ياسمح المحيا جر الهجنية

الجزء الثمانين

،،الـجـزء الـثـمـانـيـن،،

استغفر الله العظيم واتوب اليه،،لااله الا انت سبحانك اني كنت من الظالمين
.
.
..بالسيارة..
غازي يشد عالدريكسون بيديه وهي ماترد عليه ابد اتصل مرة واثنين وثلاث ونفس الوضع ماترد زفر وهو يتصل:حي ذا الصوت
ابو صايل بابتسامة يسوق متجه لبيت عادل:الله يسلمه ويبقيه ياهلا ياهلا
غازي:وشلونكم ياعم؟وشلون عمتي عساها بخير؟
ابو صايل:بخير عساك بخير انت بشرني عنكم كيفه جسّار الحين عساه احسن؟
غازي:ماعليه الحمدلله ماعليه بس الأدوية مأثرة عليه شوي الدكتور يقول يومين ان شاء الله ويرجع طبيعي
ابو صايل:اجر وعافية اجر وعافية الله يقر عيونكم بسلامته
غازي:امين امين جزاك الله خير اقول ياعم بغيتك ولا عليك امر تمر عذاري
ابو صايل قطب جبينه:وهذا انا متجه لها عـسـى ماشر
غازي:تعبانة شوي ومو راضية تروح المستشفى الا اذا جيت وانت تدري بالطريق يبي له وقت وانا خايف لايصير لها شي
ابو صايل قاطعه وهو يوقف عند بيت عادل:لاتخاف ياولدي هذا حنا عندها ارتاح
ام صايل نزلت بسرعة
سهام نزلت واتجهت لبيت اهلها
غازي:اتعبتك ياعم اتعبتك معنا
ابو صايل:انتم عيالي ياولدي ماله داعي هالكلام
غازي:مسافة الطريق وان شاء الله عندكم
ابو صايل:على هونك وانتبه وانا اتصل بك ان شاء الله
غازي:مشكور ياعم مشكور ماتقصر
ابو صايل:فمان الله فمان الله
غازي قفل واتصل فيها عض طرف شفته بتوتر وهي ماترد واخيرا وصله ردها
عذاري بهمس:نعم
غازي اخذ نفس وهو يكتم غيظه:وينك عن جوالك ليش ماتردين!!
عذاري:وليش ارد مو تبيني اموت!!
غازي تنرفز لاقصى درجة:لا طيبة!!دام فيك حيل تجادلين!!
عذاري عضت شفتها وهي تحبس دموعها
غازي زفر:عذاري روحي مع عمي وبطلي عناد مو عشانك لحالك عشان اللي معك بعد مو انتي تبينه!!
عذاري بكت:خايفة ياغازي خايفة اروح ويقولون راح خلاص
غازي:واذا راح فدا راسك
عذاري ببكا:غازي
غازي:دامك طيبة كل شي ياعوض ياروحي ربك كريم اهم شي انك بخير والله يعوضنا ياعين غازي
عذاري:بس انا تعبت وانا انتظر ابيه ابيه
ام صايل دقت الباب:عذاري بنتي عذاري
عذاري سكتت
غازي:روحي واتركي العناد واللي مكتوب يصير بيصير والحمدلله على كل حال الحمدلله
.
.........****..........
،،الصيدلية،،
جواد واقف وهو ينتظر الصيدلي التفت يطالعها وهي متكتفة ومكشرة كتم ضحكته وهو يطالعها
رهايف بطرف انفها المجروح وشفتها المنفوخة وجنب اليسار المخدوش مكشرة ومتكتفة
جواد اخذ الدوا بعد ماحاسب عليه مد يده ليدها ومسكها وخرج من الصيدلية وهي وراه وهو كل شوي يزفر بصوت يكتم ضحكته
رهايف بزعلها وبشويش تتكلم وبحروف بالقوة تخرج:اضـدححـ.ـك وش رادّدك
جواد انفجر يضحك
رهايف سحبت يدها منه وهي تكمل طريقها بدونه
جواد لحقها وهو يمسك يدها:اول مرة تمر علي حالة مثلك
رهايف بتكشيرة وبنفسها وهي ماتقدر تتكلم:على اسمي رهيفة وجع!!
جواد:طيحة بسيطة جرحت لسانك ولازم غرز اجل لو تكعبلتي بالدرج وش صار!!
رهايف بعصبية وهي تسحب يدها:تفاول علي!!،،تغير وجهها وهي تحبس دموعها من المها،،
جواد بضحكة:بشويش بشويش لاينفتح جرحك ونبلش من جديد
رهايف طالعته وهي تكمل
جواد لحقها وحط يده على كتفها وهو جنبها وضمها وهو يكمل طريقه:بشويش بشويش لاتتكعبلين وتضرب أسنانك بالرصيف وتتكسر عاد وش يحلها وقتها والفتحة الفم الامامية اكبر من الجبهة،،انفجر يضحك،،
رهايف دفت يده وهي تطالعه يضحك
جواد بضحكة:ها ها انتبهي لاتتكلمين محد بيتوجع غيرك
رهايف اسرعت بخطواتها وهي تغلي
جواد لحقها وبضحكه اللي يحرقها:يابنت بشويش بشويش لاتطيحين بشويش
.
..المستشفى..
عذاري بيدها المغذي صادة بوجهها عن ابوها وامها ووجهها شاحب
ام صايل:الحمدلله على سلامتك يابنتي الحمدلله
ابو صايل بنرفزة:يوم تحسين الوجع ليه مااتصلتي اوديك ولا اقلها رحتي بنفسك لو صار لك شي ومحد درا عنك ها!!
