بعدك يابوي اصبحت دنياي عرجاء بلا عكاز

14

خلال سبع ايام مرت سريعة على الأبطال .. حليمه ونايف سافروا للندن ، الأخوين نفسياتهم تدريجيًا بدأت تتأقلم على الي حصل ، البنات اكتفوا بوجودهم مع بعضهم و زياراتهم لفرح وامها و جيات وضحى لهم الي سمح لها ابوها ..
ببيت ابو نايف الساعة ٩ الصباح
جابر : يا يمه الله يهديكم كانكم ارهقتوني متى بتخطبون البنت!!
ام نايف مسكت راسها : ياويلي ويلاه منك يا جابر كانك صدعت براسي كلم ابوك وتفاهم معه انا شلت يدي ماعاد لي دخل
جابر انصدم : ماني ولدك؟
ام نايف : الا ولدي ونظر عيني بس كلم ابوك ويعطينا وقت ونروح نخطب
جابر فز واهو مبتسم : يلا رايح له
طلع من البيت مستعجل لدكان ابوه الي كان قاعد مع نياف ..
جابر : السلام
الكل : وعليكم السلام
جابر جلس جنب ابوه : وش صار على الخطبة يابوي؟
ابو نايف اشر عليه: والله اني داري من شفت وجهك عارف وش بتقول بس ابشر خل امك تكلمهم ان بكره بنروح لهم
جابر باس راسه بفرح : الله يطول بعمرك
قام بيطل بس مسكه ابوه : اجلس
جابر استغرب : سم
ابو نايف : الكلام الي قلته لك قبل ، انا اسف يا بوك بس من حر مافيني
جابر هز براسه : حصل خير
ابو نايف : مسامح؟
جابر ابتسم : مسامح
طلع جابر يركض بفرحه والكل يناظره ويبتسم معه ..مسكه مصلح
مصلح والحزن واضح على وجهه : فرحنا معك
جابر : بخطبها
مصلح رفع يده : يالله يا كريم يفرحك فيها عروس لك
جابر : امين ومن قال..وش اخبار ابوك؟
مصلح : حاله ما يسرك تعبان تعبان حيل
جابر تنهد : الله يشفيه ويعافيه ويخليه لكم
مصلح : امين
جابر سحبه : امش للقهوه دام ماعندي شي نسولف
مصلح ابتسم : يلا
-
ببيت ابو زايد ..سكرت السماعه واهي تبتسم
ثامر جلس على المركى : من تكلمين ؟
ام زايد : اختك
ثامر : اي اخت بالضبط؟
ام زايد : جميلة..وبعدين انت وش مجلسك عندي ورا ماتطلع مع اخوانك؟
ثامر : اعوذ بالله شبت فيني ..جالس معك اونسك ماتبين؟
ام زايد : لا رح لأخوانك عمتك بتجي اهي وبنتها
ثامر : طيب عادي خلها تجي
ام زايد : اطلع بس خل فرح تاخذ راحتها
ثامر قام : اجل لا فقدتيني لا اشوفك مناديتني
ام زايد ابتسمت : يصير خير
طلع الا وتسمع خطوات سريعه نازله من الدرج فزت بخوف : بسم الله
زايد مستغرب : بسم الله عليك وش بلاك!
ام زايد تأشر للباب : انت موب توك طالع مع صقر و ابوك؟
زايد عقد حواجبه : يتهيئ لك يمي
ام زايد جلست وزفرت : والله ان زاغ قلبي من سمعت حسك
زايد ضحك واهو يحضنها : بسم الله على قلبك..يلا الحين انا طالع وتأكدي اني طالع
ضحكت ام زايد : بسلامتك
طلع واهو يسكر جاكيته ويدخل يدينه بجيوبه متوجهه للدكان ..بس استوقفه صوت مألوف ، لف يناظر مستغرب..
وريف تضحك : شكله جديد بالحاره
جودي متقرفه : وع الله يقرفه
وريف الي كانت متعقده من تجربتها السابقة : ماعليك منه كذا الرجاجيل موب صاحين
جودي : لا يختي لا تقولين كذا فيه رجال والنعم فيهم موب عشان عادل تعممين
وريف بملل : يابنت الحلال فكينا
جودي تأففت واهي تحط يدها اليمين على خصرها : وهذولي للحين ماخلصوا
وريف مسكتها : امشي لهم لأن لو ما سحبناهم بلطوا لـ الليل
لف على طول اول ماشافهم تحركوا ومشى يكمل طريقه واهو يهوجس بكلامها وتعميمها بس الي شده اسم طليقها الي يعتبر من اكبر تجار الديره بس ماعاد جاء ..تناسى الموضوع اول مادخل للدكان واهو يسلم..
الكل : وعليكم السلام
زايد جلس واهو يوجه المروحه على صقر ويبتسم و يكلم ابوه : يبه تعرف عادل؟
ابو زايد : اي من مايعرفه
صقر ناظر لزايد : تبي تحارش صح؟
زايد لأبوه : له فترة ماعاد يجي وش عنده؟
ابو زايد : استقر بالرياض و شغله هنا فيه من يخلصه له
صقر بعصبيه : وخر المروحه اثلجتني
ابو زايد : يا زايد وخرها عن اخوك و وجها للعفش خل يبرد
زايد غير وجهتها ولازال مبتسم : ابشر
ثامر الي سكر دفتر الحساب : ليش تسأل عن عادل؟
زايد : سمعت سيرته وانا جاي وتذكرته
ابو زايد : خلكم من الهذره الزايده وقوموا نظفوا المحل من هالأكياس
-
بـ لندن عند حليمه و نايف..
