𝐏𝐨𝐞𝐦𝐬 𝐂𝐨𝐥𝐥𝐞𝐜𝐭𝐢𝐨𝐧

ELEKSYON

Taong dalawang libo dalawampu't dalawa
Panahon nanaman ng madla upang magpasya
Pipili ng lider na sa bansa'y mangangasiwa
Sa mga mamamaya'y mayro'ng pagkalinga

Dumating na ang oras na pinakahihintay
Resulta ng botoha'y nasaksihang tunay
Karamiha'y natuwa sa naluklok sa unang hanay
Ang iba'y nabalisa't napuno ng lumbay

Bayang Pilipinas, O dakila ka sa lahat
Mamamayan mong Pilipino'y nahati sapagkat-
Hindi magkapareho, hindi kumbinsido
Ang hinahangad na pag kakaisa'y nauwi sa gulo

Namayani ang salitang 'RESPETO'
Ngunit bakit tinutudyo
Mga taong taliwas sa sinusuportahang partido
Hindi ba't ang dapat ay mahalin ang bansa at kapwa Pilipino?

Ang resulta ng botohan ay bunga ng pinaniniwalaan
Ang mamayan ay binigyan ng kani-kaniyang karapatan
Isaisip na ang inihalal na kandidato'y aangat sa mamamayan
Naglalayong magkaisa ang sambayanan

Hindi magkaibang kulay ang sisira sa pagkakaibigan
Hindi kapwa Pilipino ang tunay na magkalaban
Ang resulta ng eleksyo'y hindi magiging batayan
H'wag mangamba dahil may Dyos na hindi tayo pababayaan