ياسمح المحيا جر الهجنية

الجزء الثالث والسبعين

،،الـجـزء الـثـالـث والـسـبـعـيـن،،

سبحانك اللهم وبحمدك استغفرك ربي وأتوب اليك،،لاحول ولاقوة الا بالله
.
.
شذى واقفة قبال وحدة تعرفها تسولف معها انتبهت لأمجاد اللي مرت من جنبها ومسكتها:ها رهايف جاهزة؟
امجاد قطبت جبينها:اكيد جاهزة!!وش ذا السؤال!!
شذى تركت يدها:ادري انها جاهزة قصدي جواد بيدخل تبي تحط عطر او تعدل روج هذا قصدي!!
امجاد:بروح أشوفها،،بتمشي،،
شذى مسكتها:بسرعة ترا جواد على وصول
.
حلايا واقفة برا باب غرفة العروس وهي تروح وتجي عالباب انفجعت وهي تطالع اللي دخل من باب القاعة الخارجي الخاص بالعروس تنهدت براحة وهي تطالعه وبهواش:وش تريد؟!!
بتال ببشت جواد اللي قصير عليه شوي وهو ناوي يفجع خواته طالعها:فيه احد داخل؟؟
حلايا وهي تحس انها مميزة لانها تعرف العروس تخص ن وبلهجتها الطفولية:ايه به حريم عيب تغدي يمهن
بتال وهو يطالع حركاتها:وخري بس ياورع عني العروس اختي!!ولا فيه غيرها داخل؟
حلايا سكتت وهي تفكر وتقارن بينه وبين جسّار وبين عباير وبخوت ووصلت انه عادي يدخل مدت يديها تغطي مدخل الباب:رهايف صحيح احتك؟
بتال:والله والله اختي!!
حلايا نزلت يديها وهي تزفر:مابه احد اعد يمهن
بتال ابتسم وهو يفتح الباب بشويش
عباير واقفة عالباب وهي تنتظر رهايف تخلص حتى تدخل وتساعدها بفستانها
بتال عدا الممر البسيط اللي بمدخل غرفة العروس ووقف وهو يثقل صوته بتقليد لجواد:رهااايف
عباير شهقت وبصوت:يمه
بتال طاحت عينه بعينها وانصدم وعطاها ظهره وجرى مبتعد عن المكان
عباير بدون لاتنتبه ان بتال مشى فتحت الحمام على رهايف ودخلت
رهايف صرخت
عباير جتها الصيحة:والله ماارعيت شي!!به رجلن برا،،خرجت وهي تحبس دموعها،،
بتال خرج من غرفة العروس ومشى كم خطوة وطلعت بوجه بنت
امجاد شهقت وهي تطالع البشت ورجعت طريقها جري
بتال رجع طريقه لغرفة العروس ودخل وهو يجلس عند الباب ويتصبب عرق من الصدمات اللي ورا بعض ولاانتبه انها امجاد
امجاد وقفت وهي تستوعب انه بتال ورجعت
بتال ضيع من كثر ربكته تربع وهو يتغطى كله بالبشت وبصدمته وإحراجه:والله مادريت ان فيه احد والله
حلايا واقفة تطالعه باستغراب من اللي يسويه
.
جواد واقف قبال المدخل الخاص باهل العريس وهو متوتر لكن هالتوتر يطغى عليه شعور الفرح والوناسة والحماس ببداية حياة جديدة دخل وهو يطالع الباب انفتح له دخل وهو يمشي وبنرفزة:سنة ياشذى سنة على ماتفتحين لي!!
دانة بعبايتها وبصمتها تسمعه وهي منهارة بكى وكسرت هالصمت:جواد
جواد قشعر جسمه كله وهو يسمع الصوت اللي مانساه ابد ولاتجرأ يلتفت لها
دانة ببكاها:اسفة جواد بس هاذي هي الطريقة الوحيدة اللي قدرت اشوفك فيها
.
عباير جالسة متكتفة ومبوزة وصادة بوجهها وهي تاخذ نفس وتبلع غصتها للحين تحس برجفة ماتوقعت يصير معها هالشي ابد
بخوت جالسة جنبها وحلايا على رجولها جالسة
حلايا تطالع عباير بزعل
بخوت تطالعها بضحكة:علامش مخنفرة!!خلاص يسدش!!واراعش وثمن!!
عباير التفت لها بغيظ:اتضحكين!!
بخوت كتمت ضحكتها وهي تطالعها
عباير:ايه وش عليش ماهو انتي اللي غديتي يم الحمام وانتي خابرة ان به احد ونفخ بوجهش!!
بخوت ضحكت غصب:ياربي كل مايطري لي إنش غديتي يم رهايف يلفيني ضحكن مامثله ابدن
عباير طالعت حلايا وهي تفك تكتفيتها:وانتي
حلايا كتمت بكيتها وبهمس:هاه
بخوت وهي تضم حلايا:عباير!!
عباير:هماني محرصة يمش محدن يغدي يمّنا!!
حلايا دفت نفسها من حضن بخوت وبزعل وهي تطالع عباير:احو زسار وانتي احت بحوت!!
