في البيت عندنا تقليد عائلي صارم .. جدتي تصر دائما أن نجتمع على وجبة وحدة في اليوم على الأقل متأثرة بالأتراك .. بما أن ظروف أعمالنا مختلفة .. فأغلب الأوقات اللي نجتمع فيها هي العشا.. لكن يوم الجمعة الغداء إلزامي .. والعذر ممنوع .. بعد الغدا جدتي تحب تقعد في الحديقة الداخلية للبيت .. مسوينها مثل بيوت الشام ( أرض الديار ) على قولتهم ..
اليوم ما كان لي خلق أبد .. نزلت مجاملة .. ما لي خلق أشوف مدلل أمه .. بعد الغدا قعدت جدتي وعمتي موضي وبناتها .. وزوجة أبوي مليكة .. في الحديقة الداخلية .. جلست معهم .. بدوا يسولفون عن الخطوبة واللي صار فيها ..
موضي تشرب الشاي : ما شاء الله عليها .. اسم على مسمى ..
جدتي : الله يتمم لهم على خير..
دلال : تبون الصراحة .. حمد ما يستاهلها ..
الجدة عصبت : دلول.. وش هالكلام ..
ريم : دلال ما غلطت .. مدلل أمه مو كفو زواج ..
الجدة : يمكن الزواج يعقله ..
ريم تضحك بسخرية : يمكن .. وجات ريم بتقوم أشرت لها جدتها تقعد ..
ريم تبتسم : خير أم سعود ..
الجدة : الخير بوجهك بنتي.. (تكلم موضي) وين الورقة اللي كتبتيها لي أمس ..
موضي تقوم تجيبها وتعطيها لريم .. أخذتها ريم وقرتها .. كلها طلبات ..
ريم تبتسم : أم سعود .. وش قالوا لك عني المصباح السحري ..
الجدة تضحك : يا بنتي ما فيها شي نساعد الناس .. عاد وش هي طلباتهم ..
ريم تقرا: أم غانم تبي تدخل بنتها الجامعة ..
الجدة تهز راسها : أي .. نسبتها زينة لكن هالقدرات اللي خفس العيال .. ما قدمت فيه عدل..
ريم تكمل : أم عبدالله تبغي توظف ولدها في الخارجية ..
الجدة : ولدها صار له من تخرج 3سنوات .. ويشتغل براتب 2000ريال .. والولد عنده شهادة في هالدولية .. ما أدري وش اسمها ..
ريم تصحح لها : علاقات دولية .. أم سعود الله يحفظك .. لا توعدين الناس وتوهقيني ..
الجدة : يا بنيتي .. الناس للناس والكل بالله ..
ريم تهز راسها : ونعم بالله .. خلاص يا أم سعود ( تقوم وتبوس راسها) أشوف وش أقدر أسوي .
الجدة تبتسم : والله ما احد يبرد قلبي في هالبيت غيرك .. الله يحفظك ويسعدك ..
موضي تكلم نفسها : والله هيفاء جابت مرأة ..
الجدة التفتت عليها ناظرتها مدة .. ريم قامت ولحقتها مليكة تبغي تجهز عيالها لأنها بتطلع مع سعود .. وهم في المصعد ..
مليكة بهدوء: حاولي تتحكمين في أعصابك ..
التفتت عليها ريم : وش قصدك ..
مليكة تحط يدها على كتف ريم : لاحظت نظراتكم أمس ..
ريم تناظرها .. وقبل ما تتكلم .. مليكة : أنا ماني ضدك ريم .. أنت مثل أختي الصغيرة .. لا تكشفين نفسك .. من أمس والكل ملاحظ عصبيتك .. هم يمكن يفهمون أنك غيرانة أن حمد بيتزوج. لكن الحقيقة غير ..
ريم تبتسم بسخرية : مليكة .. خيالك واسع إلى ...
قاطعتها مليكة : لا تنكرين .. شفت بعيني .. شلون كنتوا تناظرون بعض ..
ريم تضحك : مين .. انا ومين ..
مليكة بهدوء: أنت و زينة ..
ريم اسكتت .. ناظرتها مدة .. مليكة بابتسامة دافية : ريم .. حبيبي أنا فاهمتك .. لكن غيري لا ..
ريم بهدوء: إلى هالدرجة .. انا كتاب مفتوح ..
مليكة تضحك بخفيف : بس لي حبيبي .. بس لي ..
ريم تهز أكتافها : على العموم .. أنا راح أسافر بعد كم يوم .. محتاجة أغير جو ..
مليكة : سافري حبيبتي .. ورتبي أمورك .. ورجعي لنا ريم القوية اللي نعرفها ..
