ياسمح المحيا جر الهجنية

الجزء السادس عشر

لااله الا الله وحده لاشريك له له الملك وله الحمد وهو على كل شي قدير
.
.........****..........
أم جـلاجــل>>الــديــرة>>
.........****..........
..بيت بادي..
عباير طالعة من غرفتها بقميصها الروز وهي كل ملابسها قمصان روز ماعدا المناسبات جلابيات متجهة لغرفة بخوت اللي جنب غرفتها فتحت الباب وهي لازالت ماسكته وكشرت بوجهها وهي تشوفها
بخوت جالسة عالارض تخيّط
عباير بتكشيرتها:لااله الا الله بكل وقت تخيطين(تخيّط)!!ارحمي عمرش
بخوت بدون لاتطالعها:اذكري الله بس وولمّي العشا سعود على وصول
عباير تنهدت:ليش نولّمه الحين!!كان طاوعتيني وغدينا يم عشا ام هليّل
بخوت طالعتها وبنص عين:اهب ياوجهش مغسولن بمرقة حمار!!توش متهاوشة مع الرجل وبغيتي تذبحينه انتي واخوش وبتغدين يم بيته!!الله اكبر عليش!!
عباير وهي تتكتف وتصد بوجهها:العيشة(الاكل)مالها بـد(شغل)بالهوشات
بخوت بتهديد:اقول طسّي ولمّي العشا بس
عباير وهي ترد الباب معها بتقفله وبزعل:طيب طيب،،فتحت الباب بسرعة وبابتسامة،،وينها حلايا؟
بخوت تطالعها:بغرفة جدي عالتلفزون
عباير مشت لها وانحنت وهي تمسك يدها وتقومها:غدينا يمّها
بخوت سحبت يدها وبتكشيرة:طسّي ولمي العشا بس كل ذَا هجّة ماتبين تعملين شي!!،،رجعت تخيط،،عليش الليلة ولميّه بس
عباير بترجي:بخوت قومي يالله طلبتش وانا خيتش تكفين!!،،ابتسمت،،معي شين لحلايا بيعجبها وبتزعلين يوم انها توريش اياه ثمّن تقولين ليش ماعلمتيني اغدي معش كان شفت وجهها!!
بخوت طالعتها بتردد وهي مميلة فمها:توجسينه صدق؟
عباير هزت راسها بوناسة:اي والله صدق
بخوت تنهدت وهي تقوم وفتحت الدولاب وهي تحط الابرة والقماش بداخله ثم قفلته:يالله،،مرت من جنب عباير،،
عباير رجعت خطوة لورا وصارت ورا بخوت ودفتها بسرعة باتجاه غرفة جدهم المقابلة لغرفهم بالاتجاه الثاني وهم يقطعون الحوش اللي بوسط البيت وهي تضحك بخفة:يالله يالله يالله
بخوت ابتسمت وهي تجري من دفة عباير:اركدي علامش!!
،،وصلوا غرفة جدهم،،
بخوت اللي قدام عباير فتحت الباب ودخلت وهي مكملة بخطوات سريعة من اثر دفة عباير والتفت عليها بابتسامة
عباير اول مادخلت لغرفة جدهم عطتها ظهرها وقفلت الباب بالمفتاح والتفتت بوجه شاحب على بخوت وظهرها ملاصق للباب
بخوت اختفت ابتسامتها وعقدت حواجبها باستغراب
عباير همست وسط قلبها اللي بيخرج من مكانه من الخوف اللي تحاول تخفيه:فيه رجلن متلثم بزاوية العشة يابخوت!!!
.
سعود وهو يعض شفته من ألمه ويطالع المتلثم بنظرات حادة وماسك الخنجر بيدينه الثنتين مثبتة حتى مايغرزه فيه اكثر
المتلثم يحاول يغرز الخنجر اكثر بكل قوته لكن مو قادر على سعود وفوقها يشوف نظراته الحادة
سعود ابتسم:احسب اني بأنذبح بيدين رجال قوته تشيل الضلع(الجبل)من مكان وتوطيه بمكان ثاني،،ضحك بخفة وباستهزاء،،لكن هالخنيجر(تصغير خنجر)اللي ناوين تذبحني به مايقوى حتى على فريخات النغري(صغير طير من الطيور)!!
المتلثم همس:مااشقاني(ماهمني)ذبحك الود ودي أتمقّل بوجهك وانت توحي نوح خواتك!!