نايف طلع مع المحل واهو يناظرها : شكرًا
حليمه متكتفه : لا خذ رقمها بعد
نايف بهدوء ومشى وتعداها : امشي
حليمه : من جينا وانت تكلمهم بحنيه قصوى يا حنون وين حنيتك هذي علي؟
نايف : حليمه اقصري الشر ولا تسوينها سالفه
حليمه بهدوء : طيب
سكتت لأن ماودها تسوي مشكلة بس ناويه ترد حركات نايف لما يوقف مع البنات ويكلمهم و الأبتسامة شاقه وجهه ولا كأنها جنبه..
نايف مسك يدها : تعالي للمطعم
جلسوا وثواني وجاء النادل يأخذ طلبهم ..
حليمه حطت يدينها تحت وجها وابتسمت واهي تعطيه طلباتها ..
تحت نظر نايف المستغرب ..
نايف : مو قبالك واحد عنده لسان؟
حليمه ناظرت للنادل وأشرت على نايف واهي مبتسمه : توجهه اليه
نايف كتم نرفزته واعطاه طلباته ، وبمجرد ماراح لف لحليمه الي لازالت تناظره ومبتسمه ..
نايف بعصبيه : مضيعه شي بوجهي؟
حليمه : ما اناظر زوجي يعني؟
نايف مسح على وجهه واهو يتعوذ من الشيطان : حليمه المره الثانية تعطيني طلباتك وانا اتكلم هالحركات ماهيب عندي
حليمه بتسليك : طيب ..بروح للحمام
نايف : طيب
دخلت تعدل شكلها وحجابها وطلعت الا وحده جنب نايف حاطه يدها على كتفه وتضحك..
حليمه توجهت له على طول بعصبيه : سلامات!
نايف ابعد كتفه والبنت وخرت يدها ..وهمس لها : البنت عادي عندها
حليمه : وعادي عندك؟ نايف تستهبل ماتشوفني شي عندك انت!
نايف للبنت : المعذره
سحب حليمه واهو يرص على اسنانه : لا ترفعين صوتك علي
حليمه : ما تصدق اغيب عنك الا وارجع القاك مع وحده! استح على وجهك
نايف بصدمه : انا استحي على وجهي؟
حليمه هزت براسها بعصبيه : ايه ، طفشتني لنا اسبوع هنا كم من وحده كملتها وعيونك عليها ؟ ادري انك مجبور علي بس على الأقل احترم وجودي زي ما انا محترمه نفسي
نايف مسكها وطلعها لبرا المطعم : وش مجبور عليك! تستهبلين انتي
حليمه بعصبيه : ايه مجبور علي ايه لا تحسبني غبيه ما ادري انك تزوجتني عشان عمي ما يزوجك وحده من بنات سليمان الي ماتبيهم
نايف بصدمه : وش دراك؟
حليمه الي كانت سامعه وضحى و ليلى بالمخزن بالمزرعه : انصدمت صح؟ تراني درايه انك مو مقتنع اني زوجه لك بس حاول تتقبل الواقع اني انا زوجتك الي مفروض الوحيده الي تشوف هالجانب منك موب ذا الشقر
نايف بصدمه : مين علمك؟
حليمه : مريت من مكان والسوالف تتطاير فيه وللأسف ان قبل ليلة عرسي ادري اني كنت اول فرصة تغتنمها المهم انك تهرب من خيار ابوك
نايف : حليمه تعوذي من الشيطان
حليمه ببرود : اعوذ بالله منه ..جاء الأكل بروح اكل
دخلت للمطعم وقلبها تحسه بينفجر من حرارته ساكته طول الوقت وانفجرت عليه ، جلست تاكل قبل يجي ، ثواني وجاء ياكل وكانوا ساكتين ..بعد دقايق
نايف : حليمه
حليمه ناظرته بعيونها وكمل كلامه : مين قالك؟
حليمه : مدري
نايف : اخلصي علي مين علمك؟
حليمه الي خايفه على وضحى منه : سكر الموضوع لأن استحاله اتكلم
نايف واهو مستبعد امه : وضحى صح؟
حليمه هزت براسها بـ لا
نايف تسند على الكرسي واهو يمسح يده : مصيري بعرف
حليمه ببرود والعصبيه تاكلها من داخلها : طيب
-
عند البنات ..
سُلاف تطلعها من الكيسه وترميها بالأرض : شريت شباشب كثيره
ليلى : طيب ليش تخبطينها بالأرض كذا؟
سُلاف رفعت كتوفها : مدري
ليلى اخذت وحده : ابي ذي
سُلاف : مختارتها لوجود
ليلى : لا انا ابيها
سُلاف : بكيفك
تجمعوا البنات وجودي جايبه صينيه القهوة والشاهي..
جودي بحماس : يلا يلا
وريف : شوي شوي لا تطيح وتتكسر
جودي : اذا طاحت عاد وجود تنظف
وجود تخصرت : لا والله! اشتغل عند امك انا
وريف بنبرة صارمه : الله يرحمها
الكل : امين
رن التليفون .. سُلاف استغربت : من يتصل الحين؟
وريف قامت واهي تعدل قميصها : بشوف
رفعت السماعه : الو
ام نايف : السلام عليكم
وريف : وعليكم السلام
بعد سؤالهم عن الحال ..
ام نايف : بكره العصر بجيكم انا و وضحى يا بنيتي
وريف ناظرت للبنات وابتسمت : حياكم الله
سكرت السماعه .. تحت اناظر البنات الفضوليه
وجود : مين؟
وريف لازالت مبتسمه : ام نايف بتجي العصر
ليلى فزت من غير شعور وابتسموا البنات ..