عذاري:وش يهمك الحين يبه اهم شي ولدك
ابو صايل بحدة:عذاري!!
عذاري شدت يدها وهي تحبس دموعها
ام صايل طالعته:خالد!!
ابو صايل وقف وبحدة:تدرين اني ماقصدت ولحظة غضب وبالعكس اخاف عليك وانتي قطعة مني!!واخطيت واعتذرت بس راسك يابس وش تبين اكثر هاه وش تبين!!
عذاري ماردت
ابو صايل طالع ام صايل وهو يغلي:خليك معها الليلة ولاجا زوجها أخذتك ماله داعي تنغثين منها،،خرج،،
عذاري نزلت دموعها وهي تسمعه وطالعت امها:الحين انا غثيثة يمه!!
ام صايل سكتت ماردت
عذاري:قولي لي يمه صدق
ام صايل:ارتاحي الحين وبعدين خير
.
.........****..........
.
..بيت بادي..
،،العشّة الخارجية،،
بتال مسلطة عليه جميع أنواع النظرات بهاللحظة مابين عتاب وزعل وقهر وغيظ وحتى حنية تنهد وهو يستجمع شجاعته وبحدته:انا ماني بندمان عاللي سويته ابد
الجد بادي احتدت نظرته
ابو غازي عن يمينه وبحدة:اعقب وانا ولد ابوي!!
نشمي زفر وهو يرفع فنجاله يتقهوى بهدوء
الجد نشمي بحدة:عادل انكعم كبنا نوحي علمه!!
ابو غازي بحدته:وش علمه يبه هاه!!ماوراه غير انه يريدنا نقبل بفاهدن وحنا نتضحك!!
الجد بادي بحدة:معصي دام هذا علمه!!
الجد نشمي زفر بيأس من هالاثنين
الجد بادي بحدة وعينه على بتال:كودك تريد تواجهه اقطع طاريك من يمي اوحيت!!
ابو غازي صد وبغبنته:هاذي تاليتها نقبل به عقب شين فعوله!!
بتال:وانا من متى قلت اقبلوه!!
الجد بادي قطب جبينه
ابو غازي التفت له يطالعه بتكشيرته
الجد نشمي يطالعه بتقطيبة جبينه
بتال:عمري ماقلت سامحوه!!ولاعمري قلت سلموا عليه واحسبوه من اهلكم!!
ابو غازي بحدة:مهبول انت مهبول!!
بتال رفع صوته:بكامل عقلي بس انتم ماتسمعون لي ابد!!
ابو غازي صرخ:وهذا معنى كلامك!!وش فيك انت!!كل اللي تقوله هذا معناه!!
بتال رفع يديه:استغفر الله ماقلته ابد!!لاتقولني شي ماقلته يبه!!
الجد نشمي:وش عنيت يابتال اوجس نوحيك؟
بتال:انا ماني بلعبة عند احد ولاني بمستعد أضيق صدري وأكدر خاطري وانا رايح جاي بينكم احاول أراضي ذا وذا!!
ابو غازي بحدة:ووش تبي برضا فاهد يابتال!!
بتال:ابوي
ابو غازي انخطف وجهه وهو يطالعه
بتال زفر:ادري توجعك هالكلمة يبه لكن يظل ابوي ويحاول يمد حبال الوصل وانت تصده
ابو غازي عض شفته بقهر
بتال طالع جده:وانت ياجد تلوم فاهد وناسي وش سويت بي!!
الجد بادي احتدت نظرته
الجد نشمي بحدة:بتال!!
بتال طالع جده نشمي:وانت ياجد قولي وش اللي مااعرفه للحين بعد؟
الجد نشمي زفر:مابه شي
بتال ابتسم بسخرية:ااااه مثل سالفة عيال عبري اللي مافيه شي ابد!!
الجد نشمي كشر
بتال طالع خاله نشمي:انت اخر واحد أسأله هالسؤال ياخال وتكفى طلبتك لاتكذب علي
نشمي طالعه بجدية
بتال:فيه شي مااعرفه؟باقي شي ماادري عنه؟
نشمي:اقصاها يابتال عيال عبري وهذا هو فاهد سعى وحل الموضوع
بتال التفت ومرر نظره بين ابوه وجده:يشهد الله علي ماابي منك توصلونه ابد ولا ابي منكم تعزونه وتحسبونه منكم اللي ابيه وانا جالس وهو موجود احترام بس احترام ماابي محبة ابد،،وقف،،لاقبلتوا باللي قلته حياكم غيره انا للحين عند كلامي!!،،لف بيمشي،،
الجد بادي بحدة:والخوان وشلون نقدّره وهو خان!!
بتال التفت يطالع جده:تاب ياجد وجاك وهو راضي باللي ناوي تسويه فيه!!
الجد بادي:وش عقبه!!
بتال زفر والتفت يطالع ابوه وهو يسمع جوابه الشعري
ابو غازي:
من تقنع النفس قنعت لو تعاتبها..
ماعاد ترجع كما الاول على العادة..
شين بلا شفّها ماعاد يطربها..
اذا انكفت مالها في تركها راده..
نفسي على ماكرهت ماني بغاصبها..
ماهي على المخادعة والشين معتادة..
من تلدغ اليد في الحفرة xxxxبها..
ماتردّها ثانية والعقرب اسدادة!!..
بتال بضيق ارتسم بوضوح على وجهه:صعب يبه بالحيل صعب؟
ابو غازي يطالعه بحدة وهو ساكت مكتفي بردّه اللي قاله
بتال برجفة صوته:اجل وادعتكم الله من اكبركم لاصغركم
الجد نشمي:بتاااال!!
