ديما متفاجأة : يعني شنو .. ما يصلح لنا ..
منيرة : حنا أدرى بمصلحتك ..
ديما : ليه هو في شي .. سامعين عنه شي ..
منيرة : لا والنعم فيهم .. بس ما يصلحون لنا .. حنا نبيلك واحد يستاهلك ..
ديما بعصبية : قصدك واحد جيبه مليان ..
منيرة : وليه لا ..تبين تاخذين واحد يبهدلك ..
ديما : يعني الحين .. اللي ماخذته هيا .. مدللها على الأخر ..
منيرة بحدة : اسمعي يا بنية .. قلت لا يعني لا ..
ديما : وأبوي وش رايه ..
منيرة : هالأمور أبوك ما يدّخل فيها ..
ديما عصبت .. واطلعت من الغرفة .. وراحت إلى جناح ريم .. ريم كانت قاعدة في الصالة .. على الكنبة ومادة رجولها .. تشرب كافي .. قربت منها ديما ورمت نفسها على الكنبة ..
ديما بعصبية : بأموت قهر من هالبيت ..
ريم تلتفت عليها : ليه .. وش صاير ..
ديما : أمي رفضت عزيز ..
ريم : ليه ..
ديما : تقول أنها تبغى تزوجني واحد غني ..
ريم : وعزيز وش فيه .. من عايلة محترمة ومرتاحين مادياً ..
ديما : موعاجبها ..
ريم : وأبوي وش قال ..
ديما : إذا أمي ما وافقت .. هو بعد ماراح يوافق .. (تصيح )..
ريم احضنت أختها : هدي حبيبي .. ما يصير إلا اللي تبين إن شاء الله ..
ديما تصيح : أي بس أبوي رافض ..
ريم : ما عليك أنت خلي الموضوع علي .. حاتم وين ..
ديما تمسح دموعها : في جناحه ..
ريم هزت راسها .. وقامت وراحت إلى جناح حاتم .. دقت الباب .. افتحت لها سارة زوجة حاتم .
سارة تبتسم : هلا والله بالريم ..
ريم تبتسم : هلا فيك .. وين بعلك ..
سارة تضحك : في الصالة .. حياك ..
حاتم يبتسم : أوه .. الريم عندنا يا مرحبا .. يا مرحبا .. ( حاتم يدرس لغة عربية وأدابها )
ريم تكلم سارة : ما تملين من الفصحى ..
سارة تبتسم : لا تعودت .. صارت عندي مناعة ..
حاتم : خير أختي .. مشرفتنا اليوم ..
ريم : أي في موضوع أبغى أكلمك فيه ..
قالت ريم لحاتم عن خطبة ديما لعزيز .. وان امه رافضته ..
حاتم : طيب وش طالع بيدي ..
ريم بحدة : حاتم .. يا اخي أنت الكبير .. لازم يكون لك راي .. ديما موافقة والولد ما عليه كلام .
حاتم يهز راسه : عبد العزيز والنعم فيه .. سمعته طيبة وشاب نشيط ..
ريم : زين .. وين المانع ..
حاتم : راي أبوي ..
ريم: إذا رحنا أنا وأنت نقدر نقنعه .. أنا ما أقدر لحالي ..
حاتم : طيب .. نكلمه ..
وهم قاعدين يتكلمون .. يسمعون صراخ .. وأصوات أشياء تتحطم .. اركضوا إلى الدور الأول .. كان حمد ماسك ديما من شعرها .. ويضربها .. حاتم مسك حمد .. ريم شالت ديما من الأرض ..
ريم عصبت .. وراحت إلى حمد .. حاتم كان بينهم .. جات موضي ومنيرة يهدونهم ..
ريم تحاول تمسكه : خلني أعلمه مراجله تطلع على اللي قده ..
حمد معصب : انت ما لك شغل .. إذا أبوي مخليك على هواك وهايته من بلد إلى بلد .. هو حر لكن أختي ديما لا وراها رجال ..
ريم عصبت : من اللي هايت .. يا السفلة .. يالحقير ..
منيرة وموضي يهدونهم .. وحاتم واقف بينهم ..
موضي : اذكروا الله .. وش صاير ..
حمد : هالكلبة تعرف هاللي اسمه عبد العزيز .. وبينهم علاقة ..
ديما صارت ورى ريم تصارخ : أي أحبه .. وش تبي تسوي ..
حمد : بأشرب من دمك ..
بدوا كل واحد يسب الثاني .. يدخل سعود .. بصوت عالي : بس ..
سعود يخزهم واحد .. واحد .. : وش صاير ..
حمد أول من تكلم : هالكلبة ( يأشر على ديما ) تعرف اللي جاي يخطبها .. والله أعلم وش بينهم ..
سعود : وأنت وش دراك ..
حمد : سمعتها تكلمه بالتليفون قبل شوي..
سعود عصب .. وقرب إلى جهة ديما اللي واقفة خلف ريم وماسكة قميصها من ورى خايفة .. ريم تكلم أبوها ..
ريم : إذا بتضربها .. اضربني أنا أول ..
سعود يناظر ريم مدة : إنتِ كنت تعرفين ..
ريم هزت راسها : أي أدري .. البنت ما اكفرت ..
حمد بعصبية : تقول ما اكفرت .. أجل وش تسمين اللي سوته ..
ريم تكلم أبوها بهدوء: يعني الحب حرام .. والولد جاء من الباب .. و طلب يدها ..يعني ما كان يتسلى ولا كان يلعب .. اثنين حبوا بعض .. ويبغون يتزوجون .. ما اكفروا ..
حمد بزمرة : أي .. أنت عادي عندك .. ذمتك وسيعة من وين بتجيبينه غير من أمك ..
ريم التفتت عليه بترد .. لكن أبوها سبقها .. التفت سعود على حمد وسطره كف .. من قوته طاح على الأرض .. سعود حط رجله بين رقبة حمد وصدره ..
سعود بغضب: ظفر أمها يسواك ويسوى طوايف اللي خلفك .. يا كلب ..
حاتم يحاول يبعد أبوه عن حمد .. ومنيرة راحت لولدها تشيله ..
سعود قرب منه .. وامسكه من قميصه : إن مديت يدك على واحد من إخوانك أو خواتك مرة ثانية .. رميتك برا البيت مثل الكلاب .. وتبريت منك .. سامع يا حيوان ..
