ديما ( تترجى): عمتي الله يوفقك .. كلميه .. أنا ما أبغى أتزوج الحين ..
موضي ( تهز راسها): والله يا ديما .. ما بيدي حيلة .. أبوك وتعرفينه راسه عنيد .. واللي في راسه بيسويه ..
ديما تكتف يدينها : أوف ..
موضي : طيب .. قولي لأمك تكلمه..
ديما : أمي موافقة عليه .. خصوصا أنه من طرف مدللها حمود ..
دلال : ليه ما تروحين لـريم .. أبوك يسمع لها ..
ديما : ما أدري .. أخاف من أمي ..
دلال: إذا بتخافين .. لا تترجين شيء يصير ..
ديما تأففت وقامت .. نزلت إلى دورهم شافت يوسف في الصالة يطالع التي في .. قعدت جنبه
( رمت نفسها على الكنبة ) ..
يوسف (يطالع التي في) : ما في نتيجة ..
ديما ( بيأس): لا ما تبي تتدخل .. أوف وش هالحالة ..
يوسف التفت عليها : قلت لك من قبل .. ما لك غير ريم ..
ديما : أي بس ...أمي ...
قاطعها يوسف : لا بس ولا شي .. تذكرين لمن كنت أبغى أدرس تقنية أبوي وش سوى .. ما أقنعته إلا ريم .. وإذا على أمك ..هي ما عندها إلا مدللها حمود .. وما يهما أحد غيره ..
ديما: أنت شايل عليها ..
يوسف : لا شايل ولا شيء .. هي ماخذة مني موقف .. لأني أحب ريم وأحترمها ..
ديما : وهي بعد أمك..
يوسف ( يضحك): مرحبا أم .. صار لي 3 أيام من جيت .. ما قعدت معاي حتى نص ساعة .. تسولف معي .. تحسسني أنها مشتاقة لي .. ما لك غير ريم .. روحي لها ..
ديما (مترددة): أوف .. بروح ..
دقت ديما الباب لكن ما أحد رد .. افتحت الباب وادخلت .. ريم كانت نايمة .. مشت ديما إلى السرير وحاولت تصحي ريم .. لكن ما فايدة .. اسحبت البطانية ..
ريم ( بعصبية ): أووه .. ديمو وجع .. خليني أنام .. ما رجعت إلا الفجر ..
ديما (تترجى): ريمي .. أبغاك في موضوع مهم .. يا الله قومي ..
ريم تقعد وتاخذ البطانية من ديما : إذا قعدت .. يصير خير ..
ديما : لا.. لا ..( وتقفز على ريم تهزها .. ريم لا شعورياً امسكت يد ديما ولاحتها على الأرض )
ديما ( تتوجع): أي .. عورتيني ..
ريم تنتبه .. تقوم تساعدها وهي تضحك : أكثر من مرة قلت لك لا تصحيني إذا كنت نايمة .. إلا إذا في زلزال يهز الأرض..
ديما تدلك ذراعها : فيه زلزال بيهز حياتي هز ..
اقعدت ريم جنب أختها على السرير : خير وش هالزلزال اللي بيهز حياتك ..
ديما ( بحزن ): أبوي يبغى يزوجني .. وأنا ما أبغى ..
ريم تهز راسها : وين المشكلة .. قولي له أنت مو موافقة ..
ديما : ما يهمه .. مُصر خصوصا أنه راح يشارك أبوه ..
ريم ( تفكر): يشاركه .. هو من ولده ..
ديما : ولد خالد عبد الله ال ....
ريم (تهز راسها) : تدبير مدلل أمه ..
ديما تهز راسها ( يعني أي ) .. ضمتها ريم ( ولا يهمك .. ما يصير شي غصب عنك )..
دخلت الخادمة عليهم بسرعة : miss please help
راحوا معها وانزلوا الدور الثاني .. اسمعوا صراخ فهد .. شافوا حمد يضرب فهد .. ريم راحت له .. امسكت ذراعه ولوتها ورمته على الأرض وركبتها على ظهره تثبته.. وهو يصارخ .. ديما احضنت فهد..
حمد ( يصارخ): قومي عني ...
ريم : أكثر من مرة قلت لك مراجلك .. طلعها على اللي قدك ...
حمد يحاول يقوم : قومي عني .. عادة نفسك بنت .. أنت ...
ريم( تلف يده وتضحك بسخرية ): بنت.. وما أنت بقدها ..
قامت عنه .. قام وصار يرجع لورا وطاح .. جات أمه بسرعة ..
منيرة ( خايفة وراحت لولدها): وش فيكم .. وش صاير ..
ريم ( بسخرية): ولدك يستعرض عضلاته ..
حمد ماسك ذراعه : هالمتوحشة هذه ..
ريم (بعصبية ): يا مراة خذي ولدك .. لأدفنه لك هنا ..
منيرة ( بحدة): بلا طولة لسان .. وش صاير ..
ريم ( توجه كلامها لحمد): وربي أن لمست فهد مرة ثانية لأقطع يدك ..
حمد بحدة : مو شغلك .. هذه ولد قليل أدب وبربيه ..
جاتهم موضي خايفة : خير وش صاير ..
ريم بتروح له .. امسكتها موضي : أنت رب نفسك أول .. بعدين تكلم ..
منيرة بحدة : ريم احترمي نفسك .. لا تشوفيني ساكتت لك ..
ريم بسخرية : لا خفت ..
موضي تهدي ريم : ريم .. اذكري الله .. وش صاير لكم..
ريم تناظر لمنيرة : خذي مدللك وروحي .. لأقبره لك هنا .. (تناظر حمد اللي واقف ورا أمه) وأنت ان مديت يدك عليه مرة ثانية .. قطعتها وعلقتها في رقبتك .. طس ..
منيرة تبغى ترد عليها لكنها خافت .. امسكت ولدها وراحت .. فهد ركض لـريم ولمها .. هو يوصل لفخذها .. لمته ريم .. موضي التفتت عليهم ..
موضي ( باهتمام) : خير وش صاير..
ريم ( تمسح راس فهد): هالحقير ضرب يوسف ..
موضي تهز راسها : لا حول ولا قوة إلا بالله ..
فهد يمسح دموعه : أنا كنت ألعب بلايستيشن وهو جاء يصارخ علي أني كنت مطول على التلفزيون ..
نزلت ريم علشان تصير في مستوى طوله .. وباست راسه : خلاص حبيبي .. ما عليك منه ..
فهد : أنا إذا كبرت بصير مثلك .. أسوي كارتيه ... وأضربه ..
ريم ( تبتسم ): حبيبي أنت تكبر وتقوى .. وهو يكبر ويضعف .. لا تنسى هالشي ..
فهد يهز راسه يسوي روحه يفهم ..
ريم تسأله : وين أمك ؟؟؟
فهد : راحت تودي يارا الطبيب .. تعبانة ..
ريم وقفت ..تمسح راسها : طيب .. تعال معي فوق إلى أن تجي أمك ..