بتال:وجع سنين ولا وجع كل لحظة طول عمري ياجد،،مشى وتركهم وراه،،
.
،،بـعـد اربـع ايـام،،
.........****..........
يوم جديد
.........****..........
.
..المستشفى..
جسّار شبه جالس ساند ظهره عالسرير وهو يطالعهم بابتسامة
سعود بابتسامة:لا ماشاء الله اليوم وجهك منور احسن من الأيام اللي غدت
حلايا واقفة جنب سعود وهي تطالعه بهدوء
جسّار بصوت هادي وسط ابتسامته:ادري ادري اني صاير مضيء للحد الذي لايُرى
بتال قباله بلبس دوامه متكي ظهره عالجدار ومتكتف:ليه يالحبيب كشّاف ملعب!!
راشد انفجر يضحك
جسّار كشر بوجهه:انت ماترحم لا بسراء ولا بضراء!!
بتال رفع أكتافه لفوق:ارحم اللي يستاهلون الرحمة
جسّار زفر وهو ارتفع ضغطه منه
سعود طالع بتال:كب جسار علامك عليه اغد وحط قنقك باللي انت خابر!!
بتال بوسع عيونه:وانا قلت شي!!
جسّار قطب جبينه:وش صاير؟
راشد بحماس:فاااااتك بتال رمى خالي وجداني بالسجن
جسّار اتسعت عيونه وهو يفز بجلسته ناشئ وضعه مسك جرحه بألم وزفر بصوت
بتال تقدم له بسرعة وهو يرفع عينه على راشد بحدة
راشد:وش دراني بيتحمس!!
بتال مسكه من يده بيمينه ويساره ورا ظهر جسار وهو يرجعه لورا بشويش:شوي شوي خذ نفس
جسّار:ورا ماتشيل جبسك عن ظهري كسرت عامودي الفقري
سعود ابتسم وهو يطالع مناقرتهم
جسّار:وادري مايحتاج تقول!!
بتال شال يساره عن جسار وبتكشيرة:ويومك تدري تبي ترجع للعمليات من جديد!!
جسّار سند ظهره عالسرير وبأنفاس هادية:وش اللي يقوله راشد من جده ولا يمزح علي!!
بتال زفر:بعدين الحين ارتاح ووراك تحقيق اول ماتخف
جسّار تغير وجهه وبحقد:خل يجون انا جاهز
بتال:ارتاح اول
جسّار:مرتاح يابتال خل يجون
بتال رفع يمينه لوجه جسار بسرعة وضم أصبعيه الوسطى والسبابة وهو يطلق الوسطى بقوة ويضرب جبهة جسار
جسّار غمض وهو يمسك جبهته:اااه
بتال:ارتاح اول وبعده يصير خير،،مشى،،
حلايا وقفت بطريقه قبل يخرج
بتال طالعها:فصعونة وش تبين
حلايا بتهديد:اخر مرة تضرب زسار
جسّار اتسعت عيونه باستغراب وهو يطالعها تهدده بس
بتال ابتسم:افا افا يعني الحين هو بس اللي تحبينه!!
حلايا ميلت فمها بحيرة
بتال:وش تبين هالمرة قولي؟
سعود:بتااال!!لاتعدمها علينا!!
حلايا طالعت سعود:اوص
سعود اتسعت عيونه
راشد ضحك:والله وطاح كرتك ياسعود!!
بتال انحنى شبه جالس قبالها:هاه وش تبين امري
حلايا همست له باذنه
بتال طالعها:بــس!!ابشري الليلة عندك
حلايا ابتسمت وهي ترجع جنب سعود
بتال:عاد استأذنكم وراي دوام
سعود:اجيك الليلة؟
بتال وهو خارج:بكيفك سلام
جسّار مرر نظره بين سعود وراشد:وش فيه؟وش صاير؟
راشد زفر:وش اللي مو صاير ياجسار اخر شي تتوقعه بحياتك
سعود طالع راشد:ترا حاله ياراشد ماهي بانقص منهم!!
راشد:داري والله وواضح عليه ماالومه ياسعود
جسّار بنرفزة:وبعدين معكم!!احد يقول لي وش صاير!!
حلايا واقفة جنب سريره:زسار
جسّار طالعها ابتسم وهو يخفي عصبيته:عـيـونـي امري
حلايا مسكت يده وبخوف:لاتخنفر اذّل عليك
.
..بيت طلق..
ام طلق فتحت الباب ودخلت بخطوات سريعة وهي تدور عليه فقدته من البارح من انتهى العزا ماشافته وسألت عنه اخوانه ماشافوه دارت البيت ووقفت قبال غرفة النوم بتردد فتحت الباب:طلق
طلق متمدد على السرير بثوب العزا اللي امس ومتلثم بشماغه نايم
ام طلق تنهدت براحة ومشت له ووقفت عنده وهي تنحني تصحيه:طلق يمّه ياطلق
طلق مارد
ام طلق فكت شماغه عن وجهه وخنقتها عبرتها وهي تطالع وجهه اللي اقرب للسواد انحنت وباست جبينه وهمست:الله يجبر قليبك وانا امك الله يجبره،،مشت،،
طلق عض شفته يكتم عبرته وهو يغمض عيونه بقوة
ام طلق قفلت الباب
طلق سحب المخدة وهو يغطي وجهه يكتم صوت بكاه اللي ماهدا من البارح
.
