باحراج:وش رايك نتواجه الليلة بالبر وأعلمك العلم كل ابوه
بتال وقف عندهم وهو يسمع كلام سعود:ابوك يالجحدة!!
سعود تغير وجهه للحظة ثم ابتسم باحراج
بتال:بتكشتون لحالكم مايصير!!،،سحب جسّار جنبه،،انت اذا تبي تطلع مع واحد يجونك الباقين مجانا ماتاخذ قطعة لحالها لازم العلبة كاملة
سعود بابتسامة:وانا احرز(اقدر)اخذ واحد واكب الباقين!!
يوسف وراهم:يصير اكشت معكم؟
.
..بيت الشلة..
،،غرفة راشد،،
عذبة واقفة قباله وبنرفزة:لا ماتروح
راشد زفر:يمه انتي تدرين اني جاي للديرة عشان اخلص هالموضوع ولهالسبب اخذت اجازة من دوامي مايصير أتأخر وبعدين اتورط!!
عذبة بعصبية:خذ معك بتال ماتروح لهالمدرسة لحالك،،سكتت للحظة،،وليش يروح بتال انا اروح معك
راشد باس راسها:ياام راشد وشو له كل هالخوف والله اروح للمدرسة سيدة وارجع ماألف لايمين ولايسار
عذبة هزت راسها بلا:ماتروح لحالك يعني ماتروح ورجلي فوق رجلك
راشد تنهد وهو يشوف اصرارها:طيب عندي حل يازينه وش رايك مااروح للمدرسة وتروحين معي وناخذ البنات ونكشت على غدا؟
.
.........****..........
..بيت عادل..
،،غرفة فيصل،،
فيصل قال السالفة كلها من البداية للنهاية من تسلف(دين)الفلوس من ابو يزيد والعربات وتأجيرها وتخبي ورا امجاد اللي هو اطول منها بشوي من خوفه منه وهو ينتظر الكارثة اللي بتصير له
غازي بثوب باللون الابيض وفوقه جاكيته العسكري واقف ومتكتف قباله زفر وهو يريح نفسه ويرخي اعصابه بعد ماكانت محتدة نظراته وهو يطالعه:اخص ياولد والله وطلعت تاجر!!
فيصل بصدمته:هاه!!
امجاد اتسعت عيونها بصدمة من رده
رهايف تطالعه مو مصدقته ثم طالعت فيصل:بسرعة قول اللي عندك كله شكله ينتظر الصدمة الكبرى
غازي طالع فيصل:حتى لو اللي سويته زين هو غلط تدري؟
فيصل زفر بخفة:ادري
غازي:دام عندك هالمخ وراعي استثمارات تعال وقولي قول لأي احد فينا ماهو تسوي شي غلط وتندم عليه
فيصل:اذا قلت لكم يابتجلدوني او ابوي بيمنعني من هالشي
غازي:السلف اللي عليك بكرة انا باسدده لابو يزيد
فيصل:بس
غازي:بلا بس بلا هم انا ماقلت بأخذ عربياتك قلت باسدد دينك وانت رجعه متى ماقدرت اهم شي اللي تأجر هم امورهم بالسليم ووثق كل شي حتى ماتتورط بشي بعدين
امجاد ابتسمت وهي تطالع تصرفه الهادي عكس توقعها انه بينفجر عليه
فيصل امتلى صدره حب واحترام كبير لأخوه فوق حبه واحترامه بعد هالموقف معه همس:ان شاء الله
رهايف بفرحة وسط ابتسامتها:غازي!!
غازي:بعد شوي تروح معي أشوفها وترجع البيت مالك شغل بشي فهمت
فيصل:مابيرضون يمشون وانا وعدتهم انزل سعر الإيجار لهم
غازي:انت مالك شغل بشي الى مااناديك وأقول تفضل هذا عربياتك سمعت؟
فيصل هز راْسه بايه:طيب
غازي تنهد:اهم شي ابوي لايدري بالموضوع وهاليزيد اقطعه ماابي اشوفك معه فهمت
فيصل:طيب طيب
غازي بتهديد:مو تقول طيب وتمشي من وراي معه
فيصل:لا والله توبة توبة عرفت وجهه خلاص ماعاد امشي معه
غازي تنهد وهو يحس بتعب من طريقه وزاد اكثر بعد هالمشكلة:يالله باطلع ابدل وانزل القاك عند السيارة تنتظرني فهمت
فيصل براحة:طيب،،اشر على انفه بطرق اصبعه،،على هالخشم
غازي مر من جنب امجاد وفيصل خارج من الغرفة
فيصل:غازي
غازي وقف وهو يلتفت:وش فيه؟
فيصل وقف قباله وهو يسلم على راسه:مشكور مشكور ياغازي
غازي دفه بشويش
فيصل رجع بخطواته لورا
غازي:وش مشكور!!لااحد يسمعك بس تراك اخوي ان ماساعدتك اساعد مين!!،،مشى،،
رهايف وهي تضم يديها:ياحظك ياعذاري بهالاقشر قاسي قاسي هالاخ
امجاد:كلهم قشران واولهم ابوك الحقيني بس امي لحالها بالمطبخ،،مشت،،
رهايف مشت وراها:ياربي متى ارتاح من هالكرف
امجاد بضحكة:ماابي اقول ببيت زوجك لاني اشوفك مكروفة من الحين
رهايف كشرت:تمسخري على كيفك تمسخري انا اللي جبته لنفسي،،رن جوالها وطالعت الاسم،،استغفر الله ليش جبتي سيرته
امجاد وهي تنزل الدرج:وش دخلني انا!!