سُلاف انسدحت واهي تبتسم : ايـه يا ليلى حبيب القلب شكله صامل
ليلى استحت : وش تقولين انتي
وجود قامت تغمز لها : يعني اني ما افهم
جودي : حرام وجها حمر يابنات
وريف ضحكت : عيب عليكم
ليلى قامت بسرعه واهي معصبه : انا الغلطانه اجلس عندكم اصلًا
جودي مسكتها على طول واهي تضحك : اقعدي اقعدي نستهبل
ليلى : خير وش ذا المزح السامج
سُلاف : خلاص اسفين يا حبيبتنا اقعدي
ليلى جلست واهي تصب لها القهوة ومدتها : خذوا صبوا لأنفسكم
وجود ضحكت : ياحياتي الزعلانين
ليلى : مازعلت بس مالي خلق اصب لكم
وريف اخذتها منها : اي واضح ..هاتي بس
-
بالصباح .. بحارة البنات ..
صقر سكر جاكيته واهو يتلثم بشماغه وتسند على الجدار واهو يرمى الحجر على الدريشة ..
سُلاف بعصبيه : وجع يوجعهم اكيد هالمبزره
وجود الي كانت معها : خليهم
سُلاف اخذت عبايتها : لا والله ما اخليهم اصبري شوي
وجود ضحكت : الله يعينهم اجل
سُلاف طلعت من الغرفة وتوجهت للباب واهي تعدل لثمتها وطلعت بسرعه واهي تلف يمين ويسار ..وسمعت ضحكته
سُلاف بصدمه: انت
صقر الي لازال على وقفته ولثمته بشماغه وعيونه المبتسمه : اي
سُلاف : لو كسرتها؟
صقر : اصلحها لك
سُلاف بملل : وش تبي طيب؟
صقر : اشتقت لك ..كم مره بعيدها لك؟
سُلاف تراجعت لورا : ما اضمنك انا
صقر : ولا انا
سُلاف : طيب وش سبب جيتك ؟ اخلص علي
صقر تكتف : يعني منتي مقتنعه اني جاي عشانك؟
سُلاف هزت براسها بـ لا
صقر قرب لعندها : عادي احضنك؟
سُلاف اتسعت عيونها على كبرها : ولعنه ! انهبلت انت
صقر فك لثمته واهو يمسك شنبه وبأبتسامة مايله وعيونه على رقبتها : عادي قدني سويت الأعظم
سُلاف نزلت للأرض واخذت كمية تراب واهي ترميه عليه : وصخ نجس ما تتغير
صقر الي لف يتصدى التراب ورجع لف عليها : الا تغيرت شوفيني استأذنك
سُلاف بعصبيه : وخر عن وجهي عشان ما اجيك واحشى عيونك هالزايغه بالتراب
صقر بروقان : فدوه يا نظر عيني
دخلت و سكرت الباب وركضت لخواتها داخل بتعلمهم ، خايفه يرجع يسوي شي ويتمادى ولازم خواتها يكونون معها ..
-
العصريه ببيت ابو نايف ..
جابر ماسك يد امه : تكفين خليني اوديكم
ام نايف : انت صاحي! اثقل البنت ماتحب الرجال الخفيف
وضحى ضحكت : صح ترا ليلى ثقيلة من الحين اقولك
جابر حط رجل على رجل : لا ترجعون الا واهي موافقه ولا خطفتهم
ابو نايف الي يناظر جابر وبهدوء : روحوا روحوا لا تتأخرون
طلعت ام نايف و وضحى مع نياف الي بيوديهم ..
ابو نايف يناظره : انت تبيها من زمان صح؟
جابر لف عليه بسرعه : كيف
ابو نايف : ماني بغبي يومني بزوجها لأخوك فزيت بكامل طولك عشانها
جابر : زين انك فاهم اجل ..ويومك عارف اني ابيها ليش قررت تزوجها مره ثانيه لنايف؟
ابو نايف : ابيك تتحرك
جابر ابتسم بهدوء : وانا وقفت اصلًا عشان اتحرك
ابو نايف استغرب : وش مهبب؟
جابر : ارتاح ماسويت الا كل خير
ابو نايف تنهد : والله مايندرى عنك ياولدي
جابر ابتسم بتسليك له ، ما يبي يعلمه عن البيت الا بعد الملكة بيحطهم كلهم امام الأمر الواقع ..
-
عند البنات ..
وريف تمد القهوة لهم : تفضلوا
وضحى : زاد فضلك
وريف جلست جنب وجود وجودي و سُلاف..وبعد سوالف دامت لساعة ..
ام نايف : انتم عارفين ليش جايه اكيد
وريف ابتسمت لها ..وكملت ام نايف : ابي اختكم ليلى لولدي جابر
وريف : هذي الساعة المباركة بس لازم ناخذ موافقة ليلى بالأول
ام نايف : خذوا راحتكم .. يلا اجل انا اترخص
وضحى : يمه بقعد عندهم شوي
ام نايف ناظرتها : طيب المغرب بيجيك نياف ياخذك
وضحى بفرح : طيب
طلعت و وضحى جلست تنطط من الفرح مع وجود ..