هليل يتمشى بالقرية يغير جو الحزن اللي خنقه بالبيت وبكل مكان حتى نفسه ويحاول ينسى شوي لكن اللي يصير معه يضيق صدره اكثر كل خطوة يخطيها يتذكر شامة وزعلها منه قبل موتها ماتت وهي زعلانة منه وقف بمكانه وانحنى شبه جالس انفجر يبكي عليها
الجد بادي راجع من الحلال يمشي بعد ماطلب من نشمي يوقف له على مدخل الديرة وهو يكمل طريقه للبيت مشي وبيده عليك موية صغيرة فيها حليب من الغنم وقف وراه وهو يطالعه زفر وتقدم هالخطوة ووقف جنبه وهو ينحني شبه راكع ويحط علبة الحليب جنبه
هليل طالع العلبة ورفع عينه له يطالعه
الجد بادي زفر بصوت وهو يعتدل بوقفته ويكمل طريقه
هليل برجفة صوته وسط دموعه:يوجسون بنيتك توفت وهي مغتاظة منك ياجد بادي صحيح هالوجس؟
الجد بادي وقف بدون لايلتفت له
هليل بدموعه:وشلون ياجد وشلون يصبح صبحك ويمسي ليلك وانت تخبر هاللون؟وشلون قلبك تصبر على هالعلم وشلون!!
الجد بادي زفر وهو يبلع غصته:اللوم ياهليّل اللوم
هليل بلع ريقه وهو يبلع غصته معه
الجد بادي تنهد:ماظليت حي لليوم لولا الملامة ولا كودني فطست من الغبينة وراها من الاول،،مشى،،
هليل هلت دموعه وبصوته المنتحب:مير من الوم من هو اللي ألومه مابه غيري يلام ياجد مابه غيري!!
الجد بادي تنهد وبنفسه:مير الملامة لاابطت تعدم الخير اللي لافين وراها ياهليّل
.
.........****..........
..بيت عادل..
،،جناح غازي،،
غازي فاتح الشنطة وحاطها عالسرير وهو يخرج ملابس لها ويحطها
عذاري خرجت من الحمام عقدت حواجبها وهي تطالعه قبالها وبينهم السرير:خير!!
غازي:الخير وجهك ارتاحي وانا اجهز اللي تبين
عذاري اتسعت عيونها:نعم!!،،اسرعت بخطواتها له،،
غازي:شوي شوي!!
عذاري وقفت جنبه وهي تطالعه:ليش!!
غازي وهو يمسكها من يديها يجلسها:اجلسي طيب
عذاري دفت يديه:جاوبني؟!
غازي:زفر وهو يخرج من ملابسها:عشان ترتاحين عند عمي
عذاري اتسعت عيونها؛لا والله!!،،انحنت وهي تسحب ملابسها من الشنطة وترميها بالدولاب بنرفزة،،
غازي كتم نرفزته:عذاري!!
عذاري:ماابي اروح عندهم ياغازي وانت تدري برايي من البداية!!
غازي انحنى وهو يسحب الشنطة شوي عنه وجلس مكانها وهو يمسك عذاري ويجلسها جنبه
عذاري بنرفزة:لاتحاول معي ماابي
غازي زفر:عذاري سلمتي هالمرة وبأذنك سمعتي وش قالت لك الدكتورة مافيه مرة جاية الحرص واجب!!
عذاري:عشان كذا اقولك لا وبعدين انت معي!!
غازي:هي يومين بس بأروح اجيب امي وامجاد وراجع
عذاري:ايييه!!
غازي:والثاني اخذك فيه على بيتنا الجديد
عذاري ابتسمت:صدق!!
غازي زفر:عاد بعد اللي صار لازم راحة ومافيه درج مجبور وش اسوي
عذاري كشرت:بس ماابي اروح عندهم ياغازي
غازي:كنت أتمنى اسمعها والحين يوم اسمعها ماابيها!!
عذاري اتسعت عيونها:نعمممم!!!
غازي ضحك:ليش أكذب!!طفشت وانا رايح جاي اوديك واجيبك
عذاري صدت وهي مكشرة:مشكور ماتقصر مشكور
غازي مد يده لوجهها بابتسامة وهو يلف وجهها له وماسك وجهها:يمّه يالنفيسة اللي عندك يارب ماتنتقل بالوراثة بس
عذاري ضربت يده بزعل
غازي ضحك:عذاري صح اني طفشت شوي لكن مستحيل اردك وانا ادري بعمتي ووضعها ولأجل عين تكرم مدينة
عذاري ابتسمت وهي تتكتف وبشوفة نفس:ايه الله يخلي لك هالعين
غازي قفل قبضة يمينه ماعدا سبابته وهو يمدها لجبهة عذاري ويدفها بشويش:يالله يالعين اخلصي أبوديك وراي خط
عذاري كشرت ماتبي تروح
غازي:يالله يالله بدون اعتراضات قومي يالله
.
،،المطعم،،
جواد يطالعها بحقد:الحين طالبة كل ذا وانتي ماتقدرين تاكلين ليش!!سرف!!
رهايف وهي متكية باكواعه عالطاولة وسانده فكها على كفوفها وراسمة بابتسامة وبشويش:انا خفيت الحمدلله!!
جواد بتكشيرة:ايه بس اللي طالبته ماراح تقدرين عليه بيوجعك!!
رهايف:يكفي أمتع نظري بشوفتك وانت تستلذ
جواد زفر:اصبر أيوب
رهايف وهي تاخذ من الاكل بشوكتها وترفع له:اااه
جواد اكل بوسط تكشيرة
رهايف اتسعت عيونها:حرام عليك!!نعمة شيل التكشيرة احترمها!!