رهايف وقفت وهي تتنحنح وبهدوء وهي ترفع الجوال لاذنها وترد:الووو
امجاد وقفت والتفتت تطالعها بصدمة من الصوت اللي تغير
جواد طالع الاسم يتأكد:السلام عليكم
رهايف بهدوء:وعليكم السلام
جواد:صباح الخير رهايف
رهايف استحت وهي تسمع اسمها همست:صباح النور
امجاد هزت راسها يمين ويسار وهي تلف بوجهها عنها وتنزل الدرج بسرعة ماتبي انصدم اكثر
جواد:الصراحة كنت ناوي ارسل رسالة بس قلت اكلمك احسن
رهايف باستغراب طلع معه صوتها الحقيقي:ليش وش فيه وش صاير لايكون تبيني اسوي لك غدا انت قلت هالاسبوع مافيه!!
جواد ضحك:ايه كذا ماعرفتك قبل شوي شكيت اني داق على وحدة بالغلط
رهايف كشرت وبنرفزة:نعم وش تبي؟
جواد:ابي اقول خلاص مهمتك انتهت
رهايف عقدت حواجبها:وش؟
جواد:اقصد أكلي واغراضي
رهايف بدون ماتنتبه:اصلا فيك وبدونك فيني الاكل والغسيل
جواد:يعني بتستمرين بهالشغل!!
رهايف اتسعت عيونها وهي تنتبه وتنحنحت وبهدوء:اصلا انا مااحط يدي بشي نهائيا بس من صرت اجهز اكلك امي تطلبني اكمل باقي السفرة للأهل
جواد يكتم ضحكته:يعني سويت خير بعمتي سنعتك وانتي من اول جبتي لها المرض اكيد!!
رهايف بنرفزة:هيه انت!!تراني سنعة من قبل لاتطلب حضرتك!!كل شي اسويه الحمدلله مريحة امي وش شايفني!!
جواد:اجل خلاص كملي شغلك جيبي الفطور استناك
رهايف بعصبية:مو انت تقول خلاص انتهت مهمتي!!وش فيك تغير كلامك كل شوي!!
جواد:مو انتي تقولين اني سنعتك!!اخاف تحسين بطعم الراحة وتصيرين كسلانة!!
رهايف:الكسل للرخوم خل عني بس
جواد اتسعت عيونه وسط ابتسامته:ياشيخة عاللي تنطق درر ماعرفتك والله!!
رهايف كشرت بوجهها:من يومي حكيمة والكل يشهد لي!!
جواد كتم ضحكته:طيب يالحكيمة امر اخذ فطوري؟
رهايف:والله يازوج الحكيمة
جواد ابتسم من كلمتها:هلا ياحكيمتي قولي
رهايف ارتبكت:انت قلت انتهت مهمتك خلاص يعني انتهت وبعدين،،بهدوء،،انا تعبت الصراحة حتى يـديـنـي تعبت مررررة
جواد:والله ماكنت ادري ان سندويشة الجبن اللي بدون نفس توصلني كل يوم تتعب!!
رهايف عصبت منه:اقولك انت خلاص ترا قلت لي مهمتي انتهت وبكيفك وانا وراي شغل مع السلامة،،قفلت بوجهه،،والله عاد ماصارت!!،،مشت للمطبخ،،
.
.........****..........
ام جـلاجـل
.
..بالسيارة..
راشد يسوق
عذبة جنبه وبحضنها حلايا
بخوت جالسة ورا عذبة بهدوء
عباير جالسة ورا راشد طفشت من هدوء السيارة:راشد
راشد بابتسامة:هـلا
عباير:وين غادين بنا؟
راشد ابتسم
عذبة:يم ديرتن اخبرها مير عسى ماتغيرت
عباير:بعيدة ياعمة؟
عذبة:لا لا قريّبة قربنا قربنا
بخوت تطالعها بحدة
حلايا التفتت ورا تطالع :بعاير عني يابعاير عني عني
عباير اللي حاسبة حسابها انحنت وسحبت جركل(حك جالون)الموية الفاضي من عند رجولها وهي تعتدل بجسمها وبتحطيم على رجولها وسط ابتسامتها
بخوت سحبته منها بسرعة قبل تحطه على رجولها وهي تطالعها بحدة:مانريد صجّة!!(ازعاج)
عباير كشرت بوجهها
عذبة ابتسمت:دقي ياعباير وردي وراي
راشد اتسعت عيونه:اووووه حركات ياعذبة!!
عباير سحبت الجركل من بخوت وهي تبتسم وحطته على رجولها:على امرش
عذبة:الدق بالهون
عباير بحماس:ابشري ياام راشد
عذبة غنت وهي تصفق:
عـسـى الله يـجـمـلـنـا مـع أصـحـابـنـا الـغـالـيـن..
عباير ردت وسط صوت تصفيق حلايا:عـسـى الله،،سكتت بوسط اتساع عيونها وهي تسمعه،،
راشد بوسط ابتسامته رد مع عباير:
عـسـى الله يـجـمـلـنـا مـع أصـحـابـنـا الـغـالـيـن..
عذبة اتسعت ابتسامتها وهي تلتفت لراشد:
وعـسـى مـن هـقـى فـيـنـا نـجـي فـوق هـقـواتـه..
عباير وراشد ردوا وراها:
وعـسـى مـن هـقـى فـيـنـا نـجـي فـوق هـقـواتـه..
بخوت ابتسمت وهي تطالع وناستهم واكتفت تصفق
عذبة كملت تغني وسط ردهم وراها:
عـسـى عـلـومـنـا بـالـطـيـب تـذكـر مـع الـوافـيـن..
وعـسـى الله يـرزقـنـا بـعـفـوه وجـنـاتـه..