سعود شحب وجهه من كلامه وارتخت يده للحظة
المتلثم استغل انشغاله وغرز الخنجر بجسم سعود
سعود اللي مسك الخنجر وزفر زفرة واضحة كلها ألم
المتلثم سحب الخنجر بقوة بعد ماتحقق اللي يبيه وهرب وهو يترك سعود وراه
سعود جلس عالارض وهو يتصبب عرق من ألمه وضغط على جرحه اللي انساب بغزارة بدمه اخذ نفس وهو يذكر كلام المتلثم وقف وهو يضغط على نفسه تكى بيد عالجدار ويده الثانية ضاغط فيها على جرحه زفر زفرة كلها ألم لكن هالألم يهون قدام الأفكار الشينة اللي مرت بباله خطى ببطئ وهو يحس بنفضات تجتاحه وكأنها لذعات كهرب تزداد كل ماضغط على نفسه اكثر لكن مااهتم ابد بهالشي وكل تفكيره محصور بخواته وهو مرعوب عليهن لحد الموت مشى باتجاه البيت بخطوات بطيئة وتزيد بطئ كل ماحاول يسرع اكثر وسط ترنح شبه واضح يحاول يسيطر عليه وهو يجمع شتات نفسه اللي تضيع وسط ألمه كل ماتذكر خواته..
..........****..........
..بيت عادل..
المجلس..
ابو غازي يطق رجله بالارض وهو يطالع الارض ومتكتف وهو متلثم بشماغه وساكت
ابو جواد جالس بنفس جهة ابو غازي لكن بينهم مسافة ولا واحد يطالع الثاني
جسّار جالس قبال ابوه وعمه طالع حالة ابوه اللي ماتبشر بخير وقف واتجه للطاولة وهو يرفع الثلاجة ويصب قهوة ويمدها لابوه
ابو غازي رفع يده بمعنى لايصب وهو ساكت والتفت يطالع ابو جواد وبحدة:العلة ولدك وينه؟!!
جسّار ابتعد عنهم وجلس وهو يشوف حدة الموقف بين ابوه وعمه
ابو جواد وهو يكبح نفسه لايغلط عليه:جاي جاي الحين انت بس اهدأ شوي،،خرج جواله وهو يتصل عليه وبحدة يكتمها:وينك؟
جواد ببرود:بالكوفي امر يبه بغيت شي؟
ابو جواد انفجر وهو يسمع نبرته الباردة:ورب البيت ياجواد ان ماجيت لاانت ولدي ولا اعرفك تسمع
ابو غازي سحب الجوال من يد ابو جواد وبحدة وهو يغلي:اسمع يالهيس الأربد عدّيت(مررت)لك الاولة لكن الثانية مدفون مدفون ولاتستفزع بأبوك لانه لو قال هـه حطيته جنبك ولايردني احد لو هو جد جدي والحين خمس دقايق خمس دقايق ماغيرهن وخلني مااشوفك قدامي،،قفل بوجهه ورجع جلس مكانه وهو ساكت،،
ابو جواد طالعه وهو يزفر وبنفسه:حسبي الله عليك ياجواد تلعب من وراي هين هين لاخلص عمك يجي دورك معي
..غرفة امجاد ورهايف..
رهايف تكمد خدها بشويش وهي تتألم:ااه ااه
أمجاد متمددة على سريرها طالعتها وبغل:أحسن
رهايف كشرت والتفتت تطالعها:اعوذ بالله منك وش ذَا القلب اللي عندك!!
امجاد:الا والله انتي وش هالقلب اللي عندك الله اكبر عليك لاخوف ولا حيا!!
رهايف رمت الكمادة عليها وبتكشيرة:والله حسابه معي هين تحسبين بأسكت له كذا!!والله لاأطلّع حقي وحق اخواني من عينه وارجع له اللي سواه بإخواني أضعاف
امجاد توسعت عيونها:ليه؟!!وش اللي سواه ان شاء الله؟!!
رهايف طنشتها وماردت
امجاد:مااظن ذبحهم لمى ماكان يساعدهم!!ولا ذبحهم لمى كان يرمي الكلام عليهم!!
رهايف احتدت ملامحها وبقهر:لايكون ان شاء الله تشوفينه البريء المسكين انتي بعد!!
امجاد عقدت حواجبها
رهايف بغبنة:اصحي ياامجاد اصحي شوي وش اللي موقف رزق اخوانك وللحين ماتوظفوا هاه؟!!مع انه واحد طبيب طوارئ والثاني مسعف وكلهم مع مرتبة الشرف قولي لي ليش؟!!
امجاد تغير وجهها:اتركي الظلم عنك يارهايف ولاتتبلين الناس!!
