جَفا

Part 22

هنوف:
دخلنا الخيمه ندور حل وقال سحمي "بنرجع جفا انا وهنوف لين تخلصون يلي عندكم" قاطعته وقلت بترجع وحدك تقصد، ناظرني فيصل بيأس وكانه عارف اني ببقى على كلامي وما برجع مكان الا معه وقال "هنوف ما ينفع تبقين هنا كله يوم" قلت وانا على رفضي : وعشانه يوم ببقى معك! قاطعني سحمي "ياليل انت شفيك ؟ افهمي الكلام زين -" وقفت مكاني بعد ما بديت اسمع صوت سياره ثانيه قريبه من الخيمه ورفعت اصبعي بوجه فيصل وانا احاول اسيطر على دموعي وقلت لو مت ولله ما اسامحك وانسى انك تعرفني حتى!وقفت لحظات اراقب نظرات فيصل يلي كانت كلها استغراب ، خرجت من عندهم وما كان في اي جوااب او نقاش بعد يلي قلته لفيصل لقيت عزيز و طلال بوجهي بس ما عطيتهم اهميه واتجهت للخيمه الثانيه يلي كلها ذكريات لي مع النات ..

فيصل:
سرحت للحظات افكر بكلامها وكيف قالت انها ما بتسامحني ..ودخل عزيز وطلال بنظرات استغراب لسحمي ويسألونه عن سبب جيتهم بس بين كلامهم ما كان تركيزي عندهم الين هزني عزيز وهمس "شجاب هنوف هنا؟" طفيت الدخان وجيت بقوم بس سحبني وكمل كلامه "اعرف وش تبي صدقني محد بيفهمك مثلي، باجي معك ونشوف حل"قمت ادور عليها وعزيز وراي كنت للامانه اوثق بحلوله من ذي الناحيه ، دخلت الخيمه الثانيه وكانت جالسه تدور على شي تحمحم عزيز عشان تنتبه له ودخل بيننا وقال "هنوف وفيصل وقفوا عنادكم ذا كانكم بزران واسمعوني زين، خلنا نركز على المنطق مو العناد!" قاطعته و انا منقهر من كلامها :انت بس تبين تعاندين يا بنت استهدي- قاطعتني وهي تصارخ "انا بس يلي ابي اعاند! تشوف نفسك يا راس الثور؟ تشوف تصرفاتك!!" قاطعها عزيز "يا ليل جايين نحل المشكله!!" دفته بعيد عن طريقها وجت بوجهي ومسكت ملابسي وحاولت تدفني بس كانت كل محاولاتها بدون فايده ،قالت بصوت يرجف وهي تضرب على صدري "انت ما فيك ذره مشاعر،ما تحس؟ ما تحس بكل يلي مريت فيه!تكفى يا فيصل مقدر اتعامل معك وانت كذا-" قاطعتها ومسكت اكتافها وجلستها على المفرش يلي كان وراها ولاول مره حسيت بكلام يضرب قلبي بهالقوه كلامها كان كافي يسكتني.. كمل عزيز كلامه وهو يجلس "هنوف تبي تبقى هنا و انت يا فيصل تبيها ترجع غَطا صح؟" هزت راسها بمعنى ايوه قال بعد سكوت طويل "بيبقى سحمي مع هنوف بالبر تنتظرك ترجع من مصيبه بكرا وبنرجع جَفا مع بعض" قاطعته هنوف"مصيبه بكرا!"تحمحم عزيز وكمل كلامه"شغل بسيط يا بنت المهم موافقين على ذا القرار؟"ناظرتني وهي توجه الكلام ل عزيز "انا راضيه" وجه عزيز نظره عليي وقال "ها فيصل؟" تنهدت وهزيت راسي بمعنى اي بوسط نظرات عزيز يلي كانت كلها فخر و ثقه رغم ان قلبي رفض انها تبقى بجفا كلها..

هنوف:
بعد دقايق قليله خرج عزيز وقال لفيصل انهم بيبدون يتجهزون ، ناظرني فيصل بجديه وقال "هنوف لا تخليني اندم اني رضيت ، لا تخرجين من الخيم ولا تفارقين سحمي خليك بخير انت الشي الوحيد يلي ابي ارجع عشانه " قربت له وانا اناظر عيونه وادعي بقلبي انها مو اخر مره اشوف هالعيون همست له بعد سكوت طويل :انا واثقه فيك يا فيصل.. بدا يتجنب عيوني وبتجنب الكلام وانا فاهمه انه يكره الوداع من بعد ما ودعني بخَطا جا بيخرج بس مسكت يده وقلت :فيصل انا اسفه اني قلت انك ما تح- ناظرني بأبتسامه خفيفه وشد على يدي وقال "جعلن روحي تفدا هالعيون يا هنوف" ابتسمت من كلامه وناظرته وهو يخرج من الخيمه وبدا يتجهز معهم، وقفت بعيده عنهم اسمع كلامهم..
عزيز:وش الخطه الحين؟
طلال:بنتوزع باخر مقرات العصابه ونحاول نخلص على يلي نقدر عليه -
فيصل:وبهالوقت تكون انت يا عزيز بمركز الشرطه والرئيسي وتسوي يلي قلنا عنه.
طلال:بنجتمع الساعه١٢ الليل قدام الطريق السريع لجَفا وبنرجع البر بدون ما نفقد احد انتبهوا..
سحمي:المهمه خطره شوي عليكم خل تركيزكم عالي وتوقعوا كل شي
فيصل:سحمي بتبقى هنا حتى لو تشوفنا نموت قدام عبونك تبقى عندها فاهمني؟
عزيز:لا تربطك مثل المره الماضيه يبزر انتبه
ناظره طلال وهو يضحك :ما هقيتها منك يا سح-
قاطعهم عزيز بجديه: معنا ١٤ ساعه من الحين مشينا..
ناظرني فيصل بسكوت كان يخليني اسمع كلام قلبه الين هزه طلال وقال (مشينا)،
بدت السياره تتحرك و سحمي متجه للخيمه يلي انا فيها جلس ينظف الاسلحه بدون لا يناظرني وجلست على المفرش المقابل له سرحت شوي بتفكيري الين قاطعني "لو بتقضين الوقت ذا تفكير ما عمره بيمضي" تنهدت وانا اعدل جلستي وسألته شتبيني اسوي؟ ابتسم وكمل شغله وهو يقول "سولفي لي عن فيصل" ناظرته بعدم فهم وكمل كلامه "انت و هو تختلفون كثير عن بعض ورغم اني ما اصدق بالحب بس انا شاهد لكم " وترني كلامه وقلت وانا احاول ابعد شكوك الحب عن باله: من قال لك انه حب شفيك انت ضحك وعدل جلسته وقال "انا يلي اعرفه ان اهل الحب جملتهم (الحب مو عيب) لو ما تحبينه ليه رجعتي جَفا؟" للامانه كلام سحمي كان دايم منطقي ويلي خلاني اكمل بالسالفه انه كان يفهم اني اتوتر من العيون فكان ما يرفع راسه عن سلاحه بس ذا ما يمنع اني اكمل انكاري للحقيقه وقلت: اقولك ما احبه رفع راسه عليي وقال "ناظري عيونه زين وقولي له انك ما تحبيه"..