بعدك يابوي اصبحت دنياي عرجاء بلا عكاز

2

الساعة ٢ عند سُلاف
تأففت بملل واهي تشوف الساعة : حلت لهم الجلسه
قطع كلامها صوت التليفون ركضت له : الو
بشير : السلام عليكم مدام
سُلاف عرفت صوته : وعليكم السلام ، حاصل شي؟
بشير بتوتر : مدام ممكن اخذ اجازة؟
سُلاف : ليش ان شاء الله؟
بشير : زوجه انا تعبان كثير بباكستان ، اجازة ثلاث ايام بس ماما
سُلاف : تعبانه؟ ليش وش فيها؟
بشير : مافي معلوم اهي بس نادي بشير بشير
سُلاف تنهدت : طيب خلاص خلاص تجي وريف و ارد لك
بشير بترجي : ماما ضروري اليوم اعطي خبر لو سمحت
سُلاف : خلاص بشير انا بتصل عليك واعلمك
فزت على صوت الباب وراحت تركض وفتحته واهي تتخصر وماسكه الباب بيدها اليسار : اهيه ماشاء الله شرفتوا
وريف واهي تشيل الغطوه من على وجها : والله يا اننا تونسنا ناقص انتي بس
ليلى : وش رايكم اروح لأبو فالح الحين اشوفه يضبط الغساله قبل افصخ عبايتي واجلس؟
وجود : كان على طريقنا قلتي ونروح كلنا
ليلى : والله تو اتذكرها يوم دخلت البيت
سُلاف : اصبري شوي خمس دقايق وروحي
ليلى : ليه؟
علمتهم سُلاف بكلام بشير واهم كلهم واقفين بالحوش ..
وريف : لا حول ولا قوة الا بالله
سُلاف : وش اقوله طيب؟
وريف : اكيد بنخليه يروح حرام
جودي : لا نكسب اثم ويصير شي بزوجته واهو ماشافها
وريف : كلميه يروح
ليلى : طيب والمحل يابنات ؟ صعبه ترا يتسكر ثلاث ايام من وين لنا فلوس
وجود واهي ترتب حوسة الحوش : صادقه واهو يوميًا فاتح زين ندبر مبلغ كيف لو تسكر
سُلاف : عادي انا امسكه
التفتوا عليها البنات بصدمه : تستهبلين؟
سُلاف رفعت كتوفها : لا والله صادقه
وريف بخوف : لا لا ماينفع وش بيقولون الناس
سُلاف بغضب :كم مره اقولك وش علينا منهم!
وريف : بياكلونا اكل تكفين فكينا من الكلام وخلاص كلها ثلاث ايام ويرجع لا تسوون شوشره
سُلاف : لا والله ماعلي منكم وانا ببيع بحلال ابوي و بأحترامي ماتعديت على حلال احد
وريف بعصبيه : الين متى وانتي تعادنين والا تمشين كلمتك!
وجود بخوف : بنات تكفون قصروا اصواتكم لحد يسمع
سُلاف ما اهتمت : لأني ماغلطت ودامني مو غلطانه بتشوفين هالعناد الين كلامي يمشي عاجبك زين ما عاجبك طقي براسك الجدار
ليلى واهي تضرب خدودها بخفيف وتناظر جودي : ياويلي ياويلي بيتهاوشون
وريف واهي تلف عبايتها تحت يدها : لا عاد طالت وتشمخت يا عمتي سُلاف ما تسوين شي هنا من غير رضانا كلنا واذا موب عاجبك انتي الي طقي براسك الجدار
جودي وقفت بينهم : بـنات تكفون خلاص اسكتوا
وريف ابعدت جودي من قدامها ودخلت للبيت ..ولحقتها جودي
ليلى جلست على الكرسي وحطت يدينها على فخوذها : سُلاف يرحم امك لا تكبرين المواضيع!
سُلاف تأشر على نفسها بعصبيه: انا! انا الي اكبر المواضيع اذا خايفه على لقمة عيشنا وبعدين انا وش مسويه بشير بيروح وانا بمسك المحل غلطت بشي؟
ليلى : لا ما غلطتي بس وريف خايفه من كلام الناس واحنا ببيوتنا ماسلمنا منهم
سُلاف بعصبيه : محد خايف مننا من كلام الناس الا اهي ، من بعد طلاقها واهي مزعجتنا وشايله كلام الناس فوق راسها كأنه مهم
ليلى وقفت بسرعه واهي تسكر فمها : اسسسكتييي!!! لا تجيبين الطاري هذا لا اقص لسانك لك اسكتي
وجود : سُلاف كم مره قلنا تسكرين هالموضوع ولا تجيبين طاريه!
