நிலாவே வா...!-எஸ்.ஜோவிதா

நிலாவே வா...!-எஸ்.ஜோவிதா-28

அத்தியாயம் 28

''பார் எப்ப பார்த்தாலும் கண்டுபிடிக்கலை! தேடிகிட்டிருக்கோம் என்றே பதில் சொல்லிகிட்டு. அப்படி இப்படி என்று மூணு மாசத்துக்கு மேலாச்சு.. எனக்கு என்னமோ இவங்க ஃபைலை குளோஸ் பண்ணிட்டாங்கன்னு தான் தோணுது...'' போலீஸ் ஸ்டேஷனில் அக்ஷய் புலம்பிக் கொண்டிருந்தான்.

''அக்ஷய் இது நம்ம நாடு இல்லை. இவங்க தேடிகிட்டு இருக்கோம்னு சொன்னா நம்பித்தான் ஆகணும்...உன்னைப்போல எத்தனை பேரு? ஸ்கூல் போன பிள்ளையை காணவில்லை! வேலைக்கு போன மகளை காணவில்லை! என்று எத்தனை கம்ப்ளைண்ட்? இது எல்லாம் பல மாசம் அல்ல! பல வருஷக்கேசுங்க'' கீர்த்தி அவனை அமைதிப்படுத்த முயல,

''மிஸ்டர் அக்ஷய்! உங்களுக்கு நாங்க தேடுவது சீக்ரெட்டாக இருக்கணும், எந்த மீடியாவுக்கும் ஃபோட்டோ தரக்கூடாது! வெளிப்படையாக விசாரிக்க கூடாது! இப்படி கண்டிசன் எல்லாம் போட்டுட்டு உங்க ஃபொசிஷன்லே இருந்து பார்க்குறப்போ உங்க நிலமை புரியுது...! ஆனா எங்க நிலமையில இருந்தும் பாருங்க! நாங்க இந்த லண்டன் சிட்டியில தேடாத இடம் இல்லை. அப்படியும் கண்டு பிடிச்சு உங்களை கூப்பிட்டு காட்டினோமே.'' அங்கிருந்த போலீஸ் ஆபீசர் கூறினார்.

''ஆமா கூப்பிட்டீங்க..! எதை காட்ட? செத்துப்போனதை..! பாதி ரயிலில் சிதைந்து போனதை..! மீதி குடிச்சுட்டு ஆக்சிடெண்ட் ஆனவங்க. ஏன் சார் என் மனைவி ரயில் முன்னாடி குதிக்குற அளவுக்கு என்ன பிரச்சனை?'' என்றான் அவர் முன்னாடி எகிறியபடி.

''டேய்...கொஞ்சம் பொறுமையா இருடா..'' கீர்த்தி அவனை இழுத்துப் பிடித்தபடி கூறினான்.

''எப்படிடா? இதோ பத்து நாளைக்கு முன்னாடி செத்துபோன ஒரு பாடியை காட்டி இதுதானா? என்று என்னை கேட்க எனக்கே டவுட் வந்துடுத்து. ஒரு வேளை நிலா செத்தே போயிட்டாளா? இப்படி இல்லாத ஒருத்தியை தேடிகிட்டு இருக்கேனோ? என்று பயமாக இருக்குடா.'' புலம்பலுடன் கூறியவனை, கீர்த்தி வேதனையோடு பார்த்தான்.

''அந்த செத்துப்போன பொண்ணும் ஒரு இந்தியன் தான். புருசன் டார்ச்சர் தாங்க முடியாமல் குழந்தையோடு சூசைட் பண்ணிகிட்டா..மிஸ்டர் அக்ஷய்..எனக்கு உங்க ஃபீலிங்க்ஸ் புரியுது...ப்ளீஸ் எங்க கூட ஒத்துழைங்க. எங்களுக்கு கடைசியா வந்த தகவலின்படி ஒரு முடிவு எடுத்திருக்கோம்.'' என்றார் போலீஸ் ஆபீசர்.