ليلى دخلت واهي مبتسمه : لا يكون وافقتوا بدالي بعد؟
وضحى بصدمه : ماراح توافقين؟
ليلى جلست وحطت رجل على رجل : مالكم دخل
وجود : ياشينك ياليلى
ليلى واهي تلعب بشعرها : وش فيكم مستعجلين؟
وضحى : خير ياليلى جابر زين تو ما جابنا ركض وانتي هنا يتتثيقلين على اخوي
ليلى ضحكت ..وريف واهي تبتسم : ترا واضح موافقه بس تبي تستعبط عليكم
وضحى نقزت لعندها : جد؟
ليلى واهي مبتسمه هزت براسها بـ اي
سُلاف بتهديد : والله يا وضحى لو اخوك زعل اختي اقصقص شعره هالطويل
وضحى : لا ماعليك انا بقصه معك لو زعلها
وريف : يازينك ياوضحى ليت عندي اخو ازوجك اياه
وضحى بتنهيده : اه بس اه
جودي : عساك تبين العرس بعد؟
وضحى : هاليومين يعني افكر كأن عدوة فرح جتني
وجود : اوه عاد فرح حاله خاصه
وضحكوا البنات على سيرة فرح الي ماتقعد الا واهي تتمنى تتزوج..
-
عند حليمه ونايف ..
الي جلست على الكنب على بطنها وتلعب برجولها بملل : اف
نايف الي كان جاي من عندها واهو يشوفها كذا : وش فيك؟
حليمه سكتت ماردت عليه ..نايف : اتكلم انا
حليمه عدلت جلستها واهي تنزل لبسها وتغطي رجولها : الصراحه فقدت جلسة البنات
نايف رفع حاجب وجلس على الكرسي : يعني؟
حليمه بستغراب: يعني وش؟
نايف : ما مليت عينك؟
حليمه بصدق : لا ماله دخل بس جلسة البنات وضحكهم لها فقده
نايف : هانت بقى ثلاث ايام ان شاء الله وتشوفينهم
حليمه وقفت بهدوء : ان شاء الله
نايف : على وين؟
حليمه واهي متوجهه للغرفة : رايحه انام
نايف وقف بسرعه ولحقها : زعلانه؟
حليمه : لو بزعل ، بزعل من دريت اني لعبه عندك
نايف : وش ذا الحكي ياحليمه! تراك بنت عمي
حليمه بقوه : وزوجتك
نايف : وانا مقصر بشي معك كزوج؟
حليمه بسخريه : لا ابد بس تسولف وتضحك مع الرايحه والجايه
نايف : يابنت الحلال ترا ارد عليهم بنفس اسلوبهم لا تكبرين الموضوع
حليمه : اجل حتى انا برد على الكل بنفس اسلوبه ولا تسوي لي سالفه
نايف : السالفه عناد يعني؟
حليمه : لا مو عناد بس مو من حقي بعد اتعامل مع الكل زي ما يتعاملون معي؟
نايف بعصبيه : حــليـمه
حليمه توجهت للسرير وانسدحت واهي تتلحف ، سحب منها اللحاف واهو يالله يتمالك نفسه..
نايف بطولة بال : وش مشكلتك معي؟
حليمه بعصبيه : سمعت انك مختارني بس عشان تتهرب من شي ماتبيه قلت طيب يا حليمه ماعليه زواجك بكره ماينفع تتراجعين وسيرتك بتصير على كل لسان بالذات انك ولد عمي و الحين وانا معك اشوفك مستهين بوجودي لا عاد لهنا وبس ، فيه مليون وحده غيري ليش اخترتني انا؟ ليشش!
نايف وقف بعصبيه : لأني مختارك وانا ابيك موب زي ما تعتقدين
حليمه وقفت قدامه : لا تكذب!
نايف مسكها من كتفها ويهزها : لو اني ما ابيك ولا كنتي ببالي تزوجت ليلى وكملت معاها بس ما ابيها
حليمه بكت من شعورها الي تحسه : ماتبيها لأن اخوك يبيها اي جابر يبيها وعشان عمي مايجبرك عليها قلت ما فيه الا حليمه الي من اجيب طاريها ابوي اكيد ماراح يرفضها ..ضمنت نفسك فيني وخليتني بالواجهه صح؟
حليمه من سمعت الكلام والغصه بحلقها بس لما شافت تعامل نايف مع البنات انفجرت عليه ماعاد تقدر تتحمل..
نايف حضنها واهو يمسح على شعرها واهي كانت تبكي من حر مافيها على نفسها تكلم بهدوء واهو لازال حاضنها : ماكنت ابي ليلى الا لأني ابيك ، رافضها قبل ادري ان جابر يبيها
حليمه ناظرته : وش الدليل؟
نايف ابتسم ابتسامة خفيفة: يوم خبطتي فيني وطلعتي بوجهي تتذكرين؟ من هنا بديتي تحوسين براسي
حليمه ابعدت عنه واهي تنسدح وتغطي نفسها باللحاف ..دخل معها بالسرير واهو يحضنها من ورا ويشدها له : والله يا حليمه اني ما تزوجتك الا اني ابيك لي زوجة
سكتت حليمه واهي تسمع كلامه وعيونها تذرف دموع غمضت عيونها واهي تحاول تنام واهو لازال شاد عليها ..
-
المغرب ..ببيت ابو زايد ..
زايد بملل : جابر يرحم ام امك صجيتنا اقعد
جابر الي يروح ويجي بتوتر : امشي على راسك انا كمل سوالف
زايد : وشلون بسولف وانت رايح جاي؟
جابر جلس : ها جلسنا ارتحت؟
زايد الي ناظرت ولف لـ صقر : المهم كمل سالفتك
صقر تسند واهو يرجع يده اليمين ورا راسه : بس
نياف وقف : بروح اجيب وضحى
جابر : انا الي بروح
نياف : اقول اقعد بمكانك امي محلفتني ماتروح
جابر بعصبيه : ياليل الليل
زايد : ياخي قر بمكانك فيك دوده انت؟
جابر : ابي اعرف وش ردت
صقر : الحين موب امك قالت ماردت؟
جابر يهز راسه : ايه بس اكيد وضحى تدري دامها قعدت عندهم
طلع نياف متوجهه لبيت البنات ..