سُلاف ابعدت ليلى عنها ودخلت تاركتهم بدون لا ترد عليهم واهي بقمة عصبيتها..
وجود : هالبنت مو طبيعيه نار نار ما تثمن حكيها
ليلى : الله يهديهم يارب
دخلوا البنات كلهم للبيت وكل وحده سرحانه بهمها..
-
بالقهوة عند ابو زايد و ابو نايف ..
ابو زايد : خلاص وانا اخوك ارضى عاد
ابو نايف بغضب : لازم تكسر حكيي لازم تبيع كلامي ببلاش!
ابو زايد : لا والله محشوم يا خوي بس وش اسوي لو تبي الجد ترا بناته مالهم دخل بسواياه وانا اخوك
ابو نايف : حتى ولو انا حالف ما ابي شي من سليمان ولا شي يخصه
ابو زايد يهديه : اسمع وانا اخوك الرجال مات والله يرحمه معد بقى الا هاليتيمات ، صدقني يا خالد والله العظيم لو اشوف منهم شي.. اني انا الي اقلب دنياهم فوق تحت بس اني خايف اظلمهم ياخوك
ابو نايف واهو يتنهد : حسبي الله ونعم الوكيل
ابو زايد : انت هد بس
ابو نايف : انا ماعلي من بنتك واهي معهم بس علمها لا تتصل على وضحى وتخليها تجي معهم عشان ما يصير بيني وبينك زعل
ابو زايد : ابشر ولا يهمك ، اشرب شاهيك برد
عدل جلسته ابو نايف وشرب شاهيه واهو يناظر قدامه ولمح نايف ، ورفع صوته : نايـف تعال وانا ابوك
نايف جاء وباس راس ابوه وعمه : السلام عليكم كيف الحال؟
كلهم : الحمدلله
ابو نايف : وش صار بالمزرعه؟
ابو زايد لف على سليم : جيب شاهي يا مدير
نايف : ابد والله كل شي تمام ومرتبين الأمور زي ماتحب
ابو نايف يربت على ظهره : كفو والله ولدي
ابو زايد : ليت هالثور يتعلم منك
نايف ضحك وعرف انه يقصد ثامر : وش مسوي بعد
ابو زايد : رايح يسربت ومخلي الدكان لحاله وانسرق منه ٣٠٠
نايف ضحك : ياساتر الله يهديه
ابو نايف : هذا خله يجي عندي انا اعرف له
ابو زايد : ابد ابشر كم يوم بس؟
ابو نايف : بساعه وحده بس اصحصحه لك
ضحكوا كلهم ..وجاء سليم بالشاهي :تفضل
نايف : زاد فضلك
ابو نايف : وش ناوي تسوي؟
نايف : والله منهد حيلي برجع للبيت اريح لي شوي واكل على لحم بطني من الصبح
ابو نايف : زين زين
-
ببيت ابو نايف ..بغرفة وضحى
وضحى واهي تبكي : تخيلي بس انها مدت يدها علي عشاني قلت ابوي الغلطان
فرح : خلاص يا حبيبتي خلاص لك ساعه تصيحين دموعك جفوا
وضحى بقهر واضح : قهرتني قهرتني كلهم حاطين حيلهم علي
فرح واهي عارفه تعامل امها و ابوها معهم : الله يهديهم يارب ..لا عاد تطولين بالحكي معهم خليهم بحالهم سوي الي عليك وبس
وضحى : ليش ! من حقي اجتمع واطلع حاكريني بهالبيت حتى عتبة البيت يحاسبوني عليها
فرح تنهدت : والله مدري وش اقول ..بخلي امي تكلم امك
وضحى : لا انتبهي نسيتي وش سوت فيني المره الي فاتت بس عشان عمتي درت بحركاتها معي
فرح : طيب خلاص هدي انتي و اضحكي عاد ضيقتي صدري
وضحى واهي تمسح دموعها بيدها : طيب
فرح : وش رايك تجين عندي بالبيت واحنا راجعين ؟ تغيرين جو شوي
وضحى : تهقين يوافقون؟
فرح : مدري انتي مسحي دموعك زين ونطلع لهم ونكلمهم
قاموا وطلعوا من الغرفة ودخلوا المجلس الي كانت فيه مريم عمة وضحى و ام زايد ..بعد نص ساعة من السوالف والي كانت وضحى تتجنب امها بقدر ما تستطيع
ام فرح : يلا عاد انا اترخص
ام زايد واهي تبتسم : حياك الله عاد ها عن القطاعه
فرح : خالتي عادي وضحى تجي معي اليوم؟
ام زايد : وين؟
فرح : البيت ، طفشانه وودي اتونس انا وياها
ام زايد : لا وين ابوها بيعيي وبعدين ابيها تساعدني بالبيت ماعندي الا اهي
وضحى تأشر بعيونها لفرح يعني حاولي اكثر ..تكلمت فرح : يوم واحد خالتي تكفين وبعدين انا اعرف خالي خالد ماراح يقول شي تكفيين
ام زايد : ما اقدر انتي كلميه وشوفي وش يقول
فرح : وينه خالي طيب؟
ام زايد : طالع برا
ام فرح : اجل نقعد لين يجي ونشوف وش يرد وناخذ وضحى معنا
وضحى الي استبشرت خير من عمتها وعرفت انها بتساعدها
ام زايد : ايه اجلسي اجل نكمل سوالف
كملوا سوالفهم بينما فرح و وضحى يتساسرون بينهم وش يقولون له عشان يوافق..