عباير اتسعت عيونها:عليش وجه الله!!!
بخوت فلتت ضحكتها بصوت عالي وكتمت صوتها
عباير:يوم انه اخو زسار وش عـلـي منه!!هاه!!
حلايا:والله لاسكيس(لاشكيش)يم سعود
عباير:مير لا خير سعود عاث بي وبش!!
حلايا بكت
بخوت وهي تضم حلايا:عباير!!خلاص كبي الضعيفة لزوم تغيظينها
عباير كشرت وهي تتكتف:ام دميعة على طريف!!
بخوت طالعت جوالها اللي رن قبالها عالطاولة وابتسمت وهي توقف وتنزل حلايا
عباير طالعتها:وين؟
بخوت:حلايا معش
حلايا مسكت فيها:مااريد بعاير
عباير:عاد انا اللي رايدتش عقب سواتش بي!!
بخوت زفرت:لااله الا الله!!
عباير:اغدي اغدي يم رجلش لاتخنفرين علي لاتوخرتي عليه
.
جواد كذب نفسه ولاالتفت ابدا رغم انه يسمع صوت شهقاتها
دانة:جواد انا مستعدة اعترف باللي صار وارجع كل شي كل شي ماابيه ماابيه
جواد التفت وبحدة:وش اللي تبين توصلين له؟
دانة:اللي تبيه بأسويه والله بأ
جواد قاطعها بصوته العالي:والمقابل!!
شذى اللي تمشي بالممر فزت من صوته وهي توقف:بسم الله!!،،مشت وسط استغرابها واتسعت عيونها بصدمة وهي تطالعهم،،
دانة:نرجع لبعض
جواد قطب جبينه
دانة:كان رد فعل من الصدمة انت كل حياتي حياتي بدونك ولاشي ولاشي ياجواد
جواد ميل فمه بابتسامة جانبية بسخرية
دانة بترجي وسط دموعها وهي تطالع ابتسامته:جواااد
جواد زفر وهو يعطيها ظهرها:احشمي نفسك يابنت الناس وعيب عليك انا غريب عنك!!روحي الله يستر عليك ويوفقك مع ولد الحلال اللي يستاهلك،،مشى بخطوات سريعة وهو تعكر مزاجه وانقلبت فرحته لضيقة ووقف وهو يطالع شذى احتدت نظرته لها،،
شذى بلعت ريقها وبلعثمة:جواد اننااا
جواد مسك يدها وسحبها وراه وهو يضغط على يدها بقوة
.
،،غرفة العروس،،
بتال ورهايف جالسين عالكنب جنب بعض مكشرين
امجاد تتصور لوحدها بعد مارفضوا الاثنين يتصورون
المصورة:تعالي شوفي الصور
امجاد وقفت جنبها وطالعتهم وهي تكتم ضحكتها وكلامها للمصورة اللي تمرر بالصور:ياليت تكتبين تحت هاذي بدون بشت
بتال طالعها بتكشيرته
امجاد بضحكة:وتحت ذي دخل علي وانا بالحمام
المصورة رمشت باستغراب وهي تطالعها
رهايف بتكشيرتها:لا والله!!حلفت عليك!!
امجاد:كلمتك انت!!،،كلمت المصورة،،وتحت هاذي مضيئة للحد الذي لايرى!!
بتال:ايه كشاف ملعب!!
امجاد ضحكت؛حلوة حلوة واللي يحلي السماجات هاليوم الحلو
بتال طيّر تكشيرته وهو يوقف:يالله رهايف نتصور
رهايف وقفت بتكشيرة
بتال مشى وهو يوقف عند امجاد اللي وقفت قدام خلفية التصوير
رهايف وقفت عندهم
المصورة لقطت كم صورة زفرت وهي تطالع الصور:ياعروسة شوي ابتسامة
امجاد طالعتها:ابتسمت الحين يجي جواد وبعدها ماعاد فيه وقت تروحين على طول!!
رهايف بتكشيرة:طيب
امجاد بحواجبها المرتفعة:فكي التكشيرة اول وبعدين قولي طيب!!
بتال خرج جواله وفتحه وهو يقلب فيه ثم وقف بينهم:صح فيه شي نسيت اقولكم عليه
رهايف وامجاد يطالعون جواله باهتمام
بتال بابتسامة:هذا هو
امجاد انفجرت تضحك بصوت عالي
رهايف اتسعت عيونها
بتال اللي فتح صورتها مع الغنم وقت الحادث اللي سوته مع عباير:شكلك اشتقتي لهم صح
رهايف مدت يدها بتسحب جواله وبغبنة:بتااااال!!
بتال رفع يده فوق:يالله يازينك بينهم حزمة علف(اكل الغنم)
رهايف تنط تبي توصله:جيبه جيبه والله تمسحها والله
بتال:جوالي وكيفي!!
رهايف وهي تنط بكت وانحنت شبه جالسة نزلت راسها تغطي وجهها
بتال انصدم:وش فيك!!