فتحت له وضحى و ورا الباب ليلى ..ركبت وضحى السيارة ونياف ..
نياف : ها ياليلى دامك بتصيرين زوجة اخوي ضبطيني مع اختك عاد
ليلى انصدمت : خير وش ذا الحكي
نياف: قلتي تعال المره الثانية وتكلمك ناديها لي
وبعد طولة بال من نياف استسلمت ليلى ودخلت تنادي جودي ..
طلعت جودي مستغربه وماسكه الطرحه على نص وجها : هلا نياف وش بغيت؟
نياف : كيف حالك؟
جودي : بخير عسى ماشر فيه شي؟
نياف : لا بس حبيت اتطمن عليك
جودي ابتسمت : صدق؟
نياف هز براسه : ايه
وضحى نزلت من السيارة بملل : ياطيور الحب اخلصوا علي
جودي اتسعت عيونها من كلامها ونياف الي لف على جودي واهو مبتسم : سمعتي وش قالت؟
جودي : ومستانس ؟
نياف لازالت الابتسامة بوجهه : ليش ممنوع؟
جودي دخلت وجت بتسكر الباب : مع السلامة
ركب السيارة جنب وضحى الي تكلمت : خير انتوا وش ذا الاخوان مبلطين عندهم كل شوي بيقولون اخوانها خفيفين
نياف : هالله اكبر الي يشوفني كل يوم مسنتر عندهم ترا جاي اتطمن عليها بعد الي صار
وضحى : والله واضح انك طايح على وجهك الله يعينك عاد
نياف : ليه؟
وضحى : بتلحق جابر بدرب المحبين
نياف تنهد وابتسم : دامها اهي فدى
وضحى اشرت بيدها : وقف وقف ابي البقاله
وقف ونزلوا مع بعض ..
-
عند البنات ..
جودي واهي ماسكه خدودها : واي يابنات يجنن
سُلاف منسدحه : والله من هالخفه بذا الراس
وجود بضحكه : اظن جودي شافت شي احلى من صقر
جودي : احلى من صقر! قولي انا ويني اصلًا عن هالزين اه ياقلبي قلباه
سُلاف : ليه كنتي معجبه بصقر؟
جودي هزت براسها : لا بس شكله يهبل
ليلى بصدمه : ياربي هذي ما توفر احد!
وريف بستنكار : عاد اعقلي بلاها حركات المراهقين يبيك يطق بابنا مثل ما اخوه طقه
وجود : اسألي مجرب اربع سنين متمرمطه بعلاقة واخر شي جحدني
ليلى : زين ربي فكك منه
وجود : الحمدلله
جودي قامت تقلد وقفته وحركاته : يازينه واهو يكلمني واهو مبتسم كذا ..جلست بالأرض واهي ماسكه قلبها وصرخت بـ : آخ
وريف ضربتها : وجع
ليلى ماتت ضحك : ياويلي بنتنا راحت
جودي حضنت وجود وتبوسها بقوه  ..وجود واهي تحاول تفك نفسها منها : ياهوه وخري
سُلاف ابعدت جودي عنها : يالحبيبه هذي وجود مو نياف ابعدي
ابعدت جودي واهي تضحك : لو انه اهو صدق بستحي اسويها
وريف : اقول انا بقوم انظف غرفتي واضح جلستكم طويلة
قامت وتركتهم يسولفون ..
-
الظهر ..
ام نايف بعصبيه : يا جابر فك عني تراك ارهقتني
ابو نايف : قم فز للدكان فكنا من شرك
جابر : ان ماعلمتوني ترا بروح لبيتها
ابو نايف بستخفاف : يلا قم ان كان فيك خير
وقف بسرعه واهو يسحب شماغه و ابو نايف يناديه ..
ابو نايف لف عليها بصدمه : عساه رايح لها؟
ام نايف ضحكت : يعني طار من عندنا اكيد رايح
ابو نايف : كنت اقول انه اعقل عيالي بس ماش
وضحى دخلت على كلامه : يعني هذا دليل اني العاقله فيهم صح يبه؟
ابو نايف بتسليك يهز راسه : ايه ايه
ام نايف : وش سويتي امس عندهم؟
وضحى : ابد يسولفون ويضحكون غيرت جو
ابو نايف بفضول : ماجابوا طاري ابوهم ؟
وضحى هزت براسها : لا
ابو نايف بتأكيد : متأكده؟
وضحى : اي والله حتى ما فتحوا سيرة ابو مصلح ابد
ام نايف : الله يعينهم والله صدمتي كبيره بأبو مصلح
ابو نايف بأسف : اجل وش تقولين عني يومني واقف ضد سليمان محد موقف معي بعد يافع بهالزنقه الا اهو
وضحى : طيب وش صار عليه؟
ابو نايف : ما سألت عنه ولا ابي اسأل يكفي ماجاء منه
ام نايف : الله يعين بس
وضحى بزعل : يبه عطني فنجالك
ابو نايف : لا شربت واجد
وضحى مدت يدها لأمها : فنجالك
-
عند جابر الي اول ماطلع من البيت مشى متوجهه لبيت البنات ..
طق الباب وفتحت له سُلاف : وشو؟
جابر مبتسم : هذا ترحيبك لزوج اختك؟
سُلاف : لا بس استغربت شوي
جابر دخل يدينه بجيبوه : نادي ليلى
سكرت الباب وراحت تناديها ..