.‏
،،الجد بادي واللي معه بعد ماانتهوا من امور الحلال وتأكد الجد ان مافيه اَي اثر لجلد الذيب هالمرة طلعوا للبر واختاروا مكان زين ووقفوا ونزلوا فيه،،
بتال مشى عنهم بعيد شوي يجمع حطب ووراه يوسف وكل كامد يده لغصن سبقه يوسف وأخذه بالنهاية رجع طريقه وهو يشوف الحطب اللي مع يوسف يكفي
يوسف يمشي وراه
الجد بادي جالس بظل الشجرة وعينه عليهم وهم متجهين لهم ركز على بتال وزفر بضيقة
نشمي بعيد عن الظل بشي بسيط معطي ابوه ظهره وقباله النار عند الدلة يجهزها التفت لابوه يطالعه:وين غدا البال ياابو نشمي؟
الجد بادي طالعه وبابتسامة:غدا يم بالن ماتريح اول ولاهو بمتريحن تالي
نشمي ابتسم:اللي فات مات وحنا اهل اليوم
الجد بادي هز راْسه:صحيح صحيح يانشمي
بتال وقف عند نشمي وهو يمسكه من يده يقومه:خلاص الحين دوري
يوسف نزل الحطب
نشمي رفع راْسه يطالعه وهو جالس:ياولد
بتال قاطعه وهو يسحبه اكثر:مافيه ياولد قم قم جنب جدي قم
نشمي تنهد وهو يوقف ويضرب يديه ببعض ينفضها والتفت لابوه:اخبر البال لاجرّيت يتريح
بتال جلس يعدل النار والدلة على كيفه
يوسف جلس عنده
الجد بادي ابتسم:ايه هذاك يوم البال زين
نشمي:والحمدلله للحين زين مير انت جرها
الجد بادي بابتسامة:به من يجرها أزين مني
نشمي وهو يلتفت وراه يطالع بتال وبابتسامته:صحيح!!!
بتال كل مامد يده لشي خطفه يوسف قبل يوصله ومده له ولاانتبه لنشمي واللي يقوله
نشمي باستغراب:بتال!!
بتال التفت وهو يزفر بوسط تكشيرة على وجهه
الجد بادي طالعه باستغراب من تضايقه الواضح من يوسف
بتال ابتسم وهو يحس بنفسه:ياهلا
نشمي:ابوي يوجس ان به احدن يجر الهجينية ازين منه
بتال رفع يديه لفوق:اعوذ بالله محدن يجرها ازين من جدي اعفوني هالمرة،،لف وهو يمد يده للهيل،،
يوسف خطفه ورفعه له
بتال سحبه من يوسف بقوة وهو يعض على لسانه داخل فمه يكتم غيظه
الجد بادي ابتسم وهو يجرها:
قـمـت أتـذكـر زمـان فـات..
يـوم الـبـدواة لـهـا فـنّـه..
يـوم الـرعـيّـة بـهـا الـخـفـرات..
وضـعـايـن الـبـدو يـتـلـنّـه..
والـجـو يـردّنـه الـزرفـات..
مـن حـامـي الـقـيـض يردنّـه..
تـكـثـر قـطـيـنـة مـن الابـيـات..
<استمتعوا بالصوت>
بتال مد يده للتمرة وبيوصلها
يوسف سحبها قبله ومدها له وع وجهه ابتسامة
بتال اخذها وهو يستغفر بينه وبين نفسه مد يده بيرفع الدلة من على المركب
يوسف مد يده بسرعة يبي يسبقه الفناجيل
بتال مامسك الدلة زين
يوسف ضربت يده بيد بتال بدون قصد
بتال انكبت على طرف يده اليسار القهوة والباقي منها طفى النار
يوسف اتسعت عيونه:بسم الله
الجد بادي وقف هجينيته وهو يطالعهم
نشمي وقف بمكانه:طاح الشر طاح الشر مامن خلاف
بتال فز واقف وهو ينفض يده من الحرارة وثم حضنها بيده الثانية بين ركبه وهو ينحني يكتم ألمه
يوسف وقف معه وهو ينحني ومد يده لذراع بتال وهو يسحبها يبي يشوف اصابته
بتال اعتدل بوقفته وهو يدف يوسف عنه وبصراخ:ياأخي فارقني فااااارق ماتحس!!ماتفهم!!اشغلتني الله يشغلك بنفسك فارقني!!
الجد بادي اتسعت عيونه وهو يطالع بتال وصرخ بحدة وهو يوقف:بتااااال!!
.
.........****..........
..بيت عادل..
،،جناح غازي،،
غازي وقف عالباب وبيده شنطته الصغيرة وسط تكشيرة من تفكيره بحل لموضوع فيصل اللي استقبله اول مارجع حتى وارتاح للحين واختفت التكبيرة بلحظة وارتسمت مكانها ابتسامة على وجهه بعد ماوصلته ريحة البخور دخل مفتاحه وفتح الباب بهدوء وهو يسمي:بسم الله الرحمن الرحيم،،اتسعت ابتسامته وهو يطالعها،،
عذاري واقفة قباله بابتسامة بفستان موف هادي كاشف عن أكتافها سبعة من عالصدر والظهر بعد ماسك ع جسمها للخصر وطايح من بعده ولنص ساقها بشعرها المفرود لتحت أكتافها بمكياج خفيف مجرد كحل ومسكرة وقلوس
غازي تنهد براحة وسط ابتسامته وعينه عليها يحس روحه رجعت بعد الغيبة الطويلة بالحد:السلام عليكم
عذاري اسرعت بخطواتها له وهي تفتح يديها له
غازي تقدم خطوة لداخل الجناح
عذاري ارتمت بحضنه وهي تحاوطه بيديها وبرجفة صوتها:الحمدلله على سلامتك ياروحي
غازي بمشاعر حب ملت صدره من زودها يحس بقلبه بيخرج من مكانه:اشتقت لك ياعذرة القلب
عذاري رفعت راسها له تطالعه وهي بين يديه:طولت الغيبة هالمرة ياغازي طولتها كثير
غازي:ياروح غازي ماهو بالكيف
عذاري دفنت راسها بحضنه:بعدين بعدين نتفاهم الحين اتركني اشبع منك
غازي ابتسم:طيب اقفل الباب لاحد يجي وهالبيت يحبون الستر الله يحفظهم
عذاري ضمته اكثر:خل يشوفون بكيفهم
غازي زفر ورمى شنطته لداخل الجناح وحاوطها بيده اليسار وهو يرفعها ويشد عليها ومشى لداخل الجناح وهو يرد الباب بيده اليمين وراه بقوة وتقفل الباب وضمها بيديه:يازين البيت زيناه يازينه
عذاري قطبت جبينها وهي إتكي بطرف فكها ع نهاية صدره وبزعلها:البيت بس!!!