جواد رسم ابتسامة غصب وهو يمضغ
رهايف بابتسامة:حبيبي انت
جواد قطب جبينه يتصنع الحزن:تدرين عاد ماتهنى لي لقمة وانتي بهالحالة
رهايف كشرت:كذاب لك يومين تبلع وتطقطق علي!!
جواد بتطنيش لكلامها:عاد مايصير اكل واترك كذا!!
رهايف رجعت بظهرها لورا عالكرسي وبشك:وش بتسوي!!
جواد بابتسامة:امضغ لـك
رهايف طلعت روحها وهي تتخيل
جواد كتم ضحكته وهذا اللي يبيه:يعني احنا سول ميت عادي الوضع بالعكس هذا قمة الحب والوفاء
رهايف وهي تحس بغثيان:جواد اسكت الله يعافيك
جواد وهو ياخذ بالشوكة كذا قطعة من الدجاج اللي قدامه ويفتح فمه لأوسع شي وحطها بفمه
رهايف:جواد اكرم النعمة!!
جواد بفمه المليان:ماي لڤ ماي سول ميت!!
رهايف بنرفزة:اذا صادق جوّع نفسك مو تطلب اللي احبه قاصد!!
جواد بلع اللقمة وتغير وجهه وهي وقفت بحلقه
رهايف انخطف وجهها وهي تعطيه عصيرها
جواد شرب وزفر بعد مانزلت لقمته
جواد طالعها:ذنبك
رهايف بغرور:الحمدلله عشان تتأدب معي
جواد ارتفع حاجبه:نعم!!
رهايف وهي حست جابت العيد:لا مو قصدي يعني اقصد
جواد قاطعها:وش قلتي؟اللقمة اثرت علي
رهايف سحبت كليتها وهي تشفط العصير من المصاصة مرة وحدة وتركتها وهي تغطي فمها بيديها بوجع
جواد ابتسم وهو يوقف:مشينا بس اشتري لك غيره برا
.
.........****..........
ام جـلاجـل
.
هليل يمشي متجه لبيتهم مر من قبال بيت الشيخ والتفت للسيارة وهو يطالعه كمل طريقه وهو يوقف عنده:السلام عليكم ياعم
مناور واقف عند السيارة يصلحها اعتدل وهو يلتفت له ابتسم:وعليكم السلام والرحمة هلا ياهليّل ياهلا يسرني عنكم وشلون ابيك واميمتك اليوم؟
هليل زفر:الحمدلله الحمدلله
مناور:الله يجبر مصابهم الله يجبره
هليل:عـسـى ماشر ياعم ارعيك تولم بهالددسن؟
مناور ابتسم:اَي بالله غادين يم المحافظة اجيب غيث
هليل ابتسم:كبوه!!
مناور:الحمدلله سترها ربك
هليل وهو يحاول يطلع نفسه من جوه:تريح ياعم انا باغدي يمه
مناور:لا خلك عند امك وأبيك
هليل:ماني بمطولن ابدن ياعم كبني اعمل مااريد
مناور:هليل!!
هليل:تكفى ياعم
مناور زفر وهو يطالع اصراره مد له المفتاح
هليل:مالي به اغدي بسيارتي،،مشى بخطوات سريعة متجه لسيارته،،
.
..المستشفى..
بتال واقف برا غرفة جسار متكي بظهره عالجدار متكتف ينتظرها اعتدل بوقفته ونزل عينه عالارض وهو يسمع فتح الباب
ام غازي خرجت ابتسمت وهي تطالعه:بتال
بتال رفع عينه لها وابتسم وهو يمشي لها:ياعيون بتال،،انحنى وهو ياخذ السلة من يدها بيمينه،،
ام غازي بابتسامة:سلمت سلمت
بتال بضيق:خلاص بتروحون اليوم؟
ام غازي:ان شاء الله
بتال:ماشبعت منك يمّه تعالي بيتي الليلة
ام غازي:انا ببيتك!!
بتال كشر بوجهه:بيت جدي ماهو بيتي!!
ام غازي ابتسمت:يومك زعلان وقطعت علاقتك معهم وش له تقول له جد!!
بتال سكت
ام غازي:بتال
بتال:تكفين يمه قفلي الموضوع
ام غازي زفرت:الله يهدي النفوس ياعيني الله يهديها
،،خرجوا من المستشفى،،
بتال:يمه تعالي عندي
ام غازي:ان شاء الله مايصير خاطرك الا طيب
بتال ابتسم بوناسة:صدق!!
ام غازي بتتكلم والتفتت للصوت الحاد اللي وصلها
بتال زفر وهو يلتفت له
ابو غازي بحدة:وسمية!!وش فيك تاخرتي!!اخلصي علينا!!
بتال نزل السلة وباس راسها:اعذريني يمه مااقدر أوصلها عنك
ام غازي تنهدت:معذور ياعيني معذور
ابو غازي بحدة:اخلصي يامرة!!
بتال رفع كفها بيمينه وهو يبوسها:استودعتك الله الظاهر مالي نصيب بشوفتك قبل تسافرين
ام غازي انعصر قلبها عليه وحاوطته بحضنها
ابو غازي شهق:وسمية!!!!
