Love you seven times မြန်မာဘာသာပြန်စဆုံး

အပိုင်း (၈)

Love you seven times
အပိုင်း (၈)

ဒါက အိပ်ရခက်တဲ့ပထမဆုံးအကြိမ်ပဲ။ သူမ အိပ်ရာပေါ်လှဲပြီး ဟိုဒီလိမ့်နေလိုက်သည်။ သူမ ဘယ်လိုပဲလုပ်လုပ် လုဟိုင်ခုန်းရဲ့ဖြူဖျော့သွားတဲ့မျက်နှာလေးကို စိတ်ထဲကနေ ထုတ်မပစ်နိုင်ခဲ့ဘူး။ သူမ ထထိုင်ပြီး သက်ပြင်းရှည်ကြီး ချလိုက်တော့သည်။ ချူးခုန်းဆိုတဲ့ကောင်စုတ်က ပြန်လည်ဝင်စားပြီးတဲ့နောက်မှာ ဘာလို့ဒီလိုဖြစ်လာခဲ့တာလဲ? သူက မုန်းစရာကောင်းပြီး အထက်စီးဆန်တဲ့လူတစ်ယောက်ဖြစ်တာ ကြိမ်းသေပဲ။ သူ ဘယ်လိုဖြစ်လို့ ဒီလိုဖြစ်လာခဲ့တာလဲ?

လုဟိုင်ခုန်း သူမကို စိတ်ဆိုးသွားအောင် တစ်ခါလုပ်လိုက်တာနဲ့၊ တစ်ကြိမ်တစ်ခါပဲ ဖြစ်ရင်တောင်မှ သူမ သူ့ကို အကြင်နာတရားကင်းမဲ့စွာ ရှင်းထုတ်ပစ်လိုက်မှာ! ဘာကြောင့်လဲ?! ဘာကြောင့်… ဘာကြောင့် ဒီလိုအမူအယာမျိုး ဖြစ်သွားတာလဲ?! ဝမ်းနည်းပူဆွေးနေတဲ့အမူအယာက သူမကို အပြစ်တင်စိတ်ဖြစ်အောင် လုပ်နေတော့သည်။

သူမ သက်ပြင်းနောက်တစ်ခေါက်ချလိုက်၏။ ရုတ်တရက် သူမရဲ့အခန်းရှေ့မှာ အရိပ်မည်းလေးတစ်ခုကို လှမ်းမြင်လိုက်ရသည်။ သူမ မျက်ခုံးတစ်ဖက်ကိုပင့်ပြီး ကျောင်းသားချင်းရှန်းနဲ့ ဟေးဝူတို့များလားလို့ တွေးမိသွား၏။ သို့သော် သူမရဲ့တံခါးရှေ့မှာ တီးတိုးရေရွတ်သံလေးကိုကြားလိုက်ရတော့ သူမ၏နှလုံးသားလေး တင်းကျပ်သွားတော့သည်။ ထိုသူက လုဟိုင်ခုန်းပဲ။ မှားယွင်းအပြစ်တင်ခံရတာတောင်မှ သူ သူမကို လာရှာနေသေးတယ်။ တကယ်တော့… သူမကို သူ စိတ်ဆိုးသွားအောင် တစ်ခါမှ မလုပ်ခဲ့ဘူး။

သူ တံခါးမခေါက်သလို ဝင်လည်းဝင်မလာဘဲ တံခါးဝမှာသာ ရေရွတ်ပြောနေခဲ့တာ။ တကယ်တော့ သူမ စိတ်ပူသွားပြီး တံခါးဆီ လျှောက်သွားလိုက်သည်။ တံခါးကြားကနေ သူ့ကိုယ်သူ တီးတိုးပြောဆိုနေတာကို သူမ ကြားလိုက်ရ၏၊ “ယွင်ရှန်း၊ ကျွန်တော် တောင်းပန်ပါတယ်၊ ကျွန်တော် ဝန်ခံဖို့ငြင်းဆန်တာမဟုတ်ဘူး၊ ဦးလေးကို ဘယ်လိုငြင်းဆန်ရမလဲ၊ နောက်ပြီး ယွင်ရှန်းကို ဘယ်လို… ဘယ်လိုပြောရမလဲဆိုတာ တွေးနေခဲ့တာ၊ ကျွန်တော် တောင်းပန်ပါတယ်၊ အဲ့ဒါက ကျွန်တော့်အမှားပါ…”