رهايف:لا ماني ظالمته ابد ابد شفت وسمعت بنفسي محد قالي شي،،برجفة صوت من القهر،،واللي يفقع القلب وانا اشوف حماسهم وهم يقدمون وادري بيوقف بطريقهم وبيكتمون الخيبة بصدورهم ويبتسمون قهر ياامجاد قهر ساكن قلبي واحرقني وأتلف أعصابي!!
امجاد زفرت وهي تشوف حرقتها:طيب انتي وش بتستفيدين من هالحركة!!
رهايف ابتسمت:بأذوقه المر بأشكاله بأدبسّه بين عمي وابوي واتركه ينجن على رواقة وبالأخير مابيني وبينه شي
امجاد باستغراب:كيف يعني؟!
رهايف:لايكون مصدقة اني بأتزوج هالثور!!يخسي والله مااكون زوجة له لو مابقي غيره!!
امجاد تطالعها بصدمة
ام غازي دخلت وبحدة:أثاري هاذي علومك يارهايف!!
رهايف تطالع امها بفجعة وهي توقف:يمه
ام غازي:اجل اسمعي زين يارهايف اذا ابوك زوجك لولد عمك تخسين انتي تردينه وبتقبلين فيه غصبا عليك!!
رهايف بعصبية:يمه!!
ام غازي ضربتها كف على وجهها بقوة:وصمّة ان شاء الله يارهايف اخر شي تسوينه انك تفارقين بين الإخوان تخسين ثم تخسين ثم تخسين
رهايف تطالعها بدموعها
ام غازي بحدة:وبتتزوجينه وبيحط على راسك غيرك وبيعلقك لا هو اللي جاك ولا هو اللي طلقك وتحملي نتايج سواتك يارهايف
رهايف بترجي:يمه تكفين ماابيه ماابيه
ام غازي:والله ثم والله يارهايف اذا تسببتي بين ابوك وعمك ان لسانك مايلامس لساني ليوم الدين،،خرجت،،
..........****.........
..بيت ابو هليّل..
جو كله فرح وناسة وتباريك بهالمناسبة..
زغاريط وملعبة عند الحريم وسط فرحة ام هليّل وأم طلق..
شامة بهاليوم محد قدها رغم انه مجرد عقد لكن حلمها اللي تتمناه مع الانسان اللي تحبه تحقق حتى لو مو بالطريقة اللي تبيها..
..عند الرجال..
طلق قافلة معه ويسلم بدون نفس ولايرد على احد سواءًا يبارك له او يسأله عن أحواله
ناصر جنبه همس له:علامك!!ابتسم!!واضح للخلق كلهم انك مغصوب!!
طلق همس:فكني ياناصر اللي فيني مكفيني
ناصر بيتكلم سكت وهو يشوف هليّل متجه لهم
هليّل بابتسامة:حي الله نسيبي ياحيه حياالله الصديق اللي صار اخو وزاد قدره قدر
طلق مارد
ناصر ضرب طلق ع جنبه حتى يرد
طلق بدون نفس ولاطالعه:يسلمه ويبقيه
ولد من عيال الديرة دخل وهو يلهث مفزوع:ياعرب شفت رجلن متلثم قلط يم بيت بادي
طلق وناصر وقفوا وهم يطالعونه
،،الكل طالعه بتكذيب،،
ابو هليّل:كب الهلس ياورع ثمّن راعي البيت موجود
الولد:لكن سعود يم ضيفه بالبيت الصاد(بالجهة الثانية من البيت)
طلق وناصر جروا بدون اهتمام للي ينقال وراهم
.
..بيت بادي..
عباير خرجت من غرفة جدها حافية وهي متلثمة بشماغ جدها ويتدلى شعرها على ظهرها وبيدها البندق قفلت الباب وراها
بخوت داخل الغرفة قفلت الباب بالمفتاح وهي تجلس جنبه وبحضنها حلايا وترجف وهي تحاول تكتم شهقاتها رغم دموعها اللي خانتها وانسابت
عباير رفعت البندق وهي تصوب ووقفت قبال العشة وهي تعشّق البندق وبحدة:اطلع ياالمتدسس لو بك سنع ماتدسست!!ومتقصد الاناثي!!
المتلثم خرج بثقة وهو يسمع نبرتها الحادة:والله وطلعن بنات بادي عن الف رجال
عباير:وانت حتى كلمة رجال كثيرة عليك!!
المتلثم كشّر بوجهه تحت لثامه وهو يتقدم لها بخطواته
عباير ضغطت زناد البندق
المتلثم وقف وهو يشوفها تضغط عالزناد وتجمد الدم بعروقه وهو يرف جديتها
عباير توسعت عيونها وهي تشوفه مارمى الطلقة تثبيت عرق وهي تشوف السلاح يعلق وهذا مو وقته ابد
المتلثم ضحك بانتصار:والله إنش ماانتي بهينة لكن وش الدبرة دام السلاح خانش!!