ام غازي:استودعتك الله ياعيني انتبه على نفسك وتراني وصيت بخوت على مرق اللحم لك وعطيتها قيمة الذبيحة لاتترك منها ولا شي سمعت
بتال ضم امه بكل قوته لصدره وهو يستنشق بعمق ريحتها مايدري متى اللقى معها المرة الجاية
ام غازي تركته:فمان الله ياعيني فمان الله
بتال تركها وهو يطالعها بانكسار التقت نظراته بنظرات ابوه المحتدة وارتسمت على وجهه ملامحه المحتدة مثله بعناد ومشى
ابو غازي عض شفته بقهر منه وركب السيارة وهو يقفل الباب بكل قوته وبعصبية:لازم التأخير يعني لازم!!
.
..السيارة..
هليّل يسوق وهو ساكت
غيث يهمهم مبسوط زفر بصوت:ارعيت ارعيت!!هماني اوجست يمك مردها أتروع وتعود عن قنقها!!،،ضحك وهو يزفر نفس عميق من نشوة انتصاره اللي تحتويه بهاللحظة،،ايه ياغيث ايه صحيح وجسك يحصل!!،،التفت لهليل وهو يطالعه ساكت تنهد،،مأجور يااخوي مأجور عظم الله اجرك
هليل زفر:جزاك الله خير
غيث وهو يوجه نظره لقدام:ايه ياويل قليبي عليش ياشامة ايه
هليل كشر بوجهه
غيث بضيق:وش لش بطلق هذاش اخذتي ظلميته عنه واشيب عمري عليش!!
هليل عض شفته وهو يسترجع كل شي من البداية غيث وسالفته مع البير وسالفة بخوت وشهادة طلق وزعل شامة اللي كان هو السبب الرئيسي اللي زعل اخته عشانه
غيث:ياقلبي عليش مير الطاهر طاهر عسى روحش للجنة حسيبة الله ياطلق الظلوم حسيبك الله
هليل وقف السيارة على جنب الطريق
غيث قطب جبينه باستغراب:عـسـى ماشر!!
هليل وهو يغلي وبدون لايطالعه:اندر
غيث بصدمة؛هاه!!
هليل التفت له وصرخ:اندر ياغيث اندر
غيث كشر بوجهه:علامك!!
هليل بغيظه؛اندر لااقبرك ذالحين ياغيث اندر!!
غيث فتح الباب:هين ياهليّل هين!!،،نزل وقفل الباب بقوة وراه،،
هليل حرك وتركه بوسط هالصحرا لحاله
.
..المستشفى..
جسّار يتأمل بخوت اللي جالسة قباله وهي تأكله
بخوت انتبهت له
جسّار شال عينه وهو يرسم التعب على وجهه
بخوت زفرت وهي تنزل الملعقة:كل انت
جسّار كح وتوجع صدق
بخوت وهي تاخذ الملعقة وتاخذ من الشوربة وتمدها له وسط زفرتها:الكذب خياب راع كذبتك وش عملت بك
جسّار وهو يهدي صوته:تعبان يابخوت احسني دايخ
بخوت مد الملعقة له اكثر وهي تنتظره ياكل:بسم الله عليك بلكن من الدوا
جسّار:دواي معروف عند مين
بخوت ميلت فمها وهي فاهمة قصده وتطالع الاكل وهي تقلبه بالملعقة:لا الحمدلله عني انك ازين وياعله دايم
جسّار ابتسم وهو يطالعها
بخوت بتردد:جسّار
جسّار بابتسامته:عيونه
بخوت اخذت نفس ورفعت عينها له وبجدية:به علمن لابد تعلمه
جسّار قطب جبينه:اسلمي؟
بخوت:كبيت غيث يغدي
جسّار مو فاهم بالضبط قصدها وبشكه:كيف يعني؟
بخوت تركت الملعقة ورفعت عينها له:تنازلت عنه
جسّار بصدمة:عن مين!!
بخوت:عن غيث ياجسار عن غيث
جسّار بعصبية:ليش!!
بخوت مدت يدها له بتمسك كتفه:بالهون على روحك بالهون
جسّار ضرب يدها يدفها عنه بعصبيته؛اتركيني عنك الحين وجاوبيني ليش تنازلنا عنه ليش!!
بخوت نزلت يدها وضمتها وبهدوءها:راع وش غدا بك راع!!
جسّار بقهره:وش عليك مني!!
بخوت نزلت عينها وهمست:وشلون ماعلي منك!!
جسّار بصراخ:ليش تنازلتي ليش!!ماصدقنا نمسك عليه شي تضيعين تعبنا كله بلحظة خوف منك ليش ليش!!
بخوت رفعت عينها لها وسط نظرتها الحادة وبعصبية وسط صوتها اللي ارتفع:ايه أذل منه ايه!!تهددني وعمل تهديده وش تريدون مني احتريه!!تموتون إنظارتي(قدام عيني)واحدن ورا الثاني!!
جسّار بعصبيته:اجل خافي منه وسوي اللي يبيه!!تحسبين بيتركك بحالك!!
بخوت بثقة:مايقدر يتعرضني
جسّار:وواثقة!!وش سر هالثقة!!
بخوت:ماذل من الشرطة مير انه بيذل من المنقود ووجس الديرة يردّه
جسّار يطالعها بغبنته
بخوت:وبه علمن أبدى من هالعلم
جسّار بحدة:وش باقي بعد؟
بخوت:لاتشاويت(لاخفيت)وزانت امورك أريدك تحللني من حلّك
جسّار قطب جبينه:نعم
بخوت:طلقني ياجسار تطلقني
جسّار اتسعت عيونه بصدمة من طلبها:نعم!!!
.
..المركز..