امجاد زفرت:كنت حاسة
بتال انحنى شبه جالس جنبها وهو يمد لها جواله:خذي امسحيها خلاص والله خلاص لاتبكين بس
رهايف ماردت
امجاد:فستانك بينعدم رهايف
رهايف رفعت راسها وهي تدف يد بتال وبدموعها:لاتسمحها اصلا حلوة الصورة
بتال ابتسم:طيب ليش تبكين!!
رهايف:ماادري
بتال وقف وهو ينحني وشالها
رهايف صرخت
بتال بابتسامة:تسكتين ولا؟
رهايف هزت راسها بايه وهي تهل دموعها
بتال بابتسامة شر:شكلك اشتقتي للمروحة!!
امجاد اتسعت عيونها:لا بتال
رهايف بسرعة:لا لا لا والله مااشتقت
بتال دار فيها بسرعة:مرررررروووووحة بسرعة2
رهايف صرخت:بتااااااال
.
بخوت واقفة بالممر قباله وهي تطالعه بابتسامة
جسّار وشايل حلايا اللي تسولف عليه وعينه على بخوت تنهد
بخوت انتبهت وتغير وجهها وهي تنزل عينها بالارض
حلايا مسكت جسّار من دقنه وهي تلف وجهه لها:زسار ارعني!!اوزس يمك انا!!
جسّار ضحك وهو يتقدم الخطوة اللي بينه وبين بخوت وهو يثبت حلايا بيمينه ومد يساره لخصر بخوت وحاوطه :يازين اللي اوزس يمي
بخوت انصدمت منه
جسّار سحبها لحضنه وعينه على حلايا
بخوت بلعت ريقها وهي تمرر نظرها بينه وبين حلايا
جسّار؛ها قولي نسمعك كلنا
حلايا تسولف
جسّار شد على بخوت بحضنه اكثر
بخوت همست له:خلاص كبني لايرعينا احد
جسّار بابتسامة وهو يطالع حلايا:خليهم يشوفون صح حلايا
حلايا:صحيح صحيح مو صح!!
جسّار ضحك:طيب صحيح وش رايك الحين
حلايا:رايي زين
بخوت:جسّار خلاص!!
جسّار التفت لها بابتسامة:وش وش!!
بخوت رمشت بتفكير:وشو؟
جسّار:يازين اسمي من منك غير غير!!
حلايا بزعل:ياربي!!ماتدعون احد يوزس زين!!
جسّار ضحك:اوجسي ياللي ماتخلص سوالفك اوجسي
حلايا:مااريد
بخوت همست:كبني
جسّار شد عليها اكثر
بخوت تحركت من شدته وطبع روجها برقبته
جسّار طالعها:مستعجلة!!
بخوت اتسعت عيونها بصدمة:وشو!!،،دفته تفك نفسها،،كبني كبني
جسّار ضحك وهو يثبتها:خلاص خلاص
حلايا تكتفت:اندرني(نزلني)اندرني علطان اللي يعلمكم
حصة تمشي بالممر متجهة لرهايف زفرت وهي تطالعها بين يديه بعدم رضا رسمت ابتسامة:ياعيني ياعيني
بخوت دفت جسار بقوة باحراج وهي تشتت نظرها بالمكان
جسّار مسك يدها قبل تبعد عنه اكثر وشد عليها
بخوت طالعته
جسّار بابتسامة:حصيص اذكري الله انتي بالذات لازم اخذ غسالك
حصة:يمّه منك يمه!!كان محد تزوج غيرك!!وبعدين احسدك على وش!!ملكة الجمال اللي اخذها!!
بخوت طالعتها بتقطيبة جبينها وزفرت
جسّار بابتسامة:يكفي انها ملكة جمال بعيني وأكثر من ذا كله ملكت جسار وقلبه ياعمة
حصة قطبت جبينها بتكشيرة وهي تسمعه ينهي كلامه بعمة
جسّار:مافيه دعوة ياعمة!!
حصة اسرعت بخطواتها وهي تمر من جنب بخوت:الله يهنيك ياجسار يهنيك،،كملت طريق وهي متجهة لرهايف،،
جسّار التفت لبخوت وباس جبينها
بخوت وهي تحس بإحساس غريب ماهي متعودة عليه من غريب عنها بعينها تحس بروحها تميل له وهذا شي غريب بكل معاني الكلمة عليها زفرت
جسّار:انا باخذ حلايا معي داخل تكمل سواليفها علي الى مانخلص تصوير وانتي انبسطي وخذي راحتك وانا اتصل عليك اذا جيت بأروح للرجال
.
،،غرفة اهل العريس،،
جواد جالس بتكشيرة
شذى دخلت الغرفة وبيدها المبخرة مثل مطالبها وقفت قباله وهي تحط العود له
جواد تنهد وهو يوقف
شذى تبخره:اسفة جواد لو ماتاخرت عليك كان
جواد:مو مشكلة
شذى بقهر:لو امي ماارسلتني كان وصلت قبلك وهزأتها احلى تهزيئة اللي ماتستحي
جواد بحدة:خلاص شذى خلاص!!