ليلى فزت : ليه وش يبي؟
سُلاف رفعت كتوفها : مدري بس شكله مروق
وريف : البسي وروحي له
ليلى قامت متوتره واهي تلبس عبايتها ولثمتها وفتحت له ..
جابر : ياهلا ياهلا
ليلى لازالت متمسكه بالباب : هلا فيك
جابر : من دون لف و دوران ..وش ردك؟
ليلى : جابر اصبر شوي وبيجيك الخبر من امك
جابر هز راسه : لا علميني الحين قاعد على اعصابي
وريف من وراها عند الباب الداخلي مع خواتها يراقبون رفعت صوتها : ياليلى جاوبيه لا تلعبين بأعصابه
جابر رفع حاجب : حتى اختك رحمتني وانتي لا
ليلى لفت عليه واهي تبتسم : موافقه
جابر من غير شعوره دخل لعندها واهو يحضنها ويدور فيها ..عند البنات الي كانوا مجتمعين وتفرقعوا اول ماشافوا المنظر ..
سُلاف الي شهقت بقوه : عـمـى
وريف غطت عيونها : لا لا
جودي : خير خير ليش كذا يقرب منها
وجود مبتسمه واهي تناظرهم : يازينهم
وريف ضربتها : قلة حياء للحين ماصارت حلاله
وجود لفت عليها : بتصير بتصير لا تعقدين الأمور
سُلاف ضحكت : بنات شوفوا ليلى تترنح شكلها بتدوخ
دخلت عليهم ليلى و وجها اصفر وتكلمت بهدوء : شفتوا؟
وريف بعصبيه : اي شفنا قلة حياكم ماتستحون!
جودي : اول مره يسوي كذا ولا؟
وجود بستنكار : خير اكيد اول مره وش ذا الحكي
ليلى توجهت للكرسي من دون اي كلمة ويدها على قلبها : بسم الله
سُلاف مستغربه : وش فيك؟
ليلى : بغيت ادوخ من الحيا عنده
وريف توجهت للمطبخ تشرب مويا : ببل ريقي نشفتوه ياخواتي نشفتوه
وجود : مالي دخل انا عاقله
سُلاف : حتى انا
وريف : و فالح؟
سُلاف تصرف : ما اعرفه
وريف : ايه واضح
-
ببيت ابو زايد ..العصر
ابو زايد جالس و واضح عليه الزعل ..
ام زايد : وش بلاك؟
ابو زايد : والله ودي ابعد عن الديره شوي
ام زايد : وين؟
ابو زايد لثامر : جب التليفون
ثامر قام وجابه له ..اخذ التليفون..
ابو زايد : هلا يا نياف
نياف : سم ياعمي
ابو زايد : ابوك بالبيت؟
نياف : اي هذا اهو قبالي تبيه؟
ابو زايد : عطني اياه
نياف مد التليفون لأبوه..نياف : عمي يافع
ابو نايف : السلام عليكم
ابو زايد : وعليكم السلام ..ها للحين صامل على الروحه؟
ابو نايف : ان قلت تم يلا مشينا
ابو زايد : هالمره عاد بمزرعتك ، مزرعتي يحوسون ويدوسون فيها العمال
ابو نايف : متى؟
ابو زايد : بكره ؟
ابو نايف : تم اجل من الصباح نمشي
ابو زايد : على بركة الله
ثامر فز : يبه بنروح للمزرعه؟
ابو زايد : ايه ..ميساء ازهمي على جميلة شوفي اذا بتجي اهي وعيالها و حليمه
ام زايد : حليمه بشهر عسلها وش يجيبها من لندن لمزرعتنا
ثامر ضحك ..ابو زايد ناظره بطرف عين : تضحك انت وجهك
ثامر يكتم ضحكته : معليش يابوي بس امي صادقه
ابو زايد وقف : المهم تجهزوا وعلم اخوانك ترا بكره الصبح بنمشي
ثامر : ابشر
-
عند ام فرح الي كانت ببيت ابو نايف ..
ام فرح : عاد انا وفرح بسرعه نخلص
فرح : يمه عادي ناخذ بنات سليمان معنا؟
ام فرح : اسألي صاحب المزرعه انا وش دخلني
قامت فرح بسرعه لخالها ..ودخلت الملحق الي كانوا جالسين فيه العيال وخالها ..
فرح جلست جنبه واهي تبتسم ..ابو نايف ناظرها مستغرب : وش عندك؟
فرح لازالت مبتسمه : بطلبك طلب وقل تم
ابو نايف : قولي
فرح : عادي اقول لبنات سليمان يجون؟
ابو نايف تنهد : بكيفك
جابر فز : اي قولي لهم
ابو نايف : انت متى بتعقل؟
جابر رجع يتسند واهو يناظر نياف الي يبتسم على فشلته من فرح ..
فرح باسته : شكرًا يا احلى خال
ابو نايف يبعدها : خلاص روحي يلا
طلعت فرح واهي مستانسه ودخلت بالمطبخ عند وضحى ..
وضحى فزت : بسم الله تنحنحي
فرح واهي مستانسه : توقعي شي
وضحى : وشو؟
فرح : تو كلمت خالي وقالي عادي نادي البنات
وضحى بفرحه : امانه
فرح : اي والله
وضحى : اجل بخلي امي تكلمهم
فرح : احسن بعد عشان العزيمه تجي من اصحاب المكان
وضحى : يارب يوافقون
فرح : ان شاء الله
-
عند البنات ..