غازي:لا مو البيت لحاله
عذاري ابتسمت وهي تطالعه
غازي:اكثر شي اشتقت له السرير
عذاري تركته ودفته عنها
غازي ضحك وهو محاوطها بالقوة:فيه فيه شي ثاني اشتقت له صدق صدق
عذاري وقفت حركة وهي تطالعه وبزعل:وش؟
غازي:اشتقت لدفى الغرفة
عذاري دفته بقوة عنها
غازي ضحك وهو يبعد عنها من دفتها
عذاري بزعلها:هيا روح خل السرير ودفى الغرفة ينفعونك،،عطته ظهرها،،
غازي لحقها وضمها له ولاصق جسمه ظهرها وهو يحاوط خصرها بين يديه ويتكي بطرف دقنه ع كتفها الأيسر وبهمس:اشتقت لك والله اشتقت لك ماسمعتيها!!
عذاري ضربته ع يديه بشويش:والسرير والدفى!!
غازي:ايه اشتقت لهم صدق
عذاري التفتت له وسط تكشيرة وهي تلمحه عن طرف
غازي:اشتقت للسرير ودفى الغرفة وانتي بين يديني
عذاري ابتسمت وهي تسمع رده ومسحت ع يديه بيديها:طيب ليش تخليني اظلمك دايم تعطيني مجال لظلمك وتطلع انت المسكين ليش
غازي:اموت على الوجه البريء اللي يجيني يعتذر احب اشوفك وانتي ترجعين لي زعلانة منك ومني
عذاري وهي مستمرة تمسح ع يدينه:ليش كذا ليش!!والله انك شرير
غازي:والله يديني نظيفة مايحتاج تنظفينها اكثر
عذاري تفك يديه عنها
غازي وهو يثبتها وسط ابتسامته:خلاص خلاص امزح معك خلااصص
عذاري فكت يديه والتفتت تطالعه وبزعل:هذا انت لازم تستعبط علي
غازي مسكها من أكتافها وسحبها له وهو يطبع بوسة ع جبينها وطالعها
عذاري مكشرة بزعلها
غازي بابتسامته:اموت عليك وقت تعصبين وش اسوي
عذاري ميلت فمها وهي تزفر
غازي:يالحب
عذاري:نعم
غازي:جهزي ملابسي بأتروش وطالع وراي مشوار
عذاري اتسعت عيونها:مسرع!!الحين وين؟
غازي:ماني مطول ابد
عذاري كتمت بقلبها اللي تبي تقوله وهي تطالعه بتكشيرة
غازي باس راْسها:ادري اني توي واصل وهذا بدايتها لكن وش اسوي هالمشوار بالذات مهم وبالحيل
.
،،الصالة،،
ام غازي:رهايف
رهايف قاعدة تآكل وعينها بكتبها وبداخله جوالها تتصفح:همممم
ام غازي:طالعيني وانا أكلمك!!
فيصل زفر ورفع صوته:رهااايف
رهايف رفعت عينها لامها:نعم
ام غازي:روحي لجدتك تبيك
رهايف كشرت:ماابي اروح
ام غازي طالعتها مستغربة:وليش ان شاء الله!!
ابو غازي دخل
رهايف وهي تخرج جوالها من الكتاب وتقفله:ماابي اروح وخلاص
ابو غازي باستغراب:وش مسوية!!
رهايف وقفت وهي تلف تطالعه:هـلا يبه
ابو غازي:ودي علي ليش ماتبين تروحين لجدتك!!
رهايف بوسع عيونها:مين قاله!!
فيصل كتم ضحكته
ابو غازي:انتي!!
رهايف:اعوذ بالله يبه!!حاشى لله ماقلته ابد
ابو غازي زفر وهو يتركها ويجلس جنب ام غازي:روحي لجدتك وخلي عنك هالحركات
رهايف وهي تجلس جنبه:لازم اروح هاذي الغالية ام الغالي
ابو غازي طالعها بتكشيرة:وليش جالسة!!
رهايف كشرت
فيصل ضحك
رهايف:يرضيك يبه سكبت ماء وجهي!!
ابو غازي:روحي بس لاينسكب فوق ظهرك شين ثاني!!
رهايف وقفت:ابشر ياابو غازي ابشر،،مشت،،
فيصل يفطر وهو كاتم ضحكته
ابو غازي طالعه:وانت؟
فيصل طالعه:سم يبه
ابو غازي:وين الاستعداد اللي اعرفه لاصار هالاسبوع مااشوف اخوانك مقطعين ارواحهم بالمذاكرة وانت مغير تسرح وتمرح على كيفك!!
فيصل:ابشر يبه ابشر بعد الفطور اقطع الكتاب تقطيع
ابو غازي كشر بوجهه:تسوقها علي انت!!
فيصل:اقصد بالمذاكرة يبه
ابو غازي:قم وشو له تفطر يكفيك اللي أكلته قم
فيصل وقف:ابشر يبه
ام غازي اتسعت عيونها وطالعت ابو غازي:وش فيك!!خله ياكل حرام عليك!!حتى باللقمة واقف له!!،،طالعت فيصل،،اجلس كل
فيصل طالعهم محتار
غازي وقف عندهم وبابتسامة وهو يحس اخيرا انه بالبيت:السلام عليكم
ابو غازي اتسعت ابتسامته وهو بيوقف:هـلا ياهلا
غازي اسرع له وهو يحط يده ع كتف ابوه يجلسه:والله ماتقوم
ابو غازي جلس:حيالله غازي ياحيّه
غازي سلم على راس ابوه ويده وهو منحني شبه جالس:وشلونك يبه عشاك بخير
ام غازي اشرت لفيصل يجلس دام ابوه انشغل عنه
فيصل جلس وهو ياكل بسرعة
ابو غازي:متى جيت!!وشو له مادرينا!!