شذى كشرت:طيب طيب
جواد اخذ المبخرة منها يبخر نفسه زين:ماابي اللي صار يدري به احد فهمتي
شذى:افا عليك محد بيدري
جواد بتأكيد:خاصة رهايف فهمتي
شذى:ان شاء الله ان شاء الله محد بيدري ابد لاتشيل هم
.
،،غرفة العروس،،
حلايا واقفة جنب الطاولة تاكل من شنطتها كاكاو وهي تحط تغليفة الكاكاو عالطاولة تطالعهم بابتسامة وهم يتصورون
حصة جالسة عالكنب تطالعها بتكشيرة:بنت
حلايا التفتت لها
حصة:حطي الأكياس بالزبالة ماتعرفين!!
حلايا بخوف منها:مااخبر الزبالة
حصة:شوفيها هناك يالله
حلايا تجمع أكياسها وهي حابسة دمعتها
امجاد بابتسامة:عمة حصة تعالي
حصة وقفت:اذا خلصتي تجميع ارميها بالزبالة فاهمة،،مشت،،
حلايا رمتها ورجعت للطاولة ابتعدت عنها وهي تجلس عالكنبة وتقفل شنطتها
حصة رجعت وهي تطالعها تقفل شنطتها زفرت وهي تجلس:تعالي اشوف وش حطيتي بشنطتك
حلايا وفيها الصيحة:ماحطيت شي
حصة:تعالي اقول
حلايا مشت لها
حصة اخذت شنطتها وفتحها واتسعت عيونها:ليش اخذتي بدون استئذان!!
حلايا نزلت دموعها:والله مااخذتها حطتهن لي العلوس
حصة زفرت وهي تطالع دموعها وحسن بنفسها وهي تخاصم بزر ماله ذنب:استغفر الله العظيم خلاص لاتبكين
حلايا مسحت دموعها بسرعة خايفة منها
حصة مدت يدها لصحن الكاكاو اللي عالطاولة وهي تحط لها بشنطتها:خلاص لاتبكين،،مدت الشنطة لها،،لااشوف دموعك خلاص؟
جسّار:تعالي ياعمة
حلايا تطالعهم وهي متضايقة تحس وجودها بهالمكان غلط خرجت من غرفة العروس وهي تجلس عند الباب
.
عباير وقفت وهي تسمع الدقاقة تغني وبحماس لبخوت:اغدي معي نرقص
بخوت هزت راسها بلا:مااريد بلكن يتصل جسّار
عباير مسكت يدها قومي بس
بخوت طالعت هيفاء اللي جالسة عن يمينها:اغدي معها ياهيفا
هيفاء:واشيب حالي ماعينتي غيري يرقص عالملعبة معها عز الله ان نغدي على السنة الخليقة
عباير تركت يديها وبتكشيرة:اهبن مابكن خير يوم غدت الملعبة اللي نخبرها عييتن تغدن معي!!،،مشت،،
بخوت زفرت وهي بتوقف
هيفاء فزت واقفة:نعنبوا حي اللي مايفزع يمش،،مشت وبصوت عالي،،احتريني يابنت وانتي خنفرتي علي احتريني
بخوت نزلت عينها عالقهوة وهي تحس باحراج من هيفاء
.
جسّار بوجهه المخطوف ينتظر على اعصابه:ها بشري
امجاد بقلق:ماهي داخل ابد ياجسار ماهي بفيه
بتال:متاكدة؟دورتي زين
امجاد:ايه دورت حتى بغرفة العاملات ماهي بموجودة
جسّار فتح ياقة ثوبه من كثر توتره:يعني وين بتروح
بتال:مابتروح بعيد اكيد عند الرجال غازي يشوفها
جسّار بعصبية:وش وداها عند الرجال!!
بتال بحدة:جسّار!!اذا انت سويت كذا امها وش بتسوي!!امسك أعصابك بروح وادورها بنفسي،،طالع امجاد،،اهم شي امها ماتدري
امجاد:ابشر وانا بأرجع ادور لها داخل يمكن ماانتبهت
جسّار:وانا بأشوف حول المكان يمكن خرجت ومحد انتبه لها،،خرج ومعه بتال،،
.
،،عند مدخل القاعة،،
عذبة وهي تسرع بخطواتها لهم:ها بشري
امجاد بتوتر واضح:مالقيناها ياعمة للحين
عذبة انخطف وجهها:يارب سترك يارب مين اخر من كلمها طيب
امجاد طالعت حصة
غذبة بتكشيرة:حصيص
حصة اتسعت عيونها:عذبة!!تتهميني
عذبة:استغفر الله العظيم اسفة ماقصدت بس يمكن زليتي اعرفك ماتقصدين والبزر مايفهم
حصة بعصبية:لا ياعذبة لا مو انا اللي اخذ البنت واخوفها واخوف اهلها!!
بخوت وقفت عندهم بوجهه مخطوف:اي بنت؟
،،انصدموا من وجودها،،
بخوت برعب وهي تطالعهم:من تعنون؟بنت من؟
امجاد توترت ولانطقت
عذبة تقدمت لها:بخوت يمه
بخوت شهقت:حلايا!!