وريف منسدحه و ترسم على تراب الأرضيه : بنروح بس مو معهم اول يوم
جودي : ليه؟
وريف : بكلم ام نايف برد لها رد ليلى ولا ناسيه؟
جودي تذكرت : اي صح
وجود : عادي علميها اذا رحنا هناك
ليلى : لا لا احسن خلها تعلمها بالتليفون احس بستحي هناك اذا فتحوا الموضوع
وريف : اي عشانك يعني قلت نروح لهم اليوم الثاني بعد ردنا
جودي بفرحه : بشوف نياف
وريف : بنت!
جودي : ياخي خليني استانس وش وراي
وريف تأففت : استغفر الله بس
وجود : المهم بنات ترا بخلي فرح تعلمني على الخيل وبدعس ثامر فيه
ليلى ضحكت بخفه : وانتي للحين حاقده عليه
وجود : ماشفتيه يوم جاء عند الباب يتمصخر علي البزر
وريف : ماتعرفين ثامر كذا عبيط يحب يستهبل
وجود : ادري بس بردها له
سُلاف : ماقالوا كم بيقعدون؟
وريف : مدري بس خذوا ملابس تدفي
ليلى وقفت : بروح اجهز اجل
جودي ابتسمت : ايه متحمسه لعريس الغفله اجل
ليلى مشت بغرور : مالك دخل
وريف ناظرتها : يعني ما كأن عيونك زايغه على اخوه
جودي : خليني اتمقل بالحبيب
سُلاف ضيقت عيونها : سبحان الله تتذكرين حركاتي مع فالح الي تنقدين عليها؟ صرتي اتسوينها
جودي : دام هذا شعور فما الومك
وجود : اقول قوموا بس ندخل المطبخ نسوي شي جوعانه
وريف قامت : يلا حتى انا
توجهوا للمطبخ واهو ينادون ليلى تجي معهم عشان يكملون سوالف ..
-
بعد صلاة الفجر و الشمس اشرقت على الديرة ..ببيت ابو زايد
زايد شال اخر شنطة ونفض يده : يمه الله يهديك الي يشوفنا بنهاجر
ام زايد : اقول حمل وانت ساكت ، وين اخوك؟
ثامر جاي يركض واهو ماسك شماغه : لبيه
ام زايد : رح لعمتك وجبهم للمزرعه
ثامر : ابشري
مسكته من ثوبه : ارجع البس شي دافي
ثامر خبط جبهته بخفه : ناسي الجاكيت
زايد : ياخي انت مطيور شوي شوي محد لاحقك
ثامر : مالك دخل
صقر جاي وشايل الصندوق على كتفه..ام زايد شهقت : جرحك يا صقر نزله!!!
صقر : وين يا يمه لي شهرين الحين قد طاب
ام زايد : ولو نزله لا عاد تشيل شي ثقيل
زايد مستغرب : وش ذا الصندوق؟
ام زايد : تقضيت من البقاله وحطيتها فيه
زايد : ايه والحركات الحلوه بتصير عندكم وانتوا بس تعطونا بهالتمور
ام زايد ابتسمت : بنعطيكم بنعطيكم
ابو زايد طلع واهو يسمي بالله : يلا ياعيال مشينا
صقر ناظر لزايد : عطني المفتاح بسوق انا
زايد رماه عليه : خففت علي
ببيت ابو نايف ..
نياف الي ساحب وضحى من اذونها وتنادي على جابر يساعدها : وخر اوجعتنيي
نياف لازال يسحبها : امشي معي
وضحى بألم والعبره بحلقها : يـمه ، يـبه
نياف : بزر انتي بزر
وضحى رجفته ببطنه : قلت لك وخر
نياف انحنى من الألم وتكلم بنبرة متوجعه : آه الله لا يوفقك
ركضت وضحى للمحلق عند ابوها وجلست جنبه ..ابو نايف الي كان يسمع الأخبار من المسجل قصر الصوت ولف عليها : وراك تراكضين؟
وضحى واهي تاخذ نفس من ركضها وخوفها : اشتقت لك
ابو نايف يأشر عليها : والله وراك بلا بنتي واعرفك
وضحى ابتسمت : وين بلا معه الله يهديك
دخل نياف ويده على بطنه وتكلم بهدوء : امشي
وضحى هزت براسها بـ لا
نياف بنظرات تخوف: امشي وش فيك خايفه؟
وضحى ناظرت ابوها الي يناظرهم مستغرب ..ابو نايف : مسويه له شي؟
وضحى وخرت شعرها ورا اذنها : شوف يبه حمرا ساحبني من اذني وعيا يفكني
ابو نايف ناظره : صاحي انت شايفها عنز تسحبها من اذنها!
وضحى همست : ابوي مالقيت الا ذا التشبيه تشبهني فيه
نياف : ماقصرت بنتك دخلت رجلها ببطني
ابو نايف : انك تستاهل ويلا ناد لي جابر وامك خلنا نمشي
نياف أشر لوضحى بـ اوريك
وضحى مدت لسانها تعانده
وراح متوجهه لأمه وجابر عشان يمشون للمزرعه ..
-
عند حليمه ونايف الي يتجهزون ويلمون اغراضهم للرجعه ، هذا اخر يوم لهم بلندن ..
حليمه لبست شنطتها : يلا
نايف وقف واهو يحط كوب القهوة على الطاولة : يلا مشينا
طلعوا لبرا ، و حليمه بالنسبه لها الجو للآن ماهو صافي بينها وبينه بس بتمشي الموضوع ..
بعد ماوصلوا للمول ..