عباير وهي تقلب السلاح وتستخدمه عشان تدافع عن نفسها وبحدة:اقرب وشف وش يحتريك!!،،صرخت،،أفزعوا لنا ياعرب يااهل ام جلاجل أفزعوا لنا
المتلثم:يعني ماقنعتي!!للحين صاملة انهم بيجونش!!،،ضحك وهو يتقدم لها بسرعة وقف ومابينهم الا خطوة ومد يده لها،،
عباير اللي تتصنع القوة غمضت عيونها وهي تحبس عبرتها كل قوتها ضاعت
بتال اللي نط الجدار بينه وبينهم اول ماسمع صراخها جرى لعندهم وهو يشوفهم ومد يده ومسك يد المتلثم وهو يشيله ويرميه عالارض ويجلس فوقه وبحدة:من انت؟ووش تبي من الحرمة؟!!
سعود دف باب البيت بكل حيله وانفتح الباب معه لانه ماكان مقفول كان مردود وطاح ع مدخل الباب بحيله المهدود وهو يشوف عباير وسط الرجال سحب نفسه عالارض يبي يوصل لها ماعاد يقوى يتحرك
عباير صرخت وهي تشوفه:سعووووووود!!
بتال توسعت عيونه من شكل سعود وحالته وترك المتلثم وهو يجري له
المتلثم نط الجدار وهرب
عباير جرت ورا بتال لسعود وسط دموعها اللي انسابت بغزارة وبشهقات مرعوبة:سعود سعود
بتال رفع يد سعود وطالع جرحه وتوسعت عيونه من منظر الجرح
سعود مسك يد بتال وهو بالقوة يلقط انفاسه وضغط عليها وبدون وعي يتكلم:تكفى ياولد الناس نخيتك نصيتك خواتي تكفى خواتي
بتال ضغط على جرحه:ابشر ابشر تطمن خواتك بخير مافيهم شي بخير
سعود غاب عن وعيه تماما اول ماسمع كلام بتال
..........****..........
..السيارة..
فيصل جالس مكان الراكب متكتف وصاد بوجهه وهو زعلان
راشد واقف بسيارته قدام محلات ع طرف الشارع ومتكي بطرف دقنه عالدريكسون وهو يدق بأطراف اصابعه عالطبلون قدّامه بقلة صبر التفت لفيصل وبتكشيرته:وينه الزفت خويك ذَا؟!!
فيصل بنرفزة:وش دراني عنه انا؟!!
راشد بنبرة مرتفعة وبحدة:دق عليه وحط سبيكر يالله
فيصل سوا مثل ماقال راشد وهو يتأفف لكن جواله مغلق ابتسم برضا
راشد بغبنة وهو يطالعه:سد فمك لاأكسر أسنانك ذي الحين!!على وش مبسوط ها؟!!،،طالع لقدام يشوف الطريق اللي هم واقفين فيه،،خل الموضوع يخلص على خسر ثم حسابي معك بعدين؟
فيصل ماقدر يسكت وبقهره:احسن خله يموت ونرتاح الله يفكنا منه!!
راشد بحدة وهو يلتفت له:انطم لااسمع صوتك ثم قل الحمدلله اني عارف طريق جواد المختصر ولا والله كان ذبحتك بس قل الحمدلله،،طالع قدّامه وهو يلمح سيارة جواد شغل سيارته ومشى وراه،،
جواد بسيارته يكلم دانة ماانتبه لهم:ايه حبيبتي بس شويات وارجع اكلمك سلام
راشد ملصق سيارته بجواد وبحدة وهو يطالع فيصل:وين موتر خويك خلصني؟
فيصل وهو يضرب قدّامه بيديه:مدري قلت لك،،انتبه للتقاطع وشهق،،
شاهر اول ماعرف سيارة جواد حرك بسرعة من التقاطع باتجاه جواد بدون مايهدي بوسط ابتسامته
راشد دعس بسيارته وهو يمر من جنب جواد
فيصل صرخ:راشد يالمهبول!!
راشد وقف بالسيارة بين جواد وشاهر واخذ الصدمة بسيارته مكان جواد
،،وتقلبت السيارة براشد وفيصل على مرأى من عيون جواد وشاهر،،
جواد اتسعت عيونه بصدمة وهو يعرف السيارة
.
.
.
<اللهم صل وسلم على نبينا محمد>
...........