امجاد:استهدي بالله يابخوت
بخوت لفت عنهم وهي تدور بنتها بالمكان بهستيريا
عباير اللي داخل القاعة جالسة تتقهوى بمكانها قطبت جبينها وهي تطالع بخوت اللي وضعها غريب والأغرب المجموعة اللي وراها وبينهم حصة وقفت بسرعة ومشت لها وهي مو مرتاحة وقفت عندها:بخوت علامش!!
بخوت هلت دموعها وبصدمة:حلايا حلايا حلايا،،اختل توازنها بينهم من صدمتها وهي تبكي بدون صوت،،
،،عباير وعذبة مسكوها،،
عذبة:بسم الله عليك بسم الله
حصة سحبت موية من عالطاولة ومدتها لها:بسم الله عليك بسم الله مافيها شي مافيها شي ان شاء الله العيال يجيبونها
عباير تطالعهم بصدمة ولانطقت حرف
.
،،غرفة العروس،،
رهايف منتبه لجواد اللي واضح انه متضايق رغم ابتسامته
المصورة:ياعريس ابتسامة من قلب الله يرضى عليك
جواد زفر بطفش منها ومن طلباته
رهايف طالعت المصورة:بريك خمس دقايق لو سمحتي
المصورة خرجت
رهايف طالعته وهي تتكتف
جواد ابتسم وهو يمد يده ويفك يدها ويرفعها له ويبوس كفها بحب:قمر تبارك الرحمن
رهايف:وانت بعد
جواد ضحك بخفة:ماتعرفين تمدحين!!
رهايف:وانا الصادقة قمر بسم الله عليك
جواد ابتسم لكن خاطره ضايق ومد يده بيدها الثانية وصار ماسك يديها بيديه:رهايف
رهايف توترت وهي تطالعه:نعم
جواد؛انا مااحب اكذب عليك ابد
رهايف زادت توترها وهي تطالع جديته
جواد:ومااحب حياتنا تبدا وانا مخبي عليك أشياء
رهايف اخذت نفس
جواد:دانة جاتني قبل شوي
.
جسّار يلف بالمكان وهو بيموت من توتره وقف وهو يسمع صوت ضحكات
فيصل يلعب مع حلايا بالمواقف
حلايا ميتة ضحك
فيصل:والله لامسكك الحين والله
حلايا:ماتحرز كود بك خير قضبتني من الاوله
فيصل اتسعت عيونه وسط ابتسامته:هين هين والله لامسكك
حلايا صرخت وهي تجري
فيصل جرى وراها
حلاي وقفت هي تطالعه وابتسمت:زساااار
جسّار وهو يحس روحه رجعت اسرع بخطواته وهو يفتح يديه لها
حلايا ارتمت بحضنه
فيصل وقف عندهم بابتسامة
جسّار اعتدل بوقفته وهو يطالع فيصل بحدة
فيصل قطب جبينه:وش فيه!!
جسّار بحدة:حسابي معك بعدين،،مشى،،
.
،،غرفة العروس،،
رهايف تضايقت ووضح على وجهها:وش تبي منك؟
جواد:قالت كلام عن حبها وتبينا نرجع لبعض
رهايف:وانت؟
جواد:اكذب عليك اذا قلت لك ماتوترت
رهايف تجمعت غصتها وبلعتها:وبعدين؟
جواد:كنت خايف لاتفتري علي ويصدقونها الكل وانا محد يصدقني
رهايف قطبت جبينها من سببه وهي تستوعب
جواد:وش كان بيصير الليلة الفرح ينقلب عزا!!كيف بيصدقوني وانا اللي كذ
رهايف ابتسمت وهي تطالعه يصارحها ضغطت على يديه وقاطعته:انا اصدقك ياجواد
جواد طالعها بهدوء
رهايف:وكلنا بنصدقك
جواد ميل فمه يطالعها بتكذيب
رهايف بابتسامة:والله كلنا بنصدقك تدري ليش؟لان جواد اليوم غير عن ذاك الجواد جواد اليوم ولد مسفر وعزوة لعيال عمه،،رمشت بغرور،،والأهم من ذا كله زوج رهايف
جواد ارتاح وهو مايشوف اَي بوادر زعل ضحك بخفة:تذبح الثقة!!
رهايف:انت بس قول رهايف اخواني كلهم يجون
جواد:وهذا اللي يخوف!!
رهايف كشرت:وش قصدك!!
جواد ضحك:الحمدلله انا ساكنين لحالنا والله مدري وش كان بيصير لو حنا معهم
رهايف فكت يديه وهي تتكتف وبزعل:يعني اخواني يخوفون!!ترا ماارضى
جواد حاوطها بيديه ولفهم بشته
رهايف توترت ووضح عليها
جواد بابتسامة وهو يطالعها:بالعكس المفروض ماتزعلين هذا دليل انهم هيبة!!
رهايف قطبت جبينها بتفكير:صح والله
جواد ابتسم كتم ضحكته وبنفسه:يازينك ينلعب عليك بسرعة
رهايف دفته عنها وهي تبعد عنه للكنبة وتاخذ جوالها وترجع له؛اه صح ابيك تشوف شي مرة حلو
جواد:الحين!!