هليل واقف قبال المركز يروح ويجي بتردد اخذ نفس وهو يهدي باله هذا الحل الوحيد قدامه حتى يسويه اتجه للمركز بخطوات ثابتة دخل اول مكتب قابله ووقف قبال الضابط:انا لافين اوجس علمن داسّه(مخفيه)من سنين
الضابط طالعه باستغراب:الأمور ماتمشي كذا صبر اخوي انتظر مثل الباقين الى مايجي دورك
هليل بعصبية:مابي صبر غادين اوجس يمك علمن يروع كبني اوجسه قبل أهون
.
.........****..........
الليل
.........****..........
.
..بيت غيث..
هدية بوجهها الشاحب تكنس البيت النظيف من اساسه من قهرها من درت بالخبر عضت شفتها وهي تكتم عبرتها كانت مستعدة تنتظره وتبدا معه حياة جديدة وهو نظيف تبي حياة كلها حلال وخير لكن خابت ظنونها من عرفت بخرجته من السجن اعتدلت بوقفتها وهي تسمع صوت عند الباب قطبت جبينها وهي تتجه له:مـن؟
غيث:علامش موصدة الباب بالحيل!!
هدية قشعر جسمها من وصلها صوته وبلعت ريقها
غيث:فكي لي رجلش!!من غيره!!
هدية لفت عن الباب وجرت لغرفتها
غيث ضرب عالباب بقوة ومن بين اسنانه:فكي ياهدية ازين لش
هدية رجعت للباب بخطوات سريعة وقفت ورا الباب وهي ترتب شكلها اخذت نفس وهي تفتح الباب وزغرطت:ياحيّه ياحيّه
غيث ارتفع حاجبه وهو مميل فمه بابتسامة جانبية وزفر بسخرية وهو يدخل والتفت لها قباله يطالعها
هدية وهي ترد الباب بتقفله:مبروك مبروك ياعله،،انقطع كلامها وشهقت وهي تحس بسحبته،،
غيث مسكها من طرف كوعها وسحبها بقوة له ومن بين اسنانه بابتسامة:لفاش موتش ياهدية لفاش انا تغدرين بي انا!!
هدية وهي تطالعه بحدة:كود ماارعيت الخطا افك عويناتك وادعيا تراعيه
غيث ضحك:وانا بفكك لش عظامش على سواد وجهش
هدية ابتسمت وهي تنتفض من الخوف:ماتحرز تعمل بي شين ابدن ياغيث
غيث احتدت نظرته وهو يسمع كلامها اللي عكس خوفها اللي ينطق به جسمها بيده:وليش مااحرز عليه!!
هدية دفت يده وهي تنزل يدها وطاح خنجرها بكفها وبحدة:عليم الله لاأوسمك قبل تنوشني
غيث ضحك:ماانتي بهينة يابنت الـعـم
هدية تطالعه بحدة
غيث مد يديه ومسكها وهو يسحبها بقوة له وسط ابتسامته:ابشري الفيش بجميلش مرتن وحدة
هدية رجفت برعب وسط عيونها اللي غرقت بدموعها وهي تطالع عيونه
مناور دخل وصرخ بحدة:غيث!!
غيث التفت له وهدية بين يديه
مناور بحدة:كبها!!
غيث:وليش اوحي لك علم وانت غادين معها!!
مناور كشر بوجهه:اعقب!!
غيث تركها من جهة وظل ماسكها من يمينها وهو يطالع ابوه:ليش أكبها!!كود توسدت وسادتي تغدي يمي وتذبحني!!لاااا انا اخبر وشلون اعمل أموري!!
مناور مشى له بسرعة وهو يسحب هدية من يده بقوة ويرجعها وراه وبحدة:انخبلت!!وش ذبحته!!ماانت بصاحي عاثت علومك وانت بالسجن
غيث:ايه تعوث يبه تعوث دام ابوي هو اللي غادين بمرتي اللي تشهد علي!!
هدية بعصبية:ايه انا اللي دليتهم يمك كودك على باطل نوعيك
غيث مد يده يحاول يمسكها وهو ناوي يضربها:انا اعلمش وشلون تقدرين رجلش
مناور دفه بقوة لبعيد وبحدة:بالاول علم روحك وشلون تقدر ابوك!!!
غيث طالعه:ابوي ماحشمني كود احشمه!!
مناور اتسعت عيونه:وشو!!
غيث:مامن حشيمة للي مايحشمنا ياشيخ!!
مناور بعصبية:اغد برا البيت برررااا
غيث زفر بضحكة:بيتي!!وشلون تقلعني منه!!
مناور:ماهو ببيتك تعقب بيتها
غيث بتكشيرته:وشو!!
مناور:وماتطبه وهي ماكبتك تغدي يمه
هدية:برا اغد برا بيتي برا
غيث بابتسامة:هين ياهدية هين مردي اعود ومحدن يمش واعلمش من هو غيث اعلمش،،خرج،،
.
..بيت بتال الجديد..
،،البيت عبارة عن غرفة صغيرة لها باب تفتح على ممر نهايته مطبخ صغير وهالبيت له بابين باب الدخول للبيت وقباله تماما باب يخرجك لبرا البيت وتلاقي الحمام متصل بالبيت لكن بابه من ورا البيت يعني لازم تخرج من البيت حتى تروح له وبتّال بحكم مافيه مكان للجلسة ضبط مشب صغير وجلسة بسيطة برا البيت من جهة باب الدخول،،
غازي اللي اول مرة يشوف بيته الجديد يطالعه بضحكة:عساك مبسوط بعنادك؟
بتال طالعه بتكشيرة:ايه مبسوط اذا عنادي على حق مبسوط،،صد عنه،،
سعود:غازي كبّه يسده مابه
بتال:ليش وش فيني!!مافيني الا العافية الحمدلله!!