غازي:احسن يبه مفاجاة وعشان لاتنتظرون واتاخر عليكم
ابو غازي:الحمدلله على سلامتك
غازي:الله يسلمك ويطول بعمرك لنا
ابو غازي:اجلس علامك!!
غازي:بروح اسلم على جداني وبعدها طالع مشوار
ابو غازي:لاحق عالمشواير ارتاح
غازي:ضروري يبه وبعدين ماني مطول وفيصل ابيه معي
فيصل وقفت اللقمة بحلقه وبلعها وهو يحاول يكون طبيعي
ابو غازي ميل فمه وهو يلتفت يطالع فيصل بشك
غازي ضحك:يبه وش فيك!!
ابو غازي بشك:وش مسوي فصيل؟
فيصل بفجعة:ماسويت شي
غازي:يبه ابيه يساعدني لاتظلم المسكين
ابو غازي مثبت عينه على فيصل بشكه
فيصل توتر وبدا يخاف وعينه عالفطور مارفعها لابوه
غازي وقف:الحقني يافيصل
فيصل فز واقف:ابشر،،مشى،،انتظرك عند السيارة،،اسرع بخطواته مبتعد،،
ابو غازي يطالعه بشك
غازي وعينه على امه:تبون شي توصون على شي؟؟
ام غازي:سلامتك ياعيني سلامتك
غازي طالع ابوه:يبه؟
ابو غازي:سلامتك سلامتك
غازي مشى
ام غازي طالعته:وش فيك عالمسكين اخوه يبيه ليش دايم ظالمهم
ابو غازي زفر وهو يمد يده عالفطور:عيني ماتخطي
ام غازي بنرفزة:اقفلهن وارتاح!!
ابو غازي كشر بوجهه وهو يلتفت لها:غادين افطر معش لاتسدين نفسي
ام غازي صدت بوجهها عنه وبنرفزتها:عافية عافية
.
رهايف خرجت من بيتهم وهي كارهة تقابل جدتها بعد اللي صار مو كره لجدتها كره للموقف اللي انحطت فيه ولاتدري وشلون تتصرف معها
جواد خارج من بينهم وشافها وهي تمشي قدامه وعرفها رفع صوته:رهااايف
رهايف قشعر جسمها وهي تسمع الصوت اللي عرفته لفت وهي ترجع طريقها جري
جواد اتسعت عيونه وهو يشوفها تجري وجرى لها بصدمة من تصرفها:بنت!!لحظة!!وش فيك!!
فيصل فتح الباب لغازي اللي وراه
غازي خرج من البيت وانصدم وهو يشوف رهايف متجهة للبيت جري ولّا انتبه لجواد وبصوت عالي من صدمته:وش فيك!!
جواد هدا بخطواته وهو يشوف غازي معها ووقف بحيرة للحظة بانه يتجه لهم او يروح لكن اتجه لهم وهو يطرد هالحيرك
رهايف وقفت عنده وبوسط انفاسها:ججواد
غازي التفت وهو يطالع جواد بحدة ورجع رهايف وراه:يعني ماأدبه السجن هالجواد!!
فيصل بكره ونظرات محتدة وعينه على جواد:وش سوا لك؟!!
رهايف باستغراب وسط انفاسها:ماسوا لي شي!!
فيصل:نعم!!
غازي بحدة:ووشو له جاية تجرين ميتين لو فيه ساهر صورك!!
رهايف:شكلي مو مرتب وشلون تبيني اقابله!!
غازي يطالعه مصدوم من ردها
رهايف:وبعدين ابوي ماسمح لي أقابله حتى لو بيت جدي وشلون أصرفه مااعرف،،دخلت وهي تشوفه وصل عندهم تقريبا،،
غازي يطالعها وهي تدخل منجلط منها ووده يذبحها زفر وهو يسمعه والتفت له
جواد وقف عندهم وبابتسامة وهو يمد يده:السلام عليكم
فيصل يطالعه بتكشيرة
غازي مد يده يصافحه:وعليكم السلام والرحمة،،انصدم ووضح على وجهه وجواد يسلم عليه ومااكتفى بالمصافحة كالعادة،،
جواد سلم على فيصل
فيصل يطالعه باستغراب وهو مو مصدق للحين هالمودة الغريبة منه
جواد وهو يطالعهم:كيف حالكم شباب عساكم بخير
،،ردوا عليه بهدوء وسط استغرابهم،،
جواد وعينه على غازي:الحمدلله على سلامتك نورت المكان
غازي:الله يسلمك منور باهله
جواد:اسمع ياغازي فيه شي ودي اقوله لك ولفيصل ولو جسّار وبتّال موجودين قلته لكن مصيرنا نقابلهم على خير
غازي باستغرابه:أسلم؟!!
جواد:الواحد لا عرف غلطته يعترف بغلطه
غازي ارتفعت حواجبه
جواد:وانا ادري اني غلطت بحقكم وكثير و
غازي قاطعه بسرعة:عفى الله عما سلف
فيصل طالع غازي مصدوم
جواد:بس
غازي قاطعه:اللي فات مات وحنا عيال اليوم
فيصل يطالع غازي بغبنة نفسه يسمع اعتذار يشفي غليله شوي
غازي:كانت فترة شينة علينا كلنا ومرت والحمدلله
جواد تغير وجهه منحرج بكل ماتعنيه الكلمة من كلام غازي وتصرفه اللي كبّر غازي بعينه كثير كثير
غازي:وبعدين اللي تبي تقوله وصل وحتى لجسّار وبتّال وصل
جواد همس بغصة بلعها:بس
غازي:وش فيكم تبسبسون لي اليوم كلكم!!