رهايف وعينها بجوالها:ايه الحين
جواد حاوطها من ورا وصار ظهرها ملاصق بصدره
رهايف بلعت ريقها اخفت خجلها والتفتت وهي تلمحه عن طرف ميلت فمها بعدم رضا
جواد بابتسامة بريئة:وش فيك ابي اشوف معك!!
رهايف زفرت وهي تمشيها رغم رجفة يديها اللي فضحتها وهي تحاول تكون طبيعية:شوف
جواد كشر بوجهه
رهايف تقلب بصور الخيل وباستعباط:يعني هاذي افضل الجوادات قلت نجمع ونشتري لنا اثنين ويتكاثرون
جواد ابتسم وبخباثة:مايحتاج جوادات يكفي واحد
رهايف قشعر جسمها ودفته عنها:نعم!!!
جواد ارتفعت حواجبه وهو يكتم ضحكته:وش فيك!!صدق مايحتاج جوادات اذا تبين رحنا مزرعة صديق اعرفه عنده،،باستعباط،،جوادات كثيرة
رهايف بنرفزة:ماابي اشوف جوادات واحد يكفي!!،،اتسعت عيونها وهي تستوعب اللي قالته،،
جواد ضحك بانتصار:الحمدلله وشهد شاهد من اهلها!!
.
بخوت جالسة مانطقت حرف ولاترد على اَي احد يكلمها من فجعتها
عذبة تمسح على ظهرها:بسم الله عليك يابنتي ان شاء الله مافيها شي استودعيها الله مافيها شي باذنه
عباير بدموعها وهي تروح وتجي مو قادرة تجلس
حصة وقفت عندهم وهي تلهث:جابها جسّار حصلها
بخوت رفعت راسها تطالعها
عباير بفرحة وراحة:صحيح!!
حصة بلهجتهم وبتبتسامة:يابنت اوجس يمش عيّنها جسّار عيّنها وهي طيبة مابها خلاف الحمدلله هذا هم بالمدخل اللي يم رهايف
بخوت فزت وجرت بدون لاتعطي انتباه لاي احد يناديها وكل فكرها بحلايا اللي بمدخل العروس وصلت لهم وهي تطالعهم
حلايا تسولف لأمجاد وتضحك عادي
جسّار بوجه متغير واقف عندهم وهو يشرب موية قفل علبته وهو يطالعها واتسعت عيونه من شكلها المنهار:بخوت!!
حلايا طالعت امها وانصدمت
بخوت تجر خطواتها الثقيلة لهم وهي تطالعها
حلايا جرت لها ووقفت عندها:ماما علامس!!
بخوت مسكت يديها وهي تتفحصها وبغصة:بش شي يوجعك شي احد عمل بش شي؟!!
حلايا هزت راسها بلا
بخوت زادت دموعها وهي تضمها وتطبع بوسات سريعة عليها بكل مكان بوجهها ويديها
حلايا باستغراب وطفش:حلاص حلاص علامس!!
جسّار تقدم لها ووقف عندهم وهو يزفر:بخوت
بخوت صحت بصوته وارتسمت تكشيرة على وجهها وضمت حلايا بحضنها وهي توقف
جسّار انصدم من نظرتها وتعلثم:انا انا
بخوت قاطعته بحقد:يومك ماانت قد الأمانة لاتاخذها من الاولة!!
جسّار تزلزل من قوة كلامها وانخرس وهو يطالعها بصدمة
بخوت لفت عنه ومشت وتركته وراها
.
.........****..........
يوم جديد
.........****..........
..الشقة..
،،عالفطور،،
سعود جالس يصب الشاهي لجده ومد له كاسته
الجد بادي وهو ياخذ الكاس:سلمت سلمت الشكوى لله ذالحين وقت غدا ماهو بفطور
سعود ابتسم:مير غصب ياجد عقب عرس البارح
الجد بادي زفر:الله يكفينا شر هالعروس!!
سعود باستغراب:ليش ياجد!!علامه عرس البارح يازينه!!
الجد بادي:ارعيت متى قلطوا عالعشا!!
سعود:ياجد ازين يأخذون علوم بعيضهم وثم جسّار اوجس يمي دايم يقلطون الساعة12
الجد بادي شهق:ياوجه الله!!
سعود بابتسامة:سلفهم ياجد
بخوت دخلت للصالة عندهم وهي شايلة بيدها صحن كبير فيه فطور ومغطى
الجد بادي انصدم من وجودها وعينه عليها:بنت!!ماغديتي يم رجلش البارح!!رقدتي هنيا!!
بخوت ماردت عليه وهي تطالع سعود:هذا فطوره اغد به يمّه
الجد بادي اتسعت عيونه وشهق وبحدة:ولد ابوي!!مابش حيا!!على مراعاتي توجسينه!!