-
بالليل عند البنات ..بعد ما كلمت سُلاف بشير وخبرته يروح واهي حاطه ببالها انها بتروح وبتعاند وريف..
كان البيت هادي على غير عادته من ازعاجهم ..
وريف كانت بالمجلس تسفط ملابسها و الضيقه مداهمه قلبها ، لأنها سمعت سُلاف واهي تطري سالفة طلاقها الي من ثلاث سنين تحاول تتناساها..دخلت ليلى واهي تبي تلطف الجو
ليلى : مطوله؟
وريف واهي تسفط ملابسها : ليه وش تبين؟
ليلى : ودي نطلع برا نفرش فرشتنا ونشرب شاهي
وريف : روحي انتي مالي خلق
ليلى : تكفين عاد يلا
وريف : اقولك مالي خلق وبعدين فيني النوم راسي مصدع
ليلى تناظر الساعة : تونا ٨ وش ينومك الحين
وريف : ليلى لو سمحتي اطلعي برا
ليلى قامت واهي تنفض ملابسها : طيب واذا طاب خاطرك تلقيني برا طفشانه
وريف : ناديهم يجلسون معك
طلعت ليلى واهي تدور جودي و وجود :انتوا هنا
وجود : لا تقولين تشابكوا باليدين؟
ليلى ضحكت : تتمنين شكلك
وجود : لا تظلميني
ليلى : وش رايكم نقعد بالحوش؟
جودي : تم تم يلا
ليلى : اي كفو هذي وخيتي السنعه
وجود : يلا برتب الحوش لأحلى جلسة
جودي : وانا بسوي الشاهي و القهوة واطلع لكم
ليلى : تبون اسوي حلى مع القهوة سريع سريع؟
البنات : يلا
كل وحده توجهت لشغلها .. وريف راحت لغرفتها بعد مارتبت ملابسها وانسدحت ودخلت بنوم عميق تهرب من احزانها و طريقة كلام سُلاف معها ، وسُلاف بغرفتها ترسم تفرغ العصبيه الي بداخلها بهالطريقة ومنها تتجنب خواتها شوي الين تهدا..
نص ساعة وطلعوا الثلاثة مع بعض..
ليلى : نشرب شاهي الين يبرد الحلى شوي
جودي : عادي ما احنا دايم معكوسين اصلًا
وجود : تتوقعون بنات سُلاف تسويها وتروح تفتح المحل بنفسها؟
جودي : اكيد ماتعرفينها الي براسها تسويه
وجود تناظر ليلى : بما انك ثاني اكبر وحده فينا وش رايك؟
ليلى : والله انا اشوف معها حق تروح تفتح المحل وانا ابكون معها
جودي : بس ياخي مدري
ليلى : جودي حبيبتي واحنا ببيتنا سلمنا من كلامهم؟
جودي : لا
ليلى : خلاص اجل ماراح تفرق
وجود : بس جودي قصدها انو لا نزيد الطين بله
ليلى : والله ما غلطنا عشان نخاف ولا علينا منهم
جودي بخوف : الله يستر بس انا مو خايفه من الكلام انا خايفه نتأذى ولا احد يسوي شي
ليلى : ماراح يصير الا كل خير بس تطمنوا وسكروا السالفه
اكتملت ليلتهم بسوالفهم الين الساعة ١٠ الليل وكل وحده توجهت لغرفتها للنوم