جواد طالعه مو فاهم
غازي زفر:وراك شي؟
فيصل اتسعت عيونه:غازي!!
جواد باستغراب منهم:لااا
غازي قرب منه:تكتم السر؟
جواد باستغراب:ابشر
فيصل:غازي!!
غازي:الحقوني انتم الاثنين
.
.........****..........
أم جـلاجـل
.
بتال اعتدل بوقفته وهو يدف يوسف عنه وبصراخ:ياأخي فارقني فااااارق ماتحس!!ماتفهم!!اشغلتني الله يشغلك بنفسك فارقني!!
الجد بادي اتسعت عيونه وهو يطالع بتال وصرخ بحدة وهو يوقف:بتااااال!!
يوسف اكتسى وجهه اللون الأحمر باحراج وضيق من اللي صار بسببه وهو يبعد بخطواته عن بتّال
نشمي تنهد بضيق وهو عارف نوايا يوسف الزينة رغم حركاته اللي تغث اللي حوله دايم
بتال التفت يطالع جده وسط تكشيرته وبعصبية؛نعم!!
الجد بادي اتسعت عيونه وهو يسمع النبرة وبحدة:اعقب وانا ولد ابوي!!
بتال زفر وهو يصد بوجهه عنهم وبهمس:استغفر الله العظيم
الجد بادي بعصبية:علامك عطيتنا قفاك هاه!!
بتال التفت بسرعة:السموحة ياجد ماقصدت
الجد بادي بعصبيته:اوص لاتوجس شين ابد اوص!!ياخسارة التعب ياخسارة!!يوك عليك ياعادل يوك!!حتى لو انك ربيت الدم مايغدي ما ابدن ابدن!!
بتال قطب جبينه باستغراب من اللي يسمعه
يوسف اتسعت عيونه بصدمة وهو يطالع الجد بادي
نشمي انقلب وجهه:يبه!!
الجد بادي انتبه للي يقوله وبعصبيته:استغفر الله بس استغفر الله
بتال كشر بوجهه وهو يطالع خاله وجده
الجد بادي وهو يأشر بعكازه على يوسف وعينه على بتال:انا خابرن انه بلوتن صقعا وابلشك مير انه الضعيف مستانس انه بالبر ماعليه ملامة ماعمره كشت وشو له تخنفر عليه
بتال بتكشيرته:وش فيه دمي ياجد؟
نشمي تغير وجهه
الجد بادي انقلب وجهه للحظة من السؤال واحتدت ملامحه وهو يطالعه
بتال بحدة:قولي ياجد وش اللي ماتبوني اعرفه عن فاهد؟وش اللي مسويه فاهد ومخليكم تتنافضون بمكانكم ماتبوني اعرفه وشو،،صرخ،،وشووووو!!!!
.
،،عذبة وعباير يجهزون غداهم اللي عبارة عن كبسة لحم،،
،،حلايا تحفر قدامهم بمسافة،،
،،راشد وبخوت يجمعون حطب زيادة للنار احتياط،،
بخوت واقفة عند الشجرة وهي تطالعه:انزل يسد ماكسرت،،
راشد جالس على غصن الشجرة يكسر ويرمي عالارض عندها طالع الحطب:لا مايكفي هاذي كبسة لحم يبي لها واجد
بخوت سكتت شوي وهي تطالعه وسط ترددها واستجمعت شجاعتها:راشد
راشد وهو مستمر ماطالعها:ياهلا
بخوت:جسّار
راشد التفت له غصب يطالعها
بخوت انحرجت وهي تنزل راسها وسكتت
راشد نزل ووقف عندها:اسألي يابخوت ولاتستحين وانا اخوك هذا حقك وش اللي تبين تعرفينه ابشري وانا حاضر
بخوت رفعت عينها تطالعه وبوسط رجفة تخفيها:وش هو من علم؟
راشد:سؤالك صعب وبالحيل
بخوت قطبت جبينها
راشد:اخاف امدحه وتقولين ايه عشانه ولد خالك واخاف اذمه وأظلمه واظلمك معه
بخوت تطالعه ساكتة
راشد:اذا قلت بتسمعين لي؟
بخوت:سعود مدحه مير اني اريد واحدن من قريب
راشد تنهد:اسمعي يابخوت،،كشر بوجهه،،جسار غثيث وسامح ونشبة اللهم ياكافي
بخوت مكشرة بوجهها مثله من اللي يقوله
راشد ابتسم
بخوت رمشت بسرعة
راشد:لكن قلبه ابيض ويقطع من عمره ويعطيك لاصار يغليك يكره يشوف احد من اهله متضايق ويقعد يتسيمج فوق راْسه ويغثه الى ماينجلد منه وهو يضحك مايزعل وحتى وان زعل مايطول زعله بريال اقرب مطعم يراضيه والأهم من ذا كله يخاف ربه والصلاة،،زفر،،يصلي ماهو مايصلي لكن لازم تفوته ركعة من ثقل نومه
بخوت سكتت بتفكير
راشد:شي ثاني؟؟
بخوت برجفة صوتها:أنا ارعيت التهاويل ياراشد ارعيتها وبالحيل ومحدن يوجس انه يحصل بروحه هاللون
راشد طالعها
بخوت:وأذل(اخاف)وأموت من الذلة لااوحيت طاري الجيزة مااريد أذوق التهاويل من اول وتالي
راشد:يمكن يابخوت الله ارسل لك جسار حتى طول عمرك تضحكين عن التهاويل اللي شفتيها!!