بخوت التفتت له بتقطيبة جبينها وبحدة:ايه اوجسه ياجد!!توبة توبة تبت اغدي بوغدتي يم رجلن ابدن
الجد بادي:تكوفنيها(لفينا بلفة)ولميها بصدرش محدن موجسن يمش شين مير خبالش كبيه عنش
بخوت بقهر:وينه الخبال يوم انكم تغدون بالضعيفة وهي لاتربط ولاتحل!!
الجد بادي:بخوت عليم الله ماانكعمتي عن هالعلم اللي مابه سنع يغدي شين مايسرش مير ابلعي من هالانعام وانكعمي!!
بخوت عضت شفتها بقهر
الجد بادي:مير اغدي يم رجلش والفي به يفطر معنا
بخوت اتسعت عيونها:والله ماغديت يمه!!
الجد بادي التفت لسعود وهو يطنشها:اغد يمه ياسعود ولاتعود الا وهو معك
بخوت بعصبية:جدي!!
الجد بادي بحدة:تقضبين ارضش قدامي بالفطور معه وثمن تغدين معه وانتي ماتراعين دربش اوحيتي
بخوت وقفت ومشت بخطوات سريعة
سعود زفر
الجد بادي:بت بخوت!!بنت!!
بخوت دخلت الغرفة وقفلت الباب بقوة
الجد بادي طالع سعود وبعصبيته:علامك قاعد لذالحين قم!!
سعود وقف وخرج
الجد بادي وقف واتجه لغرفة البنات فتح الباب وهو يطالعها جالسة عالسرير متكتفة وواضح عليها الزعل وبتهديد:خنفرتي ولا ماخنفرتي الفطور تلفين تفطرين معنا ولا لش علمن ثاني معي،،قفل الباب بقوة،،
بخوت بلعت غصتها
عباير صحت من النوم رفعت راسها وهي تطالع بخوت اللي قبالها:علامكم!!
بخوت بقهر:مابنا شي مير اخمدي
.
..الحوش..
،،الجد نشمي والجدة منيرة وابو غازي جالسين بظل جدار بيت الجد نشمي وقبالهم بعض من الفطور اللي ماكمل للحين،،
ابو غازي زفر بصوت
الجد نشمي:علامك!!
ابو غازي:والله يبه انت اللي علامك علينا!!
الجد نشمي قطب جبينه:هاه!'صدق من قال تجيك التهايم وانت نايم!!وش سويت بك!!
ابو غازي:كم مرة قلنا نبني مظلة بوسط الحوش
الجد نشمي اشر بطرف عكازه:هذيك هي!!
ابو غازي ابتسم:هذيك ماتكفي احد حقت الطاولة والكرسيين اللي عندها!!
الجد نشمي:وانت وش مزعلك من ظل الجدار!!يازينه!!
ابو غازي بمحاولة يلين راسه:بالله يبه الحين لو نفطر تحت عشة وش زينها عند النخيلات ماهو بازين من ذا!!
الجد نشمي:لا والله ظل الجدار ازين عندي!!
ابو غازي:ونتوازك(ننحشر)!!
الجد نشمي:ازين لكم قليباتكم اتصافى
الجدة منيرة ضحكت
ابو غازي زفر بقلة حيلة
غازي نزل اخر الفطور وهو يجلس:حياكم
ابو غازي قطب جبينه:وين عمك وعمتك!!
غازي:شوي ويجون ان شاء الله
.
..الشقة..
جسّار جالس قبال بخوت
بخوت تشغل نفسها باي شي تتحاشى تطالعه
الجد بادي:بخوت صبي شاهي لجسّار
بخوت طالعت جدها بتكشيرة
الجد بادي بحدة:صبي!!
جسّار ابتسم:مايحتاج مايحتاج انا
الجد بادي قاطعه:افطر مالك بشين انت!!
جسّار انصدم من رده
سعود جلس وهو يمد يده بيصب
الجد بادي ضرب سعود بيده:محدن اوجس يمك شين
بخوت صبت ومات لجسّار وهي منزلة نظرها
جسّار اخذ منها:يعطيك العافية
بخوت ماردت
الجد بادي زفر وهو يكتم غيظه:الله يعافيك مير افطر وانا جدك افطر
.
..الفندق..
جواد جلس على طرف السرير وهو ينزل طاولة السرير اللي بين يديه عالسرير وتحديدًا وراه ثم التفت لها
رهايف نايمة
جواد:رهايف
رهايف تاففت وهي وتسحب البطانية وتتغطى كلها
جواد ابتسم:رهايف
رهايف فتحت عيونها وهي حسن باللي سوته واستوعبت عضت شفتها باحراج
جواد بتهديد:بتقومين ولا؟!!
