صحت ريماس على صوت منبه قاعد يرن بشكل مزعج .. فتحت عيونها وتذكرت أنها للحين عند يارا .. قامت بثقل واطلعت الغرفة .. شافت يارا شبه نايمة .. وتحاول تطفي المنبه .. قربت منها ريماس .. طفت المنبه .. والتفتت على يارا ..
ريماس بهدوء : يارا .. قومي ..
يارا بنعاس : بس 5 دقايق وأصحى ..
ريماس تبتسم : قومي يا كسولة ..
يارا بتأفف : ما نمت إلا الفجر .. أوفف بس ..
ريماس : مو تقولين عليك اختبار ..
قعدت يارا ويدها على راسها : أي .. الله يستر بس ..
بعدت يارا اللحاف عنها .. ونزلت من السرير .. وراحت صوب الدولاب .. واخذت لها ملابس .. كانت تبغى تطلع من الغرفة بسرعة .. وتتجنب تجي عينها بعين ريماس ..
يارا بكسل : باخذ لي شاور .. يمكن أتنشط ..
وهي ماسكة مقبض الباب .. التفتت على ريماس .. كانت ريماس لافة نفسها بشال يارا .. وتحتها topless .. احمر وجهها يارا ..
يارا تبلع ريقها : يبغى لك ملابس .. بدل ما تمشين شبه عريانة ..
نزلت ريماس راسها تناظر نفسها .. كانت لابسة بنطلون جلد .. ولافة نفسها بشال لقته على التسريحة .. قميصها ملطخ وشبه محترق ..
ريماس تغطي نفسها عدل : ما أظن عندك شيء على مقاسي ..
يارا تتحاشى تحط عينها بعين ريماس : لا ما عندي .. لكن خالي عنده .. تقريباً أنتو نفس الحجم .. باجيب لك قميص من عنده ..
طلعت يارا بسرعة .. اضحكت ريماس على وجهه يارا .. هي ما عندها مانع تمشي شيرت ليس .. لكن يبدو أن يارا عندها تحفظات .. انسدحت ريماس على السرير .. وأخذت مخدة يارا وشمتها ودفنت وجهها بها .. " أحبها .. أحبها "..
تحممت يارا بماء بارد .. على الرغم من أن الجو بارد .. تبغى تشيل ريماس من راسها .. حلمت فيها أمس وهم ..... صفعت يارا وجهها بماء بارد .. " أنا وش قاعدة أفكر فيه .. لازم ما أنسى اللي سوته ".. نشفت نفسها ولبست .. وقبل ما ترجع لغرفتها .. نزلت المطبخ وسوت لهم فطور سريع .. أو بالأحرى لريماس .. لأنها راح تكون في غرفتها طول اليوم .. وأكيد بتجوع .. خاصة أنها ما تقدر تخفي نفسها ..
دانه تناظر الصينية : وش عندك على هالشهية ..
يارا تناظرها بنص عين : مو شغلك ..
دانه : ما أدري وين يروح هالأكل .. ولا تسمنين ..
يارا تشيل الصينية : قل أعوذ برب الفلق ..
دانه بنبرة : وانا وش قلت .. لا تفكرين بأحسدك .. عيني باردة ..
يارا بسخرية : أي واضح .. بدليل بلوزة مرام ..
دانه تدافع : ما لي شغل في بلوزتها ..
يارا رافعة حاجبها : مجرد ما قلتِ ناعمة زي الحرير .. ما قامت البنت من الكنب .. إلا والبلوزة منسل منها خيوط ..
دانة بحدة : الكنب قديم .. وفيه نتوءات .. وش ذنبي أنا ..
يارا تضحك : نتوءات ..
تركتها وصعدت الدرج .. ودانة تحاول ترقع لنفسها .. يارا مطنشتها وصاعدة الدرج .. دخلت غرفتها .. لقت ريماس نايمة على سريرها .. حطت الصينية بهدوء على الطاولة المقابلة للصوفا.. ورجعت الى الباب وقفلته .. وقربت من ريماس تصحيها .. كانت ريماس نايمة بهدوء .. وقفت يارا تناظرها .. " ملامح وجهها .. حادة وقوية .. لكني أشوفها بيبي .. ماي بيبي .. جروحها بدت تشفى .. لكن ما زال فيه أثار واضحة "..
يارا يدها على راس ريماس : ريماس .. ريماس .. قومي اكلي ..
لفت ريماس على يارا .. وطاح الشال وبان جسم ريماس .. يارا قلب وجهها احمر .. ولفت بسرعة .. ريماس ما فهمت ردة فعل يارا .. إلا لما ناظرت تحت .. وشافت نفسها .. ابتسمت وغطت نفسها بالشال مرة ثانية ..
ريماس : أسفة نمت ولا حسيت بنفسي ..
يارا : راح اجيب لك قميص من حقين خالي .. الاكل على الطاولة ..