بخوت اتسعت عيونها
راشد:يمكن هو اللي تكملين حياتك معه ويكرمك ويعوضك عن اللي راح
بخوت تطالعه ساكتة
راشد:وبعدين من قال الرجال مثل بعضهم!!اااه يمكن رجال هالديرة ايه لكن،،هز راْسه يمين ويسار،،حنا!!لا والف لااا
بخوت:مير
راشد قاطعها:عاد العلم عندك عرفتي الرجال،،يقلدها،،وش هو من علم والباقي اختيارك،،انحنى وهو يجمع الحطب،،
بخوت تطالعه بحيرة وتردد
راشد فز وهو يسمع صراخها
بخوت التفتت تطالع وراها لجهتهم وهي تسمع صراخها ثم ابتسمت وهي تطالعها
عباير فزت واقفة من عند النار وجرت بصرخة وحدة وهي تطالع كلب من بعيد متجه لهم
عذبة انفض قلبها من صرخة عباير ووقفت وبفجعة:بسم الله الرحمن الرحيم،،جور وراها،،يابنت وش فيك؟!!
حلايا انفجرت تضحك وهي تطالع عباير اللي ابتعدت عنهم
عباير بنفس الصرخة وسرعة جريها متجهة للسيارة
راشد رمى الحطب وجرى
بخوت بصوت عالي:اقف اقف
راشد وقف وهو يلتفت لها بفجعة:ابشوف وش فيها!!
بخوت:هاذي هي لا لمحت كلب كبها عنك
عباير دخلت السيارة وقفلت الأبواب عليها وهي تجلس بين المقاعد وتغطي اذانيها وسط دموعها المنسابة
.
الجد بادي بتكشيرته:ماعمل شي
بتال بحدة:لكن الأكيد ماعمل خير ابد
يوسف شد ع قبضته وهو يسمع كلامه
الجد بادي بتكشيرته:مابه شي غـيـر الصلاة عالنبي
بتال وهو يحاول يسيطر على نفسه ويحس برجفة صوته واضحة لهم رغم انه العكس مايرجف صوته ابد:وبالصلاة عالنبي وش مسوي فاهد ياجد؟
الجد بادي:لموا غرضانكم مامن كشتة،،مشى للسيارة،،
بتال اسرع بخطواته ووقف قباله:وش مسوي فاهد ياجد؟
الجد بادي يطالعه بتكشيرة
بتال بحدة:وإلا اقولك ماابي اعرف وش مسوي يكفيني ماعرفت ابي اعرف ليش ماسألت عني ليش قاطعتني ماهو انا وحيد بنتك!!ليش انا اللي جيتك وانت ماعمرك دورت علي!!
الجد بادي طالعه بغبنة:ووشلون تريدني اراعي وليد الرجل اللي تسبب بعييلي كل ابوهم!!
بتال قطب جبينه باستغراب من هالكلام الجديد
نشمي بنرفزة:يبه يكفيه مااوحاه منك يكفيه!!
الجد بادي مد عكازه لنشمي وعينه على بتال:راع هاللي يحامي عنك راعه
بتال طالع خاله لثواني ثم طالع جده:وش فيه خالي
الجد بادي:راح عمره كله بسبايب هالفاهد راااح
نشمي صرخ بغبنته:يبه!!!
الجد بادي بدون اهتمام لنشمي او بتال من حرقة قلبه على عياله:اخذ منه عذبة وجوزها متعب اللي متهني بأمان الله وحاس الدنيا كل ابوها
بتال يطالعه ساكت وهو يحس ببرودة سرت بأطرافه وبنفسه:باقي!!للحين باقي!!
الجد بادي بغبنته:نشمي وغدا يم ديار الغُرب ولاعوّد ومتعب واخذ عذبة وزاهية وانهد بييتها وكلن يخبر زاهية وقليبها اللي يغدي فدا دون متعب وانقلب الغلا لنارن يوم خبرت زاهية بعلم عذبة وعملت العملة الشينة بها
بتال انخطف وجهه وهو يفهم اخيرا سالفة حرق عمته
الجد بادي:وغدا متعب بين نارين يكب سعود وخيّاته ولا يكب عذبة ووليدها وبدّا(اختار)سعود وخياته على عذبة ووليدها وظل طول عمره وهو معتل قليبه من ظليمته الى منه مات وزاهية ماتت وراه من الغبنة اللي توحيها ماملت عينه ابدن حتى وهي تحوفه حوف
يوسف نزل راْسه بخجل منهم وهو يشوف فعايل ابوه فيهم
بتال بلع ريقه وشد ع قبضته يخفي هالرجفة اللي سرت بجسمه وهو اخيرا يعرف حجم الكارثة مو بس ابوه وامه الوضع اكبر فيه ناس اكثر ومصايب اكثر
الجد بادي بغبنة:وعقب عملته الشينة بجميلة هج الله لايرده واللي ماعود لذالحين الوكاد انه مات وكوده مات الله لايغفر له جعل ذنب عييلي نارن بقبره
يوسف قشعر جسمه من الدعوة وانقلب وجهه وهو يشوف كمية الحقد بعيون بادي لابوه كيف لو عرف انه ولده
نشمي بفجعة من الدعوة:استغفر الله العظيم!!يبه!!
الجد بادي:ليته ظلى(بقى)على غزته للشبريّة بجوف جميلة(يقصد طعن فاهد لجميلة)
نشمي اتسعت عيونه بصدمة وصرخ:يبه!!!
الجد بادي التفت يطالعه بحدة:اوحيك هذاني دونك!!
بتال يحاول قد مايقدر يتصنع الهدوء عكس الانهيارات اللي تجتاح مشاعره من الداخل وهو يشوف شتات اهله من حوله والسبب ابوه وبكل هدوء:وش مسوي زيادة ياجد وش!!
يوسف عقد حواجبه وهو يطالعه باستغراب من هدوءه كيف ماتحركت فيه شعرة للحين بعد ماعرف عمق المشكلة كلها!!