رهايف رفعت الغطا وهي تجلس وتحاول قد ماتقدر تتحكم بتعابير وجهها وتكتفت وهي تزفر:صحيت
جواد ابتسم وهو يرفع نفسه ويطبع بوسة على جبينها
رهايف خجلت
جواد بابتسامته:ياصباح الخير
رهايف وهتفت يديها وترجع غرتها ورا اذنها بخجل:صباح النور
جواد ابتسم وهو يطالعه خجلها ولف عنها وهو يرفع طاولة السرير ويحطها قدامها
رهايف طالعت الطاولة كان فيه كورسون وعصير رفعت عينها له:وانت؟
جواد:بيني وبينك خلاص مابقي شي عالصلاة
رهايف وهي ترفع الطاولة:بأغسل وجهي و
جواد مسك يديها والطاولة مرفوعة بينهم:انا أأكلك مايحتاج تقومين
رهايف كشرت:بس انا مااحب كذا لازم اغسل وجهي لاااازم
جواد:قلت لك انا
رهايف قاطعته:لازم اغسل وجهي وافرش أسناني والله مااعرف جواد ماراح ارتاح
جواد تنهد وهو يترك يديها:على راحتك
رهايف أبعدت الطاولة بيمينها وهي تنزل من السرير عن يسارها وبابتسامة:شوي وراجعة
جواد ميل فمه بتأنيب ضمير وهو يطالعها تمشي
رهايف دخلت للحمام وهي تقفل الباب وراها ووقفت قبال المراية وهي ترفع يدها لشعرها بتلمه واتسعت عيونها وهي تطالع وجهها وصرخت
جواد تمدد عالسرير وانفجر يضحك وهو مغطي فمه بيمينه يكتم صوت ضحكته وبسيارته يضرب عالسرير من وناسته
رهايف وهي تدعي عليه بينها وبين نفسها وهي تفرك تحت انفها وفمها تحاول تمسح رسمة الشنب واللحية اللي راسمها على وجهها لكن ماراح خف شي بسيط
جواد وقف وهو يتجه للحمام وقف وهو يسمع صوت فتح الباب
رهايف خرجت ووقفت وهي تطالعه قبالها كشرت بوجهها
جواد بعباطة وسط ابتسامته:قلت اشوف وش يصير اذا رسمت بالقلم على وجهك يروح او لا؟
رهايف بلعت غصتها وبقهر:الحين كيف اروح اسلم عليهم وانا كذا هاه!!
جواد:عادي لخبطة هرمونات،،ضحك،،
رهايف غرقت عيونها دموع وزفرت
جواد اختفت ضحكته بصدمة وهو يطالع عيونها
رهايف مرت من جنبه واتجهت للتسريحة وهي تفتح شنطتها الصغيّرة تشوف لها حل
جواد تقدم لها وهو يوقف جنبها:رهايف
رهايف ماردت وهي تخرج مزيل المكياج والقطن لعل وعسى ينفع معها
جواد:رهايف
رهايف ماردت وهي تخرج قطنة وتحط عليها شوي من المزيل ورفعتها لوجهها
جواد زفر وهو يمسك يدها ويلفها عليه:رهايف
رهايف طالعته بزعل:هاذي مزحة!!
جواد:وبختك للفليت مزحة!!
رهايف كشرت:ماتوقعتك حقود
جواد ابتسم وهو ياخذ القطنة من يدها ويلفها له وانحنى يمسح لها:من الحين اقولك تراني جمل
رهايف بوزت:اعوذ بالله منك
جواد بابتسامة وعينه على وجهها يمسح:ومنك ياناقتي
رهايف ميلت فمها بزعل ثم تكدرت:ها راح؟
جواد بابتسامة وهو يعتدل:راح خلاص
رهايف ابتسمت وهي تلف للمراية بوناسة
جواد يطالعها بضحكة
رهايف اختفت ابتسامتها وهي تطالع نفسها وبصوت فيه البكية:ماراح!!،،لفت عليه بتكشيرة،،ليش تكذب علي هاه ليش!!
جواد سحب كرسي التسريحة له وجلس وهو يطالعها:اليوم اول يــوم ومستعجلة تبين تروحين لهم!!
رهايف:اكيد!!يعني مااشتقت لأهلك!!
جواد:اكيد اشتقت بس احنا تو عرسان واول يوم نبي نتعرف على بعض شوي
رهايف قطبت جبينها باستغراب:كل شي تعرفه!!وش اللي تبي تتعرف عليه!!
جواد مد يده ومسك يدها وهو يسحبها ويجلسها على رجوله
رهايف توترت ووضح على وجهها
جواد:بسم الله عليك صوت قلبك واصل لي!!
رهايف كشرت رفعت نفسها بتوقف
جواد ضحك وهو يمسكها ويجلسها عليه ويحاوطها بيديه
رهايف ساكتة متوترة
جواد:الله يازين الهدوء خل استمتع فيه قبل يختفي
رهايف بتقطيبة جبينها:وش قصدك!!مزعجة انا!!
جواد رفع يديه:الحمدلله ماقلت شي
رهايف وقفت
جواد مسكها وسحبها له من جديد وجلسها عليه
رهايف تتحرك بتوقف:اتركني اتركني
جواد: يموت الازعاج جنبك من إزعاجك الإزعاج اصلا ولاشي عندك!!مسكين يحزن ظالمينه مرة
رهايف بغبنة:اتركني اتركني وش تبي فيني وانا مزعجتك!!
جواد ثبت رجولها بين رجليه وقفلهن عليها وبضحكه:والله انك مزعجة صدق اهجدي
.
.
<اللهم صل وسلم على نبينا محمد>