نايف : من بقى ما اخذنا له؟
حليمه : ثامر و وضحى
نايف : والله وضحى مدري وش اجيب لها محتار
حليمه سحبته معها : تعال نشوف هالمحل
بعد مادارت بالمول ساعتين ..
نايف مسك راسها : صدعتي براسي
حليمه ابتسمت : يلا خلصت
نايف : يلا مشينا ناكل لنا شي
حليمه : يلا
جلسوا وعلى طول جاهم النادل وحليمه كانت مشغوله بالأكياس ترتبهم حولها ونايف بقى يناظرها لثواني بيشوف بتكلم النادل ولا بتسمع كلامه ..
النادل واقف ويناظرهم ينتظر الطلب ..
حليمه رفعت راسها ولاحظت نظراته واستغربت : وشو؟
نايف : وش تبين تاكلين؟
حليمه ماكان لها نفس ابد : عادي اي شي
نايف : لازم تختارين
حليمه بملل : نايف تكفى اطلب الي تبيه
نايف ناظر للنادل واعطاه الي يبغاه ..
نايف مستغرب : انتي علامك؟
حليمه : تعبت من المشي
نايف : اني داري اخر هالتمتيره تعب
حليمه ابتسمت بخفه : عاد وش نسوي ماعاد فيه وقت بكره رجعتنا
نايف تنهد : على خير ان شاء الله
حليمه : تدري انهم مجتمعين بمزرعة عمي؟
نايف هز راسه : ايه امي معلمتني
حليمه : اذا وصلنا نروح لهم؟
نايف : لا خلينا نريح ونرتب امورنا ونشوف وقتها
حليمه : طيب
-
عند البنات ..
وريف واهي مبتسمه : مع السلامة
لفت على خواتها بعد ماسكرت المكالمة وضحكت : خير وش ذا النظرات؟
ليلى بتوتر : وش قالت؟
وريف لازالت مبتسمه : يعني وش بتقول اكيد فرحت
وجود زفرت : الحمدلله
ليلى : احس ما ابي اروح للمزرعه
جودي : بتروحين ماعلي منك خير
ليلى : مدري مستحيه
وريف تربعت : اقول اقربوا اقولكم وش قالت
سُلاف : وش قالت؟
وريف ناظرت لليلى : قالت دام كذا بكره نكتب الكتاب بس خلي ليلى تقول تم
ليلى شهقت : يمه بدري
وجود : ليلى عاد بلا مصاخه الرجال من متى يبيك وانتي تردينه خلاص اكتبوا الكتاب وتملكوا
ليلى : بقولكم شي
سُلاف : هالنبره تخوفني
جودي: وش مهببه؟
ليلى : ما ابي نسوي عرس وزحمه
وريف شهقت : خير يا طير ليش ماتبين عرس!
ليلى : تكفون بنات تعرفوني ما احب ذا الأجواء
سُلاف : اهو الي قايل لك صح؟
ليلى بسرعه : لا والله ، اساسًا ما يدري
وريف : والله بكيفك
وجود : واذا رفض؟
ليلى : اذا رفص ويبغى عرس كبير عاد الشكوى لله هذا المكتوب
جودي : انا مستغربه يعني وحده ماتبي يكون لها عرس كيف ماتجي هذي!
ليلى : احتفالية صغيره بينا ما ابي الديره كلهم يتواجدون
سُلاف : دام كذا تمام بس انكم تكتبون الكتاب ويجي ياخذك على طول كأننا نبي الفكه منك لا
ليلى : لا ياخي قصدي يعني جمعه بينا بس محد غريب
وريف : اجل بعد ما تملكون تفاهمي معه
ليلى تنهدت : يارب يوافق
البنات : يارب
-
بالمزرعة على اذان العصر ..بالمطبخ
وضحى تركض واهي تضحك وتنادي امها : يمه شوفيه
ام نايف بملل : اعنبوكم اعقلوا كانكم رجيتوا راسي
نياف الي يحاول يمسكها : تحسبيني نسيت الضربه
وضحى : انت الي بديت تحمل
ام نايف صرخت : خلاص اعقلوا
نياف بتهديد : اوريك
وضحى ببتسامة مايله : بتجي جودي بكره وتفزع لي
نياف يحاول يمسك ابتسامته : اقول تقلعي
ام نايف : روحي نادي فرح ، وانت انقلع عن قسمنا
نياف وقف واهو ياخذ لقمه : ابشري
طلع وانتظرته وضحى يروح وطلعت على طول بس خابت ظنونها مسكها بقوه : قلت لك بمسكك
وضحى بألم : فكني
نياف : اعتذري
وضحى بعناد : والله ما اعتذر
نياف : اعتذ..
انكبت عليه مويا بارده فك وضحى واهو يسمح وجه ..سمع ضحك فرح واهي تمسك يد وضحى وتركض فيها..
وضحى من عند الباب : تحسب ماوراي فزعات
نياف بعصبيه : الله يقلعكم كانكم رشحتوني بذا البرد
ام نايف بهدوء : رح رح غير ملابسك ولا عاد اشوفك هنا فقعت راسي انت واختك
نياف : انا اوريها فريح مسويه فزعه
ام نايف مسكت راسها وصارخت :خلاص فكنا من شرك
نياف : طيب طيب
عند فرح و وضحى..
وضحى : ياويلك والله ما يخليك هذا مثل البعير لا حقد ما يفكك
فرح : وش اسوي خذتني الفزعه والنخوه
وضحى : اقول امي تبينا كيف نروح لها اخاف يكون مترصد لنا
فرح : بخلي امي تروح تشوف اول
وضحى دفتها : يلا ناديها