بتال بصوت اهتز للحظة:ادري انه اخذ امي من ابوي بالقوة وادري انه مايبيني وحاول يذبح امي وادري انه رمى تهمته الشينة على ابوي والحين وعرفت وش مسوي بخوالي لكن أنا!!ليش مادورت علي جاوبني ليش؟
الجد بادي بكره ارتسم على ملامح وجهه
بتال انقبض قلبه وهو يطالع هالنظرات
الجد بادي:وش اريد بوجهن لاراعيته اوحيت اوجاعن سرت بقليبي وعلتني(امرضته)
بتال انخطف وجهه وهو يذكر الكلام جدته انه يشبه ابوه
يوسف اتسعت عيونه وهو ينتبه فعلا ان بتال يشبه ابوه
نشمي بغبنة وهو يطالع وجه بتال مسك يد ابوه وسحبه وراه للسيارة
بتال بشرود أفكاره وهو يستوعب كل يوم امه تطالعه وتذكر فاهد واللي سواه فيها وابوه يطالعه ويذكر فاهد واللي سواه طالع قفا جده بادي وهمس بصوت ماينسمع:اااه وانت كل يوم تطالعني وتذكر عيالك بسبتي!!،،ضاقت انفاسه وهو يتخيل حجم الالم اللي كل يوم يمر فيه ابوه وامه وجده فتح ازارير ثوبه وهو يزفر وعطاهم ظهره وهو يمشي،،
يوسف يطالعه باستغراب وهو يمشي وراه
الجد بادي سحب يده وبصراخ:علامك انت علي علامك!!
نشمي بصراخ من غبنته:يسد مااوحاه يسددد!!!
الجد بادي:لا مايسد كبّه يخبر يوم انه هج سويد الوجه ليته هج عن شينه بجميلة لحاله!!
نشمي صرخ:يبه!!!
الجد بادي:ليته غاز الشبرية بجميلة وطاس ياعله مطس الأولين وفاكنا من شره
نشمي مسك ابوه من يده وهو يسلم عليها وبترجي:تكفى يبه تكفى!! يسد يسد والله يسد ماعلمته يسد!!
الجد بادي سحب يده من نشمي وهو يزفر:علامك علي!!
نشمي:يبه اوجست اللي تريد خلاص مالك بد بشين مالك به
الجد بادي بغبنة:الا لي بد وكبه يخبر شين ابوه كبّه!!
بتال بصدمته مو قادر يستوعب انه بكل يوم يسبب هالوجع لاهله
يوسف يمشي ورا بتال:بتال!!
بتال مارد عليه وهو ماانتبه لوجوده من الاساس
يوسف رفع صوته:بتال؟
الجد بادي ونشمي التفتوا لهم
بتال التفت يطالعه بشروده وانتبه لنفسه وبابتسامة وسط وجهه الشاحب:ااه جدي يقول مامن كشتة،،التفت يطالع هو وين ويلم ضياعه اللي واضح عليه ولمح مكان النار ورجع لها ووقف عندها وانحنى وهو يجمع الاغراض اللي حولها،،
يوسف مشى وراه وانحنى جنبه وهو يساعده
نشمي طالع ابوه وبغبنة:ارعيت!!اوجست يمك يسد يسد ماهو لزومن يخبر باقي العلم!!
الجد بادي زفر بغبنته وهو يفتح باب السيارة وجلس مكان الراكب وهو يقفل الباب وراه وخرج راْسه يطالعه
نشمي جلس مكان السواق وشغل السيارة
بتال تطيح الاغراض من رجفة يديه غصبا عنه ويرجع يجمعها
يوسف اخذ الاغراض من يده:كبهن عنك انا بأولهمن اغدا يم السيارة
بتال سحب من يد يوسف الاغراض:شغلي واعرفه،،جمع الاغراض وهو يروح ويرجع مابين مكان الاغراض والسيارة وسط نظراتهم عليه واصراره محد يساعده ابد وبعد ماانتهى تلثم بشماغه زين وهو يحاول يخفي ملامح وجهه عنهم،،
يوسف طلع بالحوض من جهة الجد بادي وهو واقف ومد يده لبتّال
بتال وقف على مسافة بسيطة من السيارة وطالع يوسف وهو يرفع يده ويمدها يأشر على يمينه:من هينا الطريق صح؟
يوسف قطب جبينه باستغراب:طريق وش؟!!
بتال:الـديــرة!!
الجد بادي مقطب جبينه:ايه منيّا(من هينا)!!
بتال بابتسامة:اجل تيسروا انا اعرف طريقي
الجد بادي اتسعت عيونه:وش توجس ياولد!!اطلع بس ولاتكثر خثاريدك(خرابيط)
نشمي تنهد وهو يسمعه
يوسف انحنى اكثر وشوي ويده تدخل في وجه بتال بإصرار:اطلع
بتال دف يد يوسف عن وجهه وسط تقطيبة جبينه
نشمي:اجل حنا نحتريك عند الخط ماهو ببعيد
الجد بادي بحدة:وشو!!!
بتال هز راْسه:ان شاء الله ان شاء الله
نشمي:كود انك ابطيت عودنا يمك وتليناك معنا بالددسن غصب
الجد بادي بحدة:وش هالعلم!!
بتال زفر:على خير على خير
نشمي حرك بسرعة قبل ابوه ينزل
يوسف اختل توازنه وجلس بسرعة وعينه على بتال اللي واقف بمكانه ماتحرك
نشمي:كبّه يبه كبّه العلوم اللي اوجستها ماهي بهينة كبه على هواه كبّه
بتال عطاهم ظهره صد بنفسه عنهم وانحنى شبه جلس وهو يمسك راْسه بيديه وبوجهه كاتم من الهم وسط لمعة عيونه:ياوسع وجهك يابتال ياوسعه!!
.
.
<اللهم صل وسلم على نبينا محمد>