غازي وهو يتلفت ويطالع الدنيا حوله ظلام وخلا مافيه احد قريب منه ابد ضحك وهو يطالعه:والله هذا سوء المنقلب!!
بتال كشر
سعود شهق:غازي علامك غادين يمّه تزيده!!
غازي:والله ماهو بنيتي شي!!لكن هذا الحقيقة المرة!!
بتال:كيفي والله المكان ويازينه اهيجن متى ماابي العب سوني واصارخ على كيفي مافيه احد يستقعد لي والامور على الـكـيـف
غازي قطب جبينه وهو مميل فمه بعدم رضا:كيف حالك يابتال؟
بتال يطالعه باستغراب:وش كيف حالي!!الحمدلله طيب!!
غازي يطالعه ساكت
بتال زفر وهو من البداية فاهمه بس يستغبي اعتدل بجلسته وهو يرفع الدلة بيمينه
سعود اخذها منه:هات انت دوبك بروحك
بتال جلس وهو يتحاشى يطالع غازي
سعود صب لغازي ومد له
غازي اخذ الفنجال:سلمت
بتال وهو يطالع الظلام قدامه بعد مااخذ الفنجال من سعود:
ياخي لا تنشد عن الحال ياخي..
‏حالي وسط ياللي عن الحال خصيت..
‏في خاطري ضيقه وفي خاطري شي..
‏شيّ يراودني ليا اصبحت وامسيت..
‏نسبر عذوق الغرسه اللي على النيّ..
‏اللي تخاطفها يدين العفاريت..
‏حلمت واليا الميت يبكي على الحي..
‏وانا احسب ان الحيّ يبكي على الميت..
سعود بابتسامة وهو يتقهوى:دامك عملتها أصمل!!القشران يريد لهم خلقن اقشر منهم واصبر
بتال زفر بضيق:داري ياسعود داري حتى جدي يهون مقدور عليه لكن وجه ابوي للحين مانسيته ابوي،،سكت ماكمل كلامه وهو يزفر،،
غازي ابتسم:هونها وتهون وبعدين هذا عادل وتعرفه وانت ولده ورأسك أيبس من راسه تجيبه الأيـام تجيبه
بتال ساكت مارد
سعود وقف:عاد استأذنكم
غازي التفت له بوسع عيونه:بدري ياولد!!
سعود بابتسامة:وراي دوام بكرة هني اللي متريح
غازي ابتسم:درب السلامة
سعود مشى:يالله فمان الله،،ركب سيارته وابتعد،،
بتال وعينه عالنار:غازي
غازي التفت له:نعم
بتال ماطالعه عينه عالنار:خايف ياغازي خايف
غازي قطب جبينه:من وش!!
بتال:خايف ان البكا على الحي يصير لي ياغازي
غازي تنهد:تدري عاد انت وش ينفع معك
بتال التفت له بأمل
غازي ابتسم: وكل أمرك للكريم ويسمح أمـرك..
كل ما دكت علـى بالك روابـع..
وافرد همومك على سجـاة صـدرك..
لا تضيقها وحلم الله واسع..
واعرف اسباب الردى والطيب وادرك..
واحسب حسابك من الليلـه وطالـع..
لا تطاول في قصير الشبر شبٌرك..
ولا اتنازل عن شيمك ولا اتراجع..
بتال زفر بضحكة خفيفة
غازي بابتسامة:ها عرفت اجيب راسك ولا ماعرفت؟
بتال وهو يتمدد على ظهره ويطالع السما:محد يجيب راسي غيرك انت واللي بتاخذني
غازي ضحك:مستحيل تعترف بأفضالي عليك لازم تدخل احد!!
بتال حرك عيونه يطالعه بتكشيرة:من متى لك أفضال علي انت ووجهك!!!
غازي اتسعت عيونه:ابوك يالجاحد!!
بتال:تقهوى واسكت لااطردك بس
غازي شهق:ولد ابوي فيها طردة بعد!!
بتال وهو يطالع السما:براحتك ياتقلب وجهك ياتتقهوى وانت ساكت
غازي كشر بوجهه وبسخرية:ايه انت عاد يبي لك احد مع هالوحدة المحزنة القاتلة اللي انت فيها صراحة
بتال كشر وهو يطالعه:نعم!!
غازي زفر:لكن انا الشكوى لله مجبور اجلس عندك البيت فل زحمة هناك
بتال ابتسم:طبعًا مافيه كرامة!!
غازي قام بعصبية وهو ياخذ الدلة وفنجاله معه ومشى مسافة وهو يجلس قبال بتال بنهاية ضو النار بزعل
بتال طالعه وضحك:وش ذا أقصى حدود الكرامة!!
غازي بنرفزة:ورب البيت تزعل بتال خلاص عاد!!
بتال زفر:اتركني انفس عليك شوي ياغازي لااموت من الضيقة
غازي يطالعه بتكشيرة
بتال طالع السما زفر وهو يجر هجينيته:
الـبـارحـة مـزعـلـيـن الـنـوم..
لـو مـر مـانـي عـلـى فـاقـة..
مـن بـيـنـنـا صـار لـمـس خـشـوم..
لـيـن الـزعـل بـيّـن أخـلاقـه..
بتال زفر:ايييههه
غازي كمّل وهو يأكد له ورا الصبر الفرج:
أخـيـل بـرق سـنـاه يـزوم..
حـتـى أقـبـل الـصـبـح بـاشـراقـه..
.
.
<اللهم صل وسلم على نبينا محمد>